The Comprehensive Aramaic Lexicon

07:01 [ai]	ܘܫܰܐܠܶܗ ܪ̈ܰܒܿ ܟܿܳܗܢܶܐ ܕܶܐܢ ܗ̱ܘ ܕܗܳܠܶܝܢ ܗܳܟܼܰܢܳܐ ܐܶܢܶܝܢ̈܂
07:02 [ai]	ܗܽܘ ܕܶܝܢ ܐܶܡܰܪ܂ ܓܿܰܒܼܪ̈ܶܐ܂ ܐܰܚܰܝܢ̈܂ ܘܰܐܒܼܳܗܳܬܼܰܢ̈܂ ܫܡܰܥܘ܂ ܐܰܠܳܗܳܐ ܕܬܶܫܒܿܽܘܚܬܳܐ ܐܶܬܼܚܙܺܝ ܠܰܐܒܼܽܘܢ ܐܰܒܼܪܳܗܳܡ܃ ܟܰܕܼ ܐܺܝܬܼܰܘܗ̱ܝ ܗ̱ܘܳܐ ܒܶܝܬܼ ܢܰܗܪ̈ܺܝܢ܂ ܥܰܕܼ ܠܳܐ ܢܺܐܬܼܶܐ ܢܶܥܡܰܪ ܒܚܳܪܳܢ܂
07:03 [ai]	ܘܶܐܡܰܪ ܗ̱ܘܳܐ ܠܶܗ܃ ܕܦܽܘܩ ܡܶܢ ܐܰܪܥܳܟܼ܂ ܘܡܶܢ ܠܘܳܬܼ ܒܢܰܝ ܛܽܘܗܡܳܟܼ܃ ܘܬܼܳܐ ܠܰܐܪܥܳܐ ܐܰܝܕܼܳܐ ܕܶܐܚܰܘܶܝܟܼ܂
07:04 [ai]	ܘܗܳܝܕܶܝܢ ܢܦܼܰܩ ܐܰܒܼܪܳܗܳܡ ܡܶܢ ܐܰܪܥܳܐ ܕܟܰܠܕܼܳܝܶܐ̈܃ ܘܶܐܬܼܳܐ ܥܡܰܪ ܒܚܳܪܳܢ܂ ܘܡܶܢ ܬܰܡܳܢ ܟܰܕܼ ܡܺܝܬܼ ܐܰܒܼܽܘܗ̱ܝ܃ ܫܰܢܝܶܗ ܐܰܠܳܗܳܐ ܠܰܐܪܥܳܐ ܗܳܕܼܶܐ܃ ܕܒܳܗ ܥܳܡܪܺܝܢ ܐܢ̱ܬܿܽܘܢ ܝܰܘܡܳܢܳܐ܂
07:05 [ai]	ܘܠܳܐ ܝܰܗ̱ܒܼ ܠܶܗ ܝܳܪܬܿܽܘܬܼܳܐ ܒܿܳܗ܂ ܐܳܦܼ ܠܳܐ ܕܽܘܪܟܿܬܼܳܐ ܕܪܶܓܼܠܳܐ܂ ܘܶܐܫܬܰܘ ܕܺܝܗ̱ܘܳܐ ܕܢܶܬܿܠܺܝܗ ܠܶܗ ܐܰܝܟܼ ܕܰܠܡܺܐܪܬܼܳܗ܂ ܠܶܗ܂ ܘܰܠܙܰܪܥܶܗ܂ ܟܰܕܼ ܠܰܝܬܿ ܗ̱ܘܳܐ ܠܶܗ ܒܪܳܐ܂
07:06 [ai]	ܘܡܰܠܶܠ ܗ̱ܘܳܐ ܥܰܡܶܗ ܐܰܠܳܗܳܐ ܟܰܕܼ ܐܳܡܰܪ ܠܶܗ܃ ܕܢܶܗܘܶܐ ܙܰܪܥܳܟܼ ܬܰܘܬܿܳܒܼܳܐ ܒܰܐܪܥܳܐ ܢܽܘܟܼܪܳܝܬܳܐ܂ ܘܰܢܫܰܥܒܿܕܼܽܘܢܳܝܗ̱ܝ܂ ܘܢܰܒܼܶܐܫܽܘܢ ܠܶܗ ܐܰܪܒܿܰܥܡܳܐܐ ܫܢܺܝܢ̈܂
