← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62043: P Jn

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


18:01 [ai]ܗܳܠܶܝܢ ܐܶܡܰܪ ܝܶܫܽܘܥ܃ ܘܰܢܦܼܰܩ ܥܰܡ ܬܰܠܡܺܝܕܼܰܘܗ̱ܝ̈ ܠܥܶܒܼܪܳܐ ܕܰܪܓܼܶܠܬܳܐ ܕܩܶܕܼܪܽܘܢ܂ ܐܰܬܼܰܪ ܕܺܐܝܬܼ ܗ̱ܘܳܬܼ ܓܰܢܬܼܳܐ܂ ܐܰܝܟܿܳܐ ܕܥܰܠ ܗܽܘ ܘܬܼܰܠܡܺܝܕܼܰܘܗ̱ܝ̈܀
18:02 [ai]ܝܳܕܼܰܥ ܗ̱ܘܳܐ ܕܶܝܢ ܐܳܦܼ ܺܝܗܽܘܕܼܳܐ ܡܰܫܠܡܳܢܳܐ ܠܕܼܽܘܟܿܬܼܳܐ ܗܳܝ܂ ܡܶܛܽܠ ܕܣܰܓܿܺܝ ܙܰܒܼܢܳܐ ܟܳܢܶܫ ܗ̱ܘܳܐ ܬܰܡܳܢ ܝܶܫܽܘܥ ܥܰܡ ܬܰܠܡܺܝܕܼܰܘܗ̱ܝ̈܂
18:03 [ai]ܗܽܘ ܗܳܟܼܺܝܠ ܺܝܗܽܘܕܼܳܐ ܕܒܰܪ ܐܶܣܦܿܺܝܪ܂ ܘܡܶܢ ܠܘܳܬܼ ܪ̈ܰܒܰܝ ܟܳܗܢܶܐ̈ ܘܰܦܼܪ̈ܺܝܫܶܐ܂ ܕܒܰܪ ܕܰܚܫܶܐ̈܃ ܘܶܐܬܼܳܐ ܠܬܼܰܡܳܢ܂ ܥܰܡ ܢܰܦܼܛܺܪ̈ܶܐ ܘܠܰܡܦܿܺܝܕܼܶܐ̈ ܘܙܰܝܢܳܐ܀
18:04 [ai]ܝܶܫܽܘܥ ܕܶܝܢ ܕܝܳܕܼܰܥ ܗ̱ܘܳܐ ܟܽܠ ܡܶܕܶܡ ܕܳܐܬܼܶܐ ܥܠܰܘܗ̱ܝ܃ ܢܦܼܰܩ ܘܶܐܡܰܪ ܠܗܽܘܢ܂ ܠܡܰܢ ܒܿܳܥܶܝܢ ܐܢ̱ܬܿܽܘܢ܂
18:05 [ai]ܐܳܡܪܺܝܢ ܠܶܗ܂ ܠܝܶܫܽܘܥ ܢܳܨܪܳܝܳܐ܂ ܐܳܡܰܪ ܠܗܽܘܢ ܝܶܫܽܘܥ܂ ܐܶܢܳܐ ܐ̱ܢܳܐ܂ ܩܳܐܶܡ ܗ̱ܘܳܐ ܕܶܝܢ ܐܳܦܼ ܺܝܗܽܘܕܼܳܐ ܡܰܫܠܡܳܢܳܐ ܥܰܡܗܽܘܢ܂
18:06 [ai]ܘܟܼܰܕܼ ܐܶܡܰܪ ܠܗܽܘܢ ܝܶܫܽܘܥ܂ ܕܶܐܢܳܐ ܐ̱ܢܳܐ܂ ܐܶܙܰܠܘ ܠܒܼܶܣܬܿܰܪܗܽܘܢ܂ ܘܰܢܦܼܰܠܘ ܥܰܠ ܐܰܪܥܳܐ܂
