← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62044: P Acts

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:01 [ai]ܟܬܼܳܒܼܳܐ ܩܰܕܼܡܳܝܳܐ ܟܶܬܼܒܿܶܬܼ ܐܳܘ ܬܿܶܐܳܘܦܼܺܝܠܶܐ܃ ܥܰܠ ܟܽܠܗܶܝܢ ܐܰܝܠܶܝܢ ܕܫܰܪܺܝ ܡܳܪܰܢ ܝܶܫܽܘܥ ܡܫܺܝܚܳܐ ܠܡܶܥܒܿܰܕܼ ܘܰܠܡܰܠܳܦܼܽܘ܃
01:02 [ai]ܥܕܼܰܡܳܐ ܠܝܰܘܡܳܐ ܗܰܘ ܕܒܶܗ ܐܶܣܬܿܰܠܰܩ܂ ܡܶܢ ܒܳܬܼܰܪ ܕܦܰܩܶܕܼ ܗ̱ܘܳܐ ܐܶܢܽܘܢ ܠܰܫܠܺܝܚܶܐ̈܃ ܐܰܝܠܶܝܢ ܕܰܓܼܒܼܳܐ ܒܪܽܘܚܳܐ ܕܩܽܘܕܼܫܳܐ܂
01:03 [ai]ܗܳܢܽܘܢ ܕܳܐܦܼ ܚܰܘܺܝ ܠܗܽܘܢ ܢܰܦܼܫܶܗ ܟܰܕܼ ܚܰܝ ܡܶܢ ܒܳܬܼܰܪ ܕܚܰܫ܃ ܒܳܐܬܼܘܳܬܼܳܐ̈ ܣܰܓܿܺܝܳܐܬܼܳܐ̈ ܒܝܰܘܡܺܝܢ̈ ܐܰܪܒܥܺܝܢ܂ ܟܰܕܼ ܡܶܬܼܚܙܶܐ ܗ̱ܘܳܐ ܠܗܽܘܢ܂ ܘܳܐܡܰܪ ܥܰܠ ܡܰܠܟܿܽܘܬܼܳܐ ܕܰܐܠܳܗܳܐ܂
01:04 [ai]ܘܟܼܰܕܼ ܐܶܟܼܰܠ ܥܰܡܗܽܘܢ ܠܰܚܡܳܐ܃ ܦܰܩܶܕܼ ܐܶܢܽܘܢ ܕܡܶܢ ܐܽܘܪܺܫܠܶܡ ܠܳܐ ܢܶܦܼܪܩܽܘܢ܃ ܐܶܠܳܐ ܕܰܢܩܰܘܽܘܢ ܠܫܽܘܘ̱ܕܿܳܝܶܗ ܕܰܐܒܼܳܐ܂ ܗܰܘ ܕܰܫܡܰܥܬܿܽܘܢ ܡܶܢܝ܂
01:05 [ai]ܕܝܽܘܚܰܢܳܢ ܐܰܥܡܶܕܼ ܒܡܰܝܳܐ̈܃ ܘܰܐܢ̱ܬܿܽܘܢ ܬܶܥܡܕܼܽܘܢ܂ ܒܪܽܘܚܳܐ ܕܩܽܘܕܼܫܳܐ܂ ܠܳܐ ܒܳܬܼܰܪ ܝܰܘܡܳܬܼܳܐ̈ ܣܰܓܿܺܝܶܐܐ̈܂
01:06 [ai]ܗܶܢܽܘܢ ܕܶܝܢ ܟܰܕܼ ܟܢܺܝܫܺܝܢ܃ ܫܰܐܠܽܘܗ̱ܝ܂ ܘܳܐܡܪܺܝܢ ܠܶܗ܂ ܡܳܪܰܢ܂ ܐܶܢ ܒܗܳܢܳܐ ܙܰܒܼܢܳܐ ܡܰܦܼܢܶܐ ܐܰܢ̱ܬܿ ܡܰܠܟܿܽܘܬܼܳܐ ܠܺܐܝܣܪܳܝܶܠ܂
