← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62045: Rom

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


08:01 [ai]ܡܶܟܿܺܝܠ ܠܰܝܬܿ ܚܰܝܳܒܼܽܘܬܼܳܐ܂ ܠܰܐܝܠܶܝܢ ܕܠܳܐ ܡܗܰܠܟܼܺܝܢ ܒܰܒܼܣܰܪ܂ ܒܝܶܫܽܘܥ ܡܫܺܝܚܳܐ܂
08:02 [ai]ܢܳܡܽܘܣܳܐ ܓܶܝܪ ܕܪܽܘܚܳܐ ܕܚܰܝ̈ܶܐ܂ ܕܰܒܼܝܶܫܽܘܥ ܡܫܺܝܚܳܐ܃ ܚܰܪܪܳܟܼ ܡܶܢ ܢܳܡܽܘܣܳܐ ܕܰܚܛܺܝܬܼܳܐ܂ ܘܰܕܼܡܰܘܬܳܐ܂
08:03 [ai]ܡܶܛܽܠ ܕܰܡܚܺܝܠ ܗ̱ܘܳܐ ܓܶܝܪ ܢܳܡܽܘܣܳܐ܂ ܒܝܰܕܼ ܟܪܺܝܗܽܘܬܼܶܗ ܕܒܶܣܪܳܐ܃ ܫܰܕܿܰܪ ܐܰܠܳܗܳܐ ܠܰܒܼܪܶܗ ܒܰܕܼܡܽܘܬܼܳܐ ܕܒܶܣܪܳܐ ܕܰܚܛܺܝܬܼܳܐ܃ ܡܶܛܽܠܳܬܼܳܗ ܕܰܚܛܺܝܬܼܳܐ܂ ܕܰܢܚܰܝܒܼܺܝܗ ܠܰܚܛܺܝܬܼܳܐ ܒܒܼܶܣܪܶܗ܂
08:04 [ai]ܕܟܺܐܢܽܘܬܼܳܐ ܕܢܳܡܽܘܣܳܐ ܒܰܢ ܬܶܬܼܡܰܠܶܐ܂ ܕܠܳܐ ܗ̱ܘܳܐ ܒܰܒܼܣܰܪ ܡܗܰܠܟܼܺܝܢܰܢ܂ ܐܶܠܳܐ ܒܪܽܘܚ܂
08:05 [ai]ܐܰܝܠܶܝܢ ܓܶܝܪ ܕܒܰܒܼܣܰܪ ܐܶܢܽܘܢ܂ ܕܰܒܼܣܰܪ ܗ̱ܽܘ ܡܶܬܼܪܰܥܶܝܢ܂ ܘܰܐܝܠܶܝܢ ܕܰܕܼܪܽܘܚ ܐܶܢܽܘܢ܂ ܕܪܽܘܚ ܗ̱ܽܘ ܡܶܬܼܪܰܥܶܝܢ܂
08:06 [ai]ܬܰܪܥܺܝܬܼܳܐ ܓܶܝܪ ܕܒܶܣܪܳܐ܂ ܡܰܘܬܳܐ ܗܽܘ܂ ܘܬܼܰܪܥܺܝܬܼܳܐ ܕܪܽܘܚܳܐ܂ ܚܰܝ̈ܶܐ ܘܰܫܠܳܡܳܐ܂
08:07 [ai]ܡܶܛܽܠ ܕܬܰܪܥܺܝܬܼܳܐ ܕܒܶܣܪܳܐ܂ ܒܥܶܠܕܿܒܼܳܒܼܽܘܬܼܳܐ ܗ̱ܝ ܠܘܳܬܼ ܐܰܠܳܗܳܐ܂ ܠܢܳܡܽܘܣܳܐ ܓܶܝܪ ܕܰܐܠܳܗܳܐ ܠܳܐ ܡܶܫܬܿܰܥܒܿܕܼܳܐ܂ ܡܶܛܽܠ ܕܠܳܐ ܡܶܫܟܿܚܳܐ܂
