The Comprehensive Aramaic Lexicon

09:01 [ai]	ܫܳܐܘܳܠ ܕܶܝܢ ܥܕܼܰܟܿܺܝܠ ܡܠܶܐ ܗ̱ܘܳܐ܂ ܠܽܘܚܳܡܳܐ ܘܚܶܡܬܼܳܐ ܕܩܶܛܠܳܐ ܥܰܠ ܬܰܠܡܺܝܕܼܰܘܗ̱ܝ̈ ܕܡܳܪܰܢ܂
09:02 [ai]	ܘܰܫܐܶܠ ܠܶܗ ܐܶܓܿܪ̈ܳܬܼܳܐ ܡܶܢ ܪܰܒܿ ܟܳܗܢܶܐ̈܃ ܕܢܶܬܿܶܠ ܠܶܗ ܠܕܼܰܪܡܣܽܘܩ ܠܰܟܼܢܽܘܫܳܬܼܳܐ̈܃ ܕܶܐܢܗܽܘ ܕܢܶܫܟܿܰܚ ܕܪܳܕܼܶܝܢ ܒܗܳܕܼܶܐ ܐܽܘܪܚܳܐ ܓܿܰܒܼܪ̈ܶܐ ܐܰܘ ܢܶܫܶܐ̈܃ ܢܶܐܣܽܘܪ ܢܰܝܬܿܶܐ ܐܶܢܽܘܢ ܠܽܐܘܪܺܫܠܶܡ܂
09:03 [ai]	ܘܟܼܰܕܼ ܐܳܙܶܠ ܗ̱ܘܳܐ ܘܫܰܪܺܝ ܡܡܰܛܶܐ ܠܕܼܰܪܡܣܽܘܩ܃ ܡܶܢ ܬܚܶܝܬܼ ܫܶܠܝܳܐ܂ ܐܰܙܠܶܓܼ ܗ̱ܘܳܐ ܥܠܰܘܗ̱ܝ ܢܽܘܗܪܳܐ ܡܶܢ ܫܡܰܝܳܐ܂
09:04 [ai]	ܘܰܢܦܼܰܠ ܥܰܠ ܐܰܪܥܳܐ܂ ܘܰܫܡܰܥ ܩܳܠܳܐ ܕܳܐܡܰܪ ܠܶܗ܂ ܫܳܐܘܳܠ ܫܳܐܘܳܠ܃ ܡܳܢܳܐ ܪܳܕܼܶܦܼ ܐܰܢ̱ܬܿ ܠܺܝ܂ ܩܫܶܐ ܗ̱ܘ ܠܳܟܼ ܠܰܡܒܼܰܥܳܛܽܘ ܠܥܽܘܩܣܶܐ̈܂
09:05 [ai]	ܥܢܳܐ ܗܽܘ ܘܶܐܡܰܪ܂ ܡܰܢ ܐܰܢ̱ܬܿ ܡܳܪܝ܂ ܘܡܳܪܰܢ ܐܶܡܰܪ܂ ܐܶܢܳܐ ܐ̱ܢܳܐ ܝܶܫܽܘܥ ܢܳܨܪܳܝܳܐ ܗܰܘ ܕܰܐܢ̱ܬܿ ܪܳܕܼܶܦܼ ܐܰܢ̱ܬܿ܂
09:06 [ai]	ܐܶܠܳܐ ܩܽܘܡ ܥܽܘܠ ܠܰܡܕܼܺܝܢ̱ܬܳܐ܃ ܘܬܼܰܡܳܢ ܢܶܬܼܡܰܠܰܠ ܥܰܡܳܟܼ ܥܰܠ ܡܳܐ ܕܘܳܠܶܐ ܠܳܟܼ ܠܡܶܥܒܿܰܕܼ܂
