The Comprehensive Aramaic Lexicon

10:01 [ai]	ܒܩܶܣܰܪܺܝܰܐ ܕܶܝܢ ܐܺܝܬܼ ܗ̱ܘܳܐ ܓܰܒܼܪܳܐ ܚܰܕܼ ܩܶܢܛܪܽܘܢܳܐ܃ ܕܰܫܡܶܗ ܗ̱ܘܳܐ ܩܳܘܪܢܺܠܺܝܳܘܣ܃ ܡܶܢ ܣܦܿܺܝܪܰܐ ܗܳܝ ܕܡܶܬܼܩܰܪܝܳܐ ܐܺܝܛܰܠܺܝܩܺܐ܂
10:02 [ai]	ܘܙܰܕܿܺܝܩ ܗ̱ܘܳܐ ܘܕܼܳܚܶܠ ܗ̱ܘܳܐ ܡܶܢ ܐܰܠܳܗܳܐ܂ ܗܽܘ ܘܒܼܰܝܬܿܶܗ ܟܽܠܶܗ܂ ܘܥܳܒܼܶܕܼ ܗ̱ܘܳܐ ܙܶܕܼܩܳܬܼܳܐ̈ ܣܰܓܿܺܝܳܐܬܼܳܐ̈ ܒܥܰܡܳܐ܂ ܘܰܒܟܼܽܠܙܒܼܰܢ ܒܿܳܥܶܐ ܗ̱ܘܳܐ ܡܶܢ ܐܰܠܳܗܳܐ܂
10:03 [ai]	ܗܳܢܳܐ ܚܙܳܐ ܡܰܠܰܐܟܼܳܐ ܕܰܐܠܳܗܳܐ ܒܚܶܙܘܳܐ ܓܰܠܝܳܐܺܝܬܼ܃ ܠܰܐܦܿܰܝ̈ ܬܫܰܥ ܫܳܥܺܝܢ̈ ܒܺܐܝܡܳܡܳܐ܃ ܕܥܰܠ ܠܘܳܬܼܶܗ ܘܶܐܡܰܪ ܠܶܗ܂ ܩܳܘܪܢܺܠܺܝܶܐ܃
10:04 [ai]	ܘܗܽܘ ܚܳܪ ܒܶܗ ܘܰܕܼܚܶܠ܂ ܘܶܐܡܰܪ܂ ܡܳܢܳܐ ܡܳܪܝ܂ ܘܶܐܡܰܪ ܠܶܗ ܡܰܠܰܐܟܼܳܐ܂ ܨܠܰܘܳܬܼܳܟܼ̈ ܘܙܶܕܼܩܳܬܼܳܟܼ̈ ܣܠܶܩ ܠܕܼܽܘܟܼܪܳܢܳܐ ܩܕܼܳܡ ܐܰܠܳܗܳܐ܂
10:05 [ai]	ܘܗܳܫܳܐ ܫܰܕܿܰܪ ܓܿܰܒܼܪ̈ܶܐ ܠܝܳܘܦܿܺܐ ܡܕܼܺܝܢ̱ܬܳܐ܃ ܘܰܐܝܬܳܐ ܠܫܶܡܥܽܘܢ ܕܡܶܬܼܩܪܶܐ ܟܺܐܦܼܳܐ܂
10:06 [ai]	ܗܳܐ ܫܪܶܐ ܒܒܼܰܝܬܿܶܗ ܕܫܶܡܥܽܘܢ ܒܽܘܪܣܳܝܳܐ܂ ܗܰܘ ܕܺܐܝܬܼܰܘܗ̱ܝ ܥܰܠ ܝܰܕܼ ܝܰܡܳܐ܂
10:07 [ai]	ܘܟܼܰܕܼ ܐܶܙܰܠ ܠܶܗ ܡܰܠܰܐܟܼܳܐ ܕܡܰܠܶܠ ܥܰܡܶܗ܃ ܩܪܳܐ ܬܿܪ̈ܶܝܢ ܡܶܢ ܒܢܰܝ ܒܰܝܬܿܶܗ ܘܦܼܳܠܚܳܐ ܚܰܕܼ ܕܕܼܳܚܶܠ ܠܰܐܠܳܗܳܐ܂ ܐܰܝܢܳܐ ܕܡܶܬܿܕܿܢܶܐ ܗ̱ܘܳܐ ܠܶܗ܃
