← Back
The Comprehensive Aramaic Lexicon
← Return to the Text Browser
click on the file description for more information
62043: P Jn

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


20:01 [ai]ܒܚܰܕܼ ܒܫܰܒܿܳܐ ܕܶܝܢ ܐܶܬܼܳܬܼ ܡܰܪܝܰܡ ܡܰܓܼܕܿܠܳܝܬܳܐ ܒܨܰܦܼܪܳܐ ܥܰܕܼ ܚܶܫܽܘܟܼ܂ ܠܒܼܶܝܬܼ ܩܒܼܽܘܪܳܐ܂ ܘܰܚܙܳܬܼ ܠܟܼܺܐܦܼܳܐ܂ ܕܰܫܩܺܝܠܳܐ ܡܶܢ ܩܰܒܼܪܳܐ܂
20:02 [ai]ܘܪܶܗܛܰܬܼ ܐܶܬܼܳܬܼ ܠܘܳܬܼ ܫܶܡܥܽܘܢ ܟܺܐܦܼܳܐ܂ ܘܰܠܘܳܬܼ ܗܰܘ ܬܰܠܡܺܝܕܼܳܐ ܐ̱ܚܪܺܢܳܐ ܕܪܳܚܶܡ ܗ̱ܘܳܐ ܝܶܫܽܘܥ܂ ܘܳܐܡܪܳܐ ܠܗܽܘܢ܂ ܕܫܰܩܠܽܘܗ̱ܝ ܠܡܳܪܰܢ ܡܶܢ ܗܰܘ ܒܶܝܬܼ ܩܒܼܽܘܪܳܐ܃ ܘܠܳܐ ܝܳܕܼܥܳܐ ܐ̱ܢܳܐ ܐܰܝܟܿܳܐ ܣܳܡܽܘܗ̱ܝ܂
20:03 [ai]ܘܰܢܦܼܰܩ ܫܶܡܥܽܘܢ ܘܗܰܘ ܬܰܠܡܺܝܕܼܳܐ ܐ̱ܚܪܺܢܳܐ܃ ܘܳܐܬܼܶܝܢ ܗ̱ܘܰܘ ܠܒܼܶܝܬܼ ܩܒܼܽܘܪܳܐ܂
20:04 [ai]ܘܪܳܗܛܺܝܢ ܗ̱ܘܰܘ ܬܿܪ̈ܰܝܗܽܘܢ ܐܰܟܼܚܕܼܳܐ܂ ܗܰܘ ܕܶܝܢ ܬܰܠܡܺܝܕܼܳܐ ܪܗܶܛ ܩܰܕܡܶܗ ܠܫܶܡܥܽܘܢ܃ ܘܶܐܬܼܳܐ ܩܰܕܼܡܳܝܳܐ ܠܒܼܶܝܬܼ ܩܒܼܽܘܪܳܐ܂
20:05 [ai]ܘܰܐܕܼܺܝܩ ܚܙܳܐ ܟܶܬܿܳܢܶܐ̈ ܟܰܕܼ ܣܺܝܡܺܝܢ܂ ܡܶܥܰܠ ܕܶܝܢ ܠܳܐ ܥܰܠ܀