18:07 [ai]ܬܽܘܒܼ ܫܰܐܶܠ ܐܶܢܽܘܢ ܝܶܫܽܘܥ܂ ܠܡܰܢ ܒܿܳܥܶܝܢ ܐܢ̱ܬܿܽܘܢ܂ ܗܶܢܽܘܢ ܕܶܝܢ ܐܶܡܰܪܘ܂ ܠܝܶܫܽܘܥ ܢܳܨܪܳܝܳܐ܂
18:08 [ai]ܐܳܡܰܪ ܠܗܽܘܢ ܝܶܫܽܘܥ܂ ܐܶܡܪܶܬܼ ܠܟܼܽܘܢ ܕܶܐܢܳܐ ܐ̱ܢܳܐ܂ ܘܶܐܢ ܠܺܝ ܒܿܳܥܶܝܢ ܐܢ̱ܬܿܽܘܢ܃ ܫܒܼܽܘܩܘ ܠܗܳܠܶܝܢ ܐܳܙܺܠ̱ܝܢ܂
18:09 [ai]ܕܬܶܫܠܰܡ ܡܶܠܬܼܳܐ ܕܶܐܡܰܪ܂ ܕܰܐܝܠܶܝܢ ܕܝܰܗ̱ܒܼܬܿ ܠܺܝ܃ ܠܳܐ ܐܰܘܒܿܕܼܶܬܼ ܡܶܢܗܽܘܢ ܐܳܦܼܠܳܐ ܚܰܕܼ܀
18:10 [ai]ܫܶܡܥܽܘܢ ܕܶܝܢ ܟܺܐܦܼܳܐ܃ ܐܺܝܬܼ ܗ̱ܘܳܐ ܥܠܰܘܗ̱ܝ ܣܰܦܼܣܺܪܳܐ܂ ܘܫܰܡܛܳܗ܂ ܘܰܡܚܳܝܗ̱ܝ ܠܥܰܒܼܕܿܶܗ ܕܿܪ̈ܰܒܿ ܟܿܳܗܢܶܐ܂ ܘܫܰܩܠܳܗ ܐܶܕܼܢܶܗ ܕܝܰܡܺܝܢܳܐ܂ ܫܡܶܗ ܕܶܝܢ ܕܥܰܒܼܕܿܳܐ܂ ܡܳܠܶܟܼ܀
18:11 [ai]ܘܶܐܡܰܪ ܝܶܫܽܘܥ ܠܟܼܺܐܦܼܳܐ܂ ܣܺܝܡ ܣܰܦܼܣܺܪܳܐ ܒܚܶܠܬܼܳܗ܂ ܟܳܣܳܐ ܕܝܰܗ̱ܒܼ ܠܺܝ ܐܳܒܼܝ܃ ܠܳܐ ܐܶܫܬܿܶܝܘܗ̱ܝ܀
18:12 [ai]ܗܳܝܕܶܝܢ ܐܶܣܦܿܺܝܪ ܘܟܿܺܠܺܝܰܪ̈ܟܼܶܐ܂ ܘܕܼܰܚܫܶܐ̈ ܕܺܝܗܽܘܕܼܳܝܶܐ̈܃ ܐܰܚܕܿܽܘܗ̱ܝ ܠܝܶܫܽܘܥ܂ ܘܰܐܣܪܽܘܗ̱ܝ܂
18:13 [ai]ܘܰܐܝܬܿܝܽܘܗ̱ܝ ܠܘܳܬܼ ܚܰܢܳܢ ܠܽܘܩܕܼܰܡ܂ ܡܶܛܽܠ ܕܰܚܡܽܘܗ̱ܝ ܗ̱ܘܳܐ ܕܩܰܝܳܦܼܳܐ܃ ܗܰܘ ܕܺܐܝܬܼܰܘܗ̱ܝ ܗ̱ܘܳܐ ܪ̈ܰܒܿ ܟܿܳܗܢܶܐ ܕܫܰܢ̱ܬܳܐ ܗܳܝ܂
18:14 [ai]ܐܺܝܬܼܰܘܗ̱ܝ ܗ̱ܘܳܐ ܕܶܝܢ ܩܰܝܳܦܼܳܐ܃ ܗܰܘ ܕܰܡܠܰܟܼ ܠܺܝܗܽܘܕܼܳܝܶܐ̈܃ ܕܦܰܩܳܚ ܕܚܰܕܼ ܓܰܒܼܪܳܐ ܢܡܽܘܬܼ ܚܠܳܦܼ ܥܰܡܳܐ܀
