The Comprehensive Aramaic Lexicon

27:01 [ai]	ܘܰܦܼܩܰܕܼ ܥܠܰܘܗ̱ܝ ܦܿܺܗ̱ܣܛܳܣ܃ ܕܢܶܫܬܿܰܕܿܰܪ ܠܘܳܬܼ ܩܶܣܰܪ ܠܺܐܝܛܰܠܺܝܰܐ܂ ܘܰܐܫܠܡܶܗ ܠܦܿܰܘܠܳܘܣ ܘܠܰܐܣܺܝܪ̈ܶܐ ܐ̱ܚܪ̈ܳܢܶܐ ܥܰܡܶܗ܃ ܠܓܼܰܒܼܪܳܐ ܚܰܕܼ ܩܶܢܛܪܽܘܢܳܐ ܡܶܢ ܐܶܣܦܿܺܝܪ ܕܰܫܡܶܗ ܗܘܳܐ ܝܽܘܠܺܝܳܘܣ܀
27:02 [ai]	ܘܟܼܰܕܼ ܗܘܳܬܼ ܕܢܶܪܕܿܶܐ܃ ܢܚܶܬܼܢ ܠܶܐܠܦܼܳܐ ܕܺܐܝܬܼܶܝܗ ܗ̱ܘܳܬܼ ܡܶܢ ܐܰܕܼܪܡܢܽܛܳܘܣ ܡܕܼܺܝܢ̱ܬܳܐ܂ ܘܳܐܙܳܠ̱ܐ ܗ̱ܘܳܬܼ ܠܰܐܬܼܪܳܐ ܕܰܐܣܺܝܰܐ܂ ܘܥܰܠ ܗ̱ܘܳܐ ܥܰܡܰܢ ܠܶܐܠܦܼܳܐ܃ ܐܰܪܺܣܛܰܪܟܼܳܘܣ ܡܰܩܶܕܼܳܘܢܺܝܰܐ ܕܡܶܢ ܬܼܶܣܰܠܳܘܢܺܝܩܺܐ ܡܕܼܺܝܢ̱ܬܳܐ܂
27:03 [ai]	ܘܰܠܝܰܘܡܳܐ ܐ̱ܚܪܺܢܳܐ܃ ܡܰܛܺܝܢ ܠܨܰܝܕܳܢ܂ ܘܶܐܬܼܚܰܫܰܚ ܩܶܢܛܪܽܘܢܳܐ ܒܰܡܪܰܚܡܳܢܽܘܬܼܳܐ ܐܠܘܳܬܼ ܦܿܰܘܠܳܘܣ܃ ܘܰܐܦܿܶܣ ܠܶܗ ܕܢܺܐܙܰܠ ܠܘܳܬܼ ܪ̈ܳܚܡܰܘܗ̱ܝ܃ ܘܢܶܬܿܬܿܢܺܝܚ܂
27:04 [ai]	ܘܡܶܢ ܬܰܡܳܢ ܪܕܼܰܝܢ܃ ܘܡܶܛܽܠ ܕܿܪ̈ܽܘܚܶܐ ܣܰܩܽܘܒܼܠܳܢ̈ ܗ̱ܘܰܝ̈܃ ܐܶܬܼܟܿܪܶܟܼܢ ܥܰܠ ܩܽܘܦܿܪܳܘܣ܂
27:05 [ai]	ܘܰܥܒܼܰܪܢ ܝܰܡܳܐ ܕܩܺܝܠܺܝܩܺܝܰܐ ܘܰܕܼܦܿܰܡܦܼܽܘܠܺܝܰܐ܂ ܘܡܰܛܺܝܢ ܠܡܽܘܪܰܐ ܡܕܼܺܝܢ̱ܬܳܐ ܕܠܽܘܩܺܝܰܐ܂
27:06 [ai]	ܘܶܐܫܟܿܰܚ ܬܰܡܳܢ ܩܶܢܛܪܽܘܢܳܐ ܐܶܠܦܼܳܐ ܡܶܢ ܐܰܠܶܟܿܣܰܢܕܿܪܺܝܰܐ܃ ܕܳܐܙܳܠ̱ܐ ܗ̱ܘܳܬܼ ܠܺܐܝܛܰܠܺܝܰܐ܃ ܘܰܐܘܬܿܒܼܰܢ ܒܿܳܗ܂
