The Comprehensive Aramaic Lexicon

14:01 [ai]	ܘܶܐܬܼܰܘ ܘܥܰܠܘ ܠܗܽܘܢ ܠܰܟܼܢܽܘܫܬܳܐ ܕܺܝܗܽܘܕܼܳܝܶܐ̈܂ ܘܗܳܟܼܰܢܳܐ ܡܰܠܶܠܘ ܥܰܡܗܽܘܢ܃ ܐܰܝܟܼ ܕܰܢܗܰܝܡܢܽܘܢ ܣܰܓܿܺܝܶܐܐ̈ ܡܶܢ ܺܝܗܽܘܕܼܳܝܶܐ̈ ܘܡܶܢ ܝܰܘܢܳܝܶܐ̈܂
14:02 [ai]	ܺܝܗܽܘܕܼܳܝܶܐ̈ ܕܶܝܢ܂ ܐܰܝܠܶܝܢ ܕܠܳܐ ܡܶܬܿܛܦܿܺܝܣܺܝܢ ܗ̱ܘܰܘ܃ ܓܰܪܶܓܼܘ ܠܥܰܡ̱ܡܶܐ̈܃ ܕܢܰܒܼܶܐܫܽܘܢ ܠܗܽܘܢ ܠܰܐܚܶܐ̈܂
14:03 [ai]	ܘܗܶܢܽܘܢ ܙܰܒܼܢܳܐ ܣܰܓܿܺܝܳܐܐ ܗ̱ܘܰܘ ܬܰܡܳܢ܂ ܘܥܺܝܢ ܒܰܓܼܠܶܐ ܡܡܰܠܠܺܝܢ ܗ̱ܘܰܘ ܥܰܠ ܡܳܪܝܳܐ܂ ܘܗܽܘ ܡܰܣܗܶܕܼ ܗ̱ܘܳܐ ܥܰܠ ܡܶܠܬܼܳܐ ܕܛܰܝܒܿܽܘܬܼܶܗ܃ ܒܳܐܬܼܘܳܬܼܳܐ̈ ܘܰܒܬܼܶܕܼܡܪ̈ܳܬܼܳܐ ܕܥܳܒܼܶܕܼ ܗ̱ܘܳܐ ܒܺܐܝܕܼܰܝܗܽܘܢ̈܂
14:04 [ai]	ܘܟܼܽܠܶܗ ܟܶܢܫܳܐ ܕܰܡܕܼܺܝܢ̱ܬܳܐ ܦܠܺܝܓܼ ܗ̱ܘܳܐ܃ ܡܶܢܗܽܘܢ ܐܺܝܬܼ ܗ̱ܘܰܘ ܥܰܡ ܺܝܗܽܘܕܼܳܝܶܐ̈܃ ܘܡܶܢܗܽܘܢ ܢܰܩܺܝܦܼܺܝܢ ܗ̱ܘܰܘ ܠܰܫܠܺܝܚܶܐ̈܂
14:05 [ai]	ܗܘܳܐ ܕܶܝܢ ܥܠܰܝܗܽܘܢ ܓܙܳܡܳܐ ܡܶܢ ܥܰܡ̱ܡܶܐ̈܃ ܘܡܶܢ ܺܝܗܽܘܕܼܳܝܶܐ̈ ܘܪ̈ܺܫܳܢܰܝܗܽܘܢ܃ ܕܰܢܨܰܥܪܽܘܢ ܐܶܢܽܘܢ ܘܢܶܪܓܿܡܽܘܢ ܐܶܢܽܘܢ ܒܟܺܐܦܼܶܐ̈܂
14:06 [ai]	ܘܟܼܰܕܼ ܺܝܕܼܰܥܘ܃ ܫܰܢܺܝܘ ܘܶܐܬܼܓܿܰܘܰܣܘ ܒܰܡܕܼܺܝܢܳܬܼܳܐ̈ ܕܠܽܘܩܳܢܺܝܰܐ܃ ܠܽܘܣܛܪܰܐ ܘܕܼܶܪܒܿܺܐܘܩܽܘܪ̈ܝܳܐ ܕܿܰܚܕܼܳܪ̈ܰܝܗܶܝܢ܂
14:07 [ai]	ܘܬܼܰܡܳܢ ܡܣܰܒܿܪܺܝܢ ܗ̱ܘܰܘ܀
