The Comprehensive Aramaic Lexicon

16:01 [ai]	ܗܳܠܶܝܢ ܡܰܠܠܶܬܼ ܥܰܡܟܼܽܘܢ ܕܠܳܐ ܬܶܬܼܟܿܰܫܠܽܘܢ܀
16:02 [ai]	ܢܰܦܿܩܽܘܢܳܟܼܽܘܢ ܓܶܝܪ ܡܶܢ ܟܢܽܘܫܳܬܼܗܽܘܢ̈܂ ܘܬܼܺܐܬܼܶܐ ܫܳܥܬܼܳܐ ܕܟܽܠ ܕܢܶܩܛܽܘܠܟܼܽܘܢ܃ ܢܰܣܒܰܪ ܕܩܽܘܪܒܿܳܢܳܐ ܡܩܰܪܶܒܼ ܠܰܐܠܳܗܳܐ܂
16:03 [ai]	ܘܗܳܠܶܝܢ ܢܶܥܒܿܕܼܽܘܢ܃ ܡܶܛܽܠ ܕܠܳܐ ܺܝܕܼܰܥܘ ܘܠܳܐ ܠܳܐܒܼܝ܂ ܘܠܳܐ ܠܺܝ ܿ܀ܿ܀ܿ
16:04 [ai]	ܗܳܠܶܝܢ ܡܰܠܠܶܬܼ ܥܰܡܟܼܽܘܢ܃ ܕܡܳܐ ܕܶܐܬܼܳܐ ܥܶܕܳܢܗܶܝܢ ܬܶܥ̱ܗܕܿܽܘܢ ܐܶܢܶܝܢ̈܃ ܕܶܐܢܳܐ ܐܶܡܪܶܬܼ ܠܟܼܽܘܢ܃ ܗܳܠܶܝܢ ܕܶܝܢ ܡܶܢ ܩܕܼܺܝܡ ܠܳܐ ܐܶܡܪܶܬܼ ܠܟܼܽܘܢ ܕܥܰܡܟܼܽܘܢ ܗ̱ܘܺܝܬܼ܂
16:05 [ai]	ܗܳܫܳܐ ܕܶܝܢ ܐܳܙܶܠ ܐ̱ܢܳܐ ܠܘܳܬܼ ܡܰܢ ܕܫܰܕܿܪܰܢܝ܃ ܘܠܳܐ ܐ̱ܢܳܫ ܡܶܢܟܼܽܘܢ ܡܫܰܐܶܠ ܠܺܝ܂ ܠܰܐܝܟܿܳܐ ܐܳܙܶܠ ܐܰܢ̱ܬܿ܂
16:06 [ai]	ܐܶܡܪܶܬܼ ܠܟܼܽܘܢ ܓܶܝܪ ܗܳܠܶܝܢ܃ ܘܶܐܬܼܳܬܼ ܟܰܪܝܽܘܬܼܳܐ܂ ܘܰܡܠܳܬܼ ܠܶܒܿܰܘܳܬܼܟܼܽܘܢ̈܂
16:07 [ai]	ܐܶܠܳܐ ܐܶܢܳܐ ܫܪܳܪܳܐ ܐܳܡܰܪ ܐ̱ܢܳܐ ܠܟܼܽܘܢ܂ ܕܦܰܩܳܚ ܠܟܼܽܘܢ܂ ܕܶܐܢܳܐ ܐܺܙܰܠ܂ ܐܶܢܓܶܝܪ ܐܶܢܳܐ ܠܳܐ ܐܳܙܶܠ ܐ̱ܢܳܐ܃ ܦܰܪܰܩܠܺܛܳܐ ܠܳܐ ܐܳܬܼܶܐ ܠܘܳܬܼܟܼܽܘܢ܂ ܐܶܢ ܕܶܝܢ ܐܺܙܰܠ܃ ܐܶܫܰܕܿܪܺܝܘܗ̱ܝ ܠܘܳܬܼܟܼܽܘܢ܂
16:08 [ai]	ܘܡܳܐ ܕܶܐܬܼܳܐ ܗܽܘ ܢܰܟܣܺܝܘܗ̱ܝ ܠܥܳܠܡܳܐ܂ ܥܰܠ ܚܛܺܝܬܼܳܐ ܘܥܰܠ ܙܰܕܿܺܝܩܽܘܬܼܳܐ ܘܥܰܠ ܕܺܝܢܳܐ܂
16:09 [ai]	ܥܰܠ ܚܛܺܝܬܼܳܐ܂ ܕܠܳܐ ܡܗܰܝܡܢܺܝܢ ܒܺܝ܂
