← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62045: Rom

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


07:01 [ai]ܐܰܘ ܠܳܐ ܝܳܕܼܥܺܝܢ ܐܢ̱ܬܿܽܘܢ ܐܰܚܰܝ̈܂ ܠܝܳܕܼܥܰܝ̈ ܢܳܡܽܘܣܳܐ ܓܶܝܪ ܡܡܰܠܶܠ ܐ̱ܢܳܐ܂ ܕܢܳܡܽܘܣܳܐ ܫܰܠܺܝܛ ܗ̱ܽܘ܂ ܥܰܠ ܓܰܒܼܪܳܐ ܟܡܳܐ ܕܚܰܝ܂
07:02 [ai]ܐܰܝܟܼ ܐܰܢ̱ܬܿܬܼܳܐ ܕܰܐܣܺܝܪܳܐ ܗ̱ܝ ܒܒܼܰܥܠܳܗ ܟܡܳܐ ܕܚܰܝ܂ ܒܢܳܡܽܘܣܳܐ܂ ܐܶܢ ܕܶܝܢ ܡܺܝܬܼ ܒܰܥܠܳܗ܃ ܐܶܬܼܚܰܪܪܰܬܼ ܡܶܢ ܢܳܡܽܘܣܳܐ ܕܒܰܥܠܳܗ܂
07:03 [ai]ܐܶܢ ܕܶܝܢ ܟܰܕܼ ܚܰܝ ܒܰܥܠܳܗ ܬܶܩܰܦܼ ܠܰܓܼܒܼܰܪ ܐ̱ܚܪܺܝܢ܃ ܗܘܳܬܼ ܠܳܗ ܓܰܝܳܪܬܼܳܐ܂ ܐܶܢܕܶܝܢ ܢܡܽܘܬܼ ܒܰܥܠܳܗ܃ ܐܶܬܼܚܰܪܪܰܬܼ ܡܶܢ ܢܳܡܽܘܣܳܐ܂ ܘܠܳܐ ܐܺܝܬܼܶܝܗ ܓܰܝܳܪܬܼܳܐ܂ ܐܶܢ ܬܶܗܘܶܐ ܠܓܼܰܒܼܪܳܐ ܐ̱ܚܪܺܢܳܐ܀
07:04 [ai]ܘܗܳܫܳܐ ܐܰܚܰܝ̈܃ ܐܳܦܼ ܐܰܢ̱ܬܿܽܘܢ ܡܺܝܬܿܬܿܽܘܢ ܠܢܳܡܽܘܣܳܐ ܒܦܰܓܼܪܶܗ ܕܰܡܫܺܝܚܳܐ܃ ܕܬܶܗܘܽܘܢ ܠܰܐ̱ܚܪܺܝܢ܂ ܐܰܝܢܳܐ ܕܩܳܡ ܡܶܢ ܒܶܝܬܼ ܡܺܝܬܼܶܐ̈܃ ܕܬܶܬܿܠܽܘܢ ܦܿܺܐܪ̈ܶܐ ܠܰܐܠܳܗܳܐ܂
07:05 [ai]ܟܰܕܼ ܒܒܼܶܣܪܳܐ ܗ̱ܘܰܝܢ ܓܶܝܪ܃ ܟܺܐܒܼܶܐ̈ ܕܰܚܛܳܗܶܐ̈ ܕܰܒܼܢܳܡܽܘܣܳܐ܂ ܡܶܬܼܚܰܦܿܛܺܝܢ ܗ̱ܘܰܘ ܒܗܰܕܿܳܡܰܝܢ̈܃ ܕܿܦܼܺܐܪ̈ܶܐ ܢܶܬܿܶܠ ܠܡܰܘܬܳܐ܂