18:15 [ai]ܫܶܡܥܽܘܢ ܕܶܝܢ ܟܺܐܦܼܳܐ܂ ܘܚܰܕܼ ܡܶܢ ܬܰܠܡܺܝܕܼܶܐ̈ ܐ̱ܚܪ̈ܳܢܶܐ܂ ܐܳܬܼܶܝܢ ܗ̱ܘܰܘ ܒܳܬܼܪܶܗ ܕܝܶܫܽܘܥ܂ ܠܗܰܘ ܕܶܝܢ ܬܰܠܡܺܝܕܼܳܐ܂ ܝܳܕܼܰܥ ܗ̱ܘܳܐ ܠܶܗ ܪ̈ܰܒܿ ܟܿܳܗܢܶܐ܂ ܘܥܰܠ ܥܰܡ ܝܶܫܽܘܥ ܠܕܼܳܪܬܳܐ܂
18:16 [ai]ܫܶܡܥܽܘܢ ܕܶܝܢ ܩܳܐܶܡ ܗ̱ܘܳܐ ܠܒܼܰܪ ܠܘܳܬܼ ܬܰܪܥܳܐ܂ ܘܰܢܦܼܰܩ ܗܰܘ ܬܰܠܡܺܝܕܼܳܐ ܐ̱ܚܪܺܢܳܐ܂ ܕܝܳܕܼܰܥ ܗ̱ܘܳܐ ܠܶܗ ܪ̈ܰܒܿ ܟܿܳܗܢܶܐ܃ ܘܶܐܡܰܪ ܠܢܳܛܪܰܬܼ ܬܰܪܥܳܐ܂ ܘܰܐܥܠܶܗ ܠܫܶܡܥܽܘܢ܀
18:17 [ai]ܐܶܡܪܰܬܼ ܕܶܝܢ ܥܠܰܝܡܬܼܳܐ ܢܳܛܪܰܬܼ ܬܰܪܥܳܐ ܠܫܶܡܥܽܘܢ܂ ܠܡܳܐ܃ ܐܳܦܼ ܐܰܢ̱ܬܿ ܡܶܢ ܬܰܠܡܺܝܕܼܰܘܗ̱ܝ̈ ܐܰܢ̱ܬܿ ܕܗܳܢܳܐ ܓܰܒܼܪܳܐ܃ ܐܳܡܰܪ ܠܳܗ ܠܳܐ܀
18:18 [ai]ܘܩܳܝܡܺܝܢ ܗ̱ܘܰܘ ܥܰܒܼܕܿܶܐ̈ ܘܕܼܰܚܫܶܐ̈܃ ܘܣܳܝܡܺܝܢ ܗ̱ܘܰܘ ܢܽܘܪܳܐ ܕܢܶܫܚܢܽܘܢ܂ ܡܶܛܽܠ ܕܩܰܪܺܝܫ ܗ̱ܘܳܐ܂ ܩܳܐܶܡ ܗ̱ܘܳܐ ܕܶܝܢ ܐܳܦܼ ܫܶܡܥܽܘܢ ܥܰܡܗܽܘܢ܂ ܘܫܳܚܶܢ܂
18:19 [ai]ܪ̈ܰܒܿ ܟܿܳܗܢܶܐ ܕܶܝܢ ܫܰܐܠܶܗ ܠܝܶܫܽܘܥ܂ ܥܰܠ ܬܰܠܡܺܝܕܼܰܘܗ̱ܝ̈ ܘܥܰܠ ܝܽܘܠܦܿܳܢܶܗ܂
18:20 [ai]ܘܶܐܡܰܪ ܠܶܗ ܝܶܫܽܘܥ܂ ܐܶܢܳܐ ܥܺܝܢ ܒܰܓܼܠܶܐ ܡܰܠܠܶܬܼ ܥܰܡ ܥܰܡܳܐ܂ ܘܰܒܟܼܽܠܙܒܼܰܢ ܐܰܠܦܼܶܬܼ ܒܰܟܼܢܽܘܫܬܳܐ܂ ܘܰܒܗܰܝܟܠܳܐ܂ ܐܰܝܟܿܳܐ ܕܟܽܠܗܽܘܢ ܺܝܗܽܘܕܼܳܝܶܐ̈ ܡܶܬܼܟܿܰܢܫܺܝܢ܂ ܘܡܶܕܶܡ ܒܛܽܘܫܝܳܐ ܠܳܐ ܡܰܠܠܶܬܼ܂
