← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62044: P Acts

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


05:01 [ai]ܘܓܼܰܒܼܪܳܐ ܚܰܕܼ ܕܰܫܡܶܗ ܗܘܳܐ ܚܰܢܰܢܝܳܐ܃ ܥܰܡ ܐܰܢ̱ܬܿܬܼܶܗ ܕܰܫܡܳܗ ܗܘܳܐ ܫܰܦܿܺܝܪܳܐ܃ ܙܰܒܿܶܢ ܗ̱ܘܳܐ ܩܪܺܝܬܼܶܗ܂
05:02 [ai]ܘܰܫܩܰܠ ܡܶܢ ܛܺܝܡܶܝܗ̈܂ ܘܛܰܫܺܝ܂ ܟܰܕܼ ܪܓܼܺܝܫܳܐ ܗ̱ܘܳܬܼ ܒܶܗ ܐܰܢ̱ܬܿܬܼܶܗ܂ ܘܰܐܝܬܿܺܝ ܡܶܢܶܗ ܡܶܢ ܟܶܣܦܿܳܐ܃ ܘܣܳܡ ܩܕܼܳܡ ܪ̈ܶܓܼܠܰܝܗܽܘܢ ܕܰܫܠܺܝܚܶܐ̈܂
05:03 [ai]ܘܶܐܡܰܪ ܠܶܗ ܫܶܡܥܽܘܢ܂ ܚܰܢܰܢܝܳܐ܃ ܡܳܢܰܘ ܕܗܳܟܼܰܢܳܐ ܡܠܳܐ ܣܳܛܳܢܳܐ ܠܶܒܳܟܼ܃ ܕܰܬܕܼܰܓܿܶܠ ܒܪܽܘܚܳܐ ܕܩܽܘܕܼܫܳܐ܃ ܘܰܬܿܛܰܫܶܐ ܡܶܢ ܟܶܣܦܿܳܐ ܕܰܕܼܡܶܝܗ̈ ܕܰܩܪܺܝܬܼܳܐ܂
05:04 [ai]ܠܳܐ ܗ̱ܘܳܐ ܕܺܝܠܳܟܼ ܗܘܳܬܼ ܥܰܕܼܠܳܐ ܬܿܶܙܕܿܰܒܰܢ܃ ܘܡܶܢ ܕܶܐܙܕܿܰܒܿܢܰܬܼ ܬܽܘܒܼ ܐܰܢ̱ܬܿ ܫܰܠܺܝܛ ܗ̱ܘܰܝܬܿ ܥܰܠ ܕܡܶܝܗ̈܂ ܠܡܳܢܳܐ ܣܳܡܬܿ ܒܿܠܶܒܳܟܼ ܕܬܶܥܒܿܶܕܼ ܨܒܼܽܘܬܼܳܐ ܗܳܕܼܶܐ܂ ܠܳܐ ܕܰܓܿܶܠܬܿ ܒܰܒܼܢܰܝ ܐ̱ܢܳܫܳܐ܃ ܐܶܠܳܐ ܒܰܐܠܳܗܳܐ܂
05:05 [ai]ܘܟܼܰܕܼ ܫܡܰܥ ܚܰܢܰܢܝܳܐ ܗܳܠܶܝܢ ܡܶܠܶܐ̈܃ ܢܦܼܰܠ܂ ܘܡܺܝܬܼ܂ ܘܰܗܘܳܬܼ ܕܶܚܠܬܼܳܐ ܪܰܒܿܬܼܳܐ ܒܟܽܠܗܽܘܢ ܗܳܠܶܝܢ ܕܰܫܡܰܥܘ܂
