← Back
The Comprehensive Aramaic Lexicon
← Return to the Text Browser
click on the file description for more information
62043: P Jn

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


14:01 [ai]ܠܳܐ ܢܶܬܿܕܿܰܘܰܕܼ ܠܶܒܟܽܘܢ܂ ܗܰܝܡܶܢܘ ܒܰܐܠܳܗܳܐ܂ ܘܒܼܺܝ ܗܰܝܡܶܢܘ܂
14:02 [ai]ܣܰܓܿܺܝܐܺܝܢ̈ ܐܶܢܽܘܢ ܐܰܘܳܢܶܐ̈ ܒܶܝܬܼ ܐܳܒܼܝ܂ ܘܶܐܠܳܐ ܐܳܡܰܪ ܗ̱ܘܺܝܬܼ ܠܟܼܽܘܢ܃ ܕܳܐܙܶܠ ܐ̱ܢܳܐ ܕܶܐܛܰܝܶܒܼ ܠܟܼܽܘܢ ܐܰܬܼܪܳܐ܂
14:03 [ai]ܘܶܐܢ ܐܺܙܰܠ ܐܶܛܰܝܶܒܼ ܠܟܼܽܘܢ ܐܰܬܼܪܳܐ܃ ܬܽܘܒܼ ܐܺܬܼܶܐ܂ ܘܶܐܕܼܒܰܪܟܼܽܘܢ ܠܘܳܬܼܝ܂ ܕܰܐܝܟܿܳܐ ܕܶܐܢܳܐ ܐܺܝܬܼܰܝ܃ ܐܳܦܼ ܐܰܢ̱ܬܿܽܘܢ ܬܶܗܘܽܘܢ܂
14:04 [ai]ܘܠܰܐܝܟܿܳܐ ܕܳܐܙܶܠ ܐ̱ܢܳܐ ܝܳܕܼܥܺܝܢ ܐܢ̱ܬܿܽܘܢ܂ ܘܽܐܘܪܚܳܐ ܝܳܕܼܥܺܝܢ ܐܢ̱ܬܿܽܘܢ܂
14:05 [ai]ܐܳܡܰܪ ܠܶܗ ܬܳܐܘܡܰܐ܂ ܡܳܪܰܢ܃ ܠܳܐ ܝܳܕܼܥܺܝܢܰܢ ܠܰܐܝܟܿܳܐ ܐܳܙܶܠ ܐܰܢ̱ܬܿ܂ ܘܰܐܝܟܿܰܢܳܐ ܡܶܫܟܿܚܺܝܢ ܚ̱ܢܰܢ ܐܽܘܪܚܳܐ ܠܡܶܕܿܰܥ܂
14:06 [ai]ܐܳܡܰܪ ܠܶܗ ܝܶܫܽܘܥ܂ ܐܶܢܳܐ ܐ̱ܢܳܐ ܐܽܘܪܚܳܐ ܘܰܫܪܳܪܳܐ ܘܚܰܝ̈ܶܐ܂ ܠܳܐ ܐ̱ܢܳܫ ܐܳܬܼܶܐ ܠܘܳܬܼ ܐܳܒܼܝ܂ ܐܶܠܳܐ ܐܶܢ ܒܺܝ܂
14:07 [ai]ܐܶܠܽܘ ܠܺܝ ܝܳܕܼܥܺܝܢ ܗ̱ܘܰܝܬܿܽܘܢ܃ ܐܳܦܼ ܠܳܐܒܼܝ ܝܳܕܼܥܺܝܢ ܗ̱ܘܰܝܬܿܽܘܢ܂ ܘܡܶܢ ܗܳܫܳܐ ܝܳܕܼܥܺܝܢ ܐܢ̱ܬܿܽܘܢ ܠܶܗ܂ ܘܰܚܙܰܝܬܿܽܘܢܳܝܗ̱ܝ܂