09:07 [ai]	ܘܓܼܰܒܼܪ̈ܶܐ ܕܳܐܙܺܠ̱ܝܢ ܗ̱ܘܰܘ ܥܰܡܶܗ ܒܽܐܘܪܚܳܐ܃ ܩܳܝܡܺܝܢ ܗ̱ܘܰܘ ܟܰܕܼ ܬܰܡܺܝܗܺܝܢ܃ ܡܶܛܽܠ ܕܩܳܠܳܐ ܒܰܠܚܽܘܕܼ ܫܳܡܥܺܝܢ ܗ̱ܘܰܘ܂ ܐ̱ܢܳܫ ܕܶܝܢ ܠܳܐ ܡܶܬܼܚܙܶܐ ܗ̱ܘܳܐ ܠܗܽܘܢ܂
09:08 [ai]	ܘܩܳܡ ܫܳܐܘܳܠ ܡܶܢ ܐܰܪܥܳܐ ܘܠܳܐ ܡܶܬܼܚܙܶܐ ܗ̱ܘܳܐ ܠܶܗ ܡܶܕܶܡ܃ ܟܰܕܼ ܥܰܝܢܰܘܗ̱ܝ̈ ܦܬܼܺܝܚܳܢ̈ ܗ̱ܘܰܝ̈܂ ܘܟܼܰܕܼ ܐܰܚܺܝܕܼܺܝܢ ܒܺܐܝܕܼܰܘܗ̱ܝ̈܂ ܐܰܥܠܽܘܗ̱ܝ ܠܕܼܰܪܡܣܽܘܩ܂
09:09 [ai]	ܘܠܳܐ ܡܶܬܼܚܙܶܐ ܗ̱ܘܳܐ ܠܶܗ ܬܠܳܬܼܳܐ ܝܰܘܡܺܝܢ̈܂ ܘܠܳܐ ܐܶܟܼܰܠ܂ ܘܠܳܐ ܐܶܫܬܿܺܝ܀
09:10 [ai]	ܐܺܝܬܼ ܗ̱ܘܳܐ ܕܶܝܢ ܒܿܳܗ ܒܕܼܰܪܡܣܽܘܩ ܬܰܠܡܺܝܕܼܳܐ ܚܰܕܼ ܕܰܫܡܶܗ ܗܘܳܐ ܚܰܢܰܢܝܳܐ܂ ܘܡܳܪܝܳܐ ܐܶܡܰܪ ܠܶܗ ܒܚܶܙܘܳܐ܂ ܚܰܢܰܢܝܳܐ܃ ܘܶܐܡܰܪ܂ ܗܳܐ ܐܶܢܳܐ ܡܳܪܝ܂
09:11 [ai]	ܘܡܳܪܰܢ ܐܶܡܰܪ ܠܶܗ܂ ܩܽܘܡ ܙܶܠ ܠܫܽܘܩܳܐ ܕܡܶܬܼܩܪܶܐ ܬܪܺܝܨܳܐ܃ ܘܰܒܥܺܝ ܒܒܼܰܝܬܳܐ ܕܺܝܗܽܘܕܼܳܐ ܠܫܳܐܘܳܠ ܕܺܐܝܬܼܰܘܗ̱ܝ ܡܶܢ ܛܰܪܣܳܘܣ ܡܕܼܺܝܢ̱ܬܳܐ܂ ܗܳܐ ܓܶܝܪ ܟܰܕܼ ܗܽܘ ܡܨܰܠܶܐ܃
09:12 [ai]	ܚܙܳܐ ܒܚܶܙܘܳܐ ܠܓܼܰܒܼܪܳܐ ܕܰܫܡܶܗ ܚܰܢܰܢܝܳܐ܃ ܕܥܰܠ ܘܣܳܡ ܥܠܰܘܗ̱ܝ ܐܺܝܕܼܳܐ܃ ܐܰܝܟܼ ܕܢܶܬܼܦܿܰܬܿܚܳܢ̈ ܥܰܝܢܰܘܗ̱ܝ̈܂
09:13 [ai]	ܘܶܐܡܰܪ ܚܰܢܰܢܝܳܐ܂ ܡܳܪܝ܂ ܫܶܡܥܶܬܼ ܡܶܢ ܣܰܓܿܺܝܶܐܐ̈ ܥܰܠ ܓܰܒܼܪܳܐ ܗܳܢܳܐ܃ ܕܰܟܼܡܳܐ ܒܺܝܫܳܬܼܳܐ̈ ܐܰܣܒܿܶܠ ܠܩܰܕܿܺܝܫܰܝܟܿ̈ ܒܽܐܘܪܺܫܠܶܡ܂