27:07 [ai]	ܘܡܶܛܽܠ ܕܝܰܩܺܝܪܳܐܺܝܬܼ ܪܳܕܼܝܳܐ ܗ̱ܘܳܬܼ ܠܝܰܘܡܳܬܼܳܐ̈ ܣܰܓܿܺܝܶܐܐ̈܃ ܠܡܰܚܣܶܢ ܡܰܛܺܝܢ ܠܽܘܩܒܼܰܠ ܩܢܺܝܕܼܳܘܣ ܓܳܙܰܪܬܳܐ܂ ܘܡܶܛܽܠ ܕܠܳܐ ܫܳܒܼܩܳܐ ܗ̱ܘܳܬܼ ܪܽܘܚܳܐ ܕܢܺܐܙܰܠ ܬܪܺܝܨܳܐܺܝܬܼ܃ ܐܶܬܼܟܿܪܶܟܼܢ ܥܰܠ ܩܪܺܛܺܐ܃ ܠܽܘܩܒܼܰܠ ܣܰܠܡܳܘܢܺܐ ܡܕܼܺܝܢ̱ܬܳܐ܂
27:08 [ai]	ܘܰܠܡܰܚܣܶܢ ܟܰܕܼ ܪܳܕܼܶܝܢܰܢ ܚܕܼܳܪ̈ܶܝܗ܃ ܡܰܛܺܝܢ ܠܕܼܽܘܟܿܬܼܳܐ ܕܡܶܬܼܩܰܪܝܳܐ ܠܡܺܐܢܶܐ̈ ܫܰܦܿܺܝܪ̈ܶܐ܂ ܘܩܰܪܺܝܒܼܳܐ ܗ̱ܘܳܬܼ ܠܳܗ ܡܕܼܺܝܢ̱ܬܳܐ ܕܰܫܡܳܗ ܠܰܐܣܶܐܰܐ܂
27:09 [ai]	ܘܰܗܘܰܝܢ ܬܰܡܳܢ ܙܰܒܼܢܳܐ ܣܰܓܿܺܝܳܐܐ܃ ܥܕܼܰܡܳܐ ܕܰܥܒܼܰܪ ܐܳܦܼ ܝܰܘܡܳܐ ܕܨܰܘܡܳܐ ܕܺܝܗܽܘܕܼܳܝܶܐ̈܂ ܘܰܗܘܳܐ ܠܶܗ ܩܶܢܛܳܐ ܕܢܶܪܕܿܶܐ ܐ̱ܢܳܫ ܒܝܰܡܳܐ܂ ܘܡܳܠܶܟܼ ܗ̱ܘܳܐ ܠܗܽܘܢ ܦܿܰܘܠܳܘܣ
27:10 [ai]	ܘܳܐܡܰܪ܂ ܓܿܰܒܼܪ̈ܶܐ܃ ܚܳܙܶܐ ܐ̱ܢܳܐ ܕܒܽܐܘܠܨܳܢܳܐ ܘܰܒܚܽܘܣܪܳܢܳܐ ܣܰܓܿܺܝܳܐܐ ܗܳܘܝܳܐ ܡܰܪܕܿܺܝܬܼܰܢ܃ ܠܰܘ ܒܰܠܚܽܘܕܼ ܕܡܰܘܒܿܠܳܗ ܕܶܐܠܦܼܰܢ܂ ܐܶܠܳܐ ܐܳܦܼ ܕܢܰܦܼܫܳܬܼܰܢ̈ ܕܺܝܠܰܢ܂
27:11 [ai]	ܩܶܢܛܪܽܘܢܳܐ ܕܶܝܢ ܠܩܽܘܒܼܶܪܢܺܛܺܐ ܘܰܠܡܳܪܳܗ ܕܶܐܠܦܼܳܐ ܫܳܡܰܥ ܗ̱ܘܳܐ ܝܰܬܿܺܝܪ ܡܶܢ ܡܶܠܰܘܗ̱ܝ̈ ܕܦܿܰܘܠܳܘܣ܂