07:07 [ai]	ܘܰܠܥܰܡܳܐ ܕܢܶܦܼܠܚܽܘܢ ܥܰܒܼܕܿܽܘܬܼܳܐ܃ ܐܶܕܿܽܘܢܺܝܘܗ̱ܝ ܐܶܢܳܐ܂ ܐܳܡܰܪ ܐܰܠܳܗܳܐ܂ ܘܡܶܢ ܒܳܬܼܰܪ ܗܳܠܶܝܢ܃ ܢܶܦܿܩܽܘܢ܂ ܘܢܶܦܼܠܚܽܘܢ ܠܺܝ ܒܰܐܬܼܪܳܐ ܗܳܢܳܐ܂
07:08 [ai]	ܘܝܰܗ̱ܒܼ ܠܶܗ ܕܺܝܰܬܼܺܩܺܐ ܕܰܓܼܙܽܘܪܬܳܐ܂ ܘܗܳܝܕܶܝܢ ܐܰܘܠܶܕܼ ܠܺܐܝܣܚܳܩ܂ ܘܓܼܰܙܪܶܗ ܒܝܰܘܡܳܐ ܬܡܺܝܢܳܝܳܐ܂ ܘܺܐܝܣܚܳܩ ܐܰܘܠܶܕܼ ܠܝܰܥܩܽܘܒܼ܂ ܘܝܰܥܩܽܘܒܼ ܐܰܘܠܶܕܼ ܠܰܬܼܪܶܥܣܰܪ ܐܰܒܼܳܗܳܬܼܰܢ̈܂
07:09 [ai]	ܘܗܶܢܽܘܢ ܐܰܒܼܳܗܳܬܼܰܢ̈ ܛܰܢܘ ܒܝܰܘܣܶܦܼ܂ ܘܙܰܒܿܢܽܘܗ̱ܝ ܠܡܶܨܪܶܝܢ܂ ܘܰܐܠܳܗܳܐ ܥܰܡܶܗ ܗܘܳܐ܂
07:10 [ai]	ܘܦܼܰܪܩܶܗ ܗ̱ܘܳܐ ܡܶܢ ܟܽܠܗܽܘܢ ܐܽܘܠܨܳܢܰܘܗ̱ܝ̈܂ ܘܝܰܗ̱ܒܼ ܠܶܗ ܛܰܝܒܿܽܘܬܼܳܐ ܘܚܶܟܼܡܬܼܳܐ܂ ܩܕܼܳܡ ܦܶܪܥܽܘܢ ܡܰܠܟܿܳܐ ܕܡܶܨܪܶܝܢ܂ ܘܰܐܩܺܝܡܶܗ ܪܺܫܳܐ ܥܰܠ ܡܶܨܪܶܝܢ܂ ܘܥܰܠ ܒܰܝܬܿܶܗ ܟܽܠܶܗ ܿ܀ܿ܀ܿ
07:11 [ai]	ܘܰܗܘܳܐ ܟܰܦܼܢܳܐ܂ ܘܽܐܘܠܨܳܢܳܐ ܪܰܒܿܳܐ܂ ܒܟܽܠܳܗ ܡܶܨܪܶܝܢ܂ ܘܒܼܰܐܪܥܳܐ ܕܰܟܼܢܰܥܢ܂ ܘܠܰܝܬܿ ܗ̱ܘܳܐ ܠܗܽܘܢ ܠܡܶܣܒܿܰܥ ܠܰܐܒܼܳܗܳܬܼܰܢ̈܂
07:12 [ai]	ܘܟܼܰܕܼ ܫܡܰܥ ܝܰܥܩܽܘܒܼ ܕܺܐܝܬܼ ܥܒܼܽܘܪܳܐ ܒܡܶܨܪܶܝܢ܃ ܫܰܕܿܰܪ ܗ̱ܘܳܐ ܠܰܐܒܼܳܗܳܬܼܰܢ̈ ܠܽܘܩܕܼܰܡ܂
07:13 [ai]	ܘܟܼܰܕܼ ܐܶܙܰܠܘ ܕܿܬܼܰܪ̈ܬܿܶܝܢ ܙܰܒܼܢܺܝܢ̈܃ ܐܰܘܕܿܰܥ ܝܰܘܣܶܦܼ ܢܰܦܼܫܶܗ ܠܰܐܚܰܘܗ̱ܝ̈܂ ܘܶܐܬܼܺܝܕܼܰܥ ܠܦܼܶܪܥܽܘܢ ܛܽܘܗܡܶܗ ܕܝܰܘܣܶܦܼ܂
07:14 [ai]	ܘܫܰܕܿܰܪ ܗ̱ܘܳܐ ܝܰܘܣܶܦܼ܃ ܘܰܐܝܬܿܝܶܗ ܠܰܐܒܼܽܘܗ̱ܝ ܝܰܥܩܽܘܒܼ܂ ܘܰܠܟܼܽܠܶܗ ܛܽܘܗܡܶܗ܂ ܘܗܳܘܶܝܢ ܗ̱ܘܰܘ ܒܡܶܢܝܳܢܳܐ܃ ܫܰܒܼܥܺܝܢ ܘܚܰܡܶܫ ܢܰܦܼܫܳܢ̈܂