09:14 [ai]	ܘܗܳܐ ܐܳܦܼ ܗܳܪܟܿܳܐ ܐܺܝܬܼ ܠܶܗ ܫܽܘܠܛܳܢܳܐ ܡܶܢ ܪ̈ܰܒܰܝ ܟܳܗܢܶܐ̈܃ ܕܢܶܐܣܽܘܪ ܠܟܼܽܠܗܽܘܢ ܐܰܝܠܶܝܢ ܕܩܳܪܶܝܢ ܫܡܳܟܼ܂
09:15 [ai]	ܘܶܐܡܰܪ ܠܶܗ ܡܳܪܝܳܐ܂ ܩܽܘܡ ܙܶܠ܂ ܡܶܛܽܠ ܕܡܳܐܢܳܐ ܗܽܘ ܠܺܝ ܓܰܒܼܝܳܐ܃ ܕܢܶܫܩܽܘܠ ܫܶܡܝ ܒܥܰܡ̱ܡܶܐ̈ ܘܰܒܡܰܠܟܿܶܐ̈܂ ܘܒܼܶܝܬܼ ܒܢܰܝ ܐܺܝܣܪܳܝܶܠ܂
09:16 [ai]	ܐܶܢܳܐ ܓܶܝܪ ܐܶܚܰܘܶܝܘܗ̱ܝ܃ ܟܡܳܐ ܥܬܼܺܝܕܼ ܠܡܶܚܰܫ ܡܶܛܽܠ ܫܶܡܝ܀
09:17 [ai]	ܗܳܝܕܶܝܢ ܚܰܢܰܢܝܳܐ ܐܶܙܰܠ ܠܒܼܰܝܬܳܐ ܠܘܳܬܼܶܗ܃ ܘܣܳܡ ܥܠܰܘܗ̱ܝ ܐܺܝܕܼܳܐ ܘܶܐܡܰܪ ܠܶܗ܂ ܫܳܐܘܳܠ ܐܳܚܝ܃ ܡܳܪܰܢ ܝܶܫܽܘܥ ܫܰܕܿܪܰܢܝ܃ ܗܰܘ ܕܶܐܬܼܚܙܺܝ ܠܳܟܼ ܒܽܐܘܪܚܳܐ܂ ܟܰܕܼ ܐܳܬܼܶܐ ܐܰܢ̱ܬܿ܃ ܐܰܝܟܼ ܕܢܶܬܼܦܿܰܬܿܚܳܢ̈ ܥܰܝܢܰܝܟܿ̈ ܘܬܼܶܬܼܡܠܶܐ ܪܽܘܚܳܐ ܕܩܽܘܕܼܫܳܐ܂
09:18 [ai]	ܘܒܼܰܪ ܫܳܥܬܼܶܗ ܢܦܼܰܠ ܡܶܢ ܥܰܝܢܰܘܗ̱ܝ̈ ܡܶܕܶܡ ܕܕܼܳܡܶܐ ܠܰܩܠܳܦܼܶܐ̈܃ ܘܶܐܬܼܦܰܬܿܰܚ ܥܰܝܢܰܘܗ̱ܝ̈܂ ܘܩܳܡ ܥܡܰܕܼ܂
09:19 [ai]	ܘܩܰܒܿܶܠ ܣܰܝܒܿܳܪܬܳܐ ܘܶܐܬܼܚܰܝܰܠ܂ ܘܰܗܘܳܐ ܝܰܘܡܳܬܼܳܐ̈ ܠܘܳܬܼ ܬܰܠܡܺܝܕܼܶܐ̈ ܗܳܢܽܘܢ܂ ܕܺܐܝܬܼ ܗ̱ܘܰܘ ܒܕܼܰܪܡܣܽܘܩ܂
