The Comprehensive Aramaic Lexicon

17:01 [ai]	ܘܰܥܒܼܰܪܘ ܥܰܠ ܐܰܡܦܼܺܝܦܿܳܘܠܺܝܣ ܘܰܐܦܿܳܠܳܘܢܺܝܰܐ ܡܕܼܺܝܢܳܬܼܳܐ̈܀ ܘܶܐܬܼܰܘ ܠܬܼܶܣܰܠܳܘܢܺܝܩܺܐ܃ ܐܰܝܟܿܳܐ ܕܺܐܝܬܼ ܗ̱ܘܳܐ ܟܢܽܘܫܬܳܐ ܕܺܝܗܽܘܕܼܳܝܶܐ̈܂
17:02 [ai]	ܘܥܰܠ ܦܿܰܘܠܳܘܣ܂ ܐܰܝܟܿܰܢܳܐ ܕܰܡܥܳܕܼ ܗ̱ܘܳܐ܂ ܠܘܳܬܼܗܽܘܢ܂ ܘܫܰܒܿܶܐ̈ ܬܠܳܬܼ ܡܰܠܶܠ ܥܰܡܗܽܘܢ ܡܶܢ ܟܬܼܳܒܼܶܐ̈܃
17:03 [ai]	ܟܰܕܼ ܡܦܼܰܫܶܩ ܗ̱ܘܳܐ ܘܰܡܚܰܘܶܐ܃ ܕܰܥܬܼܺܝܕܼ ܗ̱ܘܳܐ ܡܫܺܝܚܳܐ ܕܢܶܚܰܫ ܘܕܼܰܢܩܽܘܡ ܡܶܢ ܒܶܝܬܼ ܡܺܝܬܼܶܐ̈܂ ܘܗܽܘܝܽܘ ܝܶܫܽܘܥ ܡܫܺܝܚܳܐ ܗܳܢܳܐ ܕܰܡܣܰܒܰܪ ܐ̱ܢܳܐ ܠܟܼܽܘܢ܂
17:04 [ai]	ܘܐ̱ܢܳܫܺܝܢ̈ ܡܶܢܗܽܘܢ ܗܰܝܡܶܢܘ ܘܰܢܩܶܦܼܘ ܠܦܿܰܘܠܳܘܣ ܘܰܠܫܺܝܠܳܐ܂ ܘܣܰܓܿܺܝܶܐܐ̈ ܡܶܢ ܝܰܘܢܳܝܶܐ̈܂ ܐܰܝܠܶܝܢ ܕܕܼܳܚܠܺܝܢ ܗ̱ܘܰܘ ܡܶܢ ܐܰܠܳܗܳܐ܂ ܘܳܐܦܼ ܢܶܫܶܐ̈ ܺܝܕܼܺܝܥܳܬܼܳܐ̈ ܠܳܐ ܥܳܬܼܳܐ̈ܠܳܐܙܥܽܘܪ̈ܝܳܢ܂
17:05 [ai]	ܘܰܚܣܰܡܘ ܗ̱ܘܰܘ ܺܝܗܽܘܕܼܳܝܶܐ̈ ܘܰܐܩܶܦܼܘ ܠܗܽܘܢ ܐ̱ܢܳܫܳܐ ܒܺܝܫܶܐ̈ ܡܶܢ ܫܽܘܩܶܐ̈ ܕܰܡܕܼܺܝܢ̱ܬܳܐ܂ ܘܰܥܒܼܰܕܼܘ ܐܳܟܼܠܳܘܣ ܣܰܓܿܺܝܳܐܐ܂ ܘܕܼܰܠܰܚܘ ܗ̱ܘܰܘ ܠܰܡܕܼܺܝܢ̱ܬܳܐ܂ ܘܶܐܬܼܰܘ ܘܩܳܡܘ ܘܶܐܬܼܰܘ ܘܩܳܡܘ ܠܗܽܘܢ ܥܰܠ ܒܰܝܬܿܶܗ ܕܺܐܝܰܣܳܘܢ܂ ܘܒܼܳܥܶܝܢ ܗ̱ܘܰܘ܃ ܕܢܰܦܿܩܽܘܢ ܐܶܢܽܘܢ ܡܶܢ ܬܰܡܳܢ܃ ܘܢܰܫܠܡܽܘܢ ܐܶܢܽܘܢ ܠܳܐܟܼܠܳܘܣ܂
17:06 [ai]	ܘܟܼܰܕܼ ܠܳܐ ܐܶܫܟܿܰܚܘ ܐܶܢܽܘܢ ܬܰܡܳܢ܃ ܓܰܪܽܘܗ̱ܝ ܗ̱ܘܰܘ ܠܺܐܝܰܣܳܘܢ ܘܠܰܐܚܶܐ̈ ܕܺܐܝܬܼ ܗ̱ܘܰܘ ܬܰܡܳܢ܂ ܘܰܐܝܬܿܺܝܘ ܐܶܢܽܘܢ ܠܘܳܬܼ ܪ̈ܺܫܶܐ ܕܰܡܕܼܺܝܢ̱ܬܳܐ܃ ܟܰܕܼ ܩܳܥܶܝܢ ܗ̱ܘܰܘ܃ ܕܗܳܠܶܝܢ ܐܶܢܽܘܢ ܕܰܠܟܼܽܠܳܗ ܐܰܪܥܳܐ ܕܰܠܰܚܘ܂ ܘܗܳܐ ܬܽܘܒܼ ܠܗܳܪܟܿܳܐ ܐܶܬܼܰܘ܂
17:07 [ai]	ܘܰܡܩܰܒܿܠܳܢܗܽܘܢ ܗܳܢܰܘ ܐܺܝܰܣܳܘܢ܂ ܘܟܼܽܠܗܽܘܢ ܗܳܠܶܝܢ ܠܽܘܩܒܼܰܠ ܦܽܘܩܕܳܢܰܘܗ̱ܝ̈ ܕܩܶܣܰܪ ܩܳܝܡܺܝܢ܃ ܟܰܕܼ ܐܳܡܪܺܝܢ܂ ܕܺܐܝܬܼ ܡܰܠܟܿܳܐ ܐ̱ܚܪܺܢܳܐ܂ ܝܶܫܽܘܥ܂
17:08 [ai]	ܐܶܬܿܕܰܠܰܚܘ ܕܶܝܢ ܪ̈ܺܫܶܐ ܕܰܡܕܼܺܝܢ̱ܬܳܐ ܘܟܼܽܠܶܗ ܥܰܡܳܐ܃ ܟܰܕܼ ܫܡܰܥܘ ܗܳܠܶܝܢ܂
17:09 [ai]	ܘܰܢܣܰܒܼܘ ܥܰܪ̈ܳܒܼܶܐ ܡܶܢ ܐܺܝܰܣܳܘܢ ܘܳܐܦܼ ܡܶܢ ܐܰܚܶܐ̈܃ ܘܗܳܝܕܶܝܢ ܫܪܰܘ ܐܶܢܽܘܢ ܿ܀ܿ܀ܿ
17:10 [ai]	ܐܰܚܶܐ̈ ܕܶܝܢ ܒܰܪ ܫܳܥܬܼܶܗ ܒܶܗ ܒܠܺܠܝܳܐ܃ ܫܪܰܘ ܠܦܿܰܘܠܳܘܣ ܘܰܠܫܺܝܠܳܐ ܠܒܼܶܪܳܘܰܐܐ ܡܕܼܺܝܢ̱ܬܳܐ܂ ܘܟܼܰܕܼ ܐܶܬܼܰܘ ܠܬܼܰܡܳܢ܃ ܥܳܐܠܺܝܢ ܗ̱ܘܰܘ ܠܰܟܼܢܽܘܫܬܳܐ ܕܺܝܗܽܘܕܼܳܝܶܐ̈܂