14:08 [ai]	ܘܓܼܰܒܼܪܳܐ ܚܰܕܼ ܝܳܬܼܶܒܼ ܗ̱ܘܳܐ ܒܠܽܘܣܛܪܰܐ ܡܕܼܺܝܢ̱ܬܳܐ܃ ܕܰܣܓܼܺܝܦܼ ܗ̱ܘܳܐ ܒܪ̈ܶܓܼܠܰܘܗ̱ܝ܃ ܚܓܼܺܝܪܳܐ ܕܡܶܢ ܟܪܶܣ ܐܶܡܶܗ܃ ܕܡܶܡܬܼܽܘܡ ܠܳܐ ܗܰܠܶܟܼ ܗ̱ܘܳܐ܂
14:09 [ai]	ܗܳܢܳܐ ܫܡܰܥ ܠܦܿܰܘܠܳܘܣ ܕܰܡܡܰܠܶܠ܂ ܘܟܼܰܕܼ ܚܙܳܝܗ̱ܝ ܦܿܰܘܠܳܘܣ ܘܶܐܫܬܰܘܕܿܰܥ ܕܺܐܝܬܼ ܒܶܗ ܗܰܝܡܳܢܽܘܬܼܳܐ ܕܢܺܚܶܐ܃
14:10 [ai]	ܐܶܡܰܪ ܠܶܗ ܒܩܳܠܳܐ ܪܳܡܳܐ܂ ܠܳܟܼ ܐܳܡܰܪ ܐ̱ܢܳܐ܃ ܒܰܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܩܽܘܡ ܥܰܠ ܪ̈ܶܓܼܠܰܝܟܿ܂ ܘܰܫܘܰܪ ܩܳܡ ܘܗܰܠܶܟܼ܂
14:11 [ai]	ܘܟܼܶܢܫܳܐ ܕܥܰܡܳܐ ܟܰܕܼ ܚܙܰܘ ܡܶܕܶܡ ܕܰܥܒܼܰܕܼ ܦܿܰܘܠܳܘܣ܃ ܐܰܪܺܝܡܘ ܩܳܠܗܽܘܢ ܒܠܶܫܳܢܶܗ ܕܰܐܬܼܪܳܐ ܘܳܐܡܪܺܝܢ܂ ܐܰܠܳܗܶܐ̈ ܐܶܬܿܕܰܡܺܝܘ ܒܰܒܼܢܰܝ ܐ̱ܢܳܫܳܐ ܘܰܢܚܶܬܼܘ ܠܘܳܬܼܰܢ܂
14:12 [ai]	ܘܫܰܡܺܝܘ ܗ̱ܘܰܘ ܠܒܼܰܪܢܰܒܼܰܐ ܡܳܪܶܐ ܐܰܠܳܗܶܐ̈܃ ܘܰܠܦܿܰܘܠܳܘܣ ܗܶܪܡܺܝܣ܃ ܡܶܛܽܠ ܕܗܽܘ ܡܫܰܪܶܐ ܗ̱ܘܳܐ ܒܡܶܠܬܼܳܐ܂
14:13 [ai]	ܘܟܼܽܘܡܪܳܐ ܕܡܳܪܶܐ ܐܰܠܳܗܶܐ̈܂ ܗܰܘ ܕܺܐܝܬܼ ܗ̱ܘܳܐ ܠܒܼܰܪ ܡܶܢ ܡܕܼܺܝܢ̱ܬܳܐ܃ ܐܰܝܬܿܺܝ ܬܰܘܪ̈ܶܐ ܘܰܟܼܠܺܝܠܶܐ̈ ܠܬܼܰܪܥܳܐ ܕܕܼܳܪܬܳܐ܂ ܐܰܬܼܰܪ ܕܰܫܪܶܝܢ ܗ̱ܘܰܘ܃ ܘܨܳܒܼܶܐ ܗ̱ܘܳܐ ܕܰܢܕܼܰܒܿܰܚ ܠܗܽܘܢ܂
14:14 [ai]	ܒܰܪܢܰܒܼܰܐ ܕܶܝܢ ܘܦܿܰܘܠܳܘܣ܂ ܟܰܕܼ ܫܡܰܥܘ܃ ܣܰܕܿܶܩܘ ܢܰܚܬܿܰܝܗܽܘܢ̈܃ ܘܰܫܘܰܪܘ ܘܰܢܦܼܰܩܘ ܠܗܽܘܢ ܠܘܳܬܼ ܐܳܟܼܠܳܘܣ܂ ܘܩܳܥܶܝܢ ܗ̱ܘܰܘ
