← Back
The Comprehensive Aramaic Lexicon
← Return to the Text Browser
click on the file description for more information
62043: P Jn

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


11:01 [ai]ܐܺܝܬܼ ܗ̱ܘܳܐ ܕܶܝܢ ܚܰܕܼ ܕܰܟܼܪܺܝܗ܂ ܠܳܥܳܙܰܪ ܡܶܢ ܒܶܝܬܼ ܥܰܢܝܳܐ ܩܪܺܝܬܼܳܐ ܐܰܚܽܘܗ ܕܡܰܪܝܰܡ ܘܰܕܼܡܳܪܬܳܐ܀
11:02 [ai]ܡܰܪܝܰܡ ܕܶܝܢ ܗܳܕܼܶܐ ܐܺܝܬܼܶܝܗ܂ ܗܳܝ ܕܡܶܫܚܰܬܼ ܒܒܼܶܣܡܳܐ ܪ̈ܶܓܼܠܰܘܗ̱ܝ ܕܝܶܫܽܘܥ܂ ܘܫܰܘܝܰܬܼ ܒܣܰܥܪܳܗ܂ ܐܰܚܽܘܗ ܗ̱ܘܳܐ ܕܗܳܕܼܶܐ ܠܳܥܳܙܰܪ ܕܰܟܼܪܺܝܗ ܗ̱ܘܳܐ܀
11:03 [ai]ܘܫܰܕܿܰܪ̈ܶܝܢ ܬܿܰܪ̈ܬܿܰܝܗܶܝܢ ܐܰܚܘܳܬܼܶܗ̈ ܠܘܳܬܼ ܝܶܫܽܘܥ܂ ܘܳܐܡܪ̈ܳܢ܂ ܡܳܪܰܢ܂ ܗܳܐ ܗܰܘ ܕܪܳܚܶܡ ܐܰܢ̱ܬܿ ܟܪܺܝܗ܂
11:04 [ai]ܝܶܫܽܘܥ ܕܶܝܢ ܐܶܡܰܪ܂ ܗܳܢܳܐ ܟܽܘܪܗܳܢܳܐ ܠܳܐ ܗܘܳܐ ܕܡܰܘܬܳܐ܂ ܐܶܠܳܐ ܚܠܳܦܼ ܬܿܶܫܒܿܽܘܚܬܳܐ ܕܰܐܠܳܗܳܐ܂ ܕܢܶܫܬܿܰܒܿܰܚ ܒܪܶܗ ܕܰܐܠܳܗܳܐ ܡܶܛܽܠܳܬܼܶܗ܂
11:05 [ai]ܡܰܚܶܒܼ ܗ̱ܘܳܐ ܕܶܝܢ ܗܽܘ ܝܶܫܽܘܥ ܠܡܳܪܬܳܐ ܘܰܠܡܰܪܝܰܡ ܘܰܠܠܳܥܳܙܰܪ܂
11:06 [ai]ܘܟܼܰܕܼ ܫܡܰܥ ܕܰܟܼܪܺܝܗ܃ ܟܰܬܿܰܪ ܒܕܽܘܟܿܬܼܳܐ ܕܺܐܝܬܼܰܘܗ̱ܝ ܗ̱ܘܳܐ܂ ܬܿܪ̈ܶܝܢ ܝܰܘܡܺܝܢ̈܂
