← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62044: P Acts

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


08:01 [ai]ܫܳܐܘܳܠ ܕܶܝܢ ܨܳܒܼܶܐ ܗ̱ܘܳܐ܂ ܘܰܡܫܰܘܬܿܰܦܼ ܗ̱ܘܳܐ ܒܩܶܛܠܶܗ܂ ܘܰܗܘܳܐ ܗ̱ܘܳܐ ܒܗܰܘ ܝܰܘܡܳܐ ܪܕܼܽܘܦܼܝܳܐ ܪܰܒܿܳܐ ܠܥܺܕ̱ܿܬܳܐ ܕܒܽܐܘܪܺܫܠܶܡ܂ ܘܶܐܬܼܒܰܕܿܰܪܘ ܟܽܠܗܽܘܢ ܒܩܽܘܪ̈ܝܳܐ ܕܺܝܗܽܘܕܼ܂ ܘܳܐܦܼ ܒܶܝܬܼ ܫܳܡܪ̈ܳܝܶܐ܂ ܠܒܼܰܪ ܡܶܢ ܫܠܺܝܚܶܐ̈ ܒܰܠܚܽܘܕܼ܂
08:02 [ai]ܘܰܩܦܼܰܣܘ ܩܰܒܼܪܽܘܗ̱ܝ ܠܶܐܣܛܶܦܼܰܢܳܘܣ ܓܿܰܒܼܪ̈ܶܐ ܡܗܰܝܡܢܶܐ̈܃ ܘܶܐܬܼܶܐܒܼܶܠܘ ܥܠܰܘܗ̱ܝ ܪܰܘܪܒܼܳܐܺܝܬܼ܀
08:03 [ai]ܫܳܐܘܳܠ ܕܶܝܢ ܪܳܕܼܶܦܼ ܗ̱ܘܳܐ ܠܥܺܕ̱ܿܬܿܶܗ ܕܰܐܠܳܗܳܐ܃ ܟܰܕܼ ܥܳܐܶܠ ܗ̱ܘܳܐ ܠܒܼܳܬܿܶܐ̈܃ ܘܰܡܓܼܰܪܓܿܰܪ ܠܓܼܰܒܼܪ̈ܶܐ ܘܰܠܢܶܫܶܐ̈܃ ܘܰܡܫܰܠܡܺܝܢ ܗ̱ܘܳܐ ܠܒܼܶܝܬܼ ܐܰܣܺܝܪ̈ܶܐ܂
08:04 [ai]ܘܗܳܢܽܘܢ ܕܿܶܐܬܼܒܰܕܿܰܪܘ܃ ܡܶܬܼܟܰܪܟܿܺܝܢ ܗ̱ܘܰܘ܂ ܘܡܰܟܼܪܙܺܝܢ ܡܶܠܬܼܳܐ ܕܰܐܠܳܗܳܐ܂
08:05 [ai]ܦܼܺܝܠܺܝܦܿܳܘܣ ܕܶܝܢ ܢܚܶܬܼ ܠܶܗ ܠܰܡܕܼܺܝܢ̱ܬܳܐ ܕܫܳܡܪܳܝܶܐ܃ ܘܡܰܟܼܪܶܙ ܗ̱ܘܳܐ ܠܗܽܘܢ ܥܰܠ ܡܫܺܝܚܳܐ܂
08:06 [ai]ܘܟܼܰܕܼ ܫܳܡܥܺܝܢ ܗ̱ܘܰܘ ܡܶܠܬܼܶܗ ܒܢܰܝܢܳܫܳܐ ܕܬܰܡܳܢ܃ ܨܳܝܬܿܺܝܢ ܗ̱ܘܰܘ ܠܶܗ܂ ܘܡܶܬܿܛܦܿܺܝܣܺܝܢ ܗ̱ܘܰܘ܂ ܠܟܼܽܠ ܕܳܐܡܰܪ ܗ̱ܘܳܐ܂ ܕܚܳܙܶܝܢ ܗ̱ܘܰܘ ܐܳܬܼܘܳܬܼܳܐ̈ ܕܥܳܒܼܶܕܼ ܗ̱ܘܳܐ܂
