The Comprehensive Aramaic Lexicon

11:01 [ai]	ܘܶܐܫܬܿܰܡܥܰܬܼ ܗ̱ܘܳܬܼ ܠܰܫܠܺܝܚܶܐ̈ ܘܠܰܐܚܶܐ̈ ܕܒܺܝܗܽܘܕܼ܃ ܕܳܐܦܼ ܥܰܡ̱ܡܶܐ̈ ܩܰܒܿܶܠܘ ܡܶܠܬܼܳܐ ܕܰܐܠܳܗܳܐ܀
11:02 [ai]	ܘܟܼܰܕܼ ܣܠܶܩ ܫܶܡܥܽܘܢ ܠܽܐܘܪܺܫܠܶܡ܃ ܕܳܝܢܺܝܢ ܗ̱ܘܰܘ ܥܰܡܶܗ ܗܳܢܽܘܢ ܕܡܶܢ ܓܙܽܘܪܬܳܐ܂
11:03 [ai]	ܟܰܕܼ ܐܳܡܪܺܝܢ܃ ܕܰܠܘܳܬܼ ܐ̱ܢܳܫܳܐ ܥܽܘܪ̈ܠܶܐ ܥܰܠ ܘܰܠܥܶܣ ܥܰܡܗܽܘܢ܂
11:04 [ai]	ܘܰܐܩܶܦܼ ܗ̱ܘܳܐ ܫܶܡܥܽܘܢ ܒܳܬܼܰܪ ܒܳܬܼܰܪ ܠܡܺܐܡܰܪ ܠܗܽܘܢ܃
11:05 [ai]	ܕܟܰܕܼ ܡܨܰܠܶܐ ܗ̱ܘܺܝܬܼ ܒܝܳܘܦܿܺܐ܃ ܚܙܺܝܬܼ ܒܚܶܙܘܳܐ܃ ܕܰܢܚܶܬܼ ܗ̱ܘܳܐ ܡܳܐܢܳܐ ܚܰܕܼ܃ ܐܰܝܢܳܐ ܕܕܼܳܡܶܐ ܗ̱ܘܳܐ ܠܟܼܶܬܿܳܢܳܐ܂ ܘܰܐܣܺܝܪ ܗ̱ܘܳܐ ܒܰܐܪ̈ܒܿܰܥ ܩܰܪ̈ܢܳܬܼܶܗ܂ ܘܫܳܐܶܒܼ ܗ̱ܘܳܐ ܡܶܢ ܫܡܰܝܳܐ܂ ܘܶܐܬܼܳܐ ܥܕܼܰܡܳܐ ܠܘܳܬܼܝ܂
11:06 [ai]	ܘܚܳܪܶܬܼ ܒܶܗ܂ ܘܚܳܙܶܐ ܗ̱ܘܺܝܬܼ ܕܺܐܝܬܼ ܒܶܗ ܚܰܝܘܳܬܼܳܐ̈ ܕܿܰܐܪ̈ܒܿܥܳܬܼ ܪ̈ܶܓܼܠܰܝܗܶܝܢ܂ ܘܪܰܚܫܳܐ ܕܰܐܪܥܳܐ܂ ܘܳܐܦܼ ܦܳܪܰܚܬܼܳܐ ܕܰܫܡܰܝܳܐ܂
11:07 [ai]	ܘܫܶܡܥܶܬܼ ܗ̱ܘܺܝܬܼ ܩܳܠܳܐ ܕܳܐܡܰܪ ܗ̱ܘܳܐ ܠܺܝ܂ ܫܶܡܥܽܘܢ܃ ܩܽܘܡ ܟܽܘܣ ܘܰܐܟܼܽܘܠ܂
11:08 [ai]	ܘܶܐܡܪܶܬܼ܂ ܚܳܣ ܡܳܪܝ܃ ܕܡܶܡܬܼܽܘܡ ܠܳܐ ܥܰܠ ܠܦܼܽܘܡܝ ܕܰܛܡܰܐ ܘܕܼܰܡܣܰܝܰܒܼ܂
11:09 [ai]	ܘܬܼܽܘܒܼ ܩܳܠܳܐ ܐܶܡܰܪ ܠܺܝ ܡܶܢ ܫܡܰܝܳܐ܃ ܕܿܡܶܕܶܡ ܕܰܐܠܳܗܳܐ ܕܰܟܿܺܝ܃ ܐܰܢ̱ܬܿ ܠܳܐ ܬܣܰܝܶܒܼ܂
