← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62044: P Acts

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


23:01 [ai]ܘܟܼܰܕܼ ܚܳܪ ܦܿܰܘܠܳܘܣ ܒܟܶܢܫܗܽܘܢ܃ ܐܶܡܰܪ܂ ܓܿܰܒܼܪ̈ܶܐ ܐܰܚܰܝ̈܃ ܐܶܢܳܐ ܒܟܽܠ ܬܿܺܐܪܬܳܐ ܛܳܒܼܬܼܳܐ ܐܶܬܿܕܿܰܒܿܪܶܬܼ ܩܕܼܳܡ ܐܰܠܳܗܳܐ ܥܕܼܰܡܳܐ ܠܝܰܘܡܳܢܳܐ܂
23:02 [ai]ܘܚܰܢܰܢܝܳܐ ܟܳܗܢܳܐ ܦܩܰܕܼ ܠܗܳܢܽܘܢ ܕܩܳܝܡܺܝܢ ܥܰܠ ܓܿܶܒܶܗ܃ ܕܢܶܡܚܽܘܢܶܗ ܠܦܿܰܘܠܳܘܣ ܥܰܠ ܦܽܘܡܶܗ܂
23:03 [ai]ܘܦܿܰܘܠܳܘܣ ܐܶܡܰܪ ܠܶܗ܂ ܥܬܼܺܝܕܼ ܗ̱ܽܘ ܐܰܠܳܗܳܐ ܕܢܶܡܚܶܝܟܼ܂ ܐܶܣܬܼܳܐ ܡܚܰܘܰܪܬܳܐ܂ ܘܰܐܢ̱ܬܿ ܝܳܬܼܶܒܼ ܐܰܢ̱ܬܿ ܕܳܐܶܢ ܐܰܢ̱ܬܿ ܠܺܝ ܐܰܝܟܼ ܕܰܒܼܢܳܡܽܘܣܳܐ܃ ܟܰܕܼ ܥܳܒܼܰܪ ܐܰܢ̱ܬܿ ܥܰܠ ܢܳܡܽܘܣܳܐ ܘܦܼܳܩܶܕܼ ܐܰܢ̱ܬܿ ܕܢܶܡܚܽܘܢܳܢܝ܂
23:04 [ai]ܘܰܐܝܠܶܝܢ ܕܩܳܝܡܺܝܢ ܗ̱ܘܰܘ ܬܰܡܳܢ܂ ܐܳܡܪܺܝܢ ܠܶܗ܂ ܠܟܼܳܗܢܳܐ ܕܰܐܠܳܗܳܐ ܡܨܰܚܶܐ ܐܰܢ̱ܬܿ܂
23:05 [ai]ܐܳܡܰܪ ܠܗܽܘܢ ܦܿܰܘܠܳܘܣ܂ ܠܳܐ ܝܳܕܼܰܥ ܗ̱ܘܺܝܬܼ ܐܰܚܰܝ̈܃ ܕܟܳܗܢܳܐ ܗ̱ܘ܂ ܟܬܼܺܝܒܼ ܗ̱ܽܘ ܓܶܝܪ ܕܰܠܪܺܫܳܐ ܕܥܰܡܳܟܼ ܠܳܐ ܬܠܽܘܛ܂
