← Back
The Comprehensive Aramaic Lexicon
← Return to the Text Browser
click on the file description for more information
62043: P Jn

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


21:01 [ai]ܒܳܬܼܰܪ ܗܳܠܶܝܢ܃ ܚܰܘܺܝ ܬܽܘܒܼ ܢܰܦܼܫܶܗ ܝܶܫܽܘܥ ܠܬܼܰܠܡܺܝܕܼܰܘܗ̱ܝ̈܃ ܥܰܠ ܝܰܡܳܐ ܕܛܺܝܒܼܶܪܺܝܳܘܣ܂ ܚܰܘܺܝ ܕܶܝܢ ܗܳܟܼܰܢܳܐ܂
21:02 [ai]ܐܺܝܬܼܰܝܗܽܘܢ ܗ̱ܘܰܘ ܐܰܟܼܚܕܼܳܐ܃ ܫܶܡܥܽܘܢ ܟܺܐܦܼܳܐ܂ ܘܬܼܳܐܘܡܰܐ ܕܡܶܬܼܶܐܡܰܪ ܬܳܐܡܳܐ܂ ܘܢܰܬܼܰܢܰܝܐܺܝܠ ܗܰܘ ܕܡܶܢ ܩܳܛܢܶܐ ܕܰܓܼܠܺܝܠܳܐ܂ ܘܰܒܢܰܝ ܙܰܒܼܕܼܰܝ܃ ܘܰܬܼܪ̈ܶܝܢ ܐ̱ܚܪ̈ܳܢܺܝܢ ܡܶܢ ܬܰܠܡܺܝܕܼܶܐ̈܂
21:03 [ai]ܐܳܡܰܪ ܠܗܽܘܢ ܫܶܡܥܽܘܢ ܟܺܐܦܼܳܐ܂ ܐܳܙܶܠ ܐ̱ܢܳܐ ܐܶܨܽܘܕܼ ܢܽܘܢܶܐ̈܂ ܐܳܡܪܺܝܢ ܠܶܗ ܐܳܦܼ ܚܢܰܢ ܐܳܬܼܶܝܢܰܢ ܥܰܡܳܟܼ܂ ܘܰܢܦܼܰܩܘ ܘܰܣܠܶܩܘ ܠܰܣܦܼܺܝܢ̱ܬܳܐ܂ ܘܰܒܗܰܘ ܠܺܠܝܳܐ ܡܶܕܶܡ ܠܳܐ ܨܳܕܼܘ܂
21:04 [ai]ܟܰܕܼ ܕܶܝܢ ܗܘܳܐ ܨܰܦܼܪܳܐ܃ ܩܳܡ ܝܶܫܽܘܥ ܥܰܠ ܝܰܕܼ ܝܰܡܳܐ܃ ܘܠܳܐ ܝܕܼܰܥܘ ܬܰܠܡܺܝܕܼܶܐ̈ ܕܝܶܫܽܘܥ ܗ̱ܽܘ܀
21:05 [ai]ܘܶܐܡܰܪ ܠܗܽܘܢ ܝܶܫܽܘܥ܂ ܛܠܳܝܶܐ̈܃ ܠܡܳܐ܃ ܐܺܝܬܼ ܠܟܼܽܘܢ ܡܶܕܶܡ ܠܡܶܠܥܰܣ܃ ܐܳܡܪܺܝܢ ܠܶܗ ܠܳܐ܂