08:07 [ai]ܣܰܓܿܺܝܶܐܐ̈ ܓܶܝܪ ܕܰܐܚܺܝܕܼܳܢ̈ ܗ̱ܘܰܝ̈ ܠܗܽܘܢ ܪ̈ܽܘܚܶܐ ܛܰܢܦܼܳܬܼܳܐ̈܃ ܩܳܥܶܝܢ ܗ̱ܘܰܘ ܒܩܳܠܳܐ ܪܳܡܳܐ܂ ܘܢܳܦܼܩܳܢ̈ ܗ̱ܘܰܝ̈ ܡܶܢܗܽܘܢ܂ ܘܰܐ̱ܚܪ̈ܳܢܶܐ ܡܫܰܪ̈ܰܝܳܐ܂ ܘܰܡܚܰܓܿܪ̈ܶܐ܂ ܐܶܬܼܰܐܣܺܝܘ܂
08:08 [ai]ܘܚܰܕܼܽܘܬܼܳܐ ܪܰܒܿܬܼܳܐ ܗܘܳܬܼ ܒܗܳܝ ܡܕܼܺܝܢ̱ܬܳܐ܀
08:09 [ai]ܐܺܝܬܼ ܗ̱ܘܳܐ ܕܶܝܢ ܬܰܡܳܢ ܓܰܒܼܪܳܐ ܚܰܕܼ܂ ܕܰܫܡܶܗ ܣܺܝܡܳܘܢ܃ ܕܰܥܡܺܝܪ ܗ̱ܘܳܐ ܠܶܗ ܒܿܳܗ ܒܰܡܕܼܺܝܢ̱ܬܳܐ ܙܰܒܼܢܳܐ ܣܰܓܿܺܝܳܐܐ܂ ܘܰܒܚܰܪ̈ܫܰܘܗ̱ܝ ܡܰܛܥܶܐ ܗ̱ܘܳܐ ܠܥܰܡܳܐ ܕܫܳܡܪ̈ܳܝܶܐ܃ ܟܰܕܼ ܡܰܘܪܶܒܼ ܗ̱ܘܳܐ ܢܰܦܼܫܶܗ܂ ܘܳܐܡܰܪ܂ ܕܶܐܢܳܐ ܐ̱ܢܳܐ ܪܰܒܿܳܐ܂
08:10 [ai]ܘܰܨܠܶܝܢ ܗ̱ܘܰܘ ܠܘܳܬܼܶܗ ܟܽܠܗܽܘܢ܂ ܪ̈ܰܘܪܒܼܶܐ܂ ܘܕܼܰܩܕܿܩܶܐ̈܂ ܘܳܐܡܪܺܝܢ ܗ̱ܘܰܘ܃ ܗܳܢܰܘ ܚܰܝܠܶܗ ܪܰܒܿܳܐ ܕܰܐܠܳܗܳܐ܂
08:11 [ai]ܘܡܶܬܿܛܦܿܺܝܣܺܝܢ ܗ̱ܘܰܘ ܠܶܗ ܟܽܠܗܽܘܢ܃ ܡܶܛܽܠ ܕܙܰܒܼܢܳܐ ܣܰܓܿܺܝܳܐܐ ܒܚܰܪ̈ܫܰܘܗ̱ܝ ܐܰܬܼܡܰܗ ܗ̱ܘܳܐ ܐܶܢܽܘܢ܂
08:12 [ai]ܟܰܕܼ ܕܶܝܢ ܗܰܝܡܶܢܘ ܠܦܼܺܝܠܺܝܦܿܳܘܣ ܕܰܡܣܰܒܰܪ ܗ̱ܘܳܐ ܡܰܠܟܿܽܘܬܼܳܐ ܕܰܐܠܳܗܳܐ܃ ܒܰܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܥܳܡܕܺܝܢ ܗ̱ܘܰܘ ܓܿܰܒܼܪ̈ܶܐ ܘܢܶܫܶܐ̈܂
