← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62045: Rom

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


06:01 [ai]ܡܳܢܳܐ ܗܳܟܼܺܝܠ ܢܺܐܡܰܪ܂ ܢܩܰܘܶܐ܃ ܒܿܳܗ ܒܰܚܛܺܝܬܼܳܐ ܕܛܰܝܒܿܽܘܬܼܳܐ ܬܶܬܼܝܰܬܿܰܪ܂
06:02 [ai]ܚܳܣ܂ ܐܰܝܠܶܝܢ ܓܶܝܪ ܕܡܺܝܬܼܢ ܠܰܚܛܺܝܬܼܳܐ܃ ܐܰܝܟܿܰܢܳܐ ܢܺܚܶܐ ܒܿܳܗ ܬܽܘܒܼ܂
06:03 [ai]ܐܰܘ ܠܳܐ ܝܳܕܼܥܺܝܢ ܐܢ̱ܬܿܽܘܢ܂ ܕܰܐܝܠܶܝܢ ܕܰܥܡܰܕܼܢ ܒܝܶܫܽܘܥ ܡܫܺܝܚܳܐ܃ ܒܡܰܘܬܿܶܗ ܗ̱ܽܘ ܥܡܰܕܼܢ܂
06:04 [ai]ܐܶܬܼܩܒܼܰܪܢ ܥܰܡܶܗ ܒܡܰܥܡܽܘܕܼܺܝܬܼܳܐ ܠܡܰܘܬܳܐ܂ ܕܰܐܝܟܿܰܢܳܐ ܕܩܳܡ ܝܶܫܽܘܥ ܡܫܺܝܚܳܐ ܡܶܢ ܒܶܝܬܼ ܡܺܝܬܼܶܐ̈ ܒܬܶܫܒܿܽܘܚܬܳܐ ܕܰܐܒܼܽܘܗ̱ܝ܃ ܗܳܟܼܰܢܳܐ ܐܳܦܼ ܚܢܰܢ ܒܚܰܝ̈ܶܐ ܚܰܕܼ̱ܬܼܶܐ̈ ܢܗܰܠܶܟܼ܂
06:05 [ai]ܐܶܢ ܓܶܝܪ ܐܰܟܼܚܰܕܼ ܐܶܬܼܢܨܶܒܼܢ ܥܰܡܶܗ ܒܰܕܼܡܽܘܬܼܳܐ ܕܡܰܘܬܿܶܗ܃ ܗܳܟܼܰܢܳܐ ܐܳܦܼ ܒܰܩܝܳܡܬܿܶܗ ܢܶܗܘܶܐ܂
06:06 [ai]ܝܳܕܼܥܺܝܢܰܢ ܓܶܝܪ ܕܒܰܪܢܳܫܰܢ ܥܰܬܿܺܝܩܳܐ ܐܶܙܕܿܩܶܦܼ ܥܰܡܶܗ܂ ܕܢܶܬܼܒܿܰܛܰܠ ܦܰܓܼܪܳܐ ܕܰܚܛܺܝܬܼܳܐ܂ ܕܬܽܘܒܼ ܠܳܐ ܢܫܰܡܶܫ ܠܰܚܛܺܝܬܼܳܐ܂
06:07 [ai]ܐܰܝܢܳܐ ܕܡܺܝܬܼ ܓܶܝܪ܂ ܐܶܬܼܚܰܪܰܪ ܠܶܗ ܡܶܢ ܚܛܺܝܬܼܳܐ܂
06:08 [ai]ܐܶܢ ܗܳܟܼܺܝܠ ܡܺܝܬܼܢ ܥܰܡ ܡܫܺܝܚܳܐ܃ ܢܗܰܝܡܶܢ ܕܥܰܡܶܗ ܥܰܡ ܡܫܺܝܚܳܐ ܢܺܚܶܐ܂
06:09 [ai]ܝܳܕܼܥܺܝܢܰܢ ܓܶܝܪ ܕܰܡܫܺܝܚܳܐ ܩܳܡ ܡܶܢ ܒܶܝܬܼ ܡܺܝܬܼܶܐ̈܂ ܘܬܼܽܘܒܼ ܠܳܐ ܡܳܐܶܬܼ܂ ܘܡܰܘܬܳܐ ܠܳܐ ܡܶܫܬܿܰܠܰܛ ܒܶܗ܂
