The Comprehensive Aramaic Lexicon

09:01 [ai]	ܩܽܘܫܬܳܐ ܐܳܡܰܪ ܐ̱ܢܳܐ ܒܰܡܫܺܝܚܳܐ܂ ܘܠܳܐ ܡܕܼܰܓܿܶܠ ܐ̱ܢܳܐ܂ ܘܪܶܥܝܳܢܝ ܡܰܣܗܶܕܼ ܥܠܰܝ܃ ܒܪܽܘܚܳܐ ܕܩܽܘܕܼܫܳܐ܃
09:02 [ai]	ܕܟܰܪܝܽܘܬܼܳܐ ܗ̱ܝ ܠܺܝ ܪܰܒܿܬܼܳܐ܂ ܘܟܼܺܐܒܼܳܐ ܕܡܶܢ ܠܶܒܿܝ ܠܳܐ ܫܳܠܶܐ܂
09:03 [ai]	ܡܨܰܠܶܐ ܗ̱ܘܺܝܬܼ ܓܶܝܪ܂ ܕܶܐܢܳܐ ܩܢܽܘܡܝ ܚܶܪܡܳܐ ܐܶܗܘܶܐ ܡܶܢ ܡܫܺܝܚܳܐ܃ ܚܠܳܦܼ ܐܰܚܰܝ̈ ܘܰܐ̱ܚܝܳܢܰܝ̈܂ ܕܒܰܒܼܣܰܪ܂
09:04 [ai]	ܕܺܐܝܬܼܰܝܗܽܘܢ ܒܢܰܝ ܐܺܝܣܪܳܝܶܠ܂ ܕܕܼܺܝܠܗܽܘܢ ܗܘܳܬܼ ܣܺܝܡܰܬܼ ܒܢܰܝܳܐ܂ ܘܬܼܶܫܒܿܽܘܚܬܳܐ܂ ܘܰܩܝܳܡܶܐ̈܂ ܘܢܳܡܽܘܣܳܐ܂ ܘܬܼܶܫܡܶܫܬܳܐ ܕܒܶܗ܂ ܘܡܽܘܠܟܿܳܢܶܐ̈܂
09:05 [ai]	ܘܰܐܒܼܳܗܳܬܼܳܐ̈܂ ܘܡܶܢܗܽܘܢ ܐܶܬܼܚܙܺܝ ܡܫܺܝܚܳܐ ܒܰܒܼܣܰܪ܂ ܕܺܐܝܬܼܰܘܗ̱ܝ ܐܰܠܳܗܳܐ ܕܥܰܠ ܟܽܠ܂ ܕܠܶܗ ܬܶܫܒܿܚܳܢ̈ ܘܒܼܽܘܪ̈ܟܿܳܢ܃ ܠܥܳܠܰܡ ܥܳܠܡܺܝܢ ܐܰܡܺܝܢ܀
09:06 [ai]	ܠܳܐ ܗ̱ܘܳܐ ܕܶܝܢ ܡܶܦܿܰܠ ܢܶܦܼܠܰܬܼ ܡܶܠܬܼܶܗ ܕܰܐܠܳܗܳܐ܂ ܠܳܐ ܗ̱ܘܳܐ ܓܶܝܪ ܟܽܠܗܽܘܢ ܕܡܶܢ ܐܺܝܣܪܳܝܶܠ܂ ܐܺܝܬܼܰܝܗܽܘܢ ܐܺܝܣܪܳܝܶܠ܂
09:07 [ai]	ܐܳܦܼܠܳܐ ܡܶܛܽܠ ܕܡܶܢ ܙܰܪܥܶܗ ܐܶܢܽܘܢ ܕܰܐܒܼܪܳܗܳܡ܂ ܟܽܠܗܽܘܢ ܒܢܰܝܳܐ܂ ܡܶܛܽܠ ܕܶܐܬܼܶܐܡܰܪ܂ ܕܒܺܐܝܣܚܳܩ ܢܶܬܼܩܪܶܐ ܠܳܟܼ ܙܰܪܥܳܐ܂
09:08 [ai]	ܗܳܢܰܘ ܕܶܝܢ܃ ܠܳܐ ܗ̱ܘܳܐ ܒܢܰܝܳܐ ܕܒܶܣܪܳܐ܂ ܐܺܝܬܼܰܝܗܽܘܢ ܒܢܰܝܳܐ ܕܰܐܠܳܗܳܐ܂ ܐܶܠܳܐ ܒܢܰܝܳܐ ܕܡܽܘܠܟܿܳܢܳܐ ܡܶܬܼܚܰܫܒܺܝܢ ܠܙܰܪܥܳܐ܂
