← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62044: P Acts

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


26:01 [ai]ܘܶܐܡܰܪ ܐܰܓܼܪܺܦܿܰܘܣ ܠܦܿܰܘܠܳܘܣ܂ ܡܰܦܿܰܣ ܠܳܟܼ ܠܰܡܡܰܠܳܠܽܘ ܥܰܠ ܐܰܦܿܰܝ̈ ܢܰܦܼܫܳܟܼ܀ ܗܳܝܕܶܝܢ ܦܿܰܘܠܳܘܣ ܦܫܰܛ ܐܺܝܕܼܶܗ܃ ܘܢܳܦܼܶܩ ܗ̱ܘܳܐ ܪܽܘܚܳܐ ܘܳܐܡܰܪ܂
26:02 [ai]ܥܰܠ ܟܽܠ ܡܳܐ ܕܡܶܬܼܪܫܶܐ ܐ̱ܢܳܐ ܡܶܢ ܺܝܗܽܘܕܼܳܝܶܐ̈ ܡܰܠܟܿܳܐ ܐܰܓܼܪܺܦܿܶܐ܃ ܣܳܒܼܰܪ ܐ̱ܢܳܐ ܥܰܠ ܢܰܦܼܫܝ ܕܛܽܘܒܼܳܢܳܐ ܐ̱ܢܳܐ܃ ܕܰܩܕܼܳܡܰܝܟܿ ܝܰܘܡܳܢܳܐ ܢܳܦܼܶܩ ܐ̱ܢܳܐ ܪܽܘܚܳܐ܂
26:03 [ai]ܝܰܬܿܺܝܪܳܐܺܝܬܼ ܕܝܳܕܼܰܥ ܐ̱ܢܳܐ ܕܰܡܦܿܳܣ ܐܰܢ̱ܬܿ ܒܟܽܠܗܽܘܢ ܙܺܛܺܡܶܐ̈ ܘܢܳܡܽܘܣܶܐ̈ ܕܺܝܗܽܘܕܼܳܝܶܐ̈܂ ܡܶܛܽܠ ܗܳܢܳܐ ܒܿܳܥܶܐ ܐ̱ܢܳܐ ܡܶܢܳܟܼ܃ ܕܰܒܼܡܰܓܿܪܰܬܼ ܪܽܘܚܳܐ ܬܶܫܡܥܰܢܝ܂
26:04 [ai]ܝܳܕܼܥܺܝܢ ܐܶܢܽܘܢ ܓܶܝܪ ܐܳܦܼ ܗܶܢܽܘܢ ܺܝܗܽܘܕܼܳܝܶܐ̈ ܐܶܢ ܨܳܒܼܶܝܢ ܕܢܶܣܗܕܼܽܘܢ܃ ܕܿܽܘܒܿܳܪ̈ܰܝ ܕܡܶܢ ܛܰܠܝܽܘܬܼܝ ܕܰܗܘܰܘ ܠܺܝ ܡܶܢ ܫܽܘܪܳܝܳܐ ܒܥܰܡܝ ܘܒܼܽܐܘܪܺܫܠܶܡ܂
26:05 [ai]ܡܶܛܽܠ ܕܡܶܢ ܢܽܘܓܼܪܳܐ ܡܦܿܳܣܺܝܢ ܒܺܝ܃ ܘܝܳܕܼܥܺܝܢ ܕܰܒܼܝܽܘܠܦܿܳܢܳܐ ܪܺܫܳܝܳܐ ܕܿܰܦܼܪ̈ܺܝܫܶܐ ܚܝܺܝܬܼ܂
26:06 [ai]ܘܗܳܫܳܐ ܥܰܠ ܣܰܒܼܪܳܐ ܕܫܽܘܘ̱ܕܿܳܝܳܐ ܕܰܗܘܳܐ ܗ̱ܘܳܐ ܠܰܐܒܼܳܗܳܬܼܰܢ̈ ܡܶܢ ܐܰܠܳܗܳܐ܃ ܩܳܐܶܡ ܐ̱ܢܳܐ ܘܡܶܬܿܕܼܺܝܢ ܐ̱ܢܳܐ܂
