← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62045: Rom

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:01 [ai]ܦܿܰܘܠܳܘܣ ܥܰܒܼܕܿܳܐ ܕܝܶܫܽܘܥ ܡܫܺܝܚܳܐ܂ ܩܰܪܝܳܐ܂ ܘܰܫܠܺܝܚܳܐ܂ ܕܶܐܬܼܦܿܪܶܫ ܠܶܐܘܰܢܓܿܶܠܺܝܳܘܢ ܕܰܐܠܳܗܳܐ܂
01:02 [ai]ܕܡܶܢ ܩܕܼܺܝܡ ܡܠܰܟܼ ܒܝܰܕܼ ܢܒܼܺܝܰܘܗ̱ܝ̈܂ ܒܰܟܼܬܼܳܒܼܶܐ̈ ܩܰܕܿܺܝܫܶܐ̈܂
01:03 [ai]ܥܰܠ ܒܪܶܗ܂ ܗܰܘ ܕܶܐܬܼܺܝܠܶܕܼ ܒܰܒܼܣܰܪ ܡܶܢ ܙܰܪܥܳܐ ܕܒܶܝܬܼ ܕܿܰܘܺܝܕܼ܃
01:04 [ai]ܘܶܐܬܼܺܝܕܼܰܥ ܒܪܳܐ ܕܰܐܠܳܗܳܐ܃ ܒܚܺܝܠ ܘܰܒܪܽܘܚ ܩܕܼܽܘܫ܂ ܕܩܳܡ ܡܶܢ ܒܶܝܬܼ ܡܺܝܬܼܶܐ̈܂ ܝܶܫܽܘܥ ܡܫܺܝܚܳܐ܂ ܡܳܪܰܢ܂
01:05 [ai]ܕܒܶܗ ܢܣܰܒܼܢ ܛܰܝܒܿܽܘܬܼܳܐ ܘܰܫܠܺܝܚܽܘܬܼܳܐ܂ ܒܟܽܠܗܽܘܢ ܥܰܡ̱ܡܶܐ̈܃ ܐܰܝܟܼ ܕܢܶܫܬܿܰܡܥܽܘܢ ܠܗܰܝܡܳܢܽܘܬܼܳܐ ܕܰܫܡܶܗ܂
01:06 [ai]ܕܳܐܦܼ ܐܰܢ̱ܬܿܽܘܢ ܡܶܢܗܽܘܢ ܐܰܢ̱ܬܿܽܘܢ܃ ܩܪ̈ܰܝܳܐ ܒܝܶܫܽܘܥ ܡܫܺܝܚܳܐ܂
01:07 [ai]ܠܟܼܽܠܗܽܘܢ ܕܰܒܼܪܽܗ̱ܘܡܺܝ܃ ܚܰܒܺܝܒܼܰܘܗ̱ܝ̈ ܕܰܐܠܳܗܳܐ܂ ܩܪ̈ܰܝܳܐ܂ ܘܩܰܕܿܺܝܫܶܐ̈܂ ܫܠܳܡܳܐ ܘܛܰܝܒܿܽܘܬܼܳܐ ܥܰܡܟܼܽܘܢ܂ ܡܶܢ ܐܰܠܳܗܳܐ ܐܰܒܼܽܘܢ܃ ܘܡܶܢ ܡܳܪܰܢ ܝܶܫܽܘܥ ܡܫܺܝܚܳܐ܀
