← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62044: P Acts

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


15:01 [ai]ܢܚܶܬܼܘ ܗ̱ܘܰܘ ܕܶܝܢ ܐ̱ܢܳܫܳܐ ܡܶܢ ܺܝܗܽܘܕܼ܃ ܘܡܰܠܦܼܺܝܢ ܗ̱ܘܰܘ ܠܗܽܘܢ ܠܰܐܚܶܐ̈܃ ܕܶܐܢܗܽܘ ܕܠܳܐ ܓܳܙܪܺܝܢ ܐܢ̱ܬܿܽܘܢ ܒܰܥܝܳܕܼܳܐ ܕܢܳܡܽܘܣܳܐ܃ ܠܳܐ ܡܶܫܟܿܚܺܝܢ ܐܢ̱ܬܿܽܘܢ ܠܡܶܚܳܐ܂
15:02 [ai]ܘܰܗܘܳܐ ܫܓܼܽܘܫܝܳܐ ܣܰܓܿܺܝܳܐܐ ܘܰܒܥܳܬܼܳܐ܃ ܠܦܿܰܘܠܳܘܣ ܘܰܠܒܼܰܪܢܰܒܼܰܐ ܥܰܡܗܽܘܢ܂ ܘܰܗܘܳܬܼ܂ ܕܢܶܣܩܽܘܢ ܦܿܰܘܠܳܘܣ ܘܒܼܰܪܢܰܒܼܰܐ ܘܰܐ̱ܚܪ̈ܳܢܶܐ ܥܰܡܗܽܘܢ܃ ܠܘܳܬܼ ܫܠܺܝܚܶܐ̈ ܘܩܰܫܺܝܫܶܐ̈ ܕܒܽܐܘܪܺܫܠܶܡ܂ ܡܶܛܽܠ ܗܳܕܼܶܐ ܒܥܳܬܼܳܐ܂
15:03 [ai]ܘܠܰܘܝܰܬܼ ܫܰܕܿܪܰܬܼ ܐܶܢܽܘܢ ܥܺܕ̱ܿܬܳܐ܂ ܘܪܳܕܼܶܝܢ ܗ̱ܘܰܘ ܒܟܽܠܳܗ ܦܿܽܘܢܺܝܩܺܐ܂ ܘܳܐܦܼ ܒܶܝܬܼ ܫܳܡܪ̈ܳܝܶܐ܃ ܟܰܕܼ ܡܶܫܬܿܰܥܶܝܢ ܗ̱ܘܰܘ ܥܰܠ ܦܽܘܢܳܝܳܐ ܕܥܰܡ̱ܡܶܐ̈܂ ܘܥܳܒܼܕܺܝܢ ܗ̱ܘܰܘ ܚܰܕܼܽܘܬܼܳܐ ܪܰܒܿܬܼܳܐ ܠܟܼܽܠܗܽܘܢ ܐܰܚܶܐ̈ ܿ܀ܿ܀ܿ
15:04 [ai]ܘܟܼܰܕܼ ܐܶܬܼܰܘ ܠܽܐܘܪܺܫܠܶܡ܃ ܐܶܬܼܩܰܒܿܰܠܘ ܡܶܢ ܥܺܕ̱ܿܬܳܐ ܘܡܶܢ ܫܠܺܝܚܶܐ̈ ܘܡܶܢ ܩܰܫܺܝܫܶܐ̈܂ ܘܶܐܫܬܿܰܥܺܝܘ ܠܗܽܘܢ ܟܽܠ ܡܳܐ ܕܰܥܒܼܰܕܼ ܥܰܡܗܽܘܢ ܐܰܠܳܗܳܐ܂