16:10 [ai]	ܥܰܠ ܙܰܕܿܺܝܩܽܘܬܼܳܐ ܕܶܝܢ܂ ܕܰܠܘܳܬܼ ܐܳܒܼܝ ܐܳܙܶܠ ܐ̱ܢܳܐ܃ ܘܠܳܐ ܬܽܘܒܼ ܚܳܙܶܝܢ ܐܢ̱ܬܿܽܘܢ ܠܺܝ܂
16:11 [ai]	ܥܰܠ ܕܺܝܢܳܐ ܕܶܝܢ܂ ܕܰܐܪܟܼܽܘܢܳܐ ܕܥܳܠܡܳܐ ܗܳܢܳܐ ܕܺܝܢ ܗ̱ܽܘ܂
16:12 [ai]	ܬܽܘܒܼ ܣܰܓܿܺܝ ܐܺܝܬܼ ܠܺܝ ܠܡܺܐܡܰܪ ܠܟܼܽܘܢ܃ ܐܶܠܳܐ ܠܳܐ ܡܶܫܟܿܚܺܝܢ ܐܢ̱ܬܿܽܘܢ ܠܡܶܐܚܰܕܼ ܗܳܫܳܐ܂
16:13 [ai]	ܡܳܐ ܕܶܐܬܼܳܐ ܕܶܝܢ ܪܽܘܚܳܐ ܕܰܫܪܳܪܳܐ܃ ܗܽܘ ܢܕܼܰܒܰܪܟܼܽܘܢ ܒܟܽܠܶܗ ܫܪܳܪܳܐ܂ ܠܳܐ ܓܶܝܪ ܢܡܰܠܶܠ ܡܶܢ ܪܶܥܝܳܢ ܢܰܦܼܫܶܗ܂ ܐܶܠܳܐ ܟܽܠ ܕܢܶܫܡܰܥ ܗܰܘ ܢܡܰܠܶܠ܂ ܘܰܥܬܼܺܝܕܼܳܬܼܳܐ̈ ܢܰܘܕܿܰܥܟܼܽܘܢ܂
16:14 [ai]	ܘܗܽܘ ܢܫܰܒܿܚܰܢܝ܂ ܡܶܛܽܠ ܕܡܶܢ ܕܺܝܠܝ ܢܶܣܰܒܼ܂ ܘܰܢܚܰܘܶܝܟܼܽܘܢ܂
16:15 [ai]	ܟܽܠ ܡܶܕܶܡ ܕܺܐܝܬܼ ܠܳܐܒܼܝ܂ ܕܺܝܠܝ ܗ̱ܽܘ܂ ܡܶܛܽܠ ܗܳܢܳܐ ܐܶܡܪܶܬܼ ܠܟܼܽܘܢ܃ ܕܡܶܢ ܕܺܝܠܝ ܢܶܣܰܒܼ܂ ܘܰܢܚܰܘܶܝܟܼܽܘܢ܀
16:16 [ai]	ܩܰܠܺܝܠ܂ ܘܠܳܐ ܬܶܚܙܽܘܢܳܢܝ܂ ܘܬܼܽܘܒܼ ܩܰܠܺܝܠ܂ ܘܬܼܶܚܙܽܘܢܳܢܝ܂ ܕܳܐܙܶܠ ܐ̱ܢܳܐ ܠܘܳܬܼ ܐܰܒܼܳܐ܂
16:17 [ai]	ܘܶܐܡܰܪܘ ܗ̱ܘܰܘ ܬܰܠܡܺܝܕܼܰܘܗ̱ܝ̈ ܚܰܕܼ ܠܚܰܕܼ܂ ܡܳܢܳܐ ܗ̱ܝ ܗܳܕܼܶܐ ܕܶܐܡܰܪ ܠܰܢ܃ ܕܩܰܠܺܝܠ ܘܠܳܐ ܬܶܚܙܽܘܢܳܢܝ܃ ܘܬܼܽܘܒܼ ܩܰܠܺܝܠ ܘܬܼܶܚܙܽܘܢܳܢܝ܂ ܘܕܼܳܐܙܶܠ ܐ̱ܢܳܐ ܠܘܳܬܼ ܐܳܒܼܝ܂
16:18 [ai]	ܘܳܐܡܪܺܝܢ ܗ̱ܘܰܘ܂ ܡܳܢܳܐ ܗ̱ܝ ܗܳܕܼܶܐ ܩܰܠܺܝܠ ܕܶܐܡܰܪ܂ ܠܳܐ ܝܳܕܼܥܺܝܢܰܢ ܡܳܢܳܐ ܡܡܰܠܶܠ܂