07:15 [ai]	ܘܰܢܚܶܬܼ ܝܰܥܩܽܘܒܼ ܠܡܶܨܪܶܝܢ܂ ܘܡܺܝܬܼ ܬܰܡܳܢ܂ ܗܽܘ ܘܰܐܒܼܳܗܳܬܼܰܢ̈܂
07:16 [ai]	ܘܶܐܫܬܿܰܢܺܝ ܠܰܫܟܼܺܝܡ܂ ܘܶܐܬܿܬܣܺܝܡ ܒܩܰܒܼܪܳܐ܂ ܕܰܙܒܼܰܢ ܗ̱ܘܳܐ ܐܰܒܼܪܳܗܳܡ ܒܟܶܣܦܿܳܐ܂ ܡܶܢ ܒܢܰܝ ܚܡܽܘܪ܂
07:17 [ai]	ܘܟܼܰܕܼ ܡܰܛܺܝ ܗ̱ܘܳܐ ܙܰܒܼܢܳܐ ܕܿܡܶܕܶܡ ܕܶܐܫܬܰܘܕܿܺܝ ܗ̱ܘܳܐ ܒܡܰܘܡܳܬܼܳܐ̈ ܐܰܠܳܗܳܐ ܠܰܐܒܼܪܳܗܳܡ܃ ܣܓܼܺܝ ܗ̱ܘܳܐ ܥܰܡܳܐ܂ ܘܰܬܼܩܶܦܼ ܒܡܶܨܪܶܝܢ܃
07:18 [ai]	ܥܕܼܰܡܳܐ ܕܩܳܡ ܡܰܠܟܿܳܐ ܐ̱ܚܪܺܢܳܐ ܥܰܠ ܡܶܨܪܶܝܢ܃ ܐܰܝܢܳܐ ܕܠܳܐ ܝܳܕܼܰܥ ܗ̱ܘܳܐ ܠܶܗ ܠܝܰܘܣܶܦܼ܂
07:19 [ai]	ܘܶܐܨܛܰܢܰܥ ܥܰܠ ܛܽܘܗܡܰܢ܂ ܘܰܐܒܼܶܐܫ ܠܰܐܒܼܳܗܳܬܼܰܢ̈܂ ܘܰܦܼܩܰܕܼ ܕܢܶܗܘܽܘܢ ܡܶܫܬܿܕܼܶܝܢ ܝܰܠܽܘܕܼܰܝܗܽܘܢ̈܂ ܕܠܳܐ ܢܺܚܽܘܢ܂
07:20 [ai]	ܒܶܗ ܒܙܰܒܼܢܳܐ ܗܰܘ܂ ܐܶܬܼܺܝܠܶܕܼ ܡܽܘܫܶܐ܂ ܘܰܪܚܺܝܡ ܗ̱ܘܳܐ ܠܰܐܠܳܗܳܐ܂ ܘܶܐܬܼܪܰܒܺܝ ܝܰܪ̈ܚܶܐ ܬܠܳܬܼܳܐ ܒܶܝܬܼ ܐܰܒܼܽܘܗ̱ܝ܂
07:21 [ai]	ܘܟܼܰܕܼ ܐܶܫܬܿܕܼܺܝ ܡܶܢ ܐܶܡܶܗ܃ ܐܶܫܟܿܰܚܬܼܶܗ ܒܰܪ̱ܬܼ ܦܶܪܥܽܘܢ܂ ܘܪܰܒܿܝܰܬܼܶܗ ܠܳܗ ܠܰܒܼܪܳܐ܂
07:22 [ai]	ܘܶܐܬܼܪܕܼܺܝ ܡܽܘܫܶܐ ܒܟܽܠܳܗ ܚܶܟܼܡܬܼܳܐ ܕܿܡܶܨܪ̈ܳܝܶܐ܂ ܘܰܥܬܼܺܝܕܼ ܗ̱ܘܳܐ ܒܡܶܠܰܘܗ̱ܝ̈܂ ܘܳܐܦܼ ܒܰܥܒܼܳܕܼܰܘܗ̱ܝ̈܂
07:23 [ai]	ܘܟܼܰܕܼ ܗܘܳܐ ܒܰܪ ܐܰܪܒܥܺܝܢ ܫܢܺܝܢ̈܃ ܣܠܶܩ ܗ̱ܘܳܐ ܥܰܠ ܠܶܒܶܗ܃ ܕܢܶܣܥܽܘܪ ܠܰܐܚܰܘܗ̱ܝ̈ ܒܢܰܝ ܐܺܝܣܪܳܝܶܠ܂
