← Back
The Comprehensive Aramaic Lexicon
← Return to the Text Browser
click on the file description for more information
62043: P Jn

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


12:01 [ai]ܝܶܫܽܘܥ ܕܶܝܢ ܩܕܼܳܡ ܫܬܳܐ ܝܰܘܡܺܝܢ̈ ܕܦܶܨܚܳܐ܃ ܐܶܬܼܳܐ ܠܒܼܶܝܬܼ ܥܰܢܝܳܐ܂ ܐܰܝܟܿܳܐ ܕܺܐܝܬܼܰܘܗ̱ܝ ܗ̱ܘܳܐ ܠܳܥܳܙܰܪ܃ ܗܰܘ ܕܰܐܩܺܝܡ ܡܶܢ ܒܶܝܬܼ ܡܺܝܬܼܶܐ̈ ܗܽܘ ܝܶܫܽܘܥ܀
12:02 [ai]ܘܰܥܒܼܰܕܼܘ ܠܶܗ ܬܰܡܳܢ ܚܫܳܡܺܝܬܼܳܐ܂ ܘܡܳܪܬܳܐ ܡܫܰܡܫܳܐ ܗ̱ܘܳܬܼ܂ ܘܠܳܥܳܙܰܪ ܚܰܕܼ ܡܶܢ ܣܡܺܝܟܼܶܐ̈ ܗ̱ܘܳܐ ܕܥܰܡܶܗ܂
12:03 [ai]ܡܰܪܝܰܡ ܕܶܝܢ܂ ܫܶܩܠܰܬܼ ܫܳܛܺܝܦܼܬܳܐ ܕܒܶܣܡܳܐ ܕܢܰܪܕܺܝܢ ܪܺܫܳܝܳܐ ܣܰܓܿܺܝ ܕܡܰܝܳܐ̈܃ ܘܡܶܫܚܰܬܼ ܪ̈ܶܓܼܠܰܘܗ̱ܝ ܕܝܶܫܽܘܥ܂ ܘܫܰܘܝܰܬܼ ܒܣܰܥܪܳܗ ܪ̈ܶܓܼܠܰܘܗ̱ܝ܂ ܘܶܐܬܼܡܠܺܝ ܒܰܝܬܳܐ ܡܶܢ ܪܺܝܚܶܗ ܕܒܶܣܡܳܐ܀
12:04 [ai]ܘܶܐܡܰܪ ܺܝܗܽܘܕܼܳܐ ܣܟܼܰܪܝܽܘܛܳܐ ܚܰܕܼ ܡܶܢ ܬܰܠܡܺܝܕܼܰܘܗ̱ܝ̈܃ ܗܰܘ ܕܰܥܬܼܺܝܕܼ ܗ̱ܘܳܐ ܕܢܰܫܠܡܺܝܘܗ̱ܝ܂
12:05 [ai]ܠܡܳܢܳܐ ܠܳܐ ܐܶܙܕܿܰܒܰܢ ܡܶܫܚܳܐ ܗܳܢܳܐ ܒܰܬܼܠܳܬܼ ܡܳܐܐ ܕܺܝܢܳܪ̈ܺܝܢ܂ ܘܶܐܬܼܺܝܗܶܒܼ ܠܡܶܣܟܿܺܢܶܐ̈܂
