← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62045: Rom

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


04:01 [ai]ܡܳܢܳܐ ܗܳܟܼܺܝܠ ܐܳܡܪܺܝܢܰܢ ܥܰܠ ܐܰܒܼܪܳܗܳܡ܂ ܪܺܫܳܐ ܕܰܐܒܼܳܗܳܬܼܳܐ̈܂ ܕܶܐܫܟܿܰܚ܂ ܒܰܒܼܣܰܪ܂
04:02 [ai]ܐܶܠܽܘ ܓܶܝܪ ܐܰܒܼܪܳܗܳܡ ܡܶܢ ܥܒܼܳܕܼܶܐ̈ ܐܶܙܕܿܰܕܿܰܩ ܗ̱ܘܳܐ܃ ܐܺܝܬܼ ܗ̱ܘܳܐ ܠܶܗ ܫܽܘܒܼܗܳܪܳܐ܂ ܐܶܠܳܐ ܠܳܐ ܠܘܳܬܼ ܐܰܠܳܗܳܐ܂
04:03 [ai]ܡܳܢܳܐ ܓܶܝܪ ܐܶܡܰܪ ܟܬܼܳܒܼܳܐ܂ ܕܗܰܝܡܶܢ ܐܰܒܼܪܳܗܳܡ ܠܰܐܠܳܗܳܐ܃ ܘܶܐܬܼܚܰܫܒܿܰܬܼ ܠܶܗ ܠܙܰܕܿܺܝܩܽܘ܂
04:04 [ai]ܠܡܰܢ ܕܦܳܠܰܚ ܕܶܝܢ܃ ܠܳܐ ܡܶܬܼܚܫܶܒܼ ܠܶܗ ܐܰܓܼܪܶܗ ܐܰܝܟܼ ܕܰܒܼܛܰܝܒܿܽܘ܂ ܐܶܠܳܐ ܐܰܝܟܼ ܡܰܢ ܕܡܶܬܿܬܿܚܺܝܒܼ ܠܶܗ܂
04:05 [ai]ܠܗܰܘ ܕܶܝܢ ܕܠܳܐ ܦܠܰܚ܃ ܐܶܠܳܐ ܗܰܝܡܶܢ ܒܰܠܚܽܘܕܼ ܒܡܰܢ ܕܰܡܙܰܕܿܶܩ ܠܚܰܛܳܝܶܐ̈܃ ܡܶܬܼܚܰܫܒܿܳܐ ܠܶܗ ܗܰܝܡܳܢܽܘܬܼܶܗ ܠܟܼܺܐܢܽܘ܂
04:06 [ai]ܐܰܝܟܿܰܢܳܐ ܕܳܐܦܼ ܕܿܰܘܺܝܕܼ ܐܶܡܰܪ ܥܰܠ ܛܽܘܒܼܶܗ ܕܓܰܒܼܪܳܐ܃ ܐܰܝܢܳܐ ܕܰܐܠܳܗܳܐ ܚܳܫܶܒܼ ܠܶܗ ܙܰܕܿܺܝܩܽܘܬܼܳܐ ܕܠܳܐ ܥܒܼܳܕܼܶܐ̈܃ ܟܰܕܼ ܐܳܡܰܪ܃
04:07 [ai]ܕܛܽܘܒܼܰܝܗܽܘܢ ܠܰܐܝܠܶܝܢ ܕܶܐܫܬܿܒܼܶܩ ܠܗܽܘܢ ܥܰܘܠܗܽܘܢ܃ ܘܶܐܬܼܟܿܰܣܺܝܘ ܚܛܳܗܰܝܗܽܘܢ̈܂
04:08 [ai]ܘܛܽܘܒܼܰܘܗ̱ܝ ܠܓܼܰܒܼܪܳܐ ܕܠܳܐ ܢܶܚܫܽܘܒܼ ܠܶܗ ܐܰܠܳܗܳܐ ܚܛܺܝܬܼܶܗ܂
04:09 [ai]ܗܳܢܳܐ ܗܳܟܼܺܝܠ ܛܽܘܒܼܳܐ܃ ܥܰܠ ܓܙܽܘܪܬܳܐ ܗܽܘ܂ ܐܰܘ ܥܰܠ ܥܽܘܪܠܽܘܬܼܳܐ܂ ܐܳܡܪܺܝܢܰܢ ܕܶܐܬܼܚܰܫܒܿܰܬܼ ܠܰܐܒܼܪܳܗܳܡ ܗܰܝܡܳܢܽܘܬܼܶܗ ܠܟܼܺܐܢܽܘ܂