14:08 [ai]ܐܳܡܰܪ ܠܶܗ ܦܼܺܝܠܺܝܦܿܳܘܣ܂ ܡܳܪܰܢ܃ ܚܰܘܳܢ ܐܰܒܼܳܐ܂ ܘܟܼܰܕܿܽܘ ܠܰܢ܂
14:09 [ai]ܐܳܡܰܪ ܠܶܗ ܝܶܫܽܘܥ܂ ܗܳܢܳܐ ܟܽܠܶܗ ܙܰܒܼܢܳܐ ܥܰܡܟܼܽܘܢ ܐ̱ܢܳܐ܃ ܘܠܳܐ ܺܝܕܼܰܥܬܿܳܢܝ ܦܿܺܝܠܺܝܦܿܶܐ܃ ܡܰܢ ܕܠܺܝ ܚܳܙܶܐ܂ ܚܙܳܐ ܠܰܐܒܼܳܐ܂ ܘܰܐܝܟܿܰܢܳܐ ܐܰܢ̱ܬܿ ܐܳܡܰܪ ܐܰܢ̱ܬܿ ܚܰܘܳܢ ܐܰܒܼܳܐ܂
14:10 [ai]ܠܳܐ ܡܗܰܝܡܶܢ ܐܰܢ̱ܬܿ ܕܶܐܢܳܐ ܒܳܐܒܼܝ܃ ܘܳܐܒܼܝ ܒܺܝ܃ ܡܶܠܶܐ̈ ܐܰܝܠܶܝܢ ܕܶܐܢܳܐ ܡܡܰܠܶܠ ܐ̱ܢܳܐ܃ ܡܶܢ ܢܰܦܼܫܝ܂ ܠܳܐ ܡܡܰܠܶܠ ܐ̱ܢܳܐ܂ ܐܳܒܼܝ ܕܶܝܢ ܕܒܺܝ ܥܳܡܰܪ܃ ܗܽܘ ܥܳܒܼܶܕܼ ܥܒܼܳܕܼܶܐ̈ ܗܳܠܶܝܢ܂
14:11 [ai]ܗܰܝܡܶܢܘ ܕܶܐܢܳܐ ܒܳܐܒܼܝ܂ ܘܳܐܒܼܝ ܒܺܝ܂ ܘܶܐܠܳܐ܂ ܐܳܦܼܶܢ ܡܶܛܽܠ ܥܒܼܳܕܼܶܐ̈ ܗܰܝܡܶܢܘ܂
14:12 [ai]ܐܰܡܺܝܢ ܐܰܡܺܝܢ܂ ܐܳܡܰܪ ܐ̱ܢܳܐ ܠܟܼܽܘܢ܃ ܕܡܰܢ ܕܰܡܗܰܝܡܶܢ ܒܺܝ܃ ܥܒܼܳܕܼܶܐ̈ ܐܰܝܠܶܝܢ ܕܶܐܢܳܐ ܥܳܒܼܶܕܼ ܐ̱ܢܳܐ ܐܳܦܼ ܗܽܘ ܢܶܥܒܿܶܕܼ܂ ܘܰܕܼܝܰܬܿܺܝܪܺܝܢ ܡܶܢ ܗܳܠܶܝܢ ܢܶܥܒܿܶܕܼ܂ ܕܶܐܢܳܐ ܠܘܳܬܼ ܐܰܒܼܳܐ ܐܳܙܶܠ ܐ̱ܢܳܐ܂
14:13 [ai]ܘܡܶܕܶܡ ܕܬܶܫܶܐܠܽܘܢ ܒܫܶܡܝ܂ ܐܶܥܒܿܶܕܼ ܠܟܼܽܘܢ܂ ܕܢܶܫܬܿܰܒܿܰܚ ܐܰܒܼܳܐ ܒܰܒܼܪܶܗ܂
14:14 [ai]ܘܶܐܢ ܬܶܫܶܐܠܽܘܢܳܢܝ ܒܫܶܡܝ ܐܶܢܳܐ ܥܳܒܼܶܕܼܢܳܐ܀
14:15 [ai]ܐܶܢ ܪܳܚܡܺܝܢ ܐܢ̱ܬܿܽܘܢ ܠܺܝ܂ ܦܽܘܩܕܳܢܰܝ̈ ܛܰܪܘ܂
14:16 [ai]ܘܶܐܢܳܐ ܐܶܒܼܥܶܐ ܡܶܢ ܐܳܒܼܝ܃ ܘܰܐ̱ܚܪܺܢܳܐ ܦܰܪܰܩܠܺܛܳܐ ܢܶܬܿܶܠ ܠܟܼܽܘܢ܃ ܕܢܶܗܘܶܐ ܥܰܡܟܼܽܘܢ ܠܥܳܠܰܡ܂