23:06 [ai]ܘܟܼܰܕܼ ܺܝܕܼܰܥ ܦܿܰܘܠܳܘܣ ܕܡܶܢܶܗ ܕܥܰܡܳܐ ܐܺܝܬܼܰܘܗ̱ܝ ܕܙܰܕܿܽܘܩܳܝܶܐ̈ ܘܡܶܢܶܗ ܕܿܰܦܼܪ̈ܺܝܫܶܐ܃ ܩܥܳܐ ܗ̱ܘܳܐ ܒܟܶܢܫܳܐ܂ ܓܿܰܒܼܪ̈ܶܐ ܐܰܚܰܝ̈܃ ܐܶܢܳܐ ܦܪܺܝܫܳܐ ܐ̱ܢܳܐ ܒܰܪ ܦܿܪ̈ܺܝܫܶܐ܂ ܘܥܰܠ ܣܰܒܼܪܳܐ ܕܰܩܝܳܡܬܳܐ ܕܡܺܝܬܼܶܐ̈ ܡܶܬܿܕܼܺܝܢ ܐ̱ܢܳܐ܂
23:07 [ai]ܘܟܼܰܕܼ ܗܳܕܼܶܐ ܐܶܡܰܪ܃ ܢܦܼܰܠܘ ܚܰܕܼ ܒܚܰܕܼ ܦܿܪ̈ܺܝܫܶܐ ܘܙܰܕܿܽܘܩܳܝܶܐ̈܃ ܘܶܐܬܼܦܿܠܶܓܼ ܥܰܡܳܐ܂
23:08 [ai]ܙܰܕܿܽܘܩܳܝܶܐ̈ ܓܶܝܪ ܐܳܡܪܺܝܢ܃ ܕܠܰܝܬܿ ܩܝܳܡܬܳܐ ܘܠܳܐ ܡܰܠܰܐܟܼܶܐ̈ ܘܠܳܐ ܪܽܘܚܳܐ܂ ܦܿܪ̈ܺܝܫܶܐ ܕܶܝܢ ܡܰܘܕܶܝܢ ܒܟܽܠܗܶܝܢ܂
23:09 [ai]ܘܰܗܘܳܐ ܩܳܠܳܐ ܪܰܒܿܳܐ܂ ܘܩܳܡܘ ܐ̱ܢܳܫܳܐ ܣܳܦܼܪ̈ܶܐ ܡܶܢ ܓܰܒܿܳܐ ܕܿܰܦܼܪ̈ܺܝܫܶܐ܃ ܘܢܳܨܶܝܢ ܗ̱ܘܰܘ ܥܰܡܗܽܘܢ܂ ܘܳܐܡܪܺܝܢ܂ ܠܳܐ ܡܶܫܟܿܚܺܝܢܰܢ ܡܶܕܶܡ ܕܒܺܝܫ ܒܗܳܢܳܐ ܓܰܒܼܪܳܐ܂ ܐܶܢ ܕܶܝܢ ܪܽܘܚܳܐ ܐܰܘ ܡܰܠܰܐܟܼܳܐ ܡܰܠܶܠ ܥܰܡܶܗ܃ ܡܳܢܳܐ ܐܺܝܬܼ ܒܿܳܗ ܒܗܳܕܼܶܐ܂
23:10 [ai]ܘܟܼܰܕܼ ܗܘܳܐ ܫܓܼܽܘܫܝܳܐ ܪܰܒܿܳܐ ܒܰܝܢܳܬܼܗܽܘܢ܃ ܕܚܶܠ ܗ̱ܘܳܐ ܟܺܠܺܝܰܪܟܼܳܐ܃ ܕܰܠܡܳܐ ܢܦܼܰܫܚܽܘܢܶܗ ܠܦܿܰܘܠܳܘܣ܂ ܘܰܫܠܰܚ ܠܪ̈ܽܗ̱ܘܡܳܝܶܐ܃ ܕܢܺܐܬܼܽܘܢ ܢܶܚܛܦܼܽܘܢܶܗ ܡܶܢ ܡܨܰܥܬܼܗܽܘܢ܂ ܘܢܰܥܠܽܘܢܶܗ ܠܡܰܫܪܺܝܬܼܳܐ܂