18:21 [ai]ܡܳܢܳܐ ܡܫܰܐܶܠ ܐܰܢ̱ܬܿ ܠܺܝ܂ ܫܰܐܶܠ ܠܗܳܢܽܘܢ ܕܰܫܡܰܥܘ܂ ܡܳܢܳܐ ܡܰܠܠܶܬܼ ܥܰܡܗܽܘܢ܂ ܗܳܐ ܗܶܢܽܘܢ ܝܳܕܼܥܺܝܢ܂ ܟܽܠ ܡܶܕܶܡ ܕܶܐܡܪܶܬܼ܀
18:22 [ai]ܘܟܼܰܕܼ ܗܳܠܶܝܢ ܐܶܡܰܪ܃ ܚܰܕܼ ܡܶܢ ܕܰܚܫܶܐ̈ ܕܩܳܐܶܡ ܗ̱ܘܳܐ܂ ܡܚܳܝܗ̱ܝ ܥܰܠ ܦܰܟܿܶܗ ܠܝܶܫܽܘܥ܂ ܘܶܐܡܰܪ ܠܶܗ܂ ܗܳܟܼܰܢܳܐ ܝܳܗܶܒܼ ܐܰܢ̱ܬܿ ܦܶܬܼܓܼܳܡܳܐ ܠܪ̈ܰܒܿ ܟܿܳܗܢܶܐ܂
18:23 [ai]ܥܢܳܐ ܝܶܫܽܘܥ܂ ܘܶܐܡܰܪ ܠܶܗ܂ ܐܶܢ ܒܺܝܫܳܐܺܝܬܼ ܡܰܠܠܶܬܼ܂ ܐܰܣܗܶܕܼ ܥܰܠ ܒܺܝܫܬܳܐ܂ ܘܶܐܢ ܕܶܝܢ ܫܰܦܿܺܝܪ܂ ܠܡܳܢܳܐ ܡܚܰܝܬܿܳܢܝ ܿ܀ܿ܀ܿ
18:24 [ai]ܚܰܢܳܢ ܕܶܝܢ ܫܰܕܿܰܪ ܠܝܶܫܽܘܥ܂ ܟܰܕܼ ܐܰܣܺܝܪ ܠܘܳܬܼ ܩܰܝܳܦܼܳܐ ܪ̈ܰܒܿ ܟܿܳܗܢܶܐ܀
18:25 [ai]ܘܫܶܡܥܽܘܢ ܟܺܐܦܼܳܐ ܩܳܐܶܡ ܗ̱ܘܳܐ ܘܫܳܚܶܢ܂ ܘܳܐܡܪܺܝܢ ܠܶܗ܂ ܠܡܳܐ܃ ܐܳܦܼ ܐܰܢ̱ܬܿ ܚܰܕܼ ܡܶܢ ܬܰܠܡܺܝܕܼܰܘܗ̱ܝ̈ ܐܰܢ̱ܬܿ܃ ܘܗܽܘ ܟܦܼܰܪ܂ ܘܶܐܡܰܪ ܠܳܐ ܗ̱ܘܺܝܬܼ܂
18:26 [ai]ܐܳܡܰܪ ܠܶܗ ܚܰܕܼ ܡܶܢ ܥܰܒܼܕܿܶܐ̈ ܕܿܪ̈ܰܒܿ ܟܿܳܗܢܶܐ܂ ܐ̱ܚܝܳܢܶܗ ܕܗܰܘ ܕܰܦܼܣܰܩ ܗ̱ܘܳܐ ܫܶܡܥܽܘܢ ܐܶܕܼܢܶܗ܂ ܠܳܐ ܐܶܢܳܐ ܚܙܺܝܬܼܳܟܼ ܥܰܡܶܗ ܒܓܰܢܬܼܳܐ܂
18:27 [ai]ܘܬܼܽܘܒܼ ܟܦܼܰܪ ܫܶܡܥܽܘܢ܂ ܘܒܼܳܗ ܒܫܳܥܬܼܳܐ ܩܪܳܐ ܬܰܪܢܳܓܼܠܳܐ܀܀
