The Comprehensive Aramaic Lexicon

13:01 [ai]	ܐܺܝܬܼ ܗ̱ܘܳܐ ܕܶܝܢ ܒܥܺܕ̱ܿܬܳܐ ܕܰܐܢܛܺܝܳܟܼܺܝܰܐ܃ ܢܒܼܺܝܶܐ̈ ܘܡܰܠܦܼܳܢܶܐ̈܂ ܒܰܪܢܰܒܼܰܐ܂ ܘܫܶܡܥܽܘܢ ܕܡܶܬܼܩܪܶܐ ܢܺܝܓܿܶܪ܂ ܘܠܽܘܩܺܝܳܣ ܕܡܶܢ ܩܽܘܪܺܝܢܺܐ ܡܕܼܺܝܢ̱ܬܳܐ܂ ܘܡܰܢܰܐܝܶܠ ܒܰܪ ܡܪ̈ܰܒܿܝܳܢܰܘܗ̱ܝ ܕܗܶܪܳܘܕܼܶܣ ܛܶܛܪܰܪܟܼܰܐ܂ ܘܫܳܐܘܳܠ܂
13:02 [ai]	ܘܟܼܰܕܼ ܗܶܢܽܘܢ ܨܳܝܡܺܝܢ ܗ̱ܘܰܘ ܘܡܶܬܼܟܿܰܫܦܼܺܝܢ ܠܰܐܠܳܗܳܐ܃ ܐܶܡܪܰܬܼ ܠܗܽܘܢ ܪܽܘܚܳܐ ܕܩܽܘܕܼܫܳܐ܂ ܦܪܽܘܫܘ ܠܺܝ ܠܫܳܐܘܳܠ ܘܰܠܒܼܰܪܢܰܒܼܰܐ܃ ܠܰܥܒܼܳܕܼܳܐ ܐܰܝܢܳܐ ܕܶܐܢܳܐ ܩܪܺܝܬܼ ܐܶܢܽܘܢ܂
13:03 [ai]	ܘܒܼܳܬܼܰܪ ܕܨܳܡܘ ܘܨܰܠܺܝܘ܃ ܣܳܡܘ ܥܠܰܝܗܽܘܢ ܐܺܝܕܼܳܐ ܘܫܰܕܿܰܪܘ ܐܶܢܽܘܢ ܿ܀ܿ܀ܿ
13:04 [ai]	ܘܗܶܢܽܘܢ ܟܰܕܼ ܐܶܫܬܿܠܰܚܘ ܡܶܢ ܪܽܘܚܳܐ ܕܩܽܘܕܼܫܳܐ܃ ܢܚܶܬܼܘ ܠܗܽܘܢ ܠܣܶܠܳܘܩܺܝܰܐ܂ ܘܡܶܢ ܬܰܡܳܢ ܪܕܼܰܘ ܒܝܰܡܳܐ ܥܕܼܰܡܳܐ ܠܩܽܘܦܿܪܳܘܣ܂
13:05 [ai]	ܘܟܼܰܕܼ ܥܰܠܘ ܠܣܰܠܰܡܺܢܺܐ ܡܕܼܺܝܢ̱ܬܳܐ܃ ܡܣܰܒܿܪܺܝܢ ܗ̱ܘܰܘ ܡܶܠܬܼܶܗ ܕܡܳܪܰܢ ܒܰܟܼܢܽܘܫܳܬܼܳܐ̈ ܕܺܝܗܽܘܕܼܳܝܶܐ̈܂ ܘܝܽܘܚܰܢܳܢ ܡܫܰܡܶܫ ܗ̱ܘܳܐ ܠܗܽܘܢ܂
13:06 [ai]	ܘܟܼܰܕܼ ܐܶܬܼܟܰܪܟܿܽܘܗ ܠܟܼܽܠܳܗ ܓܳܙܰܪܬܳܐ ܥܕܼܰܡܳܐ ܠܦܿܰܦܼܳܘܣ ܡܕܼܺܝܢ̱ܬܳܐ܃ ܐܶܫܟܿܰܚܘ ܓܰܒܼܪܳܐ ܚܰܕܼ ܚܰܪܳܫܳܐ ܺܝܗܽܘܕܼܳܝܳܐ ܕܺܐܝܬܼܰܘܗ̱ܝ ܗ̱ܘܳܐ ܢܒܼܺܝܳܐ ܕܰܓܿܳܠܳܐ܃ ܕܰܫܡܶܗ ܗܘܳܐ ܒܰܪܫܽܘܡܳܐ܂
