The Comprehensive Aramaic Lexicon

02:01 [ai]	ܘܟܼܰܕܼ ܐܶܬܼܡܰܠܺܝܘ ܝܰܘܡܳܬܼܳܐ̈ ܕܦܿܶܢܛܺܩܳܘܣܛܺܐ܃ ܟܰܕܼ ܟܢܺܝܫܺܝܢ
02:02 [ai]	ܗܘܳܐ ܡܶܢ ܫܶܠܝܳܐ ܡܶܢ ܫܡܰܝܳܐ܂ ܩܳܠܳܐ܂ ܐܰܝܟܼ ܪܽܘܚܳܐ ܥܰܙܺܝܙܬܳܐ܂ ܘܶܐܬܼܡܠܺܝ ܗ̱ܘܳܐ ܡܶܢܶܗ܃ ܟܽܠܶܗ ܒܰܝܬܳܐ ܗܰܘ ܕܒܶܗ ܝܳܬܼܒܺܝܢ ܗ̱ܘܰܘ܂
02:03 [ai]	ܘܶܐܬܼܚܙܺܝܘ ܠܗܽܘܢ ܠܶܫܳܢܶܐ̈ ܕܡܶܬܼܦܿܰܠܓܼܺܝܢ ܗ̱ܘܰܘ ܐܰܝܟܼ ܢܽܘܪܳܐ܂ ܘܺܝܬܼܶܒܼܘ ܥܰܠ ܚܰܕܼ ܚܰܕܼ ܡܶܢܗܽܘܢ܂
02:04 [ai]	ܘܶܐܬܼܡܠܺܝܘ ܟܽܠܗܽܘܢ ܒܪܽܘܚܳܐ ܕܩܽܘܕܼܫܳܐ܂ ܘܰܐܩܶܦܼܘ ܗ̱ܘܰܘ ܠܰܡܡܰܠܳܠܽܘ ܒܠܶܫܳܢ ܠܶܫܳܢ܃ ܐܰܝܟܼ ܡܳܐ ܕܪܽܘܚܳܐ ܝܳܗܶܒܼ ܗ̱ܘܳܐ ܠܗܽܘܢ ܠܰܡܡܰܠܳܠܽܘ܂
02:05 [ai]	ܐܺܝܬܼ ܗ̱ܘܰܘ ܕܶܝܢ ܓܿܰܒܼܪ̈ܶܐ ܕܥܳܡܪܺܝܢ ܒܽܐܘܪܺܫܠܶܡ ܕܕܼܳܚܠܺܝܢ ܡܶܢ ܐܰܠܳܗܳܐ܃ ܺܝܗܽܘܕܼܳܝܶܐ̈܂ ܡܶܢ ܟܽܠ ܥܰܡ̱ܡܶܐ̈ ܕܰܬܼܚܶܝܬܼ ܫܡܰܝܳܐ܂
02:06 [ai]	ܘܟܼܰܕܼ ܗܘܳܐ ܩܳܠܳܐ ܗܰܘ܃ ܟܢܰܫ ܟܽܠܶܗ ܥܰܡܳܐ ܘܶܐܫܬܿܓܼܶܫ܂ ܡܶܛܽܠ ܕܫܳܡܰܥ ܗ̱ܘܳܐ ܐ̱ܢܳܫ ܐ̱ܢܳܫ ܡܶܢܗܽܘܢ ܕܰܡܡܰܠܠܺܝܢ ܗ̱ܘܰܘ ܒܠܶܫܳܢܰܝܗܽܘܢ̈܂
02:07 [ai]	ܬܰܗܺܝܪܺܝܢ ܗܘܰܘ ܕܶܝܢ ܟܽܠܗܽܘܢ ܘܡܶܬܿܕܰܡܪܺܝܢ܂ ܟܰܕܼ ܐܳܡܪܺܝܢ ܗ̱ܘܰܘ ܚܰܕܼ ܠܚܰܕܼ܃ ܗܳܠܶܝܢ ܟܽܠܗܽܘܢ ܕܰܡܡܰܠܠܺܝܢ܃ ܠܳܐ ܗܳܐ ܓܠܺܝܠܳܝܶܐ̈ ܐܶܢܽܘܢ܃