23:11 [ai]ܘܟܼܰܕܼ ܗܘܳܐ ܠܺܠܝܳܐ܃ ܐܶܬܼܚܙܺܝ ܠܶܗ ܡܳܪܰܢ ܠܦܿܰܘܠܳܘܣ܂ ܘܶܐܡܰܪ ܠܶܗ܂ ܐܶܬܼܚܰܝܰܠ܃ ܡܶܛܽܠ ܕܰܐܝܟܼ ܕܰܐܣܗܶܕܿܬܿ ܥܠܰܝ ܒܽܐܘܪܺܫܠܶܡ܃ ܗܳܟܼܰܢܳܐ ܥܬܼܺܝܕܼ ܐܰܢ̱ܬܿ ܕܳܐܦܼ ܒܪܽܗ̱ܘܡܺܐ ܬܰܣܗܶܕܼ܀
23:12 [ai]ܘܟܼܰܕܼ ܗܘܳܐ ܨܰܦܼܪܳܐ܃ ܐܶܬܼܟܿܰܢܰܫܘ ܗ̱ܘܰܘ ܐ̱ܢܳܫܺܝܢ̈ ܡܶܢ ܺܝܗܽܘܕܼܳܝܶܐ̈܂ ܘܰܐܚܪܶܡܘ ܥܠܰܝܗܽܘܢ܃ ܕܠܳܐ ܢܶܐܟܼܠܽܘܢ ܘܠܳܐ ܢܶܫܬܿܽܘܢ ܥܕܼܰܡܳܐ ܕܢܶܩܛܠܽܘܢܶܗ ܠܦܿܰܘܠܳܘܣ܂
23:13 [ai]ܗܳܘܶܝܢ ܗ̱ܘܰܘ ܕܶܝܢ ܗܳܢܽܘܢ ܕܰܐܩܺܝܡܘ ܒܡܰܘܡܳܬܼܳܐ̈ ܗܳܢܳܐ ܩܝܳܡܳܐ܃ ܝܰܬܿܺܝܪ ܡܶܢ ܐܰܪܒܥܺܝܢ ܓܿܰܒܼܪ̈ܺܝܢ܂
23:14 [ai]ܘܶܐܬܼܩܰܪܰܒܼܘ ܠܘܳܬܼ ܟܳܗܢܶܐ̈ ܘܰܠܘܳܬܼ ܩܰܫܺܝܫܶܐ̈܂ ܘܳܐܡܪܺܝܢ ܗ̱ܘܰܘ܃ ܕܚܶܪܡܳܐ ܐܰܚܪܶܡܢ ܥܠܰܝܢ܃ ܕܿܡܶܕܶܡ ܠܳܐ ܢܶܛܥܰܡ ܥܕܼܰܡܳܐ ܕܢܶܩܛܽܘܠ ܠܦܿܰܘܠܳܘܣ܂
23:15 [ai]ܘܗܳܫܳܐ ܒܥܰܘ ܐܰܢ̱ܬܿܽܘܢ ܘܪ̈ܺܫܶܐ ܕܰܟܼܢܽܘܫܬܳܐ ܡܶܢ ܟܺܠܺܝܰܪܟܼܳܐ܃ ܕܢܰܝܬܿܶܝܘܗ̱ܝ ܠܘܳܬܼܟܼܽܘܢ ܐܰܝܟܼ ܒܿܳܥܶܝܢ ܐܢ̱ܬܿܽܘܢ ܕܬܶܒܼܨܽܘܢ ܫܰܪܺܝܪܳܐܺܝܬܼ ܣܽܘܥܪܳܢܶܗ܂ ܘܰܚܢܰܢ ܡܛܰܝܒܼܺܝܢܰܢ ܕܢܶܩܛܠܺܝܘܗ̱ܝ܂ ܥܰܕܼܠܳܐ ܢܶܡܛܶܐ ܠܘܳܬܼܟܼܽܘܢ܂
23:16 [ai]ܘܰܫܡܰܥ ܗ̱ܘܳܐ ܒܰܪ ܚܳܬܼܶܗ ܕܦܿܰܘܠܳܘܣ ܐܳܦܿܰܪܣܢܳܐ ܗܳܢܳܐ܃ ܘܥܰܠ ܠܡܰܫܪܺܝܬܼܳܐ ܘܒܼܰܕܿܶܩ ܠܦܿܰܘܠܳܘܣ܂
