The Comprehensive Aramaic Lexicon

02:01 [ai]	ܡܶܛܽܠ ܗܳܢܳܐ ܠܰܝܬܿ ܠܳܟܼ ܡܰܦܿܰܩ ܒܪܽܘܚܳܐ܂ ܐܳܘ ܒܰܪܢܳܫܳܐ܂ ܕܳܐܶܢ ܚܰܒܼܪܶܗ܃ ܒܗܰܘ ܓܶܝܪ ܕܕܼܳܐܶܢ ܐܰܢ̱ܬܿ ܚܰܒܼܪܳܟܼ܃ ܢܰܦܼܫܳܟܼ ܗ̱ܽܘ ܡܚܰܝܶܒܼ ܐܰܢ̱ܬܿ܂ ܐܳܦܼ ܐܰܢ̱ܬܿ ܓܶܝܪ ܕܕܼܳܐܶܢ ܐܰܢ̱ܬܿ܃ ܒܗܶܝܢ ܗ̱ܽܘ ܡܶܬܼܗܰܦܿܰܟܼ ܐܰܢ̱ܬܿ܂
02:02 [ai]	ܘܝܳܕܼܥܺܝܢܰܢ ܕܺܐܝܬܼܰܘܗ̱ܝ ܕܺܝܢܶܗ ܕܰܐܠܳܗܳܐ ܒܩܽܘܫܬܳܐ܃ ܥܰܠ ܐܰܝܠܶܝܢ ܕܰܒܼܗܳܠܶܝܢ ܡܶܬܼܗܰܦܿܟܼܺܝܢ܂
02:03 [ai]	ܡܳܢܳܐ ܕܶܝܢ ܡܶܬܼܚܰܫܰܒܼ ܐܰܢ̱ܬܿ ܐܳܘ ܒܰܪܢܳܫܳܐ܃ ܕܕܼܳܐܶܢ ܐܰܢ̱ܬܿ ܠܰܐܝܠܶܝܢ ܕܰܒܼܗܳܠܶܝܢ ܡܶܬܼܗܰܦܿܟܼܺܝܢ܃ ܟܰܕܼ ܐܳܦܼ ܐܰܢ̱ܬܿ ܒܗܶܝܢ ܡܶܬܼܗܰܦܿܰܟܼ ܐܰܢ̱ܬܿ܃ ܕܰܐܢ̱ܬܿ ܬܶܥܪܽܘܩ ܡܶܢ ܕܺܝܢܶܗ ܕܰܐܠܳܗܳܐ܂
02:04 [ai]	ܐܰܘ ܥܰܠ ܥܽܘܬܼܪܳܐ ܕܒܰܣܺܝܡܽܘܬܼܶܗ܂ ܘܥܰܠ ܡܰܓܿܪܰܬܼ ܪܽܘܚܶܗ܃ ܘܥܰܠ ܐܰܬܼܪܳܐ ܕܝܰܗ̱ܒܼ ܠܳܟܼ܂ ܡܰܡܪܰܚ ܐܰܢ̱ܬܿ܃ ܘܠܳܐ ܝܳܕܼܰܥ ܐܰܢ̱ܬܿ܂ ܕܒܰܣܺܝܡܽܘܬܼܶܗ ܕܰܐܠܳܗܳܐ܂ ܠܰܬܼܝܳܒܼܽܘܬܼܳܐ ܗܽܘ ܡܰܝܬܿܝܳܐ ܠܳܟܼ܂
02:05 [ai]	ܐܶܠܳܐ ܡܶܛܽܠ ܩܰܫܝܽܘܬܼ ܠܶܒܳܟܼ ܕܠܳܐ ܬܳܐܶܒܼ܃ ܣܳܐܶܡ ܐܰܢ̱ܬܿ ܠܳܟܼ ܣܺܝܡܬܼܳܐ ܕܪܽܘܓܼܙܳܐ܂ ܠܝܰܘܡܳܐ ܕܪܽܘܓܼܙܳܐ܂ ܘܰܠܓܼܶܠܝܳܢܳܐ ܕܕܼܺܝܢܳܐ ܟܺܐܢܳܐ ܕܰܐܠܳܗܳܐ܃
02:06 [ai]	ܗܰܘ ܕܦܳܪܰܥ ܠܟܼܽܠܢܳܫ ܐܰܝܟܼ ܥܒܼܳܕܼܰܘܗ̱ܝ̈ ܿ܀ܿ܀ܿ
