← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62044: P Acts

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


16:01 [ai]ܘܡܰܛܺܝ ܗ̱ܘܳܐ ܠܕܼܶܪܒܿܺܐ ܡܕܼܺܝܢ̱ܬܳܐ ܘܰܠܠܽܘܣܛܪܰܐ܀ ܐܺܝܬܼ ܗ̱ܘܳܐ ܕܶܝܢ ܬܰܡܳܢ ܬܰܠܡܺܝܕܼܳܐ ܚܰܕܼ ܕܰܫܡܶܗ ܛܺܝܡܳܬܼܶܐܳܘܣ܂ ܒܪܳܗ ܕܺܝܗܽܘܕܼܳܝܬܳܐ ܚܕܼܳܐ ܡܗܰܝܡܰܢܬܳܐ܂ ܘܰܐܒܼܽܘܗ̱ܝ ܐܰܪܡܳܝܳܐ ܗ̱ܘܳܐ܂
16:02 [ai]ܘܟܼܽܠܗܽܘܢ ܬܰܠܡܺܝܕܼܶܐ̈ ܕܡܶܢ ܠܽܘܣܛܪܰܐ ܘܡܶܢ ܐܺܝܩܳܢܺܘܳܢ܃ ܡܰܣܗܕܼܺܝܢ ܗ̱ܘܰܘ ܥܠܰܘܗ̱ܝ܂
16:03 [ai]ܠܗܳܢܳܐ ܨܒܼܳܐ ܗ̱ܘܳܐ ܦܿܰܘܠܳܘܣ܃ ܕܢܶܕܼܒܿܪܺܝܘܗ̱ܝ ܥܰܡܶܗ܂ ܘܰܢܣܰܒܼ ܓܰܙܪܶܗ܃ ܡܶܛܽܠ ܺܝܗܽܘܕܼܳܝܶܐ̈ ܕܺܐܝܬܼ ܗ̱ܘܰܘ ܒܰܐܬܼܪܳܐ܂ ܝܳܕܼܥܺܝܢ ܗ̱ܘܰܘ ܓܶܝܪ ܟܽܠܗܽܘܢ ܠܰܐܒܼܽܘܗ̱ܝ܂ ܕܰܐܪܡܳܝܳܐ ܗ̱ܘܳܐ܂
16:04 [ai]ܘܟܼܰܕܼ ܐܳܙܺܠ̱ܝܢ ܗ̱ܘܰܘ ܒܰܡܕܼܺܝܢܳܬܼܳܐ̈܃ ܡܰܟܼܪܙܺܝܢ ܗ̱ܘܰܘ ܘܡܰܠܦܼܺܝܢ ܠܗܽܘܢ܃ ܕܢܶܗܘܽܘܢ ܢܳܛܪܺܝܢ ܦܽܘܩܕܳܢܶܐ̈܂ ܐܰܝܠܶܝܢ ܕܰܟܼܬܼܰܒܼܘ ܫܠܺܝܚܶܐ̈ ܘܩܰܫܺܝܫܶܐ̈ ܕܒܽܐܘܪܺܫܠܶܡ܀
16:05 [ai]ܒܪܰܡ ܥܺܕܼܳܬܼܳܐ̈ ܡܶܬܼܩܰܝܡܳܢ̈ ܗ̱ܘܰܝ̈ ܒܗܰܝܡܳܢܽܘܬܼܳܐ܂ ܘܣܳܓܼܝܳܢ̈ ܗ̱ܘܰܝ̈ ܒܡܶܢܝܳܢܳܐ ܟܽܠܝܽܘܡ܂
