The Comprehensive Aramaic Lexicon

24:01 [ai]	ܘܡܶܢ ܒܳܬܼܰܪ ܝܰܘܡܳܬܼܳܐ̈ ܚܰܡܫܳܐ܃ ܢܚܶܬܼ ܚܰܢܰܢܝܳܐ ܪܰܒܿ ܟܳܗܢܶܐ̈ ܥܰܡ ܩܰܫܺܝܫܶܐ̈܃ ܘܥܰܡ ܛܶܪܛܽܠܳܘܣ ܪܗܺܛܪܳܐ܃ ܘܰܐܘܕܰܥܘ ܠܗܺܓܼܡܳܘܢܳܐ ܥܰܠ ܦܿܰܘܠܳܘܣ܂
24:02 [ai]	ܘܟܼܰܕܼ ܐܶܬܼܩܪܺܝ܃ ܐܰܩܶܦܼ ܗ̱ܘܳܐ ܛܶܪܛܽܠܳܘܣ ܡܩܰܛܪܶܓܼ ܠܶܗ ܘܳܐܡܰܪ܂ ܒܣܽܘܓܼܳܐܐ ܕܫܰܝܢܳܐ ܥܳܡܪܺܝܢܰܢ ܡܶܛܽܠܳܬܼܳܟܼ܂ ܘܬܼܰܩܢܳܬܼܳܐ̈ ܣܰܓܿܺܝܳܐܬܼܳܐ̈ ܗ̱ܘܰܝ̈ ܠܥܰܡܳܐ ܗܳܢܳܐ ܒܰܫܩܳܠܛܰܥܢܳܟܼ܂
24:03 [ai]	ܘܟܼܽܠܰܢ ܒܟܽܠ ܕܽܘܟܿ ܡܩܰܒܿܠܺܝܢܰܢ ܛܰܝܒܿܽܘܬܼܳܟܼ܂ ܢܰܨܺܝܚܳܐ ܦܿܺܝܠܺܟܿܣ܂
24:04 [ai]	ܕܠܳܐ ܕܶܝܢ ܢܰܠܶܐܝܟܼ ܒܣܰܓܿܺܝܳܐܬܼܳܐ̈܃ ܒܿܳܥܶܐ ܐ̱ܢܳܐ ܡܶܢܳܟܼ ܕܬܶܫܡܰܥ ܠܡܰܟܿܺܝܟܼܽܘܬܼܰܢ ܒܦܳܣܺܝܩܳܬܼܳܐ̈܂
24:05 [ai]	ܐܶܫܟܿܰܚܢ ܓܶܝܪ ܠܓܼܰܒܼܪܳܐ ܗܳܢܳܐ ܕܺܐܝܬܼܰܘܗ̱ܝ ܡܫܰܚܛܳܢܳܐ܃ ܘܰܡܥܺܝܪ ܫܓܼܽܘܫܝܳܐ ܠܟܼܽܠܗܽܘܢ ܺܝܗܽܘܕܼܳܝܶܐ̈ ܕܰܒܼܟܼܽܠܳܗ ܐܰܪܥܳܐ܂ ܪܺܫܳܐ ܗ̱ܘ ܓܶܝܪ ܕܝܽܘܠܦܿܳܢܳܐ ܕܿܢܳܨܪ̈ܳܝܶܐ܂
24:06 [ai]	ܘܰܠܗܰܝܟܠܰܢ ܨܒܼܳܐ ܠܰܡܣܰܝܳܒܼܽܘ܂ ܘܟܼܰܕܼ ܐܶܚܰܕܼܢܳܝܗ̱ܝ܃ ܒܥܰܝܢ ܕܰܢܕܼܽܘܢܺܝܘܗ̱ܝ ܐܰܝܟܼ
24:07 [ai]	ܐܶܬܼܳܐ ܕܶܝܢ ܠܽܘܣܺܝܳܘܣ ܟܺܠܺܝܰܪܟܼܳܐ܂ ܘܒܼܰܩܛܺܝܪܳܐ ܣܰܓܿܺܝܳܐܐ ܡܶܢ ܐܺܝܕܼܰܝܢ̈ ܐܰܥܕܿܝܶܗ܂ ܘܠܳܟܼ ܫܰܕܿܪܶܗ܂
24:08 [ai]	ܘܰܦܼܩܰܕܼ ܠܰܩܛܺܪ̈ܓܼܳܢܰܘܗ̱ܝ ܕܢܺܐܬܼܽܘܢ ܠܘܳܬܼܳܟܼ܂ ܘܡܶܫܟܿܰܚ ܐܰܢ̱ܬܿ ܟܰܕܼ ܡܫܰܐܶܠ ܐܰܢ̱ܬܿ ܠܶܗ܃ ܕܬܺܐܠܰܦܼ ܡܶܢܶܗ܃ ܥܰܠ ܟܽܠܗܶܝܢ ܗܳܠܶܝܢ ܕܰܡܩܰܛܪܓܼܺܝܢܰܢ ܠܶܗ܂
24:09 [ai]	ܐܰܪܺܝܒܼܘ ܕܶܝܢ ܥܠܰܘܗ̱ܝ ܐܳܦܼ ܗܶܢܽܘܢ ܺܝܗܽܘܕܼܳܝܶܐ̈ ܟܰܕܼ ܐܳܡܪܺܝܢ܃ ܕܗܳܠܶܝܢ ܗܳܟܼܰܢܳܐ ܐܶܢܶܝܢ̈܀
24:10 [ai]	ܘܰܪܡܰܙ ܗܺܓܼܡܽܘܢܳܐ ܠܦܿܰܘܠܳܘܣ ܕܰܢܡܰܠܶܠ܂ ܘܰܥܢܳܐ ܦܿܰܘܠܳܘܣ ܘܶܐܡܰܪ܂ ܡܶܢ ܫܢܰܝܳܐ̈ ܣܰܓܿܺܝܳܐܬܼܳܐ̈ ܝܳܕܼܰܥ ܐ̱ܢܳܐ܃ ܕܺܐܝܬܼܰܝܟܿ ܕܰܝܳܢܳܐ ܕܥܰܡܳܐ ܗܳܢܳܐ܂ ܘܡܶܛܽܠ ܗܳܢܳܐ ܚܳܕܼܝܳܐܺܝܬܼ ܢܳܦܼܶܩ ܐ̱ܢܳܐ ܪܽܘܚܳܐ ܥܰܠ ܐܰܦܿܰܝ̈ ܢܰܦܼܫܝ܃
24:11 [ai]	ܟܰܕܼ ܡܶܫܟܿܰܚ ܐܰܢ̱ܬܿ ܠܡܶܕܿܰܥ ܕܠܰܝܬܿ ܠܺܝ ܝܰܬܿܺܝܪ ܡܶܢ ܬܪܶܥܣܰܪ ܝܰܘܡܺܝܢ̈ ܕܣܶܠܩܶܬܼ ܠܽܐܘܪܺܫܠܶܡ ܠܡܶܣܓܿܰܕܼ܂
24:12 [ai]	ܘܠܳܐ ܐܶܫܟܿܚܽܘܢܝ ܕܰܡܡܰܠܶܠ ܐ̱ܢܳܐ ܥܰܡ ܐ̱ܢܳܫ ܒܗܰܝܟܠܳܐ܂ ܘܳܐܦܼܠܳܐ ܟܶܢܫܳܐ ܕܟܳܢܶܫ ܐ̱ܢܳܐ܃ ܠܳܐ ܒܰܟܼܢܽܘܫܬܿܗܽܘܢ܂ ܘܠܳܐ ܒܰܡܕܼܺܝܢ̱ܬܳܐ܂
24:13 [ai]	ܘܠܳܐ ܕܰܢܚܰܘܽܘܢ ܡܳܛܝܳܐ ܒܺܐܝܕܼܰܝܗܽܘܢ̈ ܩܕܼܳܡܰܝܟܿ܃ ܥܰܠ ܡܶܕܶܡ ܕܗܳܫܳܐ ܡܩܰܛܪܓܼܺܝܢ ܠܺܝ܂
24:14 [ai]	ܒܪܰܡ ܕܶܝܢ ܗܳܕܼܶܐ ܡܰܘܕܿܶܐ ܐ̱ܢܳܐ܃ ܕܒܶܗ ܒܗܳܢܳܐ ܝܽܘܠܦܿܳܢܳܐ ܕܳܐܡܪܺܝܢ܂ ܒܶܗ ܦܳܠܰܚ ܐ̱ܢܳܐ ܠܰܐܠܳܗܳܐ ܕܰܐܒܼܳܗܰܝ̈܃ ܟܰܕܼ ܡܗܰܝܡܶܢ ܐ̱ܢܳܐ ܠܟܼܽܠܗܶܝܢ ܕܰܟܼܬܼܺܝܒܼܳܢ̈ ܒܢܳܡܽܘܣܳܐ ܘܒܼܰܢܒܼܺܝܶܐ̈܃