13:07 [ai]	ܗܳܢܳܐ ܕܿܰܒܺܝܩ ܗ̱ܘܳܐ ܠܓܼܰܒܼܪܳܐ ܚܰܟܿܺܝܡܳܐ܂ ܕܺܐܝܬܼܰܘܗ̱ܝ ܗ̱ܘܳܐ ܐܰܢܬܼܽܘܦܿܰܛܳܘܣ܃ ܘܡܶܬܼܩܪܶܐ ܗ̱ܘܳܐ ܣܶܪܓܿܺܝܳܘܣ ܦܿܰܘܠܳܘܣ܂ ܘܰܩܪܳܐ ܗ̱ܘܳܐ ܐܰܢܬܼܽܘܦܿܰܛܳܘܣ ܠܫܳܐܘܳܠ ܘܰܠܒܼܰܪܢܰܒܼܰܐ܂ ܘܒܼܳܥܶܐ ܗ̱ܘܳܐ܃ ܕܢܶܫܡܰܥ ܡܶܢܗܽܘܢ ܡܶܠܬܼܳܐ ܕܰܐܠܳܗܳܐ܂
13:08 [ai]	ܩܳܐܶܡ ܗ̱ܘܳܐ ܕܶܝܢ ܠܽܘܩܒܼܰܠܗܽܘܢ܂ ܗܽܘ ܗܳܢܳܐ ܚܰܪܳܫܳܐ ܒܰܪܫܽܘܡܳܐ܃ ܕܡܶܬܿܬܿܰܪܓܿܰܡ ܫܡܶܗ ܐܶܠܽܘܡܰܣ܃ ܡܶܛܽܠ ܕܨܳܒܼܶܐ ܗ̱ܘܳܐ ܕܰܢܥܰܩܡܺܝܘܗ̱ܝ ܠܰܐܢܬܼܽܘܦܿܰܛܳܘܣ ܡܶܢ ܗܰܝܡܳܢܽܘܬܼܳܐ܂
13:09 [ai]	ܫܳܐܘܳܠ ܕܶܝܢ ܗܰܘ ܕܶܐܬܼܩܪܺܝ ܦܿܰܘܠܳܘܣ܃ ܐܶܬܼܡܠܺܝ ܗ̱ܘܳܐ ܒܪܽܘܚܳܐ ܕܩܽܘܕܼܫܳܐ܂ ܘܚܳܪ
13:10 [ai]	ܘܶܐܡܰܪ܂ ܐܳܘ ܕܰܡܠܶܐ ܟܽܠ ܢܶܟܼܠܺܝܢ̈ ܘܟܼܽܠܗܶܝܢ ܒܺܝܫܳܬܼܳܐ̈܂ ܒܪܶܗ ܕܳܐܟܼܶܠ ܩܰܪܨܳܐ܂ ܘܰܒܥܶܠܕܿܒܼܳܒܼܳܐ ܕܟܽܠܳܗ ܟܺܐܢܽܘܬܼܳܐ܃ ܠܳܐ ܫܳܠܶܐ ܐܰܢ̱ܬܿ ܠܰܡܥܰܩܳܡܽܘ܃ ܐܽܘܪ̈ܚܳܬܼܶܗ ܬܿܪ̈ܺܝܨܳܬܼܳܐ ܕܡܳܪܝܳܐ܂
13:11 [ai]	ܘܗܳܫܳܐ ܐܺܝܕܼܶܗ ܕܡܳܪܝܳܐ ܥܠܰܝܟܿ܃ ܘܬܼܶܗܘܶܐ ܣܡܶܐ ܘܠܳܐ ܬܶܚܙܶܐ ܫܶܡܫܳܐ ܥܕܼܰܡܳܐ ܠܙܰܒܼܢܳܐ܂ ܘܒܼܳܗ ܒܫܳܥܬܼܳܐ܂ ܢܦܼܰܠ ܥܠܰܘܗ̱ܝ ܥܰܡܛܳܢܳܐ ܘܚܶܫܽܘܟܼܳܐ܃ ܘܡܶܬܼܟܿܪܶܟܼ ܗ̱ܘܳܐ ܘܒܼܳܥܶܐ܂ ܕܡܰܢܽܘ ܢܶܐܚܽܘܕܼ ܒܺܐܝܕܼܶܗ܂
