← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62044: P Acts

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


20:01 [ai]ܘܒܼܳܬܼܰܪ ܕܰܫܠܺܝ ܫܓܼܽܘܫܝܳܐ܃ ܩܪܳܐ ܦܿܰܘܠܳܘܣ ܠܬܼܰܠܡܺܝܕܼܶܐ̈܂ ܘܒܼܰܝܰܐ ܐܶܢܽܘܢ ܘܢܰܫܶܩ ܐܶܢܽܘܢ܂ ܘܰܢܦܼܰܩ ܐܶܙܰܠ ܠܶܗ ܠܡܰܩܶܕܼܳܘܢܺܝܰܐ܂
20:02 [ai]ܘܟܼܰܕܼ ܐܶܬܼܟܿܪܶܟܼ ܐܶܢܽܘܢ ܠܰܐܬܼܪ̈ܰܘܳܬܼܳܐ ܗܳܠܶܝܢ܃ ܘܒܼܰܝܰܐ ܐܶܢܽܘܢ ܒܡܶܠܶܐ̈ ܣܰܓܿܺܝܳܐܬܼܳܐ̈܃ ܐܶܬܼܳܐ ܠܶܗ ܠܗܶܠܰܣ ܐܰܬܼܪܳܐ܂
20:03 [ai]ܘܰܗܘܳܐ ܬܰܡܳܢ ܬܠܳܬܼܳܐ ܝܰܪ̈ܚܺܝܢ܂ ܥܒܼܰܕܼܘ ܕܶܝܢ ܥܠܰܘܗ̱ܝ ܢܶܟܼܠܳܐ ܺܝܗܽܘܕܼܳܝܶܐ̈܃ ܟܰܕܼ ܥܬܼܺܝܕܼ ܗ̱ܘܳܐ ܠܡܺܐܙܰܠ ܠܣܽܘܪܺܝܰܐ܂ ܘܶܐܬܼܚܰܫܰܒܼ ܕܢܶܗܦܿܽܘܟܼ ܠܶܗ ܠܡܰܩܶܕܼܳܘܢܺܝܰܐ܂
20:04 [ai]ܘܰܢܦܼܰܩܘ ܥܰܡܶܗ ܥܕܼܰܡܳܐ ܠܰܐܣܺܝܰܐ܃ ܣܳܘܦܿܰܛܪܳܘܣ ܕܡܶܢ ܒܿܶܪܳܘܐܰܐ ܡܕܼܺܝܢ̱ܬܳܐ܂ ܘܰܐܪܺܣܛܰܪܟܼܳܘܣ܂ ܘܣܶܩܽܘܢܕܼܳܘܣ ܕܡܶܢ ܬܿܶܣܰܠܳܘܢܺܝܩܺܐ̈܂ ܘܓܼܰܐܺܝܳܘܣ ܕܡܶܢ ܕܿܶܪܒܿܺܐ ܡܕܼܺܝܢ̱ܬܳܐ܂ ܘܛܺܝܡܳܬܼܶܐܳܘܣ ܕܡܶܢ ܠܽܘܣܛܪܰܐ܂ ܘܡܶܢ ܐܰܣܺܝܰܐ܂ ܛܽܘܟܼܺܝܩܳܘܣ ܘܰܛܪܳܘܦܼܺܝܡܳܘܣ܂
20:05 [ai]ܗܳܠܶܝܢ ܐܶܙܰܠܘ ܩܕܼܳܡܰܝܢ܃ ܘܩܰܘܺܝܘ ܠܰܢ ܒܰܛܪܳܘܰܐܣ܂