18:28 [ai]ܐܰܝܬܿܝܽܘܗ̱ܝ ܕܶܝܢ ܠܝܶܫܽܘܥ ܡܶܢ ܠܘܳܬܼ ܩܰܝܳܦܼܳܐ ܠܰܦܿܪܶܛܳܘܪܺܝܢ܂ ܘܺܐܝܬܼܰܘܗ̱ܝ ܗ̱ܘܳܐ ܨܰܦܼܪܳܐ܂ ܘܗܶܢܽܘܢ ܠܳܐ ܥܰܠܘ ܠܰܦܿܪܶܛܳܘܪܺܝܢ܃ ܕܠܳܐ ܢܶܬܼܛܰܘܫܽܘܢ܂ ܥܰܕܼ ܐܳܟܼܠܺܝܢ ܦܶܨܚܳܐ܂
18:29 [ai]ܢܦܼܰܩ ܕܶܝܢ ܦܿܺܝܠܰܛܳܘܣ ܠܒܼܰܪ ܠܘܳܬܼܗܽܘܢ܂ ܘܶܐܡܰܪ ܠܗܽܘܢ܂ ܡܳܢܳܐ ܡܶܐܟܼܰܠ ܩܰܪܨܳܐ ܐܺܝܬܼ ܠܟܼܽܘܢ ܥܰܠ ܓܰܒܼܪܳܐ ܗܳܢܳܐ܂
18:30 [ai]ܥܢܰܘ܂ ܘܳܐܡܪܺܝܢ ܠܶܗ܂ ܐܶܠܽܘ ܠܳܐ ܥܳܒܼܶܕܼ ܒܺܝܫܳܬܼܳܐ̈ ܗ̱ܘܳܐ܃ ܐܳܦܼܠܳܐ ܠܳܟܼ ܡܰܫܠܡܺܝܢ ܗ̱ܘܰܝܢ ܠܶܗ܂
18:31 [ai]ܐܳܡܰܪ ܠܗܽܘܢ ܦܿܺܝܠܰܛܳܘܣ܂ ܕܽܘܒܼܪܽܘܗ̱ܝ ܐܰܢ̱ܬܿܽܘܢ܂ ܘܕܼܽܘܢܽܘܗ̱ܝ ܐܰܝܟܼ ܢܳܡܽܘܣܟܼܽܘܢ܂ ܐܳܡܪܺܝܢ ܠܶܗ ܺܝܗܽܘܕܼܳܝܶܐ̈܂ ܠܳܐ ܫܰܠܺܝܛ ܠܰܢ ܠܡܶܩܛܰܠ ܠܐ̱ܢܳܫ܂
18:32 [ai]ܕܬܶܫܠܰܡ ܡܶܠܬܼܳܐ ܕܶܐܡܰܪ ܝܶܫܽܘܥ܃ ܟܰܕܼ ܡܰܘܕܿܰܥ ܒܰܐܝܢܳܐ ܡܰܘܬܳܐ ܥܬܼܺܝܕܼ ܕܰܢܡܽܘܬܼ܀
18:33 [ai]ܥܰܠ ܕܶܝܢ ܦܿܺܝܠܰܛܳܘܣ ܠܰܦܿܪܶܛܳܘܪܺܝܢ܃ ܘܰܩܪܳܐ ܠܝܶܫܽܘܥ܂ ܘܶܐܡܰܪ ܠܶܗ܂ ܐܰܢ̱ܬܿ ܗ̱ܽܘ ܡܰܠܟܿܗܽܘܢ ܕܺܝܗܽܘܕܼܳܝܶܐ̈܂
18:34 [ai]ܐܳܡܰܪ ܠܶܗ ܝܶܫܽܘܥ܂ ܡܶܢ ܢܰܦܼܫܳܟܼ ܐܶܡܰܪܬܿ ܗܳܕܼܶܐ܃ ܐܰܘ ܐ̱ܚܪ̈ܳܢܶܐ ܐܶܡܰܪܘ ܠܳܟܼ ܥܠܰܝ܂
18:35 [ai]ܐܳܡܰܪ ܠܶܗ ܦܿܺܝܠܰܛܳܘܣ܂ ܠܡܳܐ ܐܶܢܳܐ ܺܝܗܽܘܕܼܳܝܳܐ ܐ̱ܢܳܐ܃ ܒܢܰܝ ܥܰܡܳܟܼ ܗ̱ܽܘ܂ ܘܪ̈ܰܒܰܝ ܟܳܗܢܶܐ̈ ܐܰܫܠܡܽܘܟܼ ܠܺܝ܂ ܡܳܢܳܐ ܥܒܼܰܕܿܬܿ܂
