← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62044: P Acts

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


03:01 [ai]ܘܰܗܘܳܐ ܕܟܰܕܼ ܣܳܠܩܺܝܢ ܫܶܡܥܽܘܢ ܟܺܐܦܼܳܐ ܘܝܽܘܚܰܢܳܢ ܐܰܟܼܚܕܼܳܐ ܠܗܰܝܟܠܳܐ܃ ܒܥܶܕܳܢܳܐ ܕܰܨܠܽܘܬܼܳܐ ܕܰܬܼܫܰܥ ܫܳܥܺܝܢ̈܃
03:02 [ai]ܘܗܳܐ ܓܰܒܼܪܳܐ ܚܰܕܼ ܚܓܼܺܝܪܳܐ ܕܡܶܢ ܟܪܶܣ ܐܶܡܶܗ܃ ܫܩܺܝܠܺܝܢ ܗ̱ܘܰܘ ܐ̱ܢܳܫܳܐ ܐܰܝܠܶܝܢ ܕܰܡܥܳܕܼܺܝܢ ܗ̱ܘܰܘ ܡܰܝܬܿܶܝܢ ܘܣܳܝܡܺܝܢ ܠܶܗ܃ ܒܬܰܪܥܳܐ ܕܗܰܝܟܠܳܐ ܕܡܶܬܼܩܪܶܐ ܫܰܦܿܺܝܪܳܐ܃ ܕܢܶܗܘܶܐ ܫܳܐܶܠ ܙܶܕܼܩܬܼܳܐ ܡܶܢ ܗܳܢܽܘܢ ܕܥܳܐܠܺܝܢ ܠܗܰܝܟܠܳܐ܂
03:03 [ai]ܗܳܢܳܐ ܟܰܕܼ ܚܙܳܐ ܠܫܶܡܥܽܘܢ ܘܰܠܝܽܘܚܰܢܳܢ ܕܥܳܐܠܺܝܢ ܠܗܰܝܟܠܳܐ܃ ܒܿܳܥܶܐ ܗ̱ܘܳܐ ܡܶܢܗܽܘܢ܂ ܕܢܶܬܿܠܽܘܢ ܠܶܗ ܙܶܕܼܩܬܼܳܐ܂
03:04 [ai]ܘܚܳܪܘ ܒܶܗ ܫܶܡܥܽܘܢ ܘܝܽܘܚܰܢܳܢ܂ ܘܶܐܡܰܪܘ ܠܶܗ܂ ܚܽܘܪ ܒܰܢ܂
03:05 [ai]ܗܽܘ ܕܶܝܢ ܚܳܪ ܒܗܽܘܢ܃ ܟܰܕܼ ܣܳܒܼܰܪ ܗ̱ܘܳܐ ܠܡܶܣܰܒܼ ܡܶܢܗܽܘܢ ܡܶܕܶܡ܂
03:06 [ai]ܐܳܡܰܪ ܠܶܗ ܫܶܡܥܽܘܢ܃ ܕܰܗܒܼܳܐ ܘܣܺܐܡܳܐ ܠܰܝܬܿ ܠܺܝ܃ ܐܶܠܳܐ ܡܶܕܶܡ ܕܺܐܝܬܼ ܠܺܝ܂ ܝܳܗܶܒܼܐ̱ܢܳܐ ܠܳܟܼ܂ ܒܰܫܡܶܗ ܕܝܶܫܽܘܥ ܡܫܺܝܚܳܐ ܢܳܨܪܳܝܳܐ܂ ܩܽܘܡ ܗܰܠܶܟܼ܂
