The Comprehensive Aramaic Lexicon

12:01 [ai]	ܒܗܰܘ ܕܶܝܢ ܙܰܒܼܢܳܐ܃ ܐܰܪܡܺܝ ܗ̱ܘܳܐ ܐܺܝܕܼܰܝܳܐ̈ ܥܰܠ ܐ̱ܢܳܫܺܝܢ̈ ܕܰܒܼܥܺܕ̱ܿܬܳܐ܃ ܐܰܝܟܼ ܕܢܰܒܼܶܐܫ ܠܗܽܘܢ ܗܶܪܳܘܕܼܶܣ ܡܰܠܟܿܳܐ܃ ܗܰܘ ܕܡܶܬܼܟܿܰܢܶܐ ܗ̱ܘܳܐ ܐܰܓܼܪܺܦܿܰܘܣ܂
12:02 [ai]	ܘܰܩܛܰܠ ܒܣܰܝܦܿܳܐ ܠܝܰܥܩܽܘܒܼ ܐܰܚܽܘܗ̱ܝ ܕܝܽܘܚܰܢܳܢ܂
12:03 [ai]	ܘܟܼܰܕܼ ܚܙܳܐ ܕܫܶܦܼܪܰܬܼ ܗܳܕܼܶܐ ܠܺܝܗܽܘܕܼܳܝܶܐ̈܃ ܐܰܘܣܶܦܼ ܗ̱ܘܳܐ ܠܡܶܐܚܰܕܼ ܐܳܦܼ ܠܫܶܡܥܽܘܢ ܟܺܐܦܼܳܐ܂ ܘܺܐܝܬܼܰܝܗܽܘܢ ܗ̱ܘܰܘ ܝܰܘܡܳܬܼܳܐ̈ ܕܿܦܼܰܛܺܝܪ̈ܶܐ܂
12:04 [ai]	ܘܰܐܚܕܿܶܗ ܘܰܐܪܡܝܶܗ ܒܶܝܬܼ ܐܰܣܺܝܪ̈ܶܐ܂ ܘܰܐܫܠܶܡ ܠܶܗ ܫܬܼܬܼܰܥܣܰܪ ܣܛܪ̈ܰܛܳܘܛܺܝܢ ܕܢܶܛܪܽܘܢܶܗ܃ ܕܡܶܢ ܒܳܬܼܰܪ ܦܶܨܚܳܐ ܢܰܫܠܡܺܝܘܗ̱ܝ ܠܥܰܡܳܐ ܕܺܝܗܽܘܕܼܳܝܶܐ̈܂
12:05 [ai]	ܘܟܼܰܕܼ ܗܽܘ ܫܶܡܥܽܘܢ ܡܶܬܼܢܛܰܪ ܗ̱ܘܳܐ ܒܶܝܬܼ ܐܰܣܺܝܪ̈ܶܐ܃ ܨܠܽܘܬܼܳܐ ܐܰܡܺܝܢܬܳܐ ܡܶܬܼܩܰܪܒܼܳܐ ܗ̱ܘܳܬܼ ܡܶܢ ܥܺܕ̱ܿܬܳܐ ܚܠܳܦܼܰܘܗ̱ܝ ܠܰܐܠܳܗܳܐ܂
12:06 [ai]	ܘܒܼܶܗ ܒܗܰܘ ܠܺܠܝܳܐ ܕܰܠܨܰܦܼܪܳܐ ܥܬܼܺܝܕܼ ܗ̱ܘܳܐ ܕܢܰܫܠܡܺܝܘܗ̱ܝ܃ ܟܰܕܼ ܕܡܶܟܼ ܗ̱ܘܳܐ ܫܶܡܥܽܘܢ ܒܶܝܬܼ ܬܿܪ̈ܶܝܢ ܐܶܣܛܪ̈ܰܛܺܝܳܘܛܺܝܢ܃ ܘܰܐܣܺܝܪ ܗ̱ܘܳܐ ܒܬܰܪ̈ܬܿܶܝܢ ܫܺܫܠܳܢ̈܃ ܘܰܐ̱ܚܪ̈ܳܢܶܐ ܢܳܛܪܺܝܢ ܗ̱ܘܰܘ ܬܿܰܪ̈ܥܶܐ ܕܒܶܝܬܼ ܐܰܣܺܝܪ̈ܶܐ܃