12:06 [ai]ܗܳܕܼܶܐ ܕܶܝܢ ܐܶܡܰܪ܃ ܠܳܐ ܗ̱ܘܳܐ ܡܶܛܽܠ ܕܥܰܠ ܡܶܣܟܿܺܢܶܐ̈ ܒܛܺܝܠ ܗ̱ܘܳܐ ܠܶܗ܂ ܐܶܠܳܐ ܡܶܛܽܠ ܕܓܰܢܳܒܼܳܐ ܗ̱ܘܳܐ܂ ܘܰܓܼܠܽܘܣܩܡܳܐ܂ ܠܘܳܬܼܶܗ ܗ̱ܘܳܐ܂ ܘܡܶܕܶܡ ܕܢܳܦܼܶܠ ܗ̱ܘܳܐ ܒܶܗ܂ ܗܽܘ ܛܥܺܝܢ ܗ̱ܘܳܐ܀
12:07 [ai]ܐܶܡܰܪ ܕܶܝܢ ܝܶܫܽܘܥ܂ ܫܒܼܽܘܩܶܝܗ܂ ܠܝܰܘܡܳܐ ܕܰܩܒܼܽܘܪܝ ܢܛܰܪܬܼܶܗ܂
12:08 [ai]ܒܟܽܠܙܒܼܰܢ ܓܶܝܪ ܡܶܣܟܿܺܢܶܐ̈ ܐܺܝܬܼ ܠܟܼܽܘܢ ܥܰܡܟܼܽܘܢ܃ ܠܺܝ ܕܶܝܢ ܠܳܐ ܒܟܽܠܙܒܼܰܢ ܐܺܝܬܼ ܠܟܼܽܘܢ܀
12:09 [ai]ܘܰܫܡܰܥܘ ܟܶܢܫܶܐ̈ ܣܰܓܿܺܝܶܐܐ̈ ܡܶܢ ܺܝܗܽܘܕܼܳܝܶܐ̈܂ ܕܬܰܡܳܢ ܗ̱ܽܘ ܝܶܫܽܘܥ܂ ܘܶܐܬܼܰܘ܂ ܠܳܐ ܡܶܛܽܠ ܝܶܫܽܘܥ ܒܰܠܚܽܘܕܼ܃ ܐܶܠܳܐ ܐܳܦܼ ܕܢܶܚܙܽܘܢ ܠܠܳܥܳܙܰܪ܃ ܗܰܘ ܕܰܐܩܺܝܡ ܡܶܢ ܒܶܝܬܼ ܡܺܝܬܼܶܐ̈܂
12:10 [ai]ܘܶܐܬܼܪܰܥܺܝܘ ܗ̱ܘܰܘ ܪ̈ܰܒܰܝ ܟܳܗܢܶܐ̈܂ ܕܳܐܦܼ ܠܠܳܥܳܙܰܪ ܢܶܩܛܠܽܘܢܳܝܗ̱ܝ܂
12:11 [ai]ܡܶܛܽܠ ܕܣܰܓܿܺܝܶܐܐ̈ ܡܶܢ ܺܝܗܽܘܕܼܳܝܶܐ̈ ܡܶܛܽܠܳܬܼܶܗ ܐܳܙܺܠ̱ܝܢ ܗ̱ܘܰܘ܂ ܘܰܡܗܰܝܡܢܺܝܢ ܒܝܶܫܽܘܥ܀܀
12:12 [ai]ܘܰܠܝܰܘܡܳܐ ܐ̱ܚܪܺܢܳܐ܃ ܟܶܢܫܳܐ ܣܰܓܿܺܝܳܐܐ ܐܰܝܢܳܐ ܕܳܐܬܼܶܐ ܗ̱ܘܳܐ ܠܥܰܕܼܥܺܕܼܳܐ܃ ܟܰܕܼ ܫܡܰܥܘ ܕܝܶܫܽܘܥ ܐܳܬܼܶܐ ܠܽܐܘܪܺܫܠܶܡ܃
