← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62043: P Jn

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


13:01 [ai]ܩܕܼܳܡ ܕܶܝܢ ܥܺܐܕܼܳܐ ܕܦܶܨܚܳܐ܃ ܝܳܕܼܰܥ ܗ̱ܘܳܐ ܝܶܫܽܘܥ ܕܰܡܛܳܬܼ ܫܳܥܬܼܳܐ܃ ܕܰܢܫܰܢܶܐ ܡܶܢ ܗܳܢܳܐ ܥܳܠܡܳܐ ܠܘܳܬܼ ܐܰܒܼܽܘܗ̱ܝ܂ ܘܰܐܚܶܒܼ ܠܕܼܺܝܠܶܗ ܕܰܒܼܗܳܢܳܐ ܥܳܠܡܳܐ܂ ܘܰܥܕܼܰܡܳܐ ܠܚܰܪܬܼܳܐ܂ ܐܰܚܶܒܼ ܐܶܢܽܘܢ܀
13:02 [ai]ܘܟܼܰܕܼ ܗܘܳܬܼ ܚܫܳܡܺܝܬܼܳܐ܃ ܪܡܶܐ ܗ̱ܘܳܐ ܠܶܗ ܠܣܳܛܳܢܳܐ ܒܿܠܶܒܶܗ ܕܺܝܗܽܘܕܼܳܐ܂ ܒܰܪ ܫܶܡܥܽܘܢ ܣܟܼܰܪܝܽܘܛܳܐ܂ ܕܢܰܫܠܡܺܝܘܗ̱ܝ܀
13:03 [ai]ܗܽܘ ܕܶܝܢ ܝܶܫܽܘܥ܃ ܡܶܛܽܠ ܕܝܳܕܼܰܥ ܗ̱ܘܳܐ ܕܟܽܠ ܡܶܕܶܡ ܝܰܗ̱ܒܼ ܐܰܒܼܳܐ ܒܺܐܝܕܼܰܘܗ̱ܝ̈܃ ܘܰܕܼܡܶܢ ܐܰܠܳܗܳܐ ܢܦܼܰܩ ܘܰܠܘܳܬܼ ܐܰܠܳܗܳܐ ܐܳܙܶܠ܃
13:04 [ai]ܩܳܡ ܡܶܢ ܚܫܳܡܺܝܬܼܳܐ܂ ܘܣܳܡ ܢܰܚܬܰܘܗ̱ܝ̈܂ ܘܰܫܩܰܠ ܣܶܕܿܽܘܢܳܐ܂ ܡܚܳܐ ܒܚܰܨܰܘܗ̱ܝ̈܂
13:05 [ai]ܘܰܐܪܡܺܝ ܡܰܝܳܐ̈ ܒܰܡܫܳܓܼܬܳܐ܃ ܘܫܰܪܺܝ ܠܰܡܫܳܓܼܽܘ ܪ̈ܶܓܼܠܶܐ ܕܬܰܠܡܺܝܕܼܰܘܗ̱ܝ̈܂ ܘܰܡܫܰܘܶܐ ܗ̱ܘܳܐ ܒܣܶܕܿܽܘܢܳܐ ܕܰܡܚܶܐ ܒܚܰܨܰܘܗ̱ܝ̈܂
13:06 [ai]ܟܰܕܼ ܕܶܝܢ ܐܶܬܼܳܐ ܠܘܳܬܼ ܫܶܡܥܽܘܢ ܟܺܐܦܼܳܐ܃ ܐܳܡܰܪ ܠܶܗ ܫܶܡܥܽܘܢ܂ ܐܰܢ̱ܬܿ ܡܳܪܝ܃ ܪ̈ܶܓܼܠܰܝ ܡܫܺܝܓܼ ܐܰܢ̱ܬܿ ܠܺܝ܃
13:07 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܶܗ܂ ܡܶܕܶܡ ܕܥܳܒܼܶܕܼ ܐ̱ܢܳܐ ܐܰܢ̱ܬܿ ܠܳܐ ܝܳܕܼܰܥ ܐܰܢ̱ܬܿ ܗܳܫܳܐ܂ ܒܳܬܼܰܪܟܿܶܢ ܕܶܝܢ ܬܶܕܿܰܥ܂