04:10 [ai]ܐܰܝܟܿܰܢܳܐ ܗܳܟܼܺܝܠ ܐܶܬܼܚܰܫܒܿܰܬܼ ܠܶܗ܃ ܒܰܓܼܙܽܘܪܬܳܐ܂ ܐܰܘ ܒܥܽܘܪܠܽܘܬܼܳܐ܂ ܠܳܐ ܗ̱ܘܳܐ ܒܰܓܼܙܽܘܪܬܳܐ܂ ܐܶܠܳܐ ܒܥܽܘܪܠܽܘܬܼܳܐ܂
04:11 [ai]ܐܳܬܼܳܐ ܗܽܘ ܓܶܝܪ ܫܰܩܠܳܗ܂ ܠܰܓܼܙܽܘܪܬܳܐ܃ ܘܚܳܬܼܡܳܐ ܕܟܺܐܢܽܘܬܼܳܐ ܕܗܰܝܡܳܢܽܘܬܼܶܗ ܕܰܒܼܥܽܘܪܠܽܘܬܼܳܐ܃ ܕܢܶܗܘܶܐ ܐܰܒܼܳܐ ܠܟܼܽܠܗܽܘܢ ܐܰܝܠܶܝܢ ܕܰܡܗܰܝܡܢܺܝܢ ܡܶܢ ܥܽܘܪܠܽܘܬܼܳܐ܂ ܕܬܶܬܼܚܫܶܒܼ ܐܳܦܼ ܠܗܽܘܢ ܠܟܼܺܐܢܽܘ܂
04:12 [ai]ܘܰܐܒܼܳܐ ܠܰܓܼܙܽܘܪܬܳܐ܂ ܠܳܐ ܗ̱ܘܳܐ ܠܰܐܝܠܶܝܢ ܕܡܶܢ ܓܙܽܘܪܬܳܐ ܐܶܢܽܘܢ ܒܰܠܚܽܘܕܼ܃ ܐܶܠܳܐ ܐܳܦܼ ܠܰܐܝܠܶܝܢ ܕܫܳܠܡܺܝܢ ܠܥܶܩܒܼܳܬܼܳܐ̈ ܕܗܰܝܡܳܢܽܘܬܼܳܐ ܕܥܽܘܪܠܽܘܬܼܳܐ ܕܰܐܒܼܽܘܢ ܐܰܒܼܪܳܗܳܡ܂
04:13 [ai]ܠܳܐ ܗ̱ܘܳܐ ܓܶܝܪ ܒܢܳܡܽܘܣܳܐ ܗܘܳܐ ܡܽܘܠܟܿܳܢܳܐ ܠܰܐܒܼܪܳܗܳܡ ܘܰܠܙܰܪܥܶܗ܂ ܕܢܶܗܘܶܐ ܝܳܪܬܳܐ ܠܥܳܠܡܳܐ܃ ܐܶܠܳܐ ܒܟܺܐܢܽܘܬܼܳܐ ܕܗܰܝܡܳܢܽܘܬܼܶܗ܂
04:14 [ai]ܐܶܠܽܘ ܓܶܝܪ ܗܳܠܶܝܢ ܕܡܶܢ ܢܳܡܽܘܣܳܐ܂ ܗܘܰܘ ܝܳܪ̈ܬܿܶܐ܃ ܣܪܺܝܩܳܐ ܗ̱ܘܳܬܼ ܗܰܝܡܳܢܽܘܬܼܳܐ܂ ܘܰܡܒܼܰܛܰܠ ܗ̱ܘܳܐ ܡܽܘܠܟܿܳܢܳܐ܂
04:15 [ai]ܢܳܡܽܘܣܳܐ ܓܶܝܪ ܡܰܥܒܿܕܼܳܢܳܐ ܗܽܘ ܕܪܽܘܓܼܙܳܐ܂ ܟܰܪ ܕܠܰܝܬܿ ܓܶܝܪ ܢܳܡܽܘܣܳܐ܃ ܐܳܦܼܠܳܐ ܥܒܼܳܪ ܢܳܡܽܘܣܳܐ܂
04:16 [ai]ܡܶܛܽܠ ܗܳܢܳܐ ܒܗܰܝܡܳܢܽܘܬܼܳܐ ܕܰܒܼܛܰܝܒܿܽܘܬܼܳܐ ܢܶܙܕܿܰܕܿܰܩ܃ ܘܢܶܗܘܶܐ ܫܰܪܺܝܪ ܡܽܘܠܟܿܳܢܳܐ ܠܟܼܽܠܶܗ ܙܰܪܥܶܗ܂ ܠܳܐ ܠܰܐܝܢܳܐ ܕܡܶܢ ܢܳܡܽܘܣܳܐ ܗܽܘ ܒܰܠܚܽܘܕܼ܃ ܐܶܠܳܐ ܐܳܦܼ ܠܰܐܝܢܳܐ ܕܡܶܢ ܗܰܝܡܳܢܽܘܬܼܳܐ ܗܽܘ ܕܰܐܒܼܪܳܗܳܡ܃ ܕܺܐܝܬܼܰܘܗ̱ܝ ܐܰܒܼܳܐ ܕܟܽܠܰܢ܂
