← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62044: P Acts

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


04:01 [ai]ܘܟܼܰܕܼ ܗܳܠܶܝܢ ܡܶܠܶܐ̈ ܡܡܰܠܠܺܝܢ ܗ̱ܘܰܘ ܠܥܰܡܳܐ܃ ܩܳܡܘ ܥܠܰܝܗܽܘܢ ܟܳܗܢܶܐ̈ ܘܙܰܕܿܽܘܩܳܝܶܐ̈ ܘܰܐܪ̈ܟܼܽܘܢܶܐ ܕܗܰܝܟܠܳܐ܃
04:02 [ai]ܟܰܕܼ ܡܶܬܼܚܰܡܬܼܺܝܢ ܗ̱ܘܰܘ ܥܠܰܝܗܽܘܢ ܕܡܰܠܦܼܺܝܢ ܠܥܰܡܳܐ܃ ܘܡܰܟܼܪܙܺܝܢ ܒܰܡܫܺܝܚܳܐ ܥܰܠ ܩܝܳܡܬܳܐ ܕܡܶܢ ܒܶܝܬܼ ܡܺܝܬܼܶܐ̈܂
04:03 [ai]ܘܰܐܪܡܺܝܘ ܥܠܰܝܗܽܘܢ ܐܺܝܕܼܰܝܳܐ̈܃ ܘܰܢܛܰܪܘ ܐܶܢܽܘܢ ܠܝܰܘܡܳܐ ܐ̱ܚܪܺܢܳܐ܃ ܡܶܛܽܠ ܕܰܩܪܶܒܼ ܗ̱ܘܳܐ ܠܶܗ ܪܰܡܫܳܐ܂
04:04 [ai]ܘܣܰܓܿܺܝܶܐܐ̈ ܕܰܫܡܰܥܘ ܗ̱ܘܰܘ ܡܶܠܬܼܳܐ܂ ܗܰܝܡܶܢܘ ܗ̱ܘܰܘ܂ ܘܺܐܝܬܼܰܝܗܽܘܢ ܗ̱ܘܰܘ ܒܡܶܢܝܳܢܳܐ܂ ܐܰܝܟܼ ܚܰܡܫܳܐ ܐܰܠܦܼܺܝܢ̈ ܓܿܰܒܼܪ̈ܺܝܢ܀
04:05 [ai]ܘܰܠܝܰܘܡܳܐ ܐ̱ܚܪܺܢܳܐ܃ ܐܶܬܼܟܿܰܢܰܫܘ ܐܰܪ̈ܟܼܽܘܢܶܐ܂ ܘܩܰܫܺܝܫܶܐ̈܂ ܘܣܳܦܼܪ̈ܶܐ܂
04:06 [ai]ܘܳܐܦܼ ܚܰܢܳܢ ܪ̈ܰܒܿ ܟܿܳܗܢܶܐ܂ ܘܩܰܝܳܦܼܳܐ܂ ܘܝܽܘܚܰܢܳܢ ܘܰܐܠܶܟܿܣܰܢܕܿܪܳܘܣ܂ ܘܰܐܝܠܶܝܢ ܕܺܐܝܬܼܰܝܗܽܘܢ ܗ̱ܘܰܘ ܡܶܢ ܫܰܪܒܿܬܼܳܐ ܕܿܪ̈ܰܒܰܝ ܟܳܗܢܶܐ̈܂