01:08 [ai]ܠܽܘܩܕܼܰܡ ܡܰܘܕܿܶܐ ܐ̱ܢܳܐ ܠܰܐܠܳܗܝ܂ ܒܝܶܫܽܘܥ ܡܫܺܝܚܳܐ܂ ܥܰܠ ܟܽܠܟܼܽܘܢ܃ ܕܗܰܝܡܳܢܽܘܬܼܟܼܽܘܢ ܐܶܫܬܿܰܡܥܰܬܼ ܒܟܽܠܶܗ ܥܳܠܡܳܐ܂
01:09 [ai]ܣܳܗܶܕܼ ܗ̱ܽܘ ܠܺܝ ܓܶܝܪ ܐܰܠܳܗܳܐ ܕܠܶܗ ܡܫܰܡܶܫ ܐ̱ܢܳܐ ܒܪܽܘܚ ܒܶܐܘܰܢܓܿܶܠܺܝܳܘܢ ܕܰܒܼܪܶܗ܃ ܕܰܕܼܠܳܐ ܫܰܠܘܳܐ ܒܟܽܠܙܒܼܰܢ ܡܶܬܿܕܿܟܼܰܪ ܐ̱ܢܳܐ ܠܟܼܽܘܢ ܒܰܨܠܰܘܳܬܼܝ̈܂
01:10 [ai]ܘܡܶܬܼܚܰܢܰܢ ܐ̱ܢܳܐ܂ ܕܶܐܢ ܡܶܢ ܟܰܕܿܽܘ ܬܿܶܬܼܦܬܼܰܚ ܠܺܝ ܐܽܘܪܚܳܐ ܒܨܶܒܼܝܳܢܶܗ ܕܰܐܠܳܗܳܐ܃ ܕܺܐܬܼܶܐ ܠܘܳܬܼܟܼܽܘܢ܂
01:11 [ai]ܡܶܛܽܠ ܕܛܳܒܼ ܣܘܶܐ ܐ̱ܢܳܐ ܕܶܐܚܙܶܟܼܽܘܢ܂ ܘܶܐܬܿܶܠ ܠܟܼܽܘܢ ܡܰܘܗܰܒܼܬܳܐ ܕܪܽܘܚ܂ ܕܒܳܗ ܬܶܫܬܿܰܪܪܽܘܢ܂
01:12 [ai]ܘܰܐܟܼܚܕܼܳܐ ܢܶܬܼܒܰܝܰܐ ܒܗܰܝܡܳܢܽܘܬܼܳܐ ܕܺܝܠܟܼܽܘܢ ܘܕܼܺܝܠܝ܀
01:13 [ai]ܨܳܒܼܶܐ ܐ̱ܢܳܐ ܕܶܝܢ ܐܰܚܰܝ̈ ܕܬܶܕܿܥܽܘܢ܃ ܕܙܰܒܼܢܺܝܢ̈ ܣܰܓܿܺܝܳܐܢ̈ ܨܒܼܺܝܬܼ ܕܺܐܬܼܶܐ ܠܘܳܬܼܟܼܽܘܢ܃ ܘܶܐܬܼܟܠܺܝܬܼ ܥܕܼܰܡܳܐ ܠܗܳܫܳܐ܂ ܕܳܐܦܼ ܒܟܽܘܢ ܢܶܗܘܶܐ ܠܺܝ ܐܳܕܼܫܳܐ܂ ܐܰܝܟܼ ܕܰܒܼܫܰܪܟܿܳܐ ܕܥܰܡ̱ܡܶܐ̈܂
01:14 [ai]ܝܰܘܢܳܝܶܐ̈ ܘܒܼܰܪ̈ܒܿܪܳܝܶܐ܂ ܚܰܟܿܺܝܡܶܐ̈ ܘܣܰܟܼܠܶܐ̈܂ ܕܰܠܟܼܽܠܢܳܫ ܚܰܝܳܒܼ ܐ̱ܢܳܐ ܕܰܐܟܼܪܶܙ܂
01:15 [ai]ܘܗܳܟܼܰܢܳܐ ܡܶܬܼܚܰܦܿܰܛ ܐ̱ܢܳܐ܃ ܕܳܐܦܼ ܠܟܼܽܘܢ ܕܰܒܼܪܽܗ̱ܘܡܺܝ ܐܶܣܰܒܰܪ܂