20:06 [ai]ܐܶܬܼܳܐ ܕܶܝܢ ܫܶܡܥܽܘܢ ܒܳܬܼܪܶܗ܃ ܘܥܰܠ ܠܒܼܶܝܬܼ ܩܒܼܽܘܪܳܐ܂ ܘܰܚܙܳܐ ܟܶܬܿܳܢܶܐ̈ ܟܰܕܼ ܣܺܝܡܺܝܢ܂
20:07 [ai]ܘܣܽܘܕܼܳܪܳܐ ܗܰܘ ܕܰܚܙܺܝܩ ܗ̱ܘܳܐ ܒܪܺܫܶܗ܃ ܠܳܐ ܥܰܡ ܟܶܬܿܳܢܶܐ̈܂ ܐܶܠܳܐ ܟܰܕܼ ܟܪܺܝܟܼ ܘܣܺܝܡ ܠܰܣܛܰܪ ܒܰܚܕܼܳܐ ܕܽܘܟܿܳܐ܂
20:08 [ai]ܗܳܝܕܶܝܢ ܥܰܠ ܐܳܦܼ ܗܰܘ ܬܰܠܡܺܝܕܼܳܐ ܕܶܐܬܼܳܐ ܩܰܕܼܡܳܝܳܐ ܠܒܼܶܝܬܼ ܩܒܼܽܘܪܳܐ܃ ܘܰܚܙܳܐ܂ ܘܗܰܝܡܶܢ܂
20:09 [ai]ܠܳܐ ܓܶܝܪ ܥܕܼܰܟܿܺܝܠ ܝܳܕܼܥܺܝܢ ܗ̱ܘܰܘ ܡܶܢ ܟܬܼܳܒܼܶܐ̈܃ ܕܰܥܬܼܺܝܕܼ ܗ̱ܘܳܐ ܠܰܡܩܳܡ ܡܶܢ ܡܺܝܬܼܶܐ̈܂
20:10 [ai]ܘܶܐܙܰܠܘ ܗܶܢܽܘܢ ܬܰܠܡܺܝܕܼܶܐ̈ ܬܽܘܒܼ ܠܕܼܽܘܟܿܰܬܼܗܽܘܢ܀
20:11 [ai]ܡܰܪܝܰܡ ܕܶܝܢ ܩܳܝܡܳܐ ܗ̱ܘܳܬܼ ܠܘܳܬܼ ܩܰܒܼܪܳܐ܂ ܘܒܼܳܟܼܝܳܐ܂ ܘܟܼܰܕܼ ܒܳܟܼܝܳܐ܂ ܐܰܕܼܺܝܩܰܬܼ ܒܩܰܒܼܪܳܐ܃
20:12 [ai]ܘܰܚܙܳܬܼ ܬܿܪ̈ܶܝܢ ܡܰܠܰܐܟܼܶܐ̈ ܒܚܶܘܳܪ̈ܶܐ ܕܿܝܳܬܼܒܺܝܢ܂ ܚܰܕܼ ܡܶܢ ܐܶܣܳܕܼܰܘܗ̱ܝ̈܂ ܘܚܰܕܼ ܡܶܢ ܪ̈ܶܓܼܠܰܘܗ̱ܝ܂ ܐܰܝܟܿܳܐ ܕܣܺܝܡ ܗ̱ܘܳܐ ܦܰܓܼܪܶܗ ܕܝܶܫܽܘܥ܂
20:13 [ai]ܘܳܐܡܪܺܝܢ ܠܳܗ܂ ܐܰܢ̱ܬܿܬܼܳܐ܂ ܡܳܢܳܐ ܒܳܟܼܝܳܐ ܐܰܢ̱ܬܿܝ܂ ܐܳܡܪܳܐ ܠܗܽܘܢ܂ ܕܫܰܩܠܽܘܗ̱ܝ ܠܡܳܪܝ܂ ܘܠܳܐ ܝܳܕܼܥܳܐ ܐ̱ܢܳܐ ܐܰܝܟܿܳܐ ܣܳܡܽܘܗ̱ܝ܂