02:08 [ai]	ܐܰܝܟܿܰܢܳܐ ܚܢܰܢ ܫܳܡܥܺܝܢ ܚ̱ܢܰܢ ܐ̱ܢܳܫ ܐ̱ܢܳܫ ܠܶܫܳܢܶܗ ܕܒܶܗ ܺܝܠܺܝܕܼܺܝܢ ܚ̱ܢܰܢ܃
02:09 [ai]	ܦܿܰܪ̈ܬܼܘܳܝܶܐ܂ ܘܡܳܕܼܳܝܶܐ̈ ܘܰܐܠܰܢܳܝܶܐ̈܂ ܘܰܐܝܠܶܝܢ ܕܥܳܡܪܺܝܢ ܒܶܝܬܼ ܢܰܗܪ̈ܺܝܢ܂ ܺܝܗܽܘܕܼܳܝܶܐ̈ ܘܩܰܦܿܽܘܕܼܩܳܝܶܐ̈܂ ܘܰܕܼܡܶܢ ܐܰܬܼܪܳܐ ܕܦܿܳܢܛܳܘܣ܂ ܘܕܼܰܐܣܺܝܰܐ܂
02:10 [ai]	ܘܰܕܼܡܶܢ ܐܰܬܼܪܳܐ ܕܰܦܼܪܽܘܓܼܺܝܰܐ ܘܰܕܼܦܿܰܡܦܼܽܘܠܺܝܰܐ܂ ܘܰܕܼܡܶܨܪܶܝܢ܂ ܘܕܼܰܐܬܼܪ̈ܰܘܳܬܼܳܐ ܕܠܽܘܒܼܺܐ ܕܩܰܪܺܝܒܼܺܝܢ ܠܩܽܘܪܺܝܢܺܐ܂ ܘܰܐܝܠܶܝܢ ܕܶܐܬܼܰܘ ܡܶܢ ܪܽܗ̱ܘܡܺܐ܂ ܺܝܗܽܘܕܼܳܝܶܐ̈܂ ܘܓܼܺܝܽܘܪ̈ܶܐ܂
02:11 [ai]	ܘܰܕܼܡܶܢ ܩܪܺܛܺܐ܂ ܘܥܰܪ̈ܒܼܳܝܶܐ܂ ܗܳܐ ܫܳܡܥܺܝܢ ܚ̱ܢܰܢ ܡܶܢܗܽܘܢ ܕܰܡܡܰܠܠܺܝܢ ܒܠܶܫܳܢܰܝܢ̈ ܕܺܝܠܰܢ܂ ܬܿܶܕܼܡܪ̈ܳܬܼܶܗ ܕܰܐܠܳܗܳܐ܂
02:12 [ai]	ܡܶܬܿܕܰܡܪܺܝܢ ܗ̱ܘܰܘ ܕܶܝܢ ܟܽܠܗܽܘܢ܂ ܘܬܼܰܘܺܝܪܺܝܢ܂ ܟܰܕܼ ܐܳܡܪܺܝܢ ܚܰܕܼ ܠܚܰܕܼ܃ ܕܡܳܢܳܐ ܗ̱ܝ ܗܳܕܼܶܐ ܨܒܼܽܘܬܼܳܐ܂
02:13 [ai]	ܐ̱ܚܪ̈ܳܢܶܐ ܕܶܝܢ ܡܡܰܝܩܺܝܢ ܗ̱ܘܰܘ ܒܗܽܘܢ܂ ܟܰܕܼ ܐܳܡܪܺܝܢ܃ ܗܳܠܶܝܢ ܡܶܐܪܺܝܬܼܳܐ ܐܶܫܬܿܺܝܘ ܘܰܪܘܺܝܘ ܿ܀ܿ܀ܿ