27:12 [ai]	ܘܡܶܛܽܠ ܕܠܳܐ ܥܳܗܶܢ ܗ̱ܘܳܐ ܗܰܘ ܠܡܺܐܢܳܐ ܠܡܰܣܬܿܳܝܽܘ ܒܶܗ ܣܰܬܼܘܳܐ܃ ܣܰܓܿܺܝܶܐܐ̈ ܡܶܢܰܢ ܨܳܒܼܶܝܢ ܗ̱ܘܰܘ ܕܢܶܪܕܿܶܐ ܡܶܢ ܬܰܡܳܢ܃ ܘܶܐܢܗܽܘ ܕܡܶܫܟܿܚܺܝܢ܃ ܕܰܢܡܰܢܥܽܘܢ ܘܢܰܣܬܿܽܘܢ ܒܰܠܡܺܐܢܳܐ ܚܰܕܼ ܕܺܐܝܬܼܰܘܗ̱ܝ ܗ̱ܘܳܐ ܒܰܩܪܺܛܺܐ܂ ܘܡܶܬܼܩܪܶܐ ܗ̱ܘܳܐ ܦܿܽܘܢܺܟܿܣ܂ ܘܚܳܐܰܪ ܗ̱ܘܳܐ ܠܬܼܰܝܡܢܳܐ܂
27:13 [ai]	ܘܟܼܰܕܼ ܢܶܫܒܿܰܬܼ ܪܽܘܚܳܐ ܕܬܰܝܡܢܳܐ܃ ܘܰܣܒܼܰܪܘ ܕܰܡܡܰܛܶܝܢ ܐܰܝܟܼ ܨܶܒܼܝܳܢܗܽܘܢ܃ ܪܳܕܼܶܝܢ ܗ̱ܘܰܘ ܚܕܼܳܪ̈ܰܝ ܩܪܺܛܺܐ܂
27:14 [ai]	ܘܡܶܢ ܒܳܬܼܰܪ ܩܰܠܺܝܠ܂ ܢܦܼܰܩ ܥܠܰܝܢ ܡܰܫܒܼܳܐ ܕܥܰܠܥܳܠܳܐ܃ ܕܡܶܬܼܩܪܶܐ ܛܽܘܦܼܳܢܺܝܩܳܘܣ ܐܶܘܪܰܩܠܺܝܕܼܳܘܢ܂
27:15 [ai]	ܘܶܐܬܼܚܰܛܦܿܰܬܼ ܐܶܠܦܼܳܐ܂ ܘܠܳܐ ܐܶܫܟܿܚܰܬܼ ܕܰܬܼܩܽܘܡ ܠܽܘܩܒܼܰܠ ܪܽܘܚܳܐ܂ ܘܝܰܗ̱ܒܼܢ ܠܰܐܝܕܼܳܐ ܕܗܺܝ܂
27:16 [ai]	ܘܟܼܰܕܼ ܥܒܼܰܪܢ ܓܳܙܰܪܬܳܐ ܚܕܼܳܐ ܕܡܶܬܼܩܰܪܝܳܐ ܩܽܘܕܼܰܐ܃ ܠܡܰܚܣܶܢ ܐܶܫܟܿܰܚܢ ܐܶܚܰܕܼܢ ܠܩܰܪܩܽܘܪܳܐ܂
27:17 [ai]	ܘܟܼܰܕܼ ܫܩܰܠܢܳܗ܃ ܡܚܰܝܨܺܝܢ ܗ̱ܘܰܝܢ ܘܡܰܬܼܩܢܺܝܢ ܠܳܗ ܠܶܐܠܦܼܳܐ܂ ܘܡܶܛܽܠ ܕܕܼܳܚܠܺܝܢ ܗ̱ܘܰܝܢ ܕܕܼܰܠܡܳܐ ܢܶܦܿܶܠ ܒܡܰܚܰܬܿܬܿܶܗ ܕܝܰܡܳܐ܃ ܐܰܚܶܬܼܢܳܝܗ̱ܝ ܠܰܐܪܡܶܢܳܘܢ܂ ܘܗܳܟܼܘܳܬܼ ܪܳܕܼܶܝܢ ܗ̱ܘܰܝܢ܂
27:18 [ai]	ܘܟܼܰܕܼ ܩܳܡ ܠܶܗ ܥܠܰܝܢ ܟܺܝܡܽܘܢܳܐ ܩܰܫܝܳܐ܃ ܠܝܰܘܡܳܐ ܐ̱ܚܪܺܢܳܐ܂ ܫܕܼܰܝܢ ܡܳܐܢܺܝܢ̈ ܒܝܰܡܳܐ܂