11:10 [ai]	ܗܳܕܼܶܐ ܗܘܳܬܼ ܬܠܳܬܼ ܙܰܒܼܢܺܝܢ̈܃ ܘܶܐܣܬܿܰܠܰܩ ܠܶܗ ܟܽܠܡܶܕܶܡ ܠܰܫܡܰܝܳܐ܂
11:11 [ai]	ܘܒܼܳܗ ܒܫܳܥܬܼܳܐ܃ ܬܠܳܬܼܳܐ ܓܿܰܒܼܪ̈ܺܝܢ ܕܶܐܫܬܿܰܕܿܰܪܘ ܠܘܳܬܼܝ ܡܶܢ ܩܳܘܪܢܺܠܺܝܳܘܣ ܡܶܢ ܩܶܣܰܪܺܝܰܐ܃ ܐܶܬܼܰܘ ܘܩܳܡܘ ܥܰܠ ܬܰܪܥܳܐ ܕܕܼܳܪܬܳܐ܂ ܕܰܫܪܶܐ ܗ̱ܘܺܝܬܼ ܒܿܳܗ܂
11:12 [ai]	ܘܶܐܡܰܪ ܠܺܝ ܪܽܘܚܳܐ܂ ܕܙܶܠ ܥܰܡܗܽܘܢ ܕܠܳܐ ܦܽܘܠܳܓܼܳܐ܂ ܘܶܐܬܼܰܘ ܥܰܡܝ ܐܳܦܼ ܗܳܠܶܝܢ ܫܬܳܐ ܐܰܚܺܝܢ̈܂ ܘܥܰܠܢ ܠܒܼܰܝܬܿܶܗ ܕܓܰܒܼܪܳܐ܂
11:13 [ai]	ܘܶܐܫܬܿܰܥܺܝ ܠܰܢ܃ ܐܰܝܟܿܰܢܳܐ ܚܙܳܐ ܒܒܼܰܝܬܿܶܗ ܡܰܠܰܐܟܼܳܐ܃ ܕܩܳܡ ܘܶܐܡܰܪ ܠܶܗ܂ ܕܫܰܕܿܰܪ ܠܝܳܘܦܿܺܐ ܡܕܼܺܝܢ̱ܬܳܐ܃ ܘܰܐܝܬܳܐ ܠܫܶܡܥܽܘܢ ܕܡܶܬܼܩܪܶܐ ܟܺܐܦܼܳܐ܂
11:14 [ai]	ܘܗܽܘ ܢܡܰܠܶܠ ܥܰܡܳܟܼ ܡܶܠܶܐ̈ ܕܰܒܼܗܶܝܢ ܬܺܚܶܐ܂ ܐܰܢ̱ܬܿ ܘܟܼܽܠܶܗ ܒܰܝܬܿܳܟܼ܂
11:15 [ai]	ܘܟܼܰܕܼ ܐܰܩܦܼܶܬܼ ܗ̱ܘܺܝܬܼ ܬܰܡܳܢ ܠܰܡܡܰܠܳܠܽܘ܃ ܐܰܓܿܢܰܬܼ ܪܽܘܚܳܐ ܕܩܽܘܕܼܫܳܐ ܥܠܰܝܗܽܘܢ܂ ܐܰܝܟܼ ܡܳܐ ܕܰܥܠܰܝܢ ܡܶܢ ܩܕܼܺܝܡ܂
11:16 [ai]	ܘܶܐܬܿܕܿܰܟܼܪܶܬܼ ܡܶܠܬܼܶܗ ܕܡܳܪܰܢ ܕܶܐܡܰܪ ܗ̱ܘܳܐ܃ ܕܝܽܘܚܰܢܳܢ ܐܰܥܡܶܕܼ ܒܡܰܝܳܐ̈܃ ܐܰܢ̱ܬܿܽܘܢ ܕܶܝܢ ܬܶܥܡܕܼܽܘܢ ܒܪܽܘܚܳܐ ܕܩܽܘܕܼܫܳܐ܂
11:17 [ai]	ܐܶܢ ܗܳܟܼܺܝܠ ܐܰܠܳܗܳܐ ܫܰܘܝܳܐܺܝܬܼ ܝܰܗܒܿܳܗ ܡܰܘܗܰܒܼܬܳܐ ܠܥܰܡ̱ܡܶܐ̈܃ ܐܰܝܠܶܝܢ ܕܗܰܝܡܶܢܘ ܒܡܳܪܰܢ ܝܶܫܽܘܥ ܡܫܺܝܚܳܐ ܐܰܝܟܼ ܕܳܐܦܼ ܠܰܢ܃ ܐܶܢܳܐ ܡܰܢ ܗ̱ܘܺܝܬܼ ܕܶܐܣܦܿܰܩ ܗ̱ܘܺܝܬܼ ܕܶܐܟܼܠܶܐ ܠܰܐܠܳܗܳܐ܂