09:09 [ai]	ܕܡܽܘܠܟܿܳܢܳܐ ܓܶܝܪ ܐܺܝܬܼܶܝܗ ܡܶܠܬܼܳܐ ܗܳܕܼܶܐ܃ ܕܰܒܼܙܰܒܼܢܳܐ ܗܳܢܳܐ ܐܺܬܼܶܐ܂ ܘܢܶܗܘܶܐ ܒܪܳܐ ܠܣܰܪܳܐ܂
09:10 [ai]	ܘܠܰܘ ܗܳܕܼܶܐ ܒܰܠܚܽܘܕܼ܂ ܐܶܠܳܐ ܐܳܦܼ ܪܰܦܼܩܳܐ܃ ܟܰܕܼ ܥܰܡ ܚܰܕܼ ܐܰܒܼܽܘܢ ܐܺܝܣܚܳܩ܂ ܐܺܝܬܼ ܗ̱ܘܳܐ ܠܳܗ ܫܰܘܬܿܳܦܼܽܘܬܼܳܐ܃
09:11 [ai]	ܥܰܕܼܠܳܐ ܢܶܬܼܝܰܠܕܿܽܘܢ ܒܢܶܝܗ܃ ܘܠܳܐ ܢܶܣܥܪܽܘܢ ܛܳܒܼܬܼܳܐ ܐܰܘ ܒܺܝܫܬܳܐ܃ ܩܰܕܿܡܰܬܼ ܐܶܬܼܝܰܕܼܥܰܬܼ ܓܰܒܼܝܽܘܬܼܶܗ ܕܰܐܠܳܗܳܐ܂ ܕܗܺܝ ܬܩܰܘܶܐ܃ ܠܳܐ ܒܰܥܒܼܳܕܼܶܐ̈܃ ܐܶܠܳܐ ܒܝܰܕܼ ܡܰܢ ܕܰܩܪܳܐ܂
09:12 [ai]	ܐܶܬܼܶܐܡܰܪ ܓܶܝܪ܂ ܕܩܰܫܺܝܫܳܐ ܢܶܗܘܶܐ ܥܰܒܼܕܿܳܐ ܠܰܙܥܽܘܪܳܐ܂
09:13 [ai]	ܐܰܝܟܼ ܕܰܟܼܬܼܺܝܒܼ܂ ܕܰܠܝܰܥܩܽܘܒܼ ܪܶܚܡܶܬܼ܂ ܘܰܠܥܺܣܽܘ ܣܢܺܝܬܼ܀
09:14 [ai]	ܡܳܢܳܐ ܗܳܟܼܺܝܠ ܢܺܐܡܰܪ܂ ܕܰܠܡܳܐ ܥܰܘܠܳܐ ܐܺܝܬܼ ܠܘܳܬܼ ܐܰܠܳܗܳܐ܃ ܚܳܣ܂
09:15 [ai]	ܗܳܐ ܐܳܦܼ ܠܡܽܘܫܶܐ ܐܶܡܰܪ܂ ܐܶܪܰܚܶܡ ܥܰܠ ܐܰܝܢܳܐ ܕܰܡܪܰܚܶܡ ܐ̱ܢܳܐ܂ ܘܶܐܚܽܘܢ ܠܰܐܝܢܳܐ ܕܚܳܐܶܢ ܐ̱ܢܳܐ܂
09:16 [ai]	ܠܳܐ ܗܳܟܼܺܝܠ ܒܺܐܝܕܼܰܝ̈ ܡܰܢ ܕܨܳܒܼܶܐ܃ ܘܠܳܐ ܒܺܐܝܕܼܰܝ̈ ܡܰܢ ܕܪܳܗܶܛ܃ ܐܶܠܳܐ ܒܺܐܝܕܼܰܝ̈ ܐܰܠܳܗܳܐ ܡܪܰܚܡܳܢܳܐ܂