05:06 [ai]ܘܩܳܡܘ ܐܰܝܠܶܝܢ ܕܰܥܠܰܝܡܺܝܢ ܒܗܽܘܢ܃ ܘܟܼܰܢܫܽܘܗ̱ܝ܂ ܘܰܐܦܿܶܩܘ ܩܰܒܼܪܽܘܗ̱ܝ܂
05:07 [ai]ܘܡܶܢ ܒܳܬܼܰܪ ܕܰܗܘܰܝ̈ ܬܠܳܬܼ ܫܳܥܺܝܢ̈܃ ܐܳܦܼ ܐܰܢ̱ܬܿܬܼܶܗ ܥܶܠܰܬܼ܂ ܟܰܕܼ ܠܳܐ ܝܳܕܼܥܳܐ ܗ̱ܘܳܬܼ ܡܳܢܳܐ ܗܘܳܐ܂
05:08 [ai]ܐܳܡܰܪ ܠܳܗ ܫܶܡܥܽܘܢ܂ ܐܶܡܰܪ ܠܺܝ܂ ܐܶܢ ܒܗܳܠܶܝܢ ܕܡܰܝܳܐ̈ ܙܰܒܿܶܢܬܿܽܘܢ ܩܪܺܝܬܼܳܐ܂ ܗܺܝ ܕܶܝܢ ܐܶܡܪܰܬܼ܂ ܐܺܝܢ܂ ܒܗܳܠܶܝܢ ܕܡܰܝܳܐ̈܂
05:09 [ai]ܐܳܡܰܪ ܠܳܗ ܫܶܡܥܽܘܢ܂ ܡܶܛܽܠ ܕܶܐܫܬܿܘܺܝܬܿܽܘܢ ܠܰܡܢܰܣܳܝܽܘ ܪܽܘܚܶܗ ܕܡܳܪܝܳܐ܃ ܗܳܐ ܪ̈ܶܓܼܠܰܝܗܽܘܢ ܕܿܩܳܒܼܽܘܪ̈ܰܘܗ̱ܝ ܕܒܰܥܠܶܟܼܝ ܒܬܰܪܥܳܐ܂ ܘܗܶܢܽܘܢ ܢܰܦܿܩܽܘܢܶܟܼܝ܂
05:10 [ai]ܘܒܼܳܗ ܒܫܳܥܬܼܳܐ܂ ܢܶܦܼܠܰܬܼ ܩܕܼܳܡ ܪ̈ܶܓܼܠܰܝܗܽܘܢ܂ ܘܡܺܝܬܼܰܬܼ܂ ܘܥܰܠܘ ܥܠܰܝܡܶܐ̈ ܗܳܢܽܘܢ܂ ܘܶܐܫܟܿܚܽܘܗ ܟܰܕܼ ܡܺܝܬܼܳܐ܃ ܘܰܩܦܼܰܣܘ ܐܰܘܒܿܶܠܘ ܩܰܒܼܪܽܘܗ ܥܰܠ ܓܶܢ̱ܒܼ ܒܰܥܠܳܗ܂
05:11 [ai]ܘܰܗܘܳܬܼ ܕܶܚܠܬܼܳܐ ܪܰܒܿܬܼܳܐ ܒܟܽܠܳܗ ܥܺܕ̱ܿܬܳܐ܂ ܘܰܒܟܼܽܠܗܽܘܢ ܗܳܢܽܘܢ ܕܰܫܡܰܥܘ ܀
05:12 [ai]ܘܗܳܘܝܳܢ̈ ܗ̱ܘܰܝ̈ ܒܝܰܕܼ ܫܠܺܝܚܶܐ̈܃ ܐܳܬܼܘܳܬܼܳܐ̈ ܘܰܓܼܒܼܰܪ̈ܘܳܬܼܳܐ ܣܰܓܿܺܝܳܐܬܼܳܐ̈ ܒܥܰܡܳܐ܂ ܘܟܼܽܠܗܽܘܢ ܟܢܺܝܫܺܝܢ ܗ̱ܘܰܘ ܐܰܟܼܚܕܼܳܐ ܒܶܐܣܛܘܳܐ ܕܰܫܠܶܝܡܽܘܢ܂