15:05 [ai]ܩܳܡܘ ܗ̱ܘܰܘ ܕܶܝܢ ܐ̱ܢܳܫܳܐ܂ ܐܰܝܠܶܝܢ ܕܗܰܝܡܶܢܘ ܗ̱ܘܰܘ ܡܶܢ ܝܽܘܠܦܿܳܢܳܐ ܕܿܰܦܼܪ̈ܺܝܫܶܐ ܘܳܐܡܪܺܝܢ܃ ܕܘܳܠܶܐ ܗ̱ܽܘ ܠܟܼܽܘܢ ܠܡܶܓܼܙܰܪ ܐܶܢܽܘܢ܃ ܘܰܬܼܦܼܰܩܕܼܽܘܢ ܐܶܢܽܘܢ܃ ܕܢܶܛܪܽܘܢ ܢܳܡܽܘܣܳܐ ܕܡܽܘܫܶܐ܂
15:06 [ai]ܐܶܬܼܟܿܰܢܰܫܘ ܕܶܝܢ ܫܠܺܝܚܶܐ̈ ܘܩܰܫܺܝܫܶܐ̈܃ ܕܢܶܚܙܽܘܢ ܥܰܠ ܡܶܠܬܼܳܐ ܗܳܕܼܶܐ܂
15:07 [ai]ܘܟܼܰܕܼ ܗܘܳܬܼ ܒܥܳܬܼܳܐ ܣܰܓܿܺܝܐܬܼܳܐ܃ ܩܳܡ ܫܶܡܥܽܘܢ ܘܶܐܡܰܪ ܠܗܽܘܢ܂ ܓܿܰܒܼܪ̈ܶܐ ܐܰܚܺܝܢ̈܃ ܐܰܢ̱ܬܿܽܘܢ ܝܳܕܼܥܺܝܢ ܐܢ̱ܬܿܽܘܢ܃ ܕܡܶܢ ܝܰܘܡܳܬܼܳܐ̈ ܩܰܕܼܡܳܝ̈ܶܐ܃ ܡܶܢ ܦܽܘܡܝ ܕܺܝܠܝ ܓܒܼܳܐ ܐܰܠܳܗܳܐ܂ ܕܢܶܫܡܥܽܘܢ ܥܰܡ̱ܡܶܐ̈܃ ܡܶܠܬܼܳܐ ܕܰܣܒܼܰܪܬܼܳܐ ܘܰܢܗܰܝܡܢܽܘܢ܂
15:08 [ai]ܘܰܐܠܳܗܳܐ ܕܝܳܕܼܰܥ ܕܰܒܼܠܶܒܿܰܘܳܬܼܳܐ̈܂ ܐܰܣܗܶܕܼ ܥܠܰܝܗܽܘܢ܃ ܘܝܰܗ̱ܒܼ ܠܗܽܘܢ ܪܽܘܚܳܐ ܕܩܽܘܕܼܫܳܐ܂ ܐܰܝܟܼ ܕܠܰܢ܂
15:09 [ai]ܘܡܶܕܶܡ ܠܳܐ ܦܪܰܫ ܒܰܝܢܰܝܢ ܘܰܠܗܽܘܢ܃ ܡܶܛܽܠ ܕܕܼܰܟܿܺܝ ܒܗܰܝܡܳܢܽܘܬܼܳܐ ܠܶܒܿܰܘܳܬܼܗܽܘܢ̈܂
15:10 [ai]ܘܗܳܫܳܐ ܐܰܢ̱ܬܿܽܘܢ ܡܳܢܳܐ ܡܢܰܣܶܝܢ ܐܢ̱ܬܿܽܘܢ ܠܰܐܠܳܗܳܐ܃ ܐܰܝܟܼ ܕܰܬܼܣܺܝܡܽܘܢ ܢܺܝܪܳܐ ܥܰܠ ܨܰܘܪ̈ܰܝܗܽܘܢ ܕܬܰܠܡܺܝܕܼܶܐ̈܃ ܐܰܝܢܳܐ ܕܳܐܦܼܠܳܐ ܐܰܒܼܳܗܳܬܼܰܢ̈܂ ܐܳܦܼܠܳܐ ܚܢܰܢ܂ ܐܶܫܟܿܰܚܢ ܠܡܶܛܥܰܢ܂
15:11 [ai]ܐܶܠܳܐ ܒܛܰܝܒܿܽܘܬܼܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܃ ܡܗܰܝܡܢܺܝܢܰܢ܃ ܕܢܺܚܶܐ ܐܰܟܼܘܳܬܼܗܽܘܢ܂