20:14 [ai]ܗܳܕܼܶܐ ܐܶܡܪܰܬܼ ܘܶܐܬܼܦܿܰܢܝܰܬܼ ܠܒܼܶܣܬܿܪܳܗ܃ ܘܰܚܙܳܬܼ ܠܝܶܫܽܘܥ ܕܩܳܐܶܡ܃ ܘܠܳܐ ܝܳܕܼܥܳܐ ܗ̱ܘܳܬܼ ܕܝܶܫܽܘܥ ܗ̱ܽܘ܂
20:15 [ai]ܐܳܡܰܪ ܠܳܗ ܝܶܫܽܘܥ܂ ܐܰܢ̱ܬܿܬܼܳܐ܂ ܡܳܢܳܐ ܒܳܟܼܝܳܐ ܐܰܢ̱ܬܿܝ܂ ܘܰܠܡܰܢ ܒܿܳܥܝܳܐ ܐܰܢ̱ܬܿܝ܂ ܗܺܝ ܕܶܝܢ ܣܶܒܼܪܰܬܼ܂ ܕܓܰܢܳܢܳܐ ܗܽܘ܂ ܘܳܐܡܪܳܐ ܠܶܗ܂ ܡܳܪܝ܃ ܐܶܢ ܐܰܢ̱ܬܿ ܫܩܰܠܬܿܳܝܗ̱ܝ܂ ܐܶܡܰܪ ܠܺܝ ܐܰܝܟܿܳܐ ܣܳܡܬܿܳܝܗ̱ܝ܂ ܐܺܙܰܠ ܐܶܫܩܠܺܝܘܗ̱ܝ܂
20:16 [ai]ܐܳܡܰܪ ܠܳܗ ܝܶܫܽܘܥ܂ ܡܰܪܝܰܡ܂ ܘܶܐܬܼܦܿܰܢܝܰܬܼ ܘܳܐܡܪܳܐ ܠܶܗ ܥܶܒܼܪܳܐܺܝܬܼ܂ ܪܰܒܿܽܘܠܺܝ܂ ܕܡܶܬܼܶܐܡܰܪ ܡܰܠܦܼܳܢܳܐ܂
20:17 [ai]ܐܳܡܰܪ ܠܳܗ ܝܶܫܽܘܥ܂ ܠܳܐ ܬܶܬܼܩܰܪܒܼܺܝܢ ܠܺܝ܂ ܠܳܐ ܓܶܝܪ ܥܕܼܰܟܿܺܝܠ ܣܶܠܩܶܬܼ ܠܘܳܬܼ ܐܳܒܼܝ܂ ܙܶܠܝ ܕܶܝܢ ܠܘܳܬܼ ܐܰܚܰܝ̈܂ ܘܶܐܡܰܪܝ ܠܗܽܘܢ܂ ܣܳܠܶܩ ܐ̱ܢܳܐ ܠܘܳܬܼ ܐܳܒܼܝ܂ ܘܰܐܒܼܽܘܟܼܽܘܢ܂ ܘܰܐܠܳܗܝ܂ ܘܰܐܠܳܗܟܼܽܘܢ܀
20:18 [ai]ܗܳܝܕܶܝܢ ܐܶܬܼܳܬܼ ܡܰܪܝܰܡ ܡܰܓܼܕܿܠܳܝܬܳܐ܃ ܘܣܰܒܿܪܰܬܼ ܠܬܼܰܠܡܺܝܕܼܶܐ̈܂ ܕܰܚܙܳܬܼ ܠܡܳܪܰܢ܂ ܘܰܕܼܗܳܠܶܝܢ ܐܶܡܰܪ ܠܳܗ ܿ܀ܿ܀ܿ