02:07 [ai]	ܠܰܐܝܠܶܝܢ ܕܒܰܡܣܰܝܒܿܪܳܢܽܘܬܼܳܐ ܕܰܥܒܼܳܕܼܶܐ̈ ܛܳܒܼܶܐ̈܃ ܬܿܶܫܒܿܽܘܚܬܳܐ ܘܺܐܝܩܳܪܳܐ ܘܠܳܐ ܡܶܬܼܚܰܒܿܠܳܢܽܘܬܼܳܐ ܒܿܳܥܶܝܢ܃ ܝܳܗܶܒܼ ܠܗܽܘܢ ܚܰܝ̈ܶܐ ܕܰܠܥܳܠܰܡ܂
02:08 [ai]	ܐܰܝܠܶܝܢ ܕܶܝܢ ܕܥܳܨܶܝܢ܂ ܘܠܳܐ ܡܶܬܿܛܦܿܺܝܣܺܝܢ ܠܰܫܪܳܪܳܐ܃ ܐܶܠܳܐ ܠܥܰܘܠܳܐ ܡܶܬܿܛܦܿܺܝܣܺܝܢ܃ ܢܶܦܼܪܽܘܥ ܐܶܢܽܘܢ ܪܽܘܓܼܙܳܐ ܘܚܶܡܬܼܳܐ
02:09 [ai]	ܘܽܐܘܠܨܳܢܳܐ ܘܛܽܘܪܳܦܼܳܐ܂ ܠܟܼܽܠ ܒܰܪܢܳܫ ܕܦܳܠܰܚ ܒܺܝܫܳܬܼܳܐ̈܂ ܠܺܝܗܽܘܕܼܳܝܶܐ̈ ܠܽܘܩܕܼܰܡ܂ ܘܠܰܐܪ̈ܡܳܝܶܐ܂
02:10 [ai]	ܬܿܶܫܒܿܽܘܚܬܳܐ ܕܶܝܢ܂ ܘܺܐܝܩܳܪܳܐ ܘܰܫܠܳܡܳܐ܃ ܠܟܼܽܠ ܕܦܳܠܰܚ ܛܳܒܼܳܬܼܳܐ̈܂ ܠܺܝܗܽܘܕܼܳܝܶܐ̈ ܠܽܘܩܕܼܰܡ܂ ܘܠܰܐܪ̈ܡܳܝܶܐ܂
02:11 [ai]	ܠܳܐ ܓܶܝܪ ܐܺܝܬܼ ܡܰܣܰܒܼ ܒܰܐܦܿܶܐ̈ ܠܘܳܬܼ ܐܰܠܳܗܳܐ܂
02:12 [ai]	ܐܰܝܠܶܝܢ ܓܶܝܪ ܕܰܕܼܠܳܐ ܢܳܡܽܘܣܳܐ ܚܛܰܘ܃ ܐܳܦܼ ܕܠܳܐ ܢܳܡܽܘܣܳܐ ܢܺܐܒܼܕܿܽܘܢ܂ ܘܰܐܝܠܶܝܢ ܕܰܒܼܢܳܡܽܘܣܳܐ ܚܛܰܘ܃ ܡܶܢ ܢܳܡܽܘܣܳܐ ܢܶܬܿܕܼܺܝܢܽܘܢ܂
02:13 [ai]	ܠܳܐ ܗ̱ܘܳܐ ܓܶܝܪ ܫܳܡܽܘܥܰܘܗ̱ܝ̈ ܕܢܳܡܽܘܣܳܐ ܟܺܐܢܺܝܢ ܩܕܼܳܡ ܐܰܠܳܗܳܐ܃ ܐܶܠܳܐ ܥܳܒܼܽܘܕܼܰܘܗ̱ܝ̈ ܕܢܳܡܽܘܣܳܐ ܡܶܙܕܿܰܕܿܩܺܝܢ܂
02:14 [ai]	ܐܶܢ ܓܶܝܪ ܥܰܡ̱ܡܶܐ̈ ܕܢܳܡܽܘܣܳܐ ܠܰܝܬܿ ܠܗܽܘܢ܃ ܡܶܢ ܟܝܳܢܗܽܘܢ ܢܶܥܒܿܕܼܽܘܢ ܕܢܳܡܽܘܣܳܐ܃ ܗܳܢܽܘܢ ܕܟܰܕܼ ܢܳܡܽܘܣܳܐ ܠܰܝܬܿ ܗ̱ܘܳܐ ܠܗܽܘܢ܃ ܠܢܰܦܼܫܗܽܘܢ ܗܘܰܘ ܢܳܡܽܘܣܳܐ܂