15:12 [ai]ܘܰܫܬܼܶܩܘ ܟܽܠܶܗ ܟܶܢܫܳܐ܃ ܘܫܳܡܥܺܝܢ ܗ̱ܘܰܘ ܠܦܿܰܘܠܳܘܣ ܘܰܠܒܼܰܪܢܰܒܼܰܐ܃ ܕܡܶܫܬܿܰܥܶܝܢ ܗ̱ܘܰܘ ܟܽܠ ܡܳܐ ܕܰܥܒܼܰܕܼ ܐܰܠܳܗܳܐ ܒܺܐܝܕܼܰܝܗܽܘܢ̈܃ ܐܳܬܼܘܳܬܼܳܐ̈ ܘܰܓܼܒܼܰܪ̈ܘܳܬܼܳܐ ܒܥܰܡ̱ܡܶܐ̈܂
15:13 [ai]ܘܒܼܳܬܼܰܪ ܕܰܫܬܼܶܩܘ܃ ܩܳܡ ܝܰܥܩܽܘܒܼ ܘܶܐܡܰܪ܂ ܓܿܰܒܼܪ̈ܶܐ ܐܰܚܰܝܢ̈܃ ܫܽܘܡܥܽܘܢܝ܂
15:14 [ai]ܫܶܡܥܽܘܢ ܐܶܫܬܿܰܥܺܝ ܠܟܼܽܘܢ܃ ܐܰܝܟܿܰܢܳܐ ܫܰܪܺܝ ܐܰܠܳܗܳܐ ܠܡܶܓܼܒܿܳܐ ܡܶܢ ܥܰܡ̱ܡܶܐ̈܂ ܥܰܡܳܐ ܠܰܫܡܶܗ܂
15:15 [ai]ܘܰܠܗܳܕܼܶܐ ܫܳܠܡܳܢ̈ ܡܶܠܰܝܗܽܘܢ̈ ܕܰܢܒܼܺܝܶܐ̈܃ ܐܰܝܟܼ ܡܳܐ ܕܰܟܼܬܼܺܝܒܼ܂
15:16 [ai]ܕܡܶܢ ܒܳܬܼܰܪ ܗܳܠܶܝܢ܂ ܐܶܗܦܿܽܘܟܼ ܘܰܐܩܺܝܡ ܡܰܫܟܿܢܶܗ ܕܕܼܰܘܺܝܕܼ܂ ܐܰܝܢܳܐ ܕܰܢܦܼܰܠ܂ ܘܶܐܒܼܢܶܐ ܡܶܕܶܡ ܕܰܢܦܼܰܠ ܡܶܢܶܗ܂ ܘܰܐܩܺܝܡܺܝܘܗ̱ܝ܃
15:17 [ai]ܐܰܝܟܼ ܕܢܶܒܼܥܽܘܢ ܫܰܪܟܿܗܽܘܢ ܕܿܰܒܼܢܰܝܢܳܫܳܐ ܠܡܳܪܝܳܐ܃ ܘܟܼܽܠܗܽܘܢ ܥܰܡ̱ܡܶܐ̈܂ ܐܰܝܠܶܝܢ ܕܶܐܬܼܩܪܺܝ ܫܶܡܝ ܥܠܰܝܗܽܘܢ܂ ܐܳܡܰܪ ܡܳܪܝܳܐ ܕܰܥܒܼܰܕܼ ܗܳܠܶܝܢ ܟܽܠܗܶܝܢ܂
15:18 [ai]ܺܝܕܼܺܝܥܺܝܢ ܡܶܢ ܥܳܠܰܡ ܥܒܼܳܕܼܰܘܗ̱ܝ̈ ܕܰܐܠܳܗܳܐ܂
15:19 [ai]ܡܶܛܽܠ ܗܳܕܼܶܐ ܐܶܢܳܐ ܐܳܡܰܪ ܐ̱ܢܳܐ܃ ܕܠܳܐ ܢܶܗܘܽܘܢ ܫܳܚܩܺܝܢ ܠܰܐܝܠܶܝܢ ܕܡܶܢ ܥܰܡ̱ܡܶܐ̈ ܡܶܬܼܦܿܢܶܝܢ ܠܘܳܬܼ ܐܰܠܳܗܳܐ܂