11:07 [ai]ܘܒܼܳܬܼܰܪܟܿܶܢ ܐܶܡܰܪ ܠܬܼܰܠܡܺܝܕܼܰܘܗ̱ܝ̈܂ ܬܰܘ ܢܺܐܙܰܠ ܬܽܘܒܼ ܠܺܝܗܽܘܕܼ܂
11:08 [ai]ܐܳܡܪܺܝܢ ܠܶܗ ܬܰܠܡܺܝܕܼܰܘܗ̱ܝ̈܂ ܪܰܒܰܢ܃ ܗܳܫܳܐ ܺܝܗܽܘܕܼܳܝܶܐ̈ ܒܿܳܥܶܝܢ ܗ̱ܘܰܘ ܠܡܶܪܓܿܡܳܟܼ܂ ܘܬܼܽܘܒܼ܃ ܐܳܙܶܠ ܐܰܢ̱ܬܿ ܠܬܼܰܡܳܢ܃
11:09 [ai]ܐܳܡܰܪ ܠܗܽܘܢ ܝܶܫܽܘܥ܂ ܠܳܐ ܬܿܰܪ̈ܬܿܰܥܶܣܪܶܐ ܫܳܥܺܝܢ̈ ܐܺܝܬܼ ܒܝܰܘܡܳܐ܃ ܘܶܐܢ ܐ̱ܢܳܫ ܡܗܰܠܶܟܼ ܒܺܐܝܡܳܡܳܐ܂ ܠܳܐ ܡܶܬܿܬܿܩܶܠ܂ ܡܶܛܽܠ ܕܚܳܙܶܐ ܢܽܘܗܪܶܗ ܕܥܳܠܡܳܐ ܗܳܢܳܐ܂
11:10 [ai]ܐܶܢ ܐ̱ܢܳܫ ܕܶܝܢ ܒܠܺܠܝܳܐ ܢܗܰܠܶܟܼ܂ ܡܶܬܿܬܿܩܶܠ܂ ܡܶܛܽܠ ܕܢܰܗܺܝܪܳܐ ܠܰܝܬܿ ܒܶܗ܂
11:11 [ai]ܗܳܠܶܝܢ ܐܶܡܰܪ ܝܶܫܽܘܥ܂ ܘܒܼܳܬܼܰܪܟܿܶܢ ܐܶܡܰܪ ܠܗܽܘܢ܂ ܠܳܥܳܙܰܪ ܪܳܚܡܰܢ ܫܟܼܶܒܼ܂ ܐܶܠܳܐ ܐܳܙܶܠ ܐ̱ܢܳܐ܂ ܕܰܐܥܺܝܪܺܝܘܗ̱ܝ܂
11:12 [ai]ܐܳܡܪܺܝܢ ܠܶܗ ܬܰܠܡܺܝܕܼܰܘܗ̱ܝ̈܂ ܡܳܪܰܢ܃ ܐܶܢ ܕܡܶܟܼ܂ ܡܶܬܼܚܠܶܡ܂
11:13 [ai]ܗܽܘ ܕܶܝܢ ܝܶܫܽܘܥ ܐܶܡܰܪ ܥܰܠ ܡܰܘܬܿܶܗ܃ ܘܗܶܢܽܘܢ ܣܒܼܰܪܘ܂ ܕܥܰܠ ܡܰܕܼܡܟܼܳܐ ܗܽܘ ܕܫܶܢܬܼܳܐ ܐܶܡܰܪ܂
11:14 [ai]ܗܳܝܕܶܝܢ ܐܶܡܰܪ ܠܗܽܘܢ ܝܶܫܽܘܥ܂ ܦܫܺܝܩܳܐܺܝܬܼ܂ ܠܳܥܳܙܰܪ ܡܺܝܬܼ ܠܶܗ܂
