The Comprehensive Aramaic Lexicon

25:01 [ai]	ܘܟܼܰܕܼ ܐܶܬܼܳܐ ܦܿܺܗ̱ܣܛܳܘܣ ܠܩܶܣܰܪܺܝܰܐ܃ ܒܳܬܼܰܪ ܬܠܳܬܼܳܐ ܝܰܘܡܺܝܢ̈ ܣܠܶܩ ܠܽܐܘܪܺܫܠܶܡ܂
25:02 [ai]	ܘܰܐܘܕܿܥܽܘܗ̱ܝ ܪ̈ܰܒܰܝ ܟܳܗܢܶܐ̈ ܘܪ̈ܺܫܶܐ ܕܺܝܗܽܘܕܼܳܝܶܐ̈ ܥܰܠ ܦܿܰܘܠܳܘܣ܂ ܘܒܼܳܥܶܝܢ ܗ̱ܘܰܘ ܡܶܢܶܗ܂
25:03 [ai]	ܟܰܕܼ ܫܳܐܠܺܝܢ ܠܶܗ ܗܳܕܼܶܐ ܛܰܝܒܿܽܘܬܼܳܐ܃ ܕܰܢܫܰܕܿܰܪ ܢܰܝܬܿܶܝܘܗ̱ܝ ܠܽܐܘܪܺܫܠܶܡ܃ ܟܰܕܼ ܥܳܒܼܕܺܝܢ ܗ̱ܘܰܘ ܟܡܺܐܢܶܐ̈ ܒܽܐܘܪܚܳܐ ܕܢܶܩܛܠܽܘܢܳܝܗ̱ܝ܂
25:04 [ai]	ܘܦܿܺܗ̱ܣܛܳܘܣ ܦܰܢܺܝ ܦܶܬܼܓܼܳܡܳܐ܃ ܕܦܿܰܘܠܳܘܣ ܡܶܬܼܢܛܰܪ ܒܩܶܣܰܪܺܝܰܐ܂ ܘܶܐܢܳܐ ܡܣܰܪܗܰܒܼ ܐ̱ܢܳܐ ܕܶܐܚܙܽܘܩ܂
25:05 [ai]	ܐܰܝܠܶܝܢ ܗܳܟܼܺܝܠ ܕܺܐܝܬܼ ܒܟܽܘܢ ܕܡܳܛܝܳܐ ܒܺܐܝܕܼܰܝܗܽܘܢ̈܃ ܢܶܚܬܼܽܘܢ ܥܰܡܰܢ܂ ܘܥܰܠ ܟܽܠ ܣܰܟܼܠܽܘ ܕܺܐܝܬܼ ܒܶܗ ܒܓܰܒܼܪܳܐ܃ ܢܩܰܛܪܓܼܽܘܢ܂
25:06 [ai]	ܘܟܼܰܕܼ ܗܘܳܐ ܬܰܡܳܢ ܝܰܘܡܳܬܼܳܐ̈ ܬܡܳܢܝܳܐ ܐܰܘ ܥܶܣܪܳܐ܃ ܢܚܶܬܼ ܠܶܗ ܠܩܶܣܰܪܺܝܰܐ܀ ܘܰܠܝܰܘܡܳܐ ܐ̱ܚܪܺܢܳܐ܃ ܺܝܬܼܶܒܼ ܥܰܠ ܒܺܝܡ܂ ܘܰܦܼܩܰܕܼ ܕܢܰܝܬܿܽܘܢ ܠܦܿܰܘܠܳܘܣ܂