02:14 [ai]	ܒܳܬܼܰܪܟܿܶܢ ܩܳܡ ܫܶܡܥܽܘܢ ܟܺܐܦܼܳܐ ܥܰܡ ܚܕܼܰܥܣܰܪ ܫܠܺܝܚܺܝܢ̈܃ ܘܰܐܪܺܝܡ ܩܳܠܶܗ܂ ܘܶܐܡܰܪ ܠܗܽܘܢ܂ ܓܿܰܒܼܪ̈ܶܐ ܺܝܗܽܘܕܼܳܝܶܐ̈ ܘܟܼܽܠܗܽܘܢ ܕܥܳܡܪܺܝܢ ܒܽܐܘܪܺܫܠܶܡ܃ ܗܳܕܼܶܐ ܬܶܬܼܺܝܕܼܰܥ ܠܟܼܽܘܢ܂ ܘܨܽܘܬܼܘ ܡܶܠܰܝ̈܂
02:15 [ai]	ܠܳܐ ܓܶܝܪ ܐܰܝܟܿܰܢܳܐ ܕܰܐܢ̱ܬܿܽܘܢ ܣܳܒܼܪܺܝܢ ܗܳܠܶܝܢ ܪܘܶܝܢ܃ ܕܗܳܐ ܥܕܼܰܡܳܐ ܠܗܳܫܳܐ ܬܠܳܬܼ ܐܶܢܶܝܢ̈ ܫܳܥܺܝܢ̈܃
02:16 [ai]	ܐܶܠܳܐ ܗܳܕܼܶܐ ܗ̱ܺܝ ܕܰܐܡܺܝܪܳܐ ܒܝܽܘܐܝܶܠ ܢܒܼܺܝܳܐ܂
02:17 [ai]	ܢܶܗܘܶܐ ܒܝܰܘܡܳܬܼܳܐ̈ ܐ̱ܚܪ̈ܳܝܶܐ ܐܳܡܰܪ ܐܰܠܳܗܳܐ܃ ܐܶܫܽܘܕܼ ܪܽܘܚܝ ܥܰܠ ܟܽܠ ܒܣܰܪ܂ ܘܢܶܬܼܢܰܒܿܽܘܢ ܒܢܰܝܟܿܽܘܢ܂ ܘܰܒܢܳܬܼܟܼܽܘܢ܂ ܘܓܼܰܕܿܽܘܕܼܰܝܟܿܽܘܢ̈ ܚܶܙܘܳܢܶܐ̈ ܢܶܚܙܽܘܢ܂ ܘܩܰܫܺܝܫܰܝܟܿܽܘܢ̈ ܚܶܠܡܶܐ̈ ܢܶܚܠܡܽܘܢ܂
02:18 [ai]	ܘܥܰܠ ܥܰܒܼܕܿܰܝ̈ ܘܥܰܠ ܐܰܡܗܳܬܼܝ̈ ܐܶܫܽܘܕܼ ܪܽܘܚܝ ܒܝܰܘܡܳܬܼܳܐ̈ ܗܳܢܽܘܢ܂ ܘܢܶܬܼܢܰܒܿܽܘܢ܂
02:19 [ai]	ܘܶܐܬܿܶܠ ܐܳܬܼܘܳܬܼܳܐ̈ ܒܰܫܡܰܝܳܐ܂ ܘܰܓܼܒܼܰܪ̈ܘܳܬܼܳܐ ܥܰܠ ܐܰܪܥܳܐ܂ ܕܡܳܐ ܘܢܽܘܪܳܐ ܘܥܶܛܪܳܐ ܕܰܬܼܢܳܢܳܐ܂
02:20 [ai]	ܫܶܡܫܳܐ ܢܶܬܼܚܰܠܰܦܼ ܒܥܰܡܛܳܢܳܐ܂ ܘܣܰܗܪܳܐ ܒܰܕܼܡܳܐ܂ ܥܰܕܼܠܳܐ ܢܺܐܬܼܶܐ ܝܰܘܡܶܗ ܕܡܳܪܝܳܐ ܪܰܒܿܳܐ ܘܰܕܼܚܺܝܠܳܐ܀܀
02:21 [ai]	ܘܢܶܗܘܶܐ ܟܽܠ ܕܢܶܩܪܶܐ ܫܡܶܗ ܕܡܳܪܝܳܐ܂ ܢܺܚܶܐ܀