26:07 [ai]ܕܥܰܠ ܗܳܢܳܐ ܣܰܒܼܪܳܐ܃ ܬܿܰܪ̈ܬܿܰܥܶܣܪܶܐ ܫܰܪ̈ܒܼܳܢ ܡܣܰܒܿܪ̈ܳܢ ܕܰܢܡܰܢܥܳܢ̈܃ ܒܰܨܠܰܘܳܬܼܳܐ̈ ܚܦܼܺܝܛܳܬܼܳܐ̈ ܕܺܐܝܡܳܡܳܐ ܘܰܕܼܠܺܠܝܳܐ܂ ܘܰܥܠܰܘܗ̱ܝ ܥܰܠ ܗܳܢܳܐ ܣܰܒܼܪܳܐ ܡܶܬܼܪܫܶܐ ܐ̱ܢܳܐ ܡܶܢ ܐܺܝܕܼܰܝ̈ ܺܝܗܽܘܕܼܳܝܶܐ̈܂ ܡܰܠܟܿܳܐ ܐܰܓܼܪܺܦܿܶܐ܂
26:08 [ai]ܡܳܢܳܐ ܕܳܝܢܺܝܢ ܐܢ̱ܬܿܽܘܢ܂ ܠܳܐ ܘܳܠܶܐ ܕܰܢܗܰܝܡܶܢ܃ ܕܰܡܩܺܝܡ ܐܰܠܳܗܳܐ ܡܺܝܬܼܶܐ̈܂
26:09 [ai]ܐܶܢܳܐ ܓܶܝܪ ܡܶܢ ܩܕܼܺܝܡ ܣܳܡܶܬܼ ܒܪܶܥܝܳܢܝ܃ ܕܣܰܩܽܘܒܼܠܶܐ̈ ܣܰܓܿܺܝܶܐܐ̈ ܐܶܣܥܽܘܪ ܠܽܘܩܒܼܰܠ ܫܡܶܗ ܕܝܶܫܽܘܥ ܢܳܨܪܳܝܳܐ܂
26:10 [ai]ܗܳܕܼܶܐ ܕܥܶܒܼܕܿܶܬܼ ܐܳܦܼ ܒܽܐܘܪܺܫܠܶܡ܃ ܘܩܰܕܿܺܝܫܶܐ̈ ܣܰܓܿܺܝܶܐܐ̈ ܐܰܪܡܺܝܬܼ ܒܶܝܬܼ ܐܰܣܺܝܪ̈ܶܐ܃ ܒܫܽܘܠܛܳܢܳܐ ܕܩܰܒܿܠܶܬܼ ܡܶܢ ܪ̈ܰܒܰܝ ܟܳܗܢܶܐ̈܂ ܘܟܼܰܕܼ ܡܶܬܼܩܰܛܠܺܝܢ ܗ̱ܘܰܘ ܡܶܢܗܽܘܢ܃ ܐܶܫܬܰܘܬܿܦܼܶܬܼ ܠܰܐܝܠܶܝܢ ܕܚܰܝܶܒܼܘ ܐܶܢܽܘܢ܂
26:11 [ai]ܘܰܒܟܼܽܠ ܟܢܽܘܫܳܐ ܡܶܫܬܿܰܢܰܕܼ ܗ̱ܘܺܝܬܼ ܒܗܽܘܢ܃ ܟܰܕܼ ܐܳܠܶܨ ܗ̱ܘܺܝܬܼ ܕܢܶܗܘܽܘܢ ܡܓܼܰܕܿܦܼܺܝܢ ܒܰܫܡܶܗ ܕܝܶܫܽܘܥ܂ ܘܰܒܪܽܘܓܼܙܳܐ ܣܰܓܿܺܝܳܐܐ ܕܰܡܠܶܐ ܗ̱ܘܺܝܬܼ ܥܠܰܝܗܽܘܢ܃ ܐܳܦܼ ܠܰܡܕܼܺܝܢܳܬܼܳܐ̈ ܐ̱ܚܪ̈ܳܢܝܳܬܼܳܐ ܢܳܦܼܶܩ ܗ̱ܘܺܝܬܼ ܠܡܶܪܕܿܰܦܼ ܐܶܢܽܘܢ܂
26:12 [ai]ܘܟܼܰܕܼ ܐܳܙܶܠ ܗ̱ܘܺܝܬܼ ܡܶܛܽܠ ܗܳܕܼܶܐ ܠܕܼܰܪܡܣܽܘܩ ܒܫܽܘܠܛܳܢܳܐ ܘܰܒܡܰܦܿܣܳܢܽܘܬܼܳܐ ܕܿܪ̈ܰܒܰܝܟܳܗܢܶܐ̈܃
