The Comprehensive Aramaic Lexicon

06:01 [ai]	ܘܰܒܗܽܘܢ ܒܝܰܘܡܳܬܼܳܐ̈ ܗܳܢܽܘܢ܂ ܟܰܕܼ ܣܓܼܺܝܘ ܬܰܠܡܺܝܕܼܶܐ̈܃ ܪܰܛܶܢܘ ܗ̱ܘܰܘ ܝܰܘܢܳܝܶܐ̈ ܬܰܠܡܺܝܕܼܶܐ̈ ܥܰܠ ܥܶܒܼܪ̈ܳܝܶܐ܃ ܕܡܶܬܼܒܿܰܣܝܳܢ̈ ܗ̱ܘܰܝ̈ ܐܰܪ̈ܡܠܳܬܼܗܽܘܢ ܒܬܶܫܡܶܫܬܳܐ ܕܟܽܠܝܽܘܡ܂
06:02 [ai]	ܘܰܩܪܰܘ ܬܪܶܥܣܰܪ ܫܠܺܝܚܶܐ̈ ܠܟܼܽܠܶܗ ܟܶܢܫܳܐ ܕܬܰܠܡܺܝܕܼܶܐ̈܂ ܘܶܐܡܰܪܘ ܠܗܽܘܢ܂ ܠܳܐ ܫܰܦܿܺܝܪ ܕܢܶܫܒܿܽܘܩ ܡܶܠܬܼܳܐ ܕܰܐܠܳܗܳܐ܂ ܘܰܢܫܰܡܶܫ ܦܿܳܬܼܽܘܪ̈ܶܐ܂
06:03 [ai]	ܒܨܰܘ ܗܳܟܼܺܝܠ ܐܰܚܰܝ̈܃ ܘܰܓܼܒܼܰܘ ܫܰܒܼܥܳܐ ܓܿܰܒܼܪ̈ܺܝܢ ܡܶܢܟܼܽܘܢ܃ ܕܺܐܝܬܼ ܥܠܰܝܗܽܘܢ ܣܳܗܕܿܽܘܬܼܳܐ܃ ܘܰܡܠܶܝܢ ܪܽܘܚܶܗ ܕܡܳܪܝܳܐ ܘܚܶܟܼܡܬܼܳܐ܃ ܘܰܢܩܺܝܡ ܐܶܢܽܘܢ ܥܰܠ ܗܳܕܼܶܐ ܨܒܼܽܘܬܼܳܐ܂
06:04 [ai]	ܘܰܚܢܰܢ܂ ܢܶܗܘܶܐ ܐܰܡܺܝܢܺܝܢ܂ ܒܰܨܠܽܘܬܼܳܐ܂ ܘܰܒܬܼܶܫܡܶܫܬܳܐ ܕܡܶܠܬܼܳܐ܂
06:05 [ai]	ܘܫܶܦܼܪܰܬܼ ܗܳܕܼܶܐ ܡܶܠܬܼܳܐ܂ ܩܕܼܳܡ ܟܽܠܶܗ ܥܰܡܳܐ܂ ܘܰܓܼܒܼܰܘ ܠܶܐܣܛܶܦܼܰܢܳܘܣ܂ ܓܰܒܼܪܳܐ ܕܰܡܠܶܐ ܗ̱ܘܳܐ ܗܰܝܡܳܢܽܘܬܼܳܐ܂ ܘܪܽܘܚܳܐ ܕܩܽܘܕܼܫܳܐ܂ ܘܰܠܦܼܺܝܠܺܝܦܿܳܘܣ܂ ܘܠܰܦܿܪܳܟܼܳܪܳܘܣ܂ ܘܰܠܢܺܝܩܰܢܳܘܪ܂ ܘܰܠܛܺܝܡܳܘܢ܂ ܘܰܠܦܿܰܪܡܶܢܰܐ܂ ܘܰܠܢܺܝܩܳܠܰܐܘܳܣ܂ ܓܺܝܽܘܪܳܐ ܐܰܢܛܺܝܳܘܟܼܳܝܳܐ܂
06:06 [ai]	ܗܳܠܶܝܢ ܩܳܡܘ ܩܕܼܳܡܰܝܗܽܘܢ ܕܰܫܠܺܝܚܶܐ̈܂ ܘܟܼܰܕܼ ܨܰܠܺܝܘ܂ ܣܳܡܘ ܥܠܰܝܗܽܘܢ ܐܺܝܕܼܳܐ܂
06:07 [ai]	ܘܡܶܠܬܼܶܗ ܕܰܐܠܳܗܳܐ ܪܳܒܼܝܳܐ ܗ̱ܘܳܬܼ܂ ܘܣܳܓܼܶܐ ܗ̱ܘܳܐ ܡܶܢܝܳܢܳܐ ܕܬܰܠܡܺܝܕܼܶܐ̈ ܒܽܐܘܪܺܫܠܶܡ ܛܳܒܼ܂ ܘܥܰܡܳܐ ܣܰܓܿܺܝܳܐܐ ܡܶܢ ܺܝܗܽܘܕܼܳܝܶܐ̈ ܡܶܫܬܿܡܰܥ ܗ̱ܘܳܐ ܠܗܰܝܡܳܢܽܘܬܼܳܐ܀