02:22 [ai]	ܓܿܰܒܼܪ̈ܶܐ ܒܢܰܝ ܐܺܝܣܪܳܝܶܠ܃ ܫܡܰܥܘ ܡܶܠܶܐ̈ ܗܳܠܶܝܢ܂ ܝܶܫܽܘܥ ܢܳܨܪܳܝܳܐ܃ ܓܰܒܼܪܳܐ ܕܡܶܢ ܐܰܠܳܗܳܐ ܐܶܬܼܚܙܺܝ ܠܘܳܬܼܟܼܽܘܢ܃ ܒܚܰܝܠܶܐ̈ ܘܒܼܳܐܬܼܘܳܬܼܳܐ̈ ܘܒܼܰܓܼܒܼܰܪ̈ܘܳܬܼܳܐ܂ ܐܰܝܠܶܝܢ ܕܰܐܠܳܗܳܐ ܥܒܼܰܕܼ ܒܰܝܢܳܬܼܟܼܽܘܢ ܒܺܐܝܕܼܶܗ܂ ܐܰܝܟܼ ܕܰܐܢ̱ܬܿܽܘܢ ܝܳܕܼܥܺܝܢ ܐܢ̱ܬܿܽܘܢ܃
02:23 [ai]	ܠܗܳܢܳܐ ܕܰܦܼܪܺܝܫ ܗ̱ܘܳܐ ܠܳܗ ܠܗܳܕܼܶܐ܃ ܒܰܡܩܰܕܡܽܘܬܼ ܺܝܕܼܰܥܬܼܶܗ ܘܰܒܨܶܒܼܝܳܢܶܗ ܕܰܐܠܳܗܳܐ܃ ܐܰܫܠܶܡܬܿܽܘܢܳܝܗ̱ܝ ܒܺܐܝܕܼܰܝ̈ ܪ̈ܰܫܺܝܥܶܐ܂ ܘܰܙܩܰܦܼܬܿܽܘܢ܂ ܘܰܩܛܰܠܬܿܽܘܢ܂
02:24 [ai]	ܐܰܠܳܗܳܐ ܕܶܝܢ ܐܰܩܺܝܡܶܗ܂ ܘܰܫܪܳܐ ܚܶܒܼܠܶܝܗ̈ ܕܰܫܝܽܘܠ܃ ܡܶܛܽܠ ܕܠܳܐ ܡܶܫܟܿܚܳܐ ܗ̱ܘܳܬܼ ܕܢܶܬܿܬܿܚܶܕܼ ܒܿܳܗ ܒܰܫܝܽܘܠ܂
02:25 [ai]	ܕܿܰܘܺܝܕܼ ܓܶܝܪ ܐܶܡܰܪ ܥܠܰܘܗ̱ܝ܂ ܡܩܰܕܶܡ ܗ̱ܘܺܝܬܼ ܚܳܙܶܐ ܠܡܳܪܝ ܒܟܽܠܙܒܼܰܢ܃ ܕܥܰܠ ܝܰܡܺܝܢܝ ܗ̱ܽܘ܂ ܕܠܳܐ ܐܶܙܽܘܥ܂
02:26 [ai]	ܡܶܛܽܠ ܗܳܢܳܐ ܐܶܬܼܒܿܰܣܰܡ ܠܶܒܿܝ܂ ܘܪܶܘܙܰܬܼ ܬܶܫܒܿܽܘܚܬܿܝ܂ ܘܳܐܦܼ ܦܰܓܼܪܝ ܢܰܓܿܶܢ ܥܰܠ ܣܰܒܼܪܳܐ܂
02:27 [ai]	ܡܶܛܽܠ ܕܠܳܐ ܫܳܒܼܶܩ ܐܰܢ̱ܬܿ ܠܢܰܦܼܫܝ ܒܰܫܝܽܘܠ܃ ܘܠܳܐ ܝܳܗܶܒܼ ܐܰܢ̱ܬܿ ܠܚܰܣܝܳܟܼ ܕܢܶܚܙܶܐ ܚܒܼܳܠܳܐ܂