05:13 [ai]ܘܡܶܢ ܐ̱ܢܳܫܳܐ ܐ̱ܚܪ̈ܳܢܶܐ܃ ܐ̱ܢܳܫ ܠܳܐ ܡܰܡܪܰܚ ܗ̱ܘܳܐ ܕܢܶܬܼܩܰܪܰܒܼ ܠܘܳܬܼܗܽܘܢ܂ ܐܶܠܳܐ ܡܰܘܪܶܒܼ ܗ̱ܘܳܐ ܠܗܽܘܢ ܥܰܡܳܐ܂
05:14 [ai]ܘܝܰܬܿܺܝܪ ܡܶܬܿܬܰܘܣܦܼܳܢ ܗ̱ܘܰܘ ܐܰܝܠܶܝܢ ܕܰܡܗܰܝܡܢܺܝܢ ܗ̱ܘܰܘ ܒܡܳܪܝܳܐ܃ ܟܶܢܫܳܐ ܕܿܓܼܰܒܼܪ̈ܶܐ ܘܰܕܼܢܶܫܶܐ̈܃
05:15 [ai]ܐܰܝܟܿܰܢܳܐ ܕܰܒܼܫܽܘܩܶܐ̈ ܡܰܦܿܩܺܝܢ ܗ̱ܘܰܘ ܠܰܟܼܪ̈ܺܝܗܶܐ܂ ܟܰܕܼ ܪܡܶܝܢ ܗ̱ܘܰܘ ܒܥܰܪ̈ܣܳܬܼܳܐ܂ ܕܶܐܡܰܬܼܝ ܕܢܶܗܘܶܐ ܐܳܬܼܶܐ ܫܶܡܥܽܘܢ܃ ܐܳܦܼܶܢ ܛܶܠܳܢܺܝܬܼܶܗ ܬܰܓܿܶܢ ܥܠܰܝܗܽܘܢ܂
05:16 [ai]ܐܳܬܼܶܝܢ ܗ̱ܘܰܘ ܕܶܝܢ ܣܰܓܿܺܝܶܐܐ̈ ܠܘܳܬܼܗܽܘܢ܃ ܡܶܢ ܡܕܼܺܝܢܳܬܼܳܐ̈ ܐ̱ܚܪ̈ܳܢܝܳܬܼܳܐ ܕܿܰܚܕܼܳܪ̈ܰܝ ܐܽܘܪܺܫܠܶܡ܃ ܟܰܕܼ ܡܰܝܬܿܶܝܢ ܗ̱ܘܰܘ ܟܿܪ̈ܺܝܗܶܐ܂ ܘܰܐܝܠܶܝܢ ܕܗܳܘܝܳܢ̈ ܗ̱ܘܰܝ̈ ܠܗܽܘܢ ܪ̈ܽܘܚܶܐ ܛܰܢܦܼܳܬܼܳܐ̈܃ ܘܡܶܬܼܚܰܠܡܺܝܢ ܗ̱ܘܰܘ ܟܽܠܗܽܘܢ܀
05:17 [ai]ܘܶܐܬܼܡܠܺܝ ܗ̱ܘܳܐ ܚܣܳܡܳܐ܂ ܪܰܒܿ ܟܳܗܢܶܐ̈ ܘܟܼܽܠܗܽܘܢ ܕܥܰܡܶܗ܃ ܕܺܐܝܬܼܰܝܗܽܘܢ ܗ̱ܘܰܘ ܡܶܢ ܝܽܘܠܦܿܳܢܳܐ ܕܙܰܕܿܽܘܩܳܝܶܐ̈܂
05:18 [ai]ܘܰܐܪܡܺܝܘ ܐܺܝܕܼܰܝܳܐ̈ ܥܰܠ ܫܠܺܝܚܶܐ̈܃ ܘܶܐܚܰܕܼܘ ܐܶܣܰܪܘ ܐܶܢܽܘܢ ܒܶܝܬܼ ܐܰܣܺܝܪ̈ܶܐ܂