04:07 [ai]ܘܟܼܰܕܼ ܐܰܩܺܝܡܘ ܐܶܢܽܘܢ ܒܰܡܨܰܥܬܼܳܐ܃ ܡܫܰܐܠܺܝܢ ܗ̱ܘܰܘ ܠܗܽܘܢ܃ ܕܒܰܐܝܢܳܐ ܚܺܝܠ܂ ܐܰܘ ܒܰܐܝܢܳܐ ܫܶܡ܂ ܥܒܼܰܕܿܬܿܽܘܢ ܗܳܕܼܶܐ܂
04:08 [ai]ܗܳܝܕܶܝܢ ܫܶܡܥܽܘܢ ܟܺܐܦܼܳܐ܃ ܐܶܬܼܡܠܺܝ ܪܽܘܚܳܐ ܕܩܽܘܕܼܫܳܐ܂ ܘܶܐܡܰܪ ܠܗܽܘܢ܂ ܐܰܪ̈ܟܼܽܘܢܰܘܗ̱ܝ ܕܥܰܡܳܐ܂ ܘܩܰܫܺܝܫܶܐ̈ ܕܒܶܝܬܼ ܐܺܝܣܪܳܝܶܠ܂ ܫܡܰܥܘ܂
04:09 [ai]ܐܶܢ ܚܢܰܢ ܝܰܘܡܳܢܳܐ ܡܶܬܿܕܼܺܝܢܺܝܢ ܚ̱ܢܰܢ ܡܶܢܟܼܽܘܢ܃ ܥܰܠ ܫܰܦܿܺܝܪܬܳܐ ܕܰܗܘܳܬܼ ܠܒܼܰܪܢܳܫܳܐ ܟܪܺܝܗܳܐ܃ ܕܰܒܼܡܳܢܳܐ ܗܳܢܳܐ ܐܶܬܼܰܐܣܺܝ܃
04:10 [ai]ܗܳܕܼܶܐ ܬܶܬܼܺܝܕܼܰܥ ܠܟܼܽܘܢ ܘܰܠܟܼܽܠܶܗ ܥܰܡܳܐ ܕܺܐܝܣܪܳܝܶܠ܃ ܕܒܰܫܡܶܗ ܕܝܶܫܽܘܥ ܡܫܺܝܚܳܐ ܢܳܨܪܳܝܳܐ܂ ܗܰܘ ܕܰܐܢ̱ܬܿܽܘܢ ܙܩܰܦܼܬܿܽܘܢܳܝܗ̱ܝ܃ ܗܰܘ ܕܰܐܩܺܝܡ ܐܰܠܳܗܳܐ ܡܶܢ ܒܶܝܬܼܡܺܝܬܼܶܐ̈܃ ܒܶܗ ܒܗܰܘ ܗܳܐ ܩܳܐܶܡ ܗܳܢܳܐ ܩܕܼܳܡܰܝܟܿܽܘܢ ܟܰܕܼ ܚܠܺܝܡ܂
04:11 [ai]ܗܳܢܰܘ ܟܺܐܦܼܳܐ ܕܰܐܣܠܺܝܬܿܽܘܢ ܐܰܢ̱ܬܿܽܘܢ ܒܰܢܳܝܶܐ̈܂ ܘܗܽܘ ܗܘܳܐ ܠܪܺܝܫ ܩܰܪܢܳܐ܂
04:12 [ai]ܘܠܰܝܬܿ ܒܐ̱ܢܳܫ ܐ̱ܚܪܺܝܢ ܦܽܘܪܩܳܢܳܐ܂ ܠܳܐ ܓܶܝܪ ܐܺܝܬܼ ܫܡܳܐ ܐ̱ܚܪܺܢܳܐ ܬܚܶܝܬܼ ܫܡܰܝܳܐ ܕܶܐܬܼܺܝܗܶܒܼ ܠܰܒܼܢܰܝܢܳܫܳܐ܃ ܕܒܶܗ ܘܳܠܶܐ ܠܡܶܚܳܐ܀
