The Comprehensive Aramaic Lexicon

19:01 [ai]	ܘܟܼܰܕܼ ܐܺܝܬܼܰܘܗ̱ܝ ܗ̱ܘܳܐ ܐܰܦܿܳܠܳܘ ܒܩܳܘܪܺܢܬܼܳܘܣ܃ ܐܶܬܼܟܿܪܶܟܼ ܦܿܰܘܠܳܘܣ ܒܰܐܬܼܪ̈ܰܘܳܬܼܳܐ ܥܶܠܳܝܶܐ̈ ܘܶܐܬܼܳܐ ܠܶܐܦܼܶܣܳܘܣ܂ ܘܰܡܫܰܐܶܠ ܗ̱ܘܳܐ ܠܬܼܰܠܡܺܝܕܼܶܐ̈ ܐܰܝܠܶܝܢ ܕܶܐܫܟܿܰܚ ܬܰܡܳܢ܃
19:02 [ai]	ܕܶܐܢ ܩܰܒܿܶܠܬܿܽܘܢ ܪܽܘܚܳܐ ܕܩܽܘܕܼܫܳܐ ܡܶܢ ܕܗܰܝܡܶܢܬܿܽܘܢ܂ ܥܢܰܘ ܘܳܐܡܪܺܝܢ ܠܶܗ܂ ܘܳܐܦܼܠܳܐ ܐܶܢ ܐܺܝܬܼ ܪܽܘܚܳܐ ܕܩܽܘܕܼܫܳܐ܂ ܫܡܺܝܥ ܠܰܢ܂
19:03 [ai]	ܐܳܡܰܪ ܠܗܽܘܢ܂ ܘܰܒܡܳܢܳܐ ܥܡܰܕܿܬܿܽܘܢ܂ ܐܳܡܪܺܝܢ܂ ܒܡܰܥܡܽܘܕܼܺܝܬܼܶܗ ܕܝܽܘܚܰܢܳܢ܂
19:04 [ai]	ܐܳܡܰܪ ܠܗܽܘܢ ܦܿܰܘܠܳܘܣ܂ ܝܽܘܚܰܢܳܢ ܐܰܥܡܶܕܼ ܡܰܥܡܽܘܕܼܺܝܬܼܳܐ ܕܰܬܼܝܳܒܼܽܘܬܼܳܐ ܠܥܰܡܳܐ܃ ܟܰܕܼ ܐܳܡܰܪ ܗ̱ܘܳܐ܂ ܕܰܢܗܰܝܡܢܽܘܢ ܒܰܐܝܢܳܐ ܕܳܐܬܼܶܐ ܒܳܬܼܪܶܗ܃ ܕܺܐܝܬܼܰܘܗ̱ܝ ܝܶܫܽܘܥ ܡܫܺܝܚܳܐ܂
19:05 [ai]	ܘܟܼܰܕܼ ܗܳܠܶܝܢ ܫܡܰܥܘ܃ ܥܡܰܕܼܘ ܒܰܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂
19:06 [ai]	ܘܣܳܡ ܥܠܰܝܗܽܘܢ ܐܺܝܕܼܳܐ ܦܿܰܘܠܳܘܣ܂ ܘܶܐܬܼܳܐ ܪܽܘܚܳܐ ܕܩܽܘܕܼܫܳܐ ܥܠܰܝܗܽܘܢ܂ ܘܰܡܡܰܠܠܺܝܢ ܗ̱ܘܰܘ ܒܠܶܫܳܢ ܠܶܫܳܢ܂ ܘܡܶܬܼܢܰܒܿܶܝܢ ܗ̱ܘܰܘ܂
19:07 [ai]	ܗܳܘܶܝܢ ܗ̱ܘܰܘ ܕܶܝܢ ܟܽܠܗܽܘܢ ܐ̱ܢܳܫܳܐ ܬܪܶܥܣܰܪ܂