20:06 [ai]ܚܢܰܢ ܕܶܝܢ ܢܦܼܰܩܢ ܡܶܢ ܦܼܺܝܠܺܝܦܿܳܘܣ ܡܕܼܺܝܢ̱ܬܳܐ ܕܡܰܩܶܕܼܳܘܢܳܝܶܐ̈܂ ܒܳܬܼܰܪ ܝܰܘܡܳܬܼܳܐ̈ ܕܿܦܼܰܛܺܝܪ̈ܶܐ܂ ܘܰܪܕܼܰܝܢ ܒܝܰܡܳܐ܂ ܘܶܐܬܼܰܝܢ ܠܰܛܪܳܘܰܐܣ ܠܝܰܘܡܳܬܼܳܐ̈ ܚܰܡܫܳܐ܂ ܘܰܗܘܰܝܢ ܬܰܡܳܢ ܝܰܘܡܳܬܼܳܐ̈ ܫܰܒܼܥܳܐ܂
20:07 [ai]ܘܰܒܝܰܘܡܳܐ ܕܚܰܕܼ ܒܫܰܒܿܳܐ ܟܰܕܼ ܟܢܺܝܫܺܝܢܰܢ ܕܢܶܩܨܶܐ ܐܶܘܟܼܰܪܺܣܛܺܝܰܐ܃ ܡܡܰܠܶܠ ܗ̱ܘܳܐ ܥܰܡܗܽܘܢ ܦܿܰܘܠܳܘܣ܃ ܡܶܛܽܠ ܕܰܠܝܰܘܡܳܐ ܐ̱ܚܪܺܢܳܐ ܥܬܼܺܝܕܼ ܗ̱ܘܳܐ ܕܢܶܦܽܘܩ ܠܶܗ܂ ܘܰܐܓܿܰܪ ܗ̱ܘܳܐ ܠܰܡܡܰܠܳܠܽܘ܃ ܥܕܼܰܡܳܐ ܠܦܼܶܠܓܿܶܗ ܕܠܺܠܝܳܐ܂
20:08 [ai]ܘܺܐܝܬܼ ܗ̱ܘܳܐ ܬܰܡܳܢ ܠܰܡܦܿܺܐܕܼܶܐ̈ ܕܢܽܘܪܳܐ ܣܰܓܿܺܝܶܐܐ̈܃ ܒܥܶܠܺܝܬܼܳܐ ܗܳܝ ܕܰܟܼܢܺܝܫܺܝܢ ܗܘܰܝܢ ܒܿܳܗ܂
20:09 [ai]ܘܝܳܬܼܶܒܼ ܗ̱ܘܳܐ ܥܠܰܝܡܳܐ ܚܰܕܼ ܕܰܫܡܶܗ ܗܘܳܐ ܐܶܘܛܽܟܼܳܘܣ܂ ܒܟܰܘܬܼܳܐ܂ ܘܫܳܡܰܥ܂ ܘܰܛܒܼܰܥ ܒܫܶܢܬܼܳܐ ܝܰܩܺܝܪܬܳܐ܃ ܟܰܕܼ ܐܰܓܿܰܪ ܗ̱ܘܳܐ ܒܡܶܠܬܼܳܐ ܦܿܰܘܠܳܘܣ܂ ܘܰܒܫܶܢܬܼܶܗ ܢܦܼܰܠ ܗ̱ܘܳܐ ܡܶܢ ܬܠܳܬܼܳܐ ܡܶܕܼܝܳܪ̈ܺܝܢ܃ ܘܶܐܫܬܿܩܶܠ ܟܰܕܼ ܡܺܝܬܼ܂
20:10 [ai]ܘܰܢܚܶܬܼ ܦܿܰܘܠܳܘܣ ܢܦܼܰܠ ܠܥܶܠ ܡܶܢܶܗ܃ ܘܥܰܦܿܩܶܗ ܘܶܐܡܰܪ܂ ܠܳܐ ܬܶܬܿܙܺܝܥܽܘܢ܂ ܡܶܛܽܠ ܕܢܰܦܼܫܶܗ ܒܶܗ ܗ̱ܺܝ܂
20:11 [ai]ܟܰܕܼ ܣܠܶܩ ܕܶܝܢ܂ ܩܨܳܐ ܠܰܚܡܳܐ ܘܰܛܥܶܡ܂ ܘܰܗܘܳܐ ܡܡܰܠܶܠ ܥܕܼܰܡܳܐ ܕܰܣܠܶܩ ܨܰܦܼܪܳܐ܂ ܘܗܳܝܕܶܝܢ ܢܦܼܰܩ܃ ܕܢܺܐܙܰܠ ܒܝܰܒܼܫܳܐ܂