08:08 [ai]ܘܰܐܝܠܶܝܢ ܕܒܰܒܼܣܰܪ ܐܶܢܽܘܢ܂ ܠܡܶܫܦܿܰܪ ܠܰܐܠܳܗܳܐ ܠܳܐ ܡܶܫܟܿܚܺܝܢ܂
08:09 [ai]ܐܰܢ̱ܬܿܽܘܢ ܕܶܝܢ ܠܳܐ ܗ̱ܘܰܝܬܿܽܘܢ ܒܰܒܼܣܰܪ܂ ܐܶܠܳܐ ܒܪܽܘܚ܃ ܐܶܢ ܫܰܪܺܝܪܳܐܺܝܬܼ ܪܽܘܚܶܗ ܕܰܐܠܳܗܳܐ ܥܳܡܪܳܐ ܒܟܽܘܢ܂ ܐܶܢ ܕܶܝܢ ܐ̱ܢܳܫ ܠܰܝܬܿ ܒܶܗ ܪܽܘܚܶܗ ܕܰܡܫܺܝܚܳܐ܃ ܗܳܢܳܐ ܠܳܐ ܗ̱ܘܳܐ ܕܺܝܠܶܗ܂
08:10 [ai]ܘܶܐܢ ܕܶܝܢ ܡܫܺܝܚܳܐ ܒܟܽܘܢ܃ ܦܰܓܼܪܳܐ ܡܺܝܬܼ ܗ̱ܽܘ ܡܶܛܽܠ ܚܛܺܝܬܼܳܐ܃ ܪܽܘܚܳܐ ܕܶܝܢ ܚܰܝܳܐ ܗ̱ܝ ܡܶܛܽܠ ܟܺܐܢܽܘܬܼܳܐ܂
08:11 [ai]ܘܶܐܢ ܪܽܘܚܶܗ ܕܗܰܘ ܡܰܢ ܕܰܐܩܺܝܡ ܠܡܳܪܰܢ ܝܶܫܽܘܥ ܡܫܺܝܚܳܐ ܡܶܢ ܒܶܝܬܼ ܡܺܝܬܼܶܐ̈܂ ܥܳܡܪܳܐ ܒܟܽܘܢ܃ ܗܰܘ ܡܰܢ ܕܰܐܩܺܝܡܶܗ ܠܝܶܫܽܘܥ ܡܫܺܝܚܳܐ ܡܶܢ ܒܶܝܬܼ ܡܺܝܬܼܶܐ̈܂ ܐܳܦܼ ܠܦܼܰܓܼܪ̈ܰܝܟܿܽܘܢ ܡܺܝܬܼܶܐ̈ ܢܰܚܶܐ܃ ܡܶܛܽܠ ܪܽܘܚܶܗ ܕܥܳܡܪܳܐ ܒܟܽܘܢ܀
08:12 [ai]ܗܳܫܳܐ ܐܰܚܰܝ̈܂ ܚܰܝܳܒܼܺܝܢܰܢ܃ ܠܰܘ ܠܒܼܶܣܪܳܐ ܕܒܰܒܼܣܰܪ ܢܗܰܠܶܟܼ܃
08:13 [ai]ܐܶܢ ܓܶܝܪ ܒܰܒܼܣܰܪ ܚܳܐܶܝܢ ܐܢ̱ܬܿܽܘܢ܂ ܥܬܼܺܝܕܼܺܝܢ ܐܢ̱ܬܿܽܘܢ ܗ̱ܽܘ ܠܰܡܡܳܬܼ܃ ܘܶܐܢ ܒܪܽܘܚ ܗܽܘܦܿܳܟܼܰܝ̈ ܦܰܓܼܪܳܐ ܡܡܺܝܬܼܺܝܢ ܐܢ̱ܬܿܽܘܢ܂ ܚܳܐܶܝܢ ܐܢ̱ܬܿܽܘܢ܂
08:14 [ai]ܐܰܝܠܶܝܢ ܓܶܝܪ ܕܰܒܼܪܽܘܚܳܐ ܕܰܐܠܳܗܳܐ ܡܶܬܿܕܿܰܒܿܪܺܝܢ܃ ܗܳܠܶܝܢ ܒܢܰܝܳܐ ܐܶܢܽܘܢ ܕܰܐܠܳܗܳܐ܂