08:13 [ai]ܘܳܐܦܼ ܗܽܘ ܣܺܝܡܳܘܢ ܗܰܝܡܶܢ ܗ̱ܘܳܐ ܘܰܥܡܰܕܼ܃ ܘܢܰܩܺܝܦܼ ܗ̱ܘܳܐ ܠܶܗ ܠܦܼܺܝܠܺܝܦܿܳܘܣ܂ ܘܟܼܰܕܼ ܚܙܳܐ ܗ̱ܘܳܐ ܐܳܬܼܘܳܬܼܳܐ̈ ܘܚܰܝܠܶܐ̈ ܪ̈ܰܘܪܒܼܶܐ ܕܗܳܘܶܝܢ ܗ̱ܘܰܘ ܒܺܐܝܕܼܶܗ܃ ܬܳܡܰܗ ܗ̱ܘܳܐ ܘܡܶܬܿܕܰܡܰܪ܀
08:14 [ai]ܘܟܼܰܕܼ ܫܡܰܥܘ ܫܠܺܝܚܶܐ̈ ܕܒܽܐܘܪܺܫܠܶܡ܃ ܕܩܰܒܿܶܠܘ ܥܰܡܳܐ ܕܫܳܡܪ̈ܳܝܶܐ ܡܶܠܬܼܳܐ ܕܰܐܠܳܗܳܐ܃ ܫܰܕܿܰܪܘ ܠܘܳܬܼܗܽܘܢ ܠܫܶܡܥܽܘܢ ܟܺܐܦܼܳܐ ܘܰܠܝܽܘܚܰܢܳܢ܂
08:15 [ai]ܘܰܢܚܶܬܼܘ ܘܨܰܠܺܝܘ ܥܠܰܝܗܽܘܢ܃ ܐܰܝܟܼ ܕܰܢܩܰܒܿܠܽܘܢ ܪܽܘܚܳܐ ܕܩܽܘܕܼܫܳܐ܂
08:16 [ai]ܠܰܝܬܿ ܗ̱ܘܳܐ ܓܶܝܪ ܥܰܠ ܚܰܕܼ ܡܶܢܗܽܘܢ ܥܕܼܰܟܿܺܝܠ܃ ܒܰܠܚܽܘܕܼ ܕܶܝܢ ܥܳܡܕܺܝܢ ܗ̱ܘܰܘ ܒܰܫܡܶܗ ܕܡܳܪܰܢ ܝܶܫܽܘܥ܂
08:17 [ai]ܗܳܝܕܶܝܢ ܣܳܝܡܺܝܢ ܗ̱ܘܰܘ ܥܠܰܝܗܽܘܢ ܐܺܝܕܼܳܐ܃ ܘܰܡܩܰܒܿܠܺܝܢ ܗ̱ܘܰܘ ܪܽܘܚܳܐ ܕܩܽܘܕܼܫܳܐ܂
08:18 [ai]ܘܟܼܰܕܼ ܚܙܳܐ ܣܺܝܡܳܘܢ ܕܒܰܣܝܳܡ ܐܺܝܕܼܳܐ ܕܰܫܠܺܝܚܶܐ̈ ܡܶܬܼܝܰܗ̱ܒܼܳܐ ܪܽܘܚܳܐ ܕܩܽܘܕܼܫܳܐ܃ ܩܰܪܶܒܼ ܠܗܽܘܢ ܟܶܣܦܿܳܐ܂
08:19 [ai]ܟܰܕܼ ܐܳܡܰܪ܃ ܗܰܒܼܘ ܐܳܦܼ ܠܺܝ ܫܽܘܠܛܳܢܳܐ ܗܳܢܳܐ܃ ܕܰܐܝܢܳܐ ܕܶܐܣܺܝܡ ܥܠܰܘܗ̱ܝ ܐܺܝܕܼܳܐ܃ ܢܶܗܘܶܐ ܡܩܰܒܿܶܠ ܪܽܘܚܳܐ ܕܩܽܘܕܼܫܳܐ܂