19:08 [ai]	ܘܥܰܠ ܗ̱ܘܳܐ ܦܿܰܘܠܳܘܣ ܠܰܟܼܢܽܘܫܬܳܐ܂ ܘܰܡܡܰܠܶܠ ܗ̱ܘܳܐ ܥܺܝܢ ܒܰܓܼܠܶܐ ܝܰܪ̈ܚܶܐ ܬܠܳܬܼܳܐ܂ ܘܰܡܦܿܺܝܣ ܗ̱ܘܳܐ ܥܰܠ ܡܰܠܟܿܽܘܬܼܶܗ ܕܰܐܠܳܗܳܐ܂
19:09 [ai]	ܘܐ̱ܢܳܫܺܝܢ̈ ܡܶܢܗܽܘܢ ܡܶܬܼܩܰܫܶܝܢ ܗ̱ܘܰܘ ܘܡܶܬܼܚܪܶܝܢ܂ ܘܰܡܨܰܚܶܝܢ ܠܽܐܘܪܚܳܐ ܕܰܐܠܳܗܳܐ ܩܕܼܳܡ ܟܶܢܫܳܐ ܕܥܰܡ̱ܡܶܐ̈܂ ܗܳܝܕܶܝܢ ܐܰܪܚܶܩ ܦܿܰܘܠܳܘܣ܃ ܘܰܦܼܪܰܫ ܡܶܢܗܽܘܢ ܠܬܼܰܠܡܺܝܕܼܶܐ̈܂ ܘܟܼܽܠܝܽܘܡ ܡܡܰܠܶܠ ܗ̱ܘܳܐ ܥܰܡܗܽܘܢ܃ ܒܶܐܣܟܼܳܘܠܺܐ ܕܓܰܒܼܪܳܐ ܕܰܫܡܶܗ ܛܽܘܪܰܢܳܘܣ܂
19:10 [ai]	ܘܗܳܕܼܶܐ ܗܘܳܬܼ ܫܢܺܝܢ̈ ܬܿܰܪ̈ܬܿܶܝܢ܃ ܥܕܼܰܡܳܐ ܕܰܫܡܰܥܘ ܡܶܠܬܼܳܐ ܕܡܳܪܝܳܐ ܟܽܠܗܽܘܢ ܕܥܳܡܪܺܝܢ ܒܰܐܣܺܝܰܐ܃ ܺܝܗܽܘܕܼܳܝܶܐ̈܂ ܘܰܐܪ̈ܡܳܝܶܐ܂
19:11 [ai]	ܘܚܰܝܠܶܐ̈ ܪ̈ܰܘܪܒܼܶܐ ܥܳܒܼܶܕܼ ܗ̱ܘܳܐ ܐܰܠܳܗܳܐ ܒܺܐܝܕܼܶܗ ܕܦܿܰܘܠܳܘܣ܃
19:12 [ai]	ܗܳܟܼܰܢܳܐ ܕܳܐܦܼ ܡܶܢ ܢܰܚܬܿܶܐ̈ ܕܥܰܠ ܓܽܘܫܡܶܗ܃ ܣܽܘܕܼܳܪ̈ܶܐ ܐܰܘ ܪ̈ܽܘܩܥܶܐ܂ ܡܰܝܬܿܶܝܢ ܗ̱ܘܰܘ ܘܣܳܝܡܺܝܢ ܥܰܠ ܟܿܪ̈ܺܝܗܶܐ܃ ܘܦܼܳܪܩܺܝܢ ܗ̱ܘܰܘ ܡܶܢܗܽܘܢ ܟܿܽܘܪ̈ܗܳܢܶܐ܂ ܘܳܐܦܼ ܫܺܐܕܼܶܐ̈ ܢܳܦܼܩܺܝܢ ܗ̱ܘܰܘ܂