02:15 [ai]	ܘܗܶܢܽܘܢ ܡܚܰܘܶܝܢ ܥܒܼܳܕܼܶܗ ܕܢܳܡܽܘܣܳܐ܂ ܟܰܕܼ ܟܬܼܺܝܒܼ ܥܰܠ ܠܶܒܗܽܘܢ܂ ܘܡܰܣܗܕܼܳܐ ܥܠܰܝܗܽܘܢ ܬܺܐܪܬܿܗܽܘܢ܂ ܟܰܕܼ ܡܰܚܫܒܼܳܬܼܗܽܘܢ̈ ܡܟܼܰܘܢܳܢ̈܂ ܐܰܘ ܢܳܦܼܩܳܢ̈ ܪܽܘܚܳܐ܂ ܠܰܚܕܼܳܕܼܶܐ̈܃
02:16 [ai]	ܒܝܰܘܡܳܐ ܕܕܼܳܐܶܢ ܐܰܠܳܗܳܐ ܟܰܣܝܳܬܼܳܐ̈ ܕܿܰܒܼܢܰܝܢܳܫܳܐ܃ ܐܰܝܟܼ ܐܶܘܰܢܓܿܶܠܺܝܳܘܢ ܕܺܝܠܝ ܒܝܰܕܼ ܝܶܫܽܘܥ ܡܫܺܝܚܳܐ܂
02:17 [ai]	ܐܶܢ ܐܰܢ̱ܬܿ ܕܶܝܢ ܕܺܝܗܽܘܕܼܳܝܳܐ ܡܶܬܼܩܪܶܐ ܐܰܢ̱ܬܿ܃ ܘܡܶܬܿܬܿܢܺܝܚ ܐܰܢ̱ܬܿ ܥܰܠ ܢܳܡܽܘܣܳܐ܃ ܘܡܶܫܬܿܰܒܼܗܰܪ ܐܰܢ̱ܬܿ ܒܰܐܠܳܗܳܐ܂
02:18 [ai]	ܕܝܳܕܼܰܥ ܐܰܢ̱ܬܿ ܨܶܒܼܝܳܢܶܗ܃ ܘܦܼܳܪܶܫ ܐܰܢ̱ܬܿ ܘܳܠܝܳܬܼܳܐ̈܂ ܕܝܰܠܺܝܦܼ ܐܰܢ̱ܬܿ ܡܶܢ ܢܳܡܽܘܣܳܐ܃
02:19 [ai]	ܘܶܐܬܿܬܿܟܼܶܠܬܿ ܥܰܠ ܢܰܦܼܫܳܟܼ܂ ܕܰܡܕܼܰܒܿܪܳܢܳܐ ܐܰܢ̱ܬܿ ܕܰܥܘܺܝܪ̈ܶܐ܃ ܘܢܽܘܗܪܳܐ ܕܰܐܝܠܶܝܢ ܕܺܐܝܬܼܰܝܗܽܘܢ ܒܚܶܫܽܘܟܼܳܐ܃
02:20 [ai]	ܘܪܳܕܼܽܘܝܳܐ ܕܚܰܣܺܝܪ̈ܰܝ ܪܶܥܝܳܢܳܐ܃ ܘܡܰܠܦܼܳܢܳܐ ܕܰܛܠܳܝܶܐ̈܃ ܘܺܐܝܬܼ ܠܳܟܼ ܕܽܘܡܝܳܐ ܕܺܝܕܼܰܥܬܼܳܐ܂ ܘܕܼܰܫܪܳܪܳܐ ܒܢܳܡܽܘܣܳܐ܃
02:21 [ai]	ܐܰܢ̱ܬܿ ܗܳܟܼܺܝܠ ܕܡܰܠܶܦܼ ܐܰܢ̱ܬܿ ܠܰܐ̱ܚܪ̈ܳܢܶܐ܃ ܠܢܰܦܼܫܳܟܼ ܠܳܐ ܡܰܠܶܦܼ ܐܰܢ̱ܬܿ܂ ܘܰܕܼܡܰܟܼܪܶܙ ܐܰܢ̱ܬܿ ܕܠܳܐ ܢܶܓܼܢܒܼܽܘܢ܃ ܐܰܢ̱ܬܿ ܓܳܢܶܒܼ ܐܰܢ̱ܬܿ܂
02:22 [ai]	ܘܕܼܳܐܡܰܪ ܐܰܢ̱ܬܿ ܕܠܳܐ ܢܓܼܽܘܪܽܘܢ܃ ܐܰܢ̱ܬܿ ܓܳܐܰܪ ܐܰܢ̱ܬܿ܂ ܘܰܐܢ̱ܬܿ ܕܫܳܐܶܛ ܐܰܢ̱ܬܿ ܦܿܬܼܰܟܼܪ̈ܶܐ܃ ܡܚܰܠܶܨ ܐܰܢ̱ܬܿ ܒܶܝܬܼ ܡܰܩܕܿܫܳܐ܂