12:13 [ai]ܫܩܰܠܘ ܣܰܘܟܿܶܐ̈ ܕܕܼܶܩܠܶܐ̈܂ ܘܰܢܦܼܰܩܘ ܠܽܐܘܪܥܶܗ܂ ܘܩܳܥܶܝܢ ܗ̱ܘܰܘ ܘܳܐܡܪܺܝܢ܂ ܐܽܘܫܰܥܢܳܐ܂ ܒܪܺܝܟܼ ܗ̱ܽܘ ܕܳܐܬܼܶܐ ܒܰܫܡܶܗ ܕܡܳܪܝܳܐ܂ ܡܰܠܟܿܳܐ ܕܺܐܝܣܪܳܝܶܠ܀
12:14 [ai]ܐܶܫܟܿܰܚ ܕܶܝܢ ܝܶܫܽܘܥ ܚܡܳܪܳܐ܂ ܘܺܝܬܼܶܒܼ ܥܠܰܘܗ̱ܝ܂ ܐܰܝܟܿܰܢܳܐ ܕܰܟܼܬܼܺܝܒܼ܂
12:15 [ai]ܠܳܐ ܬܶܕܼܚܠܺܝܢ ܒܰܪ̱ܬܼ ܨܶܗܝܽܘܢ܃ ܗܳܐ ܡܰܠܟܿܶܟܼܝ ܐܳܬܼܶܐ ܠܶܟܼܝ܂ ܘܰܪܟܼܺܝܒܼ ܥܰܠ ܥܺܝܠܳܐ ܒܰܪ ܐܰܬܼܳܢܳܐ܀
12:16 [ai]ܗܳܠܶܝܢ ܕܶܝܢ ܠܳܐ ܺܝܕܼܰܥܘ ܬܰܠܡܺܝܕܼܰܘܗ̱ܝ̈ ܒܗܰܘ ܙܰܒܼܢܳܐ܂ ܐܶܠܳܐ ܟܰܕܼ ܐܶܫܬܿܰܒܿܰܚ ܝܶܫܽܘܥ܃ ܐܶܬܿܕܿܟܼܰܪܘ ܬܰܠܡܺܝܕܼܰܘܗ̱ܝ̈ ܕܗܳܠܶܝܢ ܟܬܼܺܝܒܼܳܢ̈ ܗ̱ܘܰܝ̈ ܥܠܰܘܗ̱ܝ܃ ܘܗܳܠܶܝܢ ܥܒܼܰܕܼܘ ܠܶܗ܂
12:17 [ai]ܘܣܳܗܶܕܼ ܗ̱ܘܳܐ ܟܶܢܫܳܐ ܗܰܘ ܕܥܰܡܶܗ ܗ̱ܘܳܐ܂ ܕܰܩܪܳܐ ܠܠܳܥܳܙܰܪ ܡܶܢ ܩܰܒܼܪܳܐ܃ ܘܰܐܩܺܝܡܶܗ ܡܶܢ ܒܶܝܬܼ ܡܺܝܬܼܶܐ̈܂
12:18 [ai]ܘܡܶܛܽܠ ܗܳܕܼܶܐ ܢܦܼܰܩܘ ܠܩܽܘܒܼܠܶܗ ܟܶܢܫܶܐ̈ ܣܰܓܿܺܝܶܐܐ̈܃ ܕܰܫܡܰܥܘ ܕܳܐܬܼܳܐ ܗܳܕܼܶܐ ܥܒܼܰܕܼ܂
12:19 [ai]ܦܿܪ̈ܺܝܫܶܐ ܕܶܝܢ ܐܳܡܪܺܝܢ ܗ̱ܘܰܘ ܚܰܕܼ ܠܚܰܕܼ܂ ܚܳܙܶܝܢ ܐܢ̱ܬܿܽܘܢ ܕܠܳܐ ܡܰܘܬܿܪܺܝܢ ܐܢ̱ܬܿܽܘܢ ܡܶܕܶܡ܃ ܕܗܳܐ ܥܳܠܡܳܐ ܟܽܠܶܗ ܐܶܙܰܠ ܠܶܗ ܒܳܬܼܪܶܗ܀܀
12:20 [ai]ܐܺܝܬܼ ܗ̱ܘܰܘ ܕܶܝܢ ܐܳܦܼ ܡܶܢ ܥܰܡ̱ܡܶܐ̈ ܐ̱ܢܳܫܳܐ̈ ܒܗܽܘܢ ܕܰܣܠܶܩܘ ܠܡܶܣܓܿܰܕܼ ܒܥܰܕܼܥܺܕܼܳܐ܂