11:15 [ai]ܘܚܳܕܼܶܐ ܐ̱ܢܳܐ ܕܠܳܐ ܗܘܺܝܬܼ ܬܰܡܳܢ܃ ܡܶܛܽܠܳܬܼܟܼܽܘܢ܂ ܕܰܬܼܗܰܝܡܢܽܘܢ܂ ܐܶܠܳܐ ܗܰܠܶܟܼܘ ܠܬܼܰܡܳܢ܂
11:16 [ai]ܐܳܡܰܪ ܬܳܐܘܡܰܐ܂ ܕܡܶܬܼܶܐܡܰܪ ܬܳܐܡܳܐ܂ ܠܬܼܰܠܡܺܝܕܼܶܐ̈ ܚܰܒܼܪ̈ܰܘܗ̱ܝ܂ ܢܺܐܙܰܠ ܐܳܦܼ ܚܢܰܢ ܢܡܽܘܬܼ ܥܰܡܶܗ܂
11:17 [ai]ܘܶܐܬܼܳܐ ܝܶܫܽܘܥ ܠܒܼܶܝܬܼ ܥܰܢܝܳܐ܂ ܘܶܐܫܟܿܰܚ ܕܿܰܐܪ̈ܒܥܳܐ ܠܶܗ ܝܰܘܡܺܝܢ̈ ܕܺܐܝܬܼܰܘܗ̱ܝ ܒܒܼܶܝܬܼ ܩܒܼܽܘܪܳܐ܂
11:18 [ai]ܐܺܝܬܼܶܝܗ ܗ̱ܘܳܬܼ ܕܶܝܢ ܒܶܝܬܼ ܥܰܢܝܳܐ܂ ܥܰܠ ܓܶܢ̱ܒܼ ܐܽܘܪܺܫܠܶܡ܂ ܟܰܕܼ ܦܰܪܺܝܩܳܐ ܡܶܢܳܗ ܐܰܝܟܼ ܐܶܣܛܕܼܰܘܳܬܼܳܐ̈ ܚܰܡܶܫܬܿܰܥܣܰܪ܂
11:19 [ai]ܘܣܰܓܿܺܝܶܐܐ̈ ܡܶܢ ܺܝܗܽܘܕܼܳܝܶܐ̈ ܐܰܬܿܺܝܐܺܝܢ ܗ̱ܘܰܘ ܠܘܳܬܼ ܡܳܪܬܳܐ ܘܡܰܪܝܰܡ܃ ܕܢܶܡܠܽܘܢ ܒܿܠܶܒܗܶܝܢ ܡܶܛܽܠ ܐܰܚܽܘܗܶܝܢ܂
11:20 [ai]ܡܳܪܬܳܐ ܕܶܝܢ ܟܰܕܼ ܫܶܡܥܰܬܼ ܕܝܶܫܽܘܥ ܐܶܬܼܳܐ܂ ܢܶܦܼܩܰܬܼ ܠܽܐܘܪܥܶܗ܂ ܡܰܪܝܰܡ ܕܶܝܢ ܒܒܼܰܝܬܳܐ ܝܳܬܼܒܿܳܐ ܗ̱ܘܳܬܼ܂
11:21 [ai]ܘܶܐܡܪܰܬܼ ܡܳܪܬܳܐ ܠܝܶܫܽܘܥ܂ ܡܳܪܝ܃ ܐܶܠܽܘ ܬܢܳܢ ܗ̱ܘܰܝܬܿ܂ ܠܳܐ ܡܳܐܶܬܼ ܗ̱ܘܳܐ ܐܳܚܝ܂
11:22 [ai]ܐܶܠܳܐ ܐܳܦܼ ܗܳܫܳܐ ܝܳܕܼܥܳܐ ܐ̱ܢܳܐ܂ ܕܰܟܼܡܳܐ ܕܬܶܫܰܐܠ ܠܰܐܠܳܗܳܐ܂ ܝܳܗܶܒܼ ܠܳܟܼ܂