01:07 [ai]ܐܳܡܰܪ ܠܗܽܘܢ ܗܽܘ܂ ܠܳܐ ܗ̱ܘܳܬܼ ܕܺܝܠܟܼܽܘܢ ܗܳܕܼܶܐ ܠܡܶܕܿܰܥ ܙܰܒܼܢܳܐ ܐܰܘ ܙܰܒܼܢܶܐ̈܃ ܐܰܝܠܶܝܢ ܕܰܐܒܼܳܐ ܣܳܡ ܐܶܢܽܘܢ ܒܫܽܘܠܛܳܢܳܐ ܕܢܰܦܼܫܶܗ܂
01:08 [ai]ܐܶܠܳܐ ܟܰܕܼ ܬܺܐܬܼܶܐ ܪܽܘܚܳܐ ܕܩܽܘܕܼܫܳܐ ܥܠܰܝܟܿܽܘܢ܃ ܬܩܰܒܿܠܽܘܢ ܚܰܝܠܳܐ܂ ܘܬܼܶܗܘܽܘܢ ܠܺܝ ܣܳܗܕܿܶܐ̈܂ ܒܽܐܘܪܺܫܠܶܡ ܘܰܒܟܼܽܠܳܗ ܺܝܗܽܘܕܼ܂ ܘܳܐܦܼ ܒܶܝܬܼ ܫܳܡܪ̈ܳܝܶܐ܂ ܘܰܥܕܼܰܡܳܐ ܠܣܰܘܦܿܶܝܗ̈ ܕܰܐܪܥܳܐ܂
01:09 [ai]ܘܟܼܰܕܼ ܗܳܠܶܝܢ ܐܶܡܰܪ܃ ܟܰܕܼ ܚܳܙܶܝܢ ܠܶܗ܂ ܐܶܣܬܿܰܠܰܩ܂ ܘܰܥܢܳܢܳܐ ܩܰܒܿܶܠܬܼܶܗ܂ ܘܶܐܬܼܟܿܰܣܺܝ ܡܶܢ ܥܰܝܢܰܝܗܽܘܢ̈܂
01:10 [ai]ܘܟܼܰܕܼ ܚܳܝܪܺܝܢ ܗ̱ܘܰܘ ܒܰܫܡܰܝܳܐ܂ ܟܰܕܼ ܗܽܘ ܐܳܙܶܠ ܗ̱ܘܳܐ܃ ܐܶܫܬܿܟܼܰܚܘ ܬܿܪ̈ܶܝܢ ܓܿܰܒܼܪ̈ܺܝܢ ܩܳܝܡܺܝܢ ܠܘܳܬܼܗܽܘܢ܂ ܒܰܠܒܼܽܘܫܶܐ ܚܶܘܳܪܳܐ܂
01:11 [ai]ܘܳܐܡܪܺܝܢ ܠܗܽܘܢ܂ ܓܿܰܒܼܪ̈ܶܐ ܓܠܺܝܠܳܝܶܐ̈܃ ܡܳܢܳܐ ܩܳܝܡܺܝܢ ܐܢ̱ܬܿܽܘܢ ܘܚܳܝܪܺܝܢ ܒܰܫܡܰܝܳܐ܂ ܗܳܢܳܐ ܝܶܫܽܘܥ ܕܶܐܣܬܿܰܠܰܩ ܡܶܢܟܼܽܘܢ ܠܰܫܡܰܝܳܐ܃ ܗܳܟܼܰܢܳܐ ܢܺܐܬܼܶܐ܂ ܐܰܝܟܼ ܡܳܐ ܕܰܚܙܰܝܬܿܽܘܢܳܝܗ̱ܝ ܕܰܣܠܶܩ ܠܰܫܡܰܝܳܐ܀
01:12 [ai]ܘܡܶܢ ܒܳܬܼܰܪܟܿܶܢ܂ ܗܦܼܰܟܼܘ ܠܗܽܘܢ ܠܽܐܘܪܺܫܠܶܡ܃ ܡܶܢ ܛܽܘܪܳܐ ܕܡܶܬܼܩܪܶܐ ܕܿܒܶܝܬܼ ܙܰܝܬܿܶܐ̈܂ ܕܺܐܝܬܼܰܘܗ̱ܝ ܥܰܠ ܓܶܢ̱ܒܼ ܐܽܘܪܺܫܠܶܡ܂ ܘܦܼܰܪܺܝܩ ܡܶܢܳܗ ܐܰܝܟܼ ܫܰܒܼܥܳܐ ܐܶܣܛܕܼܰܘܳܢ̈܂