11:18 [ai]	ܘܟܼܰܕܼ ܗܳܠܶܝܢ ܡܶܠܶܐ̈ ܫܡܰܥܘ܃ ܫܠܺܝܘ ܠܗܽܘܢ ܘܫܰܒܿܰܚܘ ܠܰܐܠܳܗܳܐ܂ ܘܳܐܡܪܺܝܢ ܗ̱ܘܰܘ܃ ܕܰܟܼܒܼܰܪ ܐܳܦܼ ܠܥܰܡ̱ܡܶܐ̈ ܐܰܠܳܗܳܐ ܝܰܗ̱ܒܼ ܬܝܳܒܿܽܘܬܼܳܐ ܠܚܰܝ̈ܶܐ܀
11:19 [ai]	ܗܳܢܽܘܢ ܕܶܝܢ ܕܿܶܐܬܼܒܰܕܿܰܪܘ ܗ̱ܘܰܘ ܡܶܢ ܐܽܘܠܨܳܢܳܐ ܕܰܗܘܳܐ ܗ̱ܘܳܐ ܥܰܠ ܐܶܣܛܶܦܼܰܢܳܘܣ܃ ܡܰܛܺܝܘ ܗ̱ܘܰܘ ܥܕܼܰܡܳܐ ܠܦܼܽܘܢܺܝܩܺܐ܂ ܘܳܐܦܼ ܠܰܐܬܼܪܳܐ ܕܩܽܘܦܿܪܳܘܣ܂ ܘܠܰܐܢܛܺܝܳܟܼܺܝܰܐ܃ ܟܰܕܼ ܥܰܡ ܐ̱ܢܳܫ ܠܳܐ ܡܡܰܠܠܺܝܢ ܗ̱ܘܰܘ ܡܶܠܬܼܳܐ܃ ܐܶܠܳܐ ܒܰܠܚܽܘܕܼ ܥܰܡ ܺܝܗܽܘܕܼܳܝܶܐ̈܂
11:20 [ai]	ܐܺܝܬܼ ܗ̱ܘܰܘ ܕܶܝܢ ܐ̱ܢܳܫܳܐ ܡܶܢܗܽܘܢ ܡܶܢ ܩܽܘܦܿܪܳܘܣ ܘܡܶܢ ܩܽܘܪܺܝܢܺܐ܃ ܗܳܠܶܝܢ ܥܰܠܘ ܗ̱ܘܰܘ ܠܰܐܢܛܺܝܳܘܟܼܺܝ܂ ܘܰܡܡܰܠܠܺܝܢ ܗ̱ܘܰܘ ܥܰܡ ܝܰܘܢܳܝܶܐ̈܂ ܘܰܡܣܰܒܿܪܺܝܢ ܗ̱ܘܰܘ ܥܰܠ ܡܳܪܰܢ ܝܶܫܽܘܥ܂
11:21 [ai]	ܘܺܐܝܬܼ ܗ̱ܘܳܬܼ ܥܰܡܗܽܘܢ ܐܺܝܕܼܶܗ ܕܡܳܪܝܳܐ܂ ܘܣܰܓܿܺܝܶܐܐ̈ ܗܰܝܡܶܢܘ ܘܶܐܬܼܦܿܢܺܝܘ ܠܘܳܬܼ ܡܳܪܝܳܐ ܿ܀ܿ܀ܿ
11:22 [ai]	ܘܶܐܫܬܿܰܡܥܰܬܼ ܗ̱ܘܳܬܼ ܗܺܝ ܗܳܕܼܶܐ ܠܶܐܕܼܢܰܝܗܽܘܢ̈ ܕܿܰܒܼܢܰܝ ܥܺܕ̱ܿܬܳܐ ܕܒܽܐܘܪܺܫܠܶܡ܃ ܘܫܰܕܿܰܪܘ ܠܒܼܰܪܢܰܒܼܰܐ ܠܰܐܢܛܺܝܳܘܟܼܺܝ܂