21:06 [ai]ܐܳܡܰܪ ܠܗܽܘܢ܂ ܐܰܪܡܰܘ ܡܨܺܝܕܼܬܿܟܼܽܘܢ ܡܶܢ ܓܰܒܿܳܐ ܕܝܰܡܺܝܢܳܐ ܕܰܣܦܼܺܝܢ̱ܬܳܐ܂ ܘܡܶܫܟܿܚܺܝܢ ܐܢ̱ܬܿܽܘܢ܂ ܘܰܐܪܡܺܝܘ܂ ܘܠܳܐ ܐܶܫܟܿܰܚܘ ܠܡܶܓܿܕܼܳܗ ܠܰܡܨܺܝܕܼܬܳܐ܃ ܡܶܢ ܣܽܘܓܼܳܐܐ ܕܢܽܘܢܶܐ̈ ܕܶܐܚܕܿܰܬܼ܀
21:07 [ai]ܘܶܐܡܰܪ ܬܰܠܡܺܝܕܼܳܐ ܗܰܘ ܕܪܳܚܶܡ ܗ̱ܘܳܐ ܠܶܗ ܝܶܫܽܘܥ ܠܟܼܺܐܦܼܳܐ܂ ܗܳܢܳܐ܂ ܡܳܪܰܢ ܗ̱ܽܘ܂ ܫܶܡܥܽܘܢ ܕܶܝܢ ܟܰܕܼ ܫܡܰܥ ܕܡܳܪܰܢ ܗ̱ܽܘ܃ ܢܣܰܒܼ ܟܽܘܬܿܺܝܢܶܗ܂ ܡܚܳܐ ܒܚܰܨܰܘܗ̱ܝ̈܂ ܡܶܛܽܠ ܕܥܰܪܛܶܠܳܝܳܐ ܗ̱ܘܳܐ܂ ܘܰܫܕܼܳܐ ܢܰܦܼܫܶܗ ܒܝܰܡܳܐ܂ ܕܢܺܐܬܼܶܐ ܠܘܳܬܼ ܝܶܫܽܘܥ܂
21:08 [ai]ܐ̱ܚܪ̈ܳܢܶܐ ܕܶܝܢ ܬܰܠܡܺܝܕܼܶܐ̈܂ ܒܰܣܦܼܺܝܢ̱ܬܳܐ ܐܶܬܼܰܘ܂ ܠܳܐ ܓܶܝܪ ܪܰܚܺܝܩܺܝܢ ܗ̱ܘܰܘ ܣܰܓܿܺܝ ܡܶܢ ܐܰܪܥܳܐ܃ ܐܶܠܳܐ ܐܰܝܟܼ ܡܰܐܬܼܶܝܢ ܐܰܡܺܝܢ̈܂ ܘܢܳܓܼܕܺܝܢ ܗ̱ܘܰܘ ܠܳܗ ܠܰܡܨܺܝܕܼܬܳܐ ܗܳܝ ܕܢܽܘܢܶܐ̈܀
21:09 [ai]ܟܰܕܼ ܕܶܝܢ ܣܠܶܩܘ ܠܰܐܪܥܳܐ܃ ܚܙܰܘ ܓܿܽܘܡܪ̈ܶܐ ܟܰܕܼ ܣܺܝܡܳܢ̈܂ ܘܢܽܘܢܳܐ ܟܰܕܼ ܣܺܝܡ ܥܠܰܝܗܶܝܢ ܘܠܰܚܡܳܐ܂
21:10 [ai]ܘܶܐܡܰܪ ܠܗܽܘܢ ܝܶܫܽܘܥ܂ ܐܰܝܬܰܘ ܡܶܢ ܗܳܢܽܘܢ ܢܽܘܢܶܐ̈ ܕܨܳܕܼܬܿܽܘܢ ܗܳܫܳܐ܂