14:15 [ai]	ܘܳܐܡܪܺܝܢ܂ ܓܿܰܒܼܪ̈ܶܐ܃ ܡܳܢܳܐ ܥܳܒܼܕܺܝܢ ܐܢ̱ܬܿܽܘܢ܂ ܐܳܦܼ ܚܢܰܢ ܒܢܰܝܢܳܫܳܐ ܚ̱ܢܰܢ ܚܳܫܽܘܫܶܐ̈ ܐܰܟܼܘܳܬܼܟܼܽܘܢ܂ ܕܰܡܣܰܒܿܪܺܝܢܰܢ ܠܟܼܽܘܢ܃ ܕܡܶܢ ܗܳܠܶܝܢ ܒܰܛܳܠܳܬܼܳܐ̈܂ ܬܶܬܼܦܿܢܽܘܢ ܠܘܳܬܼ ܐܰܠܳܗܳܐ ܚܰܝܳܐ܃ ܗܰܘ ܕܰܥܒܼܰܕܼ ܫܡܰܝܳܐ ܘܰܐܪܥܳܐ܃ ܘܝܰܡ̱ܡܶܐ̈ ܘܟܼܽܠ ܕܺܐܝܬܼ ܒܗܽܘܢ܃
14:16 [ai]	ܗܰܘ ܕܿܰܒܼܕܼܳܪ̈ܶܐ ܩܰܕܼܡܳܝ̈ܶܐ ܫܒܼܰܩ ܗ̱ܘܳܐ ܐܶܢܽܘܢ ܠܟܼܽܠܗܽܘܢ ܥܰܡ̱ܡܶܐ̈܃ ܕܢܺܐܙܽܠ̱ܘܢ ܒܽܐܘܪ̈ܚܳܬܼܳܐ ܕܢܰܦܼܫܗܽܘܢ܃
14:17 [ai]	ܟܰܕܼ ܠܳܐ ܫܒܼܰܩ ܢܰܦܼܫܶܗ ܕܠܳܐ ܣܳܗܕܿܽܘ܃ ܒܰܕܼܥܳܒܼܶܕܼ ܗ̱ܘܳܐ ܠܗܽܘܢ ܛܳܒܼܳܬܼܳܐ̈ ܡܶܢ ܫܡܰܝܳܐ܃ ܘܡܰܚܶܬܼ ܗ̱ܘܳܐ ܠܗܽܘܢ ܡܶܛܪܳܐ܃ ܘܰܡܪܰܒܿܶܐ ܗ̱ܘܳܐ ܦܿܺܐܪ̈ܶܐ ܒܙܰܒܼܢܰܝܗܽܘܢ̈܃ ܘܡܳܠܶܐ ܗ̱ܘܳܐ ܬܽܘܪܣܳܝܳܐ ܘܒܼܰܣܺܝܡܽܘܬܼܳܐ ܠܶܒܿܰܘܳܬܼܗܽܘܢ̈܂
14:18 [ai]	ܘܟܼܰܕܼ ܗܳܠܶܝܢ ܐܳܡܪܺܝܢ ܗ̱ܘܰܘ܃ ܡܶܢ ܡܰܚܣܶܢ ܟܠܰܘ ܠܥܰܡܳܐ܃ ܕܐ̱ܢܳܫ ܠܳܐ ܢܕܼܰܒܿܰܚ ܠܗܽܘܢ܂
14:19 [ai]	ܐܶܬܼܰܘ ܕܶܝܢ ܠܬܼܰܡܳܢ ܺܝܗܽܘܕܼܳܝܶܐ̈ ܡܶܢ ܐܺܝܩܳܢܺܘܳܢ ܘܡܶܢ ܐܰܢܛܺܝܳܟܼܺܝܰܐ܃ ܘܰܫܓܼܰܫܘ ܥܠܰܝܗܽܘܢ ܠܥܰܡܳܐ ܘܪܰܓܼܡܽܘܗ̱ܝ ܠܦܿܰܘܠܳܘܣ ܘܓܼܰܪܽܘܗ̱ܝ ܠܒܼܰܪ ܡܶܢ ܡܕܼܺܝܢ̱ܬܳܐ܃ ܡܶܛܽܠ ܕܣܳܒܼܪܺܝܢ ܗ̱ܘܰܘ ܕܡܺܝܬܼ ܠܶܗ܂
14:20 [ai]	ܘܰܟܼܢܰܫܘ ܥܠܰܘܗ̱ܝ ܬܰܠܡܺܝܕܼܶܐ̈܃ ܘܩܳܡ ܥܰܠ ܠܰܡܕܼܺܝܢ̱ܬܳܐ܀ ܘܰܠܝܰܘܡܳܐ ܐ̱ܚܪܺܢܳܐ܃ ܢܦܼܰܩ ܠܶܗ ܡܶܢ ܬܰܡܳܢ ܥܰܡ ܒܰܪܢܰܒܼܰܐ܃ ܘܶܐܬܼܰܘ ܠܕܼܶܪܒܿܺܐ ܡܕܼܺܝܢ̱ܬܳܐ܂