01:16 [ai]ܠܳܐ ܓܶܝܪ ܒܳܗܶܬܼ ܐ̱ܢܳܐ ܒܶܗ ܒܶܐܘܰܢܓܿܶܠܺܝܳܘܢ܂ ܡܶܛܽܠ ܕܚܰܝܠܳܐ ܗ̱ܘ ܕܰܐܠܳܗܳܐ܃ ܠܚܰܝ̈ܶܐ ܕܟܽܠ ܕܰܡܗܰܝܡܢܺܝܢ ܒܶܗ܃ ܐܶܢ ܡܶܢ ܺܝܗܽܘܕܼܳܝܶܐ̈ ܠܽܘܩܕܼܰܡ܂ ܘܶܐܢ ܡܶܢ ܐܰܪ̈ܡܳܝܶܐ܂
01:17 [ai]ܟܺܐܢܽܘܬܼܶܗ ܓܶܝܪ ܕܰܐܠܳܗܳܐ ܒܶܗ ܡܶܬܼܓܰܠܝܳܐ܃ ܡܶܢ ܗܰܝܡܳܢܽܘܬܼܳܐ ܠܗܰܝܡܳܢܽܘܬܼܳܐ܂ ܐܰܝܟܼ ܕܰܟܼܬܼܺܝܒܼ܃ ܕܟܺܐܢܳܐ ܡܶܢ ܗܰܝܡܳܢܽܘܬܼܳܐ ܢܺܚܶܐ܀
01:18 [ai]ܡܶܬܼܓܠܶܐ ܗ̱ܘ ܓܶܝܪ ܪܽܘܓܼܙܶܗ ܕܰܐܠܳܗܳܐ ܡܶܢ ܫܡܰܝܳܐ܃ ܥܰܠ ܟܽܠܶܗ ܥܰܘܠܗܽܘܢ ܘܪܽܘܫܥܗܽܘܢ ܕܿܰܒܼܢܰܝܢܳܫܳܐ܃ ܗܳܢܽܘܢ ܕܩܽܘܫܬܳܐ ܒܥܰܘܠܳܐ ܐܰܚܺܝܕܼܺܝܢ܂
01:19 [ai]ܡܶܛܽܠ ܕܺܝܕܼܺܝܥܽܘܬܼܶܗ ܕܰܐܠܳܗܳܐ ܓܰܠܝܳܐ ܗ̱ܝ ܒܗܽܘܢ܂ ܐܰܠܳܗܳܐ ܓܶܝܪ ܓܠܳܗ ܒܗܽܘܢ܂
01:20 [ai]ܟܰܣܝܳܬܼܶܗ̈ ܓܶܝܪ ܕܰܐܠܳܗܳܐ ܡܶܢ ܬܿܰܪ̈ܡܝܳܬܼܶܗ ܕܥܳܠܡܳܐ܃ ܠܒܼܶܪ̈ܝܳܬܼܶܗ ܒܣܽܘܟܿܳܠܳܐ ܡܶܬܼܚܰܙܝܳܢ̈܂ ܘܚܰܝܠܶܗ ܘܰܐܠܳܗܽܘܬܼܶܗ ܕܰܠܥܳܠܰܡ܂ ܕܢܶܗܘܽܘܢ ܕܠܳܐ ܡܰܦܿܰܩ ܒܪܽܘܚ܂
01:21 [ai]ܡܶܛܽܠ ܕܺܝܕܼܰܥܘ ܠܰܐܠܳܗܳܐ܃ ܘܠܳܐ ܐܰܝܟܼ ܕܠܰܐܠܳܗܳܐ ܫܰܒܿܚܽܘܗ̱ܝ܂ ܘܰܐܘܕܿܺܝܘ ܠܶܗ܂ ܐܶܠܳܐ ܐܶܣܬܿܰܪܰܩܘ ܒܡܰܚܫܒܼܳܬܼܗܽܘܢ̈܂ ܘܶܐܬܼܚܰܫܰܟܼ ܠܶܒܗܽܘܢ܂ ܕܠܳܐ ܡܶܣܬܿܰܟܿܰܠ܂