13:08 [ai]ܐܳܡܰܪ ܠܶܗ ܫܶܡܥܽܘܢ ܟܺܐܦܼܳܐ܂ ܠܥܳܠܰܡ ܠܳܐ ܡܫܺܝܓܼ ܐܰܢ̱ܬܿ ܠܺܝ ܪ̈ܶܓܼܠܰܝ܂ ܐܳܡܰܪ ܠܶܗ ܝܶܫܽܘܥ܂ ܐܶܢ ܠܳܐ ܡܫܺܝܓܼ ܐ̱ܢܳܐ ܠܳܟܼ܃ ܠܰܝܬܿ ܠܳܟܼ ܥܰܡܝ ܡܢܳܬܼܳܐ܂
13:09 [ai]ܐܳܡܰܪ ܠܶܗ ܫܶܡܥܽܘܢ ܟܺܐܦܼܳܐ܂ ܡܳܕܼܶܝܢ ܡܳܪܝ܃ ܠܳܐ ܒܰܠܚܽܘܕܼ ܪ̈ܶܓܼܠܰܝ ܬܫܺܝܓܼ ܠܺܝ܃ ܐܶܠܳܐ ܐܳܦܼ ܐܺܝܕܼܰܝ̈ ܐܳܦܼ ܪܺܫܝ܂
13:10 [ai]ܐܳܡܰܪ ܠܶܗ ܝܶܫܽܘܥ܂ ܗܰܘ ܕܰܣܚܶܐ܃ ܠܳܐ ܣܢܺܝܩ ܐܶܠܳܐ ܪ̈ܶܓܼܠܰܘܗ̱ܝ ܒܰܠܚܽܘܕܼ ܢܫܺܝܓܼ܂ ܟܽܠܶܗ ܓܶܝܪ ܕܟܶܐ ܗ̱ܘ܂ ܐܳܦܼ ܐܰܢ̱ܬܿܽܘܢ ܟܽܠܟܼܽܘܢ ܕܟܰܝܳܐ̈ ܐܰܢ̱ܬܿܽܘܢ܂ ܐܶܠܳܐ ܠܳܐ ܟܽܠܟܼܽܘܢ܂
13:11 [ai]ܝܳܕܼܰܥ ܗ̱ܘܳܐ ܓܶܝܪ ܝܶܫܽܘܥ ܠܗܰܘ ܕܡܰܫܠܶܡ ܠܶܗ܂ ܡܶܛܽܠ ܗܳܢܳܐ ܐܶܡܰܪ܂ ܕܠܳܐ ܗ̱ܘܳܐ ܟܽܠܟܼܽܘܢ ܕܟܰܝܳܐ̈ ܐܰܢ̱ܬܿܽܘܢ܂
13:12 [ai]ܟܰܕܼ ܕܶܝܢ ܐܰܫܺܝܓܼ ܪ̈ܶܓܼܠܰܝܗܽܘܢ܃ ܫܩܰܠ ܢܰܚܬܰܘܗ̱ܝ̈܂ ܘܶܐܣܬܿܡܶܟܼ܂ ܘܶܐܡܰܪ ܠܗܽܘܢ܂ ܝܳܕܼܥܺܝܢ ܐܢ̱ܬܿܽܘܢ܃ ܡܳܢܳܐ ܥܶܒܼܕܿܶܬܼ ܠܟܼܽܘܢ܂
13:13 [ai]ܐܰܢ̱ܬܿܽܘܢ ܩܳܪܶܝܢ ܐܢ̱ܬܿܽܘܢ ܠܺܝ܂ ܪܰܒܰܢ܂ ܘܡܳܪܰܢ܂ ܘܫܰܦܿܺܝܪ ܐܳܡܪܺܝܢ ܐܢ̱ܬܿܽܘܢ܂ ܐܺܝܬܼܰܝ ܓܶܝܪ܂
13:14 [ai]ܐܶܢ ܐܶܢܳܐ ܗܳܟܼܺܝܠ ܡܳܪܟܼܽܘܢ ܘܪܰܒܟܽܘܢ܂ ܐܰܫܺܝܓܼܶܬܼ ܠܟܼܽܘܢ ܪ̈ܶܓܼܠܰܝܟܿܽܘܢ܃ ܟܡܳܐ ܐܰܢ̱ܬܿܽܘܢ ܚܰܝܳܒܼܺܝܢ̈ ܐܢ̱ܬܿܽܘܢ ܕܰܬܼܫܺܝܓܼܽܘܢ ܪ̈ܶܓܼܠܶܐ ܚܰܕܼ ܕܚܰܕܼ܂