02:28 [ai]	ܓܠܰܝܬܿ ܠܺܝ ܐܽܘܪܚܳܐ ܕܚܰܝ̈ܶܐ܂ ܬܶܡܠܶܝܢܝ ܒܰܣܺܝܡܽܘܬܼܳܐ ܥܰܡ ܦܰܪܨܽܘܦܿܳܟܼ܂
02:29 [ai]	ܓܿܰܒܼܪ̈ܶܐ ܐܰܚܰܝܢ̈܃ ܡܰܦܿܰܣ ܠܡܺܐܡܰܪ ܥܺܝܢ ܒܰܓܼܠܶܐ ܠܘܳܬܼܟܼܽܘܢ܃ ܥܰܠ ܪܺܝܫ ܐܰܒܼܳܗܳܬܼܳܐ̈ ܕܿܰܘܺܝܕܼ܂ ܕܡܺܝܬܼ ܘܳܐܦܼ ܐܶܬܼܩܒܼܰܪ܂ ܘܒܶܝܬܼ ܩܒܼܽܘܪܶܗ ܐܺܝܬܼܰܘܗ̱ܝ ܠܘܳܬܼܰܢ ܥܕܼܰܡܳܐ ܠܝܰܘܡܳܢܳܐ܂
02:30 [ai]	ܢܒܼܺܝܳܐ ܗܘܳܐ ܓܶܝܪ܂ ܘܝܳܕܼܰܥ ܗ̱ܘܳܐ ܕܡܰܘܡܳܬܼܳܐ̈ ܺܝܡܳܐ ܠܶܗ ܐܰܠܳܗܳܐ܂ ܕܡܶܢ ܦܿܺܐܪ̈ܶܐ ܕܟܰܪܣܳܟܼ܃ ܐܰܘܬܶܒܼ ܥܰܠ ܟܽܘܪܣܝܳܟܼ܂
02:31 [ai]	ܘܩܰܕܶܡ ܚܙܳܐ܂ ܘܡܰܠܶܠ ܥܰܠ ܩܝܳܡܬܿܶܗ ܕܰܡܫܺܝܚܳܐ܂ ܕܠܳܐ ܐܶܫܬܿܒܼܶܩ ܒܰܫܝܽܘܠ܃ ܐܳܦܼ ܠܳܐ ܦܰܓܼܪܶܗ ܚܙܳܐ ܚܒܼܳܠܳܐ܂
02:32 [ai]	ܠܗܳܢܳܐ ܝܶܫܽܘܥ ܐܰܩܺܝܡ ܐܰܠܳܗܳܐ܂ ܘܰܚܢܰܢ ܟܽܠܰܢ ܣܳܗܕܿܰܘܗ̱ܝ̈܂
02:33 [ai]	ܘܗܽܘܝܽܘ ܕܰܒܼܝܰܡܺܝܢܶܗ ܕܰܐܠܳܗܳܐ ܐܶܬܿܬܿܪܺܝܡ܃ ܘܰܢܣܰܒܼ ܡܶܢ ܐܰܒܼܳܐ ܫܽܘܘ̱ܕܿܳܝܳܐ ܕܥܰܠ ܪܽܘܚܳܐ ܕܩܽܘܕܼܫܳܐ܂ ܘܶܐܫܰܕܼ ܡܰܘܗܰܒܼܬܳܐ ܗܳܕܼܶܐ܃ ܕܗܳܐ ܚܳܙܶܝܢ ܐܢ̱ܬܿܽܘܢ ܘܫܳܡܥܺܝܢ ܐܢ̱ܬܿܽܘܢ܂
02:34 [ai]	ܠܳܐ ܗ̱ܘܳܐ ܓܶܝܪ ܕܿܰܘܺܝܕܼ ܣܠܶܩ ܠܰܫܡܰܝܳܐ܂ ܡܶܛܽܠ ܕܗܽܘ ܐܶܡܰܪ܃ ܕܶܐܡܰܪ ܡܳܪܝܳܐ ܠܡܳܪܝ܃ ܬܶܒܼ ܠܳܟܼ ܡܶܢ ܝܰܡܺܝܢܝ܃