16:06 [ai]ܗܰܠܶܟܼܘ ܕܶܝܢ ܒܰܦܼܪܽܘܓܼܺܝܰܐ ܘܰܒܓܼܰܠܰܛܺܝܰܐ ܐܰܬܼܪ̈ܰܘܳܬܼܳܐ܂ ܘܰܟܼܠܳܬܼ ܐܶܢܽܘܢ ܪܽܘܚܳܐ ܕܩܽܘܕܼܫܳܐ܃ ܕܠܳܐ ܢܡܰܠܠܽܘܢ ܡܶܠܬܼܳܐ ܕܰܐܠܳܗܳܐ ܒܰܐܣܺܝܰܐ܂
16:07 [ai]ܘܟܼܰܕܼ ܐܶܬܼܰܘ ܠܡܽܘܣܺܝܰܐ ܐܰܬܼܪܳܐ܃ ܨܳܒܼܶܝܢ ܗ̱ܘܰܘ܂ ܕܢܺܐܙܽܠ̱ܘܢ ܡܶܢ ܬܰܡܳܢ ܠܒܼܺܝܬܼܽܘܢܺܝܰܐ܂ ܘܠܳܐ ܐܰܦܿܣܰܬܼ ܠܗܽܘܢ ܪܽܘܚܶܗ ܕܝܶܫܽܘܥ܂
16:08 [ai]ܘܟܼܰܕܼ ܢܦܼܰܩܘ ܡܶܢ ܡܽܘܣܺܝܰܐ܃ ܢܚܶܬܼܘ ܠܗܽܘܢ ܠܰܛܪܳܘܰܐܣ ܐܰܬܼܪܳܐ܂
16:09 [ai]ܘܰܒܚܶܙܘܳܐ ܕܠܺܠܝܳܐ܃ ܐܶܬܼܚܙܺܝ ܠܦܿܰܘܠܳܘܣ ܐܰܝܟܼ ܓܰܒܼܪܳܐ ܚܰܕܼ ܡܰܩܶܕܼܳܘܢܺܝܰܐ܃ ܕܩܳܐܶܡ ܘܒܼܳܥܶܐ ܡܶܢܶܗ ܟܰܕܼ ܐܳܡܰܪ܂ ܕܬܳܐ ܠܡܰܩܶܕܼܳܘܢܺܝܰܐ ܘܥܰܕܿܰܪܰܝܢܝ ܿ܀ܿ܀ܿ
16:10 [ai]ܟܰܕܼ ܕܶܝܢ ܚܙܳܐ ܦܿܰܘܠܳܘܣ ܗܳܢܳܐ ܚܶܙܘܳܐ܃ ܡܶܚܕܼܳܐ ܨܒܼܰܝܢ ܠܡܶܦܿܰܩ ܠܡܰܩܶܕܼܳܘܢܺܝܰܐ܃ ܡܶܛܽܠ ܕܶܐܣܬܿܰܟܿܰܠܢ ܕܡܳܪܰܢ ܩܪܳܢ ܕܿܰܢܣܰܒܰܪ ܐܶܢܽܘܢ܂
16:11 [ai]ܘܰܪܕܼܰܝܢ ܡܶܢ ܛܪܳܘܰܐܣ ܘܰܬܼܪܰܨܢ ܠܣܰܡܳܬܼܪܰܩܺܐ܂ ܘܡܶܢ ܬܰܡܳܢ ܠܝܰܘܡܳܐ ܐ̱ܚܪܺܢܳܐ܃ ܐܶܬܼܰܝܢ ܠܢܶܐܰܦܿܳܘܠܺܝܣ ܡܕܼܺܝܢ̱ܬܳܐ܃