23:17 [ai]ܘܫܰܕܿܰܪ ܦܿܰܘܠܳܘܣ ܩܪܳܐ ܠܚܰܕܼ ܡܶܢ ܩܶܢܛܪ̈ܽܘܢܶܐ ܘܶܐܡܰܪ ܠܶܗ܂ ܐܰܘܒܿܶܠ ܠܰܥܠܰܝܡܳܐ ܗܳܢܳܐ ܠܘܳܬܼ ܟܺܠܺܝܰܪܟܼܳܐ܃ ܐܺܝܬܼ ܠܶܗ ܓܶܝܪ ܡܶܕܶܡ ܕܢܺܐܡܰܪ ܠܶܗ܂
23:18 [ai]ܘܕܼܰܒܼܪܶܗ ܩܶܢܛܪܽܘܢܳܐ ܠܰܥܠܰܝܡܳܐ܂ ܘܰܐܥܠܶܗ ܠܘܳܬܼ ܟܺܠܺܝܰܪܟܼܳܐ ܘܶܐܡܰܪ܂ ܦܿܰܘܠܳܘܣ ܐܰܣܺܝܪܳܐ ܩܪܳܢܝ܂ ܘܒܼܳܥܶܐ ܡܶܢܝ܃ ܕܰܐܝܬܿܶܐ ܗܳܢܳܐ ܥܠܰܝܡܳܐ ܠܘܳܬܼܳܟܼ܃ ܕܺܐܝܬܼ ܠܶܗ ܡܶܕܶܡ ܕܢܺܐܡܰܪ ܠܳܟܼ܂
23:19 [ai]ܘܰܐܚܕܿܶܗ ܒܺܐܝܕܼܶܗ ܟܺܠܺܝܰܪܟܼܳܐ ܠܰܥܠܰܝܡܳܐ܂ ܘܢܰܓܼܕܿܶܗ ܠܚܰܕܼ ܓܰܒܿܳܐ܂ ܘܰܡܫܰܐܶܠ ܗ̱ܘܳܐ ܠܶܗ܃ ܕܡܳܢܳܐ ܐܺܝܬܼ ܠܳܟܼ ܕܬܺܐܡܰܪ ܠܺܝ܂
23:20 [ai]ܘܶܐܡܰܪ ܠܶܗ ܥܠܰܝܡܳܐ܂ ܺܝܗܽܘܕܼܳܝܶܐ̈ ܐܶܬܼܚܰܫܰܒܼܘ ܕܢܶܒܼܥܽܘܢ ܡܶܢܳܟܼ܃ ܕܬܰܚܶܬܼ ܠܦܿܰܘܠܳܘܣ ܡܚܳܪ ܠܟܼܶܢܫܗܽܘܢ܃ ܐܰܝܟܼ ܨܳܒܼܶܝܢ ܡܶܕܶܡ ܝܰܬܿܺܝܪ ܕܢܺܐܠܦܿܽܘܢ ܡܶܢܶܗ܂
23:21 [ai]ܐܰܢ̱ܬܿ ܗܳܟܼܺܝܠ ܠܳܐ ܬܶܬܿܛܦܿܺܝܣ ܠܗܽܘܢ܂ ܗܳܐ ܓܶܝܪ ܝܰܬܿܺܝܪ ܡܶܢ ܐܰܪܒܥܺܝܢ ܓܿܰܒܼܪ̈ܺܝܢ ܡܶܢܗܽܘܢ ܢܳܛܪܺܝܢ ܠܶܗ ܒܰܟܼܡܺܐܢܳܐ܂ ܘܰܐܚܪܶܡܘ ܥܰܠ ܢܰܦܼܫܗܽܘܢ܃ ܕܠܳܐ ܢܶܐܟܼܠܽܘܢ ܘܠܳܐ ܢܶܫܬܿܽܘܢ ܥܕܼܰܡܳܐ ܕܢܶܩܛܠܽܘܢܶܗ܂ ܘܗܳܐ ܡܛܰܝܒܼܺܝܢ܂ ܘܰܡܩܰܘܶܝܢ ܠܫܽܘܘܕܿܳܝܳܟܼ܂