02:35 [ai]	ܥܕܼܰܡܳܐ ܕܶܐܣܺܝܡ ܒܥܶܠܕܿܒܼܳܒܼܰܝܟܿ̈ ܟܽܘܒܼܫܳܐ ܠܪ̈ܶܓܼܠܰܝܟܿ܂
02:36 [ai]	ܫܰܪܺܝܪܳܐܺܝܬܼ ܗܳܟܼܺܝܠ ܢܶܕܿܰܥ ܟܽܠܶܗ ܒܶܝܬܼ ܐܺܝܣܪܳܝܶܠ܃ ܕܡܳܪܝܳܐ ܘܰܡܫܺܝܚܳܐ ܥܰܒܼܕܿܶܗ ܐܰܠܳܗܳܐ܃ ܠܗܳܢܳܐ ܝܶܫܽܘܥ ܕܰܐܢ̱ܬܿܽܘܢ ܙܩܰܦܼܬܿܽܘܢ܀
02:37 [ai]	ܘܟܼܰܕܼ ܫܡܰܥܘ ܗܳܠܶܝܢ܃ ܐܶܬܼܓܿܢܰܚܘ ܒܿܠܶܒܗܽܘܢ܂ ܘܶܐܡܰܪܘ ܠܫܶܡܥܽܘܢ ܘܰܠܫܰܪܟܿܳܐ ܕܰܫܠܺܝܚܶܐ̈܂ ܡܳܢܳܐ ܢܶܥܒܿܶܕܼ ܐܰܚܰܝܢ̈܃
02:38 [ai]	ܐܳܡܰܪ ܠܗܽܘܢ ܫܶܡܥܽܘܢ܂ ܬܽܘܒܼܘ ܘܰܥܡܰܕܼܘ ܐ̱ܢܳܫ ܐ̱ܢܳܫ ܡܶܢܟܼܽܘܢ܃ ܒܰܫܡܶܗ ܕܡܳܪܝܳܐ ܝܶܫܽܘܥ܂ ܠܫܽܘܒܼܩܳܢ ܚܛܳܗܶܐ̈܃ ܕܰܬܼܩܰܒܿܠܽܘܢ ܡܰܘܗܰܒܼܬܳܐ ܕܪܽܘܚܳܐ ܕܩܽܘܕܼܫܳܐ܂
02:39 [ai]	ܠܟܼܽܘܢ ܓܶܝܪ ܗܘܳܐ ܫܽܘܘ̱ܕܿܳܝܳܐ܂ ܘܠܰܒܼܢܰܝܟܿܽܘܢ܂ ܘܰܠܟܼܽܠܗܽܘܢ ܐܰܝܠܶܝܢ ܕܪܰܚܺܝܩܺܝܢ܂ ܐܰܝܠܶܝܢ ܕܗܽܘ ܐܰܠܳܗܳܐ ܢܶܩܪܶܐ ܐܶܢܽܘܢ܂
02:40 [ai]	ܘܰܒܡܶܠܶܐ̈ ܐ̱ܚܪ̈ܳܢܝܳܬܼܳܐ ܣܰܓܿܺܝܳܐܬܼܳܐ̈ ܡܣܰܗܶܕܼ ܗ̱ܘܳܐ ܠܗܽܘܢ܂ ܘܒܼܳܥܶܐ ܗ̱ܘܳܐ ܡܶܢܗܽܘܢ܂ ܟܰܕܼ ܐܳܡܰܪ܃ ܚܝܰܘ ܡܶܢ ܫܰܪܒܿܬܼܳܐ ܗܳܕܼܶܐ ܡܥܰܩܰܡܬܳܐ܂
02:41 [ai]	ܘܐ̱ܢܳܫܺܝܢ̈ ܡܶܢܗܽܘܢ ܥܬܼܺܝܕܼܳܐܺܝܬܼ ܩܰܒܿܶܠܘ ܡܶܠܬܼܶܗ܂ ܘܗܰܝܡܶܢܘ܂ ܘܰܥܡܰܕܼܘ܂ ܘܶܐܬܿܬܰܘܣܰܦܼܘ ܒܗܰܘ ܝܰܘܡܳܐ܃ ܐܰܝܟܼ ܬܠܳܬܼܳܐ ܐܰܠܦܼܺܝܢ̈ ܢܰܦܼܫܳܢ̈܂