07:24 [ai]	ܘܰܚܙܳܐ ܠܚܰܕܼ ܡܶܢ ܒܢܰܝ ܫܰܪܒܿܬܼܶܗ ܕܿܡܶܬܿܕܒܰܪ ܒܰܩܛܺܝܪܳܐ܃ ܘܬܼܰܒܼܥܶܗ܂ ܘܰܥܒܼܰܕܼ ܠܶܗ ܘܩܰܛܠܶܗ ܠܡܶܨܪܳܝܳܐ ܗܰܘ܂ ܕܡܰܣܟܿܶܠ ܗ̱ܘܳܐ ܒܶܗ܂
07:25 [ai]	ܘܰܣܒܼܰܪ ܕܡܶܣܬܿܰܟܠܺܝܢ ܐܰܚܰܘܗ̱ܝ̈ ܒܢܰܝ ܐܺܝܣܪܳܝܶܠ܃ ܕܰܐܠܳܗܳܐ ܒܺܐܝܕܼܶܗ ܝܳܗܶܒܼ ܠܗܽܘܢ ܦܽܘܪܩܳܢܳܐ܂ ܘܠܳܐ ܐܶܣܬܿܰܟܿܰܠܘ܂
07:26 [ai]	ܘܰܠܝܰܘܡܳܐ ܐ̱ܚܪܺܢܳܐ܃ ܐܶܬܼܚܙܺܝ ܠܗܽܘܢ܂ ܟܰܕܼ ܢܳܨܶܝܢ ܗܶܢܽܘܢ ܚܰܕܼ ܥܰܡ ܚܰܕܼ܂ ܘܰܡܦܿܺܝܣ ܗ̱ܘܳܐ ܠܗܽܘܢ ܕܢܶܫܬܿܰܝܢܽܘܢ܂ ܟܰܕܼ ܐܳܡܰܪ܂ ܓܿܰܒܼܪ̈ܶܐ ܐܰܚܶܐ̈ ܐܰܢ̱ܬܿܽܘܢ܃ ܡܶܛܽܠ ܡܳܢܳܐ ܡܰܣܟܠܺܝܢ ܐܢ̱ܬܿܽܘܢ ܚܰܕܼ ܒܚܰܕܼ܂
07:27 [ai]	ܗܰܘ ܕܶܝܢ ܕܡܰܣܟܿܶܠ ܗ̱ܘܳܐ ܒܚܰܒܼܪܶܗ܃ ܕܰܚܩܶܗ ܡܶܢ ܠܘܳܬܼܶܗ܂ ܘܶܐܡܰܪ ܠܶܗ܂ ܡܰܢܽܘ ܐܰܩܺܝܡܳܟܼ ܥܠܰܝܢ ܪܺܫܳܐ ܘܕܼܰܝܳܢܳܐ܂
07:28 [ai]	ܕܰܠܡܳܐ ܠܡܶܩܛܠܰܢܝ ܒܿܳܥܶܐ ܐܰܢ̱ܬܿ܃ ܐܰܝܟܼ ܕܰܩܛܰܠܬܿ ܐܶܬܼܡܳܠܝ ܠܡܶܨܪܳܝܳܐ܂
07:29 [ai]	ܘܰܥܪܰܩ ܡܽܘܫܶܐ ܒܡܶܠܬܼܳܐ ܗܳܕܼܶܐ܃ ܘܰܗܘܳܐ ܬܰܘܬܿܳܒܼܳܐ ܒܰܐܪܥܳܐ ܕܡܶܕܼܝܰܢ܂ ܘܰܗܘܰܘ ܠܶܗ ܬܿܪ̈ܶܝܢ ܒܢܺܝܢ܂
07:30 [ai]	ܘܟܼܰܕܼ ܡܠܰܝ̈ ܠܶܗ ܬܰܡܳܢ ܐܰܪܒܥܺܝܢ ܫܢܺܝܢ̈܃ ܐܶܬܼܚܙܺܝ ܠܶܗ ܒܡܰܕܼܒܪܳܐ ܕܛܽܘܪ ܣܺܝܢܰܝ܃ ܡܰܠܰܐܟܼܶܗ ܕܡܳܪܝܳܐ ܒܢܽܘܪܳܐ ܕܝܳܩܕܿܳܐ ܒܣܰܢܝܳܐ܂
07:31 [ai]	ܘܟܼܰܕܼ ܚܙܳܐ ܡܽܘܫܶܐ܂ ܐܶܬܿܕܰܡܰܪ ܒܚܶܙܘܳܐ܂ ܘܟܼܰܕܼ ܐܶܬܼܩܰܪܰܒܼ ܕܢܶܚܙܶܐ܃ ܐܶܡܰܪ ܠܶܗ ܡܳܪܝܳܐ ܒܩܳܠܳܐ܂