17:11 [ai]	ܚܺܐܪ̈ܳܝܺܝܢ ܗ̱ܘܰܘ ܓܶܝܪ ܗܳܢܽܘܢ ܺܝܗܽܘܕܼܳܝܶܐ̈ ܕܬܰܡܳܢ܃ ܡܶܢ ܺܝܗܽܘܕܼܳܝܶܐ̈ ܗܳܢܽܘܢ ܕܺܐܝܬܼ ܗ̱ܘܰܘ ܒܬܼܶܣܰܠܳܘܢܺܝܩܺܐ܂ ܘܫܳܡܥܺܝܢ ܗ̱ܘܰܘ ܡܶܢܗܽܘܢ ܡܶܠܬܼܳܐ ܟܽܠܝܽܘܡ ܚܳܕܼܝܳܐܺܝܬܼ܃ ܟܰܕܼ ܡܦܼܰܪܫܺܝܢ ܗ̱ܘܰܘ ܡܶܢ ܟܬܼܳܒܼܶܐ̈܂ ܕܶܐܢ ܗܳܠܶܝܢ ܗܳܟܼܰܢܳܐ ܐܺܝܬܼܰܝܗܶܝܢ܂
17:12 [ai]	ܘܣܰܓܿܺܝܶܐܐ̈ ܡܶܢܗܽܘܢ ܗܰܝܡܶܢܘ܂ ܘܗܳܟܼܰܢܳܐ ܐܳܦܼ ܡܶܢ ܝܰܘܢܳܝܶܐ̈܃ ܓܿܰܒܼܪ̈ܶܐ ܣܰܓܿܺܝܶܐܐ̈ ܘܢܶܫܶܐ̈ ܺܝܕܼܺܝܥܳܬܼܳܐ̈܂
17:13 [ai]	ܘܟܼܰܕܼ ܝܕܼܰܥܘ ܗܳܢܽܘܢ ܺܝܗܽܘܕܼܳܝܶܐ̈ ܕܡܶܢ ܬܼܶܣܰܠܳܘܢܺܝܩܺܐ܃ ܕܡܶܠܬܼܶܗ ܕܰܐܠܳܗܳܐ ܐܶܬܼܟܰܪܙܰܬܼ ܡܶܢ ܦܿܰܘܠܳܘܣ ܒܒܼܶܪܳܘܰܐܐ ܡܕܼܺܝܢ̱ܬܳܐ܃ ܐܶܬܼܰܘ ܐܳܦܼ ܠܬܼܰܡܳܢ܂ ܘܠܳܐ ܫܠܺܝܘ ܠܰܡܙܳܥܽܘ ܘܠܰܡܕܼܰܠܳܚܽܘ ܠܐ̱ܢܳܫܽܘܬܼܳܐ܂
17:14 [ai]	ܘܰܠܦܿܰܘܠܳܘܣ ܫܪܰܐܘܽܗ̱ܝ ܐܰܚܶܐ̈܃ ܕܢܶܚܽܘܬܼ ܠܶܗ ܠܝܰܡܳܐ܂ ܘܩܰܘܺܝ ܗ̱ܘܳܐ ܒܿܳܗ ܒܰܡܕܼܺܝܢ̱ܬܳܐ ܗܳܝ܃ ܫܺܝܠܳܐ ܘܛܺܝܡܳܬܼܶܐܳܘܣ܂