13:12 [ai]	ܘܟܼܰܕܼ ܚܙܳܐ ܐܰܢܬܼܽܘܦܿܰܛܳܘܣ ܡܶܕܶܡ ܕܰܗܘܳܐ܃ ܐܶܬܿܕܰܡܰܪ ܘܗܰܝܡܶܢ ܒܝܽܘܠܦܿܳܢܶܗ ܕܡܳܪܝܳܐ܀
13:13 [ai]	ܦܿܰܘܠܳܘܣ ܕܶܝܢ ܘܒܼܰܪܢܰܒܼܰܐ܂ ܪܕܼܰܘ ܒܝܰܡܳܐ ܡܶܢ ܦܿܰܦܼܳܘܣ ܡܕܼܺܝܢ̱ܬܳܐ܃ ܘܶܐܬܼܰܘ ܠܗܽܘܢ ܠܦܿܶܪܓܼܺܐ ܡܕܼܺܝܢ̱ܬܳܐ ܕܦܿܰܡܦܼܽܘܠܺܝܰܐ܂ ܘܰܦܼܪܰܫ ܡܶܢܗܽܘܢ ܝܽܘܚܰܢܳܢ܃ ܘܶܐܙܰܠ ܠܶܗ ܠܽܐܘܪܺܫܠܶܡ܂
13:14 [ai]	ܗܶܢܽܘܢ ܕܶܝܢ ܢܦܼܰܩܘ ܡܶܢ ܦܿܶܪܓܼܺܐ܃ ܘܶܐܬܼܰܘ ܠܰܐܢܛܺܝܳܟܼܺܝܰܐ ܡܕܼܺܝܢ̱ܬܳܐ ܕܦܿܺܝܣܺܝܕܼܺܝܰܐ܂ ܘܥܰܠܘ ܠܰܟܼܢܽܘܫܬܳܐ܂ ܘܺܝܬܼܶܒܼܘ ܒܝܰܘܡܳܐ ܘܫܰܒܿܬܼܳܐ܂
13:15 [ai]	ܘܒܼܳܬܼܰܪ ܕܶܐܬܼܩܪܺܝ ܢܳܡܽܘܣܳܐ ܘܰܢܒܼܺܝܶܐ̈܃ ܫܠܰܚܘ ܠܗܽܘܢ ܩܰܫܺܝܫܶܐ̈ ܕܰܟܼܢܽܘܫܬܳܐ ܘܶܐܡܰܪܘ܂ ܓܿܰܒܼܪ̈ܶܐ ܐܰܚܰܝܢ̈܃ ܐܶܢ ܗܽܘ ܕܺܐܝܬܼ ܠܟܼܽܘܢ ܡܶܠܬܼܳܐ ܕܒܽܘܝܳܐܳܐ܃ ܡܰܠܶܠܘ ܥܰܡ ܥܰܡܳܐ܂
13:16 [ai]	ܘܩܳܡ ܦܿܰܘܠܳܘܣ ܘܰܐܢܺܝܦܼ ܐܺܝܕܼܶܗ ܘܶܐܡܰܪ܂ ܓܿܰܒܼܪ̈ܶܐ܂ ܒܢܰܝ ܐܺܝܣܪܳܝܶܠ ܘܰܐܝܠܶܝܢ ܕܕܼܳܚܠܺܝܢ ܡܶܢ ܐܰܠܳܗܳܐ܃ ܫܡܰܥܘ܂
13:17 [ai]	ܐܰܠܳܗܶܗ ܕܥܰܡܳܐ ܗܳܢܳܐ ܓܒܼܳܐ ܠܰܐܒܼܳܗܳܬܼܰܢ̈܃ ܘܰܐܪܺܝܡ ܘܰܐܘܪܶܒܼ ܐܶܢܽܘܢ܃ ܟܰܕܼ ܗܘܰܘ ܬܰܘܬܿܳܒܼܶܐ̈ ܒܰܐܪܥܳܐ ܕܡܶܨܪܶܝܢ܂ ܘܒܼܰܕܼܪܳܥܳܐ ܪܳܡܳܐ ܐܰܦܿܶܩ ܐܶܢܽܘܢ ܡܶܢܳܗ܂