13:15 [ai]ܗܳܢܳܐ ܓܶܝܪ ܛܽܘܦܼܣܳܐ ܝܶܗܒܿܶܬܼ ܠܟܼܽܘܢ܃ ܕܰܐܝܟܿܰܢܳܐ ܕܶܐܢܳܐ ܥܶܒܼܕܿܶܬܼ ܠܟܼܽܘܢ܂ ܐܳܦܼ ܐܰܢ̱ܬܿܽܘܢ ܬܶܥܒܿܕܼܽܘܢ ܿ܀ܿ܀ܿ
13:16 [ai]ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܠܰܝܬܿ ܥܰܒܼܕܿܳܐ ܕܪܰܒܿ ܡܶܢ ܡܳܪܶܗ܃ ܘܠܳܐ ܫܠܺܝܚܳܐ ܕܪܰܒܿ ܡܶܢ ܡܰܢ ܕܫܰܕܿܪܶܗ܂
13:17 [ai]ܐܶܢ ܗܳܠܶܝܢ ܬܶܕܿܥܽܘܢ܃ ܛܽܘܒܼܳܢܶܐ̈ ܐܰܢ̱ܬܿܽܘܢ ܐܶܢ ܬܶܥܒܿܕܼܽܘܢ ܐܶܢܶܝܢ܂
13:18 [ai]ܠܳܐ ܗ̱ܘܳܐ ܥܰܠ ܟܽܠܟܼܽܘܢ ܐܳܡܰܪ ܐ̱ܢܳܐ܂ ܝܳܕܼܰܥ ܐ̱ܢܳܐ ܓܶܝܪ ܠܰܐܝܠܶܝܢ ܕܰܓܼܒܼܺܝܬܼ܂ ܐܶܠܳܐ ܕܰܟܼܬܼܳܒܼܳܐ ܢܶܫܠܰܡ܃ ܕܗܰܘ ܕܳܐܟܼܶܠ ܥܰܡܝ ܠܰܚܡܳܐ܂ ܐܰܪܺܝܡ ܥܠܰܝ ܥܶܩܒܼܶܗ܂
13:19 [ai]ܡܶܢ ܗܳܫܳܐ ܐܳܡܰܪ ܐ̱ܢܳܐ ܠܟܼܽܘܢ܂ ܡܶܢ ܩܕܼܳܡ ܕܢܶܗܘܶܐ܂ ܕܡܳܐ ܕܰܗܘܳܐ܂ ܬܗܰܝܡܢܽܘܢ ܕܶܐܢܳܐ ܐ̱ܢܳܐ܂
13:20 [ai]ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܡܰܢ ܕܰܡܩܰܒܿܶܠ ܠܡܰܢ ܕܰܡܫܰܕܿܰܪ ܐ̱ܢܳܐ܂ ܠܺܝ ܡܩܰܒܿܶܠ܂ ܘܡܰܢ ܕܠܺܝ ܡܩܰܒܿܶܠ܂ ܡܩܰܒܿܶܠ ܠܡܰܢ ܕܫܰܕܿܪܰܢܝ܀
13:21 [ai]ܗܳܠܶܝܢ ܐܶܡܰܪ ܝܶܫܽܘܥ܃ ܘܶܐܬܼܥܰܙܰܙ ܒܪܽܘܚܶܗ ܘܰܐܣܗܶܕܼ܂ ܘܶܐܡܰܪ܂ ܐܰܡܺܝܢ ܐܰܡܺܝܢ܂ ܐܳܡܰܪ ܐ̱ܢܳܐ ܠܟܼܽܘܢ܃ ܕܚܰܕܼ ܡܶܢܟܼܽܘܢ ܢܰܫܠܡܰܢܝ܀
13:22 [ai]ܚܳܪܘ ܕܶܝܢ ܬܰܠܡܺܝܕܼܶܐ̈ ܚܰܕܼ ܒܚܰܕܼ܂ ܡܶܛܽܠ ܕܠܳܐ ܝܳܕܼܥܺܝܢ ܗ̱ܘܰܘ ܕܥܰܠ ܡܰܢܽܘ ܐܶܡܰܪ܀