11:23 [ai]	ܘܟܼܰܕܼ ܐܶܬܼܳܐ ܠܬܼܰܡܳܢ ܘܰܚܙܳܐ ܛܰܝܒܿܽܘܬܼܶܗ ܕܰܐܠܳܗܳܐ܃ ܚܕܼܺܝ ܘܒܼܳܥܶܐ ܗ̱ܘܳܐ ܡܶܢܗܽܘܢ܃ ܕܰܒܼܟܼܽܠܶܗ ܠܶܒܗܽܘܢ ܢܶܗܘܽܘܢ ܢܰܩܺܝܦܼܺܝܢ ܠܡܳܪܰܢ܃
11:24 [ai]	ܡܶܛܽܠ ܕܓܰܒܼܪܳܐ ܗ̱ܘܳܐ ܛܳܒܼܳܐ܃ ܘܰܡܫܰܡܠܰܝ ܗ̱ܘܳܐ ܒܪܽܘܚܳܐ ܕܩܽܘܕܼܫܳܐ ܘܰܒܗܰܝܡܳܢܽܘܬܼܳܐ܂ ܘܶܐܬܿܬܰܘܣܰܦܼ ܗ̱ܘܳܐ ܥܰܡܳܐ ܣܰܓܿܺܝܳܐܐ ܠܡܳܪܰܢ܂
11:25 [ai]	ܘܗܽܘ ܢܦܼܰܩ ܗ̱ܘܳܐ ܠܛܰܪܣܳܘܣ ܠܡܶܒܼܥܳܐ ܠܫܳܐܘܳܠ܂
11:26 [ai]	ܘܟܼܰܕܼ ܐܶܫܟܿܚܶܗ܃ ܐܰܝܬܿܝܶܗ ܥܰܡܶܗ ܠܰܐܢܛܺܝܳܟܼܺܝܰܐ܂ ܘܫܰܢ̱ܬܳܐ ܟܽܠܳܗ ܐܰܟܼܚܕܼܳܐ ܟܢܺܝܫܺܝܢ ܗ̱ܘܰܘ ܒܥܺܕ̱ܿܬܳܐ܂ ܘܰܐܠܶܦܼܘ ܥܰܡܳܐ ܣܰܓܿܺܝܳܐܐ܂ ܡܶܢ ܗܳܝܕܶܝܢ ܩܰܕܼܡܳܝܰܬܼ ܐܶܬܼܩܪܺܝܘ ܒܰܐܢܛܺܝܳܘܟܼܺܝ ܬܰܠܡܺܝܕܼܶܐ̈ ܟܿܪ̈ܺܣܛܝܳܢܶܐ܀
11:27 [ai]	ܘܰܒܝܰܘܡܳܬܼܳܐ̈ ܗܳܢܽܘܢ܃ ܐܶܬܼܰܘ ܡܶܢ ܐܽܘܪܺܫܠܶܡ ܠܬܼܰܡܳܢ ܢܒܼܺܝܶܐ̈܂
11:28 [ai]	ܘܩܳܡ ܚܰܕܼ ܡܶܢܗܽܘܢ ܕܰܫܡܶܗ ܗܘܳܐ ܐܰܓܼܰܒܼܳܘܣ܂ ܘܰܐܘܕܿܰܥ ܐܶܢܽܘܢ ܒܪܽܘܚ܃ ܕܟܰܦܼܢܳܐ ܪܰܒܿܳܐ ܗܳܘܶܐ ܒܟܽܠܳܗ ܐܰܪܥܳܐ܂ ܘܰܗܘܳܐ ܟܰܦܼܢܳܐ ܗܳܢܳܐ܂ ܒܝܰܘܡܰܝ̈ ܩܠܰܘܕܼܺܝܳܘܣ ܩܶܣܰܪ܂
11:29 [ai]	ܒܪܰܡ ܕܶܝܢ ܬܰܠܡܺܝܕܼܶܐ̈ ܐܰܝܟܼ ܡܳܐ ܕܺܐܝܬܼ ܗ̱ܘܳܐ ܠܐ̱ܢܳܫ ܐ̱ܢܳܫ ܡܶܢܗܽܘܢ܃ ܦܪܰܫܘ ܕܰܢܫܰܕܿܪܽܘܢ ܠܬܼܶܫܡܶܫܬܳܐ ܕܰܐܚܶܐ̈ ܐܰܝܠܶܝܢ ܕܥܳܡܪܺܝܢ ܒܺܝܗܽܘܕܼ܂
11:30 [ai]	ܘܫܰܕܿܰܪܘ ܒܝܰܕܼ ܒܰܪܢܰܒܼܰܐ ܘܫܳܐܘܳܠ ܠܩܰܫܺܝܫܶܐ̈ ܕܬܰܡܳܢ܀

next chapter