10:08 [ai]	ܘܶܐܫܬܿܰܥܺܝ ܠܗܽܘܢ ܟܽܠܡܶܕܶܡ ܕܰܚܙܳܐ܂ ܘܫܰܕܿܰܪ ܐܶܢܽܘܢ ܠܝܳܘܦܿܺܐ܀
10:09 [ai]	ܘܰܠܝܰܘܡܳܐ ܐ̱ܚܪܺܢܳܐ ܟܰܕܼ ܗܶܢܽܘܢ ܪܳܕܼܶܝܢ ܒܽܐܘܪܚܳܐ ܘܩܰܪܺܝܒܼܺܝܢ ܠܰܡܕܼܺܝܢ̱ܬܳܐ܃ ܣܠܶܩ ܫܶܡܥܽܘܢ ܠܶܐܓܿܳܪܳܐ܂ ܕܰܢܨܰܠܶܐ ܒܫܶܬܼ ܫܳܥܺܝܢ̈܂
10:10 [ai]	ܘܰܟܼܦܼܶܢ ܘܨܳܒܼܶܐ ܗ̱ܘܳܐ ܕܢܶܠܥܰܣ܂ ܘܟܼܰܕܼ ܗܶܢܽܘܢ ܡܰܬܼܩܢܺܝܢ ܠܶܗ܃ ܢܦܼܰܠ ܥܠܰܘܗ̱ܝ ܬܶܡܗܳܐ܂
10:11 [ai]	ܘܰܚܙܳܐ ܫܡܰܝܳܐ ܟܰܕܼ ܦܬܼܺܝܚܺܝܢ܃ ܘܡܳܐܢܳܐ ܚܰܕܼ ܟܰܕܼ ܐܰܣܺܝܪ ܒܰܐܪܒܿܰܥ ܩܰܪ̈ܢܳܢ܂ ܘܕܼܳܡܶܐ ܗ̱ܘܳܐ ܠܟܼܶܬܿܳܢܳܐ ܪܰܒܿܳܐ܂ ܘܫܳܐܶܒܼ ܗ̱ܘܳܐ ܡܶܢ ܫܡܰܝܳܐ ܥܰܠ ܐܰܪܥܳܐ܂
10:12 [ai]	ܘܺܐܝܬܼ ܗ̱ܘܳܐ ܒܶܗ ܟܽܠܗܶܝܢ ܚܰܝܘܳܬܼܳܐ̈ ܕܿܰܐܪ̈ܒܿܥܳܬܼ ܪ̈ܶܓܼܠܶܐ܂ ܘܪܰܚܫܳܐ ܕܰܐܪܥܳܐ܂ ܘܦܼܳܪܰܚܬܼܳܐ ܕܰܫܡܰܝܳܐ܂
10:13 [ai]	ܘܩܳܠܳܐ ܐܶܬܼܳܐ ܠܶܗ ܕܳܐܡܰܪ܂ ܫܶܡܥܽܘܢ܃ ܩܽܘܡ ܟܽܘܣ ܘܰܐܟܼܽܘܠ܂
10:14 [ai]	ܘܫܶܡܥܽܘܢ ܐܶܡܰܪ܂ ܚܳܣ ܡܳܪܝ܃ ܕܡܶܡܬܼܽܘܡ ܠܳܐ ܐܶܟܼܠܶܬܼ ܟܽܠ ܕܰܡܣܰܝܰܒܼ ܘܰܛܡܰܐ܂
10:15 [ai]	ܘܬܼܽܘܒܼ ܕܿܬܼܰܪ̈ܬܿܶܝܢ ܙܰܒܼܢܺܝܢ̈ ܩܳܠܳܐ ܗܘܳܐ ܠܘܳܬܼܶܗ܂ ܐܰܝܠܶܝܢ ܕܰܐܠܳܗܳܐ ܕܰܟܿܺܝ܃ ܐܰܢ̱ܬܿ ܠܳܐ ܬܣܰܝܶܒܼ܂