07:32 [ai]	ܐܶܢܳܐ ܐ̱ܢܳܐ ܐܰܠܳܗܳܐ ܕܰܐܒܼܳܗܰܝܟܿ̈܂ ܐܰܠܳܗܶܗ ܕܰܐܒܼܪܳܗܳܡ܂ ܘܕܼܺܐܝܣܚܳܩ܂ ܘܰܕܼܝܰܥܩܽܘܒܼ܂ ܘܟܼܰܕܼ ܪܰܬܿܺܝܬܼ ܗ̱ܘܳܐ ܡܽܘܫܶܐ܃ ܠܳܐ ܡܰܡܪܰܚ ܗ̱ܘܳܐ ܕܰܢܚܽܘܪ ܒܚܶܙܘܳܐ܂
07:33 [ai]	ܘܶܐܡܰܪ ܠܶܗ ܡܳܪܝܳܐ܂ ܫܪܺܝ ܡܣܳܢܰܝܟܿ̈ ܡܶܢ ܪ̈ܶܓܼܠܰܝܟܿ܂ ܐܰܪܥܳܐ ܓܶܝܪ ܕܩܳܐܶܡ ܐܰܢ̱ܬܿ ܒܿܳܗ܂ ܩܰܕܿܺܝܫܳܐ ܗ̱ܝ܂
07:34 [ai]	ܡܶܚܙܳܐ ܚܙܺܝܬܼ ܐܽܘܠܨܳܢܶܗ ܕܥܰܡܝ ܕܰܒܼܡܶܨܪܶܝܢ܃ ܘܬܼܶܢܚܳܬܼܶܗ̈ ܫܶܡܥܶܬܼ܂ ܘܢܶܚܬܿܶܬܼ ܕܶܐܦܼܪܽܘܩܐܶܢܽܘܢ܂ ܘܗܳܫܳܐ ܬܳܐ ܐܶܫܰܕܿܪܳܟܼ ܠܡܶܨܪܶܝܢ܂
07:35 [ai]	ܠܗܳܢܳܐ ܡܽܘܫܶܐ ܕܰܟܼܦܼܰܪܘ ܒܶܗ ܟܰܕܼ ܐܳܡܪܺܝܢ܃ ܕܡܰܢܽܘ ܐܰܩܺܝܡܳܟܼ ܥܠܰܝܢ ܪܺܫܳܐ ܘܕܼܰܝܳܢܳܐ܃ ܠܶܗ ܠܗܳܢܳܐ ܐܰܠܳܗܳܐ ܪܺܫܳܐ܂ ܘܦܼܳܪܽܘܩܳܐ ܫܰܕܿܰܪ ܠܗܽܘܢ܃ ܒܺܐܝܕܼܰܝ̈ ܡܰܠܰܐܟܼܳܐ܂ ܗܰܘ ܕܶܐܬܼܚܙܺܝ ܠܶܗ ܒܣܰܢܝܳܐ܂
07:36 [ai]	ܗܳܢܰܘ ܕܰܐܦܿܶܩ ܐܶܢܽܘܢ܃ ܟܿܰܕ ܥܒܰܕ ܐܳܬܘܳܬܳܐ̈ ܘܬܼܶܕܼܡܪ̈ܳܬܼܳܐ ܘܰܓܼܒܼܰܪ̈ܘܳܬܳܐ܃ ܒܰܐܪܥܳܐ ܕܡܶܨܪܶܝܢ܂ ܘܰܒܝܰܡܳܐ ܕܿܣܽܘܦܿ܂ ܘܰܒܡܰܕܼܒܪܳܐ ܫܢܺܝܢ̈ ܐܰܪܒܥܺܝܢ܂
07:37 [ai]	ܗܳܢܰܘ ܡܽܘܫܶܐ܂ ܗܰܘ ܕܶܐܡܰܪ ܠܰܒܼܢܰܝ ܐܺܝܣܪܳܝܶܠ܃ ܕܰܢܒܼܺܝܳܐ ܢܩܺܝܡ ܠܟܼܽܘܢ ܡܳܪܝܳܐ ܐܰܠܳܗܳܐ ܡܶܢ ܐܰܚܰܝܟܿܽܘܢ̈ ܐܰܟܼܘܳܬܼܝ܂ ܠܶܗ ܬܶܫܡܥܽܘܢ܂
07:38 [ai]	ܗܳܢܰܘ ܕܰܗܘܳܐ ܒܰܟܼܢܽܘܫܬܳܐ ܒܡܰܕܼܒܪܳܐ܃ ܥܰܡ ܡܰܠܰܐܟܼܳܐ ܗܰܘ ܕܡܰܠܶܠ ܗ̱ܘܳܐ ܥܰܡܶܗ܂ ܘܥܰܡ ܐܰܒܼܳܗܳܬܼܰܢ̈܂ ܒܛܽܘܪܳܐ ܕܣܺܝܢܰܝ܂ ܘܗܽܘܝܽܘ ܕܩܰܒܿܶܠ ܡܶܠܶܐ̈ ܚܰܝܳܬܼܳܐ̈ ܕܠܰܢ ܢܶܬܿܶܠ܂