19:13 [ai]	ܨܒܼܰܘ ܗ̱ܘܰܘ ܕܶܝܢ ܐܳܦܼ ܐ̱ܢܳܫܳܐ ܺܝܗܽܘܕܼܳܝܶܐ̈܃ ܐܰܝܠܶܝܢ ܕܡܶܬܼܟܰܪܟܿܺܝܢ ܗ̱ܘܰܘ ܘܡܰܘܡܶܝܢ ܥܰܠ ܫܺܐܕܼܶܐ̈܃ ܕܢܰܘܡܽܘܢ ܒܰܫܡܶܗ ܕܡܳܪܰܢ ܝܶܫܽܘܥ܃ ܥܰܠ ܐܰܝܠܶܝܢ ܕܺܐܝܬܼ ܗ̱ܘܰܝ̈ ܠܗܽܘܢ ܪ̈ܽܘܚܶܐ ܛܰܢܦܼܳܬܼܳܐ̈܃ ܟܰܕܼ ܐܳܡܪܺܝܢ ܗ̱ܘܰܘ܂ ܡܰܘܡܶܝܢܰܢ ܠܟܼܽܘܢ ܒܰܫܡܶܗ ܕܝܶܫܽܘܥ ܐܰܝܢܳܐ ܕܡܰܟܼܪܶܙ ܦܿܰܘܠܳܘܣ܂
19:14 [ai]	ܐܺܝܬܼ ܗ̱ܘܳܐ ܕܶܝܢ ܫܰܒܼܥܳܐ ܒܢܰܘܗ̱ܝ ܕܓܰܒܼܪܳܐ ܚܰܕܼ ܺܝܗܽܘܕܼܳܝܳܐ ܪ̈ܰܒܿ ܟܿܳܗܢܶܐ܂ ܕܰܫܡܶܗ ܗܘܳܐ ܣܩܶܘܰܐ܃ ܕܥܳܒܼܕܺܝܢ ܗ̱ܘܰܘ ܗܳܕܼܶܐ܂
19:15 [ai]	ܘܰܥܢܳܐ ܫܺܐܕܼܳܐ ܗܰܘ ܒܺܝܫܳܐ ܘܶܐܡܰܪ ܠܗܽܘܢ܂ ܠܝܶܫܽܘܥ ܡܶܫܬܰܘܕܿܰܥ ܐ̱ܢܳܐ܂ ܘܰܠܦܿܰܘܠܳܘܣ ܝܳܕܼܰܥ ܐ̱ܢܳܐ܂ ܐܰܢ̱ܬܿܽܘܢ ܕܶܝܢ ܡܰܢ ܐܰܢ̱ܬܿܽܘܢ܂
19:16 [ai]	ܘܰܫܘܰܪ ܥܠܰܝܗܽܘܢ ܓܰܒܼܪܳܐ ܗܰܘ ܕܺܐܝܬܼ ܗ̱ܘܳܐ ܒܶܗ ܪܽܘܚܳܐ ܒܺܝܫܬܳܐ܃ ܘܶܐܬܼܚܰܝܰܠ ܥܠܰܝܗܽܘܢ܂ ܘܫܰܦܿܶܠ ܐܶܢܽܘܢ܂ ܘܟܼܰܕܼ ܫܠܺܝܚܺܝܢ ܘܰܦܼܥܺܝܥܺܝܢ܂ ܥܪܰܩܘ ܡܶܢ ܒܰܝܬܳܐ ܗܰܘ܂
19:17 [ai]	ܘܗܳܕܼܶܐ ܐܶܬܼܝܰܕܼܥܰܬܼ ܗ̱ܘܳܬܼ ܠܟܼܽܠܗܽܘܢ ܺܝܗܽܘܕܼܳܝܶܐ̈ ܘܰܐܪ̈ܡܳܝܶܐ ܕܥܳܡܪܺܝܢ ܒܶܐܦܼܶܣܳܘܣ܂ ܘܢܶܦܼܠܰܬܼ ܕܶܚܠܬܼܳܐ ܥܰܠ ܟܽܠܗܽܘܢ܂ ܘܡܶܬܼܪܰܡܪܰܡ ܗ̱ܘܳܐ ܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂
19:18 [ai]	ܘܣܰܓܿܺܝܶܐܐ̈ ܡܶܢ ܐܰܝܠܶܝܢ ܕܗܰܝܡܶܢܘ܃ ܐܳܬܼܶܝܢ ܗ̱ܘܰܘ ܘܡܶܫܬܿܰܥܶܝܢ ܣܰܟܼܠܘܳܬܼܗܽܘܢ̈܂ ܘܡܰܘܕܶܝܢ ܒܡܶܕܶܡ ܕܥܳܒܼܕܺܝܢ ܗ̱ܘܰܘ܂