20:12 [ai]ܘܕܼܰܒܼܪܽܘܗ̱ܝ ܠܰܥܠܰܝܡܳܐ ܟܰܕܼ ܚܰܝ܂ ܘܰܚܕܼܺܝܘ ܒܶܗ ܪܰܘܪܒܼܳܐܺܝܬܼ܀
20:13 [ai]ܚܢܰܢ ܕܶܝܢ ܢܚܶܬܼܢ ܠܶܐܠܦܼܳܐ܂ ܘܰܪܕܼܰܝܢ ܠܘܰܥܕܿܳܐ ܕܬܼܰܣܳܘܣ܃ ܡܶܛܽܠ ܕܡܶܢ ܬܰܡܳܢ ܥܬܼܺܝܕܼܺܝܢ ܗ̱ܘܰܝܢ ܕܰܢܩܰܒܿܠܺܝܘܗ̱ܝ ܠܦܿܰܘܠܳܘܣ܂ ܗܳܟܼܰܢܳܐ ܓܶܝܪ ܦܩܰܕܼ ܗ̱ܘܳܐ ܠܰܢ܃ ܟܰܕܼ ܐܶܙܰܠ ܗ̱ܘܳܐ ܗܽܘ ܒܝܰܒܼܫܳܐ܂
20:14 [ai]ܟܰܕܼ ܕܶܝܢ ܩܰܒܿܶܠܢܳܝܗ̱ܝ ܡܶܢ ܬܿܰܣܳܘܣ܃ ܫܩܰܠܢܳܝܗ̱ܝ ܒܶܐܠܦܼܳܐ܂ ܘܶܐܬܼܰܝܢ ܠܡܺܝܛܽܘܠܺܝܢܺܐ܂
20:15 [ai]ܘܡܶܢ ܬܰܡܳܢ ܠܝܰܘܡܳܐ ܐ̱ܚܪܺܢܳܐ܃ ܪܕܼܰܝܢ ܠܽܘܩܒܼܰܠ ܟܿܺܝܳܘܣ ܓܳܙܰܪܬܳܐ܂ ܘܬܼܽܘܒܼ ܠܝܰܘܡܳܐ ܐ̱ܚܪܺܢܳܐ܃ ܐܶܬܼܰܝܢ ܠܣܰܡܳܘܣ܂ ܘܩܰܘܺܝܢ ܒܰܛܪܳܘܓܼܺܠܺܝܳܘܢ܂ ܘܰܠܝܰܘܡܳܐ ܐ̱ܚܪܺܢܳܐ ܐܶܬܼܰܝܢ ܠܡܺܝܠܺܝܛܳܘܣ܂
20:16 [ai]ܦܣܺܝܩ ܗ̱ܘܳܐ ܠܶܗ ܓܶܝܪ ܠܦܿܰܘܠܳܘܣ܃ ܕܢܶܥܒܿܪܺܝܗ ܠܶܐܦܼܶܣܳܘܣ܃ ܕܰܠܡܳܐ ܢܶܫܬܰܘܚܰܪ ܠܶܗ ܬܰܡܳܢ܃ ܡܶܛܽܠ ܕܰܡܣܰܪܗܰܒܼ ܗ̱ܘܳܐ ܕܶܐܢ ܡܶܫܟܿܚܳܐ܃ ܝܰܘܡܳܐ ܕܦܿܶܢܛܺܩܳܘܣܛܺܐ ܒܽܐܘܪܺܫܠܶܡ ܢܶܥܒܿܕܼܺܝܘܗ̱ܝ܂
20:17 [ai]ܘܡܶܢܳܗ ܡܶܢ ܡܺܝܠܺܝܛܳܘܣ܃ ܫܰܕܿܰܪ ܐܰܝܬܿܺܝ ܠܩܰܫܺܝܫܶܐ̈ ܕܥܺܕ̱ܿܬܳܐ ܕܶܐܦܼܶܣܳܘܣ܂