10:16 [ai]	ܗܳܕܼܶܐ ܕܶܝܢ ܗܘܳܬܼ ܬܠܳܬܼ ܙܰܒܼܢܺܝܢ̈܃ ܘܶܐܬܼܥܰܠܺܝ ܠܶܗ ܡܳܐܢܳܐ ܠܰܫܡܰܝܳܐ܀
10:17 [ai]	ܘܟܼܰܕܼ ܡܶܬܿܕܰܡܰܪ ܫܶܡܥܽܘܢ ܒܢܰܦܼܫܶܗ ܕܡܳܢܰܘ ܚܶܙܘܳܐ ܕܰܚܙܳܐ܃ ܡܰܛܺܝܘ ܓܿܰܒܼܪ̈ܶܐ ܗܳܢܽܘܢ ܕܶܐܫܬܿܰܕܿܰܪܘ ܗ̱ܘܰܘ ܡܶܢ ܩܳܘܪܢܺܠܺܝܳܘܣ܃ ܘܫܰܐܶܠܘ ܥܰܠ ܒܰܝܬܳܐ ܕܰܫܪܶܐ ܒܶܗ ܫܶܡܥܽܘܢ܂ ܘܶܐܬܼܰܘ ܘܩܳܡܘ ܥܰܠ ܬܰܪܥܳܐ ܕܕܼܳܪܬܳܐ܂
10:18 [ai]	ܘܩܳܪܶܝܢ ܗ̱ܘܰܘ ܬܰܡܳܢ ܘܰܡܫܰܐܠܺܝܢ܃ ܕܶܐܢ ܫܶܡܥܽܘܢ ܕܡܶܬܼܩܪܶܐ ܟܺܐܦܼܳܐ ܗܳܪܟܿܳܐ ܫܪܶܐ܂
10:19 [ai]	ܘܟܼܰܕܼ ܫܶܡܥܽܘܢ ܪܳܢܶܐ ܗ̱ܘܳܐ ܒܚܶܙܘܳܐ܃ ܐܶܡܰܪ ܠܶܗ ܪܽܘܚܳܐ܂ ܗܳܐ ܓܿܰܒܼܪ̈ܶܐ ܬܠܳܬܼܳܐ ܒܿܳܥܶܝܢ ܠܳܟܼ܂
10:20 [ai]	ܩܽܘܡ ܚܽܘܬܼ ܘܙܶܠ ܥܰܡܗܽܘܢ܂ ܟܰܕܼ ܠܳܐ ܡܶܬܼܦܿܰܠܰܓܼ ܪܶܥܝܳܢܳܟܼ܂ ܡܶܛܽܠ ܕܶܐܢܳܐ ܗܽܘ ܫܰܕܿܪܶܬܼ ܐܶܢܽܘܢ܂
10:21 [ai]	ܗܳܝܕܶܝܢ ܢܚܶܬܼ ܫܶܡܥܽܘܢ ܠܘܳܬܼ ܓܿܰܒܼܪ̈ܶܐ ܗܳܢܽܘܢ ܘܶܐܡܰܪ ܠܗܽܘܢ܂ ܐܶܢܳܐ ܗܽܘ ܕܒܳܥܶܝܢ ܐܢ̱ܬܿܽܘܢ܂ ܐܰܝܕܼܳܐ ܗ̱ܝ ܥܶܠܬܼܳܐ ܕܡܶܛܽܠܳܬܼܳܗ ܐܶܬܼܰܝܬܿܽܘܢ܂
10:22 [ai]	ܐܳܡܪܺܝܢ ܠܶܗ܂ ܓܰܒܼܪܳܐ ܚܰܕܼ ܕܰܫܡܶܗ ܩܳܘܪܢܺܠܺܝܳܘܣ܂ ܩܶܢܛܪܽܘܢܳܐ ܟܺܐܢܳܐ ܕܕܼܳܚܶܠ ܡܶܢ ܐܰܠܳܗܳܐ܂ ܘܡܰܣܗܶܕܼ ܥܠܰܘܗ̱ܝ ܟܽܠܶܗ ܥܰܡܳܐ ܕܺܝܗܽܘܕܼܳܝܶܐ̈܃ ܐܶܬܼܶܐܡܰܪ ܠܶܗ ܒܚܶܙܘܳܐ ܡܶܢ ܡܰܠܰܐܟܼܳܐ ܩܰܕܿܺܝܫܳܐ܃ ܕܰܢܫܰܕܿܰܪ ܢܰܥܠܳܟܼ ܠܒܼܰܝܬܿܶܗ܃ ܘܢܶܫܡܰܥ ܡܶܠܬܼܳܐ ܡܶܢܳܟܼ܂