08:20 [ai]ܐܳܡܰܪ ܠܶܗ ܫܶܡܥܽܘܢ ܟܺܐܦܼܳܐ܂ ܟܶܣܦܿܳܟܼ ܥܰܡܳܟܼ ܢܺܐܙܰܠ ܠܰܐܒܼܕܼܳܢܳܐ܃ ܡܶܛܽܠ ܕܰܣܒܼܰܪܬܿ ܕܡܰܘܗܰܒܼܬܼܶܗ ܒܩܶܢܝܳܢ ܥܳܠܡܳܐ ܡܶܬܼܩܰܢܝܳܐ܂
08:21 [ai]ܠܰܝܬܿ ܠܳܟܼ ܡܢܳܬܼܳܐ ܐܳܦܼܠܳܐ ܦܶܣܳܐ ܒܗܰܝܡܳܢܽܘܬܼܳܐ ܗܳܕܼܶܐ܃ ܡܶܛܽܠ ܕܿܠܶܒܳܟܼ ܠܳܐ ܗ̱ܘܳܐ ܬܪܺܝܨ ܩܕܼܳܡ ܐܰܠܳܗܳܐ܂
08:22 [ai]ܒܪܰܡ ܬܽܘܒܼ ܡܶܢ ܒܺܝܫܽܘܬܼܳܟܼ ܗܳܕܼܶܐ܂ ܘܰܒܥܺܝ ܡܶܢ ܐܰܠܳܗܳܐ܃ ܕܰܠܡܳܐ ܢܶܫܬܿܒܼܶܩ ܠܳܟܼ ܢܶܟܼܠܳܐ ܕܿܠܶܒܳܟܼ܂
08:23 [ai]ܒܟܰܒܼܕܿܳܐ ܓܶܝܪ ܡܰܪܺܝܪܬܳܐ ܘܰܒܩܶܛܪ̈ܶܐ ܕܥܰܘܠܳܐ܂ ܚܳܙܶܐ ܐ̱ܢܳܐ ܕܺܐܝܬܼܰܝܟܿ܂
08:24 [ai]ܥܢܳܐ ܣܺܝܡܳܘܢ ܘܶܐܡܰܪ܂ ܒܥܰܘ ܐܰܢ̱ܬܿܽܘܢ ܚܠܳܦܼܰܝ ܡܶܢ ܐܰܠܳܗܳܐ܃ ܕܠܳܐ ܢܺܐܬܼܶܐ ܥܠܰܝ ܡܶܕܶܡ ܡܶܢ ܗܳܠܶܝܢ ܕܶܐܡܰܪܬܿܽܘܢ܂
08:25 [ai]ܫܶܡܥܽܘܢ ܕܶܝܢ ܘܝܽܘܚܰܢܳܢ܂ ܟܰܕܼ ܣܰܗܶܕܼܘ ܐܶܢܽܘܢ ܘܰܐܠܶܦܼܘ ܡܶܠܬܼܳܐ ܕܰܐܠܳܗܳܐ܃ ܗܦܼܰܟܼܘ ܠܗܽܘܢ ܠܽܐܘܪܺܫܠܶܡ܂ ܘܰܒܩܽܘܪ̈ܝܳܐ ܣܰܓܿܺܝܳܐܬܼܳܐ̈ ܕܫܳܡܪ̈ܳܝܶܐ ܣܰܒܰܪܘ܀
08:26 [ai]ܘܡܰܠܶܠ ܡܰܠܰܐܟܼܳܐ ܕܡܳܪܝܳܐ ܥܰܡ ܦܼܺܝܠܺܝܦܿܳܘܣ܂ ܘܶܐܡܰܪ ܠܶܗ܂ ܩܽܘܡ ܙܶܠ ܠܬܼܰܝܡܢܳܐ ܒܽܐܘܪܚܳܐ ܡܰܕܼܒܿܪܳܝܬܳܐ ܕܢܳܚܬܳܐ ܡܶܢ ܐܽܘܪܺܫܠܶܡ ܠܓܼܰܙܰܐ܂
08:27 [ai]ܘܩܳܡ ܐܶܙܰܠ܂ ܘܰܐܪܥܶܗ ܡܗܰܝܡܢܳܐ ܚܰܕܼ܂ ܕܳܐܬܼܶܐ ܗ̱ܘܳܐ ܡܶܢ ܟܿܽܘܫ܃ ܫܰܠܺܝܛܳܐ ܕܩܰܢܕܼܰܩ ܡܰܠܟܿܬܼܳܐ ܕܟܽܘܫܳܝ̈ܶܐ܂ ܘܗܽܘ ܫܰܠܺܝܛ ܗ̱ܘܳܐ ܥܰܠ ܟܽܠܶܗ ܓܰܙܳܗ܂ ܘܶܐܬܼܳܐ ܗ̱ܘܳܐ܃ ܕܢܶܣܓܿܽܘܕܼ ܒܽܐܘܪܺܫܠܶܡ܂