20:18 [ai]ܘܟܼܰܕܼ ܐܶܬܼܰܘ ܠܘܳܬܼܶܗ܃ ܐܶܡܰܪ ܠܗܽܘܢ܂ ܐܰܢ̱ܬܿܽܘܢ ܝܳܕܼܥܺܝܢ ܐܢ̱ܬܿܽܘܢ ܕܡܶܢ ܝܰܘܡܳܐ ܩܰܕܼܡܳܝܳܐ ܕܥܶܠܶܬܼ ܠܰܐܣܺܝܰܐ܃ ܐܰܝܟܿܰܢܳܐ ܗܘܺܝܬܼ ܥܰܡܟܼܽܘܢ ܟܽܠܶܗ ܙܰܒܼܢܳܐ܃
20:19 [ai]ܟܰܕܼ ܦܳܠܰܚ ܐ̱ܢܳܐ ܠܰܐܠܳܗܳܐ ܒܡܰܟܿܺܝܟܼܽܘܬܼܳܐ ܣܰܓܿܺܝܐܬܼܳܐ ܘܰܒܕܼܶܡܥܶܐ̈ ܘܰܒܢܶܣܝܽܘܢܶܐ̈ ܐܰܝܠܶܝܢ ܕܥܳܕܼܶܝܢ ܗ̱ܘܰܘ ܥܠܰܝ ܒܢܶܟܼܠܰܝܗܽܘܢ̈ ܕܺܝܗܽܘܕܼܳܝܶܐ̈܃
20:20 [ai]ܘܠܳܐ ܒܣܺܝܬܼ ܒܡܶܕܶܡ ܕܦܰܩܳܚ ܗ̱ܘܳܐ ܠܢܰܦܼܫܳܬܼܟܼܽܘܢ̈ ܕܰܐܟܼܪܶܙ ܠܟܼܽܘܢ܃ ܘܰܐܠܶܦܼ ܒܫܽܘܩܶܐ̈ ܘܰܒܒܼܳܬܿܶܐ̈܃
20:21 [ai]ܟܰܕܼ ܡܣܰܗܶܕܼ ܗ̱ܘܺܝܬܼ ܠܺܝܗܽܘܕܼܳܝܶܐ̈ ܘܠܰܐܪ̈ܡܳܝܶܐ ܥܰܠ ܬܝܳܒܿܽܘܬܼܳܐ ܕܰܠܘܳܬܼ ܐܰܠܳܗܳܐ܃ ܘܗܰܝܡܳܢܽܘܬܼܳܐ ܕܰܒܼܡܳܪܰܢ ܝܶܫܽܘܥ ܡܫܺܝܚܳܐ ܿ܀ܿ܀ܿ
20:22 [ai]ܘܗܳܫܳܐ ܐܶܢܳܐ ܐܰܣܺܝܪ ܐ̱ܢܳܐ ܒܪܽܘܚܳܐ܂ ܘܳܐܙܶܠ ܐ̱ܢܳܐ ܠܽܐܘܪܺܫܠܶܡ܂ ܘܠܳܐ ܝܳܕܼܰܥ ܐ̱ܢܳܐ ܡܳܢܳܐ ܐܳܪܰܥ ܠܺܝ ܒܿܳܗ܂
20:23 [ai]ܒܪܰܡ ܪܽܘܚܳܐ ܕܩܽܘܕܼܫܳܐ ܒܟܽܠ ܡܕܼܺܝܢܳܐ ܡܣܰܗܶܕܼ ܠܺܝ ܘܳܐܡܰܪ܃ ܕܿܰܐܣܽܘܪ̈ܶܐ ܘܽܐܘܠܨܳܢܶܐ̈ ܥܬܼܺܝܕܼܺܝܢ ܠܳܟܼ܂
20:24 [ai]ܐܶܠܳܐ ܠܺܝ ܠܳܐ ܚܫܺܝܒܼܳܐ ܢܰܦܼܫܝ ܡܶܕܶܡ܃ ܐܰܝܟܼ ܕܶܐܫܰܠܶܡ ܪܶܗܛܝ ܘܬܼܶܫܡܶܫܬܳܐ ܕܩܰܒܿܠܶܬܼ ܡܶܢ ܡܳܪܰܢ ܝܶܫܽܘܥ܃ ܕܰܐܣܗܶܕܼ ܥܰܠ ܣܒܼܰܪܬܼܳܐ ܕܛܰܝܒܿܽܘܬܼܶܗ ܕܰܐܠܳܗܳܐ܂