01:13 [ai]ܘܡܶܢ ܒܳܬܼܰܪ ܕܥܰܠܘ܃ ܣܠܶܩܘ ܠܗܽܘܢ ܠܥܶܠܺܝܬܼܳܐ ܗܳܝ ܕܗܳܘܶܝܢ ܗ̱ܘܰܘ ܒܿܳܗ܂ ܦܿܶܛܪܳܘܣ ܘܝܽܘܚܰܢܳܢ܂ ܘܝܰܥܩܽܘܒܼ ܘܰܐܢܕܿܪܶܐܘܳܣ܂ ܘܦܼܺܝܠܺܝܦܿܳܘܣ ܘܬܼܳܐܘܡܰܐ܂ ܘܡܰܬܿܰܝܘ ܒܼܰܪ ܬܿܽܘܠܡܰܝ܂ ܘܝܰܥܩܽܘܒܼ ܒܰܪ ܚܰܠܦܼܰܝ܂ ܘܫܶܡܥܽܘܢ ܛܰܢܳܢܳܐ܂ ܘܺܝܗܽܘܕܼܳܐ ܒܰܪ ܝܰܥܩܽܘܒܼ܂
01:14 [ai]ܗܳܠܶܝܢ ܟܽܠܗܽܘܢ܃ ܐܰܟܼܚܕܼܳܐ ܐܰܡܺܝܢܺܝܢ ܗ̱ܘܰܘ ܒܰܨܠܽܘܬܼܳܐ ܒܰܚܕܼܳܐ ܢܦܼܶܫ܃ ܥܰܡ ܢܶܫܶܐ̈܂ ܘܥܰܡ ܡܰܪܝܰܡ܂ ܐܶܡܶܗ ܕܝܶܫܽܘܥ܂ ܘܥܰܡ ܐܰܚܰܘܗ̱ܝ̈܀
01:15 [ai]ܘܰܒܗܽܘܢ ܒܝܰܘܡܳܬܼܳܐ̈ ܗܳܢܽܘܢ܃ ܩܳܡ ܫܶܡܥܽܘܢ ܟܺܐܦܼܳܐ ܡܶܨܥܰܬܼ ܬܰܠܡܺܝܕܼܶܐ̈܂ ܐܺܝܬܼ ܗ̱ܘܳܐ ܕܶܝܢ ܬܰܡܳܢ ܟܶܢܫܳܐ ܕܐ̱ܢܳܫܳܐ ܐܰܝܟܼ ܡܳܐܐ ܘܥܶܣܪܺܝܢ܂ ܘܶܐܡܰܪ܂
01:16 [ai]ܓܿܰܒܼܪ̈ܶܐ ܐܰܚܰܝܢ̈܃ ܙܳܕܼܶܩ ܗ̱ܘܳܐ ܕܢܶܬܼܡܰܠܶܐ ܟܬܼܳܒܼܳܐ܃ ܐܰܝܢܳܐ ܕܿܩܰܕܶܡ ܐܶܡܰܪ ܪܽܘܚܳܐ ܕܩܽܘܕܼܫܳܐ ܒܦܽܘܡܶܗ ܕܕܼܰܘܺܝܕܼ܃ ܥܰܠ ܺܝܗܽܘܕܼܳܐ ܗܰܘ ܕܰܗܘܳܐ ܡܕܼܰܒܿܪܳܢܳܐ ܠܗܳܢܽܘܢ ܕܶܐܚܰܕܼܘ ܠܝܶܫܽܘܥ܂
01:17 [ai]ܡܶܛܽܠ ܕܰܡܢܶܐ ܗ̱ܘܳܐ ܥܰܡܰܢ܂ ܘܺܐܝܬܼ ܗ̱ܘܳܐ ܠܶܗ ܦܶܣܳܐ ܒܬܶܫܡܶܫܬܳܐ ܗܳܕܼܶܐ܂
01:18 [ai]ܗܳܢܰܘ ܕܰܩܢܳܐ ܠܶܗ ܩܪܺܝܬܼܳܐ ܡܶܢ ܐܰܓܼܪܳܐ ܕܰܚܛܺܝܬܼܳܐ܂ ܘܰܢܦܼܰܠ ܥܰܠ ܐܰܦܿܰܘܗ̱ܝ̈ ܥܰܠ ܐܰܪܥܳܐ܃ ܘܶܐܬܼܦܿܪܶܬܼ ܡܶܢ ܡܨܰܥܬܼܶܗ܂ ܘܶܐܬܼܶܐܫܶܕܼ ܟܽܠܶܗ ܓܘܳܝܶܗ܂