01:22 [ai]ܘܟܼܰܕܼ ܣܳܒܼܪܺܝܢ ܒܢܰܦܼܫܗܽܘܢ ܕܚܰܟܿܺܝܡܺܝܢ ܐܶܢܽܘܢ܃ ܫܛܰܘ ܠܗܽܘܢ܂
01:23 [ai]ܘܚܰܠܶܦܼܘ ܬܶܫܒܿܽܘܚܬܿܶܗ ܕܰܐܠܳܗܳܐ ܕܠܳܐ ܡܶܬܼܚܰܒܿܰܠ܃ ܒܰܕܼܡܽܘܬܼܳܐ ܕܨܰܠܡܳܐ ܕܒܰܪܢܳܫܳܐ ܘܒܼܰܕܼܡܽܘܬܼܳܐ ܕܦܳܪܰܚܬܼܳܐ܂ ܘܕܼܰܐܪ̈ܒܿܥܰܬܼ ܪ̈ܶܓܼܠܶܝܗ܂ ܘܰܕܼܪܰܚܫܳܐ ܕܰܐܪܥܳܐ܂
01:24 [ai]ܡܶܛܽܠ ܗܳܢܳܐ ܐܰܫܠܶܡ ܐܶܢܽܘܢ ܐܰܠܳܗܳܐ ܠܰܪ̈ܓܼܺܝܓܼܳܬܼܳܐ ܛܰܡܳܐܬܼܳܐ̈ ܕܿܠܶܒܗܽܘܢ܃ ܕܰܢܨܰܥܪܽܘܢ ܦܿܰܓܼܪ̈ܰܝܗܽܘܢ ܒܗܽܘܢ܂
01:25 [ai]ܘܚܰܠܶܦܼܘ ܫܪܳܪܶܗ ܕܰܐܠܳܗܳܐ ܒܟܰܕܿܳܒܼܽܘܬܼܳܐ܂ ܘܰܕܼܚܶܠܘ ܘܫܰܡܶܫܘ ܠܒܼܶܪ̈ܝܳܬܼܳܐ܂ ܛܳܒܼ ܡܶܢ ܕܰܠܒܼܳܪܽܘܝܗܶܝܢ܃ ܕܠܶܗ ܬܶܫܒܿܚܳܢ̈ ܘܒܼܽܘܪ̈ܟܿܳܢ܃ ܠܥܳܠܰܡ ܥܳܠܡܺܝܢ ܐܰܡܺܝܢ܀
01:26 [ai]ܡܶܛܽܠ ܗܳܢܳܐ ܐܰܫܠܶܡ ܐܶܢܽܘܢ ܐܰܠܳܗܳܐ ܠܟܼܺܐܒܼܶܐ̈ ܕܨܰܥܪܳܐ܂ ܢܶܩܒܼܳܬܼܗܽܘܢ̈ ܓܶܝܪ ܚܰܠܶܦܼ ܚܫܰܚܬܼܳܐ ܕܰܟܼܝܳܢܗܶܝܢ܂ ܘܰܒܡܶܕܶܡ ܕܠܳܐ ܡܟܼܳܢ ܐܶܬܼܚܰܫܰܚ܂
01:27 [ai]ܘܬܼܽܘܒܼ ܐܳܦܼ ܕܿܶܟܼܪ̈ܰܝܗܽܘܢ ܗܳܟܼܰܢܳܐ܃ ܫܒܼܰܩܘ ܚܫܰܚܬܼܳܐ ܕܰܟܼܝܳܢܳܐ ܕܢܶܩܒܼܳܬܼܳܐ̈܃ ܘܶܐܫܬܿܰܪܰܚܘ ܒܪܶܓܿܬܼܳܐ ܚܰܕܼ ܥܰܠ ܚܰܕܼ܂ ܘܕܼܶܟܼܪܳܐ ܥܰܠ ܕܶܟܼܪܳܐ ܒܶܗܬܿܬܼܳܐ ܥܒܼܰܕܼܘ܂ ܘܦܼܽܘܪܥܳܢܳܐ ܕܙܳܕܼܶܩ ܗ̱ܘܳܐ ܠܛܳܥܝܽܘܬܼܗܽܘܢ܂ ܒܰܩܢܽܘܡܗܽܘܢ ܩܰܒܿܠܽܘܗ̱ܝ܂