25:07 [ai]	ܘܟܼܰܕܼ ܐܶܬܼܳܐ܃ ܚܰܕܼܪܽܘܗ̱ܝ ܺܝܗܽܘܕܼܳܝܶܐ̈ ܕܰܢܚܶܬܼܘ ܡܶܢ ܐܽܘܪܺܫܠܶܡ܂ ܘܪ̈ܺܫܶܐ ܣܰܓܿܺܝܶܐܐ̈ ܘܰܩܫܰܝܳܐ̈ ܡܰܝܬܿܶܝܢ ܗ̱ܘܰܘ ܒܳܬܼܪܶܗ܃ ܐܰܝܠܶܝܢ ܕܠܳܐ ܡܶܫܟܿܚܺܝܢ ܗ̱ܘܰܘ ܕܰܢܚܰܘܽܘܢ܂
25:08 [ai]	ܘܟܼܰܕܼ ܦܿܰܘܠܳܘܣ ܢܳܦܼܶܩ ܗ̱ܘܳܐ ܪܽܘܚܳܐ ܕܠܳܐ ܐܰܣܟܿܶܠ ܡܶܕܶܡ܃ ܠܳܐ ܒܢܳܡܽܘܣܳܐ ܕܺܝܗܽܘܕܼܳܝܶܐ̈ ܘܠܳܐ ܒܗܰܝܟܠܳܐ ܘܠܳܐ ܒܩܶܣܰܪ܃
25:09 [ai]	ܦܿܺܗ̱ܣܛܳܘܣ ܕܶܝܢ ܡܶܛܽܠ ܕܨܳܒܼܶܐ ܗ̱ܘܳܐ ܕܢܰܪܫܶܐ ܛܰܝܒܿܽܘܬܼܳܐ ܒܺܝܗܽܘܕܼܳܝܶܐ̈܃ ܐܶܡܰܪ ܠܶܗ ܠܦܿܰܘܠܳܘܣ܂ ܨܳܒܼܶܐ ܐܰܢ̱ܬܿ ܕܬܶܣܰܩ ܠܽܐܘܪܺܫܠܶܡ܃ ܘܬܼܰܡܳܢ ܥܰܠ ܗܳܠܶܝܢ ܬܶܬܿܕܼܺܝܢ ܩܕܼܳܡܰܝ܂
25:10 [ai]	ܥܢܳܐ ܦܿܰܘܠܳܘܣ ܘܶܐܡܰܪ܂ ܥܰܠ ܒܺܝܡ ܕܩܶܣܰܪ ܩܳܐܶܡ ܐ̱ܢܳܐ܂ ܗܳܪܟܿܳܐ ܗܽܘ ܙܳܕܼܶܩ ܠܺܝ ܠܡܶܬܿܕܼܳܢܽܘ܂ ܠܳܐ ܡܶܕܶܡ ܚܛܺܝܬܼ ܠܺܝܗܽܘܕܼܳܝܶܐ̈܃ ܐܰܝܟܼ ܕܳܐܦܼ ܐܰܢ̱ܬܿ ܝܳܕܼܰܥ ܐܰܢ̱ܬܿ܂
25:11 [ai]	ܘܶܐܢ ܣܰܟܼܠܽܘܬܼܳܐ ܥܒܼܺܝܕܼܳܐ ܠܺܝ ܐܰܘ ܡܶܕܶܡ ܕܫܳܘܶܐ ܠܡܰܘܬܳܐ܃ ܠܳܐ ܡܶܫܬܿܶܐܠ ܐ̱ܢܳܐ ܡܶܢ ܡܰܘܬܳܐ܂ ܐܶܢ ܕܶܝܢ ܠܰܝܬܿ ܡܶܕܶܡ ܨܶܐܕܼܰܝ ܡܶܢ ܗܳܠܶܝܢ ܕܰܡܩܰܛܪܓܼܺܝܢ ܠܺܝ܃ ܠܳܐ ܐ̱ܢܳܫ ܝܳܗܶܒܼ ܠܺܝ ܠܗܽܘܢ ܡܰܘܗܒܼܰܬܼ܂ ܒܓܶܢܰܘܗ̱ܝ̈ ܕܩܶܣܰܪ ܩܳܪܶܐ ܐ̱ܢܳܐ܂