04:17 [ai]ܐܰܝܟܿܰܢܳܐ ܕܰܟܼܬܼܺܝܒܼ܂ ܕܣܳܡܬܿܳܟܼ ܐܰܒܼܳܐ ܠܣܽܘܓܼܳܐܐ ܕܥܰܡ̱ܡܶܐ̈܃ ܩܕܼܳܡ ܐܰܠܳܗܳܐ܂ ܗܰܘ ܕܗܰܝܡܶܢܬܿ ܒܶܗ܂ ܕܡܰܚܶܐ ܡܺܝܬܼܶܐ̈܃ ܘܩܳܪܶܐ ܠܰܐܝܠܶܝܢ ܕܠܳܐ ܐܺܝܬܼܰܝܗܽܘܢ܂ ܐܰܝܟܼ ܐܺܝܬܼܰܝܗܽܘܢ܂
04:18 [ai]ܘܰܕܼܠܳܐ ܣܰܒܼܪܳܐ܂ ܠܣܰܒܼܪܳܐ ܗܰܝܡܶܢ܂ ܕܢܶܗܘܶܐ ܐܰܒܼܳܐ ܠܣܽܘܓܼܳܐܐ ܕܥܰܡ̱ܡܶܐ̈܃ ܐܰܝܟܼ ܕܰܟܼܬܼܺܝܒܼ܃ ܕܗܳܟܼܰܢܳܐ ܢܶܗܘܶܐ ܙܰܪܥܳܟܼ܂
04:19 [ai]ܘܠܳܐ ܐܶܬܼܟܿܪܰܗ ܒܗܰܝܡܳܢܽܘܬܼܶܗ܂ ܟܰܕܼ ܡܶܬܼܒܿܰܩܶܐ ܒܦܰܓܼܪܶܗ ܡܺܝܬܼܳܐ܂ ܕܰܗܘܳܐ ܒܰܪ ܡܳܐܐ ܫܢܺܝܢ̈܃ ܘܰܒܡܰܪܒܥܳܐ ܡܺܝܬܼܳܐ ܕܣܰܪܳܐ܂
04:20 [ai]ܘܰܒܡܽܘܠܟܿܳܢܳܐ ܕܰܐܠܳܗܳܐ ܠܳܐ ܐܶܬܼܦܿܰܠܰܓܼ܂ ܐܰܝܟܼ ܚܣܺܝܪ ܗܰܝܡܳܢܽܘܬܼܳܐ܂ ܐܶܠܳܐ ܐܶܬܼܚܰܝܰܠ ܒܗܰܝܡܳܢܽܘܬܼܳܐ܂ ܘܝܰܗ̱ܒܼ ܬܿܶܫܒܿܽܘܚܬܳܐ ܠܰܐܠܳܗܳܐ܂
04:21 [ai]ܘܰܐܫܰܪ܂ ܕܿܡܶܕܶܡ ܕܰܡܠܰܟܼ ܠܶܗ ܐܰܠܳܗܳܐ܃ ܡܶܫܟܿܰܚ ܠܡܶܓܼܡܰܪ܂
04:22 [ai]ܡܶܛܽܠ ܗܳܢܳܐ ܐܶܬܼܚܰܫܒܿܰܬܼ ܠܶܗ ܠܟܼܺܐܢܽܘ܂
04:23 [ai]ܘܠܳܐ ܗ̱ܘܳܐ ܡܶܛܽܠܳܬܼܶܗ ܒܰܠܚܽܘܕܼ ܐܶܬܼܟܿܰܬܼܒܿܰܬܼ ܗܳܕܼܶܐ܃ ܕܶܐܬܼܚܰܫܒܿܰܬܼ ܗܰܝܡܳܢܽܘܬܼܶܗ ܠܟܼܺܐܢܽܘ܃
04:24 [ai]ܐܶܠܳܐ ܐܳܦܼ ܡܶܛܽܠܳܬܼܰܢ܂ ܕܳܐܦܼܠܰܢ ܥܬܼܺܝܕܼ ܗ̱ܽܘ ܕܢܶܚܫܽܘܒܼ܂ ܐܰܝܠܶܝܢ ܕܗܰܝܡܶܢܢ ܒܡܰܢ ܕܰܐܩܺܝܡ ܠܡܳܪܰܢ ܝܶܫܽܘܥ ܡܫܺܝܚܳܐ ܡܶܢ ܒܶܝܬܼ ܡܺܝܬܼܶܐ̈܂
04:25 [ai]ܕܗܽܘ ܐܶܫܬܿܠܶܡ ܡܶܛܽܠ ܚܛܳܗܰܝܢ̈܃ ܘܩܳܡ ܡܶܛܽܠ ܕܰܢܙܰܕܿܩܰܢ܀

next chapter