05:19 [ai]ܗܳܝܕܶܝܢ ܒܠܺܠܝܳܐ ܡܰܠܰܐܟܼܳܐ ܕܡܳܪܝܳܐ܃ ܦܬܼܰܚ ܬܰܪܥܳܐ ܕܒܶܝܬܼ ܐܰܣܺܝܪ̈ܶܐ܂ ܘܰܐܦܿܶܩܐܶܢܽܘܢ܂ ܘܶܐܡܰܪ ܠܗܽܘܢ܂
05:20 [ai]ܙܶܠܘ ܩܽܘܡܘ ܒܗܰܝܟܠܳܐ܃ ܘܡܰܠܶܠܘ ܠܥܰܡܳܐ ܟܽܠܗܶܝܢ ܡܶܠܶܐ̈ ܗܳܠܶܝܢ ܕܚܰܝ̈ܶܐ܂
05:21 [ai]ܘܰܢܦܼܰܩܘ ܥܶܕܳܢ ܫܰܦܼܪܳܐ܂ ܘܥܰܠܘ ܠܗܰܝܟܠܳܐ܂ ܘܡܰܠܦܼܺܝܢ ܗ̱ܘܰܘ܀ ܪ̈ܰܒܿܟܿܳܗܢܶܐ ܕܶܝܢ ܘܰܐܝܠܶܝܢ ܕܥܰܡܶܗ܃ ܩܪܰܘ ܠܚܰܒܼܪ̈ܰܝܗܽܘܢ ܘܰܠܩܰܫܺܝܫܶܐ̈ ܕܺܐܝܣܪܳܝܶܠ܃ ܘܫܰܕܿܰܪܘ ܠܒܼܶܝܬܼ ܐܰܣܺܝܪ̈ܶܐ ܕܢܰܝܬܿܽܘܢ ܐܶܢܽܘܢ ܠܰܫܠܺܝܚܶܐ̈܂
05:22 [ai]ܘܟܼܰܕܼ ܐܶܙܰܠܘ ܐܰܝܠܶܝܢ ܕܶܐܫܬܿܰܕܿܰܪܘ ܡܶܢܗܽܘܢ܃ ܠܳܐ ܐܶܫܟܿܰܚܘ ܐܶܢܽܘܢ ܒܶܝܬܼܐܰܣܺܝܪ̈ܶܐ܂ ܘܰܗܦܼܰܟܼܘ ܐܶܬܼܰܘ܂
05:23 [ai]ܐܳܡܪܺܝܢ܂ ܐܶܫܟܿܰܚܢ ܒܶܝܬܼ ܐܰܣܺܝܪ̈ܶܐ܂ ܕܰܐܚܺܝܕܼ ܙܗܺܝܪܳܐܺܝܬܼ܂ ܘܳܐܦܼ ܠܢܳܛܽܘܪ̈ܶܐ ܕܩܳܝܡܺܝܢ ܥܰܠ ܬܿܰܪ̈ܥܶܐ܂ ܘܰܦܼܬܼܰܚܢ܂ ܘܐ̱ܢܳܫ ܠܳܐ ܐܶܫܟܿܰܚܢ ܬܰܡܳܢ܂
05:24 [ai]ܘܟܼܰܕܼ ܫܡܰܥܘ ܗܳܠܶܝܢ ܡܶܠܶܐ̈ ܪ̈ܰܒܰܝ ܟܳܗܢܶܐ̈ ܘܰܐܪ̈ܟܼܽܘܢܶܐ ܕܗܰܝܟܠܳܐ܃ ܬܰܘܺܝܪܺܝܢ ܗ̱ܘܰܘ ܥܠܰܝܗܽܘܢ܂ ܘܡܶܬܼܚܰܫܒܼܺܝܢ ܗ̱ܘܰܘ܂ ܕܡܳܢܳܐ ܗ̱ܝ ܗܳܕܼܶܐ܂
05:25 [ai]ܘܶܐܬܼܳܐ ܐ̱ܢܳܫ ܐܰܘܕܿܰܥ ܐܶܢܽܘܢ܂ ܕܗܳܢܽܘܢ ܓܿܰܒܼܪ̈ܶܐ ܕܰܚܒܼܰܫܬܿܽܘܢ ܒܶܝܬܼ ܐܰܣܺܝܪ̈ܶܐ܃ ܗܳܐ܂ ܩܳܝܡܺܝܢ ܒܗܰܝܟܠܳܐ܂ ܘܡܰܠܦܼܺܝܢ ܠܥܰܡܳܐ܂