07:06 [ai]ܗܳܫܳܐ ܕܶܝܢ ܐܶܬܼܒܿܰܛܰܠܢ ܡܶܢ ܢܳܡܽܘܣܳܐ܂ ܘܡܺܝܬܼܢ ܠܗܰܘ ܕܰܐܚܺܝܕܼ ܗ̱ܘܳܐ ܠܰܢ܂ ܕܰܢܫܰܡܶܫ ܡܶܟܿܺܝܠ ܒܚܰܕܼ̱ܬܼܽܘܬܼܳܐ ܕܪܽܘܚܳܐ܃ ܘܠܳܐ ܒܥܰܬܿܺܝܩܽܘܬܼ ܟܬܼܳܒܼܳܐ ܿ܀ܿ܀ܿ
07:07 [ai]ܡܳܢܳܐ ܗܳܟܼܺܝܠ ܐܳܡܪܺܝܢܰܢ܂ ܢܳܡܽܘܣܳܐ ܚܛܺܝܬܼܳܐ ܗܽܘ܃ ܚܳܣ܂ ܐܶܠܳܐ ܠܰܚܛܺܝܬܼܳܐ ܠܳܐ ܝܶܠܦܿܶܬܼ ܐܶܠܳܐ ܒܝܰܕܼ ܢܳܡܽܘܣܳܐ܂ ܠܳܐ ܓܶܝܪ ܪܶܓܿܬܼܳܐ ܝܳܕܼܰܥ ܗ̱ܘܺܝܬܼ܃ ܐܶܠܽܘܠܳܐ ܢܳܡܽܘܣܳܐ ܕܶܐܡܰܪ܂ ܕܠܳܐ ܬܶܪܰܓܼ܂
07:08 [ai]ܘܰܒܗܳܢܳܐ ܦܽܘܩܕܳܢܳܐ ܐܶܫܟܿܚܰܬܼ ܠܳܗ ܚܛܺܝܬܼܳܐ ܥܶܠܬܼܳܐ܃ ܘܓܼܶܡܪܰܬܼ ܒܺܝ ܟܽܠ ܪܶܓܿܳܐ܂ ܒܶܠܥܳܕܼ ܢܳܡܽܘܣܳܐ ܓܶܝܪ ܚܛܺܝܬܼܳܐ ܡܺܝܬܼܳܐ ܗ̱ܘܳܬܼ܂
07:09 [ai]ܐܶܢܳܐ ܕܶܝܢ ܚܰܝ ܗ̱ܘܺܝܬܼ ܕܠܳܐ ܢܳܡܽܘܣܳܐ ܡܶܢ ܩܕܼܺܝܡ܂ ܟܰܕܼ ܐܶܬܼܳܐ ܕܶܝܢ ܦܽܘܩܕܳܢܳܐ܃ ܚܛܺܝܬܼܳܐ ܚܝܳܬܼ܂ ܘܶܐܢܳܐ ܡܺܝܬܼܶܬܼ܂
07:10 [ai]ܘܶܐܫܬܿܟܼܰܚ ܠܺܝ ܦܽܘܩܕܳܢܳܐ ܗܰܘ ܕܚܰܝ̈ܶܐ܂ ܠܡܰܘܬܳܐ܂
07:11 [ai]ܚܛܺܝܬܼܳܐ ܓܶܝܪ ܒܥܶܠܬܼܳܐ ܕܶܐܫܟܿܚܰܬܼ ܠܳܗ ܒܝܰܕܼ ܦܽܘܩܕܳܢܳܐ܃ ܐܰܛܥܝܰܬܼܰܢܝ܂ ܘܒܼܶܗ ܩܛܰܠܬܼܰܢܝ܂
07:12 [ai]ܢܳܡܽܘܣܳܐ ܡܳܕܼܶܝܢ ܩܰܕܿܺܝܫ ܗ̱ܽܘ܂ ܘܦܼܽܘܩܕܳܢܳܐ ܩܰܕܿܺܝܫ ܗ̱ܽܘ܂ ܘܟܼܺܐܝܢ ܘܛܳܒܼ܂