06:08 [ai]	ܐܶܣܛܶܦܼܰܢܳܘܣ ܕܶܝܢ܃ ܡܠܶܐ ܗ̱ܘܳܐ ܛܰܝܒܿܽܘܬܼܳܐ܂ ܘܚܰܝܠܳܐ܂ ܘܥܳܒܼܶܕܼ ܗ̱ܘܳܐ ܐܳܬܼܘܳܬܼܳܐ̈܂ ܘܬܼܶܕܼܡܪ̈ܳܬܼܳܐ ܒܥܰܡܳܐ܂
06:09 [ai]	ܘܩܳܡܘ ܗ̱ܘܰܘ ܐ̱ܢܳܫܳܐ ܡܶܢ ܟܢܽܘܫܬܳܐ ܕܡܶܬܼܩܰܪܝܳܐ ܕܠܺܝܒܼܶܪܛܺܝܢܽܘ܃ ܘܩܽܘܪ̈ܺܝܢܳܝܶܐ ܘܰܐܠܶܟܿܣܰܢܕܿܪ̈ܳܝܶܐ܂ ܘܰܕܼܡܶܢ ܩܺܝܠܺܝܩܺܝܰܐ܂ ܘܡܶܢ ܐܰܣܺܝܰܐ܂ ܘܕܼܳܪܫܺܝܢ ܗ̱ܘܰܘ ܥܰܡ ܐܶܣܛܶܦܼܰܢܳܘܣ܃
06:10 [ai]	ܘܠܳܐ ܡܶܫܟܿܚܺܝܢ ܗ̱ܘܰܘ ܠܰܡܩܳܡ ܠܽܘܩܒܼܰܠ ܚܶܟܼܡܬܼܳܐ ܘܪܽܘܚܳܐ܂ ܕܰܡܡܰܠܠܳܐ ܗ̱ܘܳܬܼ ܒܶܗ܂
06:11 [ai]	ܗܳܝܕܶܝܢ ܫܰܕܿܰܪܘ ܠܓܼܰܒܼܪ̈ܶܐ܂ ܘܰܐܠܶܦܼܘ ܐܶܢܽܘܢ ܕܢܺܐܡܪܽܘܢ܃ ܕܰܚܢܰܢ ܫܡܰܥܢܳܝܗ̱ܝ ܕܶܐܡܰܪ ܡܶܠܶܐ̈ ܕܓܽܘܕܿܳܦܼܳܐ܂ ܥܰܠ ܡܽܘܫܶܐ܂ ܘܥܰܠ ܐܰܠܳܗܳܐ܂
06:12 [ai]	ܘܰܫܓܼܰܫܘ ܠܥܰܡܳܐ ܘܰܠܩܰܫܺܝܫܶܐ̈܂ ܘܰܠܣܳܦܼܪ̈ܶܐ܂ ܘܶܐܬܼܰܘ܂ ܘܩܳܡܘ ܥܠܰܘܗ̱ܝ܂ ܘܰܚܛܰܦܼܘ ܐܰܝܬܿܝܽܘܗ̱ܝ ܠܡܶܨܥܰܬܼ ܟܶܢܫܳܐ܂
06:13 [ai]	ܘܰܐܩܺܝܡܘ ܣܳܗܕܿܶܐ̈ ܕܰܓܳܠܶܐ̈ ܕܳܐܡܪܺܝܢ܃ ܗܳܢܳܐ ܓܰܒܼܪܳܐ܂ ܠܳܐ ܫܳܠܶܐ ܠܰܡܡܰܠܳܠܽܘ ܡܶܠܶܐ̈ ܠܽܘܩܒܼܰܠ ܢܳܡܽܘܣܳܐ܃ ܘܥܰܠ ܐܰܬܼܪܳܐ ܗܳܢܳܐ ܩܰܕܿܺܝܫܳܐ܂
06:14 [ai]	ܚܢܰܢ ܓܶܝܪ ܫܡܰܥܢܳܝܗ̱ܝ܂ ܕܶܐܡܰܪ܂ ܕܝܶܫܽܘܥ ܗܳܢܳܐ ܢܳܨܪܳܝܳܐ܃ ܗܽܘ ܢܶܫܪܶܝܘܗ̱ܝ ܠܰܐܬܼܪܳܐ ܗܳܢܳܐ܃ ܘܰܢܚܰܠܶܦܼ ܥܝܳܕܼܶܐ̈ ܕܰܐܫܠܶܡ ܠܟܼܽܘܢ ܡܽܘܫܶܐ܂
06:15 [ai]	ܘܚܳܪܘ ܒܶܗ ܟܽܠܗܽܘܢ ܗܳܢܽܘܢ ܕܿܝܳܬܼܒܺܝܢ ܗ̱ܘܰܘ ܒܰܟܼܢܽܘܫܬܳܐ܃ ܘܰܚܙܰܘ ܦܰܪܨܽܘܦܿܶܗ܂ ܐܰܝܟܼ ܦܰܪܨܽܘܦܿܳܐ ܕܡܰܠܰܐܟܼܳܐ܂

next chapter