19:19 [ai]	ܣܰܓܿܺܝܶܐܐ̈ ܕܶܝܢ ܐܳܦܼ ܚܰܪ̈ܳܫܶܐ ܟܰܢܶܫܘ ܟܬܼܳܒܼܰܝܗܽܘܢ̈܃ ܘܰܐܝܬܿܺܝܘ ܐܰܘܩܶܕܼܘ ܐܶܢܽܘܢ ܩܕܼܳܡ ܟܽܠܢܳܫ܂ ܘܰܚܫܰܒܼܘ ܕܡܰܝܗܽܘܢ̈܃ ܘܰܣܠܶܩ ܟܶܣܦܿܳܐ ܪ̈ܶܒܿܘܳܬܼܳܐ ܚܰܡܶܫ܂
19:20 [ai]	ܘܗܳܟܼܰܢܳܐ ܒܚܰܝܠܳܐ ܪܰܒܿܳܐ ܬܳܩܦܿܳܐ ܗ̱ܘܳܬܼ ܘܣܳܓܼܝܳܐ ܗܰܝܡܳܢܽܘܬܼܶܗ ܕܰܐܠܳܗܳܐ܀
19:21 [ai]	ܟܰܕܼ ܕܶܝܢ ܐܶܫܬܿܰܠܰܡ ܗܳܠܶܝܢ܃ ܣܳܡ ܦܿܰܘܠܳܘܣ ܒܪܶܥܝܳܢܶܗ܃ ܕܢܶܬܼܟܿܪܶܟܼ ܒܟܽܠܳܗ ܡܰܩܶܕܼܳܘܢܺܝܰܐ ܘܒܼܰܐܟܼܰܐܺܝܰܐ܃ ܘܢܺܐܙܰܠ ܠܽܐܘܪܺܫܠܶܡ܂ ܘܶܐܡܰܪ܂ ܕܡܳܐ ܕܶܐܙܶܠ̱ܬܼ ܠܬܼܰܡܳܢ܃ ܘܳܠܶܐ ܠܺܝ ܕܳܐܦܼ ܪܽܗ̱ܘܡܺܝ ܐܶܚܙܶܐ܂
19:22 [ai]	ܘܫܰܕܿܰܪ ܗ̱ܘܳܐ ܬܿܪ̈ܶܝܢ ܐ̱ܢܳܫܺܝܢ̈ ܡܶܢ ܗܳܢܽܘܢ ܕܰܡܫܰܡܫܺܝܢ ܗ̱ܘܰܘ ܠܶܗ ܠܡܰܩܶܕܼܳܘܢܺܝܰܐ܃ ܠܛܺܝܡܳܬܼܶܐܳܘܣ܂ ܘܠܶܐܪܰܣܛܳܘܣ܂ ܗܽܘ ܕܶܝܢ ܩܰܘܺܝ ܙܰܒܼܢܳܐ ܒܰܐܣܺܝܰܐ ܿ܀ܿ܀ܿ
19:23 [ai]	ܗܘܳܐ ܗ̱ܘܳܐ ܕܶܝܢ ܒܗܰܘ ܙܰܒܼܢܳܐ ܫܓܼܽܘܫܝܳܐ ܣܰܓܿܺܝܳܐܐ ܥܰܠ ܐܽܘܪܚܶܗ ܕܰܐܠܳܗܳܐ܂
19:24 [ai]	ܐܺܝܬܼ ܗ̱ܘܳܐ ܕܶܝܢ ܬܰܡܳܢ ܥܳܒܼܶܕܼ ܣܺܐܡܳܐ ܚܰܕܼ܃ ܕܰܫܡܶܗ ܗ̱ܘܳܐ ܕܿܺܡܺܛܪܺܝܳܘܣ܃ ܕܥܳܒܼܶܕ ܗ̱ܘܳܐ ܢܰܘܣܶܐ̈ ܕܣܺܐܡܳܐ ܠܰܐܪܛܶܡܺܝܣ܂ ܘܡܰܘܬܿܰܪ ܗ̱ܘܳܐ ܠܰܒܼܢܰܝ ܐܽܘܡܳܢܽܘܬܼܶܗ ܝܽܘܬܼܪܳܢܳܐ ܪܰܒܿܳܐ܂