13:18 [ai]	ܘܬܼܰܪܣܺܝ ܐܶܢܽܘܢ ܒܡܰܕܼܒܪܳܐ ܐܰܪ̈ܒܥܺܝܢ ܫܢܺܝܢ̈܂
13:19 [ai]	ܘܰܗܓܼܰܡ ܫܰܒܼܥܳܐ ܥܰܡ̱ܡܺܝܢ̈ ܒܰܐܪܥܳܐ ܕܰܟܼܢܰܥܢ܃ ܘܝܰܗ̱ܒܼ ܠܗܽܘܢ ܐܰܪܥܗܽܘܢ ܠܝܽܘܪܬܿܳܢܳܐ܂
13:20 [ai]	ܘܰܐܪܒܿܰܥ ܡܳܐܐ ܘܚܰܡܫܺܝܢ ܫܢܺܝܢ̈ ܝܰܗ̱ܒܼ ܠܗܽܘܢ ܕܰܝܳܢܶܐ̈܃ ܥܕܼܰܡܳܐ ܠܰܫܡܽܘܐܝܶܠ ܢܒܼܺܝܳܐ܂
13:21 [ai]	ܘܗܳܝܕܶܝܢ ܫܶܐܠܘ ܠܗܽܘܢ ܡܰܠܟܿܳܐ܃ ܘܝܰܗ̱ܒܼ ܠܗܽܘܢ ܐܰܠܳܗܳܐ ܠܫܳܐܘܳܠ ܒܰܪ ܩܺܝܫ܂ ܓܰܒܼܪܳܐ ܡܶܢ ܫܰܪܒܿܬܼܳܐ ܕܒܼܶܢܝܳܡܺܝܢ܂ ܫܢܺܝܢ̈ ܐܰܪܒܥܺܝܢ܂
13:22 [ai]	ܘܢܰܣܒܶܗ܂ ܘܰܐܩܺܝܡ ܠܗܽܘܢ ܠܕܼܰܘܺܝܕܼ ܡܰܠܟܿܳܐ܂ ܘܰܐܣܗܶܕܼ ܥܠܰܘܗ̱ܝ ܘܶܐܡܰܪ܂ ܕܶܐܫܟܿܚܶܬܼ ܠܕܼܰܘܺܝܕܼ ܒܪܶܗ ܕܺܐܝܫܰܝ ܓܰܒܼܪܳܐ ܐܰܝܟܼ ܠܶܒܿܝ܃ ܗܽܘ ܢܶܥܒܿܶܕܼ ܟܽܠܗܽܘܢ ܨܶܒܼܝܳܢܰܝ̈܂
13:23 [ai]	ܡܶܢ ܙܰܪܥܶܗ ܕܗܳܢܳܐ ܐܰܩܺܝܡ ܐܰܠܳܗܳܐ ܠܺܐܝܣܪܳܝܶܠ܂ ܐܰܝܟܼ ܡܳܐ ܕܶܐܫܬܰܘܕܿܺܝ܃ ܠܝܶܫܽܘܥ ܦܳܪܽܘܩܳܐ܂
13:24 [ai]	ܘܫܰܕܿܰܪ ܠܝܽܘܚܰܢܳܢ܂ ܕܢܰܟܼܪܶܙ ܩܕܼܳܡ ܡܶܐܬܼܺܝܬܼܶܗ܃ ܡܰܥܡܽܘܕܼܺܝܬܼܳܐ ܕܰܬܼܝܳܒܼܽܘܬܼܳܐ ܠܟܼܽܠܶܗ ܥܰܡܳܐ ܕܺܐܝܣܪܳܝܶܠ܂