20:25 [ai]ܘܗܳܫܳܐ ܐܶܢܳܐ ܝܳܕܼܰܥ ܐ̱ܢܳܐ܃ ܕܬܽܘܒܼ ܦܰܪܨܽܘܦܿܝ ܠܳܐ ܚܳܙܶܝܢ ܐܢ̱ܬܿܽܘܢ܃ ܟܽܠܟܼܽܘܢ ܐܰܝܠܶܝܢ ܕܶܐܬܼܟܰܪܟܿܶܬܼ ܐܰܟܼܪܙܶܬܼ ܠܟܼܽܘܢ ܡܰܠܟܿܽܘܬܼܳܐ܂
20:26 [ai]ܘܡܶܛܽܠ ܗܳܢܳܐ ܡܣܰܗܶܕܼ ܐ̱ܢܳܐ ܠܟܼܽܘܢ ܝܰܘܡܳܐ ܕܝܰܘܡܳܢܳܐ܃ ܕܰܕܼܟܼܶܐ ܐ̱ܢܳܐ ܡܶܢ ܕܡܳܐ ܕܟܽܠܟܼܽܘܢ܂
20:27 [ai]ܠܳܐ ܓܶܝܪ ܐܶܫܬܿܶܐܠܶܬܼ܃ ܕܰܐܘܕܿܰܥܟܼܽܘܢ ܟܽܠܶܗ ܨܶܒܼܝܳܢܶܗ ܕܰܐܠܳܗܳܐ܂
20:28 [ai]ܐܶܙܕܿܰܗ̱ܪܘ ܗܳܟܼܺܝܠ ܒܢܰܦܼܫܟܼܽܘܢ܂ ܘܰܒܟܼܽܠܳܗ ܡܰܪܥܺܝܬܼܳܐ܃ ܗܳܝ ܕܰܐܩܺܝܡܟܼܽܘܢ ܒܿܳܗ ܪܽܘܚܳܐ ܕܩܽܘܕܼܫܳܐ ܐܶܦܿܺܣܩܳܘܦܿܶܐ̈܃ ܕܬܶܪܥܽܘܢ ܠܥܺܕ̱ܿܬܿܶܗ ܕܰܐܠܳܗܳܐ܂ ܗܳܝ ܕܰܩܢܳܗ ܒܰܕܼܡܶܗ܂
20:29 [ai]ܐܶܢܳܐ ܝܳܕܼܰܥ ܐ̱ܢܳܐ܃ ܕܡܶܢ ܒܳܬܼܰܪ ܕܳܐܙܶܠ ܐ̱ܢܳܐ܃ ܢܶܥܠܽܘܢ ܥܰܡܟܼܽܘܢ ܕܺܐܒܼܶܐ̈ ܬܰܩܺܝܦܼܶܐ̈܃ ܕܠܳܐ ܚܳܝܣܺܝܢ ܥܰܠ ܡܰܪܥܺܝܬܼܳܐ܂
20:30 [ai]ܘܳܐܦܼ ܡܶܢܟܼܽܘܢ ܕܺܝܠܟܼܽܘܢ ܢܩܽܘܡܽܘܢ ܓܿܰܒܼܪ̈ܶܐ ܡܡܰܠܠܰܝ̈ ܡܥܰܩܡܳܬܼܳܐ̈܃ ܐܰܝܟܼ ܕܢܰܗܦܿܟܼܽܘܢ ܠܬܼܰܠܡܺܝܕܼܶܐ̈ ܕܢܺܐܙܽܠ̱ܘܢ ܒܳܬܼܰܪܗܽܘܢ܂
20:31 [ai]ܡܶܛܽܠ ܗܳܢܳܐ ܗܘܰܝܬܿܽܘܢ ܥܺܝܪܺܝܢ ܘܥܰܗܺܝܕܼܺܝܢ܃ ܕܰܫܢܰܝܳܐ̈ ܬܠܳܬܼ ܠܳܐ ܫܠܺܝܬܼ ܒܠܺܠܝܳܐ ܘܒܼܺܐܝܡܳܡܳܐ܃ ܟܰܕܼ ܒܕܶܡܥܶܐ̈ ܡܰܪܬܿܶܐ ܐܶܢܳܐ ܠܐ̱ܢܳܫ ܐ̱ܢܳܫ ܡܶܢܟܼܽܘܢ܂