27:19 [ai]	ܘܰܠܝܰܘܡܳܐ ܕܰܬܼܠܳܬܼܳܐ܃ ܡܳܐܢܶܐ̈ ܕܺܝܠܳܗ ܕܶܐܠܦܼܳܐ ܒܺܐܝܕܼܰܝܢ̈ ܫܕܼܰܝܢ܂
27:20 [ai]	ܘܟܼܰܕܼ ܐܶܚܰܕܼ ܠܶܗ ܣܰܬܼܘܳܐ ܝܰܘܡܳܬܼܳܐ̈ ܝܰܬܿܺܝܪ̈ܶܐ܃ ܘܠܳܐ ܫܶܡܫܳܐ ܡܶܬܼܚܙܶܐ ܗ̱ܘܳܐ ܘܠܳܐ ܣܰܗܪܳܐ ܘܠܳܐ ܟܰܘܟܿܒܼܶܐ̈܃ ܣܰܒܼܪܳܐ ܕܚܰܝܰܝܢ̈ ܟܽܠ ܟܽܠܶܗ ܐܶܬܼܦܿܣܶܩ ܗ̱ܘܳܐ ܠܶܗ܂
27:21 [ai]	ܘܟܼܰܕܼ ܐ̱ܢܳܫ ܡܶܕܶܡ ܠܳܐ ܡܶܣܬܿܰܝܒܰܪ ܗ̱ܘܳܐ܃ ܗܳܝܕܶܝܢ ܩܳܡ ܦܿܰܘܠܳܘܣ ܒܰܝܢܳܬܼܗܽܘܢ ܘܶܐܡܰܪ܂ ܐܶܠܽܘ ܐܶܬܿܛܦܿܺܝܣܬܿܽܘܢ ܠܺܝ ܓܿܰܒܼܪ̈ܶܐ܃ ܠܳܐ ܪܳܕܼܶܝܢ ܗ̱ܘܰܝܢ ܡܶܢ ܩܪܺܛܺܐ܃ ܘܡܶܬܼܚܰܣܟܿܺܝܢ ܗ̱ܘܰܝܢ ܡܶܢ ܚܽܘܣܪܳܢܳܐ ܘܡܶܢ ܐܽܘܠܨܳܢܳܐ ܗܳܢܳܐ܂
27:22 [ai]	ܘܗܳܫܳܐ ܡܳܠܶܟܼ ܐ̱ܢܳܐ ܕܬܶܗܘܽܘܢ ܕܠܳܐ ܥܳܩܳܐ܂ ܢܰܦܼܫܳܐ ܓܶܝܪ ܡܶܢܟܼܽܘܢ ܚܕܼܳܐ ܠܳܐ ܐܳܒܼܕܿܳܐ܃ ܐܶܠܳܐ ܐܶܢ ܐܶܠܦܼܳܐ܂
27:23 [ai]	ܐܶܬܼܚܙܺܝ ܠܺܝ ܓܶܝܪ ܒܠܺܠܝܳܐ ܗܳܢܳܐ ܡܰܠܰܐܟܼܶܗ ܕܰܐܠܳܗܳܐ܃ ܗܰܘ ܕܕܼܺܝܠܶܗ ܐ̱ܢܳܐ ܘܠܶܗ ܦܳܠܰܚ ܐ̱ܢܳܐ܂
27:24 [ai]	ܘܶܐܡܰܪ ܠܺܝ܂ ܠܳܐ ܬܶܕܼܚܰܠ ܦܿܰܘܠܶܐ܂ ܥܬܼܺܝܕܼ ܗ̱ܽܘ ܠܳܟܼ ܠܰܡܩܳܡ ܩܕܼܳܡ ܩܶܣܰܪ܂ ܘܗܳܐܼ ܝܰܗ̱ܒܼ ܠܳܟܼ ܐܰܠܳܗܳܐ ܡܰܘܗܰܒܼܬܳܐ ܠܟܼܽܠ ܕܪܳܕܼܶܝܢ ܥܰܡܳܟܼ܂