24:15 [ai]	ܘܟܼܰܕܼ ܐܺܝܬܼ ܠܺܝ ܣܰܒܼܪܳܐ ܥܰܠ ܐܰܠܳܗܳܐ܃ ܐܰܝܢܳܐ ܕܳܐܦܼ ܗܶܢܽܘܢ ܗܳܠܶܝܢ ܡܣܰܒܿܪܺܝܢ܃ ܕܰܥܬܼܺܝܕܼܳܐ ܕܬܶܗܘܶܐ ܩܝܳܡܬܳܐ ܕܡܶܢ ܒܶܝܬܼ ܡܺܝܬܼܶܐ̈܂ ܕܟܺܐܢܶܐ̈܂ ܘܰܕܼܥܰܘܳܠܶܐ̈܂
24:16 [ai]	ܡܶܛܽܠ ܗܳܢܳܐ ܐܳܦܼ ܥܳܡܶܠ ܐ̱ܢܳܐ܃ ܕܬܺܐܪܬܳܐ ܕܟܺܝܬܼܳܐ ܬܶܗܘܶܐ ܠܺܝ ܩܕܼܳܡ ܐܰܠܳܗܳܐ܃ ܘܰܩܕܼܳܡ ܒܢܰܝ ܐ̱ܢܳܫܳܐ ܐܰܡܺܝܢܳܐܺܝܬܼ܂
24:17 [ai]	ܠܰܫܢܺܝܢ̈ ܕܶܝܢ ܣܰܓܿܺܝܳܐܢ̈ ܐܶܬܼܺܝܬܼ ܠܘܳܬܼ ܒܢܰܝ ܥܰܡܳܐ ܕܺܝܠܝ܃ ܕܶܐܬܿܶܠ ܙܶܕܼܩܬܼܳܐ ܘܶܐܩܰܪܶܒܼ ܩܽܘܪܒܿܳܢܳܐ܂
24:18 [ai]	ܘܶܐܫܟܿܚܽܘܢܝ ܗܳܠܶܝܢ ܒܗܰܝܟܠܳܐ܂ ܟܰܕܼ ܡܕܼܰܟܰܝ ܐ̱ܢܳܐ܃ ܠܳܐ ܥܰܡ ܟܶܢܫܳܐ ܐܳܦܼܠܳܐ ܒܰܫܓܼܽܘܫܝܳܐ܂
24:19 [ai]	ܐܶܠܳܐ ܐܶܢ ܕܰܫܓܼܰܫܘ ܐ̱ܢܳܫܺܝܢ̈ ܺܝܗܽܘܕܼܳܝܶܐ̈ ܕܶܐܬܼܰܘ ܡܶܢ ܐܰܣܺܝܰܐ܃ ܐܰܝܠܶܝܢ ܕܘܳܠܶܐ ܗ̱ܘܳܐ ܕܰܢܩܽܘܡܽܘܢ ܥܰܡܝ ܩܕܼܳܡܰܝܟܿ܃ ܘܰܢܩܰܛܪܓܼܽܘܢ ܡܶܕܶܡ ܕܺܐܝܬܼ ܠܗܽܘܢ܂
24:20 [ai]	ܐܰܘ ܗܶܢܽܘܢ ܗܳܠܶܝܢ ܢܺܐܡܪܽܘܢ܃ ܡܳܢܳܐ ܐܶܫܟܿܰܚܘ ܒܺܝ ܣܰܟܼܠܽܘܬܼܳܐ܃ ܟܰܕܼ ܩܳܡܶܬܼ ܩܕܼܳܡ ܟܶܢܫܗܽܘܢ܂
24:21 [ai]	ܐܶܠܳܐ ܐܶܢ ܗܳܕܼܶܐ ܚܕܼܳܐ ܡܶܠܬܼܳܐ ܕܰܩܥܺܝܬܼ ܟܰܕܼ ܩܳܐܶܡ ܐ̱ܢܳܐ ܒܰܝܢܳܬܼܗܽܘܢ܃ ܕܥܰܠ ܩܝܳܡܬܳܐ ܕܡܺܝܬܼܶܐ̈ ܡܶܬܿܕܼܺܝܢ ܐ̱ܢܳܐ ܝܰܘܡܳܢܳܐ ܩܕܼܳܡܰܝܟܿܽܘܢ܂
24:22 [ai]	ܦܿܺܝܠܺܟܿܣ ܕܶܝܢ ܡܶܛܽܠ ܕܝܳܕܼܰܥ ܗ̱ܘܳܐ ܠܳܗ ܠܽܐܘܪܚܳܐ ܗܳܕܼܶܐ ܡܰܠܝܳܐܺܝܬܼ܃ ܬܰܗܺܝ ܐܶܢܽܘܢ ܟܰܕܼ ܐܳܡܰܪ܂ ܕܡܳܐ ܕܶܐܬܼܳܐ ܟܺܠܺܝܰܪܟܼܳܐ܃ ܫܳܡܰܥ ܐ̱ܢܳܐ ܒܰܝܢܳܬܼܟܼܽܘܢ܂