16:12 [ai]ܘܡܶܢ ܬܰܡܳܢ ܠܦܼܺܝܠܺܝܦܿܳܘܣ܃ ܕܗܺܝ ܗ̱ܺܝ ܪܺܫܳܐ ܕܡܰܩܶܕܼܳܘܢܺܝܰܐ܃ ܘܺܐܝܬܼܶܝܗ ܩܳܘܠܳܘܢܺܝܰܐ܂ ܗܘܰܝܢ ܕܶܝܢ ܒܿܳܗ ܒܗܳܕܼܶܐ ܡܕܼܺܝܢ̱ܬܳܐ ܝܰܘܡܳܬܼܳܐ̈ ܺܝܕܼܺܝܥܶܐ̈܂
16:13 [ai]ܘܰܢܦܼܰܩܢ ܒܝܰܘܡܳܐ ܕܫܰܒܿܬܼܳܐ ܠܒܼܰܪ ܡܶܢ ܬܰܪܥܳܐ ܕܰܡܕܼܺܝܢ̱ܬܳܐ ܥܰܠ ܝܰܕܼ ܢܰܗܪܳܐ܃ ܡܶܛܽܠ ܕܬܰܡܳܢ ܡܶܬܼܚܙܶܐ ܗ̱ܘܳܐ ܒܶܝܬܼ ܨܠܽܘܬܼܳܐ܂ ܘܟܼܰܕܼ ܺܝܬܼܶܒܼܢ܃ ܡܡܰܠܠܺܝܢ ܗ̱ܘܰܝܢ ܥܰܡ ܢܶܫܶܐ̈ ܕܰܟܼܢܺܝܫܳܢ̈ ܗ̱ܘܰܝ̈ ܬܰܡܳܢ܂
16:14 [ai]ܘܰܐܢ̱ܬܿܬܼܳܐ ܚܕܼܳܐ ܡܙܰܒܿܢܰܬܼ ܐܰܪܓܿܘܳܢܳܐ܂ ܕܕܼܳܚܠܳܐ ܗ̱ܘܳܬܼ ܡܶܢ ܐܰܠܳܗܳܐ܃ ܫܡܳܗ ܗܘܳܐ ܠܽܘܕܼܺܝܰܐ܂ ܡܶܢ ܬܿܶܐܘܰܛܺܝܪܰܐ ܡܕܼܺܝܢ̱ܬܳܐ܂ ܕܗܳܕܼܶܐ ܦܬܼܰܚ ܠܶܒܿܳܗ ܡܳܪܰܢ܃ ܘܫܳܡܥܳܐ ܗ̱ܘܳܬܼ ܡܶܕܶܡ ܕܳܐܡܰܪ ܦܿܰܘܠܳܘܣ܂
16:15 [ai]ܘܥܶܡܕܿܰܬܼ ܗ̱ܘܳܬܼ܂ ܗܺܝ ܘܰܒܢܰܝ ܒܰܝܬܿܳܗ܂ ܘܒܼܳܥܝܳܐ ܗ̱ܘܳܬܼ ܡܶܢܰܢ ܘܳܐܡܪܳܐ܂ ܕܶܐܢ ܗܽܘ ܕܫܰܪܺܝܪܳܐܺܝܬܼ ܬܟܼܺܝܠܺܝܢ ܐܢ̱ܬܿܽܘܢ ܕܗܰܝܡܢܶܬܼ ܒܡܳܪܰܢ܃ ܬܰܘ ܫܪܰܘ ܠܟܼܽܘܢ ܒܒܼܰܝܬܿܝ܂ ܘܣܰܓܿܺܝ ܐܶܠܰܨܬܼܰܢ܀
16:16 [ai]ܘܰܗܘܳܐ ܕܟܰܕܼ ܐܳܙܺܠ̱ܝܢܰܢ ܠܒܼܶܝܬܼ ܨܠܽܘܬܼܳܐ܃ ܦܶܓܼܥܰܬܼ ܒܰܢ ܥܠܰܝܡܬܼܳܐ ܚܕܼܳܐ܃ ܕܺܐܝܬܼ ܗ̱ܘܳܐ ܠܳܗ ܪܽܘܚܳܐ ܕܩܶܨܡܶܐ̈܃ ܘܥܳܒܼܕܿܳܐ ܗ̱ܘܳܬܼ ܠܡܳܪ̈ܶܝܗ ܬܿܶܐܓܼܽܘܪܬܳܐ ܣܰܓܿܺܝܐܬܼܳܐ ܒܩܶܨܡܳܐ ܕܩܳܨܡܳܐ ܗ̱ܘܳܬܼ܂