08:15 [ai]ܠܳܐ ܓܶܝܪ ܢܣܰܒܼܬܿܽܘܢ ܪܽܘܚܳܐ ܕܥܰܒܼܕܿܽܘܬܼܳܐ ܬܽܘܒܼ܂ ܠܕܼܶܚܠܬܼܳܐ܃ ܐܶܠܳܐ ܢܣܰܒܼܬܿܽܘܢ ܪܽܘܚܳܐ ܕܣܺܝܡܰܬܼ ܒܢܰܝܳܐ܃ ܕܒܳܗ ܩܳܪܶܝܢܰܢ܂ ܐܰܒܼܰܐ ܐܰܒܼܽܘܢ܂
08:16 [ai]ܘܗܺܝ ܪܽܘܚܳܐ ܡܰܣܗܕܼܳܐ ܠܪܽܘܚܰܢ܂ ܕܺܐܝܬܼܰܝܢ ܒܢܰܝܳܐ ܕܰܐܠܳܗܳܐ܂
08:17 [ai]ܘܶܐܢ ܒܢܰܝܳܐ܂ ܐܳܦܼ ܝܳܪ̈ܬܿܶܐ܂ ܝܳܪ̈ܬܿܶܐ ܕܰܐܠܳܗܳܐ܃ ܘܰܒܢܰܝ ܝܳܪܬܿܽܘܬܼܶܗ ܕܝܶܫܽܘܥ ܡܫܺܝܚܳܐ܂ ܕܶܐܢ ܢܶܚܰܫ ܥܰܡܶܗ܂ ܐܳܦܼ ܥܰܡܶܗ ܢܶܫܬܿܰܒܿܰܚ܀
08:18 [ai]ܡܶܬܼܪܰܥܶܐ ܐ̱ܢܳܐ ܓܶܝܪ܂ ܕܠܳܐ ܫܳܘܶܝܢ ܚܰܫܰܘܗ̱ܝ̈ ܕܙܰܒܼܢܳܐ ܗܳܢܳܐ܃ ܠܬܼܶܫܒܿܽܘܚܬܳܐ ܐܰܝܕܼܳܐ ܕܰܥܬܼܺܝܕܼܳܐ ܕܬܶܬܼܓܠܶܐ ܒܰܢ܂
08:19 [ai]ܟܽܠܳܗ ܓܶܝܪ ܒܪܺܝܬܼܳܐ ܡܣܰܒܪܳܐ ܘܰܡܣܰܟܿܝܳܐ܂ ܠܓܼܶܠܝܳܢܳܐ ܕܿܰܒܼܢܰܘܗ̱ܝ ܕܰܐܠܳܗܳܐ܂
08:20 [ai]ܒܪܺܝܬܼܳܐ ܓܶܝܪ ܐܶܫܬܿܰܥܒܿܕܼܰܬܼ ܠܰܣܪܺܝܩܽܘܬܼܳܐ܃ ܠܳܐ ܒܨܶܒܼܝܳܢܳܗ܃ ܐܶܠܳܐ ܡܶܛܽܠ ܡܰܢ ܕܫܰܥܒܿܕܼܳܗ ܥܰܠ ܣܰܒܼܪܳܐ܂
08:21 [ai]ܕܳܐܦܼ ܗܺܝ ܒܪܺܝܬܼܳܐ ܬܶܬܼܚܰܪܰܪ ܡܶܢ ܥܰܒܼܕܿܽܘܬܼܳܐ ܕܰܚܒܼܳܠܳܐ܃ ܒܰܚܪ̈ܽܘܪܶܐ ܕܬܶܫܒܿܽܘܚܬܳܐ ܕܿܰܒܼܢܰܝܳܐ ܕܰܐܠܳܗܳܐ ܿ܀ܿ܀ܿ
08:22 [ai]ܝܳܕܼܥܺܝܢܰܢ ܓܶܝܪ ܕܟܽܠܗܶܝܢ ܒܶܪ̈ܝܳܬܼܳܐ܃ ܡܶܬܿܬܿܰܢܚܳܢ̈ ܘܰܡܚܰܒܿܠܳܢ̈ ܥܕܼܰܡܳܐ ܠܝܰܘܡܳܢܳܐ܂
08:23 [ai]ܘܠܳܐ ܒܰܠܚܽܘܕܼ ܗܶܢܶܝܢ܂ ܐܶܠܳܐ ܐܳܦܼ ܚܢܰܢ܂ ܕܺܐܝܬܼ ܒܰܢ ܪܺܫܺܝܬܼܳܐ ܕܪܽܘܚܳܐ܃ ܡܶܬܿܬܿܰܢܚܺܝܢܰܢ ܒܢܰܦܼܫܰܢ܃ ܘܰܡܣܰܟܿܶܝܢܰܢ ܠܣܺܝܡܰܬܼ ܒܢܰܝܳܐ܂ ܘܰܠܦܼܽܘܪܩܳܢܳܐ ܕܿܦܼܰܓܼܪ̈ܰܝܢ܂