02:23 [ai]	ܘܰܐܢ̱ܬܿ ܕܡܶܫܬܿܰܒܼܗܰܪ ܐܰܢ̱ܬܿ ܒܢܳܡܽܘܣܳܐ܃ ܒܗܰܘ ܕܥܳܒܼܰܪ ܐܰܢ̱ܬܿ ܥܰܠ ܢܳܡܽܘܣܳܐ܂ ܠܰܐܠܳܗܳܐ ܗ̱ܘ ܡܨܰܥܰܪ ܐܰܢ̱ܬܿ܂
02:24 [ai]	ܫܡܶܗ ܓܶܝܪ ܕܰܐܠܳܗܳܐ܃ ܡܶܛܽܠܳܬܼܟܼܽܘܢ ܗ̱ܽܘ ܡܶܬܼܓܿܰܕܿܰܦܼ ܒܶܝܬܼ ܥܰܡ̱ܡܶܐ̈܂ ܐܰܝܟܼ ܕܰܟܼܬܼܺܝܒܼ܂
02:25 [ai]	ܓܙܽܘܪܬܳܐ ܓܶܝܪ ܡܰܗܢܝܳܐ܃ ܐܶܢ ܢܳܡܽܘܣܳܐ ܬܶܓܼܡܽܘܪ܂ ܐܶܢ ܬܿܶܥܒܰܪ ܠܳܟܼ ܕܶܝܢ ܡܶܢ ܢܳܡܽܘܣܳܐ܃ ܓܙܽܘܪܬܿܳܟܼ ܗܘܳܬܼ ܠܳܗ ܥܽܘܪܠܽܘܬܼܳܐ܂
02:26 [ai]	ܐܶܢ ܗ̱ܽܘ ܕܶܝܢ ܕܥܽܘܪܠܽܘܬܼܳܐ ܬܶܛܰܪ ܦܽܘܩܕܳܢܶܗ ܕܢܳܡܽܘܣܳܐ܃ ܠܳܐ ܗܳܐ ܡܶܬܼܚܰܫܒܿܳܐ ܠܳܗ ܓܙܽܘܪܬܳܐ܂
02:27 [ai]	ܘܰܬܿܕܼܽܘܢ ܥܽܘܪܠܽܘܬܼܳܐ ܕܡܶܢ ܟܝܳܢܳܗ ܓܳܡܪܳܐ ܢܳܡܽܘܣܳܐ܃ ܠܳܟܼ ܕܒܰܟܼܬܼܳܒܼܳܐ ܘܒܼܰܓܼܙܽܘܪܬܳܐ ܥܳܒܼܰܪ ܐܰܢ̱ܬܿ ܥܰܠ ܢܳܡܽܘܣܳܐ܂
02:28 [ai]	ܠܳܐ ܗ̱ܘܳܐ ܓܶܝܪ ܡܰܢ ܕܰܒܼܓܼܶܠܝܳܐ܂ ܗܰܘ ܗ̱ܽܘ ܺܝܗܽܘܕܼܳܝܳܐ܂ ܐܳܦܼܠܳܐ ܐܰܝܕܼܳܐ ܕܡܶܬܼܚܰܙܝܳܐ ܒܒܼܶܣܪܳܐ܂ ܓܙܽܘܪܬܳܐ܂
02:29 [ai]	ܐܶܠܳܐ ܗܰܘ ܗ̱ܽܘ ܺܝܗܽܘܕܼܳܝܳܐ܂ ܐܰܝܢܳܐ ܕܰܒܼܟܼܶܣܝܳܐ ܗܽܘ܂ ܘܰܓܼܙܽܘܪܬܳܐ ܐܰܝܕܼܳܐ ܕܰܕܼܠܶܒܿܳܐ ܗ̱ܝ܃ ܒܪܽܘܚ ܘܠܳܐ ܒܰܟܼܬܼܳܒܼܳܐ܃ ܐܰܝܕܼܳܐ ܕܬܶܫܒܿܽܘܚܬܿܳܗ ܠܳܐ ܗ̱ܘܳܬܼ ܡܶܢ ܒܢܰܝ ܐ̱ܢܳܫܳܐ܂ ܐܶܠܳܐ ܡܶܢ ܐܰܠܳܗܳܐ܂

next chapter