06:10 [ai]ܕܡܺܝܬܼ ܓܶܝܪ܂ ܠܰܚܛܺܝܬܼܳܐ ܗܽܘ ܡܺܝܬܼ܂ ܚܕܼܳܐ ܙܒܼܰܢ܃ ܘܰܕܼܚܰܝ܂ ܚܰܝ ܗ̱ܽܘ ܠܰܐܠܳܗܳܐ܂
06:11 [ai]ܗܳܟܼܰܢܳܐ ܐܳܦܼ ܐܰܢ̱ܬܿܽܘܢ܃ ܚܫܽܘܒܼܘ ܢܰܦܼܫܟܼܽܘܢ ܕܡܺܝܬܼܶܐ̈ ܐܢ̱ܬܿܽܘܢ ܠܰܚܛܺܝܬܼܳܐ܃ ܘܚܰܝ̈ܶܐ ܐܢ̱ܬܿܽܘܢ ܠܰܐܠܳܗܳܐ܃ ܒܡܳܪܰܢ ܝܶܫܽܘܥ ܡܫܺܝܚܳܐ܀
06:12 [ai]ܠܳܐ ܗܳܟܼܺܝܠ ܬܰܡܠܶܟܼ ܚܛܺܝܬܼܳܐ ܒܦܰܓܼܪܟܼܽܘܢ ܡܺܝܬܼܳܐ܃ ܐܰܝܟܼ ܕܬܶܫܬܿܰܡܥܽܘܢ ܠܰܪ̈ܓܼܺܝܓܼܳܬܼܶܗ܂
06:13 [ai]ܘܳܐܦܼ ܠܳܐ ܬܛܰܝܒܼܽܘܢ ܗܰܕܿܳܡܰܝܟܿܽܘܢ̈ ܙܰܝܢܳܐ ܕܥܰܘܠܳܐ ܠܰܚܛܺܝܬܼܳܐ܂ ܐܶܠܳܐ ܛܰܝܶܒܼܘ ܢܰܦܼܫܟܼܽܘܢ ܠܰܐܠܳܗܳܐ܃ ܐܰܝܟܼ ܐ̱ܢܳܫܳܐ ܕܡܶܢ ܡܺܝܬܼܶܐ̈ ܚܝܰܝܬܿܽܘܢ܂ ܘܗܰܕܿܳܡܰܝܟܿܽܘܢ̈ ܙܰܝܢܳܐ ܢܶܗܘܽܘܢ ܠܟܼܺܐܢܽܘܬܼܶܗ ܕܰܐܠܳܗܳܐ܃
06:14 [ai]ܘܰܚܛܺܝܬܼܳܐ ܠܳܐ ܡܶܫܬܿܰܠܛܳܐ ܥܠܰܝܟܿܽܘܢ܂ ܠܳܐ ܓܶܝܪ ܐܺܝܬܼܰܝܟܿܽܘܢ ܬܚܶܝܬܼ ܢܳܡܽܘܣܳܐ܃ ܐܶܠܳܐ ܬܚܶܝܬܼ ܛܰܝܒܿܽܘܬܼܳܐ܂
06:15 [ai]ܡܳܢܳܐ ܗܳܟܼܺܝܠ܂ ܢܶܚܛܶܐ ܕܠܳܐ ܗܘܰܝܢ ܬܚܶܝܬܼ ܢܳܡܽܘܣܳܐ܂ ܐܶܠܳܐ ܬܚܶܝܬܼ ܛܰܝܒܿܽܘܬܼܳܐ܂ ܚܳܣ܂
06:16 [ai]ܠܳܐ ܝܳܕܼܥܺܝܢ ܐܢ̱ܬܿܽܘܢ܂ ܕܰܠܡܰܢ ܕܰܡܛܰܝܒܼܺܝܢ ܐܢ̱ܬܿܽܘܢ ܢܰܦܼܫܟܼܽܘܢ ܕܬܶܫܬܿܰܡܥܽܘܢ ܠܶܗ܃ ܠܥܰܒܼܕܿܽܘܬܼܳܐ܃ ܕܺܝܠܶܗ ܐܰܢ̱ܬܿܽܘܢ ܥܰܒܼܕܿܶܐ̈ ܕܗܰܘ ܕܡܶܫܬܿܰܡܥܺܝܢ ܐܢ̱ܬܿܽܘܢ ܠܶܗ܃ ܐܶܢ ܠܰܚܛܺܝܬܼܳܐ܂ ܘܶܐܢ ܠܡܰܫܡܰܥ ܐܶܕܼܢܳܐ ܕܟܺܐܢܽܘܬܼܳܐ܂