20:19 [ai]ܟܰܕܼ ܗܘܳܐ ܕܶܝܢ ܪܰܡܫܳܐ ܕܝܰܘܡܳܐ ܗܰܘ ܕܚܰܕܼ ܒܫܰܒܿܳܐ܃ ܘܬܼܰܪ̈ܥܶܐ ܐܰܚܺܝܕܼܺܝܢ ܗ̱ܘܰܘ ܕܰܐܝܟܿܳܐ ܕܺܐܝܬܼܰܝܗܽܘܢ ܗ̱ܘܰܘ ܬܰܠܡܺܝܕܼܶܐ̈܃ ܡܶܛܽܠ ܕܶܚܠܬܼܳܐ ܕܺܝܗܽܘܕܼܳܝܶܐ̈܃ ܐܶܬܼܳܐ ܝܶܫܽܘܥ ܩܳܡ ܒܰܝܢܳܬܼܗܽܘܢ܂ ܘܶܐܡܰܪ ܠܗܽܘܢ܂ ܫܠܳܡܳܐ ܥܰܡܟܼܽܘܢ܂
20:20 [ai]ܗܳܕܼܶܐ ܐܶܡܰܪ܃ ܘܚܰܘܺܝ ܐܶܢܽܘܢ ܐܺܝܕܼܰܘܗ̱ܝ̈܂ ܘܣܶܛܪܶܗ܂ ܘܰܚܕܼܺܝܘ ܬܰܠܡܺܝܕܼܶܐ̈ ܕܰܚܙܰܘ ܠܡܳܪܰܢ܂
20:21 [ai]ܐܶܡܰܪ ܠܗܽܘܢ ܕܶܝܢ ܬܽܘܒܼ ܝܶܫܽܘܥ܂ ܫܠܳܡܳܐ ܥܰܡܟܼܽܘܢ܂ ܐܰܝܟܿܰܢܳܐ ܕܫܰܕܿܪܰܢܝ ܐܳܒܼܝ܂ ܐܳܦܼ ܐܶܢܳܐ ܡܫܰܕܿܰܪ ܐ̱ܢܳܐ ܠܟܼܽܘܢ܀
20:22 [ai]ܘܟܼܰܕܼ ܐܶܡܰܪ ܗܳܠܶܝܢ܃ ܢܦܼܰܚ ܒܗܽܘܢ܂ ܘܶܐܡܰܪ ܠܗܽܘܢ܂ ܩܰܒܿܶܠܘ ܪܽܘܚܳܐ ܕܩܽܘܕܼܫܳܐ܂
20:23 [ai]ܐܶܢ ܬܶܫܒܿܩܽܘܢ ܚܛܳܗܶܐ̈ ܠܐ̱ܢܳܫ܂ ܢܶܫܬܿܰܒܼܩܽܘܢ ܠܶܗ܂ ܘܶܐܢ ܬܶܐܚܕܿܽܘܢ ܕܐ̱ܢܳܫ܂ ܐܰܚܺܝܕܼܺܝܢ܀
20:24 [ai]ܬܳܐܘܡܰܐ ܕܶܝܢ ܚܰܕܼ ܡܶܢ ܬܿܪ̈ܶܥܣܰܪܬܳܐ܃ ܗܰܘ ܕܡܶܬܼܶܐܡܰܪ ܬܳܐܡܳܐ܂ ܠܳܐ ܗ̱ܘܳܐ ܬܰܡܳܢ ܗ̱ܘܳܐ ܥܰܡܗܽܘܢ ܟܰܕܼ ܐܶܬܼܳܐ ܝܶܫܽܘܥ܂
20:25 [ai]ܘܳܐܡܪܺܝܢ ܠܶܗ ܬܰܠܡܺܝܕܼܶܐ̈܂ ܚܙܰܝܢ ܠܡܳܪܰܢ܂ ܗܽܘ ܕܶܝܢ ܐܶܡܰܪ ܠܗܽܘܢ܂ ܐܶܠܳܐ ܚܳܙܶܐ ܐ̱ܢܳܐ ܒܺܐܝܕܼܰܘܗ̱ܝ̈ ܕܽܘܟܿܝܳܬܼܳܐ̈ ܕܨܶܨܶܐ̈܃ ܘܪܳܡܶܐ ܐ̱ܢܳܐ ܒܗܶܝܢ ܨܶܒܼܥܳܬܼܝ̈܃ ܘܡܰܘܫܶܛ ܐ̱ܢܳܐ ܐܺܝܕܼܝ ܒܕܰܦܼܢܶܗ܃ ܠܳܐ ܡܗܰܝܡܶܢ ܐ̱ܢܳܐ܀