09:20 [ai]	ܘܒܼܰܪ ܫܳܥܬܼܶܗ ܡܰܟܼܪܶܙ ܗ̱ܘܳܐ ܒܰܟܼܢܽܘܫܳܬܼܳܐ̈ ܕܺܝܗܽܘܕܼܳܝܶܐ̈ ܥܰܠ ܝܶܫܽܘܥ܃ ܕܗܽܘܝܽܘ ܒܪܶܗ ܕܰܐܠܳܗܳܐ܂
09:21 [ai]	ܘܬܼܰܡܺܝܗܺܝܢ ܗ̱ܘܰܘ ܟܽܠܗܽܘܢ܂ ܐܰܝܠܶܝܢ ܕܫܳܡܥܺܝܢ ܗ̱ܘܰܘ ܠܶܗ܃ ܘܳܐܡܪܺܝܢ ܗ̱ܘܰܘ܂ ܠܳܐ ܗ̱ܘܳܐ ܗܳܢܳܐ܃ ܗܰܘ ܕܪܳܕܼܶܦܼ ܗ̱ܘܳܐ ܠܟܼܽܠܗܽܘܢ ܐܰܝܠܶܝܢ ܕܩܳܪܶܝܢ ܗ̱ܘܰܘ ܠܰܫܡܳܐ ܗܳܢܳܐ ܒܽܐܘܪܺܫܠܶܡ܃ ܐܳܦܼ ܠܗܳܪܟܿܳܐ ܥܠܶܝܗ ܥܰܠ ܗܳܕܼܶܐ ܡܫܰܕܿܰܪ ܗ̱ܘܳܐ܃ ܐܰܝܟܼ ܕܢܶܐܣܽܘܪ ܢܰܘܒܿܶܠ ܐܶܢܽܘܢ ܠܪ̈ܰܒܰܝ ܟܳܗܢܶܐ̈܀
09:22 [ai]	ܫܳܐܘܳܠ ܕܶܝܢ ܝܰܬܿܺܝܪ ܡܶܬܼܚܰܝܰܠ ܗ̱ܘܳܐ܃ ܘܰܡܙܺܝܥ ܗ̱ܘܳܐ ܠܗܽܘܢ ܠܺܝܗܽܘܕܼܳܝܶܐ̈܂ ܗܳܢܽܘܢ ܕܥܳܡܪܺܝܢ ܗ̱ܘܰܘ ܒܕܼܰܪܡܣܽܘܩ܃ ܟܰܕܼ ܡܚܰܘܶܐ ܗ̱ܘܳܐ ܕܗܳܢܰܘ ܡܫܺܝܚܳܐ܂
09:23 [ai]	ܘܟܼܰܕܼ ܣܓܼܺܝܘ ܠܶܗ ܬܰܡܳܢ ܝܰܘܡܳܬܼܳܐ̈܃ ܥܒܼܰܕܼܘ ܥܠܰܘܗ̱ܝ ܢܶܟܼܠܳܐ ܺܝܗܽܘܕܼܳܝܶܐ̈܂ ܕܢܶܩܛܠܽܘܢܳܝܗ̱ܝ܂
09:24 [ai]	ܐܶܬܼܒܿܰܕܿܰܩ ܠܶܗ ܕܶܝܢ ܠܫܳܐܘܳܠ ܐܳܦܿܰܪܣܢܳܐ܃ ܕܒܳܥܶܝܢ ܗ̱ܘܰܘ ܠܡܶܥܒܿܰܕܼ ܠܶܗ܂ ܘܢܳܛܪܺܝܢ ܗ̱ܘܰܘ ܬܿܰܪ̈ܥܶܐ ܕܰܡܕܼܺܝܢ̱ܬܳܐ܂ ܐܺܝܡܳܡܳܐ ܘܠܺܠܝܳܐ܂ ܕܢܶܩܛܠܽܘܢܳܝܗ̱ܝ܂
09:25 [ai]	ܗܳܝܕܶܝܢ ܣܳܡܽܘܗ̱ܝ ܬܰܠܡܺܝܕܼܶܐ̈ ܒܶܐܣܦܿܪܺܝܕܼܳܐ܃ ܘܫܰܒܿܽܘܗ̱ܝ ܡܶܢ ܫܽܘܪܳܐ ܒܠܺܠܝܳܐ܂