13:25 [ai]	ܘܟܼܰܕܼ ܡܫܰܠܶܡ ܗ̱ܘܳܐ ܝܽܘܚܰܢܳܢ ܬܶܫܡܶܫܬܿܶܗ܃ ܐܳܡܰܪ ܗ̱ܘܳܐ܂ ܡܰܢܽܘ ܣܳܒܼܪܺܝܢ ܐܢ̱ܬܿܽܘܢ ܕܺܐܝܬܼܰܝ܂ ܠܳܐ ܗ̱ܘܺܝܬܼ ܐܶܢܳܐ܃ ܐܶܠܳܐ ܗܳܐ ܐܳܬܼܶܐ ܒܳܬܼܰܪܝ܃ ܗܰܘ ܕܠܳܐ ܫܳܘܶܐ ܐ̱ܢܳܐ܃ ܕܶܐܫܪܶܐ ܥܰܪ̈ܩܶܐ ܕܰܡܣܳܢܰܘܗ̱ܝ̈܂
13:26 [ai]	ܓܿܰܒܼܪ̈ܶܐ ܐܰܚܰܝܢ̈܂ ܒܢܰܝ ܫܰܪܒܿܬܼܶܗ ܕܰܐܒܼܪܳܗܳܡ ܘܰܐܝܠܶܝܢ ܕܕܼܳܚܠܺܝܢ ܥܰܡܟܼܽܘܢ ܠܰܐܠܳܗܳܐ܃ ܠܟܼܽܘܢ ܗ̱ܽܘ ܐܶܫܬܿܰܕܿܪܰܬܼ ܡܶܠܬܼܳܐ ܕܚܰܝ̈ܶܐ܂
13:27 [ai]	ܗܳܠܶܝܢ ܓܶܝܪ ܥܳܡܽܘܪ̈ܶܐ ܕܽܐܘܪܺܫܠܶܡ ܘܪ̈ܺܫܳܢܰܝܗܽܘܢ܃ ܠܳܐ ܐܰܪܓܿܶܫܘ ܒܿܳܗ܃ ܐܳܦܼܠܳܐ ܒܰܟܼܬܼܳܒܼܶܐ̈ ܕܰܢܒܼܺܝܶܐ̈ ܕܡܶܬܼܩܪܶܝܢ ܒܟܽܠ ܫܰܒܿܳܐ܂ ܐܶܠܳܐ ܕܳܢܽܘܗ̱ܝ ܘܫܰܠܶܡܘ ܗܳܠܶܝܢ ܕܰܟܼܬܼܺܝܒܼܳܢ̈܂
13:28 [ai]	ܘܟܼܰܕܼ ܠܳܐ ܐܶܫܟܿܰܚܘ ܥܶܠܬܼܳܐ ܕܡܰܘܬܳܐ ܡܶܕܶܡ܃ ܫܶܐܠܘ ܡܶܢ ܦܿܺܝܠܰܛܳܘܣ܂ ܕܢܶܩܛܠܽܘܢܳܝܗ̱ܝ܂
13:29 [ai]	ܘܟܼܰܕܼ ܫܰܠܶܡܘ ܟܽܠܡܶܕܶܡ ܕܰܟܼܬܼܺܝܒܼ ܗ̱ܘܳܐ ܥܠܰܘܗ̱ܝ܃ ܐܰܚܬܼܽܘܗ̱ܝ ܡܶܢ ܨܠܺܝܒܼܳܐ ܘܣܳܡܽܘܗ̱ܝ ܒܶܝܬܼ ܩܒܼܽܘܪܳܐ܂
13:30 [ai]	ܐܰܠܳܗܳܐ ܕܶܝܢ ܐܰܩܺܝܡܶܗ ܡܶܢ ܒܶܝܬܼ ܡܺܝܬܼܶܐ̈܂
13:31 [ai]	ܘܶܐܬܼܚܙܺܝ܂ ܝܰܘܡܳܬܼܳܐ̈ ܣܰܓܿܺܝܶܐܐ̈܃ ܠܰܐܝܠܶܝܢ ܕܰܣܠܶܩܘ ܥܰܡܶܗ ܡܶܢ ܓܠܺܝܠܳܐ ܠܽܐܘܪܺܫܠܶܡ܂ ܘܗܶܢܽܘܢ ܐܶܢܽܘܢ ܗܳܫܳܐ ܣܳܗܕܿܰܘܗ̱ܝ̈ ܠܘܳܬܼ ܥܰܡܳܐ܂