08:24 [ai]ܡܶܛܽܠ ܕܰܒܼܣܰܒܼܪܳܐ ܗ̱ܘ ܚܝܰܝܢ܂ ܣܰܒܼܪܳܐ ܕܶܝܢ ܕܡܶܬܼܚܙܶܐ܂ ܠܳܐ ܗ̱ܘܳܐ ܣܰܒܼܪܳܐ܂ ܐܶܢ ܓܶܝܪ ܚܳܙܶܝܢܰܢ ܠܶܗ܃ ܡܳܢܳܐ ܡܣܰܟܿܶܝܢܰܢ ܠܶܗ܂
08:25 [ai]ܐܶܢ ܕܶܝܢ ܠܡܶܕܶܡ ܕܠܳܐ ܡܶܬܼܚܙܶܐ ܡܣܰܒܿܪܺܝܢܰܢ܃ ܒܰܡܣܰܝܒܿܪܳܢܽܘܬܼܳܐ ܡܩܰܘܶܝܢܰܢ܂
08:26 [ai]ܗܳܟܼܰܢܳܐ ܐܳܦܼ ܗܺܝ ܪܽܘܚܳܐ ܡܥܰܕܿܪܳܐ ܠܰܟܼܪܺܝܗܽܘܬܼܰܢ܂ ܡܳܢܳܐ ܓܶܝܪ ܢܨܰܠܶܐ ܐܰܝܟܼ ܡܳܐ ܕܘܳܠܶܐ܂ ܠܳܐ ܝܳܕܼܥܺܝܢܰܢ܂ ܐܶܠܳܐ ܗܺܝ ܪܽܘܚܳܐ ܡܨܰܠܝܳܐ ܚܠܳܦܼܰܝܢ܃ ܒܬܶܢܚܳܬܼܳܐ̈ ܕܠܳܐ ܡܶܬܼܡܰܠܠܳܢ̈܂
08:27 [ai]ܕܡܳܐܶܫ ܕܶܝܢ ܠܶܒܿܰܘܳܬܼܳܐ̈܃ ܗܽܘ ܝܳܕܼܰܥ ܡܳܢܳܐ ܗ̱ܺܝ ܬܰܪܥܺܝܬܼܳܐ ܕܪܽܘܚܳܐ܃ ܕܰܐܝܟܼ ܨܶܒܼܝܳܢܶܗ ܗ̱ܽܘ ܕܰܐܠܳܗܳܐ ܡܨܰܠܝܳܐ ܚܠܳܦܼ ܩܰܕܿܺܝܫܶܐ̈܀
08:28 [ai]ܝܳܕܼܥܺܝܢܰܢ ܕܶܝܢ ܕܰܐܝܠܶܝܢ ܕܡܰܚܒܼܺܝܢ ܠܰܐܠܳܗܳܐ܃ ܒܟܽܠ ܡܶܕܶܡ ܡܥܰܕܿܰܪ ܠܗܽܘܢ ܠܛܳܒܼܬܼܳܐ܂ ܠܰܐܝܠܶܝܢ ܕܿܩܰܕܶܡ ܣܳܡ ܕܢܶܗܘܽܘܢ ܩܪ̈ܰܝܳܐ܃
08:29 [ai]ܘܡܶܢ ܠܽܘܩܕܼܰܡ ܺܝܕܼܰܥ ܐܶܢܽܘܢ܃ ܘܰܪܫܰܡ ܐܶܢܽܘܢ ܒܰܕܼܡܽܘܬܼܳܐ ܕܨܽܘܪܬܳܐ ܕܰܒܼܪܶܗ܃ ܕܗܽܘ ܢܶܗܘܶܐ ܒܽܘܟܼܪܳܐ ܕܰܐܚܶܐ̈ ܣܰܓܿܺܝܶܐܐ̈܂
08:30 [ai]ܠܰܐܝܠܶܝܢ ܕܶܝܢ ܕܿܩܰܕܶܡ ܪܫܰܡ܃ ܠܗܽܘܢ ܩܪܳܐ܂ ܘܠܰܐܝܠܶܝܢ ܕܰܩܪܳܐ܃ ܠܗܽܘܢ ܙܰܕܿܶܩ܂ ܘܠܰܐܝܠܶܝܢ ܕܙܰܕܿܶܩ܃ ܠܗܽܘܢ ܫܰܒܿܰܚ܂