17:15 [ai]	ܘܗܳܢܽܘܢ ܕܶܐܬܼܠܰܘܺܝܘ ܠܶܗ ܠܦܿܰܘܠܳܘܣ܃ ܐܶܬܼܰܘ ܥܰܡܶܗ ܥܕܼܰܡܳܐ ܠܰܐܬܼܺܢܳܘܣ ܡܕܼܺܝܢ̱ܬܳܐ܂ ܘܟܼܰܕܼ ܢܳܦܼܩܺܝܢ ܡܶܢ ܨܶܐܕܼܰܘܗ̱ܝ܃ ܩܰܒܿܶܠܘ ܡܶܢܶܗ ܐܶܓܿܰܪܬܳܐ ܠܘܳܬܼ ܫܺܝܠܳܐ ܘܛܺܝܡܳܬܼܶܐܳܘܣ܃ ܕܒܰܥܓܼܰܠ ܢܺܐܙܽܠ̱ܘܢ ܠܘܳܬܼܶܗ܂
17:16 [ai]	ܗܽܘ ܕܶܝܢ ܦܿܰܘܠܳܘܣ ܟܰܕܼ ܡܩܰܘܶܐ ܗ̱ܘܳܐ ܒܰܐܬܼܺܢܶܘܣ܃ ܡܶܬܼܡܰܪܡܰܪ ܗ̱ܘܳܐ ܒܪܽܘܚܶܗ܃ ܟܰܕܼ ܚܳܙܶܐ ܗ̱ܘܳܐ ܕܰܡܕܼܺܝܢ̱ܬܳܐ ܟܽܠܳܗ ܡܰܠܝܳܐ ܦܿܬܼܰܟܼܪ̈ܶܐ܂
17:17 [ai]	ܘܰܡܡܰܠܶܠ ܗ̱ܘܳܐ ܒܰܟܼܢܽܘܫܬܳܐ ܥܰܡ ܺܝܗܽܘܕܼܳܝܶܐ̈ ܘܥܰܡ ܐܰܝܠܶܝܢ ܕܕܼܳܚܠܺܝܢ ܡܶܢ ܐܰܠܳܗܳܐ܃ ܘܰܒܫܽܘܩܳܐ ܥܰܡ ܐܰܝܠܶܝܢ ܕܡܶܣܬܿܰܩܒܿܠܺܝܢ ܗ̱ܘܰܘ ܟܽܠܝܽܘܡ܂
17:18 [ai]	ܘܳܐܦܼ ܦܺܝܠܳܣܳܘܦܼܶܐ̈ ܕܡܶܢ ܝܽܘܠܦܿܳܢܶܗ ܕܶܐܦܿܺܝܩܳܘܪܳܣ܂ ܘܰܐ̱ܚܪ̈ܳܢܶܐ ܕܡܶܬܼܩܪܶܝܢ ܣܛܳܘܐܺܝܩܳܘ܃ ܕܳܪܫܺܝܢ ܗ̱ܘܰܘ ܥܰܡܶܗ܂ ܘܐ̱ܢܳܫ ܐ̱ܢܳܫ ܡܶܢܗܽܘܢ ܐܳܡܪܺܝܢ ܗ̱ܘܰܘ܃ ܡܳܢܳܐ ܨܳܒܼܶܐ ܗܳܢܳܐ ܡܠܰܩܶܛ ܡܶܠܶܐ̈܂ ܘܰܐ̱ܚܪ̈ܳܢܶܐ ܐܳܡܪܺܝܢ ܗ̱ܘܰܘ܃ ܕܰܐܠܳܗܶܐ̈ ܢܽܘܟܼܪ̈ܳܝܶܐ ܡܰܟܼܪܶܙ܂ ܡܶܛܽܠ ܕܰܠܝܶܫܽܘܥ ܘܠܰܩܝܳܡܬܿܶܗ ܡܰܟܼܪܶܙ ܗ̱ܘܳܐ ܠܗܽܘܢ܂