07:13 [ai]ܛܳܒܼܬܼܳܐ ܗܳܟܼܺܝܠ ܠܺܝ܃ ܠܡܰܘܬܳܐ ܗܽܘ ܗܘܳܬܼ܃ ܚܳܣ܂ ܐܶܠܳܐ ܚܛܺܝܬܼܳܐ܂ ܕܬܶܬܼܚܙܶܐ ܕܰܚܛܺܝܬܼܳܐ ܗܺܝ܂ ܕܰܒܼܛܳܒܼܬܼܳܐ ܓܶܡܪܰܬܼ ܒܺܝ ܡܰܘܬܳܐ܂ ܕܝܰܬܿܺܝܪܳܐܺܝܬܼ ܬܶܬܼܚܰܝܰܒܼ ܚܛܺܝܬܼܳܐ ܒܦܽܘܩܕܳܢܳܐ܂
07:14 [ai]ܝܳܕܼܥܺܝܢܰܢ ܓܶܝܪ ܕܢܳܡܽܘܣܳܐ ܕܪܽܘܚ ܗ̱ܽܘ܂ ܐܶܢܳܐ ܕܶܝܢ ܕܰܒܼܣܰܪ ܐ̱ܢܳܐ܂ ܘܰܡܙܰܒܰܢ ܐ̱ܢܳܐ ܠܰܚܛܺܝܬܼܳܐ܂
07:15 [ai]ܡܶܕܶܡ ܕܣܳܥܰܪ ܐ̱ܢܳܐ ܓܶܝܪ܂ ܠܳܐ ܝܳܕܼܰܥ ܐ̱ܢܳܐ܂ ܘܠܳܐ ܗ̱ܘܳܐ ܡܶܕܶܡ ܕܨܳܒܼܶܐ ܐ̱ܢܳܐ܂ ܥܳܒܼܶܕܼ ܐ̱ܢܳܐ܂ ܐܶܠܳܐ ܡܶܕܶܡ ܕܣܳܢܶܐ ܐ̱ܢܳܐ܂ ܗܰܘ ܗ̱ܽܘ ܥܳܒܼܶܕܼ ܐ̱ܢܳܐ܂
07:16 [ai]ܘܶܐܢ ܡܶܕܶܡ ܕܠܳܐ ܨܳܒܼܶܐ ܐ̱ܢܳܐ܂ ܥܳܒܼܶܕܼ ܐ̱ܢܳܐ܃ ܣܳܗܶܕܼ ܐ̱ܢܳܐ ܥܰܠ ܢܳܡܽܘܣܳܐ܂ ܕܫܰܦܿܺܝܪ ܗ̱ܽܘ܂
07:17 [ai]ܗܳܫܳܐ ܕܶܝܢ ܠܳܐ ܗ̱ܘܳܐ ܐܶܢܳܐ ܣܳܥܰܪ ܐ̱ܢܳܐ ܗܳܕܼܶܐ܃ ܐܶܠܳܐ ܚܛܺܝܬܼܳܐ ܕܥܳܡܪܳܐ ܒܺܝ܂
07:18 [ai]ܝܳܕܼܰܥ ܐ̱ܢܳܐ ܗܽܘ ܓܶܝܪ ܕܠܳܐ ܥܳܡܪܳܐ ܒܺܝ܃ ܗܳܢܰܘ ܕܶܝܢ ܒܒܼܶܣܪܝ܂ ܛܳܒܼܬܼܳܐ܂ ܕܶܐܨܒܿܶܐ ܓܶܝܪ ܒܛܳܒܼܬܼܳܐ܂ ܦܫܺܝܩ ܠܺܝ܂ ܕܶܐܣܥܪܺܝܗ ܕܶܝܢ܂ ܠܳܐ ܡܶܫܟܿܰܚ ܐ̱ܢܳܐ܂