19:25 [ai]	ܗܳܢܳܐ ܟܰܢܶܫ ܐܶܢܽܘܢ ܠܰܒܼܢܰܝ ܐܽܘܡܳܢܽܘܬܼܶܗ ܟܽܠܗܽܘܢ܂ ܘܠܰܐܝܠܶܝܢ ܕܦܳܠܚܺܝܢ ܥܰܡܗܽܘܢ܂ ܘܶܐܡܰܪ ܠܗܽܘܢ܂ ܓܿܰܒܼܪ̈ܶܐ܃ ܝܳܕܼܥܺܝܢ ܐܢ̱ܬܿܽܘܢ܃ ܕܬܶܐܓܼܽܘܪܬܿܰܢ ܟܽܠܳܗ ܡܶܢ ܗܳܢܳܐ ܗ̱ܝ ܦܽܘܠܚܳܢܳܐ܂
19:26 [ai]	ܘܳܐܦܼ ܐܰܢ̱ܬܿܽܘܢ ܫܳܡܥܺܝܢ ܐܢ̱ܬܿܽܘܢ ܘܚܳܙܶܝܢ ܐܢ̱ܬܿܽܘܢ܃ ܕܠܳܐ ܗ̱ܘܳܐ ܒܰܠܚܽܘܕܼ ܠܰܒܼܢܰܝ ܐܶܦܼܶܣܳܘܣ܃ ܐܶܠܳܐ ܐܳܦܼ ܠܣܽܘܓܼܳܐܐ ܕܟܽܠܳܗ ܐܰܣܺܝܰܐ܃ ܐܰܦܿܺܝܣ ܗܳܢܳܐ ܦܿܰܘܠܳܘܣ܃ ܘܰܐܗܦܿܶܟܼ ܟܰܕܼ ܐܳܡܰܪ܂ ܕܠܰܘ ܐܰܠܳܗܶܐ̈ ܐܶܢܽܘܢ ܗܳܢܽܘܢ ܕܒܺܐܝܕܼܰܝ̈ ܒܢܰܝܢܳܫܳܐ ܡܶܬܼܥܰܒܼܕܺܝܢ܂
19:27 [ai]	ܘܠܰܘ ܗܳܕܼܶܐ ܨܒܼܽܘܬܼܳܐ ܒܰܠܚܽܘܕܼ ܡܶܬܼܦܿܰܪܣܝܳܐ ܘܒܼܳܛܠܳܐ܃ ܐܶܠܳܐ ܐܳܦܼ ܗܽܘ ܗܰܝܟܠܳܐ ܕܰܐܪܛܶܡܺܝܣ ܐܰܠܳܗܬܳܐ ܪܰܒܿܬܼܳܐ܂ ܡܶܬܼܚܫܶܒܼ ܠܶܗ܂ ܐܰܝܟܼ ܠܳܐ ܡܶܕܶܡ܂ ܘܳܐܦܼ ܗܺܝ ܐܰܠܳܗܬܳܐ ܕܟܽܠܳܗ ܐܰܣܺܝܰܐ܂ ܘܟܼܽܠܗܽܘܢ ܥܰܡ̱ܡܶܐ̈ ܣܳܓܼܕܺܝܢ ܠܳܗ܂ ܡܶܬܿܫܺܝܛܳܐ܀
19:28 [ai]	ܘܟܼܰܕܼ ܫܡܰܥܘ ܗܳܠܶܝܢ܃ ܐܶܬܼܡܠܺܝܘ ܚܶܡܬܳܐ܂ ܘܩܳܥܶܝܢ ܗ̱ܘܰܘ ܘܳܐܡܪܺܝܢ܂ ܪܰܒܿܳܐ ܗ̱ܝ ܐܰܪܛܶܡܺܝܣ ܕܶܐܦܼܶܣܳܝܶܐ̈܂
19:29 [ai]	ܘܶܐܫܬܿܰܓܼܫܰܬܼ ܟܽܠܳܗ ܡܕܼܺܝܢ̱ܬܳܐ܂ ܘܰܪܗܶܛܘ ܐܰܟܼܚܕܼܳܐ ܘܶܐܙܰܠܘ ܠܬܼܶܐܰܛܪܳܘܢ܂ ܘܰܚܛܰܦܼ ܘܐܰܘܒܿܶܠܘ ܥܰܡܗܽܘܢ܃ ܠܓܼܰܐܺܝܳܘܣ ܘܠܰܐܪܺܣܛܰܪܟܼܳܘܣ܃ ܓܿܰܒܼܪ̈ܶܐ ܡܰܩܶܕܼܳܘܢܳܝܶܐ̈ ܒܢܰܝ ܠܘܺܝܬܼܶܗ ܕܦܿܰܘܠܳܘܣ܂