23:22 [ai]ܘܰܫܪܳܝܗ̱ܝ ܟܺܠܺܝܰܪܟܼܳܐ ܠܰܥܠܰܝܡܳܐ ܟܰܕܼ ܦܰܩܕܼܶܗ܃ ܕܐ̱ܢܳܫ ܠܳܐ ܢܶܕܿܰܥ ܕܗܳܠܶܝܢ ܒܰܕܿܶܩܬܿ ܠܺܝ܂
23:23 [ai]ܘܰܩܪܳܐ ܠܰܬܼܪ̈ܶܝܢ ܩܶܢܛܪ̈ܽܘܢܺܝܢ ܘܶܐܡܰܪ ܠܗܽܘܢ܂ ܙܶܠܘ ܥܰܬܿܶܕܼܘ ܪ̈ܽܗ̱ܘܡܳܝܶܐ ܡܰܐܬܼܶܝܢ ܕܢܺܐܙܽܠ̱ܘܢ ܠܩܶܣܰܪܺܝܰܐ܂ ܘܦܼܰܪ̈ܳܫܶܐ ܫܰܒܼܥܺܝܢ܂ ܘܫܳܕܼܝܰܝ̈ ܒܝܰܡܺܝܢܳܐ ܡܰܐܬܼܶܝܢ܃ ܕܢܶܦܿܩܽܘܢ ܡܶܢ ܬܠܳܬܼ ܫܳܥܺܝܢ̈ ܒܠܺܠܝܳܐ܂
23:24 [ai]ܛܰܝܶܒܼܘ ܕܶܝܢ ܐܳܦܼ ܒܥܺܝܪܳܐ܃ ܐܰܝܟܼ ܕܢܰܪܟܿܒܼܽܘܢ ܠܦܿܰܘܠܳܘܣ ܘܰܢܦܼܰܠܛܽܘܢܶܗ ܠܘܳܬܼ ܦܿܺܝܠܺܟܿܣ ܗܺܓܼܡܳܘܢܳܐ܂
23:25 [ai]ܘܰܟܼܬܼܰܒܼ ܐܶܓܿܰܪܬܳܐ ܝܰܗ̱ܒܼ ܠܗܽܘܢ܂ ܕܺܐܝܬܼ ܒܿܳܗ ܗܳܟܼܰܢܳܐ܂
23:26 [ai]ܩܠܰܘܕܼܺܝܳܘܣ ܠܽܘܣܺܝܳܘܣ܃ ܠܦܼܺܝܠܺܟܿܣ ܗܺܓܼܡܽܘܢܳܐ ܢܰܨܺܝܚܳܐ܂ ܫܠܳܡ܂
23:27 [ai]ܠܓܼܰܒܼܪܳܐ ܗܳܢܳܐ܂ ܐܶܚܰܕܼܘ ܺܝܗܽܘܕܼܳܝܶܐ̈܃ ܐܰܝܟܼ ܕܢܶܩܛܠܽܘܢܶܗ܂ ܘܩܳܡܶܬܼ ܐܶܢܳܐ ܥܰܡ ܪ̈ܽܗ̱ܘܡܳܝܶܐ ܘܦܼܰܪܶܩܬܿܶܗ܃ ܟܰܕܼ ܝܶܠܦܿܶܬܼ ܕܪܽܗ̱ܘܡܳܝܳܐ ܗ̱ܘ܂
23:28 [ai]ܘܟܼܰܕܼ ܒܿܳܥܶܐ ܗ̱ܘܺܝܬܼ ܠܡܶܕܿܰܥ ܥܶܠܬܼܳܐ ܕܡܶܛܽܠܳܬܼܳܗ ܪܳܫܶܝܢ ܗ̱ܘܰܘ ܠܶܗ܃ ܐܰܚܶܬܿܬܿܶܗ ܠܟܼܶܢܫܗܽܘܢ܂