13:23 [ai]ܐܺܝܬܼ ܗ̱ܘܳܐ ܕܶܝܢ ܡܶܢ ܬܰܠܡܺܝܕܼܰܘܗ̱ܝ̈܂ ܚܰܕܼ ܕܰܣܡܺܝܟܼ ܗ̱ܘܳܐ ܒܥܽܘܒܶܗ܃ ܗܰܘ ܕܪܳܚܶܡ ܗ̱ܘܳܐ ܠܶܗ ܝܶܫܽܘܥ܂
13:24 [ai]ܠܗܳܢܳܐ ܪܡܰܙ ܫܶܡܥܽܘܢ ܟܺܐܦܼܳܐ܃ ܕܰܢܫܰܐܠܺܝܘܗ̱ܝ܂ ܕܡܰܢܽܘ ܗܰܘ ܕܶܐܡܰܪ ܥܠܰܘܗ̱ܝ܂
13:25 [ai]ܘܰܢܦܼܰܠ ܗܰܘ ܬܰܠܡܺܝܕܼܳܐ ܥܰܠ ܚܰܕܼܝܶܗ ܕܝܶܫܽܘܥ܂ ܘܶܐܡܰܪ ܠܶܗ܂ ܡܳܪܝ܂ ܡܰܢܽܘ ܗܳܢܳܐ܀
13:26 [ai]ܥܢܳܐ ܝܶܫܽܘܥ܂ ܘܶܐܡܰܪ܂ ܗܰܘ ܗ̱ܽܘ ܕܨܳܒܼܰܥ ܐ̱ܢܳܐ ܠܰܚܡܳܐ ܝܳܗܶܒܼ ܐ̱ܢܳܐ ܠܶܗ܂ ܘܰܨܒܼܰܥ ܝܶܫܽܘܥ ܠܰܚܡܳܐ܃ ܘܝܰܗ̱ܒܼ ܠܺܝܗܽܘܕܼܳܐ ܒܰܪ ܫܶܡܥܽܘܢ ܣܟܼܰܪܝܽܘܛܳܐ܂
13:27 [ai]ܘܒܼܳܬܼܰܪ ܠܰܚܡܳܐ܂ ܗܳܝܕܶܝܢ ܐܶܬܼܥܰܠܰܠ ܒܶܗ ܣܳܛܳܢܳܐ܂ ܘܶܐܡܰܪ ܠܶܗ ܝܶܫܽܘܥ܂ ܡܶܕܶܡ ܕܥܳܒܼܶܕܼ ܐܰܢ̱ܬܿ܂ ܥܒܼܶܕܼ ܒܰܥܓܼܰܠ܂
13:28 [ai]ܗܳܕܼܶܐ ܕܶܝܢ ܠܳܐ ܐ̱ܢܳܫ ܺܝܕܼܰܥ܂ ܡܶܢ ܗܳܢܽܘܢ ܣܡܺܝܟܼܶܐ̈܂ ܕܥܰܠ ܡܳܢܳܐ ܐܶܡܰܪ ܠܶܗ܂
13:29 [ai]ܐ̱ܢܳܫܺܝܢ̈ ܓܶܝܪ ܣܒܼܰܪܘ܃ ܡܶܛܽܠ ܕܰܓܼܠܽܘܣܩܡܳܐ ܨܶܐܕܼܰܘܗ̱ܝ ܗܘܳܐ ܕܺܝܗܽܘܕܼܳܐ܃ ܕܡܶܦܼܩܰܕܼ ܦܩܰܕܼ ܠܶܗ ܕܢܶܙܒܿܶܢ ܡܶܕܶܡ ܕܡܶܬܼܒܿܥܶܐ ܠܥܰܕܼܥܺܕܼܳܐ܃ ܐܰܘ ܕܢܶܬܿܶܠ ܡܶܕܶܡ ܠܡܶܣܟܿܺܢܶܐ̈܂
13:30 [ai]ܗܽܘ ܕܶܝܢ ܺܝܗܽܘܕܼܳܐ ܢܣܰܒܼ ܠܰܚܡܳܐ ܒܰܪ ܫܳܥܬܼܶܗ܂ ܘܰܢܦܼܰܩ ܠܶܗ ܠܒܼܰܪ܂ ܠܺܠܝܳܐ ܗ̱ܘܳܐ ܕܶܝܢ ܟܰܕܼ ܢܦܼܰܩ܀܀
13:31 [ai]ܘܶܐܡܰܪ ܝܶܫܽܘܥ܂ ܗܳܫܳܐ ܐܶܫܬܿܰܒܿܰܚ ܒܪܶܗ ܕܐ̱ܢܳܫܳܐ܂ ܘܰܐܠܳܗܳܐ ܐܶܫܬܿܰܒܿܰܚ ܒܶܗ܂