21:11 [ai]ܘܰܣܠܶܩ ܫܶܡܥܽܘܢ ܟܺܐܦܼܳܐ܂ ܘܢܰܓܼܕܿܳܗ ܠܰܡܨܺܝܕܼܬܳܐ ܠܰܐܪܥܳܐ܃ ܟܰܕܼ ܡܰܠܝܳܐ ܢܽܘܢܶܐ̈ ܪ̈ܰܘܪܒܼܶܐ܂ ܡܳܐܐ ܘܚܰܡܫܺܝܢ ܘܰܬܼܠܳܬܼܳܐ܂ ܘܰܒܗܳܢܳܐ ܟܽܠܶܗ ܝܽܘܩܪܳܐ ܠܳܐ ܐܶܨܛܰܪܝܰܬܼ ܡܨܺܝܕܼܬܳܐ ܗܳܝ܀
21:12 [ai]ܘܶܐܡܰܪ ܠܗܽܘܢ ܝܶܫܽܘܥ܂ ܬܰܘ ܐܶܫܬܿܰܪܰܘ܂ ܐ̱ܢܳܫ ܕܶܝܢ ܡܶܢ ܬܰܠܡܺܝܕܼܶܐ̈܃ ܠܳܐ ܡܰܡܪܰܚ ܗ̱ܘܳܐ ܕܰܢܫܰܐܠܺܝܘܗ̱ܝ ܕܡܰܢܽܘ܂ ܕܝܳܕܼܥܺܝܢ ܗ̱ܘܰܘ ܕܡܳܪܰܢ ܗ̱ܽܘ܂
21:13 [ai]ܩܪܶܒܼ ܕܶܝܢ ܝܶܫܽܘܥ܂ ܘܰܫܩܰܠ ܠܰܚܡܳܐ ܘܢܽܘܢܶܐ̈܂ ܘܝܰܗ̱ܒܼ ܠܗܽܘܢ܀
21:14 [ai]ܗܳܕܼܶܐ ܕܰܬܼܠܳܬܼ ܙܰܒܼܢܺܝܢ̈ ܐܶܬܼܚܙܺܝ ܝܶܫܽܘܥ ܠܬܼܰܠܡܺܝܕܼܰܘܗ̱ܝ̈܂ ܟܰܕܼ ܩܳܡ ܡܶܢ ܒܶܝܬܼ ܡܺܝܬܼܶܐ̈܀܀
21:15 [ai]ܟܰܕܼ ܕܶܝܢ ܐܶܫܬܿܰܪܺܝܘ܃ ܐܶܡܰܪ ܝܶܫܽܘܥ ܠܫܶܡܥܽܘܢ ܟܺܐܦܼܳܐ܂ ܫܶܡܥܽܘܢ ܒܰܪ ܝܳܘܢܰܐ܃ ܪܳܚܶܡ ܐܰܢ̱ܬܿ ܠܺܝ ܝܰܬܿܺܝܪ ܡܶܢ ܗܳܠܶܝܢ܃ ܐܳܡܰܪ ܠܶܗ܂ ܐܺܝܢ ܡܳܪܝ܂ ܐܰܢ̱ܬܿ ܝܳܕܼܰܥ ܐܰܢ̱ܬܿ܂ ܕܪܳܚܶܡ ܐ̱ܢܳܐ ܠܳܟܼ܂ ܐܳܡܰܪ ܠܶܗ܂ ܪܥܺܝ ܠܺܝ ܐܶܡܪ̈ܰܝ܀
21:16 [ai]ܐܳܡܰܪ ܠܶܗ ܬܽܘܒܼ ܕܿܬܼܰܪ̈ܬܿܶܝܢ ܙܰܒܼܢܺܝܢ̈܂ ܫܶܡܥܽܘܢ ܒܰܪ ܝܳܘܢܰܐ܃ ܪܳܚܶܡ ܐܰܢ̱ܬܿ ܠܺܝ܃ ܐܳܡܰܪ ܠܶܗ ܐܺܝܢ ܡܳܪܝ܂ ܐܰܢ̱ܬܿ ܝܳܕܼܰܥ ܐܰܢ̱ܬܿ ܕܪܳܚܶܡ ܐ̱ܢܳܐ ܠܳܟܼ܂ ܐܳܡܰܪ ܠܶܗ ܝܶܫܽܘܥ܂ ܪܥܺܝ ܠܺܝ ܥܶܪ̈ܒܰܝ܀