08:28 [ai]ܘܟܼܰܕܼ ܗܦܼܰܟܼ ܕܢܺܐܙܰܠ܃ ܝܳܬܼܶܒܼ ܗ̱ܘܳܐ ܥܰܠ ܡܰܪܟܿܰܒܼܬܼܳܐ ܘܩܳܪܶܐ ܗ̱ܘܳܐ ܒܶܐܫܰܥܝܳܐ ܢܒܼܺܝܳܐ܂
08:29 [ai]ܘܶܐܡܪܰܬܼ ܪܽܘܚܳܐ ܠܦܼܺܝܠܺܝܦܿܳܘܣ܂ ܐܶܬܼܩܰܪܰܒܼ ܘܩܰܦܼ ܠܡܰܪܟܿܰܒܼܬܼܳܐ܂
08:30 [ai]ܘܟܼܰܕܼ ܐܶܬܼܩܰܪܰܒܼ܃ ܫܡܰܥ ܕܩܳܪܶܐ ܒܶܐܫܰܥܝܳܐ ܢܒܼܺܝܳܐ܂ ܘܶܐܡܰܪ ܠܶܗ܃ ܕܶܐܢܡܶܣܬܿܰܟܿܰܠܿ ܐܰܢ̱ܬܿ ܡܳܢܳܐ ܩܳܪܶܐ ܐܰܢ̱ܬܿ܂
08:31 [ai]ܘܗܽܘ ܐܶܡܰܪ܂ ܐܰܝܟܿܰܢܳܐ ܡܶܫܟܿܰܚ ܐ̱ܢܳܐ ܕܶܐܣܬܿܰܟܿܰܠ܃ ܐܶܠܳܐ ܐܶܢ ܐ̱ܢܳܫ ܢܰܪܬܿܶܝܢܝ܂ ܘܰܒܥܳܐ ܡܶܢܶܗ ܡܶܢ ܦܼܺܝܠܺܝܦܿܳܘܣ܃ ܕܢܶܣܰܩ ܘܢܶܬܶܒܼ ܥܰܡܶܗ܂
08:32 [ai]ܦܳܣܽܘܩܳܐ ܕܶܝܢ ܕܰܟܼܬܼܳܒܼܳܐ ܕܩܳܪܶܐ ܗ̱ܘܳܐ ܒܶܗ܃ ܐܺܝܬܼܰܘܗ̱ܝ ܗ̱ܘܳܐ ܗܳܢܳܐ܂ ܐܰܝܟܼ ܐܶܡܪܳܐ ܠܢܶܟܼܣܬܼܳܐ ܐܶܬܼܕܒܰܪ܂ ܘܰܐܝܟܼ ܢܶܩܝܳܐ ܩܕܼܳܡ ܓܳܙܽܘܙܳܐ ܫܰܬܿܺܝܩ ܗ̱ܘܳܐ܂ ܘܗܳܟܼܰܢܳܐ ܠܳܐ ܦܬܼܰܚ ܦܽܘܡܶܗ
08:33 [ai]ܒܡܽܘܟܿܳܟܼܶܗ܂ ܡܶܢ ܚܒܼܽܘܫܝܳܐ ܘܡܶܢ ܕܺܝܢܳܐ ܐܶܬܼܕܒܰܪ܂ ܘܕܼܳܪܶܗ ܡܰܢܽܘ ܢܶܫܬܿܰܥܶܐ܂ ܕܡܶܫܬܿܰܩܠܺܝܢ ܚܰܝܰܘܗ̱ܝ̈ ܡܶܢ ܐܰܪܥܳܐ܂
08:34 [ai]ܘܶܐܡܰܪ ܗܰܘ ܡܗܰܝܡܢܳܐ ܠܦܼܺܝܠܺܝܦܿܳܘܣ܂ ܒܿܳܥܶܐ ܐ̱ܢܳܐ ܡܶܢܳܟܼ܃ ܥܰܠ ܡܰܢܽܘ ܐܰܡܪܳܗ ܗܳܕܼܶܐ ܢܒܼܺܝܳܐ܃ ܥܰܠ ܢܰܦܼܫܶܗ ܐܰܘ ܥܰܠ ܐ̱ܢܳܫ ܐ̱ܚܪܺܝܢ ܿ܀ܿ܀ܿ