04:13 [ai]ܘܟܼܰܕܼ ܫܡܰܥܘ ܡܶܠܬܼܶܗ ܕܫܶܡܥܽܘܢ ܘܰܕܼܝܽܘܚܰܢܳܢ܂ ܕܥܺܝܢ ܒܰܓܼܠܶܐ ܐܰܡܪܽܘܗ܃ ܐܶܣܬܿܰܟܿܰܠ ܘܕܠܳܐ ܝܳܕܼܥܺܝܢ ܣܶܦܼܪܳܐ ܘܗܶܕܼܝܽܘܛܶܐ̈ ܐܶܢܽܘܢ܂ ܘܰܬܼܗܰܪܘ ܒܗܽܘܢ܂ ܘܶܐܫܬܰܘܕܰܥܘ ܐܶܢܽܘܢ܂ ܕܥܰܡ ܝܶܫܽܘܥ ܡܶܬܼܗܰܦܿܟܼܺܝܢ ܗ̱ܘܰܘ܂
04:14 [ai]ܘܚܳܙܶܝܢ ܗ̱ܘܰܘ ܕܩܳܐܶܡ ܗ̱ܘܳܐ ܥܰܡܗܽܘܢ ܚܓܼܺܝܪܳܐ ܗܰܘ ܕܶܐܬܼܰܐܣܺܝ܃ ܘܠܳܐ ܡܶܫܟܿܚܺܝܢ ܗ̱ܘܰܘ ܡܶܕܶܡ ܠܡܺܐܡܰܪ ܠܽܘܩܒܼܰܠܗܽܘܢ܂
04:15 [ai]ܗܳܝܕܶܝܢ ܦܩܰܕܼܘ܂ ܕܢܰܦܿܩܽܘܢ ܐܶܢܽܘܢ ܡܶܢ ܟܶܢܫܗܽܘܢ܂ ܘܳܐܡܪܺܝܢ ܗ̱ܘܰܘ ܚܰܕܼ ܠܚܰܕܼ܃
04:16 [ai]ܡܳܢܳܐ ܢܶܥܒܿܶܕܼ ܠܗܽܘܢ ܠܓܼܰܒܼܪ̈ܶܐ ܗܳܠܶܝܢ܂ ܗܳܐ ܓܶܝܪ ܐܳܬܼܳܐ ܓܠܺܝܬܼܳܐ ܕܰܗܘܳܬܼ ܒܺܐܝܕܼܰܝܗܽܘܢ̈܃ ܠܟܼܽܠܗܽܘܢ ܥܳܡܽܘܪ̈ܶܝܗ ܕܽܐܘܪܺܫܠܶܡ ܐܶܬܼܝܰܕܼܥܰܬܼ܂ ܘܠܳܐ ܡܶܫܟܿܚܺܝܢܰܢ ܕܢܶܟܼܦܿܽܘܪ܂
04:17 [ai]ܐܶܠܳܐ ܕܠܳܐ ܝܰܬܿܺܝܪܳܐܺܝܬܼ ܢܶܦܽܘܩ ܒܥܰܡܳܐ ܛܶܒܿܳܐ ܗܳܢܳܐ܃ ܢܶܬܼܠܰܚܰܡ ܠܗܽܘܢ܃ ܕܬܽܘܒܼ ܠܳܐ ܢܡܰܠܠܽܘܢ ܒܰܫܡܳܐ ܗܳܢܳܐ ܠܐ̱ܢܳܫ ܡܶܢ ܒܢܰܝܢܳܫܳܐ܂
04:18 [ai]ܘܰܩܪܰܘ ܐܶܢܽܘܢ ܘܦܼܰܩܶܕܼܘ ܐܶܢܽܘܢ܃ ܕܠܰܓܼܡܳܪ ܠܳܐ ܢܡܰܠܠܽܘܢ܂ ܘܠܳܐ ܢܰܠܦܼܽܘܢ ܒܫܶܡ ܝܶܫܽܘܥ܂