19:30 [ai]	ܘܦܿܰܘܠܳܘܣ ܨܳܒܼܶܐ ܗ̱ܘܳܐ܃ ܕܢܶܥܽܘܠ ܠܬܼܶܐܰܛܪܳܘܢ܂ ܘܰܟܼܠܰܐܘܽܗ̱ܝ ܬܰܠܡܺܝܕܼܶܐ̈܂
19:31 [ai]	ܘܳܐܦܼ ܪ̈ܺܫܶܐ ܕܰܐܣܺܝܰܐ ܡܶܛܽܠ ܕܿܪ̈ܳܚܡܰܘܗ̱ܝ ܗ̱ܘܰܘ܃ ܫܰܕܿܰܪܘ ܒܥܰܘ ܡܶܢܶܗ܃ ܕܠܳܐ ܢܶܬܿܶܠ ܢܰܦܼܫܶܗ ܕܢܶܥܽܘܠ ܠܬܼܶܐܰܛܪܳܘܢ܂
19:32 [ai]	ܟܶܢܫܶܐ̈ ܕܶܝܢ ܕܺܐܝܬܼ ܗ̱ܘܰܘ ܒܬܶܐܰܛܪܳܘܢ܂ ܛܳܒܼ ܫܓܼܺܝܫܺܝܢ ܗ̱ܘܰܘ܂ ܘܰܐ̱ܚܪ̈ܳܢܶܐ ܐ̱ܚܪ̈ܳܢܝܳܬܼܳܐ ܩܳܥܶܝܢ ܗ̱ܘܰܘ܂ ܣܰܓܿܺܝܶܐܐ̈ ܓܶܝܪ ܡܶܢܗܽܘܢ ܠܳܐ ܝܳܕܼܥܺܝܢ ܗ̱ܘܰܘ܃ ܡܶܛܽܠ ܡܳܢܳܐ ܐܶܬܼܟܿܰܢܰܫܘ܂
19:33 [ai]	ܥܰܡܳܐ ܕܶܝܢ ܕܺܝܗܽܘܕܼܳܝܶܐ̈ ܕܺܐܝܬܼ ܗ̱ܘܰܘ ܬܰܡܳܢ܃ ܐܰܩܺܝܡܘ ܡܶܢܗܽܘܢ ܠܓܼܰܒܼܪܳܐ ܺܝܗܽܘܕܼܳܝܳܐ ܕܰܫܡܶܗ ܐܰܠܶܟܿܣܰܢܕܿܪܳܘܣ܂ ܘܟܼܰܕܼ ܩܳܡ܂ ܐܰܢܺܝܦܼ ܐܺܝܕܼܶܗ܃ ܘܨܳܒܼܶܐ ܗ̱ܘܳܐ ܕܢܶܦܽܘܩ ܪܽܘܚܳܐ ܠܥܰܡܳܐ܂
19:34 [ai]	ܘܟܼܰܕܼ ܺܝܕܼܰܥܘ ܕܺܝܗܽܘܕܼܳܝܳܐ ܗ̱ܘ܃ ܩܥܰܘ ܟܽܠܗܽܘܢ ܒܚܰܕܼ ܩܳܠܳܐ ܐܰܝܟܼ ܫܳܥܺܝܢ̈ ܬܿܰܪ̈ܬܿܶܝܢ܂ ܕܪܰܒܿܳܐ ܗ̱ܝ ܐܰܪܛܶܡܺܝܣ ܕܶܐܦܼܶܣܳܝܶܐ̈܂