01:28 [ai]ܘܰܐܝܟܼ ܕܠܳܐ ܕܳܢܘ ܒܢܰܦܼܫܗܽܘܢ ܕܢܶܕܿܥܽܘܢ ܠܰܐܠܳܗܳܐ܃ ܐܰܫܠܶܡ ܐܶܢܽܘܢ ܐܰܠܳܗܳܐ ܠܡܰܕܿܥܳܐ ܕܰܣܪܺܝܩܽܘܬܼܳܐ܂ ܕܢܶܗܘܽܘܢ ܥܳܒܼܕܺܝܢ ܡܶܕܶܡ ܕܠܳܐ ܘܳܠܶܐ܂
01:29 [ai]ܟܰܕܼ ܡܠܶܝܢ ܟܽܠ ܥܰܘܳܠܽܘܬܼܳܐ܂ ܘܙܳܢܝܽܘܬܼܳܐ܂ ܘܡܰܪܺܝܪܽܘܬܼܳܐ܂ ܘܒܼܺܝܫܽܘܬܼܳܐ܂ ܘܥܳܠܽܘܒܼܽܘܬܼܳܐ܂ ܘܰܚܣܳܡܳܐ܂ ܘܩܶܛܠܳܐ܂ ܘܚܶܪܝܳܢܳܐ܂ ܘܢܶܟܼܠܳܐ܂ ܘܡܰܚܫܒܼܳܬܼܳܐ̈ ܒܺܝܫܳܬܼܳܐ̈܂
01:30 [ai]ܘܪܶܛܢܳܐ܂ ܘܡܶܐܟܼܰܠܩܰܪܨܳܐ܂ ܘܰܣܢܺܝܐܺܝܢ ܠܰܐܠܳܗܳܐ܂ ܡܨܰܥܪ̈ܳܢܶܐ܂ ܚܬܼܺܝܪ̈ܶܐ܂ ܫܰܒܼܗܪ̈ܳܢܶܐ܂ ܡܶܫܟܿܚܰܝ̈ ܒܺܝܫܳܬܼܳܐ̈܂ ܚܰܣܺܝܪ̈ܰܝ ܪܶܥܝܳܢܳܐ܂ ܕܠܰܐܒܼܳܗܰܝܗܽܘܢ̈ ܠܳܐ ܡܶܬܿܛܦܿܺܝܣܺܝܢ܂
01:31 [ai]ܘܕܼܰܩܝܳܡܳܐ ܠܰܝܬܿ ܠܗܽܘܢ܂ ܘܠܳܐ ܚܽܘܒܿܳܐ܂ ܘܠܳܐ ܫܰܝܢܳܐ܂ ܘܠܳܐ ܪ̈ܰܚܡܶܐ܂ ܐܺܝܬܼ ܒܗܽܘܢ܂
01:32 [ai]ܐܰܝܠܶܝܢ ܕܟܰܕܼ ܝܳܕܼܥܺܝܢ ܕܺܝܢܶܗ ܕܰܐܠܳܗܳܐ܃ ܕܠܰܐܝܠܶܝܢ ܕܰܐܝܟܼ ܗܳܠܶܝܢ ܣܳܥܪܺܝܢ ܠܡܰܘܬܳܐ ܡܚܰܝܶܒܼ܃ ܠܳܐ ܗ̱ܘܳܐ ܒܰܠܚܽܘܕܼ ܥܳܒܼܕܺܝܢ ܠܗܶܝܢ܃ ܐܶܠܳܐ ܐܳܦܼ ܡܶܫܬܰܘܬܿܦܼܺܝܢ ܠܰܐܝܠܶܝܢ ܕܗܳܠܶܝܢ ܥܳܒܼܕܺܝܢ܀

next chapter