04:19 [ai]ܥܢܰܘ ܫܶܡܥܽܘܢ ܟܺܐܦܼܳܐ ܘܝܽܘܚܰܢܳܢ܂ ܘܶܐܡܰܪܘ ܠܗܽܘܢ܂ ܐܶܢ ܟܺܐܢܳܐ ܩܕܼܳܡ ܐܰܠܳܗܳܐ܂ ܕܰܠܟܼܽܘܢ ܢܶܫܡܰܥ ܝܰܬܿܺܝܪ ܡܶܢ ܐܰܠܳܗܳܐ܂ ܕܽܘܢܘ܂
04:20 [ai]ܠܳܐ ܓܶܝܪ ܡܶܫܟܿܚܺܝܢ ܚ̱ܢܰܢ܃ ܕܡܳܐ ܕܰܚܙܰܝܢ ܘܰܫܡܰܥܢ܃ ܕܠܳܐ ܢܡܰܠܠܺܝܘܗ̱ܝ܂
04:21 [ai]ܘܶܐܬܼܠܰܚܰܡܘ ܠܗܽܘܢ܂ ܘܰܫܪܰܘ ܐܶܢܽܘܢ܂ ܠܳܐ ܓܶܝܪ ܐܶܫܟܿܰܚܘ ܠܗܽܘܢ ܥܶܠܬܼܳܐ ܕܰܢܣܺܝܡܽܘܢ ܒܪܺܫܗܽܘܢ܂ ܡܶܛܽܠ ܥܰܡܳܐ܂ ܟܽܠܢܳܫ ܓܶܝܪ ܡܫܰܒܿܰܚ ܗ̱ܘܳܐ ܠܰܐܠܳܗܳܐ ܥܰܠ ܡܶܕܶܡ ܕܰܗܘܳܐ܂
04:22 [ai]ܝܰܬܿܺܝܪ ܓܶܝܪ ܡܶܢ ܒܰܪ ܐܰܪ̈ܒܥܺܝܢ ܫܢܺܝܢ̈ ܐܺܝܬܼܰܘܗ̱ܝ ܗ̱ܘܳܐ ܓܰܒܼܪܳܐ ܗܰܘ܃ ܕܰܗܘܳܬܼ ܒܶܗ ܗܳܕܼܶܐ ܐܳܬܼܳܐ ܕܳܐܣܝܽܘܬܼܳܐ܂
04:23 [ai]ܘܟܼܰܕܼ ܐܶܫܬܿܪܺܝܘ܂ ܐܶܬܼܰܘ ܠܘܳܬܼ ܐܰܚܰܝܗܽܘܢ̈܂ ܘܶܐܫܬܿܰܥܺܝܘ ܠܗܽܘܢ ܟܽܠ ܡܳܐ ܕܶܐܡܰܪܘ ܟܳܗܢܶܐ̈ ܘܩܰܫܺܝܫܶܐ̈ ܿ܀ܿ܀ܿ
04:24 [ai]ܘܗܶܢܽܘܢ ܟܰܕܼ ܫܡܰܥܘ܃ ܐܰܟܼܚܰܕܼ ܐܰܪܺܝܡܘ ܩܳܠܗܽܘܢ ܠܘܳܬܼ ܐܰܠܳܗܳܐ܂ ܘܶܐܡܰܪܘ܂ ܡܳܪܝܳܐ܃ ܐܰܢ̱ܬܿ ܗ̱ܽܘ ܐܰܠܳܗܳܐ ܕܰܥܒܼܰܕܿܬܿ ܫܡܰܝܳܐ ܘܰܐܪܥܳܐ܃ ܘܝܰܡ̱ܡܶܐ̈܂ ܘܟܼܽܠ ܕܺܐܝܬܼ ܒܗܽܘܢ܂
04:25 [ai]ܘܰܐܢ̱ܬܿ ܗ̱ܽܘ ܕܡܰܠܶܠܬܿ ܒܝܰܕܼ ܪܽܘܚܳܐ ܕܩܽܘܕܼܫܳܐ ܒܦܽܘܡ ܕܿܰܘܺܝܕܼ ܥܰܒܼܕܿܳܟܼ܃ ܠܡܳܢܳܐ ܪܓܼܰܫܘ ܥܰܡ̱ܡܶܐ̈܃ ܘܶܐܡܘܳܬܼܳܐ̈ ܪ̈ܢܰܝ ܣܪܺܝܩܽܘܬܼܳܐ܃