20:26 [ai]ܘܒܼܳܬܼܰܪ ܬܡܳܢܝܳܐ ܝܰܘܡܺܝܢ̈܃ ܬܽܘܒܼ ܠܓܼܰܘ ܗ̱ܘܰܘ ܬܰܠܡܺܝܕܼܶܐ̈܂ ܘܬܼܳܐܘܡܰܐ ܥܰܡܗܽܘܢ܂ ܘܶܐܬܼܳܐ ܝܶܫܽܘܥ܂ ܟܰܕܼ ܐܰܚܺܝܕܼܺܝܢ ܬܿܰܪ̈ܥܶܐ܃ ܩܳܡ ܒܰܡܨܰܥܬܼܳܐ܂ ܘܶܐܡܰܪ ܠܗܽܘܢ܂ ܫܠܳܡܳܐ ܥܰܡܟܼܽܘܢ܂
20:27 [ai]ܘܶܐܡܰܪ ܠܬܼܳܐܘܡܰܐ܂ ܐܰܝܬܳܐ ܨܶܒܼܥܳܟܼ ܠܗܳܪܟܿܳܐ܂ ܘܰܚܙܺܝ ܐܺܝܕܼܰܝ̈܂ ܘܰܐܝܬܳܐ ܐܺܝܕܼܳܟܼ܂ ܘܰܐܘܫܶܛ ܒܓܰܒܿܝ܂ ܘܠܳܐ ܬܶܗܘܶܐ ܠܳܐ ܡܗܰܝܡܢܳܐ܂ ܐܶܠܳܐ ܡܗܰܝܡܢܳܐ܀
20:28 [ai]ܘܰܥܢܳܐ ܬܳܐܘܡܰܐ܂ ܘܶܐܡܰܪ ܠܶܗ܂ ܡܳܪܝ܂ ܘܰܐܠܳܗܝ܂
20:29 [ai]ܐܳܡܰܪ ܠܶܗ ܝܶܫܽܘܥ܂ ܗܳܫܳܐ ܕܰܚܙܰܝܬܿܳܢܝ܂ ܗܰܝܡܶܢܬܿ܂ ܛܽܘܒܼܰܝܗܽܘܢ̈ ܠܰܐܝܠܶܝܢ ܕܠܳܐ ܚܙܰܐܘܽܢܝ ܘܗܰܝܡܶܢܘ܀܀
20:30 [ai]ܣܰܓܿܺܝܳܐܬܼܳܐ̈ ܕܶܝܢ ܐܳܬܼܘܳܬܼܳܐ̈ ܐ̱ܚܪ̈ܳܢܝܳܬܼܳܐ ܥܒܼܰܕܼ ܝܶܫܽܘܥ ܩܕܼܳܡ ܬܰܠܡܺܝܕܼܰܘܗ̱ܝ̈܃ ܐܰܝܠܶܝܢ ܕܠܳܐ ܟܬܼܺܝܒܼܳܢ̈ ܒܰܟܼܬܼܳܒܼܳܐ ܗܳܢܳܐ܂
20:31 [ai]ܐܳܦܼ ܗܳܠܶܝܢ ܕܶܝܢ ܕܰܟܼܬܼܺܝܒܼܳܢ̈܃ ܕܰܬܼܗܰܝܡܢܽܘܢ܂ ܕܝܶܫܽܘܥ ܗܽܘ ܡܫܺܝܚܳܐ ܒܪܶܗ ܕܰܐܠܳܗܳܐ܂ ܘܡܳܐ ܕܗܰܝܡܶܢܬܿܽܘܢ܃ ܢܶܗܘܽܘܢ ܠܟܼܽܘܢ ܒܰܫܡܶܗ ܚܰܝ̈ܶܐ ܕܰܠܥܳܠܰܡ܀

next chapter