05:26 [ai]ܗܳܝܕܶܝܢ ܐܶܙܰܠܘ ܐܰܪ̈ܟܼܽܘܢܶܐ ܥܰܡ ܕܰܚܫܶܐ̈ ܕܢܰܝܬܿܽܘܢ ܐܶܢܽܘܢ܂ ܠܳܐ ܒܰܩܛܺܝܪܳܐ܂ ܕܳܚܠܺܝܢ ܗ̱ܘܰܘ ܓܶܝܪ܃ ܕܰܠܡܳܐ ܢܶܪܓܿܽܘܡ ܐܶܢܽܘܢ ܥܰܡܳܐ܂
05:27 [ai]ܘܟܼܰܕܼ ܐܰܝܬܿܺܝܘ ܐܶܢܽܘܢ܃ ܐܰܩܺܝܡܘ ܐܶܢܽܘܢ ܩܕܼܳܡ ܟܽܠܶܗ ܟܶܢܫܳܐ܂ ܘܰܐܩܶܦܼ ܗ̱ܘܳܐ ܪ̈ܰܒܿܟܿܳܗܢܶܐ ܠܡܺܐܡܰܪ ܠܗܽܘܢ܂
05:28 [ai]ܠܳܐ ܗ̱ܘܳܐ ܡܶܦܼܩܰܕܼ ܦܩܰܕܼܢ ܗ̱ܘܰܝܢ ܠܟܼܽܘܢ܃ ܕܰܠܐ̱ܢܳܫ ܠܳܐ ܬܰܠܦܼܽܘܢ ܒܰܫܡܳܐ ܗܳܢܳܐ܂ ܐܰܢ̱ܬܿܽܘܢ ܕܶܝܢ܂ ܗܳܐ ܡܠܰܝܬܿܽܘܢܳܗ ܠܽܐܘܪܺܫܠܶܡ ܡܶܢ ܝܽܘܠܦܿܳܢܟܼܽܘܢ܂ ܘܨܳܒܼܶܝܢ ܐܢ̱ܬܿܽܘܢ ܕܬܰܝܬܿܽܘܢ ܥܠܰܝܢ ܕܡܶܗ ܕܓܰܒܼܪܳܐ ܗܳܢܳܐ ܿ܀ܿ܀ܿ
05:29 [ai]ܥܢܳܐ ܫܶܡܥܽܘܢ ܥܰܡ ܫܠܺܝܚܶܐ̈܂ ܘܶܐܡܰܪ ܠܗܽܘܢ܂ ܠܰܐܠܳܗܳܐ ܘܳܠܶܐ ܠܡܶܬܿܛܦܿܳܣܽܘ ܝܰܬܿܺܝܪ ܡܶܢ ܕܿܠܰܒܼܢܰܝܢܳܫܳܐ܂
05:30 [ai]ܐܰܠܳܗܳܐ ܕܰܐܒܼܳܗܳܬܼܰܢ̈ ܐܰܩܺܝܡ ܠܝܶܫܽܘܥ܃ ܐܰܝܢܳܐ ܕܰܐܢ̱ܬܿܽܘܢ ܩܛܰܠܬܿܽܘܢ܂ ܬܠܰܝܬܿܽܘܢܳܝܗ̱ܝ ܬܠܰܝܬܿܽܘܢܳܝܗ̱ܝ ܥܰܠ ܩܰܝܣܳܐ܂
05:31 [ai]ܠܶܗ ܠܗܳܢܳܐ ܐܰܩܺܝܡ ܐܰܠܳܗܳܐ ܪܺܫܳܐ ܘܡܰܚܝܳܢܳܐ܂ ܘܰܐܪܺܝܡܶܗ ܒܝܰܡܺܝܢܶܗ܃ ܐܰܝܟܼ ܕܢܶܬܿܶܠ ܘܫܽܘܒܼܩܳܢ ܚܛܳܗܶܐ̈܂ ܠܺܐܝܣܪܳܝܶܠ܂