21:17 [ai]ܐܳܡܰܪ ܠܶܗ ܕܰܬܼܠܳܬܼ ܙܰܒܼܢܺܝܢ̈܂ ܫܶܡܥܽܘܢ ܒܰܪ ܝܳܘܢܰܐ܃ ܪܳܚܶܡ ܐܰܢ̱ܬܿ ܠܺܝ܃ ܘܟܼܶܪܝܰܬܼ ܠܶܗ ܠܟܼܺܐܦܼܳܐ ܕܶܐܡܰܪ ܠܶܗ ܕܰܬܼܠܳܬܼ ܙܰܒܼܢܺܝܢ̈ ܕܪܳܚܶܡ ܐܰܢ̱ܬܿ ܠܺܝ܂ ܘܶܐܡܰܪ ܠܶܗ܂ ܡܳܪܝ܃ ܟܽܠ ܡܶܕܶܡ ܐܰܢ̱ܬܿ ܚܳܟܼܶܡ ܐܰܢ̱ܬܿ܂ ܐܰܢ̱ܬܿ ܝܳܕܼܰܥ ܐܰܢ̱ܬܿ܂ ܕܪܳܚܶܡ ܐ̱ܢܳܐ ܠܳܟܼ܂ ܐܳܡܰܪ ܠܶܗ ܝܶܫܽܘܥ܂ ܪܥܺܝ ܠܺܝ ܢܩܰܘܳܬܼܝ̈܀
21:18 [ai]ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܳܟܼ܃ ܕܟܰܕܼ ܛܠܶܐ ܗ̱ܘܰܝܬܿ܃ ܐܰܢ̱ܬܿ ܠܢܰܦܼܫܳܟܼ ܐܳܣܰܪ ܗ̱ܘܰܝܬܿ ܚܰܨܰܝܟܿ̈܃ ܘܰܡܗܰܠܶܟܼ ܗ̱ܘܰܝܬܿ ܠܰܐܝܟܿܳܐ ܕܨܳܒܼܶܐ ܐܰܢ̱ܬܿ܂ ܡܳܐ ܕܶܝܢ ܕܰܣܶܐܒܼܬܿ܃ ܬܶܦܼܫܽܘܛ ܐܺܝܕܼܰܝܟܿ̈܂ ܘܰܐ̱ܚܪܺܝܢ ܢܶܐܣܽܘܪ ܠܳܟܼ ܚܰܨܰܝܟܿ̈܂ ܘܢܰܘܒܿܠܳܟܼ܂ ܠܰܐܝܟܿܳܐ ܕܠܳܐ ܨܳܒܼܶܐ ܐܰܢ̱ܬܿ܂
21:19 [ai]ܗܳܕܼܶܐ ܕܶܝܢ ܐܶܡܰܪ܂ ܕܰܢܚܰܘܶܐ ܒܰܐܝܢܳܐ ܡܰܘܬܳܐ ܥܬܼܺܝܕܼ ܕܰܢܫܰܒܿܰܚ ܠܰܐܠܳܗܳܐ܂ ܘܟܼܰܕܼ ܐܶܡܰܪ ܗܳܠܶܝܢ܂ ܐܶܡܰܪ ܠܶܗ܂ ܬܳܐ ܒܳܬܼܰܪܝ܀