07:39 [ai]	ܘܠܳܐ ܨܒܼܰܘ ܠܡܶܬܿܕܿܢܳܝܽܘ ܠܶܗ ܐܰܒܼܳܗܳܬܼܰܢ̈܂ ܐܶܠܳܐ ܫܰܒܼܩܽܘܗ̱ܝ܃ ܘܰܒܠܶܒܿܰܘܳܬܼܗܽܘܢ̈ ܗܦܼܰܟܼܘ ܠܗܽܘܢ ܠܡܶܨܪܶܝܢ܃
07:40 [ai]	ܟܰܕܼ ܐܳܡܪܺܝܢ ܠܰܐܗܪܽܘܢ܂ ܥܒܼܶܕܼ ܠܰܢ ܐܰܠܳܗܶܐ̈ ܕܢܺܐܙܽܠ̱ܘܢ ܩܕܼܳܡܰܝܢ܃ ܡܶܛܽܠ ܕܗܳܢܳܐ ܡܽܘܫܶܐ ܕܰܐܦܿܩܰܢ ܡܶܢ ܐܰܪܥܳܐ ܕܡܶܨܪܶܝܢ܃ ܠܳܐ ܝܳܕܼܥܺܝܢ ܚ̱ܢܰܢ ܡܳܢܳܐ ܗܘܳܝܗ̱ܝ܂
07:41 [ai]	ܘܰܥܒܼܰܕܼܘ ܠܗܽܘܢ ܥܶܓܼܠܳܐ ܒܝܰܘܡܳܬܼܳܐ̈ ܗܳܢܽܘܢ܃ ܘܕܼܰܒܿܰܚܘ ܕܶܒܼܚܶܐ̈ ܠܰܦܼܬܼܰܟܼܪ̈ܶܐ܂ ܘܡܶܬܼܒܿܰܣܡܺܝܢ ܗ̱ܘܰܘ ܒܰܥܒܼܳܕܼ ܐܺܝܕܼܰܝܗܽܘܢ̈܂
07:42 [ai]	ܘܰܗܦܼܰܟܼ ܐܰܠܳܗܳܐ ܘܰܐܫܠܶܡ ܐܶܢܽܘܢ܃ ܕܢܶܗܘܽܘܢ ܦܳܠܚܺܝܢ ܠܚܰܝܠܰܘܳܬܼܳܐ̈ ܕܰܫܡܰܝܳܐ܃ ܐܰܝܟܼ ܕܰܟܼܬܼܺܝܒܼ ܒܰܟܼܬܼܳܒܼܳܐ ܕܰܢܒܼܺܝܶܐ̈܂ ܠܡܳܐ ܐܰܪܒܥܺܝܢ ܫܢܺܝܢ̈ ܒܡܰܕܼܒܪܳܐ܃ ܢܶܟܼܣܬܼܳܐ ܐܰܘ ܕܶܒܼܚܬܼܳܐ ܩܰܪܶܒܼܬܿܽܘܢ ܠܺܝ ܒܢܰܝ ܐܺܝܣܪܳܝܶܠ܂
07:43 [ai]	ܐܶܠܳܐ ܫܩܰܠܬܿܽܘܢ ܡܰܫܟܿܢܶܗ ܕܡܰܠܟܿܽܘܡ܃ ܘܟܼܰܘܟܿܒܼܶܗ ܕܰܐܠܳܗܳܐ ܕܰܪܦܼܳܢ܃ ܕܶܡܘܳܬܼܳܐ̈ ܕܰܥܒܼܰܕܿܬܿܽܘܢ ܕܬܶܗܘܽܘܢ ܣܳܓܼܕܺܝܢ ܠܗܶܝܢ܂ ܐܶܫܰܢܶܝܟܼܽܘܢ ܠܗܰܠ ܡܶܢ ܒܿܳܒܼܶܠ܂
07:44 [ai]	ܗܳܐ ܡܰܫܟܿܢܳܐ ܕܣܳܗܕܿܽܘܬܼܳܐ ܕܰܐܒܼܳܗܳܬܼܰܢ̈܂ ܒܡܰܕܼܒܪܳܐ ܐܺܝܬܼܰܘܗ̱ܝ ܗ̱ܘܳܐ܃ ܐܰܝܟܼ ܡܳܐ ܕܦܰܩܶܕܼ ܗܰܘ ܕܡܰܠܶܠ ܥܰܡ ܡܽܘܫܶܐ ܠܡܶܥܒܿܕܼܶܗ ܒܰܕܼܡܽܘܬܼܳܐ ܕܚܰܘܝܶܗ܂