07:19 [ai]ܠܳܐ ܗ̱ܘܳܐ ܓܶܝܪ ܠܛܳܒܼܬܼܳܐ ܕܨܳܒܼܶܐ ܐ̱ܢܳܐ ܕܶܐܥܒܿܶܕܼ܂ ܥܳܒܼܶܕܼ ܐ̱ܢܳܐ܃ ܐܶܠܳܐ ܒܺܝܫܬܳܐ ܕܠܳܐ ܨܳܒܼܶܐ ܐ̱ܢܳܐ ܕܶܐܥܒܿܶܕܼ܂ ܠܳܗ ܥܳܒܼܶܕܼ ܐ̱ܢܳܐ܂
07:20 [ai]ܘܶܐܢ ܡܶܕܶܡ ܕܠܳܐ ܨܳܒܼܶܐ ܐ̱ܢܳܐ ܥܳܒܼܶܕܼ ܐ̱ܢܳܐ܃ ܠܳܐ ܗ̱ܘܳܐ ܐܶܢܳܐ ܥܳܒܼܶܕܼ ܐ̱ܢܳܐ܃ ܐܶܠܳܐ ܚܛܺܝܬܼܳܐ ܕܥܳܡܪܳܐ ܒܺܝ܂
07:21 [ai]ܡܶܫܟܿܰܚ ܐ̱ܢܳܐ ܗܳܟܼܺܝܠ ܠܢܳܡܽܘܣܳܐ܃ ܕܫܳܠܶܡ ܠܪܶܥܝܳܢܝ܃ ܗܰܘ ܕܨܳܒܼܶܐ ܕܢܶܥܒܿܶܕܼ ܛܳܒܼܬܼܳܐ܂ ܡܶܛܽܠ ܕܒܺܝܫܬܳܐ ܩܰܪܺܝܒܼܳܐ ܗ̱ܝ ܠܺܝ܂
07:22 [ai]ܚܳܕܼܶܐ ܐ̱ܢܳܐ ܓܶܝܪ ܒܢܳܡܽܘܣܶܗ ܕܰܐܠܳܗܳܐ ܒܒܼܰܪܢܳܫܳܐ ܕܰܠܓܼܰܘ܂
07:23 [ai]ܚܳܙܶܐ ܐ̱ܢܳܐ ܕܶܝܢ ܢܳܡܽܘܣܳܐ ܐ̱ܚܪܺܢܳܐ ܒܗܰܕܿܳܡܰܝ̈܃ ܕܡܰܩܪܶܒܼ ܠܽܘܩܒܼܰܠ ܢܳܡܽܘܣܳܐ ܕܪܶܥܝܳܢܝ܃ ܘܫܳܒܼܶܐ ܠܺܝ ܠܢܳܡܽܘܣܳܐ ܕܰܚܛܺܝܬܼܳܐ ܕܺܐܝܬܼ ܒܗܰܕܿܳܡܰܝ̈܂
07:24 [ai]ܕܳܘܝܳܐ ܐ̱ܢܳܐ ܒܰܪܢܳܫܳܐ܂ ܡܰܢܽܘ ܢܦܼܰܨܶܝܢܝ ܡܶܢ ܦܰܓܼܪܳܐ ܗܳܢܳܐ ܕܡܰܘܬܳܐ܂
07:25 [ai]ܡܰܘܕܿܶܐ ܐ̱ܢܳܐ ܠܰܐܠܳܗܳܐ ܒܝܰܕܼ ܡܳܪܰܢ ܝܶܫܽܘܥ ܡܫܺܝܚܳܐ܂ ܗܳܫܳܐ ܗܳܟܼܺܝܠ ܐܶܢܳܐ ܒܪܶܥܝܳܢܝ܃ ܥܰܒܼܕܿܳܐ ܐ̱ܢܳܐ ܕܢܳܡܽܘܣܳܐ ܕܰܐܠܳܗܳܐ܂ ܒܒܼܶܣܪܝ ܕܶܝܢ܂ ܐܺܝܬܼܰܝ ܥܰܒܼܕܿܳܐ ܕܢܳܡܽܘܣܳܐ ܕܰܚܛܺܝܬܼܳܐ܀

next chapter