04:26 [ai]ܩܳܡܘ ܡܰܠܟܿܶܐ̈ ܕܰܐܪܥܳܐ ܘܫܰܠܺܝܛܳܢܶܐ̈܃ ܘܶܐܬܼܡܰܠܰܟܼܘ ܐܰܟܼܚܕܼܳܐ ܥܰܠ ܡܳܪܝܳܐ܂ ܘܥܰܠ ܡܫܺܝܚܶܗ܂
04:27 [ai]ܐܶܬܼܟܿܰܢܰܫܘ ܓܶܝܪ ܫܰܪܺܝܪܳܐܺܝܬܼ ܒܰܡܕܼܺܝܢ̱ܬܳܐ ܗܳܕܼܶܐ܃ ܥܰܠ ܩܰܕܿܺܝܫܳܐ ܒܪܳܟܼ ܝܶܫܽܘܥ܂ ܐܰܝܢܳܐ ܕܰܐܢ̱ܬܿ ܡܫܰܚܬܿ܃ ܗܶܪܳܘܕܼܶܣ ܘܦܿܺܝܠܰܛܳܘܣ ܥܰܡ ܥܰܡ̱ܡܶܐ̈܂ ܘܟܼܶܢܫܳܐ ܕܺܐܝܣܪܳܝܶܠ܂
04:28 [ai]ܠܡܶܥܒܿܰܕܼ ܟܽܠ ܡܳܐ ܕܺܐܝܕܼܳܟܼ ܘܨܶܒܼܝܳܢܳܟܼ ܩܰܕܶܡ ܪܫܰܡ ܕܢܶܗܘܶܐ܂
04:29 [ai]ܘܳܐܦܼ ܗܳܫܳܐ ܡܳܪܝܳܐ܃ ܚܽܘܪ܂ ܘܰܚܙܺܝ ܠܠܽܘܚܳܡܰܝܗܽܘܢ̈܂ ܘܗܰܒܼ ܠܥܰܒܼܕܿܰܝܟܿ̈܃ ܕܥܺܝܢ ܒܰܓܼܠܶܐ ܢܶܗܘܽܘܢ ܡܰܟܼܪܙܺܝܢ ܡܶܠܬܼܳܟܼ܃
04:30 [ai]ܟܰܕܼ ܐܺܝܕܼܳܟܼ ܡܰܘܫܶܛ ܐܰܢ̱ܬܿ ܠܳܐܣܘܳܬܼܳܐ̈ ܘܠܰܓܼܒܼܰܪ̈ܘܳܬܼܳܐ ܘܠܳܐܬܼܘܳܬܼܳܐ̈܃ ܕܢܶܗܘܝܳܢ̈ ܒܰܫܡܶܗ ܕܰܒܼܪܳܟܼ ܩܰܕܿܺܝܫܳܐ ܝܶܫܽܘܥ܂
04:31 [ai]ܘܟܼܰܕܼ ܒܥܰܘ ܘܶܐܬܼܟܿܰܫܰܦܼܘ܃ ܐܶܬܿܬܿܙܺܝܥ ܐܰܬܼܪܳܐ ܕܒܶܗ ܟܢܺܝܫܺܝܢ ܗ̱ܘܰܘ܂ ܘܶܐܬܼܡܠܺܝܘ ܟܽܠܗܽܘܢ ܒܪܽܘܚܳܐ ܕܩܽܘܕܼܫܳܐ܂ ܘܰܡܡܰܠܠܺܝܢ ܗ̱ܘܰܘ ܥܺܝܢ ܒܰܓܼܠܶܐ ܡܶܠܬܼܳܐ ܕܰܐܠܳܗܳܐ܀