16:17 [ai]ܘܳܐܬܼܝܳܐ ܗ̱ܘܳܬܼ ܒܳܬܼܰܪ ܦܿܰܘܠܳܘܣ ܘܒܼܳܬܼܪܢ܃ ܘܩܳܥܝܳܐ ܗ̱ܘܳܬܼ ܘܳܐܡܪܳܐ܂ ܗܳܠܶܝܢ ܐ̱ܢܳܫܳܐ ܥܰܒܼܕܿܰܘܗ̱ܝ̈ ܐܶܢܽܘܢ ܕܰܐܠܳܗܳܐ ܡܪܰܝܡܳܐ܃ ܘܰܡܣܰܒܿܪܺܝܢ ܠܟܼܽܘܢ ܐܽܘܪܚܳܐ ܕܚܰܝ̈ܶܐ܂
16:18 [ai]ܘܗܳܟܼܰܢܳܐ ܥܳܒܼܕܿܳܐ ܗ̱ܘܳܬܼ ܝܰܘܡܳܬܼܳܐ̈ ܣܰܓܿܺܝܶܐܐ̈܂ ܘܶܐܬܿܬܿܦܼܺܝܪ ܦܿܰܘܠܳܘܣ ܘܶܐܡܰܪ ܠܳܗ ܠܪܽܘܚܳܐ ܗܳܝ܂ ܦܳܩܶܕܼ ܐ̱ܢܳܐ ܠܶܟܼܝ ܒܰܫܡܶܗ ܕܝܶܫܽܘܥ ܡܫܺܝܚܳܐ܃ ܕܬܶܦܿܩܺܝܢ ܡܶܢܳܗ܂ ܘܒܼܳܗ ܒܫܳܥܬܼܳܐ ܢܶܦܼܩܰܬܼ܂
16:19 [ai]ܘܟܼܰܕܼ ܚܙܰܘ ܡܳܪ̈ܶܝܗ ܕܰܢܦܼܰܩ ܠܶܗ ܡܶܢܳܗ ܣܰܒܼܪܳܐ ܕܬܶܐܓܼܽܘܪܬܿܗܽܘܢ܃ ܐܰܚܕܿܽܘܗ̱ܝ ܠܦܿܰܘܠܳܘܣ ܘܰܠܫܺܝܠܳܐ܂ ܘܰܢܓܼܰܕܼܘ ܐܰܝܬܿܺܝܘ ܐܶܢܽܘܢ ܠܫܽܘܩܳܐ܂
16:20 [ai]ܘܩܰܪܶܒܼܘ ܐܶܢܽܘܢ ܠܶܐܣܛܪ̈ܰܛܺܓܼܶܐ ܘܰܠܪ̈ܺܫܶܐ ܕܰܡܕܼܺܝܢ̱ܬܳܐ܂ ܘܳܐܡܪܺܝܢ ܗ̱ܘܰܘ܂ ܕܗܳܠܶܝܢ ܐ̱ܢܳܫܳܐ ܡܕܼܰܠܚܺܝܢ ܠܳܗ ܠܰܡܕܼܺܝܢ̱ܬܿܰܢ܃ ܡܶܛܽܠ ܕܺܝܗܽܘܕܼܳܝܶܐ̈ ܐܶܢܽܘܢ܂
16:21 [ai]ܘܡܰܟܼܪܙܺܝܢ ܠܰܢ ܥܝܳܕܼܶܐ̈܂ ܐܰܝܠܶܝܢ ܕܠܳܐ ܡܰܦܿܰܣ ܠܰܢ ܠܰܡܩܰܒܿܳܠܽܘ ܘܰܠܡܶܥܒܿܰܕܼ܃ ܡܶܛܽܠ ܕܿܪ̈ܽܗ̱ܘܡܳܝܶܐ ܚ̱ܢܰܢ܂