26:13 [ai]ܒܦܶܠܓܿܶܗ ܕܝܰܘܡܳܐ ܒܽܐܘܪܚܳܐ ܚܙܺܝܬܼ ܡܶܢ ܫܡܰܝܳܐ ܐܳܘ ܡܰܠܟܿܳܐ܃ ܕܰܐܙܠܶܓܼ ܥܠܰܝ ܘܥܰܠ ܟܽܠ ܕܥܰܡܝ ܗ̱ܘܰܘ܃ ܢܽܘܗܪܳܐ ܕܰܡܝܰܬܿܰܪ ܡܶܢ ܕܫܶܡܫܳܐ܂
26:14 [ai]ܘܰܢܦܼܰܠܢ ܟܽܠܰܢ ܥܰܠ ܐܰܪܥܳܐ܂ ܘܫܶܡܥܶܬܼ ܩܳܠܳܐ ܟܰܕܼ ܐܳܡܰܪ ܠܺܝ ܥܶܒܼܪܳܐܺܝܬܼ܃ ܫܳܐܘܳܠ ܫܳܐܘܳܠ ܡܳܢܳܐ ܪܳܕܼܶܦܼ ܐܰܢ̱ܬܿ ܠܺܝ܂ ܩܫܶܐ ܗ̱ܽܘ ܠܳܟܼ ܠܰܡܒܼܰܥܳܛܽܘ ܠܥܽܘܩܣܶܐ̈܂
26:15 [ai]ܘܶܐܢܳܐ ܐܶܡܪܶܬܼ܂ ܡܰܢ ܐܰܢ̱ܬܿ ܡܳܪܝ܂ ܘܡܳܪܰܢ ܐܶܡܰܪ ܠܺܝ܂ ܐܶܢܳܐ ܗܽܘ ܝܶܫܽܘܥ ܢܳܨܪܳܝܳܐ ܕܰܐܢ̱ܬܿ ܪܳܕܼܶܦܼ ܐܰܢ̱ܬܿ܂
26:16 [ai]ܘܶܐܡܰܪ ܠܺܝ܂ ܩܽܘܡ ܥܰܠ ܪ̈ܶܓܼܠܰܝܟܿ܂ ܡܶܛܽܠ ܗܳܕܼܶܐ ܓܶܝܪ ܐܶܬܼܚܙܺܝܬܼ ܠܳܟܼ܃ ܕܰܐܩܺܝܡܳܟܼ ܡܫܰܡܫܳܢܳܐ ܘܣܳܗܕܿܳܐ ܕܿܡܶܕܶܡ ܕܰܚܙܰܝܬܿܳܢܝ܃ ܘܕܼܰܥܬܼܺܝܕܼ ܐܰܢ̱ܬܿ ܕܬܶܚܙܶܝܢܝ܂
26:17 [ai]ܘܶܐܦܿܰܨܶܝܟܼ ܡܶܢ ܥܰܡܳܐ ܕܺܝܗܽܘܕܼܳܝܶܐ̈܃ ܘܡܶܢ ܥܰܡ̱ܡܶܐ̈ ܐ̱ܚܪ̈ܳܢܶܐ ܕܰܠܘܳܬܼܗܽܘܢ ܡܫܰܕܿܰܪ ܐ̱ܢܳܐ ܠܳܟܼ܃
26:18 [ai]ܕܰܬܼܦܼܰܬܿܰܚ ܥܰܝܢܰܝܗܽܘܢ̈܃ ܐܰܝܟܼ ܕܢܶܗܦܿܟܼܽܘܢ ܡܶܢ ܚܶܫܽܘܟܼܳܐ ܠܢܰܗܺܝܪܳܐ܂ ܘܡܶܢ ܫܽܘܠܛܳܢܶܗ ܕܣܳܛܳܢܳܐ ܠܘܳܬܼ ܐܰܠܳܗܳܐ܃ ܘܰܢܩܰܒܿܠܽܘܢ ܫܽܘܒܼܩܳܢ ܚܛܳܗܶܐ̈܂ ܘܦܼܶܣܳܐ ܥܰܡ ܩܰܕܿܺܝܫܶܐ̈ ܒܗܰܝܡܳܢܽܘܬܼܳܐ ܕܒܺܝ܂
26:19 [ai]ܡܶܛܽܠ ܗܳܕܼܶܐ ܡܰܠܟܿܳܐ ܐܰܓܼܪܺܦܿܶܐ܃ ܠܳܐ ܩܳܡܶܬܼ ܒܚܶܪܝܳܢܳܐ ܠܽܘܩܒܼܰܠ ܚܶܙܘܳܐ ܫܡܰܝܳܢܳܐ܂