18:36 [ai]ܐܳܡܰܪ ܠܶܗ ܝܶܫܽܘܥ܂ ܡܰܠܟܿܽܘܬܼܝ ܕܺܝܠܝ܂ ܠܳܐ ܗܘܳܬܼ ܡܶܢ ܗܳܢܳܐ ܥܳܠܡܳܐ܂ ܐܶܠܽܘ ܡܶܢ ܥܳܠܡܳܐ ܗ̱ܘܳܬܼ ܗܳܢܳܐ ܡܰܠܟܿܽܘܬܼܝ܃ ܡܶܬܼܟܿܰܬܿܫܺܝܢ ܗ̱ܘܰܘ ܡܫܰܡܫܳܢܰܝ̈܂ ܕܠܳܐ ܐܶܫܬܿܠܶܡ ܠܺܝܗܽܘܕܼܳܝܶܐ̈܂ ܗܳܫܳܐ ܕܶܝܢ ܡܰܠܟܿܽܘܬܼܝ ܕܺܝܠܝ܂ ܠܳܐ ܗ̱ܘܳܬܼ ܡܶܟܿܳܐ܀
18:37 [ai]ܐܳܡܰܪ ܠܶܗ ܦܿܺܝܠܰܛܳܘܣ܂ ܡܳܕܼܶܝܢ ܡܰܠܟܿܳܐ ܐܰܢ̱ܬܿ܂ ܐܳܡܰܪ ܠܶܗ ܝܶܫܽܘܥ܂ ܐܰܢ̱ܬܿ ܐܶܡܰܪܬܿ ܕܡܰܠܟܿܳܐ ܐ̱ܢܳܐ܂ ܐܶܢܳܐ ܠܗܳܕܼܶܐ ܺܝܠܺܝܕܼ ܐ̱ܢܳܐ܂ ܘܰܠܗܳܕܼܶܐ ܐܶܬܼܺܝܬܼ ܠܥܳܠܡܳܐ܂ ܕܰܐܣܗܶܕܼ ܥܰܠ ܫܪܳܪܳܐ܂ ܟܽܠ ܡܰܢ ܕܺܐܝܬܼܰܘܗ̱ܝ ܡܶܢ ܫܪܳܪܳܐ܂ ܫܳܡܰܥ ܩܳܠܝ܂
18:38 [ai]ܐܳܡܰܪ ܠܶܗ ܦܿܺܝܠܰܛܳܘܣ܂ ܡܳܢܰܘ ܫܪܳܪܳܐ܂ ܘܟܼܰܕܼ ܐܶܡܰܪ ܗܳܕܼܶܐ܃ ܢܦܼܰܩ ܠܶܗ ܬܽܘܒܼ ܠܘܳܬܼ ܺܝܗܽܘܕܼܳܝܶܐ̈܂ ܘܶܐܡܰܪ ܠܗܽܘܢ܂ ܐܶܢܳܐ ܐܳܦܼܠܳܐ ܚܕܼܳܐ ܥܶܠܬܼܳܐ ܡܶܫܟܿܰܚ ܐ̱ܢܳܐ ܒܶܗ܂
18:39 [ai]ܥܝܳܕܼܳܐ ܕܶܝܢ ܐܺܝܬܼ ܠܟܼܽܘܢ܂ ܕܚܰܕܼ ܐܶܫܪܶܐ ܠܟܼܽܘܢ ܒܦܶܨܚܳܐ܂ ܨܳܒܼܶܝܢ ܐܢ̱ܬܿܽܘܢ ܗܳܟܼܺܝܠ܃ ܐܶܫܪܶܐ ܠܟܼܽܘܢ ܠܗܳܢܳܐ ܡܰܠܟܿܳܐ ܕܺܝܗܽܘܕܼܳܝܶܐ̈܃
18:40 [ai]ܘܰܩܥܰܘ ܟܽܠܗܽܘܢ܂ ܘܳܐܡܪܺܝܢ܂ ܠܳܐ ܠܗܳܢܳܐ܂ ܐܶܠܳܐ ܠܒܼܰܪ ܐܰܒܿܰܐ܂ ܐܺܝܬܼܰܘܗ̱ܝ ܗ̱ܘܳܐ ܕܶܝܢ ܗܳܢܳܐ܂ ܒܰܪ ܐܰܒܿܰܐ܂ ܓܰܝܳܣܳܐ܀܀

next chapter