10:23 [ai]	ܘܰܐܥܶܠ ܐܶܢܽܘܢ ܫܶܡܥܽܘܢ܃ ܘܩܰܒܿܶܠ ܐܶܢܽܘܢ ܟܰܪ ܕܰܫܪܶܐ ܗ̱ܘܳܐ܀ ܘܩܳܡ ܠܒܼܳܬܼܪܶܗ ܕܝܰܘܡܳܐ܂ ܘܰܢܦܼܰܩ ܐܶܙܰܠ ܥܰܡܗܽܘܢ܂ ܘܶܐܙܰܠܘ ܥܰܡܶܗ ܐ̱ܢܳܫ ܐ̱ܢܳܫ ܡܶܢ ܐܰܚܶܐ̈ ܕܝܳܘܦܿܺܐ܂
10:24 [ai]	ܘܰܠܝܰܘܡܳܐ ܐ̱ܚܪܺܢܳܐ ܥܰܠ ܠܩܶܣܰܪܺܝܰܐ܂ ܩܳܘܪܢܺܠܺܝܳܘܣ ܕܶܝܢ ܡܩܰܘܶܐ ܗ̱ܘܳܐ ܠܗܽܘܢ܃ ܟܰܕܼ ܡܟܼܰܢܫܺܝܢ ܠܶܗ ܟܽܠܗܽܘܢ ܒܢܰܝ ܛܽܘܗܡܶܗ܂ ܘܳܐܦܼ ܪ̈ܳܚܡܶܐ ܚܰܒܺܝܒܼܶܐ̈ ܕܺܐܝܬܼ ܗ̱ܘܰܘ ܠܶܗ܂
10:25 [ai]	ܘܟܼܰܕܼ ܥܳܐܶܠ ܫܶܡܥܽܘܢ܃ ܐܰܪܥܶܗ ܩܳܘܪܢܺܠܺܝܳܘܣ܃ ܘܰܢܦܼܰܠ ܣܓܼܶܕܼ ܠܪ̈ܶܓܼܠܰܘܗ̱ܝ܂
10:26 [ai]	ܘܫܶܡܥܽܘܢ ܐܰܩܺܝܡܶܗ ܘܶܐܡܰܪ ܠܶܗ܂ ܩܽܘܡ ܠܳܟܼ܂ ܘܳܐܦܼ ܐܶܢܳܐ ܒܰܪܢܳܫܳܐ ܐ̱ܢܳܐ܂
10:27 [ai]	ܘܟܼܰܕܼ ܡܡܰܠܶܠ ܥܰܡܶܗ܃ ܥܰܠ ܘܶܐܫܟܿܰܚ ܣܰܓܿܺܝܶܐܐ̈ ܕܶܐܬܼܰܘ ܗ̱ܘܰܘ ܠܬܼܰܡܳܢ܂
10:28 [ai]	ܘܶܐܡܰܪ ܠܗܽܘܢ܂ ܐܰܢ̱ܬܿܽܘܢ ܝܳܕܼܥܺܝܢ ܐܢ̱ܬܿܽܘܢ܃ ܕܠܳܐ ܡܰܦܿܰܣ ܠܓܼܰܒܼܪܳܐ ܺܝܗܽܘܕܼܳܝܳܐ܃ ܕܢܶܩܰܦܼ ܠܐ̱ܢܳܫܳܐ ܢܽܘܟܼܪܳܝܳܐ ܕܠܳܐ ܗ̱ܘܳܐ ܒܰܪ ܫܰܪܒܿܬܼܶܗ܂ ܘܠܺܝ ܐܰܠܳܗܳܐ ܚܰܘܝܰܢܝ܃ ܕܠܳܐ ܐܺܡܰܪ ܥܰܠ ܐ̱ܢܳܫ ܕܰܛܡܰܐ ܐܰܘ ܡܣܰܝܰܒܼ܂