25:12 [ai]	ܗܳܝܕܶܝܢ ܦܿܺܗ̱ܣܛܳܘܣ ܡܰܠܶܠ ܥܰܡ ܒܢܰܝ ܡܶܠܟܿܶܗ ܘܶܐܡܰܪ܂ ܒܓܶܢ ܩܶܣܰܪ ܩܪܰܝܬܿ܃ ܠܘܳܬܼ ܩܶܣܰܪ ܐܳܙܶܠ ܐܰܢ̱ܬܿ ܿ܀ܿ܀ܿ
25:13 [ai]	ܘܟܼܰܕܼ ܗܘܰܘ ܝܰܘܡܳܬܼܳܐ̈܃ ܢܚܶܬܼ ܐܰܓܼܪܺܦܿܰܘܣ ܡܰܠܟܿܳܐ ܘܒܼܶܪܢܺܝܩܺܐ ܠܩܶܣܰܪܺܝܰܐ ܕܢܶܫܶܐܠܽܘܢ ܫܠܳܡܶܗ ܕܦܼܺܗ̱ܣܛܳܘܣ܂
25:14 [ai]	ܘܟܼܰܕܼ ܗܘܰܘ ܠܘܳܬܼܶܗ ܝܰܘܡܳܬܼܳܐ̈܃ ܐܶܫܬܿܰܥܺܝ ܦܿܺܗ̱ܣܛܳܘܣ ܠܡܰܠܟܿܳܐ ܕܺܝܢܶܗ ܕܦܿܰܘܠܳܘܣ܂ ܟܰܕܼ ܐܳܡܰܪ܂ ܓܰܒܼܪܳܐ ܚܰܕܼ ܐܰܣܺܝܪܳܐ ܐܶܫܬܿܒܼܶܩ ܡܶܢ ܐܺܝܕܼܰܝ̈ ܦܿܺܝܠܺܟܿܣ܂
25:15 [ai]	ܘܟܼܰܕܼ ܗܘܺܝܬܼ ܒܽܐܘܪܺܫܠܶܡ܃ ܐܰܘܕܰܥܘ ܠܺܝ ܥܠܰܘܗ̱ܝ ܪ̈ܰܒܰܝ ܟܳܗܢܶܐ̈ ܘܩܰܫܺܝܫܶܐ̈ ܕܺܝܗܽܘܕܼܳܝܶܐ̈܂ ܘܰܒܥܰܘ ܕܶܐܥܒܿܶܕܼ ܠܗܽܘܢ ܕܺܝܢܳܐ ܡܶܢܶܗ܂
25:16 [ai]	ܘܶܐܡܪܶܬܼ ܠܗܽܘܢ܃ ܕܠܰܝܬܿ ܥܝܳܕܼܳܐ ܠܪ̈ܽܗ̱ܘܡܳܝܶܐ ܕܢܶܬܿܠܽܘܢ ܒܰܪܢܳܫܳܐ ܡܰܘܗܒܼܰܬܼ ܠܩܶܛܠܳܐ܃ ܥܕܼܰܡܳܐ ܕܢܺܐܬܼܶܐ ܒܥܶܠ ܕܺܝܢܶܗ ܘܢܰܟܣܺܝܘܗ̱ܝ ܒܰܐܦܿܰܘܗ̱ܝ̈܃ ܘܢܶܬܼܺܝܗܶܒܼ ܠܶܗ ܐܰܬܼܪܳܐ ܠܡܰܦܿܰܩ ܒܪܽܘܚܳܐ ܥܰܠ ܡܳܐ ܕܡܶܬܼܪܫܶܐ܂