15:20 [ai]ܐܶܠܳܐ ܢܶܫܬܿܠܰܚ ܠܗܽܘܢ܃ ܕܢܶܗܘܽܘܢ ܦܰܪܺܝܩܺܝܢ ܡܶܢ ܛܰܡܐܘܽܬܼܳܐ ܕܰܕܼܒܼܺܝܚܳܐ܂ ܘܡܶܢ ܙܳܢܝܽܘܬܼܳܐ܂ ܘܡܶܢ ܕܰܚܢܺܝܩܳܐ܂ ܘܡܶܢ ܕܡܳܐ܂
15:21 [ai]ܡܽܘܫܶܐ ܓܶܝܪ ܡܶܢ ܕܿܳܪ̈ܶܐ ܩܰܕܼܡܳܝ̈ܶܐ܃ ܒܟܽܠ ܡܕܼܺܝܢܳܐ ܐܺܝܬܼ ܗ̱ܘܳܐ ܠܶܗ ܟܿܳܪ̈ܽܘܙܶܐ ܒܰܟܼܢܽܘܫܳܬܼܳܐ̈܃ ܕܰܒܼܟܼܽܠ ܫܰܒܺܝܢ̈ ܩܳܪܶܝܢ ܠܶܗ܂
15:22 [ai]ܗܳܝܕܶܝܢ ܫܠܺܝܚܶܐ̈ ܘܩܰܫܺܝܫܶܐ̈ ܥܰܡ ܟܽܠܳܗ ܥܺܕ̱ܿܬܳܐ܃ ܓܒܼܰܘ ܓܿܰܒܼܪ̈ܶܐ ܡܶܢܗܽܘܢ܂ ܘܫܰܕܿܰܪܘ ܠܰܐܢܛܺܝܳܘܟܼܺܝ ܥܰܡ ܦܿܰܘܠܳܘܣ ܘܒܼܰܪܢܰܒܼܰܐ܃ ܠܺܝܗܽܘܕܼܳܐ ܕܡܶܬܼܩܪܶܐ ܒܰܪ ܫܰܒܿܳܐ܂ ܘܰܠܫܺܝܠܳܐ܃ ܓܿܰܒܼܪ̈ܶܐ ܕܿܪ̈ܺܫܶܐ ܗ̱ܘܰܘ ܒܗܽܘܢ ܒܰܐܚܶܐ̈܂
15:23 [ai]ܘܰܟܼܬܼܰܒܼܘ ܐܶܓܿܰܪܬܳܐ ܒܺܐܝܕܼܰܝܗܽܘܢ̈ ܗܳܟܼܰܢܳܐ܂ ܫܠܺܝܚܶܐ̈ ܘܩܰܫܺܝܫܶܐ̈ ܘܰܐܚܶܐ̈܃ ܠܰܐܝܠܶܝܢ ܕܺܐܝܬܼ ܒܰܐܢܛܺܝܳܘܟܼܺܝ ܘܰܒܣܽܘܪܺܝܰܐ ܘܰܒܩܺܝܠܺܝܩܺܝܰܐ܃ ܐܰܚܶܐ̈ ܕܡܶܢ ܥܰܡ̱ܡܶܐ̈܂ ܫܠܳܡ܂
15:24 [ai]ܫܡܺܝܥ ܠܰܢ܃ ܕܐ̱ܢܳܫܺܝܢ̈ ܡܶܢܰܢ ܢܦܼܰܩܘ ܘܕܼܰܠܰܚܟܼܽܘܢ ܒܡܶܠܶܐ̈܃ ܘܰܐܗܦܿܶܟܼܘ ܢܰܦܼܫܳܬܼܟܼܽܘܢ̈܂ ܟܰܕܼ ܐܳܡܪܺܝܢ܃ ܕܬܶܗܘܽܘܢ ܓܳܙܪܺܝܢ ܘܢܳܛܪܺܝܢ ܢܳܡܽܘܣܳܐ܂ ܐܰܝܠܶܝܢ ܕܰܚܢܰܢ ܠܳܐ ܦܰܩܶܕܼܢ ܐܶܢܽܘܢ܂