26:20 [ai]ܐܶܠܳܐ ܐܰܟܼܪܙܶܬܼ ܡܶܢ ܠܩܽܘܕܼܡܺܝܢ܃ ܠܗܳܢܽܘܢ ܕܰܒܼܕܼܰܪܡܣܽܘܩ܂ ܘܰܠܗܳܢܽܘܢ ܕܒܽܐܘܪܺܫܠܶܡ܂ ܘܕܼܰܒܼܟܼܽܠܗܶܝܢ ܩܽܘܪ̈ܝܳܐ ܕܺܝܗܽܘܕܼ܂ ܘܳܐܦܼ ܠܥܰܡ̱ܡܶܐ̈ ܐܰܟܼܪܙܶܬܼ܃ ܕܰܢܬܼܽܘܒܼܽܘܢ ܘܢܶܬܼܦܿܢܽܘܢ ܠܘܳܬܼ ܐܰܠܳܗܳܐ܃ ܘܢܶܥܒܿܕܼܽܘܢ ܥܒܼܳܕܼܶܐ̈ ܕܫܳܘܶܝܢ ܠܰܬܼܝܳܒܼܽܘܬܼܳܐ܂
26:21 [ai]ܘܥܰܠ ܐܰܦܿܰܝ̈ ܗܳܠܶܝܢ܃ ܐܰܚܕܿܽܘܢܝ ܺܝܗܽܘܕܼܳܝܶܐ̈ ܒܗܰܝܟܠܳܐ ܘܨܳܒܼܶܝܢ ܗ̱ܘܰܘ ܠܡܶܩܛܠܰܢܝ܂
26:22 [ai]ܥܰܕܿܪܰܢܝ ܕܶܝܢ ܐܰܠܳܗܳܐ ܥܕܼܰܡܳܐ ܠܝܰܘܡܳܐ ܗܳܢܳܐ܂ ܘܗܳܐ ܩܳܐܶܡ ܐ̱ܢܳܐ ܘܰܡܣܰܗܶܕܼ ܐ̱ܢܳܐ ܠܰܙܥܽܘܪܳܐ ܘܰܠܪܰܒܿܳܐ܃ ܟܰܕܼ ܡܶܕܶܡ ܠܒܼܰܪ ܡܶܢ ܡܽܘܫܶܐ ܘܰܢܒܼܺܝܶܐ̈ ܠܳܐ ܐܳܡܰܪ ܐ̱ܢܳܐ܃ ܐܶܠܳܐ ܐܰܝܠܶܝܢ ܕܗܶܢܽܘܢ ܐܶܡܰܪܘ ܕܰܥܬܼܺܝܕܼܳܢ̈ ܕܢܶܗܘܝܳܢ̈܃
26:23 [ai]ܕܢܶܚܰܫ ܡܫܺܝܚܳܐ܂ ܘܢܶܗܘܶܐ ܪܺܫܺܝܬܼܳܐ ܕܰܩܝܳܡܬܳܐ ܕܡܶܢ ܒܶܝܬܼ ܡܺܝܬܼܶܐ̈܂ ܘܕܼܰܥܬܼܺܝܕܼ ܕܢܰܟܼܪܶܙ ܢܽܘܗܪܳܐ ܠܥܰܡܳܐ ܘܰܠܥܰܡ̱ܡܶܐ̈ ܿ܀ܿ܀ܿ
26:24 [ai]ܘܟܼܰܕܼ ܗܳܟܼܰܢܳܐ ܢܳܦܼܶܩ ܗ̱ܘܳܐ ܦܿܰܘܠܳܘܣ ܪܽܘܚܳܐ܃ ܩܥܳܐ ܦܿܺܗ̱ܣܛܳܘܣ ܒܩܳܠܳܐ ܪܳܡܳܐ܃ ܫܢܰܝܬܿ ܠܳܟܼ ܦܿܰܘܠܶܐ܂ ܣܶܦܼܪܳܐ ܣܰܓܿܺܝܳܐܐ ܥܰܒܼܕܿܳܟܼ ܕܬܶܫܢܶܐ܂
26:25 [ai]ܐܳܡܰܪ ܦܿܰܘܠܳܘܣ܂ ܠܳܐ ܫܢܺܝܬܼ ܢܰܨܺܝܚܳܐ ܦܿܺܗ̱ܣܛܳܘܣ܃ ܐܶܠܳܐ ܡܶܠܰܝ̈ ܫܪܳܪܳܐ ܘܬܼܰܩܢܽܘܬܼܳܐ ܡܡܰܠܶܠ ܐ̱ܢܳܐ܂