11:23 [ai]ܐܳܡܰܪ ܠܳܗ ܝܶܫܽܘܥ܂ ܩܳܐܶܡ ܐܰܚܽܘܟܼܝ܂
11:24 [ai]ܐܳܡܪܳܐ ܠܶܗ ܡܳܪܬܳܐ܂ ܝܳܕܼܥܳܐܢܳܐ ܕܩܳܐܶܡ ܒܢܽܘܚܳܡܳܐ ܒܝܰܘܡܳܐ ܐ̱ܚܪܳܝܳܐ܂
11:25 [ai]ܐܳܡܰܪ ܠܳܗ ܝܶܫܽܘܥ܂ ܐܶܢܳܐ ܐ̱ܢܳܐ ܢܽܘܚܳܡܳܐ܂ ܘܚܰܝ̈ܶܐ܂ ܡܰܢ ܕܰܡܗܰܝܡܶܢ ܒܺܝ܂ ܐܳܦܼܶܢ ܢܡܽܘܬܼ ܢܺܚܶܐ܃
11:26 [ai]ܘܟܼܽܠ ܕܚܰܝ ܘܰܡܗܰܝܡܶܢ ܒܺܝ܂ ܠܥܳܠܰܡ܂ ܠܳܐ ܢܡܽܘܬܼ܂ ܡܗܰܝܡܢܰܬܿܝ ܗܳܕܼܶܐ܃
11:27 [ai]ܐܳܡܪܳܐ ܠܶܗ܂ ܐܺܝܢ ܡܳܪܝ܃ ܐܶܢܳܐ ܡܗܰܝܡܢܳܐ ܐ̱ܢܳܐ܃ ܕܰܐܢ̱ܬܿ ܗ̱ܽܘ ܡܫܺܝܚܳܐ ܒܪܶܗ ܕܰܐܠܳܗܳܐ ܕܳܐܬܼܶܐ ܠܥܳܠܡܳܐ܀
11:28 [ai]ܘܟܼܰܕܼ ܐܶܡܪܰܬܼ ܗܳܠܶܝܢ܃ ܐܶܙܰܠ̱ܬܼ ܩܪܳܬܼ ܠܡܰܪܝܰܡ ܚܳܬܼܳܗ ܟܰܣܝܳܐܺܝܬܼ܂ ܘܳܐܡܪܳܐ ܠܳܗ܂ ܪܰܒܰܢ ܐܶܬܼܳܐ܂ ܘܩܳܪܶܐ ܠܶܟܼܝ܂
11:29 [ai]ܘܡܰܪܝܰܡ ܟܰܕܼ ܫܶܡܥܰܬܼ܃ ܩܳܡܰܬܼ ܥܓܼܰܠ܂ ܘܳܐܬܼܝܳܐ ܗ̱ܘܳܬܼ ܠܘܳܬܼܶܗ܂
11:30 [ai]ܗܽܘ ܕܶܝܢ ܝܶܫܽܘܥ܂ ܠܳܐ ܥܕܼܰܟܿܺܝܠ ܐܶܬܼܳܐ ܗ̱ܘܳܐ ܠܰܩܪܺܝܬܼܳܐ܂ ܐܶܠܳܐ ܒܿܳܗ ܗ̱ܘܳܐ ܒܗܳܝ ܕܽܘܟܿܬܼܳܐ ܕܶܐܪܰܥܬܼܶܗ ܡܳܪܬܳܐ܂