03:07 [ai]ܘܰܐܚܕܿܶܗ ܒܺܐܝܕܼܶܗ ܕܝܰܡܺܝܢܳܐ ܘܰܐܩܺܝܡܶܗ܂ ܘܒܼܳܗ ܒܫܳܥܬܼܳܐ ܫܰܪ ܪ̈ܶܓܼܠܰܘܗ̱ܝ ܘܥܶܩܒܼܰܘܗ̱ܝ̈܂
03:08 [ai]ܘܰܫܘܰܪ ܩܳܡ ܘܗܰܠܶܟܼ܂ ܘܥܰܠ ܥܰܡܗܽܘܢ ܠܗܰܝܟܠܳܐ܂ ܟܰܕܼ ܡܗܰܠܶܟܼ ܘܰܡܫܰܘܰܪ ܘܰܡܫܰܒܿܰܚ ܠܰܐܠܳܗܳܐ܂
03:09 [ai]ܘܰܚܙܰܐܘܽܗ̱ܝ ܟܽܠܶܗ ܥܰܡܳܐ ܟܰܕܼ ܡܗܰܠܶܟܼ ܘܰܡܫܰܒܿܰܚ ܠܰܐܠܳܗܳܐ܃
03:10 [ai]ܘܶܐܫܬܰܘܕܰܥܘ ܕܗܽܘܝܽܘ ܗܰܘ ܚܳܕܼܽܘܪܳܐ܃ ܕܝܳܬܼܶܒܼ ܗ̱ܘܳܐ ܟܽܠܝܽܘܡ ܘܫܳܐܶܠ ܙܶܕܼܩܬܼܳܐ܃ ܥܰܠ ܬܰܪܥܳܐ ܕܡܶܬܼܩܪܶܐ ܫܰܦܿܺܝܪܳܐ܂ ܘܶܐܬܼܡܠܺܝܘ ܬܶܡܗܳܐ ܘܕܼܽܘܡܳܪܳܐ ܥܰܠ ܡܶܕܶܡ ܕܰܗܘܳܐ ܿ܀ܿ܀ܿ
03:11 [ai]ܘܟܼܰܕܼ ܐܰܚܺܝܕܼ ܗܘܳܐ ܠܫܶܡܥܽܘܢ ܘܰܠܝܽܘܚܰܢܳܢ܃ ܪܗܶܛ ܟܽܠܶܗ ܥܰܡܳܐ ܟܰܕܼ ܬܰܗܺܝܪ ܠܘܳܬܼܗܽܘܢ܂ ܠܶܐܣܛܘܳܐ ܕܡܶܬܼܩܪܶܐ ܕܰܫܠܶܝܡܽܘܢ܂
03:12 [ai]ܘܟܼܰܕܼ ܚܙܳܐ ܫܶܡܥܽܘܢ܂ ܥܢܳܐ ܘܶܐܡܰܪ ܠܗܽܘܢ܂ ܓܿܰܒܼܪ̈ܶܐ ܒܢܰܝ ܐܺܝܣܪܳܝܶܠ܃ ܡܳܢܳܐ ܡܶܬܿܕܰܡܪܺܝܢ ܐܢ̱ܬܿܽܘܢ ܒܗܳܢܳܐ܂ ܐܰܘ ܒܰܢ܂ ܡܳܢܳܐ ܚܳܝܪܺܝܢ ܐܢ̱ܬܿܽܘܢ܃ ܐܰܝܟܼ ܗܰܘ ܕܰܒܼܚܰܝܠܳܐ ܕܺܝܠܰܢ܂ ܐܰܘ ܒܫܽܘܠܛܳܢܰܢ܂ ܥܒܼܰܕܼܢ ܗܳܕܼܶܐ ܕܰܢܗܰܠܶܟܼ ܗܳܢܳܐ܂