05:32 [ai]ܘܰܚܢܰܢ ܣܳܗܕܿܶܐ̈ ܚ̱ܢܰܢ ܕܡܶܠܶܐ̈ ܗܳܠܶܝܢ܂ ܘܪܽܘܚܳܐ ܕܩܽܘܕܼܫܳܐ܂ ܗܰܘ ܕܝܰܗ̱ܒܼ ܐܰܠܳܗܳܐ ܠܰܐܝܠܶܝܢ ܕܰܡܗܰܝܡܢܺܝܢ ܒܶܗ܀
05:33 [ai]ܘܟܼܰܕܼ ܫܡܰܥܘ ܗ̱ܘܰܘ ܗܳܠܶܝܢ ܡܶܠܶܐ̈܃ ܡܶܬܼܓܿܰܘܙܠܺܝܢ ܗ̱ܘܰܘ ܒܪܽܘܓܼܙܳܐ܂ ܘܡܶܬܼܚܰܫܒܼܺܝܢ ܗ̱ܘܰܘ ܠܡܶܩܛܰܠ ܐܶܢܽܘܢ܂
05:34 [ai]ܘܩܳܡ ܗ̱ܘܳܐ ܚܰܕܼ ܡܶܢ ܦܿܪ̈ܺܝܫܶܐ ܕܰܫܡܶܗ ܗܘܳܐ ܓܿܰܡܰܠܺܝܐܝܶܠ ܡܰܠܶܦܼ ܢܳܡܽܘܣܳܐ܂ ܘܰܡܝܰܩܰܪ ܡܶܢ ܟܽܠܶܗ ܥܰܡܳܐ܃ ܘܰܦܼܩܰܕܼ ܕܢܰܦܿܩܽܘܢ ܐܶܢܽܘܢ ܠܰܫܠܺܝܚܶܐ̈ ܠܒܼܰܪ ܥܶܕܳܢܳܐ ܙܥܽܘܪܳܐ܂
05:35 [ai]ܘܶܐܡܰܪ ܠܗܽܘܢ܂ ܓܿܰܒܼܪ̈ܶܐ ܒܢܰܝ ܐܺܝܣܪܳܝܶܠ܃ ܐܶܙܕܿܰܗ̱ܪܘ ܒܢܰܦܼܫܟܼܽܘܢ܂ ܘܰܚܙܰܘ ܡܳܢܳܐ ܘܳܠܶܐ ܠܟܼܽܘܢ ܠܡܶܥܒܿܰܕܼ ܥܰܠ ܗܳܠܶܝܢ ܐ̱ܢܳܫܳܐ܂
05:36 [ai]ܡܶܢ ܩܕܼܳܡ ܓܶܝܪ ܗܳܢܳܐ ܙܰܒܼܢܳܐ܃ ܩܳܡ ܗ̱ܘܳܐ ܬܳܘܕܼܰܐ܂ ܘܶܐܡܰܪ ܥܰܠ ܢܰܦܼܫܶܗ܂ ܕܿܡܶܕܶܡ ܗ̱ܽܘ ܪܰܒܼ܂ ܘܶܐܙܰܠܘ ܒܳܬܼܪܶܗ ܐܰܝܟܼ ܐܰܪܒܿܰܥܡܳܐܐ ܓܿܰܒܼܪ̈ܺܝܢ܂ ܘܗܽܘ ܐܶܬܼܩܛܶܠ܂ ܘܰܐܝܠܶܝܢ ܕܳܐܙܺܠ̱ܝܢ ܗ̱ܘܰܘ ܒܳܬܼܪܶܗ܂ ܐܶܬܼܒܰܕܿܰܪܘ܂ ܘܰܗܘܰܘ ܐܰܝܟܼ ܠܳܐ ܡܶܕܶܡ܂