10:29 [ai]	ܡܶܛܽܠ ܗܳܢܳܐ ܥܬܼܺܝܕܼܳܐܺܝܬܼ ܐܶܬܼܺܝܬܼ܃ ܟܰܕܼ ܫܰܕܿܰܪܬܿܽܘܢ ܒܳܬܼܰܪܝ܂ ܒܪܰܡ ܡܫܰܐܶܠ ܐ̱ܢܳܐ ܠܟܼܽܘܢ܃ ܡܶܛܽܠ ܡܳܢܳܐ ܫܰܕܿܰܪܬܿܽܘܢ ܒܳܬܼܰܪܝ ܿ܀ܿ܀ܿ
10:30 [ai]	ܐܳܡܰܪ ܠܶܗ ܩܳܘܪܢܺܠܺܝܳܘܣ܂ ܐܰܪ̈ܒܥܳܐ ܝܰܘܡܺܝܢ̈ ܐܺܝܬܼ ܥܕܼܰܡܳܐ ܠܗܳܫܳܐ ܗܳܐ ܡܶܢ ܕܨܳܐܶܡ ܐ̱ܢܳܐ܂ ܘܒܼܰܬܼܫܰܥ ܫܳܥܺܝܢ̈ ܟܰܕܼ ܡܨܰܠܶܐ ܐ̱ܢܳܐ ܒܒܼܰܝܬܿܝ܃ ܩܳܡ ܓܰܒܼܪܳܐ ܚܰܕܼ ܩܕܼܳܡܰܝ܂ ܟܰܕܼ ܠܒܼܺܝܫ ܚܶܘܳܪ̈ܶܐ܂
10:31 [ai]	ܘܶܐܡܰܪ ܠܺܝ܂ ܩܳܘܪܢܺܠܺܝܶܐ܃ ܐܶܫܬܿܰܡܥܰܬܼ ܨܠܽܘܬܼܳܟܼ܂ ܘܰܠܙܶܕܼܩܳܬܼܳܟܼ̈ ܕܽܘܟܼܪܳܢܳܐ ܗܘܳܐ ܩܕܼܳܡ ܐܰܠܳܗܳܐ܂
10:32 [ai]	ܒܪܰܡ ܫܰܕܿܰܪ ܠܝܳܘܦܿܺܐ ܡܕܼܺܝܢ̱ܬܳܐ܃ ܘܰܐܝܬܳܐ ܠܫܶܡܥܽܘܢ ܕܡܶܬܼܩܪܶܐ ܟܺܐܦܼܳܐ܂ ܗܳܐ ܗܳܐܫܪܶܐ ܒܒܼܰܝܬܿܶܗ ܕܫܶܡܥܽܘܢ ܒܽܘܪܣܳܝܳܐ ܕܥܰܠ ܝܰܕܼ ܝܰܡܳܐ܂ ܘܗܽܘ ܢܺܐܬܼܶܐ ܢܡܰܠܶܠ ܥܰܡܳܟܼ܂
10:33 [ai]	ܘܒܼܰܪ ܫܳܥܬܼܶܗ ܫܰܕܿܪܶܬܼ ܠܘܳܬܼܳܟܼ܂ ܘܰܐܢ̱ܬܿ ܫܰܦܿܺܝܪ ܥܒܼܰܕܿܬܿ ܕܶܐܬܼܰܝܬܿ܂ ܘܗܳܐ ܚܢܰܢ ܟܽܠܰܢ ܩܕܼܳܡܰܝܟܿ܂ ܘܨܳܒܼܶܝܢܰܢ܂ ܕܢܶܫܡܰܥ ܟܽܠ ܡܳܐ ܕܶܐܬܼܦܿܩܶܕܼ ܠܳܟܼ ܡܶܢ ܠܘܳܬܼ ܐܰܠܳܗܳܐ܂
10:34 [ai]	ܦܬܼܰܚ ܕܶܝܢ ܫܶܡܥܽܘܢ ܦܽܘܡܶܗ ܘܶܐܡܰܪ܂ ܒܰܫܪܳܪܳܐ ܐܰܕܼܪܟܼܶܬܼ܃ ܕܰܐܠܳܗܳܐ ܠܳܐ ܗ̱ܘܳܐ ܢܳܣܶܒܼ ܒܰܐܦܿܶܐ̈܂