08:35 [ai]ܗܳܝܕܶܝܢ ܦܼܺܝܠܺܝܦܿܳܘܣ ܦܬܼܰܚ ܦܽܘܡܶܗ܃ ܘܫܰܪܺܝ ܡܶܢܶܗ ܡܶܢ ܗܳܢܳܐ ܟܬܼܳܒܼܳܐ܃ ܡܣܰܒܰܪ ܠܶܗ ܥܰܠ ܡܳܪܰܢ ܝܶܫܽܘܥ܂
08:36 [ai]ܘܟܼܰܕܼ ܗܶܢܽܘܢ ܐܳܙܺܠ̱ܝܢ ܒܽܐܘܪܚܳܐ܃ ܡܰܛܺܝܘ ܗ̱ܘܰܘ ܠܕܼܽܘܟܿܬܼܳܐ ܚܕܼܳܐ ܕܺܐܝܬܼ ܒܿܳܗ ܡܰܝܳܐ̈܂ ܘܶܐܡܰܪ ܗܰܘ ܡܗܰܝܡܢܳܐ܂ ܗܳܐ ܡܰܝܳܐ̈܂ ܡܳܢܳܐ ܗ̱ܺܝ ܟܳܠܺܝܬܼܳܐ܂ ܕܶܐܥܡܰܕܼ܂
08:37 [ai]ܘܶܐܡܰܪ ܦܼܺܝܠܺܝܦܿܳܘܣ܂ ܐܶܢ ܡܗܰܝܡܶܢ ܐܰܢ̱ܬܿ ܡܶܢ ܟܽܠܶܗ ܠܶܒܿܳܐ܃ ܫܰܠܺܝܛ܂ ܘܰܥܢܳܐ ܘܶܐܡܰܪ܂ ܐܶܢܳܐ ܡܗܰܝܡܶܢ ܐ̱ܢܳܐ܂ ܕܝܶܫܽܘܥ ܡܫܺܝܚܳܐ ܒܪܶܗ ܕܰܐܠܳܗܳܐ ܗ̱ܘ܂
08:38 [ai]ܘܰܦܼܩܰܕܼ ܗ̱ܘܳܐ܂ ܕܰܬܼܩܽܘܡ ܡܰܪܟܿܰܒܼܬܼܳܐ܂ ܘܰܢܚܶܬܼܘ ܬܿܪ̈ܰܝܗܽܘܢ ܠܡܰܝܳܐ̈܂ ܘܰܐܥܡܕܼܶܗ ܦܼܺܝܠܺܝܦܿܳܘܣ ܠܰܡܗܰܝܡܢܳܐ ܗܰܘ܂
08:39 [ai]ܘܟܼܰܕܼ ܣܠܶܩܘ ܡܶܢ ܡܰܝܳܐ̈܃ ܪܽܘܚܶܗ ܕܡܳܪܝܳܐ ܚܶܛܦܿܰܬܼ ܠܦܼܺܝܠܺܝܦܿܳܘܣ܃ ܘܬܼܽܘܒܼ ܠܳܐ ܚܙܳܝܗ̱ܝ ܡܗܰܝܡܢܳܐ ܗܰܘ܂ ܐܶܠܳܐ ܐܳܙܶܠ ܗ̱ܘܳܐ ܒܽܐܘܪܚܶܗ܂ ܟܰܕܼ ܚܳܕܼܶܐ܂
08:40 [ai]ܦܼܺܝܠܺܝܦܿܳܘܣ ܕܶܝܢ ܐܶܫܬܿܟܼܰܚ ܒܰܐܙܳܘܛܳܘܣ܂ ܘܡܶܢ ܬܰܡܳܢ ܡܶܬܼܟܿܪܶܟܼ ܗ̱ܘܳܐ ܘܰܡܣܰܒܰܪ ܒܰܡܕܼܺܝܢܳܬܼܳܐ̈ ܟܽܠܗܶܝܢ܃ ܥܕܼܰܡܳܐ ܕܶܐܬܼܳܐ ܠܩܶܣܰܪܺܝܰܐ܀

next chapter