17:19 [ai]	ܘܰܐܚܕܿܽܘܗ̱ܝ ܘܰܐܝܬܿܝܽܘܗ̱ܝ ܠܒܶܝܬܼ ܕܺܝܢܳܐ ܕܡܶܬܼܩܪܶܐ ܐܰܪܺܝܳܘܣ ܦܿܰܓܼܳܘܣ܃ ܟܰܕܼ ܐܳܡܪܺܝܢ ܠܶܗ܂ ܡܶܫܟܿܚܺܝܢܰܢ ܠܡܶܕܿܰܥ ܡܳܢܰܘ ܗܳܢܳܐ ܝܽܘܠܦܿܳܢܳܐ ܚܰܕܼ̱ܬܼܳܐ ܕܡܰܟܼܪܶܙ ܐܰܢ̱ܬܿ܂
17:20 [ai]	ܡܶܠܶܐ̈ ܓܶܝܪ ܢܽܘܟܼܪ̈ܳܝܳܬܼܳܐ ܙܳܪܰܥ ܐܰܢ̱ܬܿ ܒܡܰܫܡܰܥܬܼܰܢ܂ ܘܨܳܒܼܶܝܢܰܢ ܠܡܶܕܿܰܥ ܡܳܢܳܐ ܐܶܢܶܝܢ̈ ܗܳܠܶܝܢ܂
17:21 [ai]	ܐܰܬܼܺܢܳܝܶܐ̈ ܕܶܝܢ ܟܽܠܗܽܘܢ ܘܰܐܝܠܶܝܢ ܕܳܐܬܼܶܝܢ ܠܬܼܰܡܳܢ ܢܽܘܟܼܪ̈ܳܝܶܐ܃ ܥܰܠ ܡܶܕܶܡ ܐ̱ܚܪܺܝܢ ܠܳܐ ܒܛܺܝܠ ܠܗܽܘܢ܃ ܐܶܠܳܐ ܠܡܺܐܡܰܪ ܘܰܠܡܶܫܡܰܥ ܡܶܕܶܡ ܚܕܼܶܬܼ܀
17:22 [ai]	ܘܟܼܰܕܼ ܩܳܡ ܦܿܰܘܠܳܘܣ ܒܰܐܪܺܝܳܘܣ ܦܿܰܓܼܳܘܣ܃ ܐܶܡܰܪ܂ ܓܿܰܒܼܪ̈ܶܐ ܐܰܬܼܺܢܳܝܶܐ̈܃ ܚܳܙܶܐ ܐ̱ܢܳܐ ܠܟܼܽܘܢ܃ ܕܰܒܼܟܼܽܠܗܶܝܢ ܝܰܬܿܺܝܪܺܝܢ ܐܢ̱ܬܿܽܘܢ ܒܕܶܚܠܰܬܼ ܫܺܐܕܼܶܐ̈܂
17:23 [ai]	ܟܰܕܼ ܓܶܝܪ ܡܶܬܼܟܿܪܶܟܼ ܗ̱ܘܺܝܬܼ ܘܚܳܙܶܐ ܗ̱ܘܺܝܬܼ ܒܶܝܬܼ ܕܶܚܠܳܬܼܟܼܽܘܢ̈܃ ܐܶܫܟܿܚܶܬܼ ܥܠܳܬܼܳܐ ܚܕܼܳܐ܃ ܕܰܟܼܬܼܺܝܒܼ ܗ̱ܘܳܐ ܥܠܶܝܗ܂ ܕܰܐܠܳܗܳܐ ܓܢܺܝܙܳܐ܂ ܗܰܘ ܗܳܟܼܺܝܠ ܕܟܰܕܼ ܠܳܐ ܝܳܕܼܥܺܝܢ ܐܢ̱ܬܿܽܘܢ ܕܳܚܠܺܝܢ ܐܢ̱ܬܿܽܘܢ ܠܶܗ܃ ܠܶܗ ܠܗܳܢܳܐ ܐܶܢܳܐ ܡܣܰܒܰܪ ܐ̱ܢܳܐ ܠܟܼܽܘܢ܂