26:26 [ai]ܘܳܐܦܼ ܡܰܠܟܿܳܐ ܐܰܓܼܪܺܦܿܰܘܣ ܝܰܬܿܺܝܪܳܐܺܝܬܼ ܝܳܕܼܰܥ ܥܠܰܝܗܶܝܢ ܕܗܳܠܶܝܢ܂ ܘܡܶܛܽܠ ܗܳܢܳܐ ܥܺܝܢ ܒܰܓܼܠܶܐ ܡܡܰܠܶܠ ܐ̱ܢܳܐ ܩܕܼܳܡܰܘܗ̱ܝ܃ ܡܶܛܽܠ ܕܰܚܕܼܳܐ ܡܶܢ ܗܳܠܶܝܢ ܡܶܠܶܐ̈܂ ܠܳܐ ܣܳܒܼܰܪܐ̱ܢܳܐ ܕܛܰܥܝܳܢ̈ ܠܶܗ܂ ܕܠܳܐ ܗ̱ܘܳܐ ܒܛܽܘܫܝܳܐ ܣܥܺܝܪ̈ܳܢ܂
26:27 [ai]ܡܗܰܝܡܶܢ ܐܰܢ̱ܬܿ ܡܰܠܟܿܳܐ ܐܰܓܼܪܺܦܿܶܐ ܠܰܢܒܼܺܝܶܐ̈܃ ܝܳܕܼܰܥ ܐ̱ܢܳܐ ܕܰܡܗܰܝܡܶܢ ܐܰܢ̱ܬܿ܂
26:28 [ai]ܐܳܡܰܪ ܠܶܗ ܐܰܓܼܪܺܦܿܰܘܣ܂ ܒܩܰܠܺܝܠ ܡܶܕܶܡ ܡܦܿܺܝܣ ܐܰܢ̱ܬܿ ܠܺܝ ܕܶܐܗܘܶܐ ܟܪܺܣܛܝܳܢܳܐ܂
26:29 [ai]ܘܦܿܰܘܠܳܘܣ ܐܶܡܰܪ܂ ܒܿܳܥܶܐ ܗ̱ܘܺܝܬܼ ܡܶܢ ܐܰܠܳܗܳܐ ܒܩܰܠܺܝܠ ܘܰܒܣܰܓܿܺܝ܂ ܠܳܐ ܗ̱ܘܳܐ ܠܳܟܼ ܒܰܠܚܽܘܕܼ ܐܶܠܳܐ ܐܳܦܼ ܠܟܼܽܠܗܽܘܢ ܐܰܝܠܶܝܢ ܕܫܳܡܥܺܝܢ ܠܺܝ ܝܰܘܡܳܢܳܐ܃ ܕܢܶܗܘܽܘܢ ܐܰܟܼܘܳܬܼܝ ܠܒܼܰܪܡܶܢ ܐܰܣܽܘܪ̈ܶܐ ܗܳܠܶܝܢ܂
26:30 [ai]ܘܩܳܡ ܠܶܗ ܡܰܠܟܿܳܐ ܘܗܺܓܼܡܳܘܢܳܐ ܘܒܼܶܪܢܺܝܩܺܐ܃ ܘܰܐܝܠܶܝܢ ܕܿܝܳܬܼܒܺܝܢ ܗ̱ܘܰܘ ܥܰܡܗܽܘܢ܂
26:31 [ai]ܘܟܼܰܕܼ ܦܪܰܩܘ ܡܶܢ ܬܰܡܳܢ܃ ܡܡܰܠܠܺܝܢ ܗ̱ܘܰܘ ܚܰܕܼ ܥܰܡ ܚܰܕܼ ܘܳܐܡܪܺܝܢ܂ ܕܿܡܶܕܶܡ ܕܫܳܘܶܐ ܠܡܰܘܬܳܐ ܐܰܘ ܠܰܐܣܽܘܪ̈ܶܐ܃ ܠܳܐ ܥܒܼܰܕܼ ܓܰܒܼܪܳܐ ܗܳܢܳܐ܂
26:32 [ai]ܘܶܐܡܰܪ ܐܰܓܼܪܺܦܿܰܘܣ ܠܦܿܺܗ̱ܣܛܳܘܣ܂ ܡܶܫܟܿܰܚ ܗ̱ܘܳܐ ܓܰܒܼܪܳܐ ܗܳܢܳܐ ܕܢܶܫܬܿܪܶܐ܃ ܐܶܠܽܘ ܒܓܶܢ ܩܶܣܰܪ ܠܳܐ ܩܪܳܐ܂

next chapter