07:45 [ai]	ܘܠܶܗ ܠܗܳܢܳܐ ܡܰܫܟܿܢܳܐ܃ ܐܳܦܼ ܡܰܥܳܠܽܘ ܐܰܥܠܽܘܗ̱ܝ ܐܰܒܼܳܗܳܬܼܰܢ̈ ܥܰܡ ܝܶܫܽܘܥ܃ ܠܰܐܪܥܳܐ ܕܝܰܗ̱ܒܼ ܠܗܽܘܢ ܐܰܠܳܗܳܐ ܝܽܘܪܬܿܳܢܳܐ܃ ܡܶܢ ܥܰܡ̱ܡܶܐ̈ ܗܳܢܽܘܢ ܕܰܫܕܼܳܐ ܡܶܢ ܩܕܼܳܡܰܝܗܽܘܢ܂ ܘܶܐܬܼܝܰܒܿܰܠ ܥܕܼܰܡܳܐ ܠܝܰܘܡܰܘܗ̱ܝ̈ ܕܕܼܰܘܺܝܕܼ܃
07:46 [ai]	ܗܰܘ ܕܶܐܫܟܿܰܚ ܪ̈ܰܚܡܶܐ ܩܕܼܳܡܰܘܗ̱ܝ ܕܰܐܠܳܗܳܐ܂ ܘܰܫܐܶܠ ܕܢܶܫܟܿܰܚ ܡܰܫܟܿܢܳܐ ܠܰܐܠܳܗܶܗ ܕܝܰܥܩܽܘܒܼ܂
07:47 [ai]	ܫܠܶܝܡܳܘܢ ܕܶܝܢ܂ ܒܢܳܐ ܠܶܗ ܒܰܝܬܳܐ܂
07:48 [ai]	ܘܰܡܪܰܝܡܳܐ ܠܳܐ ܫܪܳܐ ܒܰܥܒܼܳܕܼ ܐܺܝܕܼܰܝܳܐ̈܂ ܐܰܝܟܼ ܕܶܐܡܰܪ ܢܒܼܺܝܳܐ܂
07:49 [ai]	ܕܰܫܡܰܝܳܐ ܟܽܘܪܣܰܝ܂ ܘܰܐܪܥܳܐ ܟܽܘܒܼܫܳܐ ܕܰܬܼܚܶܝܬܼ ܪ̈ܶܓܼܠܰܝ܂ ܐܰܝܢܰܘ ܒܰܝܬܳܐ ܕܬܶܒܼܢܽܘܢ ܠܺܝ܂ ܐܳܡܰܪ ܡܳܪܝܳܐ܂ ܐܰܘ ܐܰܝܢܰܘ ܐܰܬܼܪܳܐ ܕܰܢܝܳܚܬܿܝ܂
07:50 [ai]	ܠܳܐ ܗܳܐ ܐܺܝܕܼܳܐ ܕܺܝܠܝ܃ ܥܶܒܼܕܿܰܬܼ ܗܳܠܶܝܢ ܟܽܠܗܶܝܢ܃
07:51 [ai]	ܐܳܘ ܩܰܫܝܰܝ̈ ܩܕܼܳܠܳܐ܂ ܘܰܕܼܠܳܐ ܓܙܺܝܪܺܝܢ ܒܿܠܶܒܗܽܘܢ܂ ܘܰܒܡܰܫܡܰܥܬܼܗܽܘܢ܃ ܐܰܢ̱ܬܿܽܘܢ ܒܟܽܠܙܒܼܰܢ ܠܽܘܩܒܼܰܠ ܪܽܘܚܳܐ ܕܩܽܘܕܼܫܳܐ ܩܳܝܡܺܝܢ ܐܢ̱ܬܿܽܘܢ܂ ܐܰܝܟܼ ܐܰܒܼܳܗܰܝܟܿܽܘܢ̈܂ ܐܳܦܼ ܐܰܢ̱ܬܿܽܘܢ܂
07:52 [ai]	ܠܰܐܝܢܳܐ ܓܶܝܪ ܡܶܢ ܢܒܼܺܝܶܐ̈ ܕܠܳܐ ܪܕܼܰܦܼܘ ܘܰܩܛܰܠܘ ܐܰܒܼܳܗܰܝܟܿܽܘܢ̈܃ ܠܰܐܝܠܶܝܢ ܕܿܩܰܕܶܡܘ ܒܰܕܿܶܩܘ ܥܰܠ ܡܶܐܬܼܺܝܬܼܶܗ ܕܙܰܕܿܺܝܩܳܐ܃ ܗܰܘ ܕܰܐܢ̱ܬܿܽܘܢ ܐܰܫܠܶܡܬܿܽܘܢ ܘܰܩܛܰܠܬܿܽܘܢܳܝܗ̱ܝ܂