03:13 [ai]ܐܰܠܳܗܶܗ ܗ̱ܽܘ ܕܰܐܒܼܪܳܗܳܡ ܘܕܼܺܐܝܣܚܳܩ ܘܰܕܼܝܰܥܩܽܘܒܼ܂ ܐܰܠܳܗܳܐ ܕܰܐܒܼܳܗܳܬܼܰܢ̈܂ ܫܰܒܿܰܚ ܠܰܒܼܪܶܗ ܝܶܫܽܘܥ܃ ܗܰܘ ܕܰܐܢ̱ܬܿܽܘܢ ܐܰܫܠܶܡܬܿܽܘܢ ܘܰܟܼܦܼܰܪܬܿܽܘܢ ܒܶܗ ܩܕܼܳܡ ܐܰܦܿܰܘܗ̱ܝ̈ ܕܦܼܺܝܠܰܛܳܘܣ܂ ܟܰܕܼ ܗܽܘ ܙܰܕܿܶܩ ܗ̱ܘܳܐ ܕܢܶܫܪܶܝܘܗ̱ܝ܂
03:14 [ai]ܐܰܢ̱ܬܿܽܘܢ ܕܶܝܢ ܒܩܰܕܿܺܝܫܳܐ ܘܙܰܕܿܺܝܩܳܐ ܟܦܼܰܪܬܿܽܘܢ܂ ܘܫܶܐܠܬܿܽܘܢ ܠܟܼܽܘܢ ܠܓܼܰܒܼܪܳܐ ܩܳܛܽܘܠܳܐ܂ ܕܢܶܬܼܺܝܗܶܒܼ ܠܟܼܽܘܢ܂
03:15 [ai]ܘܰܠܗܰܘ ܪܺܫܳܐ ܕܚܰܝ̈ܶܐ ܩܛܰܠܬܿܽܘܢ܂ ܕܠܶܗ ܐܰܩܺܝܡ ܐܰܠܳܗܳܐ ܡܶܢ ܒܶܝܬܼ ܡܺܝܬܼܶܐ̈܂ ܘܰܚܢܰܢ ܟܽܠܰܢ܂ ܣܳܗܕܿܰܘܗ̱ܝ̈܂
03:16 [ai]ܘܰܒܗܰܝܡܳܢܽܘܬܼܳܐ ܕܰܫܡܶܗ܃ ܠܗܳܢܳܐ ܕܚܳܙܶܝܢ ܐܢ̱ܬܿܽܘܢ ܘܝܳܕܼܥܺܝܢ ܐܢ̱ܬܿܽܘܢ܃ ܗܽܘ܂ ܘܰܐܣܺܝ܂ ܘܗܰܝܡܳܢܽܘܬܼܳܐ ܕܒܶܗ ܝܶܗܒܿܰܬܼ ܠܶܗ ܗܳܕܼܶܐ ܚܠܺܝܡܽܘܬܼܳܐ ܩܕܼܳܡ ܟܽܠܟܼܽܘܢ܂
03:17 [ai]ܒܪܰܡ ܗܳܫܳܐ ܐܰܚܰܝ̈܃ ܝܳܕܼܰܥ ܐ̱ܢܳܐ ܕܰܒܼܛܽܘܥܝܰܝ ܥܒܼܰܕܿܬܿܽܘܢ ܗܳܕܼܶܐ܂ ܐܰܝܟܼ ܕܰܥܒܼܰܕܼܘ ܪ̈ܺܫܰܝܟܿܽܘܢ܂
03:18 [ai]ܘܰܐܠܳܗܳܐ ܐܰܝܟܼ ܡܶܕܶܡ ܕܿܩܰܕܶܡ ܐܰܟܼܪܶܙ ܒܦܽܘܡ ܟܽܠܗܽܘܢ ܢܒܼܺܝܶܐ̈܂ ܕܢܶܚܰܫ ܡܫܺܝܚܶܗ܃ ܡܰܠܺܝ ܗܳܟܼܰܢܳܐ܂
03:19 [ai]ܬܽܘܒܼܘ ܗܳܟܼܺܝܠ܂ ܘܶܐܬܼܦܢܰܘ܂ ܐܰܝܟܿܰܢܳܐ ܕܢܶܬܼܥܛܽܘܢ ܚܛܳܗܰܝܟܿܽܘܢ̈܂ ܘܢܺܐܬܼܽܘܢ ܠܟܼܽܘܢ ܙܰܒܼܢܶܐ̈ ܕܰܢܝܳܚܬܳܐ ܡܶܢ ܩܕܼܳܡ ܦܰܪܨܽܘܦܿܶܗ ܕܡܳܪܝܳܐ܂