27:25 [ai]	ܡܶܛܽܠ ܗܳܢܳܐ ܐܶܬܼܠܰܒܿܰܒܼܘ ܓܿܰܒܼܪ̈ܶܐ܃ ܡܗܰܝܡܶܢ ܐ̱ܢܳܐ ܓܶܝܪ ܒܰܐܠܳܗܳܐ܃ ܕܗܳܟܼܰܢܳܐ ܐܰܝܟܼ ܡܳܐ ܕܶܐܬܼܡܰܠܰܠ ܥܰܡܝ܂
27:26 [ai]	ܒܪܰܡ ܠܓܼܳܙܰܪܬܳܐ ܚܕܼܳܐ ܐܺܝܬܼ ܠܰܢ ܕܢܶܫܬܿܕܼܶܐ܂
27:27 [ai]	ܘܡܶܢ ܒܳܬܼܰܪ ܐܰܪܒܿܬܼܰܥܣܰܪ ܝܰܘܡܺܝܢ̈ ܕܰܛܥܰܝܢ ܘܶܐܬܿܛܰܪܰܦܼܢ ܒܗܰܕܼܪܺܝܰܘܣ ܝܰܡܳܐ܃ ܒܦܶܠܓܿܶܗ ܕܠܺܠܝܳܐ܂ ܣܒܼܰܪܘ ܡܰܠܳܚܶܐ̈ ܕܠܰܐܪܥܳܐ ܡܶܬܼܩܰܪܒܼܺܝܢ ܗ̱ܘܰܘ܂
27:28 [ai]	ܘܰܐܪܡܺܝܘ ܐܶܘܩܺܝܢܰܣ̈܃ ܘܶܐܫܟܿܰܚܘ ܩܰܘܡܺܝܢ̈ ܥܶܣܪܺܝܢ܂ ܘܬܼܽܘܒܼ ܩܰܠܺܝܠ ܪܕܼܰܘ܃ ܘܶܐܫܟܿܰܚܘ ܩܰܘܡܺܝܢ̈ ܚܰܡܫܰܥܶܣܪ̈ܶܐ܂
27:29 [ai]	ܘܟܼܰܕܼ ܕܰܚܺܝܠܺܝܢ ܗ̱ܘܰܝܢ ܕܰܠܡܳܐ ܢܶܫܬܿܟܼܰܚ ܠܰܢ ܒܕܽܘܟܿܝܳܬܼܳܐ̈ ܕܺܐܝܬܼ ܒܗܶܝܢ ܫܽܘܥܶܐ̈܃ ܐܰܪܡܺܝܘ ܡܶܢ ܚܰܪܬܼܳܗ ܕܶܐܠܦܼܳܐ ܐܶܘܩܺܝܢܰܣ̈ ܐܰܪܒܿܰܥ܂ ܘܰܡܨܰܠܶܝܢ ܗ̱ܘܰܘ ܕܢܶܗܘܶܐ ܝܰܘܡܳܐ܂
27:30 [ai]	ܡܰܠܳܚܶܐ̈ ܕܶܝܢ ܒܥܰܘ ܠܡܶܥܪܰܩ ܡܶܢܳܗ ܡܶܢ ܐܶܠܦܼܳܐ܂ ܘܰܐܚܶܬܼܘ ܡܶܢܳܗ ܠܩܰܪܩܽܘܪܳܐ ܠܝܰܡܳܐ܃ ܒܥܶܠܬܼܳܐ ܕܢܺܐܙܽܠ̱ܘܢ ܒܿܳܗ ܘܢܶܐܣܪܽܘܢܳܗ ܠܶܐܠܦܼܳܐ ܒܰܐܪܥܳܐ܂
27:31 [ai]	ܘܟܼܰܕܼ ܚܙܳܐ ܦܿܰܘܠܳܘܣ܃ ܐܶܡܰܪ ܠܩܶܢܛܪܽܘܢܳܐ ܘܠܶܐܣܛܪ̈ܰܛܺܝܳܘܛܶܐ܂ ܕܶܐܢ ܗܳܠܶܝܢ ܒܶܐܠܦܼܳܐ ܠܳܐ ܡܟܼܰܬܿܪܺܝܢ܃ ܐܰܢ̱ܬܿܽܘܢ ܠܳܐ ܡܶܫܟܿܚܺܝܢ ܐܢ̱ܬܿܽܘܢ ܕܬܺܚܽܘܢ܂