16:19 [ai]	ܝܶܫܽܘܥ ܕܶܝܢ ܺܝܕܼܰܥ ܕܒܳܥܶܝܢ ܗ̱ܘܰܘ ܠܰܡܫܰܐܳܠܽܘܬܼܶܗ܂ ܘܶܐܡܰܪ ܠܗܽܘܢ܂ ܥܰܠ ܗܳܕܼܶܐ ܒܿܳܥܶܝܢ ܐܢ̱ܬܿܽܘܢ ܥܰܡ ܚܕܼܳܕܼܶܐ̈܃ ܕܶܐܡܪܶܬܼ ܠܟܼܽܘܢ܃ ܕܩܰܠܺܝܠ ܘܠܳܐ ܬܶܚܙܽܘܢܳܢܝ܃ ܘܬܼܽܘܒܼ ܩܰܠܺܝܠ ܘܬܼܶܚܙܽܘܢܳܢܝ܂
16:20 [ai]	ܐܰܡܺܝܢ ܐܰܡܺܝܢ܂ ܐܳܡܰܪ ܐ̱ܢܳܐ ܠܟܼܽܘܢ܂ ܕܬܶܒܼܟܿܽܘܢ ܐܰܢ̱ܬܿܽܘܢ ܘܬܼܶܐܠܽܘܢ܂ ܘܥܳܠܡܳܐ ܢܶܚܕܿܶܐ܂ ܘܰܠܟܼܽܘܢ ܬܶܟܼܪܶܐ܂ ܐܶܠܳܐ ܟܰܪܝܽܘܬܼܟܼܽܘܢ ܠܚܰܕܼܽܘܬܼܳܐ ܬܶܗܘܶܐ܂
16:21 [ai]	ܐܰܢ̱ܬܿܬܼܳܐ ܡܳܐ ܕܝܳܠܕܿܳܐ܃ ܟܳܪܝܳܐ ܠܳܗ ܕܰܡܛܳܐ ܝܰܘܡܳܐ ܕܡܰܘܠܳܕܼܳܗ܂ ܡܳܐ ܕܝܶܠܕܿܰܬܼ ܕܶܝܢ ܒܪܳܐ܃ ܠܳܐ ܥ̱ܳܗܕܿܳܐ ܐܽܘܠܨܳܢܳܗ܃ ܡܶܛܽܠ ܚܰܕܼܽܘܬܼܳܐ ܕܶܐܬܼܺܝܠܶܕܼ ܒܰܪܢܳܫܳܐ ܒܥܳܠܡܳܐ܂
16:22 [ai]	ܐܳܦܼ ܐܰܢ̱ܬܿܽܘܢ ܗܳܫܳܐ ܟܰܪܝܳܐ ܠܟܼܽܘܢ܂ ܬܽܘܒܼ ܕܶܝܢ ܐܶܚܙܶܝܟܼܽܘܢ܂ ܘܢܶܚܕܿܶܐ ܠܶܒܟܽܘܢ܂ ܘܚܰܕܼܘܰܬܼܟܼܽܘܢ܂ ܠܳܐ ܐ̱ܢܳܫ ܢܳܣܶܒܼ ܡܶܢܟܼܽܘܢ܂
16:23 [ai]	ܘܰܒܗܰܘ ܝܰܘܡܳܐ ܠܺܝ ܠܳܐ ܬܶܫܶܐܠܽܘܢ ܡܶܕܶܡ܂ ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܟܽܠ ܡܶܕܶܡ ܕܬܶܫܶܐܠܽܘܢ ܠܳܐܒܼܝ ܒܫܶܡܝ܂ ܢܶܬܿܶܠ ܠܟܼܽܘܢ܂
16:24 [ai]	ܥܕܼܰܡܳܐ ܠܗܳܫܳܐ ܠܳܐ ܫܶܐܠܬܿܽܘܢ ܡܶܕܶܡ ܒܫܶܡܝ܂ ܫܰܐܠܘ ܘܬܼܶܣܒܼܽܘܢ܂ ܕܬܶܗܘܶܐ ܚܰܕܼܘܰܬܼܟܼܽܘܢ ܡܫܰܡܠܝܳܐ܀
16:25 [ai]	ܗܳܠܶܝܢ ܒܦܶܠܳܐܬܼܳܐ̈ ܡܰܠܠܶܬܼ ܥܰܡܟܼܽܘܢ܂ ܐܳܬܼܝܳܐ ܕܶܝܢ ܫܳܥܬܼܳܐ܃ ܐܶܡܰܬܼܝ ܕܠܳܐ ܐܶܡܰܠܶܠ ܥܰܡܟܼܽܘܢ ܒܦܶܠܳܐܬܼܳܐ̈܂ ܐܶܠܳܐ ܥܺܝܢ ܒܰܓܼܠܶܐ ܐܶܒܼܰܕܿܶܩ ܠܟܼܽܘܢ ܥܰܠ ܐܰܒܼܳܐ܂