03:20 [ai]ܘܰܢܫܰܕܿܰܪ ܠܟܼܽܘܢ ܠܰܐܝܢܳܐ ܕܰܡܛܰܝܰܒܼ ܗ̱ܘܳܐ ܠܟܼܽܘܢ܂ ܠܝܶܫܽܘܥ ܡܫܺܝܚܳܐ܂
03:21 [ai]ܕܠܶܗ ܘܳܠܶܐ ܠܰܫܡܰܝܳܐ ܕܰܢܩܰܒܿܠܽܘܢ܃ ܥܕܼܰܡܳܐ ܠܡܽܘܠܳܝܳܐ ܕܙܰܒܼܢܶܐ̈܂ ܕܟܽܠܗܶܝܢ ܐܰܝܠܶܝܢ ܕܡܰܠܶܠ ܐܰܠܳܗܳܐ ܒܦܽܘܡܳܐ ܕܰܢܒܼܺܝܰܘܗ̱ܝ̈ ܩܰܕܿܺܝܫܶܐ̈ ܕܡܶܢ ܥܳܠܰܡ܂
03:22 [ai]ܡܽܘܫܶܐ ܓܶܝܪ ܐܶܡܰܪ܃ ܕܰܢܒܼܺܝܳܐ ܢܩܺܝܡ ܠܟܼܽܘܢ ܡܳܪܝܳܐ ܡܶܢ ܐܰܚܰܝܟܿܽܘܢ̈܂ ܐܰܟܼܘܳܬܼܝ܂ ܠܶܗ ܫܡܰܥܘ܂ ܒܟܽܠ ܡܳܐ ܕܰܢܡܰܠܶܠ ܥܰܡܟܼܽܘܢ܂
03:23 [ai]ܘܬܼܶܗܘܶܐ ܟܽܠ ܢܰܦܼܫܳܐ ܐܰܝܕܼܳܐ ܕܠܳܐ ܬܶܫܡܰܥ ܠܰܢܒܼܺܝܳܐ ܗܰܘ܃ ܬܺܐܒܼܰܕܼ ܢܰܦܼܫܳܐ ܗܳܝ ܡܶܢ ܥܰܡܳܗ܂
03:24 [ai]ܘܰܢܒܼܺܝܶܐ̈ ܟܽܠܗܽܘܢ ܡܶܢ ܫܡܽܘܐܝܶܠ܂ ܘܰܐܝܠܶܝܢ ܕܡܶܢ ܒܳܬܼܪܶܗ ܗܘܰܘ܃ ܡܰܠܶܠܘ܂ ܘܰܐܟܼܪܶܙܘ ܥܰܠ ܝܰܘܡܳܬܼܳܐ̈ ܗܳܢܽܘܢ܂
03:25 [ai]ܐܰܢ̱ܬܿܽܘܢ ܐܶܢܽܘܢ ܒܢܰܝܗܽܘܢ ܕܰܢܒܼܺܝܶܐ̈܃ ܘܰܕܕܼܺܝܰܬܼܺܩܺܐ ܐܰܝܕܼܳܐ ܕܣܳܡ ܐܰܠܳܗܳܐ ܠܰܐܒܼܳܗܳܬܼܰܢ̈܂ ܟܰܕܼ ܐܶܡܰܪ ܠܰܐܒܼܪܳܗܳܡ܃ ܕܰܒܼܙܰܪܥܳܟܼ ܢܶܬܼܒܰܪܟܼܳܢ ܟܽܠܗܶܝܢ ܫܰܪ̈ܒܿܳܬܼܳܐ ܕܰܐܪܥܳܐ܂
03:26 [ai]ܠܟܼܽܘܢ ܡܶܢ ܩܕܼܺܝܡ ܐܰܩܺܝܡ܂ ܘܫܰܕܿܰܪ ܐܰܠܳܗܳܐ ܠܰܒܼܪܶܗ܂ ܟܰܕܼ ܡܒܼܰܪܶܟܼ ܠܟܼܽܘܢ܃ ܐܶܢ ܬܶܬܼܦܿܢܽܘܢ ܘܰܬܬܼܽܘܒܼܽܘܢ ܡܶܢ ܒܺܝܫܳܬܼܟܼܽܘܢ̈܂

next chapter