11:31 [ai]ܐܳܦܼ ܗܳܢܽܘܢ ܕܶܝܢ ܺܝܗܽܘܕܼܳܝܶܐ̈܂ ܕܺܐܝܬܼ ܗ̱ܘܰܘ ܥܰܡܳܗ ܒܒܼܰܝܬܳܐ ܕܰܡܒܼܰܝܐܺܝܢ ܗ̱ܘܰܘ ܠܳܗ܃ ܕܰܚܙܰܘ ܠܡܰܪܝܰܡ ܕܰܥܓܼܰܠ ܩܳܡܰܬܼ ܢܶܦܼܩܰܬܼ܃ ܐܶܙܰܠܘ ܠܗܽܘܢ ܒܳܬܼܪܳܗ܂ ܣܒܼܰܪܘ ܓܶܝܪ ܕܰܠܩܰܒܼܪܳܐ ܐܳܙܳܠ̱ܐ ܠܡܶܒܼܟܿܳܐ܂
11:32 [ai]ܗܺܝ ܕܶܝܢ ܡܰܪܝܰܡ ܟܰܕܼ ܐܶܬܼܳܬܼ ܐܰܝܟܿܳܐ ܕܺܐܝܬܼܰܘܗ̱ܝ ܗ̱ܘܳܐ ܝܶܫܽܘܥ܂ ܘܰܚܙܳܬܼܶܗ܃ ܢܶܦܼܠܰܬܼ ܥܰܠ ܪ̈ܶܓܼܠܰܘܗ̱ܝ܂ ܘܳܐܡܪܳܐ ܠܶܗ܂ ܐܶܠܽܘ ܬܢܳܢ ܗ̱ܘܰܝܬܿ ܡܳܪܝ܂ ܠܳܐ ܡܳܐܶܬܼ ܗ̱ܘܳܐ ܐܳܚܝ܂
11:33 [ai]ܝܶܫܽܘܥ ܕܶܝܢ ܟܰܕܼ ܚܙܳܗ ܕܒܳܟܼܝܳܐ܃ ܘܠܺܝܗܽܘܕܼܳܝܶܐ̈ ܗܳܢܽܘܢ ܕܶܐܬܼܰܘ ܥܰܡܳܗ ܕܒܳܟܼܶܝܢ܃ ܐܶܬܼܥܰܙܰܙ ܒܪܽܘܚܶܗ܂ ܘܰܐܙܺܝܥ ܢܰܦܼܫܶܗ܂
11:34 [ai]ܘܶܐܡܰܪ܂ ܐܰܝܟܿܳܐ ܣܳܡܬܿܽܘܢܳܝܗ̱ܝ܂ ܘܳܐܡܪܺܝܢ ܠܶܗ܂ ܡܳܪܰܢ ܬܳܐ ܚܙܺܝ܂
11:35 [ai]ܘܳܐܬܼܝܳܢ̈ ܗ̱ܘܰܝ̈ ܕܶܡܥܰܘܗ̱ܝ̈ ܕܝܶܫܽܘܥ܂
11:36 [ai]ܘܳܐܡܪܺܝܢ ܗ̱ܘܰܘ ܺܝܗܽܘܕܼܳܝܶܐ̈܂ ܚܙܰܘ ܟܡܳܐ ܪܳܚܶܡ ܗ̱ܘܳܐ ܠܶܗ܂
11:37 [ai]ܐ̱ܢܳܫܺܝܢ̈ ܕܶܝܢ ܡܶܢܗܽܘܢ ܐܶܡܰܪܘ܂ ܠܳܐ ܡܶܫܟܿܰܚ ܗ̱ܘܳܐ ܗܳܢܳܐ ܕܦܰܬܿܰܚ ܥܰܝܢܰܘܗ̱ܝ̈ ܕܗܰܘ ܣܰܡܝܳܐ܃ ܢܶܥܒܿܶܕܼ܃ ܕܳܐܦܼ ܗܳܢܳܐ ܠܳܐ ܢܡܽܘܬܼ܃
11:38 [ai]ܝܶܫܽܘܥ ܕܶܝܢ ܟܰܕܼ ܡܶܬܼܥܰܙܰܙ ܒܰܝܢܰܘܗ̱ܝ̈ ܘܠܶܗ܂ ܐܶܬܼܳܐ ܠܒܼܶܝܬܼ ܩܒܼܽܘܪܳܐ܂ ܘܗܽܘ ܒܶܝܬܼ ܩܒܼܽܘܪܳܐ ܐܺܝܬܼܰܘܗ̱ܝ ܗ̱ܘܳܐ ܡܥܰܪܬܼܳܐ܂ ܘܟܼܺܐܦܼܳܐ ܣܺܝܡܳܐ ܗ̱ܘܳܬܼ ܥܰܠ ܬܰܪܥܶܗ ܿ܀ܿ܀ܿ