12:21 [ai]ܗܳܠܶܝܢ ܐܶܬܼܰܘ ܩܪܶܒܼܘ ܠܘܳܬܼ ܦܼܺܝܠܺܝܦܿܳܘܣ܃ ܗܰܘ ܕܡܶܢ ܒܶܝܬܼ ܨܰܝܳܕܼܳܐ ܕܰܓܼܠܺܝܠܳܐ܃ ܘܫܰܐܠܽܘܗ̱ܝ܂ ܘܳܐܡܪܺܝܢ ܠܶܗ܂ ܡܳܪܝ܂ ܨܳܒܼܶܝܢ ܚ̱ܢܰܢ ܢܶܚܙܶܐ ܠܝܶܫܽܘܥ܂
12:22 [ai]ܘܶܐܬܼܳܐ ܗܽܘ ܦܼܺܝܠܺܝܦܿܳܘܣ܂ ܘܶܐܡܰܪ ܠܰܐܢܕܿܪܶܐܘܳܣ܂ ܘܰܐܢܕܿܪܶܐܘܳܣ ܘܦܼܺܝܠܺܝܦܿܳܘܣ ܐܶܡܰܪܘ ܠܝܶܫܽܘܥ ܿ܀ܿ܀ܿ
12:23 [ai]ܝܶܫܽܘܥ ܕܶܝܢ ܥܢܳܐ܂ ܘܶܐܡܰܪ ܠܗܽܘܢ܂ ܐܶܬܼܳܬܼ ܫܳܥܬܼܳܐ ܕܢܶܫܬܿܰܒܿܰܚ ܒܪܶܗ ܕܐ̱ܢܳܫܳܐ܀
12:24 [ai]ܐܰܡܺܝܢ ܐܰܡܺܝܢ܂ ܐܳܡܰܪ ܐ̱ܢܳܐ ܠܟܼܽܘܢ܂ ܕܰܦܼܪܶܕܿܬܳܐ ܕܚܶܛܬܼܳܐ܃ ܐܶܠܳܐ ܢܳܦܼܠܳܐ ܘܡܳܝܬܳܐ ܒܰܐܪܥܳܐ܃ ܒܰܠܚܽܘܕܼܶܝܗ ܦܳܝܫܳܐ܂ ܐܶܢ ܕܶܝܢ ܡܳܝܬܳܐ܃ ܦܿܺܐܪ̈ܶܐ ܣܰܓܿܺܝܶܐܐ̈ ܡܰܝܬܿܝܳܐ܀
12:25 [ai]ܡܰܢ ܕܪܳܚܶܡ ܢܰܦܼܫܶܗ܂ ܢܰܘܒܿܕܼܺܝܗ܂ ܘܡܰܢ ܕܣܳܢܶܐ ܢܰܦܼܫܶܗ ܒܥܳܠܡܳܐ ܗܳܢܳܐ܃ ܢܶܛܪܺܝܗ ܠܚܰܝ̈ܶܐ ܕܰܠܥܳܠܰܡ܂
12:26 [ai]ܐܶܢ ܠܺܝ ܐ̱ܢܳܫ ܡܫܰܡܶܫ܂ ܢܺܐܬܼܶܐ ܒܳܬܼܰܪܝ܂ ܘܰܐܝܟܿܳܐ ܕܶܐܢܳܐ ܐܺܝܬܼܰܝ܃ ܬܰܡܳܢ ܢܶܗܘܶܐ ܐܳܦܼ ܡܫܰܡܫܳܢܝ܂ ܡܰܢ ܕܠܺܝ ܡܫܰܡܶܫ܂ ܢܝܰܩܪܺܝܘܗ̱ܝ ܐܰܒܼܳܐ܀
12:27 [ai]ܗܳܫܳܐ ܢܰܦܼܫܝ܂ ܗܳܐ ܫܓܼܺܝܫܳܐ܂ ܘܡܳܢܳܐ ܐܺܡܰܪ܂ ܐܳܒܼܝ ܦܰܨܳܢܝ ܡܶܢ ܗܳܕܼܶܐ ܫܳܥܬܼܳܐ܃ ܐܶܠܳܐ ܡܶܛܽܠ ܗܳܢܳܐ ܐܶܬܼܺܝܬܼ ܠܗܳܕܼܶܐ ܫܳܥܬܼܳܐ܂