10:35 [ai]	ܐܶܠܳܐ ܒܟܽܠܗܽܘܢ ܥܰܡ̱ܡܶܐ̈ ܐܰܝܢܳܐ ܕܕܼܳܚܶܠ ܡܶܢܶܗ ܘܦܼܳܠܰܚ ܟܺܐܢܽܘܬܼܳܐ܃ ܡܩܰܒܿܰܠ ܗ̱ܽܘ ܠܘܳܬܼܶܗ܂
10:36 [ai]	ܡܶܠܬܼܳܐ ܓܶܝܪ ܕܫܰܕܿܰܪ ܠܰܒܼܢܰܝ ܐܺܝܣܪܳܝܶܠ܃ ܘܣܰܒܰܪ ܐܶܢܽܘܢ ܫܠܳܡܳܐ ܘܫܰܝܢܳܐ ܒܝܰܕܼ ܝܶܫܽܘܥ ܡܫܺܝܚܳܐ܃ ܗܳܢܰܘ ܡܳܪܝܳܐ ܕܟܽܠ܂
10:37 [ai]	ܘܳܐܦܼ ܐܰܢ̱ܬܿܽܘܢ ܝܳܕܼܥܺܝܢ ܐܢ̱ܬܿܽܘܢ ܒܡܶܠܬܼܳܐ ܕܰܗܘܳܬܼ ܒܟܽܠܳܗ ܺܝܗܽܘܕܼ܃ ܕܰܐܩܦܼܰܬܼ ܡܶܢ ܓܠܺܝܠܳܐ ܒܳܬܼܰܪ ܡܰܥܡܽܘܕܼܺܝܬܼܳܐ ܕܰܐܟܼܪܶܙ ܝܽܘܚܰܢܳܢ܃
10:38 [ai]	ܥܰܠ ܝܶܫܽܘܥ ܕܡܶܢ ܢܳܨܪܰܬܼ܂ ܕܰܐܠܳܗܳܐ ܡܰܫܚܶܗ ܒܪܽܘܚܳܐ ܕܩܽܘܕܼܫܳܐ ܘܰܒܚܰܝܠܳܐ܂ ܘܗܽܘܝܽܘ ܕܡܶܬܼܟܿܪܶܟܼ ܗ̱ܘܳܐ ܘܡܰܐܣܶܐ ܠܗܳܢܽܘܢ ܕܶܐܬܼܢܟܼܺܝܘ ܡܶܢ ܒܺܝܫܳܐ܂ ܡܶܛܽܠ ܕܰܐܠܳܗܳܐ ܗ̱ܘܳܐ ܥܰܡܶܗ܂
10:39 [ai]	ܘܰܚܢܰܢ ܣܳܗܕܿܰܘܗ̱ܝ̈ ܥܰܠ ܟܽܠ ܡܳܐ ܕܰܥܒܼܰܕܼ܃ ܒܟܽܠܳܗ ܐܰܪܥܳܐ ܕܺܝܗܽܘܕܼ ܘܕܼܽܐܘܪܺܫܠܶܡ܂ ܠܶܗ ܠܗܳܢܳܐ ܬܠܰܐܘܽܗ̱ܝ ܺܝܗܽܘܕܼܳܝܶܐ̈ ܥܰܠ ܩܰܝܣܳܐ ܘܩܰܛܠܽܘܗ̱ܝ܂
10:40 [ai]	ܘܠܶܗ ܐܰܩܺܝܡ ܐܰܠܳܗܳܐ ܠܰܬܼܠܳܬܼܳܐ ܝܰܘܡܺܝܢ̈܂ ܘܝܰܗܒܶܗ ܕܢܶܬܼܚܙܶܐ ܥܺܝܢ ܒܰܓܼܠܶܐ܃
10:41 [ai]	ܠܳܐ ܕܶܝܢ ܠܟܼܽܠܶܗ ܥܰܡܳܐ܃ ܐܶܠܳܐ ܠܰܢ ܐܰܝܠܶܝܢ ܕܡܶܢ ܐܰܠܳܗܳܐ ܐܶܬܼܓܒܼܺܝܢ ܕܢܶܗܘܶܐ ܠܶܗ ܣܳܗܕܿܶܐ̈܂ ܕܶܐܟܼܰܠܢ ܥܰܡܶܗ ܘܶܐܫܬܿܺܝܢ ܡܶܢ ܒܳܬܼܰܪ ܩܝܳܡܬܿܶܗ ܕܡܶܢ ܒܶܝܬܼ ܡܺܝܬܼܶܐ̈܂