11:39 [ai]ܘܶܐܡܰܪ ܝܶܫܽܘܥ܂ ܫܩܽܘܠܘ ܟܺܐܦܼܳܐ ܗܳܕܼܶܐ܂ ܐܳܡܪܳܐ ܠܶܗ ܡܳܪܬܳܐ ܚܳܬܼܶܗ ܕܗܰܘ ܡܺܝܬܼܳܐ܂ ܡܳܪܝ܂ ܡܶܢ ܟܰܕܿܽܘ ܣܪܺܝ ܠܶܗ܂ ܐܰܪܒܥܳܐ ܠܶܗ ܓܶܝܪ ܝܰܘܡܺܝܢ̈܂
11:40 [ai]ܐܳܡܰܪ ܠܳܗ ܝܶܫܽܘܥ܂ ܠܳܐ ܐܶܡܪܶܬܼ ܠܶܟܼܝ܃ ܕܶܐܢ ܬܗܰܝܡܢܺܝܢ ܬܶܚܙܶܝܢ ܫܽܘܒܼܚܶܗ ܕܰܐܠܳܗܳܐ܃
11:41 [ai]ܘܰܫܩܰܠܘ ܟܺܐܦܼܳܐ ܗܳܝ܂ ܘܗܽܘ ܝܶܫܽܘܥ ܐܰܪܺܝܡ ܥܰܝܢܰܘܗ̱ܝ̈ ܠܥܶܠ܂ ܘܶܐܡܰܪ܂ ܐܰܒܼܳܐ܂ ܡܰܘܕܿܶܐ ܐ̱ܢܳܐ ܠܳܟܼ ܕܰܫܡܰܥܬܿܳܢܝ܂
11:42 [ai]ܘܶܐܢܳܐ ܝܳܕܼܰܥ ܐ̱ܢܳܐ܂ ܕܰܒܼܟܼܽܠܙܒܼܰܢ ܫܳܡܰܥ ܐܰܢ̱ܬܿ ܠܺܝ܂ ܐܶܠܳܐ ܡܶܛܽܠ ܟܶܢܫܳܐ ܗܳܢܳܐ ܕܩܳܐܶܡ ܐܳܡܰܪ ܐ̱ܢܳܐ ܗܳܠܶܝܢ܃ ܕܰܢܗܰܝܡܢܽܘܢ܂ ܕܰܐܢ̱ܬܿ ܫܰܕܿܰܪܬܿܳܢܝ܂
11:43 [ai]ܘܟܼܰܕܼ ܐܶܡܰܪ ܗܳܠܶܝܢ܃ ܩܥܳܐ ܒܩܳܠܳܐ ܪܳܡܳܐ܂ ܠܳܥܳܙܰܪ ܬܳܐ ܠܒܼܰܪ܂
11:44 [ai]ܘܰܢܦܼܰܩ ܗܰܘ ܡܺܝܬܼܳܐ܃ ܟܰܕܼ ܐܰܣܺܝܪ̈ܳܢ ܐܺܝܕܼܰܘܗ̱ܝ̈ ܘܪ̈ܶܓܼܠܰܘܗ̱ܝ ܒܦܶܣܩܝܳܬܼܳܐ̈܂ ܘܰܐܦܿܰܘܗ̱ܝ̈ ܐܰܣܺܝܪ̈ܳܢ ܒܣܽܘܕܼܳܪܳܐ܂ ܐܳܡܰܪ ܠܗܽܘܢ ܝܶܫܽܘܥ܂ ܫܪܰܐܘܽܗ̱ܝ ܘܰܫܒܼܽܘܩܘ ܐܳܙܶܠ܂