12:28 [ai]ܐܰܒܼܳܐ܂ ܫܰܒܿܰܚ ܫܡܳܟܼ܀ ܘܩܳܠܳܐ ܐܶܫܬܿܡܰܥ ܡܶܢ ܫܡܰܝܳܐ܂ ܫܰܒܿܚܶܬܼ܂ ܘܬܼܽܘܒܼ ܡܫܰܒܿܰܚ ܐ̱ܢܳܐ܂
12:29 [ai]ܘܟܼܶܢܫܳܐ ܕܩܳܐܶܡ ܗ̱ܘܳܐ ܫܡܰܥܘ܃ ܘܳܐܡܪܺܝܢ܂ ܪܰܥܡܳܐ ܗܘܳܐ܂ ܐ̱ܚܪ̈ܳܢܶܐ ܕܶܝܢ ܐܳܡܪܺܝܢ܂ ܡܰܠܰܐܟܼܳܐ ܡܰܠܶܠ ܥܰܡܶܗ܂
12:30 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܗܽܘܢ܂ ܠܳܐ ܗ̱ܘܳܐ ܡܶܛܽܠܳܬܼܝ ܗܘܳܐ ܩܳܠܳܐ ܗܳܢܳܐ܂ ܐܶܠܳܐ ܡܶܛܽܠܳܬܼܟܼܽܘܢ܂
12:31 [ai]ܗܳܫܳܐ ܕܺܝܢܶܗ ܗ̱ܽܘ ܕܥܳܠܡܳܐ ܗܳܢܳܐ܂ ܗܳܫܳܐ ܐܰܪܟܼܽܘܢܳܐ ܕܥܳܠܡܳܐ ܗܳܢܳܐ ܡܶܫܬܿܕܼܶܐ ܠܒܼܰܪ܂
12:32 [ai]ܘܶܐܢܳܐ ܡܳܐ ܕܶܐܬܿܬܿܪܺܝܡܶܬܼ ܡܶܢ ܐܰܪܥܳܐ܃ ܐܶܓܿܶܕܼ ܟܽܠܢܳܫ ܠܘܳܬܼܝ܂
12:33 [ai]ܗܳܕܼܶܐ ܕܶܝܢ ܐܶܡܰܪ܂ ܕܰܢܚܰܘܶܐ ܒܰܐܝܢܳܐ ܡܰܘܬܳܐ ܡܳܐܶܬܼ܂
12:34 [ai]ܐܳܡܪܺܝܢ ܠܶܗ ܟܶܢܫܶܐ̈܂ ܚܢܰܢ ܫܡܰܥܢ ܡܶܢ ܢܳܡܽܘܣܳܐ܃ ܕܰܡܫܺܝܚܳܐ ܠܥܳܠܰܡ ܡܩܰܘܶܐ܂ ܐܰܝܟܿܰܢܳܐ ܐܳܡܰܪ ܐܰܢ̱ܬܿ ܕܰܥܬܼܺܝܕܼ ܗ̱ܽܘ ܕܢܶܬܿܬܿܪܺܝܡ ܒܪܶܗ ܕܐ̱ܢܳܫܳܐ܂ ܡܰܢܽܘ ܗܳܢܳܐ ܒܪܶܗ ܕܐ̱ܢܳܫܳܐ܂