07:53 [ai]	ܘܩܰܒܿܶܠܬܿܽܘܢ ܢܳܡܽܘܣܳܐ ܒܝܰܕܼ ܦܽܘܩܕܳܢܳܐ ܕܡܰܠܰܐܟܼܶܐ̈܂ ܘܠܳܐ ܢܛܰܪܬܿܽܘܢܳܝܗ̱ܝ ܿ܀ܿ܀ܿ
07:54 [ai]	ܘܟܼܰܕܼ ܫܡܰܥܘ ܗ̱ܘܰܘ ܗܳܠܶܝܢ܃ ܐܶܬܼܡܠܺܝܘ ܚܶܡܬܳܐ ܒܢܰܦܼܫܗܽܘܢ܂ ܘܰܡܚܰܪܩܺܝܢ ܫܶܢܰܝܗܽܘܢ̈ ܥܠܰܘܗ̱ܝ܂
07:55 [ai]	ܘܗܽܘ ܟܰܕܼ ܡܠܶܐ ܗ̱ܘܳܐ ܗܰܝܡܳܢܽܘܬܼܳܐ ܘܪܽܘܚܳܐ ܕܩܽܘܕܼܫܳܐ܃ ܚܳܪ ܒܰܫܡܰܝܳܐ܂ ܘܰܚܙܳܐ ܬܿܶܫܒܿܽܘܚܬܳܐ ܕܰܐܠܳܗܳܐ܃ ܘܰܠܝܶܫܽܘܥ ܟܰܕܼ ܩܳܐܶܡ ܡܶܢ ܝܰܡܺܝܢܳܐ ܕܰܐܠܳܗܳܐ܂
07:56 [ai]	ܘܶܐܡܰܪ܂ ܗܳܐ ܚܳܙܶܐ ܐ̱ܢܳܐ ܫܡܰܝܳܐ ܟܰܕܼ ܦܬܼܺܝܚܺܝܢ܃ ܘܠܰܒܼܪܶܗ ܕܐ̱ܢܳܫܳܐ ܟܰܕܼ ܩܳܐܶܡ ܡܶܢ ܝܰܡܺܝܢܳܐ ܕܰܐܠܳܗܳܐ܂
07:57 [ai]	ܘܰܩܥܰܘ ܒܩܳܠܳܐ ܪܳܡܳܐ܂ ܘܣܰܟܰܪܘ ܐܶܕܼܢܰܝܗܽܘܢ̈܂ ܘܰܓܼܙܰܡܘ ܥܠܰܘܗ̱ܝ ܟܽܠܗܽܘܢ܂
07:58 [ai]	ܘܶܐܚܰܕܼܘ ܐܰܦܿܩܽܘܗ̱ܝ ܠܒܼܰܪ ܡܶܢ ܡܕܼܺܝܢ̱ܬܳܐ܂ ܘܪܳܓܼܡܺܝܢ ܗ̱ܘܰܘ ܠܶܗ܂ ܘܰܐܝܠܶܝܢ ܕܰܐܣܗܶܕܼܘ ܥܠܰܘܗ̱ܝ܃ ܣܳܡܘ ܢܰܚܬܿܰܝܗܽܘܢ̈ ܠܘܳܬܼ ܪ̈ܶܓܼܠܰܘܗ̱ܝ ܕܰܥܠܰܝܡܳܐ ܚܰܕܼ܃ ܕܡܶܬܼܩܪܶܐ ܫܳܐܘܳܠ܂
07:59 [ai]	ܘܪܳܓܼܡܺܝܢ ܗ̱ܘܰܘ ܠܶܗ ܠܶܐܣܛܶܦܼܰܢܳܘܣ܂ ܟܰܕܼ ܡܨܰܠܶܐ ܘܳܐܡܰܪ܃ ܡܳܪܰܢ܂ ܝܶܫܽܘܥ܂ ܩܰܒܿܶܠ ܪܽܘܚܝ܂
07:60 [ai]	ܘܟܼܰܕܼ ܣܳܡ ܒܽܘܪܟܿܳܐ܃ ܩܥܳܐ ܒܩܳܠܳܐ ܪܳܡܳܐ܂ ܘܶܐܡܰܪ܂ ܡܳܪܰܢ܂ ܠܳܐ ܬܩܺܝܡ ܠܗܽܘܢ ܗܳܕܼܶܐ ܚܛܺܝܬܼܳܐ܂ ܘܟܼܰܕܼ ܗܳܕܼܶܐ ܐܶܡܰܪ܂ ܫܟܼܶܒܼ܂

next chapter