11:45 [ai]ܘܣܰܓܿܺܝܶܐܐ̈ ܡܶܢ ܺܝܗܽܘܕܼܳܝܶܐ̈܂ ܕܶܐܬܼܰܘ ܠܘܳܬܼ ܡܰܪܝܰܡ܃ ܟܰܕܼ ܚܙܰܘ ܡܶܕܶܡ ܕܰܥܒܼܰܕܼ ܝܶܫܽܘܥ܂ ܗܰܝܡܶܢܘ ܒܶܗ܂
11:46 [ai]ܘܐ̱ܢܳܫܺܝܢ̈ ܡܶܢܗܽܘܢ ܐܶܙܰܠܘ ܠܘܳܬܼ ܦܿܪ̈ܺܝܫܶܐ܃ ܘܶܐܡܰܪܘ ܠܗܽܘܢ ܡܶܕܶܡ ܕܰܥܒܼܰܕܼ ܝܶܫܽܘܥ܀܀
11:47 [ai]ܘܶܐܬܼܟܿܰܢܰܫܘ ܪ̈ܰܒܰܝ ܟܳܗܢܶܐ̈ ܘܰܦܼܪ̈ܺܝܫܶܐ ܘܳܐܡܪܺܝܢ ܗ̱ܘܰܘ܃ ܡܳܢܳܐ ܢܶܥܒܿܶܕܼ܂ ܕܗܳܢܳܐ ܓܰܒܼܪܳܐ ܐܳܬܼܘܳܬܼܳܐ̈ ܣܰܓܿܺܝܳܐܬܼܳܐ̈ ܥܳܒܼܶܕܼ܂
11:48 [ai]ܘܶܐܢ ܫܳܒܼܩܺܝܢ ܚ̱ܢܰܢ ܠܶܗ ܗܳܟܼܰܢܳܐ܃ ܟܽܠܗܽܘܢ ܐ̱ܢܳܫܳܐ̈ ܡܗܰܝܡܢܺܝܢ ܒܶܗ܂ ܘܳܐܬܼܶܝܢ ܪ̈ܽܗ̱ܘܡܳܝܶܐ܂ ܫܳܩܠܺܝܢ ܐܰܬܼܪܰܢ ܘܥܰܡܰܢ܂
11:49 [ai]ܚܰܕܼ ܕܶܝܢ ܡܶܢܗܽܘܢ ܕܰܫܡܶܗ ܩܰܝܳܦܼܳܐ܃ ܪ̈ܰܒܿ ܟܿܳܗܢܶܐ ܗ̱ܘܳܐ ܕܗܳܝ ܫܰܢ̱ܬܳܐ܂ ܘܶܐܡܰܪ ܠܗܽܘܢ܂ ܐܰܢ̱ܬܿܽܘܢ ܠܳܐ ܝܳܕܼܥܺܝܢ ܐܢ̱ܬܿܽܘܢ ܡܶܕܶܡ܂
11:50 [ai]ܘܠܳܐ ܡܶܬܼܚܰܫܒܼܺܝܢ ܐܢ̱ܬܿܽܘܢ ܕܦܰܩܳܚ ܠܰܢ ܕܚܰܕܼ ܓܰܒܼܪܳܐ ܢܡܽܘܬܼ ܚܠܳܦܼ ܥܰܡܳܐ܃ ܘܠܳܐ ܟܽܠܶܗ ܥܰܡܳܐ ܢܺܐܒܼܰܕܼ܀
11:51 [ai]ܗܳܕܼܶܐ ܕܶܝܢ ܡܶܢ ܨܒܼܽܘܬܼ ܢܰܦܼܫܶܗ ܠܳܐ ܐܶܡܰܪ܂ ܐܶܠܳܐ ܡܶܛܽܠ ܕܿܪ̈ܰܒܿ ܟܿܳܗܢܶܐ ܗ̱ܘܳܐ ܕܗܳܝ ܫܰܢ̱ܬܳܐ܃ ܐܶܬܼܢܰܒܺܝ܂ ܕܰܥܬܼܺܝܕܼ ܗ̱ܘܳܐ ܝܶܫܽܘܥ ܕܰܢܡܽܘܬܼ ܚܠܳܦܼ ܥܰܡܳܐ܂