08:31 [ai]ܡܳܢܳܐ ܗܳܟܼܺܝܠ ܢܺܐܡܰܪ ܥܰܠ ܗܳܠܶܝܢ܂ ܐܶܢ ܐܰܠܳܗܳܐ ܚܠܳܦܼܰܝܢ܃ ܡܰܢܽܘ ܕܰܠܩܽܘܒܼܠܰܢ܂
08:32 [ai]ܘܶܐܢ ܥܰܠ ܒܪܶܗ ܠܳܐ ܚܳܣ܃ ܐܶܠܳܐ ܚܠܳܦܼ ܟܽܠܰܢ ܐܰܫܠܡܶܗ܃ ܐܰܝܟܿܰܢܳܐ ܠܳܐ ܟܽܠ ܡܶܕܶܡ ܥܰܡܶܗ ܢܶܬܿܶܠ ܠܰܢ܂
08:33 [ai]ܡܰܢܽܘ ܢܶܩܒܿܽܘܠ ܥܰܠ ܓܒܼܰܝܳܐ̈ ܕܰܐܠܳܗܳܐ܂ ܐܰܠܳܗܳܐ ܡܙܰܕܿܶܩ܃
08:34 [ai]ܡܰܢܽܘ ܡܚܰܝܶܒܼ܂ ܡܫܺܝܚܳܐ ܡܺܝܬܼ܂ ܘܩܳܡ܂ ܘܺܐܝܬܼܰܘܗ̱ܝ ܥܰܠ ܝܰܡܺܝܢܳܐ ܕܰܐܠܳܗܳܐ܂ ܘܒܼܳܥܶܐ ܚܠܳܦܼܰܝܢ܂
08:35 [ai]ܡܰܢܽܘ ܢܶܦܼܪܫܰܢܝ ܡܶܢ ܚܽܘܒܶܗ ܕܰܡܫܺܝܚܳܐ܃ ܐܽܘܠܨܳܢܳܐ܂ ܐܰܘ ܚܒܼܽܘܫܝܳܐ܂ ܐܰܘ ܪܕܼܽܘܦܼܝܳܐ܂ ܐܰܘ ܟܰܦܼܢܳܐ܂ ܐܰܘ ܥܰܪܛܶܠܳܝܽܘܬܼܳܐ܂ ܐܰܘ ܩܺܢܕܼܺܝܢܳܘܣ܂ ܐܰܘ ܣܰܝܦܼܳܐ܃
08:36 [ai]ܐܰܝܟܼ ܕܰܟܼܬܼܺܝܒܼ܂ ܕܡܶܛܽܠܳܬܼܳܟܼ ܟܽܠܝܽܘܡ ܡܳܝܬܿܺܝܢܰܢ܃ ܘܶܐܬܼܚܫܶܒܼܢ ܐܰܝܟܼ ܐܶܡܪ̈ܶܐ ܠܢܶܟܼܣܬܼܳܐ܂
08:37 [ai]ܐܶܠܳܐ ܒܗܳܠܶܝܢ ܟܽܠܗܶܝܢ܃ ܙܰܟܿܳܝܺܝܢܰܢ܂ ܒܝܰܕܼ ܡܰܢ ܕܰܐܚܒܼܰܢ܂
08:38 [ai]ܡܦܿܳܣ ܐ̱ܢܳܐ ܓܶܝܪ܃ ܕܠܳܐ ܡܰܘܬܳܐ܂ ܘܠܳܐ ܚܰܝ̈ܶܐ܂ ܘܠܳܐ ܡܰܠܰܐܟܼܶܐ̈܂ ܘܠܳܐ ܫܽܘܠܛܳܢܶܐ̈܂ ܘܠܳܐ ܚܰܝܠܶܐ̈܂ ܘܠܳܐ ܕܩܳܝ̈ܡܳܢ܂ ܘܠܳܐ ܕܰܥܬܼܺܝܕܼܳܢ̈܂
08:39 [ai]ܘܠܳܐ ܪܰܘܡܳܐ܂ ܘܠܳܐ ܥܽܘܡܩܳܐ܂ ܐܳܦܼܠܳܐ ܒܪܺܝܬܼܳܐ ܐ̱ܚܪܺܬܼܳܐ܃ ܬܶܫܟܿܰܚ ܬܶܦܼܪܫܰܢܝ ܚܽܘܒܶܗ ܕܰܐܠܳܗܳܐ܂ ܕܰܒܼܡܳܪܰܢ ܝܶܫܽܘܥ ܡܫܺܝܚܳܐ܀

next chapter