13:32 [ai]	ܘܳܐܦܼ ܚܢܰܢ ܗܳܐ ܡܣܰܒܿܪܺܝܢܰܢ ܠܟܼܽܘܢ܃ ܕܫܽܘܘ̱ܕܿܳܝܳܐ ܗܰܘ ܕܰܗܘܳܐ ܠܘܳܬܼ ܐܰܒܼܳܗܳܬܼܰܢ̈܃
13:33 [ai]	ܗܳܐ ܫܰܡܠܝܶܗ ܐܰܠܳܗܳܐ ܠܰܢ ܠܰܒܼܢܰܝܗܽܘܢ܂ ܕܰܐܩܺܝܡ ܠܝܶܫܽܘܥ܃ ܐܰܝܟܼ ܕܰܟܼܬܼܺܝܒܼ ܒܡܰܙܡܽܘܪܳܐ ܕܿܰܬܼܪ̈ܶܝܢ܂ ܕܒܶܪܝ ܐܰܢ̱ܬܿ܂ ܐܶܢܳܐ ܝܰܘܡܳܢܳܐ ܺܝܠܶܕܿܬܿܳܟܼ܂
13:34 [ai]	ܘܗܳܟܼܰܢܳܐ ܐܰܩܺܝܡܶܗ ܐܰܠܳܗܳܐ ܡܶܢ ܒܶܝܬܼ ܡܺܝܬܼܶܐ̈܃ ܕܬܽܘܒܼ ܠܳܐ ܢܶܗܦܿܽܘܟܼ ܢܶܚܙܶܐ ܚܒܼܳܠܳܐ܃ ܐܰܝܟܼ ܕܶܐܡܰܪ܂ ܕܶܐܬܿܶܠ ܠܟܼܽܘܢ ܛܰܝܒܿܽܘܬܼܶܗ ܕܕܼܰܘܺܝܕܼ ܡܗܰܝܡܰܢܬܳܐ܂
13:35 [ai]	ܘܬܼܽܘܒܼ ܐܶܡܰܪ ܒܕܽܘܟܿܬܼܳܐ ܐ̱ܚܪܺܬܼܳܐ܃ ܕܠܳܐ ܝܰܗ̱ܒܼܬܿ ܠܚܰܣܝܳܟܼ܂ ܕܢܶܚܙܶܐ ܚܒܼܳܠܳܐ܂
13:36 [ai]	ܕܿܰܘܺܝܕܼ ܓܶܝܪ ܒܫܰܪܒܿܬܼܶܗ܂ ܫܰܡܶܫ ܨܶܒܼܝܳܢܶܗ ܕܰܐܠܳܗܳܐ ܘܰܫܟܼܶܒܼ܂ ܘܶܐܬܿܬܰܘܣܰܦܼ ܥܰܠ ܐܰܒܼܳܗܰܘܗ̱ܝ̈ ܘܰܚܙܳܐ ܚܒܼܳܠܳܐ܂
13:37 [ai]	ܗܳܢܳܐ ܕܶܝܢ ܕܰܐܩܺܝܡ ܐܰܠܳܗܳܐ܂ ܠܳܐ ܚܙܳܐ ܚܒܼܳܠܳܐ܂
13:38 [ai]	ܕܰܥܘ ܗܳܟܼܺܝܠ ܐܰܚܰܝ̈܃ ܕܒܶܗ ܒܗܳܢܳܐ ܡܶܬܼܟܿܪܶܙ ܠܟܼܽܘܢ ܫܽܘܒܼܩܳܢ ܚܛܳܗܶܐ̈܂
13:39 [ai]	ܘܡܶܢ ܟܽܠ ܕܠܳܐ ܐܶܫܟܿܰܚܬܿܽܘܢ ܒܢܳܡܽܘܣܳܐ ܕܡܽܘܫܶܐ ܕܬܶܙܕܿܰܕܿܩܽܘܢ܃ ܒܗܳܢܳܐ ܟܽܠ ܕܰܡܗܰܝܡܶܢ܂ ܡܶܙܕܿܰܕܿܰܩ܂
13:40 [ai]	ܐܶܙܕܿܰܗ̱ܪܘ ܗܳܟܼܺܝܠ܃ ܕܰܠܡܳܐ ܢܺܐܬܼܶܐ ܥܠܰܝܟܿܽܘܢ ܡܶܕܶܡ ܕܰܟܼܬܼܺܝܒܼ ܒܰܢܒܼܺܝܶܐ̈܃