11:52 [ai]ܘܠܳܐ ܒܰܠܚܽܘܕܼ ܚܠܳܦܼ ܥܰܡܳܐ܃ ܐܶܠܳܐ ܕܳܐܦܼ ܒܢܰܝܳܐ ܕܰܐܠܳܗܳܐ ܕܰܡܒܼܰܕܿܪܺܝܢ܂ ܢܟܼܰܢܶܫ ܠܰܚܕܼܳܐ܀
11:53 [ai]ܘܡܶܢ ܗܰܘ ܝܰܘܡܳܐ܂ ܐܶܬܼܚܰܫܰܒܼܘ ܗ̱ܘܰܘ ܕܢܶܩܛܠܽܘܢܳܝܗ̱ܝ܂
11:54 [ai]ܗܽܘ ܕܶܝܢ ܝܶܫܽܘܥ ܠܳܐ ܡܗܰܠܶܟܼ ܗ̱ܘܳܐ ܓܰܠܝܳܐܺܝܬܼ ܒܶܝܬܼ ܺܝܗܽܘܕܼܳܝܶܐ̈܂ ܐܶܠܳܐ ܐܶܙܰܠ ܠܶܗ ܡܶܢ ܬܰܡܳܢ ܠܰܐܬܼܪܳܐ ܕܩܰܪܺܝܒܼ ܠܚܽܘܪܒܿܳܐ܂ ܠܟܼܰܪܟܼܳܐ ܕܡܶܬܼܩܪܶܐ ܐܰܦܼܪܶܝܡ܂ ܘܬܼܰܡܳܢ ܡܶܬܼܗܰܦܿܰܟܼ ܗ̱ܘܳܐ ܥܰܡ ܬܰܠܡܺܝܕܼܰܘܗ̱ܝ̈܀
11:55 [ai]ܩܰܪܺܝܒܼ ܗ̱ܘܳܐ ܕܶܝܢ ܦܶܨܚܳܐ ܕܺܝܗܽܘܕܼܳܝܶܐ̈܂ ܘܰܣܠܶܩܘ ܣܰܓܿܺܝܶܐܐ̈ ܡܶܢ ܩܽܘܪ̈ܝܳܐ ܠܽܐܘܪܺܫܠܶܡ܃ ܩܕܼܳܡ ܥܰܕܼܥܺܕܼܳܐ܂ ܕܰܢܕܼܰܟܿܽܘܢ ܢܰܦܼܫܗܽܘܢ܂
11:56 [ai]ܘܒܼܳܥܶܝܢ ܗ̱ܘܰܘ ܠܶܗ ܠܝܶܫܽܘܥ܂ ܘܳܐܡܪܺܝܢ ܗ̱ܘܰܘ ܚܰܕܼ ܠܚܰܕܼ ܒܗܰܝܟܠܳܐ܂ ܡܳܢܳܐ ܣܳܒܼܪܺܝܢ ܐܢ̱ܬܿܽܘܢ܂ ܕܠܳܐ ܐܳܬܼܶܐ ܠܥܰܕܼܥܺܕܼܳܐ܃
11:57 [ai]ܪ̈ܰܒܰܝ ܟܳܗܢܶܐ̈ ܕܶܝܢ ܘܰܦܼܪ̈ܺܝܫܶܐ ܦܩܰܕܼܘ ܗ̱ܘܰܘ܃ ܕܶܐܢ ܐ̱ܢܳܫ ܢܶܕܿܰܥ ܐܰܝܟܿܰܘ܂ ܢܒܼܰܕܿܶܩ ܠܗܽܘܢ܂ ܐܰܝܟܼ ܕܢܶܐܚܕܿܽܘܢܳܝܗ̱ܝ܀܀

next chapter