27:32 [ai]	ܗܳܝܕܶܝܢ ܦܣܰܩܘ ܐܶܣܛܪ̈ܰܛܺܝܳܘܛܶܐ ܠܚܰܒܼܠܶܝܗ̈ ܕܩܰܪܩܽܘܪܳܐ ܡܶܢ ܐܶܠܦܼܳܐ ܘܫܰܒܼܩܽܘܗ ܛܳܥܝܳܐ ܿ܀ܿ܀ܿ
27:33 [ai]	ܗܽܘ ܕܶܝܢ ܦܿܰܘܠܳܘܣ ܥܕܼܰܡܳܐ ܕܰܗܘܳܐ ܨܰܦܼܪܳܐ܃ ܡܦܿܺܝܣ ܗ̱ܘܳܐ ܠܟܼܽܠܗܽܘܢ ܕܰܢܩܰܒܿܠܽܘܢ ܣܰܝܒܿܳܪܬܳܐ܂ ܟܰܕܼ ܐܳܡܰܪ ܠܗܽܘܢ܂ ܝܰܘܡܳܢܳܐ ܗܳܐ ܐܰܪܒܿܬܼܰܥܣܰܪ ܝܰܘܡܺܝܢ̈܃ ܡܶܢ ܩܶܢܛܳܐ ܡܶܕܶܡ ܠܳܐ ܛܥܺܝܡ ܠܟܼܽܘܢ܂
27:34 [ai]	ܡܶܛܽܠ ܗܳܕܼܶܐ ܒܿܳܥܶܐ ܐ̱ܢܳܐ ܡܶܢܟܼܽܘܢ܃ ܕܰܬܼܩܰܒܿܠܽܘܢ ܡܶܐܟܼܽܘܠܬܳܐ ܠܩܽܘܝܳܡܳܐ ܕܚܰܝܰܝܟܿܽܘܢ̈܂ ܡܶܢܬܼܳܐ ܓܶܝܪ ܡܶܢ ܪܺܫܳܐ ܕܚܰܕܼ ܡܶܢܟܼܽܘܢ ܠܳܐ ܐܳܒܼܕܿܳܐ܂
27:35 [ai]	ܘܟܼܰܕܼ ܗܳܠܶܝܢ ܐܶܡܰܪ܃ ܢܣܰܒܼ ܠܰܚܡܳܐ ܘܫܰܒܿܰܚ ܠܰܐܠܳܗܳܐ ܩܕܼܳܡ ܟܽܠܗܽܘܢ܃ ܘܰܩܨܳܐ ܘܰܐܩܶܦܼ ܠܡܶܐܟܼܰܠ܂
27:36 [ai]	ܘܶܐܬܼܒܰܝܰܐܘ ܟܽܠܗܽܘܢ ܘܩܰܒܿܶܠܘ ܬܽܘܪܣܳܝܳܐ܂
27:37 [ai]	ܐܺܝܬܼܰܝܢ ܗ̱ܘܰܝܢ ܕܶܝܢ ܒܶܐܠܦܼܳܐ܃ ܡܰܐܬܼܶܝܢ ܘܫܰܒܼܥܺܝܢ ܘܫܶܬܼ ܢܰܦܼܫܳܢ̈܂
27:38 [ai]	ܘܟܼܰܕܼ ܣܒܼܰܥܘ ܡܶܐܟܼܽܘܠܬܳܐ܃ ܐܰܩܶܠܘ ܡܶܢ ܐܶܠܦܼܳܐ܃ ܘܰܫܩܰܠܘ ܚܶܛܶܐ̈ ܘܰܫܕܼܰܘ ܒܝܰܡܳܐ܂
27:39 [ai]	ܘܟܼܰܕܼ ܗܘܳܐ ܝܰܘܡܳܐ܃ ܣܰܦܿܳܢܶܐ̈ ܐܰܝܕܼܳܐ ܗ̱ܝ ܐܰܪܥܳܐ܂ ܠܳܐ ܐܶܫܬܰܘܕܰܥܘ܂ ܐܶܠܳܐ ܚܳܪܘ ܥܰܠ ܓܶܢ̱ܒܼ ܝܰܒܼܫܳܐ ܟܶܢܦܼܳܐ ܚܕܼܳܐ ܕܝܰܡܳܐ܃ ܐܰܝܟܿܳܐ ܕܪܳܢܶܝܢ ܗ̱ܘܰܘ ܕܶܐܢ ܡܶܫܟܿܚܳܐ܂ ܢܶܕܼܚܽܘܢܳܗ ܠܶܐܠܦܼܳܐ܂