21:20 [ai]ܘܶܐܬܼܦܿܢܺܝ ܫܶܡܥܽܘܢ ܟܺܐܦܼܳܐ܂ ܘܰܚܙܳܐ ܠܬܼܰܠܡܺܝܕܼܳܐ ܗܰܘ ܕܪܳܚܶܡ ܗ̱ܘܳܐ ܝܶܫܽܘܥ ܕܳܐܬܼܶܐ ܒܳܬܼܪܶܗ܂ ܗܰܘ ܕܰܢܦܼܰܠ ܗ̱ܘܳܐ ܒܰܚܫܳܡܺܝܬܼܳܐ ܥܰܠ ܚܰܕܼܝܶܗ ܕܝܶܫܽܘܥ܂ ܘܶܐܡܰܪ܂ ܡܳܪܝ܂ ܡܰܢܽܘ ܡܰܫܠܶܡ ܠܳܟܼ܂
21:21 [ai]ܠܗܳܢܳܐ ܟܰܕܼ ܚܙܳܐ ܟܺܐܦܼܳܐ܂ ܐܶܡܰܪ ܠܝܶܫܽܘܥ܂ ܡܳܪܝ܂ ܘܗܳܢܳܐ܂ ܡܳܢܳܐ܂
21:22 [ai]ܐܳܡܰܪ ܠܶܗ ܝܶܫܽܘܥ܂ ܐܶܢ ܨܳܒܼܶܐ ܐ̱ܢܳܐ ܕܰܢܩܰܘܶܐ ܗܳܢܳܐ ܥܕܼܰܡܳܐ ܕܳܐܬܼܶܐ ܐ̱ܢܳܐ܂ ܠܳܟܼܡܳܐ ܠܳܟܼ܂ ܐܰܢ̱ܬܿ ܬܳܐ ܒܳܬܼܰܪܝ܂
21:23 [ai]ܘܢܶܦܼܩܰܬܼ ܗܳܕܼܶܐ ܡܶܠܬܼܳܐ ܒܶܝܬܼ ܐܰܚܶܐ̈܃ ܕܗܰܘ ܬܰܠܡܺܝܕܼܳܐ ܠܳܐ ܡܳܐܶܬܼ܂ ܝܶܫܽܘܥ ܕܶܝܢ܂ ܠܳܐ ܗ̱ܘܳܐ ܕܠܳܐ ܡܳܐܶܬܼ ܐܶܡܰܪ܂ ܐܶܠܳܐ ܕܶܐܢ ܨܳܒܼܶܐ ܐ̱ܢܳܐ ܕܰܢܩܰܘܶܐ ܗܳܢܳܐ ܥܕܼܰܡܳܐ ܕܳܐܬܼܶܐ ܐ̱ܢܳܐ܂ ܠܳܟܼ ܡܳܐ ܠܳܟܼ܂
21:24 [ai]ܗܳܢܰܘ ܬܰܠܡܺܝܕܼܳܐ ܕܰܐܣܗܶܕܼ ܥܰܠ ܗܳܠܶܝܢ ܟܽܠܗܶܝܢ܃ ܘܳܐܦܼ ܟܬܼܰܒܼ ܐܶܢܶܝܢ̈܂ ܘܝܳܕܼܥܺܝܢ ܚ̱ܢܰܢ ܕܫܰܪܺܝܪܳܐ ܗ̱ܝ ܣܳܗܕܿܽܘܬܼܶܗ܀
21:25 [ai]ܐܺܝܬܼ ܕܶܝܢ ܐܳܦܼ ܐ̱ܚܪ̈ܳܢܝܳܬܼܳܐ ܣܰܓܿܺܝܳܐܬܼܳܐ̈ ܕܰܥܒܼܰܕܼ ܝܶܫܽܘܥ܂ ܐܰܝܠܶܝܢ ܕܶܐܠܽܘ ܚܕܼܳܐ ܚܕܼܳܐ ܡܶܬܼܟܿܰܬܼܒܿܳܢ̈ ܗ̱ܘܰܝ̈܃ ܐܳܦܼ ܠܳܐ ܗܽܘ ܥܳܠܡܳܐ ܐܰܝܟܼ ܕܣܳܒܼܰܪ ܐ̱ܢܳܐ܃ ܣܳܦܼܶܩ ܗ̱ܘܳܐ ܠܰܟܼܬܼܳܒܼܶܐ̈ ܕܿܡܶܬܼܟܿܰܬܼܒܺܝܢ ܗ̱ܘܰܘ܀