14:17 [ai]ܪܽܘܚܳܐ ܕܰܫܪܳܪܳܐ܂ ܗܰܘ ܕܥܳܠܡܳܐ ܠܳܐ ܡܶܫܟܿܰܚ ܠܰܡܩܰܒܿܳܠܽܘܬܼܶܗ܂ ܡܶܛܽܠ ܕܠܳܐ ܚܙܳܝܗ̱ܝ܂ ܘܠܳܐ ܝܰܕܼܥܶܗ܂ ܐܰܢ̱ܬܿܽܘܢ ܕܶܝܢ ܝܳܕܼܥܺܝܢ ܐܢ̱ܬܿܽܘܢ ܠܶܗ܂ ܕܰܠܘܳܬܼܟܼܽܘܢ ܥܳܡܰܪ܂ ܘܰܒܟܼܽܘܢ ܗ̱ܽܘ܂
14:18 [ai]ܠܳܐ ܫܳܒܼܶܩ ܐ̱ܢܳܐ ܠܟܼܽܘܢ ܝܰܬܼܡܶܐ̈܂ ܐܳܬܼܶܐ ܐ̱ܢܳܐ ܓܶܝܪ ܠܘܳܬܼܟܼܽܘܢ܂ ܩܰܠܺܝܠ ܐ̱ܚܪܺܝܢ܃
14:19 [ai]ܘܥܳܠܡܳܐ܂ ܠܳܐ ܚܳܙܶܐ ܠܺܝ܂ ܐܰܢ̱ܬܿܽܘܢ ܕܶܝܢ܂ ܬܶܚܙܽܘܢܳܢܝ܂ ܕܶܐܢܳܐ ܚܰܝ܂ ܐܳܦܼ ܐܰܢ̱ܬܿܽܘܢ ܬܺܚܽܘܢ܂
14:20 [ai]ܒܗܰܘ ܝܰܘܡܳܐ ܬܶܕܿܥܽܘܢ܃ ܕܶܐܢܳܐ ܒܳܐܒܼܝ܃ ܘܰܐܢ̱ܬܿܽܘܢ ܒܺܝ ܐܰܢ̱ܬܿܽܘܢ܃ ܘܶܐܢܳܐ ܒܟܽܘܢ ܐ̱ܢܳܐ ܿ܀ܿ܀ܿ
14:21 [ai]ܡܰܢ ܕܺܐܝܬܼ ܠܘܳܬܼܶܗ ܦܽܘܩܕܳܢܰܝ̈܂ ܘܢܳܛܰܪ ܠܗܽܘܢ܃ ܗܰܘ ܗ̱ܽܘ ܡܰܚܶܒܼ ܠܺܝ܂ ܗܰܘ ܕܶܝܢ ܕܪܳܚܶܡ ܠܺܝ܂ ܢܶܬܼܪܚܶܡ ܡܶܢ ܐܳܒܼܝ܂ ܘܶܐܢܳܐ ܐܶܪܚܡܺܝܘܗ̱ܝ܂ ܘܶܐܚܰܘܶܝܘܗ̱ܝ ܢܰܦܼܫܝ܀
14:22 [ai]ܐܳܡܰܪ ܠܶܗ ܺܝܗܽܘܕܼܳܐ܂ ܠܳܐ ܗ̱ܘܳܐ ܣܟܼܰܪܝܽܘܛܳܐ܂ ܡܳܪܝ܃ ܡܳܢܰܘ ܠܰܢ ܥܬܼܺܝܕܼ ܐܰܢ̱ܬܿ ܠܰܡܚܰܘܳܝܽܘ ܢܰܦܼܫܳܟܼ܂ ܘܠܳܐ ܗ̱ܘܳܐ ܠܥܳܠܡܳܐ܂
14:23 [ai]ܥܢܳܐ ܝܶܫܽܘܥ ܘܶܐܡܰܪ ܠܶܗ܂ ܡܰܢ ܕܪܳܚܶܡ ܠܺܝ܂ ܡܶܠܰܬܼܝ ܢܳܛܰܪ܂ ܘܳܐܒܼܝ ܢܶܪܚܡܺܝܘܗ̱ܝ܂ ܘܰܠܘܳܬܼܶܗ ܐܳܬܼܶܝܢ ܚ̱ܢܰܢ܃ ܘܰܐܘܳܢܳܐ ܠܘܳܬܼܶܗ ܥܳܒܼܕܺܝܢ ܚ̱ܢܰܢ܂