16:22 [ai]ܘܟܼܶܢܫܳܐ ܣܰܓܿܺܝܳܐܐ ܐܶܬܼܟܿܰܢܰܫܘ ܥܠܰܝܗܽܘܢ܂ ܗܳܝܕܶܝܢ ܐܶܣܛܪ̈ܰܛܺܓܼܶܐ ܣܰܕܿܶܩܘ ܢܰܚܬܿܰܝܗܽܘܢ̈܃ ܘܰܦܼܩܰܕܼܘ܂ ܕܰܢܢܰܓܿܕܼܽܘܢ ܐܶܢܽܘܢ܂
16:23 [ai]ܘܟܼܰܕܼ ܢܰܓܿܶܕܼܘ ܐܶܢܽܘܢ ܣܰܓܿܺܝ܃ ܐܰܪܡܺܝܘ ܐܶܢܽܘܢ ܒܶܝܬܼ ܐܰܣܺܝܪ̈ܶܐ܂ ܘܦܼܰܩܶܕܼܘ ܠܢܳܛܰܪ ܒܶܝܬܼ ܐܰܣܺܝܪ̈ܶܐ܃ ܕܢܶܛܰܪ ܐܶܢܽܘܢ ܙܗܺܝܪܳܐܺܝܬܼ܂
16:24 [ai]ܗܽܘ ܕܶܝܢ ܟܰܕܼ ܩܰܒܿܶܠ ܗܳܢܳܐ ܦܽܘܩܕܳܢܳܐ܃ ܐܰܥܶܠ ܚܒܼܰܫ ܐܶܢܽܘܢ ܒܒܼܰܝܬܳܐ ܓܰܘܳܝܳܐ ܕܒܶܝܬܼ ܐܰܣܺܝܪ̈ܶܐ܂ ܘܶܐܣܰܪ ܪ̈ܶܓܼܠܰܝܗܽܘܢ ܒܣܰܕܿܳܐ܂
16:25 [ai]ܘܰܒܦܼܶܠܓܼܶܗ ܕܠܺܠܝܳܐ܃ ܦܿܰܘܠܳܘܣ ܘܫܺܝܠܳܐ ܡܨܰܠܶܝܢ ܗ̱ܘܰܘ ܘܰܡܫܰܒܿܚܺܝܢ ܗ̱ܘܰܘ ܠܰܐܠܳܗܳܐ܂ ܘܫܳܡܥܺܝܢ ܗ̱ܘܰܘ ܠܗܽܘܢ ܐܰܣܺܝܪ̈ܶܐ܂
16:26 [ai]ܘܡܶܢ ܫܶܠܝܳܐ ܙܰܘܥܳܐ ܪܰܒܿܳܐ ܗܘܳܐ܂ ܘܶܐܬܿܬܿܙܺܝܥ ܫܶܬܼܶܐܣܶܐ̈ ܕܒܶܝܬܼ ܐܰܣܺܝܪ̈ܶܐ܂ ܘܶܐܬܼܦܬܼܰܚܘ ܡܶܚܕܼܳܐ ܬܿܰܪ̈ܥܶܐ ܟܽܠܗܽܘܢ܂ ܘܰܐܣܽܘܪ̈ܰܝܗܽܘܢ ܕܟܽܠܗܽܘܢ ܐܶܫܬܿܪܺܝܘ܂
16:27 [ai]ܘܟܼܰܕܼ ܐܶܬܿܬܿܥܺܝܪ ܢܳܛܰܪ ܒܶܝܬܼ ܐܰܣܺܝܪ̈ܶܐ܃ ܘܰܚܙܳܐ ܕܰܦܼܬܼܺܝܚܺܝܢ ܬܿܰܪ̈ܥܶܐ ܕܒܶܝܬܼ ܐܰܣܺܝܪ̈ܶܐ܃ ܢܣܰܒܼ ܣܰܦܼܣܺܪܳܐ ܘܰܒܥܳܐ܂ ܕܢܶܩܛܽܘܠ ܢܰܦܼܫܶܗ܃ ܡܶܛܽܠ ܕܣܳܒܼܰܪ ܗ̱ܘܳܐ ܕܰܥܪܰܩܘ ܠܗܽܘܢ ܐܰܣܺܝܪ̈ܶܐ܂