17:24 [ai]	ܐܰܠܳܗܳܐ ܓܶܝܪ ܕܰܥܒܼܰܕܼ ܥܳܠܡܳܐ ܘܟܼܽܠ ܡܳܐ ܕܺܐܝܬܼ ܒܶܗ܃ ܘܗܽܘܝܽܘ ܡܳܪܳܐ ܕܰܫܡܰܝܳܐ ܘܕܼܰܐܪܥܳܐ܃ ܒܗܰܝܟܠܶܐ̈ ܕܰܥܒܼܳܕܼ ܐܺܝܕܼܰܝܳܐ̈܂ ܠܳܐ ܫܳܪܶܐ܂
17:25 [ai]	ܘܠܳܐ ܡܶܫܬܿܰܡܰܫ ܡܶܢ ܐܺܝܕܼܰܝ̈ ܒܢܰܝܢܳܫܳܐ܂ ܘܥܰܠ ܡܶܕܶܡ ܠܳܐ ܣܢܺܝܩ܂ ܡܶܛܽܠ ܕܗܽܘ ܝܰܗ̱ܒܼ ܠܟܼܽܠܢܳܫ ܚܰܝ̈ܶܐ ܘܢܰܦܼܫܳܐ܂
17:26 [ai]	ܘܡܶܢ ܚܰܕܼ ܕܶܡ ܥܒܼܰܕܼ ܥܳܠܡܳܐ ܟܽܠܶܗ ܕܿܰܒܼܢܰܝܢܳܫܳܐ܃ ܕܢܶܗܘܽܘܢ ܥܳܡܪܺܝܢ ܥܰܠ ܐܰܦܿܰܝ̈ ܐܰܪܥܳܐ ܟܽܠܳܗ܂ ܘܦܼܰܪܶܫ ܙܰܒܼܢܶܐ̈ ܒܦܽܘܩܕܳܢܶܗ܂ ܘܣܳܡ ܬܚܽܘܡܶܐ ܕܥܽܘܡܪܳܐ ܕܿܰܒܼܢܰܝܢܳܫܳܐ܃
17:27 [ai]	ܕܢܶܗܘܽܘܢ ܒܿܳܥܶܝܢ ܠܰܐܠܳܗܳܐ ܘܰܡܥܰܩܒܼܺܝܢ܃ ܘܡܶܢ ܒܶܪ̈ܝܳܬܼܶܗ ܡܶܫܟܿܚܺܝܢ ܠܶܗ܂ ܡܶܛܽܠ ܠܳܐ ܗ̱ܘܳܐ ܪܰܚܺܝܩ ܡܶܢ ܟܽܠ ܡܶܢܰܢ܂
17:28 [ai]	ܒܶܗ ܗ̱ܽܘ ܓܶܝܪ ܚܰܝܺܝܢܰܢ ܘܡܶܬܿܬܿܙܺܝܥܺܝܢܰܢ ܘܺܐܝܬܼܰܝܢ܃ ܐܰܝܟܼ ܕܳܐܦܼ ܐ̱ܢܳܫܳܐ ܡܶܢ ܚܰܟܿܺܝܡܶܐ̈ ܕܰܠܘܳܬܼܟܼܽܘܢ ܐܶܡܰܪܘ܂ ܕܡܶܢܶܗ ܗ̱ܽܘ ܛܽܘܗܡܰܢ܂
17:29 [ai]	ܐ̱ܢܳܫܳܐ ܗܳܟܼܺܝܠ ܕܛܽܘܗܡܰܢ ܡܶܢ ܐܰܠܳܗܳܐ ܗ̱ܘ܃ ܠܳܐ ܚܰܝܳܒܼܺܝܢܰܢ ܠܡܶܣܒܰܪ܃ ܕܰܠܕܼܰܗܒܼܳܐ܂ ܐܰܘ ܠܣܺܐܡܳܐ܂ ܐܰܘ ܠܟܼܺܐܦܼܳܐ ܕܰܓܼܠܺܝܦܼܳܐ ܒܽܐܘܡܳܢܽܘܬܼܳܐ ܘܒܼܺܝܕܼܰܥܬܼܳܐ ܕܒܰܪܢܳܫܳܐ܂ ܕܳܡܝܳܐ ܐܰܠܳܗܽܘܬܼܳܐ܂