15:25 [ai]ܡܶܛܽܠ ܗܳܢܳܐ ܐܶܬܼܚܰܫܰܒܼܢ ܟܽܠܰܢ ܟܰܕܼ ܟܢܺܝܫܺܝܢܰܢ܂ ܘܰܓܼܒܼܰܝܢ ܓܿܰܒܼܪ̈ܶܐ ܘܫܰܕܿܰܪܢ ܠܘܳܬܼܟܼܽܘܢ܃ ܥܰܡ ܦܿܰܘܠܳܘܣ ܘܒܼܰܪܢܰܒܼܰܐ ܚܰܒܺܝܒܼܰܝܢ̈܂
15:26 [ai]ܐ̱ܢܳܫܳܐ ܕܰܐܫܠܶܡܘ ܢܰܦܼܫܳܬܼܗܽܘܢ̈ ܚܠܳܦܼ ܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂
15:27 [ai]ܘܫܰܕܿܰܪܢ ܥܰܡܗܽܘܢ ܠܺܝܗܽܘܕܼܳܐ ܘܰܠܫܺܝܠܳܐ܃ ܕܗܶܢܽܘܢ ܒܡܶܠܬܼܳܐ ܢܺܐܡܪܽܘܢ ܠܟܼܽܘܢ ܗܶܢܶܝܢ ܗܳܠܶܝܢ܂
15:28 [ai]ܗܘܳܐ ܓܶܝܪ ܨܶܒܼܝܳܢܳܐ ܠܪܽܘܚܳܐ ܕܩܽܘܕܼܫܳܐ ܘܳܐܦܼ ܠܰܢ܃ ܕܠܳܐ ܢܶܬܿܬܣܺܝܡ ܥܠܰܝܟܿܽܘܢ ܝܽܘܩܪܳܐ ܝܰܬܿܺܝܪܳܐ ܠܒܼܰܪ ܡܶܢ ܗܳܠܶܝܢ ܕܳܐܠܨܳܢ̈܃
15:29 [ai]ܕܬܶܬܼܪܰܚܩܽܘܢ ܡܶܢ ܕܰܕܼܒܼܺܝܚܳܐ܂ ܘܡܶܢ ܕܡܳܐ܂ ܘܡܶܢ ܚܢܺܝܩܳܐ܂ ܘܡܶܢ ܙܳܢܝܽܘܬܼܳܐ܃ ܕܟܰܕܼ ܬܶܛܪܽܘܢ ܢܰܦܼܫܟܼܽܘܢ ܡܶܢ ܗܳܠܶܝܢ ܫܰܦܿܺܝܪ ܬܶܗܘܽܘܢ܂ ܗܘܰܘ ܫܰܪܺܝܪܺܝܢ ܒܡܳܪܰܢ܀
15:30 [ai]ܗܳܢܽܘܢ ܕܶܝܢ ܕܶܐܫܬܿܠܰܚܘ܂ ܐܶܬܼܰܘ ܠܰܐܢܛܺܝܳܟܼܺܝܰܐ܂ ܘܰܟܼܢܰܫܘ ܟܽܠܶܗ ܥܰܡܳܐ ܘܝܰܗ̱ܒܼܘ ܐܶܓܿܰܪܬܳܐ܂
15:31 [ai]ܘܟܼܰܕܼ ܩܪܰܘ܃ ܚܕܼܺܝܘ ܘܶܐܬܼܒܰܝܰܐܘ܂
15:32 [ai]ܘܰܒܡܶܠܬܼܳܐ ܥܰܬܿܺܝܪܬܳܐ܂ ܚܰܝܶܠܘ ܠܰܐܚܶܐ̈ ܘܩܰܝܶܡܘ ܐܶܢܽܘܢ܂ ܕܒܶܝܬܼ ܺܝܗܽܘܕܼܳܐ ܘܫܺܝܠܳܐ܃ ܡܶܛܽܠ ܕܳܐܦܼ ܗܶܢܽܘܢ ܢܒܼܺܝܶܐ̈ ܗ̱ܘܰܘ܂
15:33 [ai]ܘܟܼܰܕܼ ܗܘܰܘ ܬܰܡܳܢ ܙܰܒܼܢܳܐ܃ ܫܪܰܘ ܐܶܢܽܘܢ ܐܰܚܶܐ̈ ܒܰܫܠܳܡܳܐ ܠܘܳܬܼ ܫܠܺܝܚܶܐ̈܀