12:35 [ai]ܐܳܡܰܪ ܠܗܽܘܢ ܝܶܫܽܘܥ܂ ܩܰܠܺܝܠ ܐ̱ܚܪܺܝܢ ܙܰܒܼܢܳܐ ܢܽܘܗܪܳܐ ܥܰܡܟܼܽܘܢ ܗ̱ܽܘ܂ ܗܰܠܶܟܼܘ ܥܰܕܼ ܐܺܝܬܼ ܠܟܼܽܘܢ ܢܽܘܗܪܳܐ܃ ܕܠܳܐ ܚܶܫܽܘܟܼܳܐ ܢܰܕܼܪܶܟܼܟܼܽܘܢ܂ ܘܡܰܢ ܕܰܡܗܰܠܶܟܼ ܒܚܶܫܽܘܟܼܳܐ܂ ܠܳܐ ܝܳܕܼܰܥ ܠܰܐܝܟܿܳܐ ܐܳܙܶܠ܂
12:36 [ai]ܥܰܕܼ ܐܺܝܬܼ ܠܟܼܽܘܢ ܢܽܘܗܪܳܐ܃ ܗܰܝܡܶܢܘ ܒܢܽܘܗܪܳܐ܂ ܕܿܰܒܼܢܰܘܗ̱ܝ ܕܢܽܘܗܪܳܐ ܬܶܗܘܽܘܢ܂ ܗܳܠܶܝܢ ܡܰܠܶܠ ܝܶܫܽܘܥ܃ ܘܶܐܙܰܠ܂ ܐܶܬܿܛܰܫܺܝ ܡܶܢܗܽܘܢ܀
12:37 [ai]ܘܟܼܰܕܼ ܗܳܠܶܝܢ ܟܽܠܗܶܝܢ ܐܳܬܼܘܳܬܼܳܐ̈ ܥܒܼܰܕܼ ܩܕܼܳܡܰܝܗܽܘܢ܂ ܠܳܐ ܗܰܝܡܶܢܘ ܒܶܗ܂
12:38 [ai]ܕܬܶܬܼܡܰܠܶܐ ܡܶܠܬܼܳܐ ܕܶܐܫܰܥܝܳܐ ܢܒܼܺܝܳܐ ܕܶܐܡܰܪ܂ ܡܳܪܝ܂ ܡܰܢܽܘ ܗܰܝܡܶܢ ܠܫܶܡܥܰܢ܃ ܘܰܕܼܪܳܥܶܗ ܕܡܳܪܝܳܐ ܠܡܰܢ ܐܶܬܼܓܿܠܺܝ܂
12:39 [ai]ܡܶܛܽܠ ܗܳܢܳܐ ܠܳܐ ܡܶܫܟܿܚܺܝܢ ܗ̱ܘܰܘ ܕܰܢܗܰܝܡܢܽܘܢ܂ ܡܶܛܽܠ ܕܬܽܘܒܼ ܐܶܡܰܪ ܐܶܫܰܥܝܳܐ܂
12:40 [ai]ܕܥܰܘܰܪܘ ܥܰܝܢܰܝܗܽܘܢ̈ ܘܰܐܚܫܶܟܼܘ ܠܶܒܗܽܘܢ܂ ܕܠܳܐ ܢܶܚܙܽܘܢ ܒܥܰܝܢܰܝܗܽܘܢ̈ ܘܢܶܣܬܿܰܟܠܽܘܢ ܒܿܠܶܒܗܽܘܢ܃ ܘܢܶܬܼܦܿܢܽܘܢ ܘܰܐܣܶܐ ܐܶܢܽܘܢ܂
12:41 [ai]ܗܳܠܶܝܢ ܐܶܡܰܪ ܐܶܫܰܥܝܳܐ܃ ܟܰܕܼ ܚܙܳܐ ܫܽܘܒܼܚܶܗ܂ ܘܡܰܠܶܠ ܥܠܰܘܗ̱ܝ܀
12:42 [ai]ܐܳܦܼ ܡܶܢ ܪ̈ܺܫܶܐ ܕܶܝܢ ܣܰܓܿܺܝܶܐܐ̈ ܗܰܝܡܶܢܘ ܒܶܗ܂ ܐܶܠܳܐ ܡܶܛܽܠ ܦܿܪ̈ܺܝܫܶܐ܂ ܠܳܐ ܡܰܘܕܶܝܢ ܗ̱ܘܰܘ܂ ܕܠܳܐ ܢܶܗܘܽܘܢ ܠܒܼܰܪ ܡܶܢ ܟܢܽܘܫܬܳܐ܂