17:30 [ai]	ܙܰܒܼܢܶܐ̈ ܓܶܝܪ ܕܛܳܥܝܽܘܬܼܳܐ ܐܰܥܒܰܪ ܐܰܠܳܗܳܐ܂ ܘܰܒܙܰܒܼܢܳܐ ܗܳܢܳܐ ܡܦܼܰܩܶܕܼ ܠܟܼܽܠܗܽܘܢ ܒܢܰܝܢܳܫܳܐ܃ ܕܟܽܠ ܐ̱ܢܳܫ ܒܟܽܠ ܕܽܘܟܿܳܐ ܢܬܼܽܘܒܼ܂
17:31 [ai]	ܡܶܛܽܠ ܕܰܐܩܺܝܡ ܝܰܘܡܳܐ ܕܒܶܗ ܥܬܼܺܝܕܼ ܕܰܢܕܼܽܘܢ ܐܰܪܥܳܐ ܟܽܠܳܗ ܒܟܺܐܢܽܘܬܼܳܐ܃ ܒܝܰܕܼ ܓܰܒܼܪܳܐ ܐܰܝܢܳܐ ܕܰܦܼܪܰܫ܂ ܘܰܐܦܼܢܺܝ ܠܟܼܽܠ ܐ̱ܢܳܫ ܠܗܰܝܡܳܢܽܘܬܼܶܗ ܒܕܰܐܩܺܝܡܶܗ ܡܶܢ ܒܶܝܬܼ ܡܺܝܬܼܶܐ̈܂
17:32 [ai]	ܘܟܼܰܕܼ ܫܡܰܥܘ ܩܝܳܡܬܳܐ ܕܡܶܢ ܒܶܝܬܼ ܡܺܝܬܼܶܐ̈܃ ܡܶܢܗܽܘܢ ܡܡܰܝܩܺܝܢ ܗ̱ܘܰܘ܂ ܘܡܶܢܗܽܘܢ ܐܳܡܪܺܝܢ ܗ̱ܘܰܘ܂ ܒܰܙܒܼܰܢ ܐ̱ܚܪܺܝܢ ܫܳܡܥܺܝܢܰܢ ܠܳܟܼ ܥܰܠ ܗܳܕܼܶܐ܂
17:33 [ai]	ܘܗܳܟܼܰܢܳܐ ܢܦܼܰܩ ܦܿܰܘܠܳܘܣ ܡܶܢ ܒܰܝܢܳܬܼܗܽܘܢ܂
17:34 [ai]	ܘܐ̱ܢܳܫܺܝܢ̈ ܡܶܢܗܽܘܢ ܢܰܩܦܿܽܘܗ̱ܝ ܘܗܰܝܡܶܢܘ܃ ܚܰܕܼ ܕܶܝܢ ܡܶܢܗܽܘܢ ܐܺܝܬܼܰܘܗ̱ܝ ܗ̱ܘܳܐ ܕܿܺܝܳܢܽܘܣܺܝܳܘܣ܃ ܡܶܢ ܕܰܝܳܢܶܐ̈ ܕܰܐܪܺܝܳܘܣ ܦܿܰܓܼܳܘܣ܂ ܘܰܐܢ̱ܬܿܬܼܳܐ ܚܕܼܳܐ ܕܰܫܡܳܗ ܗܘܳܐ ܕܰܡܰܪܺܝܣ܂ ܘܰܐ̱ܚܪ̈ܳܢܶܐ ܥܰܡܗܽܘܢ܀

next chapter