20:32 [ai]ܘܗܳܫܳܐ ܡܰܓܼܥܶܠ ܐ̱ܢܳܐ ܠܟܼܽܘܢ ܠܰܐܠܳܗܳܐ ܘܰܠܡܶܠܬܼܳܐ ܕܛܰܝܒܿܽܘܬܼܶܗ܃ ܕܗܺܝ ܡܶܫܟܿܚܳܐ ܒܳܢܝܳܐ ܠܟܼܽܘܢ܃ ܘܝܳܗܒܿܳܐ ܠܟܼܽܘܢ ܝܽܘܪܬܿܳܢܳܐ ܥܰܡ ܟܽܠܗܽܘܢ ܩܰܕܿܺܝܫܶܐ̈܂
20:33 [ai]ܟܶܣܦܿܳܐ ܐܰܘ ܕܰܗܒܼܳܐ ܐܰܘ ܢܰܚܬܿܶܐ̈ ܠܳܐ ܪܶܓܿܶܬܼ܂
20:34 [ai]ܘܰܐܢ̱ܬܿܽܘܢ ܝܳܕܼܥܺܝܢ ܐܢ̱ܬܿܽܘܢ܃ ܕܠܰܣܢܺܝܩܽܘܬܼܝ ܘܠܰܐܝܠܶܝܢ ܕܺܐܝܬܼ ܥܰܡܝ܃ ܫܰܡܶܫ ܗܳܠܶܝܢ ܐܺܝܕܼܰܝ̈܂
20:35 [ai]ܘܟܼܽܠܡܶܕܶܡ ܚܰܘܺܝܬܼܟܼܽܘܢ܃ ܕܗܳܟܼܰܢܳܐ ܘܳܠܶܐ ܠܡܶܠܳܐܐ ܘܰܠܡܺܐܨܰܦܼ ܕܰܐܝܠܶܝܢ ܕܰܟܼܪܺܝܗܺܝܢ܃ ܘܠܰܡܥܰܗܳܕܼܽܘ ܡܶܠܰܘܗ̱ܝ̈ ܕܡܳܪܰܢ ܝܶܫܽܘܥ܂ ܡܶܛܽܠ ܕܗܽܘ ܐܶܡܰܪ܃ ܕܛܽܘܒܼܰܘܗ̱ܝ ܠܰܐܝܢܳܐ ܕܝܳܗܶܒܼ ܝܰܬܿܺܝܪ ܡܶܢ ܐܰܝܢܳܐ ܕܢܳܣܶܒܼ܂
20:36 [ai]ܘܟܼܰܕܼ ܗܳܠܶܝܢ ܐܶܡܰܪ܃ ܩܥܶܕܼ ܥܰܠ ܒܽܘܪ̈ܟܿܰܘܗ̱ܝ ܘܨܰܠܺܝ܂ ܘܟܼܽܠܗܽܘܢ ܐ̱ܢܳܫܳܐ ܥܰܡܶܗ܂
20:37 [ai]ܘܰܗܘܳܬܼ ܒܟܳܬܼܳܐ ܪܰܒܿܬܼܳܐ ܒܟܽܠܗܽܘܢ܂ ܘܥܰܦܿܩܽܘܗ̱ܝ ܘܰܡܢܰܫܩܺܝܢ ܗ̱ܘܰܘ ܠܶܗ܂
20:38 [ai]ܝܰܬܿܺܝܪܳܐܺܝܬܼ ܕܶܝܢ ܡܶܫܬܿܰܢܩܺܝܢ ܗ̱ܘܰܘ ܥܰܠ ܗܳܝ ܡܶܠܬܼܳܐ ܕܶܐܡܰܪ܃ ܕܠܳܐ ܬܽܘܒܼ ܥܬܼܺܝܕܼܺܝܢ ܕܢܶܚܙܽܘܢ ܦܰܪܨܽܘܦܿܶܗ܂ ܘܠܰܘܝܽܘܗ̱ܝ ܥܕܼܰܡܳܐ ܠܶܐܠܦܼܳܐ܀

next chapter