24:23 [ai]	ܘܰܦܼܩܰܕܼ ܠܩܶܢܛܪܽܘܢܳܐ܃ ܕܢܶܛܪܺܝܘܗ̱ܝ ܠܦܿܰܘܠܳܘܣ ܒܰܢܝܳܚܳܐ܃ ܘܰܕܼܠܳܐ ܐ̱ܢܳܫ ܡܶܢ ܝܳܕܼܽܘܥܰܘܗ̱ܝ̈ ܢܶܬܼܟܠܶܐ ܕܢܶܗܘܶܐ ܡܫܰܡܶܫ ܠܶܗ܀
24:24 [ai]	ܘܡܶܢ ܒܳܬܼܰܪ ܩܰܠܺܝܠ ܝܰܘܡܳܬܼܳܐ̈܃ ܫܰܕܿܰܪ ܦܿܺܝܠܺܟܿܣ ܘܕܼܽܘܪܣܺܠܰܐ ܐܰܢ̱ܬܿܬܼܶܗ ܕܺܐܝܬܼܶܝܗ ܗ̱ܘܳܬܼ ܺܝܗܽܘܕܼܳܝܬܳܐ܂ ܘܰܩܪܰܘ ܠܶܗ ܠܦܿܰܘܠܳܘܣ܂ ܘܰܫܡܰܥܘ ܡܶܢܶܗ ܥܰܠ ܗܰܝܡܳܢܽܘܬܼܳܐ ܕܰܡܫܺܝܚܳܐ܂
24:25 [ai]	ܘܟܼܰܕܼ ܡܡܰܠܶܠ ܥܰܡܗܽܘܢ ܥܰܠ ܙܰܕܿܺܝܩܽܘܬܼܳܐ ܘܥܰܠ ܩܰܕܿܺܝܫܽܘܬܼܳܐ ܘܥܰܠ ܕܺܝܢܳܐ ܕܰܥܬܼܺܝܕܼ܃ ܐܶܬܼܡܠܺܝ ܕܶܚܠܬܼܳܐ ܦܿܺܝܠܺܟܿܣ܂ ܘܶܐܡܰܪ܃ ܕܗܳܫܳܐ ܙܶܠ܂ ܘܶܐܡܰܬܼܝ ܕܢܶܗܘܶܐ ܠܺܝ ܐܰܬܼܪܳܐ܃ ܐܶܫܰܕܿܰܪ ܒܳܬܼܪܳܟܼ܂
24:26 [ai]	ܣܳܒܼܰܪ ܗ̱ܘܳܐ ܓܶܝܪ܃ ܕܫܽܘܚܕܿܳܐ ܡܶܬܼܺܝܗܶܒܼ ܗ̱ܘܳܐ ܠܶܗ ܡܶܢ ܦܿܰܘܠܳܘܣ܂ ܡܶܛܽܠ ܗܳܕܼܶܐ ܐܳܦܼ ܐܰܡܺܝܢܳܐܺܝܬܼ ܡܫܰܕܿܰܪ ܗ̱ܘܳܐ ܡܰܝܬܿܶܐ ܠܶܗ ܘܰܡܡܰܠܶܠ ܥܰܡܶܗ܂
24:27 [ai]	ܘܟܼܰܕܼ ܡܰܠܺܝ ܠܶܗ ܬܿܰܪ̈ܬܿܶܝܢ ܫܢܺܝܢ̈܃ ܐ̱ܚܪܺܢܳܐ ܗܺܓܼܡܽܘܢܳܐ ܐܶܬܼܳܐ ܗ̱ܘܳܐ ܠܕܼܽܘܟܿܬܼܶܗ܃ ܕܡܶܬܼܩܪܶܐ ܗ̱ܘܳܐ ܦܿܳܪܩܺܝܳܘܣ ܦܼܺܗ̱ܣܛܳܘܣ܂ ܦܿܺܝܠܺܟܿܣ ܕܶܝܢ ܐܰܝܟܼ ܕܢܶܥܒܿܶܕܼ ܛܰܝܒܿܽܘܬܼܳܐ ܒܺܝܗܽܘܕܼܳܝܶܐ̈܃ ܫܰܒܼܩܶܗ ܠܦܿܰܘܠܳܘܣ ܟܰܕܼ ܐܰܣܺܝܪ܂

next chapter