06:17 [ai]ܛܰܝܒܿܽܘ ܕܶܝܢ ܠܰܐܠܳܗܳܐ܃ ܕܥܰܒܼܕܿܶܐ̈ ܗ̱ܘܰܝܬܿܽܘܢ ܕܰܚܛܺܝܬܼܳܐ܃ ܘܶܐܫܬܿܡܰܥܬܿܽܘܢ ܡܶܢ ܠܶܒܿܳܐ ܠܰܕܼܡܽܘܬܼܳܐ ܕܝܽܘܠܦܿܳܢܳܐ܂ ܕܶܐܫܬܿܠܶܡܬܿܽܘܢ ܠܶܗ܂
06:18 [ai]ܘܟܼܰܕܼ ܐܶܬܼܚܰܪܰܪܬܿܽܘܢ ܡܶܢ ܚܛܺܝܬܼܳܐ܃ ܐܶܫܬܿܰܥܒܿܰܕܿܬܿܽܘܢ ܠܟܼܺܐܢܽܘܬܼܳܐ܂
06:19 [ai]ܐܰܝܟܼ ܕܒܶܝܬܼ ܒܢܰܝܢܳܫܳܐ ܐܳܡܰܪ ܐ̱ܢܳܐ܃ ܡܶܛܽܠ ܟܪܺܝܗܽܘܬܼܳܐ ܕܒܶܣܪܟܼܽܘܢ܂ ܕܰܐܝܟܿܰܢܳܐ ܕܛܰܝܶܒܼܬܿܽܘܢ ܗܰܕܿܳܡܰܝܟܿܽܘܢ̈ ܠܥܰܒܼܕܿܽܘܬܼܳܐ ܕܛܰܢܦܿܽܘܬܼܳܐ ܘܰܕܼܥܰܘܠܳܐ܃ ܗܳܟܼܰܢܳܐ ܐܳܦܼ ܗܳܫܳܐ ܛܰܝܶܒܼܘ ܗܰܕܿܳܡܰܝܟܿܽܘܢ̈ ܠܥܰܒܼܕܿܽܘܬܼܳܐ ܕܟܺܐܢܽܘܬܼܳܐ܂ ܘܰܕܼܩܰܕܿܺܝܫܽܘܬܼܳܐ܂
06:20 [ai]ܟܰܕܼ ܥܰܒܼܕܿܶܐ̈ ܗ̱ܘܰܝܬܿܽܘܢ ܓܶܝܪ ܕܰܚܛܺܝܬܼܳܐ܃ ܡܚܰܪ̈ܪܶܐ ܗ̱ܘܰܝܬܿܽܘܢ ܠܟܼܺܐܢܽܘܬܼܳܐ܂
06:21 [ai]ܘܡܳܢܳܐ ܐܳܕܼܫܳܐ ܐܺܝܬܼ ܗ̱ܘܳܐ ܠܟܼܽܘܢ ܗܳܝܕܶܝܢ܃ ܐܰܝܢܳܐ ܕܝܰܘܡܳܢܳܐ ܒܳܗܬܿܺܝܢ ܐܢ̱ܬܿܽܘܢ ܒܶܗ܂ ܚܰܪܬܼܶܗ ܓܶܝܪ ܐܺܝܬܼܶܝܗ ܡܰܘܬܳܐ܂
06:22 [ai]ܘܗܳܫܳܐ ܕܶܐܬܼܚܰܪܰܪܬܿܽܘܢ ܡܶܢ ܚܛܺܝܬܼܳܐ܂ ܘܰܗܘܰܝܬܿܽܘܢ ܥܰܒܼܕܿܶܐ̈ ܠܰܐܠܳܗܳܐ܃ ܐܺܝܬܼ ܠܟܼܽܘܢ ܦܿܺܐܪ̈ܶܐ ܩܰܕܿܺܝܫܶܐ̈܃ ܕܚܰܪܬܼܗܽܘܢ܂ ܚܰܝ̈ܶܐ ܕܰܠܥܳܠܰܡ܂
06:23 [ai]ܬܿܶܐܓܼܽܘܪܬܳܐ ܕܶܝܢ ܕܰܚܛܺܝܬܼܳܐ܂ ܡܰܘܬܳܐ ܗ̱ܘ܂ ܘܡܰܘܗܰܒܼܬܼܶܗ ܕܰܐܠܳܗܳܐ܂ ܚܰܝ̈ܶܐ ܕܰܠܥܳܠܰܡ܂ ܒܡܳܪܰܢ ܝܶܫܽܘܥ ܡܫܺܝܚܳܐ܀

next chapter