09:26 [ai]	ܘܶܐܙܰܠ ܠܶܗ ܠܽܐܘܪܺܫܠܶܡ܂ ܘܨܳܒܼܶܐ ܗ̱ܘܳܐ ܠܡܶܬܼܢܰܩܳܦܼܽܘ ܠܬܼܰܠܡܺܝܕܼܶܐ̈܃ ܘܟܼܽܠܗܽܘܢ ܕܳܚܠܺܝܢ ܗ̱ܘܰܘ ܡܶܢܶܗ ܘܠܳܐ ܡܗܰܝܡܢܺܝܢ ܗ̱ܘܰܘ ܕܬܰܠܡܺܝܕܼܳܐ ܗܽܘ܂
09:27 [ai]	ܒܰܪܢܰܒܼܰܐ ܕܶܝܢ ܐܰܚܕܿܶܗ ܘܰܐܝܬܿܝܶܗ ܠܘܳܬܼ ܫܠܺܝܚܶܐ̈܂ ܘܶܐܫܬܿܰܥܺܝ ܠܗܽܘܢ ܐܰܝܟܿܰܢܳܐ ܒܽܐܘܪܚܳܐ ܚܙܳܐ ܠܡܳܪܝܳܐ܂ ܘܕܼܰܐܝܟܿܰܢܳܐ ܡܰܠܶܠ ܥܰܡܶܗ܂ ܘܰܐܝܟܿܰܢܳܐ ܒܕܼܰܪܡܣܽܘܩ ܥܺܝܢ ܒܰܓܼܠܶܐ ܡܰܠܶܠ ܒܰܫܡܶܗ ܕܝܶܫܽܘܥ܂
09:28 [ai]	ܘܥܳܐܶܠ ܗ̱ܘܳܐ ܥܰܡܗܽܘܢ ܘܢܳܦܼܶܩ ܒܽܐܘܪܺܫܠܶܡ܂
09:29 [ai]	ܘܰܡܡܰܠܶܠ ܗ̱ܘܳܐ ܒܰܫܡܶܗ ܕܝܶܫܽܘܥ ܥܺܝܢ ܒܰܓܼܠܶܐ܃ ܘܕܼܳܪܶܫ ܗ̱ܘܳܐ ܥܰܡ ܺܝܗܽܘܕܼܳܝܶܐ̈܂ ܐܰܝܠܶܝܢ ܕܝܳܕܼܥܺܝܢ ܗ̱ܘܰܘ ܝܰܘܢܳܐܺܝܬܼ܂ ܗܶܢܽܘܢ ܕܶܝܢ ܨܳܒܼܶܝܢ ܗ̱ܘܰܘ ܠܡܶܩܛܠܶܗ܂
09:30 [ai]	ܘܟܼܰܕܼ ܺܝܕܼܰܥܘ ܐܰܚܶܐ̈܃ ܐܰܝܬܿܝܽܘܗ̱ܝ ܒܠܺܠܝܳܐ ܠܩܶܣܰܪܺܝܰܐ܂ ܘܡܶܢ ܬܰܡܳܢ ܫܰܕܿܪܽܘܗ̱ܝ ܠܛܰܪܣܳܘܣ܂
09:31 [ai]	ܒܪܰܡ ܕܶܝܢ ܥܺܕ̱ܿܬܳܐ ܕܰܒܼܟܼܽܠܳܗ ܺܝܗܽܘܕܼ ܘܒܼܰܓܼܠܺܝܠܳܐ ܘܰܒܫܳܡܪܺܝܢ܃ ܐܺܝܬܼ ܗ̱ܘܳܐ ܒܿܳܗ ܫܠܳܡܳܐ܃ ܟܰܕܼ ܡܶܬܼܒܰܢܝܳܐ ܗ̱ܘܳܬܼ ܘܪܳܕܼܝܳܐ ܒܕܶܚܠܰܬܼ ܐܰܠܳܗܳܐ܂ ܘܰܒܒܼܽܘܝܳܐܳܐ ܕܪܽܘܚܳܐ ܕܩܽܘܕܼܫܳܐ ܣܳܓܼܝܳܐ ܗ̱ܘܳܬܼ ܿ܀ܿ܀ܿ