16:26 [ai]	ܒܗܰܘ ܝܰܘܡܳܐ ܕܬܶܫܶܐܠܽܘܢ ܒܫܶܡܝ܂ ܘܠܳܐ ܐܳܡܰܪ ܐ̱ܢܳܐ ܠܟܼܽܘܢ ܕܶܐܢܳܐ ܐܶܒܼܥܶܐ ܡܶܢ ܐܰܒܼܳܐ ܥܠܰܝܟܿܽܘܢ܃
16:27 [ai]	ܗܽܘ ܓܶܝܪ ܐܰܒܼܳܐ ܪܳܚܶܡ ܠܟܼܽܘܢ܂ ܕܰܐܢ̱ܬܿܽܘܢ ܪܚܶܡܬܿܽܘܢܳܢܝ܂ ܘܗܰܝܡܶܢܬܿܽܘܢ ܕܶܐܢܳܐ ܡܶܢ ܠܘܳܬܼ ܐܰܠܳܗܳܐ ܢܶܦܼܩܶܬܼ܂
16:28 [ai]	ܢܶܦܼܩܶܬܼ ܡܶܢ ܠܘܳܬܼ ܐܰܒܼܳܐ܂ ܘܶܐܬܼܺܝܬܼ ܠܥܳܠܡܳܐ܂ ܘܬܼܽܘܒܼ ܫܳܒܼܶܩ ܐ̱ܢܳܐ ܠܥܳܠܡܳܐ܂ ܘܳܐܙܶܠ ܐ̱ܢܳܐ ܠܺܝ ܠܘܳܬܼ ܐܰܒܼܳܐ܂
16:29 [ai]	ܐܳܡܪܺܝܢ ܠܶܗ ܬܰܠܡܺܝܕܼܰܘܗ̱ܝ̈܂ ܗܳܐ ܗܳܫܳܐ ܓܰܠܝܳܐܺܝܬܼ ܡܡܰܠܶܠ ܐܰܢ̱ܬܿ܃ ܘܦܼܶܠܶܐܬܼܳܐ ܘܠܳܐ ܚܕܼܳܐ ܐܳܡܰܪ ܐܰܢ̱ܬܿ܂
16:30 [ai]	ܗܳܫܳܐ ܝܳܕܼܥܺܝܢ ܚ̱ܢܰܢ ܕܟܽܠ ܡܶܕܶܡ ܝܳܕܼܰܥ ܐܰܢ̱ܬܿ܂ ܘܠܳܐ ܣܢܺܝܩ ܐܰܢ̱ܬܿ ܕܐ̱ܢܳܫ ܢܫܰܐܠܳܟܼ܂ ܒܗܳܕܼܶܐ ܡܗܰܝܡܢܺܝܢ ܚ̱ܢܰܢ ܕܡܶܢ ܐܰܠܳܗܳܐ ܢܦܼܰܩܬܿ܀
16:31 [ai]	ܐܳܡܰܪ ܠܗܽܘܢ ܝܶܫܽܘܥ܂ ܗܰܝܡܶܢܘ܂
16:32 [ai]	ܕܗܳܐ ܐܳܬܼܝܳܐ ܫܳܥܬܼܳܐ ܘܗܳܫܳܐ ܐܶܬܼܳܬܼ܃ ܕܬܶܬܼܒܿܰܕܿܪܽܘܢ ܐ̱ܢܳܫ ܠܰܐܬܼܪܶܗ܂ ܘܬܼܶܫܒܿܩܽܘܢܳܢܝ ܒܰܠܚܽܘܕܼܰܝ܂ ܘܠܳܐ ܗܘܺܝܬܼ ܒܰܠܚܽܘܕܼܰܝ܂ ܕܰܐܒܼܳܐ ܥܰܡܝ ܗ̱ܽܘ܂
16:33 [ai]	ܗܳܠܶܝܢ ܐܶܡܪܶܬܼ ܠܟܼܽܘܢ܂ ܕܒܺܝ ܢܶܗܘܶܐ ܠܟܼܽܘܢ ܫܠܳܡܳܐ܂ ܒܥܳܠܡܳܐ ܗܳܘܶܐ ܠܟܼܽܘܢ ܐܽܘܠܨܳܢܳܐ܂ ܐܶܠܳܐ ܐܶܬܼܠܰܒ̱ܿܒܼܘ܂ ܐܶܢܳܐ ܙܟܼܺܝܬܼܶܗ ܠܥܳܠܡܳܐ܀܀

next chapter