10:42 [ai]	ܘܦܼܰܩܕܼܰܢ ܕܢܰܟܼܪܶܙ ܘܰܢܣܰܗܶܕܼ ܠܥܰܡܳܐ܃ ܕܗܳܢܰܘ ܕܶܐܬܼܦܿܪܶܫ ܡܶܢ ܐܰܠܳܗܳܐ ܕܰܝܳܢܳܐ ܕܚܰܝ̈ܶܐ ܘܰܕܼܡܺܝܬܼܶܐ̈܂
10:43 [ai]	ܘܰܥܠܰܘܗ̱ܝ ܐܰܣܗܶܕܼܘ ܟܽܠܗܽܘܢ ܢܒܼܺܝܶܐ̈܃ ܕܟܽܠܡܰܢ ܕܰܡܗܰܝܡܶܢ ܒܰܫܡܶܗ܃ ܢܩܰܒܿܶܠ ܫܽܘܒܼܩܳܢ ܚܛܳܗܶܐ̈܀
10:44 [ai]	ܘܟܼܰܕܼ ܗܽܘ ܫܶܡܥܽܘܢ ܡܡܰܠܶܠ ܗ̱ܘܳܐ ܗܳܠܶܝܢ ܡܶܠܶܐ̈܃ ܐܰܓܿܢܰܬܼ ܪܽܘܚܳܐ ܕܩܽܘܕܼܫܳܐ ܥܰܠ ܟܽܠܗܽܘܢ ܕܫܳܡܥܺܝܢ ܗ̱ܘܰܘ ܡܶܠܬܼܳܐ܂
10:45 [ai]	ܘܰܬܼܡܰܗܘ ܘܰܬܼܗܰܪܘ ܐܰܚܶܐ̈ ܓܙܺܝܪ̈ܶܐ ܗܳܢܽܘܢ ܕܶܐܬܼܰܘ ܥܰܡܶܗ܃ ܕܳܐܦܼ ܥܰܠ ܥܰܡ̱ܡܶܐ̈ ܡܰܘܗܰܒܼܬܳܐ ܕܪܽܘܚܳܐ ܕܩܽܘܕܼܫܳܐ ܐܶܫܬܿܰܦܿܥܰܬܼ܂
10:46 [ai]	ܫܳܡܥܺܝܢ ܗ̱ܘܰܘ ܠܗܽܘܢ ܓܶܝܪ܂ ܟܰܕܼ ܡܡܰܠܠܺܝܢ ܒܠܶܫܳܢ ܠܶܫܳܢ܃ ܘܡܰܘܪܒܼܺܝܢ ܗ̱ܘܰܘ ܠܰܐܠܳܗܳܐ܂ ܘܶܐܡܰܪ ܗ̱ܘܳܐ ܫܶܡܥܽܘܢ܂
10:47 [ai]	ܕܰܠܡܳܐ ܡܰܝܳܐ̈ ܡܶܫܟܿܰܚ ܐ̱ܢܳܫ ܟܳܠܶܐ܃ ܕܠܳܐ ܢܶܥܡܕܼܽܘܢ ܗܳܢܽܘܢ܃ ܕܗܳܐ ܩܰܒܿܶܠ ܘܪܽܘܚܳܐ ܕܩܽܘܕܼܫܳܐ ܐܰܝܟܼ ܡܳܐ ܕܰܚܢܰܢ܂
10:48 [ai]	ܗܳܝܕܶܝܢ ܦܩܰܕܼ ܠܗܽܘܢ܃ ܕܢܶܥܡܕܼܽܘܢ ܒܰܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂ ܘܰܒܥܰܘ ܡܶܢܶܗ ܐܰܝܟܼ ܕܰܢܩܰܘܶܐ ܠܘܳܬܼܗܽܘܢ ܝܰܘܡܳܬܼܳܐ̈܀

next chapter