13:32 [ai]ܘܶܐܢ ܐܰܠܳܗܳܐ ܐܶܫܬܿܰܒܿܰܚ ܒܶܗ܃ ܘܳܐܦܼ ܐܰܠܳܗܳܐ ܡܫܰܒܿܰܚ ܠܶܗ ܒܶܗ܂ ܘܡܶܚܕܼܳܐ ܡܫܰܒܿܰܚ ܠܶܗ܂
13:33 [ai]ܒܢܰܝ܃ ܩܰܠܺܝܠ ܐ̱ܚܪܺܝܢ ܥܰܡܟܼܽܘܢ ܐ̱ܢܳܐ܂ ܘܬܼܶܒܼܥܽܘܢܳܢܝ܂ ܘܰܐܝܟܿܰܢܳܐ ܕܶܐܡܪܶܬܼ ܠܺܝܗܽܘܕܼܳܝܶܐ̈܃ ܕܠܰܐܝܟܿܳܐ ܕܶܐܢܳܐ ܐܳܙܶܠ ܐ̱ܢܳܐ܃ ܐܰܢ̱ܬܿܽܘܢ܂ ܠܳܐ ܡܶܫܟܿܚܺܝܢ ܐܢ̱ܬܿܽܘܢ ܠܡܶܐܬܼܳܐ܃ ܘܳܐܦܼ ܠܟܼܽܘܢ ܐܳܡܰܪ ܐ̱ܢܳܐ ܗܳܫܳܐ܂
13:34 [ai]ܦܽܘܩܕܳܢܳܐ ܚܰܕܼ̱ܬܼܳܐ ܝܳܗܶܒܼ ܐ̱ܢܳܐ ܠܟܼܽܘܢ܂ ܕܰܗܘܰܝܬܿܽܘܢ ܡܰܚܒܼܺܝܢ ܚܰܕܼ ܠܚܰܕܼ܂ ܐܰܝܟܿܰܢܳܐ ܕܶܐܢܳܐ ܐܰܚܶܒܼܬܿܟܼܽܘܢ܃ ܐܳܦܼ ܐܰܢ̱ܬܿܽܘܢ ܬܰܚܒܼܽܘܢ ܚܰܕܼ ܠܚܰܕܼ܂
13:35 [ai]ܒܗܳܕܼܶܐ ܢܶܕܿܰܥ ܟܽܠ ܐ̱ܢܳܫ ܕܬܰܠܡܺܝܕܼܰܝ̈ ܐܰܢ̱ܬܿܽܘܢ܃ ܐܶܢ ܚܽܘܒܿܳܐ ܢܶܗܘܶܐ ܒܟܽܘܢ ܚܰܕܼ ܠܘܳܬܼ ܚܰܕܼ܀
13:36 [ai]ܐܳܡܰܪ ܠܶܗ ܫܶܡܥܽܘܢ ܟܺܐܦܼܳܐ܂ ܡܳܪܰܢ܂ ܠܰܐܝܟܿܳܐ ܐܳܙܶܠ ܐܰܢ̱ܬܿ܂ ܥܢܳܐ ܝܶܫܽܘܥ܂ ܘܶܐܡܰܪ ܠܶܗ܂ ܠܰܐܝܟܿܳܐ ܕܳܐܙܶܠ ܐ̱ܢܳܐ܃ ܠܳܐ ܡܶܫܟܿܰܚ ܐܰܢ̱ܬܿ ܗܳܫܳܐ ܕܬܺܐܬܼܶܐ ܒܳܬܼܰܪܝ܂ ܠܚܰܪܬܼܳܐ ܕܶܝܢ ܬܺܐܬܼܶܐ܂
13:37 [ai]ܐܳܡܰܪ ܠܶܗ ܫܶܡܥܽܘܢ ܟܺܐܦܼܳܐ܂ ܡܳܪܝ܃ ܠܡܳܢܳܐ ܠܳܐ ܡܶܫܟܿܰܚ ܐ̱ܢܳܐ ܕܺܐܬܼܶܐ ܒܳܬܼܪܳܟܼ ܗܳܫܳܐ܂ ܢܰܦܼܫܝ ܚܠܳܦܼܰܝܟܿ ܣܳܐܶܡ ܐ̱ܢܳܐ܂
13:38 [ai]ܐܳܡܰܪ ܠܶܗ ܝܶܫܽܘܥ܂ ܢܰܦܼܫܳܟܼ ܚܠܳܦܼܰܝ ܣܳܐܶܡ ܐܰܢ̱ܬܿ܃ ܐܰܡܺܝܢ ܐܰܡܺܝܢ܂ ܐܳܡܰܪ ܐ̱ܢܳܐ ܠܳܟܼ܂ ܕܠܳܐ ܢܶܩܪܶܐ ܬܰܪܢܳܓܼܠܳܐ ܥܕܼܰܡܳܐ ܕܬܶܟܼܦܿܽܘܪ ܒܺܝ ܬܠܳܬܼ ܙܰܒܼܢܺܝܢ̈܀

next chapter