16:28 [ai]ܘܰܩܪܳܝܗ̱ܝ ܦܿܰܘܠܳܘܣ ܒܩܳܠܳܐ ܪܳܡܳܐ ܘܶܐܡܰܪ ܠܶܗ܂ ܠܳܐ ܬܶܥܒܿܶܕܼ ܠܢܰܦܼܫܳܟܼ ܡܶܕܶܡ ܕܒܺܝܫ܃ ܡܶܛܽܠ ܕܟܽܠܰܢ ܗܳܪܟܿܳܐ ܚܢܰܢ܂
16:29 [ai]ܘܰܐܢܗܰܪ ܠܶܗ ܫܪܳܓܼܳܐ ܘܰܫܘܰܪ ܘܥܰܠ ܟܰܕܼ ܪܳܐܶܬܼ܂ ܘܰܢܦܼܰܠ ܥܰܠ ܪ̈ܶܓܼܠܰܝܗܽܘܢ ܕܦܿܰܘܠܳܘܣ ܘܰܕܼܫܺܝܠܳܐ܂
16:30 [ai]ܘܰܐܦܿܶܩ ܐܶܢܽܘܢ ܠܒܼܰܪ܂ ܘܶܐܡܰܪ ܗ̱ܘܳܐ ܠܗܽܘܢ܂ ܡܳܪ̈ܰܝ܃ ܡܳܢܳܐ ܘܳܠܶܐ ܠܺܝ ܠܡܶܥܒܿܰܕܼ ܐܰܝܟܼ ܕܺܐܚܶܐ܂
16:31 [ai]ܘܗܶܢܽܘܢ ܐܳܡܪܺܝܢ ܗ̱ܘܰܘ ܠܶܗ܂ ܗܰܝܡܶܢ ܒܡܳܪܰܢ ܝܶܫܽܘܥ ܡܫܺܝܚܳܐ܃ ܘܬܼܺܚܶܐ ܐܰܢ̱ܬܿ ܘܒܼܰܝܬܿܳܟܼ܂
16:32 [ai]ܘܡܰܠܶܠܘ ܥܰܡܶܗ ܡܶܠܬܼܳܐ ܕܡܳܪܝܳܐ ܘܥܰܡ ܟܽܠܗܽܘܢ ܒܢܰܝ ܒܰܝܬܿܶܗ܂
16:33 [ai]ܘܒܼܳܗ ܒܫܳܥܬܼܳܐ ܒܶܗ ܒܠܺܠܝܳܐ܃ ܕܒܰܪ ܐܰܣܚܺܝ ܐܶܢܽܘܢ ܡܶܢ ܢܶܓܼܕܗܽܘܢ܂ ܘܒܼܰܪܫܳܥܬܼܶܗ ܥܡܰܕܼ܂ ܗܽܘ ܘܰܒܢܰܝ ܒܰܝܬܿܶܗ ܟܽܠܗܽܘܢ܂
16:34 [ai]ܘܰܕܼܒܼܰܪ ܐܰܣܶܩ ܐܶܢܽܘܢ ܠܒܼܰܝܬܿܶܗ܂ ܘܣܳܡ ܠܗܽܘܢ ܦܳܬܼܽܘܪܳܐ܂ ܘܪܳܘܶܙ ܗ̱ܘܳܐ܂ ܗܽܘ ܘܰܒܢܰܝ ܒܰܝܬܿܶܗ ܒܗܰܝܡܳܢܽܘܬܼܳܐ ܕܰܐܠܳܗܳܐ܀