19:35 [ai]	ܘܫܰܠܺܝ ܐܶܢܽܘܢ ܪܺܫܳܐ ܕܰܡܕܼܺܝܢ̱ܬܳܐ ܟܰܕܼ ܐܳܡܰܪ܂ ܓܿܰܒܼܪ̈ܶܐ ܐܶܦܼܶܣܳܝܶܐ̈܃ ܡܰܢܽܘ ܓܶܝܪ ܡܶܢ ܒܢܰܝܢܳܫܳܐ ܕܠܳܐ ܝܳܕܼܰܥ ܠܰܡܕܼܺܝܢ̱ܬܳܐ ܕܶܐܦܼܶܣܳܝܶܐ̈܃ ܕܟܽܘܡܪܬܼܳܐ ܗ̱ܝ ܕܰܐܪܛܶܡܺܝܣ ܪܰܒܿܬܼܳܐ܃ ܘܰܠܨܰܠܡܳܗ ܕܡܶܢ ܫܡܰܝܳܐ ܢܚܶܬܼ܂
19:36 [ai]	ܡܶܛܽܠ ܗܳܟܼܺܝܠ ܕܠܽܘܩܒܼܰܠ ܗܳܕܼܶܐ ܐ̱ܢܳܫ ܠܳܐ ܡܶܫܟܿܰܚ ܠܡܺܐܡܰܪ܃ ܘܳܠܶܐ ܠܟܼܽܘܢ ܕܬܶܗܘܽܘܢ ܫܠܶܝܢ ܘܠܳܐ ܬܶܥܒܿܕܼܽܘܢ ܡܶܕܶܡ ܒܣܽܘܪܗܳܒܼܳܐ܂
19:37 [ai]	ܐܰܝܬܿܺܝܬܿܽܘܢ ܓܶܝܪ ܠܓܼܰܒܼܪ̈ܶܐ ܗܳܠܶܝܢ܃ ܟܰܕܼ ܠܳܐ ܗܰܝܟܠܶܐ̈ ܚܰܠܶܨܘ܃ ܘܠܳܐ ܨܰܚܺܝܘ ܠܰܐܠܳܗܬܿܰܢ܂
19:38 [ai]	ܐܶܢ ܕܶܝܢ ܗܳܢܳܐ ܕܿܺܡܺܛܪܺܝܳܘܣ ܘܰܒܢܰܝ ܐܽܘܡܳܢܽܘܬܼܶܗ ܐܺܝܬܼ ܠܗܽܘܢ ܕܺܝܢܳܐ ܥܰܡ ܐ̱ܢܳܫ܃ ܗܳܐ ܐܰܢܬܼܽܘܦܿܰܛܳܘܣ ܒܰܡܕܼܺܝܢ̱ܬܳܐ܂ ܐܽܘܡܳܢܶܐ̈ ܐܶܢܽܘܢ܂ ܢܶܩܪܒܼܽܘܢ ܘܰܢܕܼܽܘܢܽܘܢ ܚܰܕܼ ܥܰܡ ܚܰܕܼ܂
19:39 [ai]	ܘܶܐܢ ܗܽܘ ܕܿܡܶܕܶܡ ܐ̱ܚܪܺܝܢ ܒܿܳܥܶܝܢ ܐܢ̱ܬܿܽܘܢ܃ ܒܕܽܘܟܿܬܼܳܐ ܕܺܝܗܺܝܒܼܳܐ ܡܶܢ ܢܳܡܽܘܣܳܐ ܠܰܟܼܢܽܘܫܝܳܐ܂ ܡܶܫܬܿܪܶܐ܂
19:40 [ai]	ܡܶܛܽܠ ܕܳܐܦܼ ܗܳܫܳܐ ܒܩܽܢܕܼܺܝܢܳܘܣ ܩܳܝܡܺܝܢܰܢ܃ ܕܢܶܬܼܪܫܶܐ ܐܰܝܟܼ ܫܳܓܼܽܘܫܶܐ̈܃ ܕܠܳܐ ܡܶܫܟܿܚܺܝܢܰܢ ܕܢܶܦܽܘܩ ܪܽܘܚܳܐ ܥܰܠ ܟܶܢܫܳܐ ܕܝܰܘܡܳܐ ܗܳܢܳܐ ܕܶܐܬܼܟܿܰܢܰܫܢ ܒܰܛܳܠܳܐܺܝܬܼ܃ ܘܶܐܫܬܿܓܼܶܫܢ ܕܠܳܐ ܥܶܠܬܼܳܐ܂
19:41 [ai]	ܘܟܼܰܕܼ ܗܳܠܶܝܢ ܐܶܡܰܪ܃ ܫܪܳܐ ܠܟܼܶܢܫܳܐ܀

next chapter