01:19 [ai]ܘܗܺܝ ܗܳܕܼܶܐ ܐܶܬܼܝܰܕܼܥܰܬܼ ܠܟܼܽܠܗܽܘܢ ܕܥܳܡܪܺܝܢ ܒܽܐܘܪܺܫܠܶܡ܂ ܘܗܳܟܼܰܢܳܐ ܐܶܬܼܩܰܪܝܰܬܼ ܩܪܺܝܬܼܳܐ ܗܳܝ ܒܠܶܫܳܢܶܗ ܕܰܐܬܼܪܳܐ܂ ܚܩܰܠ ܕܡܳܐ܂ ܕܺܐܝܬܼܰܘܗ̱ܝ ܬܽܘܪܓܿܳܡܳܗ ܩܽܘܪܝܰܬܼ ܕܶܡ܂
01:20 [ai]ܟܬܼܺܝܒܼ ܓܶܝܪ ܒܣܶܦܼܪܳܐ ܕܿܡܰܙܡܽܘܪ̈ܶܐ܃ ܕܕܼܰܝܪܶܗ ܬܶܗܘܶܐ ܚܰܪܒܿܳܐ܃ ܘܥܳܡܽܘܪ ܠܳܐ ܢܶܗܘܶܐ ܒܿܳܗ܂ ܘܬܼܶܫܡܶܫܬܿܶܗ ܢܶܣܰܒܼ ܐ̱ܚܪܺܝܢ܂
01:21 [ai]ܘܳܠܝܳܐ ܗ̱ܝ ܗܳܟܼܺܝܠ ܠܚܰܕܼ ܡܶܢ ܗܳܠܶܝܢ ܓܿܰܒܼܪ̈ܶܐ܃ ܕܰܗܘܰܘ ܥܰܡܰܢ ܒܗܳܢܳܐ ܙܰܒܼܢܳܐ ܟܽܠܶܗ܃ ܕܒܶܗ ܥܰܠ ܘܰܢܦܼܰܩ ܥܠܰܝܢ ܡܳܪܰܢ ܝܶܫܽܘܥ܃
01:22 [ai]ܕܰܐܩܶܦܼ ܡܶܢ ܡܰܥܡܽܘܕܼܺܝܬܼܶܗ ܕܝܽܘܚܰܢܳܢ܃ ܥܕܼܰܡܳܐ ܠܝܰܘܡܳܐ ܕܶܐܣܬܿܰܠܰܩ ܡܶܢ ܠܘܳܬܼܰܢ܃ ܕܗܽܘ ܢܶܗܘܶܐ ܥܰܡܰܢ ܣܳܗܕܿܳܐ ܕܰܩܝܳܡܬܿܶܗ܂
01:23 [ai]ܘܰܐܩܺܝܡܘ ܬܿܪ̈ܶܝܢ܂ ܠܝܰܘܣܶܦܼ܂ ܕܡܶܬܼܩܪܶܐ ܒܰܪܫܰܒܿܳܐ܂ ܕܶܐܫܬܿܰܡܺܝ ܝܽܘܣܛܳܘܣ܃ ܘܰܠܡܰܬܿܺܝܰܐ܂
01:24 [ai]ܘܟܼܰܕܼ ܨܰܠܺܝܘ܂ ܐܶܡܰܪܘ܂ ܐܰܢ̱ܬܿ ܡܳܪܝܳܐ ܝܳܕܼܰܥ ܕܰܒܼܠܶܒܿܰܘܳܬܼܳܐ̈ ܕܟܽܠ܃ ܚܰܘܳܐ ܚܰܕܼ ܐܰܝܢܳܐ ܕܓܳܒܼܶܐ ܐܰܢ̱ܬܿ ܡܶܢ ܗܳܠܶܝܢ ܬܿܪ̈ܰܝܗܽܘܢ܃
01:25 [ai]ܕܗܽܘ ܢܩܰܒܿܶܠ ܦܶܣܳܐ ܕܬܶܫܡܶܫܬܳܐ܃ ܘܰܫܠܺܝܚܽܘܬܼܳܐ ܕܡܶܢܳܗ ܦܪܰܩ ܺܝܗܽܘܕܼܳܐ܂ ܕܢܺܐܙܰܠ ܠܶܗ ܠܰܐܬܼܪܶܗ܂
01:26 [ai]ܘܰܐܪܡܺܝܘ ܦܶܨܶܐ̈܃ ܘܣܶܠܩܰܬܼ ܠܡܰܬܿܺܝܰܐ܂ ܘܶܐܬܼܡܢܺܝ ܥܰܡ ܚܕܼܰܥܣܰܪ ܫܠܺܝܚܶܐ̈

next chapter