09:32 [ai]	ܘܰܗܘܳܐ ܕܟܰܕܼ ܡܶܬܼܟܿܪܶܟܼ ܗ̱ܘܳܐ ܫܶܡܥܽܘܢ ܒܰܡܕܼܺܝܢܳܬܼܳܐ̈܃ ܢܚܶܬܼ ܐܳܦܼ ܠܘܳܬܼ ܩܰܕܿܺܝܫܶܐ̈ ܕܥܳܡܪܺܝܢ ܒܠܽܘܕܼ ܡܕܼܺܝܢ̱ܬܳܐ܂
09:33 [ai]	ܘܶܐܫܟܿܰܚ ܓܰܒܼܪܳܐ ܚܰܕܼ ܕܰܫܡܶܗ ܐܰܢܺܝܰܣ܃ ܕܰܪܡܶܐ ܗ̱ܘܳܐ ܒܥܰܪܣܳܐ ܘܰܡܫܰܪܰܝ ܫܢܺܝܢ̈ ܬܡܳܢܶܐ܂
09:34 [ai]	ܘܶܐܡܰܪ ܠܶܗ ܫܶܡܥܽܘܢ܂ ܐܰܢܺܝܰܐ܂ ܡܰܐܣܶܐ ܠܳܟܼ ܝܶܫܽܘܥ ܡܫܺܝܚܳܐ܂ ܩܽܘܡ ܘܫܰܘܳܐ ܥܰܪܣܳܟܼ܂ ܘܒܼܰܪ ܫܳܥܬܼܶܗ ܩܳܡ܂
09:35 [ai]	ܘܰܚܙܰܐܘܽܗ̱ܝ ܟܽܠܗܽܘܢ ܕܥܳܡܪܺܝܢ ܒܠܽܘܕܼ ܘܰܒܣܰܪܳܘܢܰܐ܃ ܘܶܐܬܼܦܿܢܺܝܘ ܠܘܳܬܼ ܐܰܠܳܗܳܐ܀
09:36 [ai]	ܐܺܝܬܼ ܗ̱ܘܳܐ ܕܶܝܢ ܬܿܰܠܡܺܝܕܿܬܳܐ ܚܕܼܳܐ ܒܝܳܘܦܿܺܐ ܡܕܼܺܝܢ̱ܬܳܐ܂ ܕܰܫܡܳܗ ܗܘܳܐ ܛܒܼܺܝܬܼܳܐ܂ ܗܳܕܼܶܐ ܥܰܬܿܺܝܪܳܐ ܗ̱ܘܳܬܼ ܒܰܥܒܼܳܕܼܶܐ̈ ܛܳܒܼܶܐ̈܂ ܘܰܒܙܶܕܼܩܳܬܼܳܐ̈܂ ܕܥܳܒܼܕܿܳܐ ܗ̱ܘܳܬܼ܂
09:37 [ai]	ܐܶܬܼܟܰܪܗܰܬܼ ܕܶܝܢ ܒܗܽܘܢ ܒܗܳܢܽܘܢ ܝܰܘܡܳܬܼܳܐ̈ ܘܡܺܝܬܼܰܬܼ܃ ܘܰܐܣܚܝܽܘܗ ܘܣܳܡܽܘܗ ܒܥܶܠܺܝܬܼܳܐ܂
09:38 [ai]	ܘܰܫܡܰܥܘ ܗ̱ܘܰܘ ܬܰܠܡܺܝܕܼܶܐ̈ ܕܫܶܡܥܽܘܢ ܒܠܽܘܕܼ ܗ̱ܽܘ ܡܕܼܺܝܢ̱ܬܳܐ܃ ܗܳܝ ܕܺܐܝܬܼܶܝܗ ܥܰܠܓܶܢ̱ܒܼ ܝܳܘܦܿܺܐ܃ ܘܫܰܕܿܰܪܘ ܗ̱ܘܰܘ ܠܘܳܬܼܶܗ ܓܿܰܒܼܪ̈ܶܐ ܬܿܪ̈ܶܝܢ ܕܢܶܒܼܥܽܘܢ ܡܶܢܶܗ܃ ܕܠܳܐ ܬܶܡܰܐܢ ܠܶܗ ܕܢܺܐܬܼܶܐ ܨܶܐܕܼܰܝܗܽܘܢ܂