14:21 [ai]	ܘܟܼܰܕܼ ܡܣܰܒܿܪܺܝܢ ܗ̱ܘܰܘ ܠܰܒܼܢܰܝ ܡܕܼܺܝܢ̱ܬܳܐ ܗܳܝ܃ ܬܰܠܡܶܕܼܘ ܗ̱ܘܰܘ ܠܣܰܓܿܺܝܶܐܐ̈܂ ܘܰܗܦܼܰܟܼܘ ܐܶܬܼܰܘ ܠܗܽܘܢ ܠܠܽܘܣܛܪܰܐ ܡܕܼܺܝܢ̱ܬܳܐ ܘܠܺܐܝܩܳܢܺܘܳܢ ܘܠܰܐܢܛܺܝܳܟܼܺܝܰܐ܃
14:22 [ai]	ܟܰܕܼ ܡܫܰܪܪܺܝܢ ܗ̱ܘܰܘ ܢܰܦܼܫܳܬܼܗܽܘܢ̈ ܕܬܰܠܡܺܝܕܼܶܐ̈܃ ܘܒܼܳܥܶܝܢ ܗ̱ܘܰܘ ܡܶܢܗܽܘܢ ܕܰܢܩܰܘܽܘܢ ܒܗܰܝܡܳܢܽܘܬܼܳܐ܃ ܘܳܐܡܪܺܝܢ ܗ̱ܘܰܘ ܠܗܽܘܢ ܕܒܽܐܘܠܨܳܢܳܐ ܣܰܓܿܺܝܳܐܐ ܘܳܠܶܐ ܠܡܶܥܰܠ ܠܡܰܠܟܿܽܘܬܼܶܗ ܕܰܐܠܳܗܳܐ܂
14:23 [ai]	ܘܰܐܩܺܝܡܘ ܠܗܽܘܢ ܒܟܽܠ ܥܺܕ̱ܿܬܳܐ܂ ܩܰܫܺܝܫܶܐ̈܃ ܟܰܕܼ ܨܳܝܡܺܝܢ ܗ̱ܘܰܘ ܥܰܡܗܽܘܢ ܘܰܡܨܰܠܶܝܢ܃ ܘܡܰܓܼܥܠܺܝܢ ܗ̱ܘܰܘ ܠܗܽܘܢ ܠܡܳܪܰܢ܂ ܗܰܘ ܕܗܰܝܡܶܢܘ ܒܶܗ܂
14:24 [ai]	ܘܟܼܰܕܼ ܐܶܬܼܟܿܪܶܟܼܘ ܒܰܐܬܼܪܳܐ ܕܦܿܺܝܣܺܝܕܼܺܝܰܐ܃ ܐܶܬܼܰܘ ܠܗܽܘܢ ܠܦܿܰܡܦܼܽܘܠܺܝܰܐ܂
14:25 [ai]	ܘܟܼܰܕܼ ܡܰܠܶܠܘ ܒܦܿܶܪܓܼܺܐ ܡܕܼܺܝܢ̱ܬܳܐ ܡܶܠܬܼܳܐ ܕܡܳܪܝܳܐ܃ ܢܚܶܬܼܘ ܠܗܽܘܢ ܠܺܐܝܛܰܠܺܝܰܐ܂
14:26 [ai]	ܘܡܶܢ ܬܰܡܳܢ ܪܕܼܰܘ ܒܝܰܡܳܐ܃ ܘܶܐܬܼܰܘ ܠܗܽܘܢ ܠܰܐܢܛܺܝܳܟܼܺܝܰܐ܃ ܡܶܛܽܠ ܕܡܶܢ ܬܰܡܳܢ ܡܰܓܼܥܠܺܝܢ ܗ̱ܘܰܘ ܠܛܰܝܒܿܽܘܬܼܶܗ ܕܡܳܪܝܳܐ܂ ܠܰܥܒܼܳܕܼܳܐ ܗܰܘ ܕܫܰܠܶܡܘ܂
14:27 [ai]	ܘܟܼܰܕܼ ܟܢܰܫܘ ܟܽܠܳܗ ܥܺܕ̱ܿܬܳܐ܃ ܡܶܫܬܿܰܥܶܝܢ ܗ̱ܘܰܘ ܟܽܠܡܶܕܶܡ ܕܰܥܒܼܰܕܼ ܥܰܡܗܽܘܢ ܐܰܠܳܗܳܐ܃ ܘܕܼܰܦܼܬܼܰܚ ܬܰܪܥܳܐ ܕܗܰܝܡܳܢܽܘܬܼܳܐ ܠܥܰܡ̱ܡܶܐ̈܂
14:28 [ai]	ܘܙܰܒܼܢܳܐ ܣܰܓܿܺܝܳܐܐ ܗ̱ܘܰܘ ܬܰܡܳܢ ܠܘܳܬܼ ܬܰܠܡܺܝܕܼܶܐ̈܀

next chapter