12:07 [ai]	ܡܰܠܰܐܟܼܳܐ ܕܡܳܪܝܳܐ ܩܳܡ ܠܥܶܠ ܡܶܢܶܗ܂ ܘܢܽܘܗܪܳܐ ܐܰܙܠܶܓܼ ܒܟܽܠܶܗ ܒܰܝܬܳܐ܂ ܘܕܼܰܩܪܶܗ ܒܿܓܼܰܒܶܗ ܘܰܐܩܺܝܡܶܗ܂ ܘܶܐܡܰܪ ܠܶܗ܂ ܩܽܘܡ ܥܓܼܰܠ܂ ܘܰܢܦܼܰܠ ܫܺܫܠܳܬܼܳܐ̈ ܡܶܢ ܐܺܝܕܼܰܘܗ̱ܝ̈܂
12:08 [ai]	ܘܶܐܡܰܪ ܠܶܗ ܡܰܠܰܐܟܼܳܐ܂ ܐܰܣܽܘܪ ܚܰܨܰܝܟܿ̈ ܘܣܰܐܢ ܛܶܠܳܪ̈ܰܝܟܿ܂ ܘܰܥܒܼܰܕܼ ܗܳܟܼܰܢܳܐ܂ ܘܬܼܽܘܒܼ ܠܶܗ܂ ܐܶܬܼܥܰܛ̱ܦܼ ܬܰܟܼܣܺܝܬܼܳܟܼ ܘܬܼܳܐ ܒܳܬܼܰܪܝ܂
12:09 [ai]	ܘܰܢܦܼܰܩ ܘܳܐܙܶܠ ܗ̱ܘܳܐ ܒܳܬܼܪܶܗ܃ ܟܰܕܼ ܠܳܐ ܝܳܕܼܰܥ ܗ̱ܘܳܐ ܕܫܰܪܺܝܪܳܐ ܗ̱ܘܳܬܼ ܗܳܝ܂ ܕܗܳܘܝܳܐ ܗ̱ܘܳܬܼ ܒܝܰܕܼ ܡܰܠܰܐܟܼܳܐ܂ ܣܳܒܼܰܪ ܗ̱ܘܳܐ ܓܶܝܪ ܕܚܶܙܘܳܐ ܚܳܙܶܐ ܗ̱ܘܳܐ܂
12:10 [ai]	ܘܟܼܰܕܼ ܥܒܼܰܪܘ ܡܰܛܰܪܬܼܳܐ ܩܰܕܼܡܳܝܬܳܐ ܘܰܕܼܬܼܰܪ̈ܬܿܶܝܢ܃ ܐܶܬܼܰܘ ܥܕܼܰܡܳܐ ܠܬܼܰܪܥܳܐ ܕܦܰܪܙܠܳܐ܂ ܘܶܐܬܼܦܬܼܰܚ ܠܗܽܘܢ ܡܶܢ ܨܒܼܽܘܬܼ ܢܰܦܼܫܶܗ܂ ܘܟܼܰܕܼ ܢܦܼܰܩܘ ܘܰܥܒܼܰܪܘ ܫܽܘܩܳܐ ܚܰܕܼ܃ ܦܪܰܩ ܡܶܢ ܠܘܳܬܼܶܗ ܡܰܠܰܐܟܼܳܐ܂
12:11 [ai]	ܗܳܝܕܶܝܢ ܐܶܫܬܰܘܕܿܰܥ ܫܶܡܥܽܘܢ ܘܶܐܡܰܪ܂ ܗܳܫܳܐ ܝܶܕܼܥܶܬܼ ܒܩܽܘܫܬܳܐ܂ ܕܡܳܪܝܳܐ ܫܰܕܿܰܪ ܡܰܠܰܐܟܼܶܗ ܘܦܼܰܠܛܰܢܝ ܡܶܢ ܐܺܝܕܼܶܗ ܕܗܶܪܳܘܕܼܶܣ ܡܰܠܟܿܳܐ܃ ܘܡܶܢ ܡܶܕܶܡ ܕܡܶܬܼܚܰܫܒܼܺܝܢ ܗ̱ܘܰܘ ܥܠܰܝ ܺܝܗܽܘܕܼܳܝܶܐ̈܂
12:12 [ai]	ܘܟܼܰܕܼ ܐܶܣܬܿܰܟܿܰܠ܃ ܐܶܬܼܳܐ ܠܶܗ ܠܒܼܰܝܬܳܐ ܕܡܰܪܝܰܡ ܐܶܡܶܗ ܕܝܽܘܚܰܢܳܢ܂ ܗܰܘ ܕܶܐܬܼܟܿܰܢܺܝ ܡܰܪܩܳܘܣ܃ ܡܶܛܽܠ ܕܰܐܚܶܐ̈ ܣܰܓܿܺܝܶܐܐ̈ ܬܰܡܳܢ ܟܢܺܝܫܺܝܢ ܗ̱ܘܰܘ܂ ܘܰܡܨܰܠܶܝܢ܂