25:17 [ai]	ܘܟܼܰܕܼ ܐܶܬܼܺܝܬܼ ܠܟܼܳܐ܃ ܕܠܳܐ ܬܽܘܗܳܝܳܐ ܠܝܰܘܡܳܐ ܐ̱ܚܪܺܢܳܐ܂ ܝܶܬܼܒܿܶܬܼ ܥܰܠ ܒܺܝܡ܂ ܘܦܼܶܩܕܿܶܬܼ ܕܢܰܝܬܿܽܘܢܳܝܗ̱ܝ ܠܺܝ ܠܓܼܰܒܼܪܳܐ܂
25:18 [ai]	ܘܩܳܡܘ ܥܰܡܶܗ ܩܛܺܪ̈ܓܼܳܢܰܘܗ̱ܝ܃ ܘܠܳܐ ܐܶܫܟܿܰܚܘ ܡܶܕܶܡ ܪܶܫܝܳܢܳܐ ܒܺܝܫܳܐ ܕܰܢܚܰܘܽܘܢ ܥܠܰܘܗ̱ܝ܃ ܐܰܝܟܼ ܡܳܐ ܕܣܳܒܼܰܪ ܗ̱ܘܺܝܬܼ܂
25:19 [ai]	ܙܺܛܺܡܶܐ̈ ܕܶܝܢ ܡܶܕܶܡ ܡܶܕܶܡ ܥܰܠ ܕܶܚܠܰܬܼܗܽܘܢ ܐܺܝܬܼ ܗ̱ܘܳܐ ܠܗܽܘܢ ܠܘܳܬܼܶܗ܃ ܘܥܰܠ ܝܶܫܽܘܥ ܕܡܺܝܬܼ܃ ܗܰܘ ܕܳܐܡܰܪ ܗ̱ܘܳܐ ܦܿܰܘܠܳܘܣ ܕܚܰܝ ܗ̱ܽܘ܂
25:20 [ai]	ܘܡܶܛܽܠ ܕܠܳܐ ܩܳܐܶܡ ܗ̱ܘܺܝܬܼ ܐܶܢܳܐ ܥܰܠ ܒܥܳܬܼܳܐ ܕܗܳܠܶܝܢ܃ ܐܶܡܪܶܬܼ ܗ̱ܘܺܝܬܼ ܠܦܿܰܘܠܳܘܣ܂ ܕܶܐܢ ܒܿܳܥܶܐ ܐܰܢ̱ܬܿ܃ ܕܬܺܐܙܰܠ ܠܽܐܘܪܺܫܠܶܡ܃ ܘܬܼܰܡܳܢ ܬܶܬܿܕܼܺܝܢ ܥܰܠ ܗܳܠܶܝܢ܂
25:21 [ai]	ܗܽܘ ܕܶܝܢ ܒܥܳܐ ܕܢܶܬܼܢܛܰܪ ܠܕܼܺܝܢܶܗ ܕܩܶܣܰܪ܂ ܘܦܼܶܩܕܿܶܬܼ ܕܢܶܬܼܢܛܰܪ܃ ܥܕܼܰܡܳܐ ܕܶܐܫܰܕܿܪܺܝܘܗ̱ܝ ܠܘܳܬܼ ܩܶܣܰܪ܂
25:22 [ai]	ܘܶܐܡܰܪ ܐܰܓܼܪܺܦܿܰܘܣ܂ ܨܳܒܼܶܐ ܗ̱ܘܺܝܬܼ ܕܶܐܫܡܥܺܝܘܗ̱ܝ ܠܓܼܰܒܼܪܳܐ ܗܳܢܳܐ܂ ܘܦܿܺܗ̱ܣܛܳܘܣ ܐܶܡܰܪ܃ ܕܠܰܡܚܳܪ ܫܳܡܰܥ ܐܰܢ̱ܬܿ ܠܶܗ܀