16:35 [ai]ܘܟܼܰܕܼ ܗܘܳܐ ܨܰܦܼܪܳܐ܃ ܫܰܕܿܰܪܘ ܐܶܣܛܪ̈ܰܛܺܓܼܶܐ ܠܫܳܩܠܰܝ̈ ܫܰܒܼܛܶܐ̈܃ ܕܢܺܐܡܪܽܘܢ ܠܪܰܒܿ ܐܰܣܺܝܪ̈ܶܐ܂ ܫܪܺܝ ܠܗܳܠܶܝܢ ܐ̱ܢܳܫܳܐ܂
16:36 [ai]ܘܟܼܰܕܼ ܫܡܰܥ ܪܰܒܿ ܒܶܝܬܼ ܐܰܣܺܝܪ̈ܶܐ܃ ܥܰܠ ܐܶܡܰܪ ܠܶܗ ܗܺܝ ܗܳܕܼܶܐ ܡܶܠܬܼܳܐ ܠܦܿܰܘܠܳܘܣ܂ ܕܫܰܕܿܰܪܘ ܐܶܣܛܪ̈ܰܛܺܓܼܶܐ܃ ܐܰܝܟܼ ܕܬܶܫܬܿܪܽܘܢ܂ ܘܗܳܫܳܐ ܦܽܘܩܘ ܙܶܠܘ ܒܰܫܠܳܡܳܐ܂
16:37 [ai]ܐܳܡܰܪ ܠܶܗ ܦܿܰܘܠܳܘܣ܂ ܕܠܳܐ ܣܰܟܼܠܽܘ ܢܰܓܿܕܼܽܘܢ ܠܥܺܝܢ ܥܳܠܡܳܐ ܟܽܠܶܗ ܠܐ̱ܢܳܫܳܐ ܪ̈ܽܗ̱ܘܡܳܝܶܐ܂ ܘܰܐܪܡܝܽܘܢ ܒܶܝܬܼ ܐܰܣܺܝܪ̈ܶܐ܃ ܘܗܳܫܳܐ ܡܰܛܫܝܳܐܺܝܬܼ ܡܰܦܿܩܺܝܢ ܠܰܢ܂ ܠܳܐ ܓܶܝܪ܂ ܐܶܠܳܐ ܗܶܢܽܘܢ ܢܺܐܬܼܽܘܢ ܢܰܦܿܩܽܘܢܳܢ܂
16:38 [ai]ܘܶܐܙܰܠܘ ܫܳܩܠܰܝ̈ ܫܰܒܼܛܶܐ̈܃ ܘܶܐܡܰܪܘ ܠܶܐܣܛܪ̈ܰܛܺܓܼܶܐ ܡܶܠܶܐ̈ ܗܳܠܶܝܢ ܕܶܐܬܼܶܐܡܰܪ ܠܗܽܘܢ܂ ܘܟܼܰܕܼ ܫܡܰܥܘ ܕܿܪ̈ܽܗ̱ܘܡܳܝܶܐ ܐܶܢܽܘܢ܃ ܕܚܶܠܘ܂
16:39 [ai]ܘܶܐܬܼܰܘ ܠܘܳܬܼܗܽܘܢ ܘܰܒܥܰܘ ܡܶܢܗܽܘܢ܃ ܕܢܶܦܿܩܽܘܢ ܘܰܢܫܰܢܽܘܢ ܠܗܽܘܢ ܡܶܢ ܡܕܼܺܝܢ̱ܬܳܐ܂
16:40 [ai]ܘܟܼܰܕܼ ܢܦܼܰܩܘ ܡܶܢ ܒܶܝܬܼ ܐܰܣܺܝܪ̈ܶܐ܃ ܥܰܠܘ ܠܘܳܬܼ ܠܽܘܕܼܺܝܰܐ܂ ܘܰܚܙܰܘ ܬܰܡܳܢ ܠܰܐܚܶܐ̈ ܘܒܼܰܝܰܐܘ ܐܶܢܽܘܢ܂ ܘܰܢܦܼܰܩܘ܂

next chapter