12:13 [ai]	ܘܰܢܩܰܫ ܒܬܰܪܥܳܐ ܕܕܼܳܪܬܳܐ܃ ܘܢܶܦܼܩܰܬܼ ܕܬܶܥܢܶܝܘܗ̱ܝ ܛܠܺܝܬܼܳܐ ܕܰܫܡܳܗ ܪܳܘܕܼܺܐ܂
12:14 [ai]	ܘܶܐܫܬܰܘܕܿܥܰܬܼ ܩܳܠܶܗ ܕܫܶܡܥܽܘܢ܃ ܘܰܒܚܰܕܼܽܘܬܼܳܗ ܠܳܐ ܦܶܬܼܚܰܬܼ ܠܶܗ ܬܰܪܥܳܐ܃ ܐܶܠܳܐ ܗܶܦܼܟܿܰܬܼ ܒܪܶܗܛܳܐ ܘܳܐܡܪܳܐ ܠܗܽܘܢ܂ ܫܶܡܥܽܘܢ ܗܳܐ ܩܳܐܶܡ ܥܰܠ ܬܰܪܥܳܐ ܕܕܼܳܪܬܳܐ܂
12:15 [ai]	ܐܳܡܪܺܝܢ ܠܳܗ܂ ܡܙܳܥ ܙܳܥܬܿܝ ܠܶܟܼܝ܂ ܘܗܺܝ ܡܶܬܼܚܰܪܝܳܐ ܗ̱ܘܳܬܼ܃ ܕܗܳܕܼܶܐ ܗܳܟܼܰܢܳܐ ܗ̱ܝ܂ ܐܳܡܪܺܝܢ ܠܳܗ܂ ܟܒܼܰܪ ܡܰܠܰܐܟܼܶܗ ܗ̱ܽܘ܂
12:16 [ai]	ܘܫܶܡܥܽܘܢ ܢܳܩܶܫ ܗ̱ܘܳܐ ܒܬܰܪܥܳܐ܂ ܘܰܢܦܼܰܩܘ ܚܙܰܐܘܽܗ̱ܝ ܘܰܬܼܡܰܗܘ ܠܗܽܘܢ܂
12:17 [ai]	ܘܰܡܢܺܝܦܼ ܗ̱ܘܳܐ ܠܗܽܘܢ ܐܺܝܕܼܶܗ܃ ܐܰܝܟܼ ܕܢܶܫܬܿܩܽܘܢ ܠܗܽܘܢ܂ ܘܥܰܠ ܘܶܐܫܬܿܰܥܺܝ ܠܗܽܘܢ܃ ܐܰܝܟܿܰܢܳܐ ܡܳܪܝܳܐ ܐܰܦܿܩܶܗ ܡܶܢ ܒܶܝܬܼ ܐܰܣܺܝܪ̈ܶܐ܂ ܘܶܐܡܰܪ ܠܗܽܘܢ܂ ܐܶܫܬܿܰܥܰܘ ܗܳܠܶܝܢ ܠܝܰܥܩܽܘܒܼ ܘܠܰܐܚܰܝܢ̈܂ ܘܰܢܦܼܰܩ ܐܶܙܰܠ ܠܶܗ ܠܰܐܬܼܰܪ ܐ̱ܚܪܺܝܢ܀
12:18 [ai]	ܘܟܼܰܕܼ ܗܘܳܐ ܨܰܦܼܪܳܐ܃ ܗܘܳܐ ܗ̱ܘܳܐ ܪܰܘܒܿܳܐ ܣܰܓܿܺܝܳܐܐ ܒܶܝܬܼ ܐܶܣܛܪ̈ܰܛܺܝܳܘܛܶܐ܃ ܥܰܠ ܫܶܡܥܽܘܢ ܕܡܳܢܳܐ ܗܘܳܐ ܠܶܗ܂