25:23 [ai]	ܘܰܠܝܰܘܡܳܐ ܐ̱ܚܪܺܢܳܐ܃ ܐܶܬܼܳܐ ܐܰܓܼܪܺܦܿܰܘܣ ܘܒܼܶܪܢܺܝܩܺܐ ܒܙܰܘܚܳܐ ܣܰܓܿܺܝܳܐܐ܂ ܘܥܰܠ ܠܒܼܶܝܬܼܕܺܝܢܳܐ܂ ܥܰܡ ܟܿܺܠܺܝܰܪ̈ܟܼܶܐ ܘܪ̈ܺܫܶܐ ܕܰܡܕܼܺܝܢ̱ܬܳܐ܂ ܘܰܦܼܩܰܕܼ ܦܿܺܗ̱ܣܛܳܘܣ ܘܶܐܬܼܳܐ ܦܿܰܘܠܳܘܣ܂
25:24 [ai]	ܘܶܐܡܰܪ ܦܿܺܗ̱ܣܛܳܘܣ܂ ܐܰܓܼܪܺܦܿܰܘܣ ܡܰܠܟܿܳܐ ܘܟܼܽܠܟܼܽܘܢ ܓܿܰܒܼܪ̈ܶܐ ܕܺܐܝܬܼܰܝܟܿܽܘܢ ܥܰܡܰܢ܃ ܥܰܠ ܗܳܢܳܐ ܓܰܒܼܪܳܐ ܕܚܳܙܶܝܢ ܐܢ̱ܬܿܽܘܢ܃ ܟܽܠܶܗ ܥܰܡܳܐ ܕܺܝܗܽܘܕܼܳܝܶܐ̈ ܩܰܒܿܠܰܢܝ ܒܽܐܘܪܺܫܠܶܡ ܘܗܳܪܟܿܳܐ܃ ܟܰܕܼ ܩܳܥܶܝܢ ܕܠܳܐ ܬܽܘܒܼ ܘܳܠܶܐ ܠܗܳܢܳܐ ܕܢܺܚܶܐ܂
25:25 [ai]	ܐܶܢܳܐ ܕܶܝܢ ܐܰܕܼܪܟܼܶܬܼ܃ ܕܿܡܶܕܶܡ ܕܫܳܘܶܐ ܠܡܰܘܬܳܐ ܠܳܐ ܣܥܺܝܪ ܠܶܗ܂ ܘܡܶܛܽܠ ܕܗܽܘ ܒܥܳܐ ܕܢܶܬܼܢܛܰܪ ܠܕܼܺܝܢܶܗ ܕܩܶܣܰܪ܃ ܦܶܩܕܿܶܬܼ ܕܢܶܫܬܿܰܕܿܰܪ܂
25:26 [ai]	ܘܠܳܐ ܝܳܕܼܰܥ ܐ̱ܢܳܐ ܡܳܢܳܐ ܐܶܟܼܬܽܘܒܼ ܥܠܰܘܗ̱ܝ ܠܩܶܣܰܪ܂ ܡܶܛܽܠ ܗܳܢܳܐ ܨܒܼܺܝܬܼ ܠܡܰܝܬܿܳܝܽܘܬܼܶܗ ܩܕܼܳܡܰܝܟܿܽܘܢ܃ ܘܝܰܬܿܺܝܪܳܐܺܝܬܼ ܩܕܼܳܡܰܝܟܿ ܡܰܠܟܿܳܐ ܐܰܓܼܪܺܦܿܶܐ܃ ܕܡܳܐ ܕܶܐܫܬܿܰܐܰܠ ܕܺܝܢܶܗ܃ ܐܶܫܟܿܰܚ ܡܳܢܳܐ ܐܶܟܼܬܽܘܒܼ܂
25:27 [ai]	ܠܳܐ ܓܶܝܪ ܘܳܠܶܐ ܕܟܰܕܼ ܡܫܰܕܿܪܺܝܢܰܢ ܓܰܒܼܪܳܐ ܐܰܣܺܝܪܳܐ܃ ܕܠܳܐ ܢܶܟܼܬܽܘܒܼ ܣܰܟܼܠܽܘܬܼܶܗ܂

next chapter