27:40 [ai]	ܘܰܦܼܣܰܩܘ ܐܶܘܩܺܝܢܰܣ̈ ܡܶܢ ܐܶܠܦܼܳܐ܃ ܘܰܐܪܦܿܺܝܘ ܐܶܢܶܝܢ̈ ܒܝܰܡܳܐ܂ ܘܰܫܪܰܘ ܪ̈ܳܟܼܒܿܶܐ ܕܣܰܘܟܿܳܢܶܐ̈܃ ܘܰܬܼܠܰܘ ܐܰܪܡܶܢܳܘܢ ܙܥܽܘܪܳܐ ܠܪܽܘܚܳܐ ܕܢܳܫܒܿܳܐ܂ ܘܪܳܕܼܶܝܢ ܗ̱ܘܰܘ ܠܰܐܦܿܰܝ̈ ܝܰܒܼܫܳܐ܂
27:41 [ai]	ܘܓܼܶܫܰܬܼ ܐܶܠܦܼܳܐ ܒܕܽܘܟܿܬܼܳܐ ܕܪܳܡܳܐ܃ ܒܰܝܢܳܬܼ ܬܿܪ̈ܶܝܢ ܥܽܘܡܩܺܝܢ̈ ܕܝܰܡܳܐ܂ ܘܶܐܬܼܚܰܪܝܰܬܼ ܒܿܳܗ܂ ܘܩܳܡ ܥܠܶܝܗ ܓܰܒܿܳܗ ܩܰܕܼܡܳܝܳܐ܃ ܘܠܳܐ ܡܶܬܿܬܿܙܺܝܥ ܗ̱ܘܳܐ܂ ܓܰܒܿܳܗ ܕܶܝܢ ܐ̱ܚܪܳܝܳܐ ܐܶܫܬܿܪܺܝ ܡܶܢ ܩܛܺܝܪܳܐ ܕܓܰܠ̱ܠܶܐ̈܂
27:42 [ai]	ܘܰܨܒܼܰܘ ܗ̱ܘܰܘ ܐܶܣܛܪ̈ܰܛܺܝܳܘܛܶܐ܃ ܕܰܢܩܰܛܠܽܘܢ ܐܶܢܽܘܢ ܠܰܐܣܺܝܪ̈ܶܐ܃ ܕܠܳܐ ܢܰܪܡܽܘܢ ܣܰܚܘܳܐ ܘܢܶܥܪܩܽܘܢ ܠܗܽܘܢ ܡܶܢܗܽܘܢ܂
27:43 [ai]	ܘܩܶܢܛܪܽܘܢܳܐ ܟܠܳܐ ܐܶܢܽܘܢ ܡܶܢ ܗܳܕܼܶܐ܃ ܡܶܛܽܠ ܕܨܳܒܼܶܐ ܗ̱ܘܳܐ ܕܢܰܚܶܐ ܠܦܿܰܘܠܳܘܣ܂ ܘܠܰܐܝܠܶܝܢ ܕܡܶܫܟܿܚܺܝܢ ܗ̱ܘܰܘ ܠܡܰܪܡܳܝܽܘ ܣܰܚܘܳܐ܃ ܦܩܰܕܼ ܠܗܽܘܢ ܕܰܒܼܩܰܕܼܡܳܝ̈ܶܐ ܢܶܣܚܽܘܢ ܘܢܶܥܒܿܪܽܘܢ ܠܰܐܪܥܳܐ܂
27:44 [ai]	ܘܰܠܫܰܪܟܿܳܐ ܥܰܠ ܕܰܦܿܶܐ̈ ܘܥܰܠ ܩܰܝܣܶܐ̈ ܐ̱ܚܪ̈ܳܢܶܐ ܕܶܐܠܦܼܳܐ܂ ܐܰܥܒܰܪܘ ܐܶܢܽܘܢ܂ ܘܗܳܟܼܰܢܳܐ ܟܽܠܗܽܘܢ ܐܶܫܬܰܘܙܰܒܼܘ ܠܰܐܪܥܳܐ܀

next chapter