02:42 [ai]	ܘܰܐܡܺܝܢܺܝܢ ܗ̱ܘܰܘ ܒܝܽܘܠܦܿܳܢܳܐ ܕܰܫܠܺܝܚܶܐ̈܃ ܘܡܶܫܬܰܘܬܿܦܼܺܝܢ ܗ̱ܘܰܘ ܒܰܨܠܽܘܬܼܳܐ ܘܒܼܰܩܨܳܝܳܐ ܕܶܐܘܟܼܰܪܺܣܛܺܝܰܐ܂
02:43 [ai]	ܘܗܳܘܝܳܐ ܗ̱ܘܳܬܼ ܕܶܚܠܬܼܳܐ ܠܟܼܽܠ ܢܦܼܶܫ܀ ܘܳܐܬܼܘܳܬܼܳܐ̈ ܣܰܓܿܺܝܳܐܬܼܳܐ̈ ܘܰܓܼܒܼܰܪ̈ܘܳܬܼܳܐ܃ ܗܳܘܝܳܢ̈ ܗ̱ܘܰܝ̈ ܒܝܰܕܼ ܫܠܺܝܚܶܐ̈ ܒܽܐܘܪܺܫܠܶܡ܂
02:44 [ai]	ܘܟܼܽܠܗܽܘܢ ܐܰܝܠܶܝܢ ܕܗܰܝܡܶܢܘ ܗ̱ܘܰܘ܂ ܐܰܟܼܚܕܼܳܐ ܗܘܰܘ܂ ܘܟܼܽܠܡܶܕܶܡ ܕܺܐܝܬܼ ܗ̱ܘܳܐ ܠܗܽܘܢ܂ ܕܓܰܘܳܐ ܗܘܳܐ܂
02:45 [ai]	ܘܰܐܝܠܶܝܢ ܕܺܐܝܬܼ ܗ̱ܘܳܐ ܠܗܽܘܢ ܩܶܢܝܳܢܳܐ܂ ܡܙܰܒܢܺܝܢ ܗ̱ܘܰܘ ܠܶܗ܃ ܘܰܡܦܼܰܠܓܼܺܝܢ ܗ̱ܘܰܘ ܠܐ̱ܢܳܫ ܐ̱ܢܳܫ ܐܰܝܟܼ ܡܶܕܶܡ ܕܰܣܢܺܝܩ ܗ̱ܘܳܐ܂
02:46 [ai]	ܘܟܼܽܠܝܽܘܡ ܐܰܡܺܝܢܺܝܢ ܗ̱ܘܰܘ ܒܗܰܝܟܠܳܐ܂ ܒܰܚܕܼܳܐ ܢܦܼܶܫ܂ ܘܰܒܒܼܰܝܬܳܐ ܩܳܨܶܝܢ ܗ̱ܘܰܘ ܦܪܺܝܣܬܳܐ܃ ܘܰܡܩܰܒܿܠܺܝܢ ܗ̱ܘܰܘ ܣܰܝܒܿܳܪܬܳܐ܂ ܟܰܕܼ ܪܳܘܙܺܝܢ܃ ܘܒܼܰܒܼܪܺܝܪܽܘܬܼܳܐ ܕܿܠܶܒܗܽܘܢ
02:47 [ai]	ܡܫܰܒܿܚܺܝܢ ܗ̱ܘܰܘ ܠܰܐܠܳܗܳܐ܃ ܟܰܕܼ ܺܝܗܺܝܒܼܺܝܢ ܒܪ̈ܰܚܡܶܐ ܩܕܼܳܡ ܟܽܠܶܗ ܥܰܡܳܐ܂ ܘܡܳܪܰܢ ܡܰܘܣܶܦܼ ܗ̱ܘܳܐ ܟܽܠܝܽܘܡ ܠܰܐܝܠܶܝܢ ܕܚܳܐܶܝܢ ܒܥܺܕ̱ܿܬܳܐ܀

next chapter