12:43 [ai]ܪܚܶܡܘ ܓܶܝܪ ܫܽܘܒܼܚܳܐ ܕܿܰܒܼܢܰܝܢܳܫܳܐ ܝܰܬܿܺܝܪ ܡܶܢ ܫܽܘܒܼܚܶܗ ܕܰܐܠܳܗܳܐ܀
12:44 [ai]ܝܶܫܽܘܥ ܕܶܝܢ ܩܥܳܐ܂ ܘܶܐܡܰܪ܂ ܡܰܢ ܕܰܡܗܰܝܡܶܢ ܒܺܝ܂ ܠܳܐ ܗ̱ܘܳܐ ܒܺܝ ܡܗܰܝܡܶܢ܂ ܐܶܠܳܐ ܒܡܰܢ ܕܫܰܕܿܪܰܢܝ܂
12:45 [ai]ܘܡܰܢ ܕܠܺܝ ܚܳܙܶܐ܂ ܚܙܳܐ ܠܡܰܢ ܕܫܰܕܿܪܰܢܝ܂
12:46 [ai]ܐܶܢܳܐ ܢܽܘܗܪܳܐ ܐܶܬܼܺܝܬܼ ܠܥܳܠܡܳܐ܂ ܕܟܽܠ ܡܰܢ ܕܰܡܗܰܝܡܶܢ ܒܺܝ܂ ܠܳܐ ܢܩܰܘܶܐ ܒܚܶܫܽܘܟܼܳܐ܂
12:47 [ai]ܘܡܰܢ ܕܫܳܡܰܥ ܡܶܠܰܝ̈܂ ܘܠܳܐ ܢܳܛܰܪ ܠܗܶܝܢ܃ ܐܶܢܳܐ ܠܳܐ ܕܳܐܶܢ ܐ̱ܢܳܐ ܠܶܗ܂ ܠܳܐ ܓܶܝܪ ܐܶܬܼܺܝܬܼ ܕܶܐܕܿܽܘܢ ܠܥܳܠܡܳܐ܂ ܐܶܠܳܐ ܕܰܐܚܶܐ ܠܥܳܠܡܳܐ܂
12:48 [ai]ܡܰܢ ܕܛܳܠܶܡ ܠܺܝ܂ ܘܠܳܐ ܡܩܰܒܿܶܠ ܡܶܠܰܝ̈܃ ܐܺܝܬܼ ܡܰܢ ܕܕܼܳܐܶܢ ܠܶܗ܂ ܡܶܠܬܼܳܐ ܕܡܰܠܠܶܬܼ܂ ܗܺܝ ܕܳܝܢܳܐ ܠܶܗ ܒܝܰܘܡܳܐ ܐ̱ܚܪܳܝܳܐ܂
12:49 [ai]ܕܶܐܢܳܐ ܡܶܢ ܢܰܦܼܫܝ ܠܳܐ ܡܰܠܠܶܬܼ܂ ܐܶܠܳܐ ܐܰܒܼܳܐ ܕܫܰܕܿܪܰܢܝ܃ ܗܽܘ ܝܰܗ̱ܒܼ ܠܺܝ ܦܽܘܩܕܳܢܳܐ܂ ܡܳܢܳܐ ܐܺܡܰܪ܂ ܘܡܳܢܳܐ ܐܶܡܰܠܶܠ܂
12:50 [ai]ܘܝܳܕܼܰܥ ܐ̱ܢܳܐ ܕܦܽܘܩܕܳܢܶܗ ܚܰܝ̈ܶܐ ܐܶܢܽܘܢ ܕܰܠܥܳܠܰܡ܂ ܐܰܝܠܶܝܢ ܗܳܟܼܺܝܠ ܕܰܡܡܰܠܶܠ ܐ̱ܢܳܐ܃ ܐܰܝܟܿܰܢܳܐ ܕܶܐܡܰܪ ܠܺܝ ܐܳܒܼܝ܂ ܗܳܟܼܰܢܳܐ ܡܡܰܠܶܠ ܐ̱ܢܳܐ܀

next chapter