15:34 [ai]ܒܪܰܡ ܗܘܳܐ ܨܶܒܼܝܳܢܶܗ ܕܫܺܝܠܳܐ ܕܰܢܩܰܘܶܐ ܬܰܡܳܢ܂
15:35 [ai]ܦܿܰܘܠܳܘܣ ܕܶܝܢ ܘܒܼܰܪܢܰܒܼܰܐ ܩܰܘܺܝܘ ܗ̱ܘܰܘ ܒܰܐܢܛܺܝܳܘܟܼܺܝ܂ ܘܡܰܠܦܼܺܝܢ ܗ̱ܘܰܘ ܘܰܡܣܰܒܿܪܺܝܢ ܥܰܡ ܐ̱ܚܪ̈ܳܢܶܐ ܣܰܓܿܺܝܶܐܐ̈܂ ܡܶܠܬܼܶܗ ܕܰܐܠܳܗܳܐ܂
15:36 [ai]ܘܒܼܳܬܼܰܪ ܝܰܘܡܳܬܼܳܐ̈܂ ܐܶܡܰܪ ܦܿܰܘܠܳܘܣ ܠܒܼܰܪܢܰܒܼܰܐ܂ ܢܶܬܼܦܿܢܶܐ ܘܢܶܣܥܽܘܪ ܠܰܐܚܶܐ̈ ܕܰܒܼܟܼܽܠ ܡܕܼܺܝܢܳܐ ܕܰܐܟܼܪܶܙܢ ܒܿܳܗ ܡܶܠܬܼܳܐ ܕܰܐܠܳܗܳܐ܂ ܘܢܶܚܙܶܐ ܡܳܢܳܐ ܥܒܼܺܝܕܼܺܝܢ܂
15:37 [ai]ܒܰܪܢܰܒܼܰܐ ܕܶܝܢ ܨܳܒܼܶܐ ܗ̱ܘܳܐ܃ ܕܿܢܶܕܼܒܰܪ ܠܝܽܘܚܰܢܳܢ܂ ܗܰܘ ܕܶܐܬܼܟܿܰܢܺܝ ܡܰܪܩܳܘܣ܂
15:38 [ai]ܦܿܰܘܠܳܘܣ ܕܶܝܢ ܠܳܐ ܨܳܒܼܶܐ ܗ̱ܘܳܐ܃ ܕܿܢܶܕܼܒܪܶܗ ܥܰܡܗܽܘܢ܃ ܡܶܛܽܠ ܕܰܫܒܼܰܩ ܗ̱ܘܳܐ ܐܶܢܽܘܢ܂ ܟܰܕܼ ܗܶܢܽܘܢ ܒܦܿܰܡܦܼܽܘܠܺܝܰܐ܃ ܘܠܳܐ ܐܶܙܰܠ ܥܰܡܗܽܘܢ܂
15:39 [ai]ܡܶܛܽܠ ܗܳܢܳܐ ܚܶܪܝܳܢܳܐ܂ ܦܪܰܫܘ ܚܰܕܼ ܡܶܢ ܚܰܕܼ܃ ܘܒܼܰܪܢܰܒܼܰܐ ܕܒܰܪ ܠܡܰܪܩܳܘܣ ܘܰܪܕܼܰܘ ܒܝܰܡܳܐ ܘܶܐܙܰܠܘ ܠܗܽܘܢ ܠܩܽܘܦܿܪܳܘܣ܂
15:40 [ai]ܦܿܰܘܠܳܘܣ ܕܶܝܢ ܓܒܼܳܐ ܠܶܗ ܠܫܺܝܠܳܐ܃ ܘܰܢܦܼܰܩ܂ ܟܰܕܼ ܡܰܓܼܥܶܠ ܡܶܢ ܐܰܚܶܐ̈ ܠܛܰܝܒܿܽܘܬܼܳܐ ܕܰܐܠܳܗܳܐ܂
15:41 [ai]ܘܪܳܕܼܶܐ ܗ̱ܘܳܐ ܒܣܽܘܪܺܝܰܐ ܘܰܒܩܺܝܠܺܝܩܺܝܰܐ ܘܰܡܩܰܝܶܡ ܥܺܕܼܳܬܼܳܐ̈܂

next chapter