14:24 [ai]ܗܰܘ ܕܶܝܢ ܕܠܳܐ ܪܳܚܶܡ ܠܺܝ܂ ܡܶܠܰܬܼܝ ܠܳܐ ܢܳܛܰܪ܂ ܘܡܶܠܬܼܳܐ ܗܳܕܼܶܐ ܕܫܳܡܥܺܝܢ ܐܢ̱ܬܿܽܘܢ܂ ܠܳܐ ܗܘܳܬܼ ܕܺܝܠܝ܂ ܐܶܠܳܐ ܕܰܐܒܼܳܐ ܕܫܰܕܿܪܰܢܝ܂
14:25 [ai]ܗܳܠܶܝܢ ܡܰܠܠܶܬܼ ܥܰܡܟܼܽܘܢ܃ ܟܰܕܼ ܠܘܳܬܼܟܼܽܘܢ ܐܺܝܬܼܰܝ܂
14:26 [ai]ܗܰܘ ܕܶܝܢ ܦܰܪܰܩܠܺܛܳܐ ܪܽܘܚܳܐ ܕܩܽܘܕܼܫܳܐ܃ ܗܰܘ ܕܰܡܫܰܕܿܰܪ ܐܳܒܼܝ ܒܫܶܡܝ܃ ܗܽܘ ܢܰܠܶܦܼܟܼܽܘܢ ܟܽܠ ܡܶܕܶܡ܂ ܘܗܽܘ ܢܰܥ̱ܗܶܕܼܟܼܽܘܢ܂ ܟܽܠ ܡܳܐ ܕܳܐܡܰܪ ܐ̱ܢܳܐ ܠܟܼܽܘܢ܂
14:27 [ai]ܫܠܳܡܳܐ ܫܳܒܼܶܩ ܐ̱ܢܳܐ ܠܟܼܽܘܢ܂ ܫܠܳܡܳܐ ܕܺܝܠܝ ܝܳܗܶܒܼ ܐ̱ܢܳܐ ܠܟܼܽܘܢ܂ ܠܳܐ ܗ̱ܘܳܐ ܐܰܝܟܿܰܢܳܐ ܕܝܳܗܶܒܼ ܥܳܠܡܳܐ܂ ܐܶܢܳܐ ܝܳܗܶܒܼ ܐ̱ܢܳܐ ܠܟܼܽܘܢ܂ ܠܳܐ ܢܶܬܿܕܿܰܘܰܕܼ ܠܶܒܟܽܘܢ ܘܠܳܐ ܢܶܕܼܚܰܠ܂
14:28 [ai]ܫܡܰܥܬܿܽܘܢ ܕܶܐܢܳܐ ܐܶܡܪܶܬܼ ܠܟܼܽܘܢ܃ ܕܳܐܙܶܠ ܐ̱ܢܳܐ ܘܳܐܬܼܶܐ ܐ̱ܢܳܐ ܠܘܳܬܼܟܼܽܘܢ܂ ܐܶܠܽܘ ܪܳܚܡܺܝܢ ܗ̱ܘܰܝܬܿܽܘܢ ܠܺܝ܃ ܚܳܕܼܶܝܢ ܗ̱ܘܰܝܬܿܽܘܢ ܕܳܐܙܶܠ ܐ̱ܢܳܐ ܠܘܳܬܼ ܐܳܒܼܝ܂ ܕܳܐܒܼܝ܂ ܪܰܒܼ ܗ̱ܽܘ ܡܶܢܝ܂
14:29 [ai]ܘܗܳܫܳܐ ܗܳܐ ܐܶܡܪܶܬܼ ܠܟܼܽܘܢ܂ ܥܰܕܼܠܳܐ ܢܶܗܘܶܐ܂ ܕܡܳܐ ܕܰܗܘܳܐ ܬܗܰܝܡܢܽܘܢ܂
14:30 [ai]ܡܶܟܿܺܝܠ ܠܳܐ ܐܶܡܰܠܶܠ ܥܰܡܟܼܽܘܢ ܣܰܓܿܺܝܳܐܬܼܳܐ̈܂ ܐܳܬܼܶܐ ܓܶܝܪ ܐܰܪܟܼܽܘܢܶܗ ܕܥܳܠܡܳܐ܃ ܘܒܼܺܝ ܠܰܝܬܿ ܠܶܗ ܡܶܕܶܡ܂
14:31 [ai]ܐܶܠܳܐ ܕܢܶܕܿܰܥ ܥܳܠܡܳܐ܂ ܕܪܳܚܶܡ ܐ̱ܢܳܐ ܠܳܐܒܼܝ܃ ܘܰܐܝܟܿܰܢܳܐ ܕܦܰܩܕܿܰܢܝ ܐܳܒܼܝ܂ ܗܳܟܼܘܳܬܼ ܥܳܒܼܶܕܼ ܐ̱ܢܳܐ܂ ܩܽܘܡܘ ܢܺܐܙܰܠ ܡܶܟܿܳܐ܀

next chapter