09:39 [ai]	ܘܩܳܡ ܫܶܡܥܽܘܢ ܐܶܙܰܠ ܥܰܡܗܽܘܢ܂ ܘܟܼܰܕܼ ܐܶܬܼܳܐ܂ ܐܰܣܩܽܘܗ̱ܝ ܠܥܶܠܺܝܬܼܳܐ܂ ܘܰܟܼܢܰܫ ܩܳܡ ܠܗܶܝܢ ܚܕܼܳܪ̈ܰܘܗ̱ܝ ܟܽܠܗܶܝܢ ܐܰܪ̈ܡܠܳܬܼܳܐ܂ ܟܰܕܼ ܒܳܟܼܝܳܢ̈ ܘܰܡܚܰܘܝܳܢ̈ ܠܶܗ܃ ܟܽܘܬܿܺܝܢܝܳܬܼܳܐ̈ ܘܡܰܪ̈ܛܽܘܛܶܐ܂ ܗܳܠܶܝܢ ܕܝܳܗܒܿܳܐ ܗ̱ܘܳܬܼ ܠܗܶܝܢ ܛܒܼܺܝܬܼܳܐ܂ ܟܰܕܼ ܚܰܝܳܐ܂
09:40 [ai]	ܫܶܡܥܽܘܢ ܕܶܝܢ ܐܰܦܿܶܩ ܠܟܼܽܠܗܽܘܢ ܐ̱ܢܳܫܳܐ ܠܒܼܰܪ܃ ܘܰܩܥܶܕܼ ܥܰܠ ܒܽܘܪ̈ܟܿܰܘܗ̱ܝ ܘܨܰܠܺܝ܂ ܘܶܐܬܼܦܿܢܺܝ ܠܘܳܬܼ ܫܠܰܕܿܳܐ ܘܶܐܡܰܪ܂ ܛܒܼܺܝܬܼܳܐ܃ ܩܽܘܡܝ܂ ܗܺܝ ܕܶܝܢ ܦܶܬܼܚܰܬܼ ܥܰܝܢܶܝܗ̈܂ ܘܟܼܰܕܼ ܚܙܳܬܼܶܗ ܠܫܶܡܥܽܘܢ܂ ܝܶܬܼܒܿܰܬܼ܂
09:41 [ai]	ܘܰܐܘܫܶܛ ܠܳܗ ܐܺܝܕܼܶܗ ܘܰܐܩܺܝܡܳܗ܂ ܘܰܩܪܳܐ ܠܩܰܕܿܺܝܫܶܐ̈ ܘܠܰܐܪ̈ܡܠܳܬܼܳܐ܂ ܘܝܰܗܒܿܳܗ ܠܗܽܘܢ܂ ܟܰܕܼ ܚܰܝܳܐ܂
09:42 [ai]	ܘܶܐܬܼܝܰܕܼܥܰܬܼ ܗܳܕܼܶܐ ܒܟܽܠܳܗ ܡܕܼܺܝܢ̱ܬܳܐ܂ ܘܣܰܓܿܺܝܶܐܐ̈ ܗܰܝܡܶܢܘ ܒܡܳܪܰܢ܂
09:43 [ai]	ܗܘܳܐ ܕܶܝܢ ܒܿܳܗ ܒܝܳܘܦܿܺܐ ܝܰܘܡܳܬܼܳܐ̈ ܠܳܐ ܙܥܽܘܪ̈ܺܝܢ܃ ܟܰܕܼ ܫܪܶܐ ܗ̱ܘܳܐ ܒܶܝܬܼ ܫܶܡܥܽܘܢ ܒܽܘܪܣܳܝܳܐ܀

next chapter