23:29 [ai]ܘܶܐܫܟܿܚܶܬܼ ܕܥܰܠ ܙܺܛܺܡܶܐ̈ ܕܢܳܡܽܘܣܗܽܘܢ ܪܳܫܶܝܢ ܗ̱ܘܰܘ ܠܶܗ܂ ܘܥܶܠܬܼܳܐ ܕܫܳܘܝܳܐ ܠܰܐܣܽܘܪ̈ܶܐ ܐܰܘ ܠܡܰܘܬܳܐ܂ ܠܰܝܬܿ ܗ̱ܘܳܐ ܠܘܳܬܼܶܗ܂
23:30 [ai]ܘܟܼܰܕܼ ܐܶܬܼܒܿܰܕܿܰܩ ܠܺܝ ܢܶܟܼܠܳܐ ܒܰܟܼܡܺܐܢܳܐ ܕܰܥܒܼܰܕܼܘ ܥܠܰܘܗ̱ܝ ܺܝܗܽܘܕܼܳܝܶܐ̈܃ ܡܶܚܕܼܳܐ ܫܰܕܿܰܪܬܿܶܗ ܠܘܳܬܼܳܟܼ܂ ܘܦܼܰܩܕܼܶܬܼ ܠܰܩܛܺܓܼܪ̈ܳܢܰܘܗ̱ܝ܃ ܕܢܺܐܬܼܽܘܢ ܘܢܺܐܡܪܽܘܢ ܥܰܡܶܗ ܩܕܼܳܡܰܝܟܿ܂ ܗܘܺܝ ܚܠܺܝܡ܀
23:31 [ai]ܗܳܝܕܶܝܢ ܪ̈ܽܗ̱ܘܡܳܝܶܐ ܐܰܝܟܼ ܕܶܐܬܼܦܿܰܩܰܕܼܘ܃ ܕܰܒܼܪܽܘܗ̱ܝ ܠܦܿܰܘܠܳܘܣ ܒܠܺܠܝܳܐ܂ ܘܰܐܝܬܿܝܽܘܗ̱ܝ ܠܰܐܢܛܺܝܦܿܰܛܪܳܣ ܡܕܼܺܝܢ̱ܬܳܐ܂
23:32 [ai]ܘܰܠܝܰܘܡܳܐ ܐ̱ܚܪܺܢܳܐ܃ ܫܪܰܘ ܦܿܰܪ̈ܳܫܶܐ ܠܪ̈ܰܓܳܠܶܐ ܚܰܒܼܪ̈ܰܝܗܽܘܢ܃ ܕܢܶܗܦܿܟܼܽܘܢ ܠܡܰܫܪܺܝܬܼܳܐ܂
23:33 [ai]ܘܰܐܝܬܿܝܽܘܗ̱ܝ ܠܩܶܣܰܪܺܝܰܐ܂ ܘܝܰܗ̱ܒܼܘ ܐܶܓܿܰܪܬܳܐ ܠܗܺܓܼܡܳܘܢܳܐ܂ ܘܰܐܩܺܝܡܽܘܗ̱ܝ ܩܕܼܳܡܰܘܗ̱ܝ ܠܦܿܰܘܠܳܘܣ܂
23:34 [ai]ܘܟܼܰܕܼ ܩܪܳܐ ܐܶܓܿܰܪܬܳܐ܃ ܡܫܰܐܶܠ ܗ̱ܘܳܐ ܠܶܗ܃ ܕܡܶܢ ܐܰܝܕܼܳܐ ܗܽܘܦܿܰܪܟܼܺܝܰܐ ܐܺܝܬܼܰܘܗ̱ܝ܂ ܘܟܼܰܕܼ ܺܝܠܶܦܼ ܕܡܶܢ ܩܺܝܠܺܝܩܺܝܰܐ܃
23:35 [ai]ܐܶܡܰܪ ܠܶܗ܂ ܫܳܡܰܥ ܐ̱ܢܳܐ ܠܳܟܼ܃ ܡܳܐ ܕܶܐܬܼܰܘ ܩܛܺܓܼܪ̈ܳܢܰܝܟܿ܂ ܘܰܦܼܩܰܕܼ ܕܢܶܛܪܽܘܢܶܗ ܒܰܦܪܶܛܳܘܪܺܝܳܢ ܕܗܶܪܳܘܕܼܶܣ ܿ܀ܿ܀ܿ

next chapter