04:32 [ai]ܐܺܝܬܼ ܗ̱ܘܳܐ ܕܶܝܢ ܠܟܼܶܢܫܳܐ ܕܐ̱ܢܳܫܳܐ܂ ܐܰܝܠܶܝܢ ܕܗܰܝܡܶܢܘ ܗ̱ܘܰܘ܃ ܚܕܼܳܐ ܢܦܼܶܫ܂ ܘܚܰܕܼ ܪܶܥܝܳܢ܂ ܘܠܳܐ ܐ̱ܢܳܫ ܡܶܢܗܽܘܢ ܐܳܡܰܪ ܗ̱ܘܳܐ ܥܰܠ ܢܶܟܼܣܶܐ̈ ܕܰܩܢܶܐ ܗ̱ܘܳܐ܃ ܕܕܼܺܝܠܶܗ ܐܶܢܽܘܢ܂ ܐܶܠܳܐ ܟܽܠ ܡܶܕܶܡ ܕܺܐܝܬܼ ܗ̱ܘܳܐ ܠܗܽܘܢ܂ ܕܓܰܘܳܐ ܗܘܳܐ܂
04:33 [ai]ܘܰܒܚܰܝܠܳܐ ܪܰܒܿܳܐ ܡܰܣܗܕܼܺܝܢ ܗ̱ܘܰܘ ܗܶܢܽܘܢ ܫܠܺܝܚܶܐ̈܃ ܥܰܠ ܩܝܳܡܬܿܶܗ ܕܝܶܫܽܘܥ ܡܫܺܝܚܳܐ܂ ܘܛܰܝܒܿܽܘܬܼܳܐ ܪܰܒܿܬܼܳܐ ܐܺܝܬܼ ܗ̱ܘܳܬܼ ܥܰܡ ܟܽܠܗܽܘܢ܂
04:34 [ai]ܘܐ̱ܢܳܫ ܠܰܝܬܿ ܗ̱ܘܳܐ ܒܗܽܘܢ ܕܰܨܪܺܝܟܼ܂ ܐܰܝܠܶܝܢ ܓܶܝܪ ܕܰܩܢܶܝܢ ܗ̱ܘܰܘ ܩܽܘܪ̈ܝܳܐ ܘܒܼܳܬܿܶܐ̈܃ ܡܙܰܒܢܺܝܢ ܗ̱ܘܰܘ ܘܡܰܝܬܿܶܝܢ ܕܡܰܝܳܐ̈ ܕܿܡܶܕܶܡ ܕܿܡܶܙܕܿܰܒܰܢ܃
04:35 [ai]ܘܣܳܝܡܺܝܢ ܠܘܳܬܼ ܪ̈ܶܓܼܠܰܝܗܽܘܢ ܕܰܫܠܺܝܚܶܐ̈܃ ܘܡܶܬܼܺܝܗܶܒܼ ܗ̱ܘܳܐ ܠܐ̱ܢܳܫ ܐ̱ܢܳܫ܂ ܐܰܝܟܼ ܡܶܕܶܡ ܕܰܣܢܺܝܩ ܗ̱ܘܳܐ܀
04:36 [ai]ܝܰܘܣܶܦܼ ܕܶܝܢ ܗܰܘ ܕܶܐܬܼܟܿܰܢܺܝ ܒܰܪܢܰܒܼܰܐ ܡܶܢ ܫܠܺܝܚܶܐ̈܃ ܕܡܶܬܿܬܿܰܪܓܿܰܡ ܒܪܳܐ ܕܒܽܘܝܳܐܳܐ܃ ܠܶܘܳܝܳܐ ܡܶܢ ܐܰܬܼܪܳܐ ܕܩܽܘܦܿܪܳܣ܃
04:37 [ai]ܐܺܝܬܼ ܗ̱ܘܳܐ ܠܶܗ ܩܪܺܝܬܼܳܐ܂ ܘܙܰܒܿܢܳܗ܂ ܘܰܐܝܬܿܺܝ ܕܡܶܝܗ̈܂ ܘܣܳܡ ܩܕܼܳܡ ܪ̈ܶܓܼܠܰܝܗܽܘܢ ܕܰܫܠܺܝܚܶܐ̈܂

next chapter