05:37 [ai]ܘܩܳܡ ܡܶܢ ܒܳܬܼܪܶܗ ܺܝܗܽܘܕܼܳܐ ܓܠܺܝܠܳܝܳܐ܃ ܒܝܰܘܡܳܬܼܳܐ̈ ܕܿܡܶܬܼܟܿܰܬܼܒܺܝܢ ܗ̱ܘܰܘ ܐ̱ܢܳܫܳܐ ܒܰܟܼܣܶܦܼܪܺܫܳܐ܂ ܘܰܐܣܛܺܝ ܥܰܡܳܐ ܣܰܓܿܺܝܳܐܐ ܒܳܬܼܪܶܗ܂ ܘܗܽܘ ܡܺܝܬܼ܂ ܘܟܼܽܠܗܽܘܢ ܐܰܝܠܶܝܢ ܕܳܐܙܺܠ̱ܝܢ ܗ̱ܘܰܘ ܒܳܬܼܪܶܗ܂ ܐܶܬܼܒܰܕܿܰܪܘ܂
05:38 [ai]ܘܗܳܫܳܐ ܐܳܡܰܪ ܐ̱ܢܳܐ ܠܟܼܽܘܢ܃ ܦܪܽܘܩܘ ܠܟܼܽܘܢ܂ ܡܶܢ ܗܳܠܶܝܢ ܐ̱ܢܳܫܳܐ܂ ܘܰܫܒܼܽܘܩܘ ܠܗܽܘܢ܂ ܕܶܐܢ ܗ̱ܽܘ ܕܡܶܢ ܒܢܰܝܢܳܫܳܐ ܐܺܝܬܼܶܝܗ ܗܳܕܼܶܐ ܡܰܚܫܰܒܼܬܳܐ܂ ܘܗܳܢܳܐ ܥܒܼܳܕܼܳܐ܃ ܡܶܫܬܪܶܝܢ ܘܥܳܒܼܪܺܝܢ܂
05:39 [ai]ܐܶܢ ܕܶܝܢ ܡܶܢ ܐܰܠܳܗܳܐ ܗ̱ܘ܃ ܠܳܐ ܡܳܛܝܳܐ ܒܺܐܝܕܼܰܝܟܿܽܘܢ̈ ܕܰܬܼܒܼܰܛܠܽܘܢܳܝܗ̱ܝ܂ ܕܰܠܡܳܐ ܬܶܫܬܿܰܟܼܚܽܘܢ ܠܟܼܽܘܢ܂ ܕܠܽܘܩܒܼܰܠ ܐܰܠܳܗܳܐ ܩܳܝܡܺܝܢ ܐܢ̱ܬܿܽܘܢ܂
05:40 [ai]ܘܶܐܬܿܛܦܿܺܝܣܘ ܠܶܗ܂ ܘܰܩܪܰܘ ܐܶܢܽܘܢ ܠܰܫܠܺܝܚܶܐ̈܂ ܘܢܰܓܿܶܕܼܘ ܐܶܢܽܘܢ܂ ܘܦܼܰܩܶܕܼܘ ܐܶܢܽܘܢ܂ ܕܠܳܐ ܢܶܗܘܽܘܢ ܡܡܰܠܠܺܝܢ ܒܰܫܡܳܐ ܕܝܶܫܽܘܥ܂ ܘܰܫܪܰܘ ܐܶܢܽܘܢ܂
05:41 [ai]ܘܰܢܦܼܰܩܘ ܡܶܢ ܩܕܼܳܡܰܝܗܽܘܢ܂ ܟܰܕܼ ܚܳܕܼܶܝܢ܂ ܕܰܫܘܰܘ ܗ̱ܘܰܘ ܡܶܛܽܠ ܫܡܳܐ ܕܢܶܨܛܰܥܪܽܘܢ܂
05:42 [ai]ܘܠܳܐ ܫܳܠܶܝܢ ܗ̱ܘܰܘ ܟܽܠܝܽܘܡ܂ ܠܡܰܠܳܦܼܽܘ ܒܗܰܝܟܠܳܐ܂ ܘܰܒܒܼܰܝܬܳܐ܃ ܘܠܰܡܣܰܒܿܳܪܽܘ ܥܰܠ ܡܳܪܰܢ ܝܶܫܽܘܥ ܡܫܺܝܚܳܐ܀

next chapter