13:41 [ai]	ܕܰܚܙܰܘ ܡܒܼܰܣܪ̈ܳܢܶܐ܂ ܘܬܼܶܬܼܡܗܽܘܢ ܘܬܼܶܬܼܚܰܒܿܠܽܘܢ܂ ܕܰܥܒܼܳܕܼܳܐ ܥܳܒܼܶܕܼ ܐ̱ܢܳܐ ܒܝܰܘܡܰܝܟܿܽܘܢ̈܃ ܐܰܝܢܳܐ ܕܠܳܐ ܬܗܰܝܡܢܽܘܢ܃ ܐܶܢ ܐ̱ܢܳܫ ܡܶܫܬܿܰܥܶܐ ܠܟܼܽܘܢ܂
13:42 [ai]	ܘܟܼܰܕܼ ܢܳܦܼܩܺܝܢ ܗ̱ܘܰܘ ܡܶܢ ܨܶܐܕܼܰܝܗܽܘܢ܃ ܒܥܰܘ ܡܶܢܗܽܘܢ ܕܰܠܫܰܒܿܬܼܳܐ ܐ̱ܚܪܺܬܼܳܐ ܢܡܰܠܠܽܘܢ ܥܰܡܗܽܘܢ ܡܶܠܶܐ̈ ܗܳܠܶܝܢ܂
13:43 [ai]	ܘܡܶܢ ܕܶܐܫܬܿܰܪܝܰܬܼ ܟܢܽܘܫܬܳܐ܃ ܣܰܓܿܺܝܶܐܐ̈ ܺܝܗܽܘܕܼܳܝܶܐ̈ ܐܶܙܰܠܘ ܒܳܬܼܰܪܗܽܘܢ܃ ܘܳܐܦܼ ܓܿܺܝܽܘܪ̈ܶܐ ܕܕܼܳܚܠܺܝܢ ܗ̱ܘܰܘ ܡܶܢ ܐܰܠܳܗܳܐ܂ ܘܗܶܢܽܘܢ ܡܡܰܠܠܺܝܢ ܗ̱ܘܰܘ ܘܰܡܦܿܺܝܣܺܝܢ ܠܗܽܘܢ܃ ܕܢܶܗܘܽܘܢ ܢܰܩܺܝܦܼܺܝܢ ܠܛܰܝܒܿܽܘܬܼܶܗ ܕܰܐܠܳܗܳܐ ܿ܀ܿ܀ܿ
13:44 [ai]	ܘܰܠܫܰܒܿܬܼܳܐ ܐ̱ܚܪܺܬܼܳܐ܃ ܟܶܢܫܰܬܼ ܟܽܠܳܗ ܡܕܼܺܝܢ̱ܬܳܐ ܠܡܶܫܡܰܥ ܡܶܠܬܼܶܗ ܕܰܐܠܳܗܳܐ܂
13:45 [ai]	ܘܟܼܰܕܼ ܚܙܰܘ ܺܝܗܽܘܕܼܳܝܶܐ̈ ܟܶܢܫܳܐ ܣܰܓܿܺܝܳܐܐ܃ ܐܶܬܼܡܠܺܝܘ ܚܣܳܡܳܐ܂ ܘܩܳܝܡܺܝܢ ܗ̱ܘܰܘ ܠܽܘܩܒܼܰܠ ܡܶܠܶܐ̈ ܕܳܐܡܰܪ ܗ̱ܘܳܐ ܦܿܰܘܠܳܘܣ܂ ܘܰܡܓܼܰܕܿܦܼܺܝܢ ܗ̱ܘܰܘ܂