12:19 [ai]	ܗܶܪܳܘܕܼܶܣ ܕܶܝܢ ܟܰܕܼ ܒܥܳܝܗ̱ܝ ܘܠܳܐ ܐܶܫܟܿܚܶܗ܃ ܕܳܢ ܐܶܢܽܘܢ ܠܢܳܛܽܘܪ̈ܶܐ ܘܰܦܼܩܰܕܼ ܕܰܢܡܽܘܬܼܽܘܢ܂ ܘܰܢܦܼܰܩ ܠܶܗ ܡܶܢ ܺܝܗܽܘܕܼ܃ ܘܺܐܝܬܼܰܘܗ̱ܝ ܗ̱ܘܳܐ ܒܩܶܣܰܪܺܝܰܐ܂
12:20 [ai]	ܘܡܶܛܽܠ ܕܰܪܓܼܺܝܙ ܗ̱ܘܳܐ ܥܰܠ ܨܽܘܪ̈ܳܝܶܐ ܘܥܰܠ ܨܰܝܕܳܢܳܝܶܐ̈܃ ܐܶܬܼܟܿܰܢܰܫܘ ܘܶܐܬܼܰܘ ܠܘܳܬܼܶܗ ܐܰܟܼܚܕܼܳܐ ܘܰܐܦܿܺܝܣܘ ܠܰܒܼܠܰܣܛܳܘܣ ܩܰܝܛܽܘܢܩܳܢܶܗ ܕܡܰܠܟܿܳܐ܂ ܘܫܶܐܠܘ ܡܶܢܶܗ܃ ܕܢܶܗܘܶܐ ܠܗܽܘܢ ܫܰܝܢܳܐ܃ ܡܶܛܽܠ ܕܦܽܘܪܢܳܣܳܐ ܕܰܐܬܼܪܗܽܘܢ ܡܶܢ ܡܰܠܟܿܽܘܬܼܶܗ ܗ̱ܘܳܐ ܕܗܶܪܳܘܕܼܶܣ܂
12:21 [ai]	ܒܝܰܘܡܳܐ ܕܶܝܢ ܺܝܕܼܺܝܥܳܐ܃ ܠܒܼܶܫ ܗ̱ܘܳܐ ܗܶܪܳܘܕܼܶܣ ܠܒܼܽܘܫܳܐ ܕܡܰܠܟܿܽܘܬܼܳܐ ܘܺܝܬܼܶܒܼ ܥܰܠ ܒܺܝܡ܂ ܘܰܡܡܰܠܶܠ ܗ̱ܘܳܐ ܥܰܡ ܟܶܢܫܳܐ܂
12:22 [ai]	ܥܰܡܳܐ ܕܶܝܢ ܟܽܠܶܗ ܩܳܥܶܐ ܗ̱ܘܳܐ ܘܳܐܡܰܪ܂ ܗܳܠܶܝܢ ܒܢܳܬܼ ܩܳܠܶܐ̈ ܕܰܐܠܳܗܳܐ ܐܶܢܶܝܢ̈܂ ܘܠܳܐ ܗ̱ܘܰܝ̈ ܕܿܰܒܼܢܰܝܢܳܫܳܐ܂
12:23 [ai]	ܘܰܚܠܳܦܼ ܕܠܳܐ ܝܰܗ̱ܒܼ ܬܿܶܫܒܿܽܘܚܬܳܐ ܠܰܐܠܳܗܳܐ܃ ܒܿܳܗ ܒܫܳܥܬܼܳܐ ܡܚܳܝܗ̱ܝ ܡܰܠܰܐܟܼܶܗ ܕܡܳܪܝܳܐ܃ ܘܰܪܦܼܰܬܼ ܒܬܰܘܠܥܶܐ̈ ܘܡܺܝܬܼ܂
12:24 [ai]	ܘܰܣܒܼܰܪܬܼܳܐ ܕܰܐܠܳܗܳܐ ܡܶܬܼܟܰܪܙܳܐ ܗ̱ܘܳܬܼ ܘܪܳܒܼܝܳܐ܀
12:25 [ai]	ܒܰܪܢܰܒܼܰܐ ܕܶܝܢ ܘܫܳܐܘܳܠ܂ ܦܢܰܘ ܡܶܢ ܐܽܘܪܺܫܠܶܡ ܠܰܐܢܛܺܝܳܘܟܼܺܝ܃ ܡܶܢ ܒܳܬܼܰܪ ܕܫܰܠܶܡܘ ܬܶܫܡܶܫܬܿܗܽܘܢ܂ ܘܰܕܼܒܼܰܪܘ ܥܰܡܗܽܘܢ ܠܝܽܘܚܰܢܳܢ܂ ܗܰܘ ܕܶܐܬܼܟܿܰܢܺܝ ܡܰܪܩܳܘܣ܂

next chapter