13:46 [ai]	ܐܶܡܰܪ ܕܶܝܢ ܦܿܰܘܠܳܘܣ ܘܒܼܰܪܢܰܒܼܰܐ܂ ܥܺܝܢ ܒܰܓܼܠܶܐ܂ ܠܟܼܽܘܢ ܗ̱ܽܘ ܘܳܠܶܐ ܗ̱ܘܳܐ ܩܰܕܼܡܳܝܰܬܼ܃ ܕܬܶܬܼܶܐܡܰܪ ܡܶܠܬܼܶܗ ܕܰܐܠܳܗܳܐ܂ ܐܶܠܳܐ ܡܶܛܽܠ ܕܕܼܳܚܶܝܢ ܐܢ̱ܬܿܽܘܢ ܠܳܗ ܡܶܢܟܼܽܘܢ܃ ܘܰܦܼܣܰܩܬܿܽܘܢ ܥܰܠ ܢܰܦܼܫܟܼܽܘܢ ܕܠܳܐ ܫܳܘܶܝܢ ܐܢ̱ܬܿܽܘܢ ܠܚܰܝ̈ܶܐ ܕܰܠܥܳܠܰܡ܃ ܗܳܐ ܠܰܢ ܠܘܳܬܼ ܥܰܡ̱ܡܶܐ̈܂
13:47 [ai]	ܗܳܟܼܰܢܳܐ ܓܶܝܪ ܦܰܩܕܿܰܢ ܡܳܪܰܢ܂ ܐܰܝܟܼ ܕܰܟܼܬܼܺܝܒܼ܃ ܕܣܳܡܬܿܳܟܼ ܢܽܘܗܪܳܐ ܠܥܰܡ̱ܡܶܐ̈܃ ܕܬܶܗܘܶܐ ܠܚܰܝ̈ܶܐ ܥܕܼܰܡܳܐ ܠܣܰܘܦܿܶܝܗ̈ ܕܰܐܪܥܳܐ܂
13:48 [ai]	ܘܟܼܰܕܼ ܫܳܡܥܺܝܢ ܗ̱ܘܰܘ ܥܰܡ̱ܡܶܐ̈܃ ܚܳܕܼܶܝܢ ܗ̱ܘܰܘ܃ ܘܰܡܫܰܒܿܚܺܝܢ ܠܰܐܠܳܗܳܐ܂ ܘܗܰܝܡܶܢܘ܂ ܐܰܝܠܶܝܢ ܕܣܺܝܡܺܝܢ ܗ̱ܘܰܘ ܠܚܰܝ̈ܶܐ ܕܰܠܥܳܠܰܡ܂
13:49 [ai]	ܘܡܶܠܬܼܶܗ ܕܡܳܪܝܳܐ ܡܶܬܼܡܰܠܠܳܐ ܗ̱ܘܳܬܼ ܒܟܽܠܶܗ ܗܰܘ ܐܰܬܼܪܳܐ܂
13:50 [ai]	ܺܝܗܽܘܕܼܳܝܶܐ̈ ܕܶܝܢ ܓܰܪܶܓܼܘ ܠܪ̈ܺܫܶܐ ܕܰܡܕܼܺܝܢ̱ܬܳܐ ܘܰܠܢܶܫܶܐ̈ ܥܰܬܿܺܝܪ̈ܳܬܼܳܐ܂ ܐܰܝܠܶܝܢ ܕܕܼܳܚܠܳܢ̈ ܗ̱ܘܰܝ̈ ܥܰܡܗܽܘܢ ܠܰܐܠܳܗܳܐ܃ ܘܰܐܩܺܝܡܘ ܪܕܼܽܘܦܼܝܳܐ ܥܰܠ ܦܿܰܘܠܳܘܣ ܘܥܰܠ ܒܰܪܢܰܒܼܰܐ܃ ܘܰܐܦܿܶܩܘ ܐܶܢܽܘܢ ܡܶܢ ܬܚܽܘܡܰܝܗܽܘܢ̈܂
13:51 [ai]	ܘܟܼܰܕܼ ܢܦܼܰܩܘ܃ ܢܦܼܰܨܘ ܥܠܰܝܗܽܘܢ ܚܶܠܳܐ ܕܿܪ̈ܶܓܼܠܰܝܗܽܘܢ܂ ܘܶܐܬܼܰܘ ܠܗܽܘܢ ܠܺܐܝܩܳܢܺܘܳܢ ܡܕܼܺܝܢ̱ܬܳܐ܂
13:52 [ai]	ܘܬܼܰܠܡܺܝܕܼܶܐ̈ ܡܶܬܼܡܠܶܝܢ ܗ̱ܘܰܘ ܚܰܕܼܽܘܬܼܳܐ ܘܪܽܘܚܳܐ ܕܩܽܘܕܼܫܳܐ܀

next chapter