09:17 [ai]	ܐܶܡܰܪ ܓܶܝܪ ܒܰܟܼܬܼܳܒܼܳܐ ܠܦܼܶܪܥܽܘܢ܃ ܕܠܳܗ ܠܗܳܕܼܶܐ ܐܰܩܺܝܡܬܿܳܟܼ܂ ܕܶܐܚܰܘܶܐ ܒܳܟܼ ܚܰܝܠܝ܂ ܘܰܕܼܢܶܬܼܟܿܪܶܙ ܫܶܡܝ ܒܰܐܪܥܳܐ ܟܽܠܶܗ܂
09:18 [ai]	ܡܳܕܼܶܝܢ ܥܰܠ ܡܰܢ ܕܨܳܒܼܶܐ ܗ̱ܘ ܡܪܰܚܶܡ܃ ܘܥܰܠ ܡܰܢ ܕܨܳܒܼܶܐ ܡܩܰܫܶܐ܂
09:19 [ai]	ܘܰܟܼܒܼܰܪ ܬܺܐܡܰܪ܃ ܕܰܠܡܳܢܳܐ ܪܳܫܶܐ܂ ܡܰܢܽܘ ܓܶܝܪ ܕܰܢܩܽܘܡ ܠܽܘܩܒܼܰܠ ܨܶܒܼܝܳܢܶܗ܂
09:20 [ai]	ܐܰܢ̱ܬܿ ܗܳܟܼܺܝܠ ܡܰܢ ܐܰܢ̱ܬܿ ܐܳܘ ܒܰܪܢܳܫܳܐ܃ ܕܦܶܬܼܓܼܳܡܳܐ ܠܰܐܠܳܗܳܐ ܝܳܗܶܒܼ ܐܰܢ̱ܬܿ܂ ܕܰܠܡܳܐ ܐܳܡܪܳܐ ܓܒܼܺܝܠܬܳܐ ܠܡܰܢ ܕܓܰܒܼܠܳܗ ܕܰܠܡܳܢܳܐ ܗܳܟܼܰܢܳܐ ܓܒܼܰܠܬܿܳܢܝ܂
09:21 [ai]	ܐܰܘ ܠܳܐ ܫܰܠܺܝܛ ܦܰܚܳܪܳܐ ܥܰܠ ܛܺܝܢܶܗ܃ ܕܡܶܢܳܗ ܡܶܢ ܓܒܼܺܝܠܬܳܐ ܢܶܥܒܿܶܕܼ ܡܳܐܢܶܐ̈܃ ܚܰܕܼ ܠܺܐܝܩܳܪܳܐ܂ ܘܚܰܕܼ ܠܨܰܥܪܳܐ܂
09:22 [ai]	ܐܶܢ ܕܶܝܢ ܨܒܼܳܐ ܐܰܠܳܗܳܐ ܕܰܢܚܰܘܶܐ ܪܽܘܓܼܙܶܗ܂ ܘܢܰܘܕܿܰܥ ܚܰܝܠܶܗ܃ ܐܰܝܬܿܺܝ ܒܣܽܘܓܼܳܐܐ ܕܡܰܓܿܪܰܬܼ ܪܽܘܚܶܗ ܪܽܘܓܼܙܳܐ܃ ܥܰܠ ܡܳܐܢܶܐ̈ ܕܪܽܘܓܼܙܳܐ ܕܰܓܼܡܺܝܪܺܝܢ ܠܰܐܒܼܕܼܳܢܳܐ܃
09:23 [ai]	ܘܰܐܫܦܿܰܥ ܪ̈ܰܚܡܰܘܗ̱ܝ ܥܰܠ ܡܳܐܢܶܐ̈ ܕܿܪ̈ܰܚܡܶܐ܂ ܕܰܡܛܰܝܒܼܺܝܢ ܗ̱ܘܰܘ ܠܰܐܠܳܗܳܐ ܠܬܼܶܫܒܿܽܘܚܬܳܐ܂
09:24 [ai]	ܕܺܐܝܬܼܰܝܢ ܚ̱ܢܰܢ ܩܪ̈ܰܝܳܐ܃ ܠܳܐ ܗ̱ܘܳܐ ܒܰܠܚܽܘܕܼ ܡܶܢ ܺܝܗܽܘܕܼܳܝܶܐ̈܃ ܐܶܠܳܐ ܐܳܦܼ ܡܶܢ ܥܰܡ̱ܡܶܐ̈܂
09:25 [ai]	ܐܰܝܟܿܰܢܳܐ ܕܳܐܦܼ ܒܗܽܘܫܳܥ ܐܶܡܰܪ܂ ܕܶܐܩܪܶܐ ܠܰܐܝܠܶܝܢ ܕܠܳܐ ܗ̱ܘܰܘ ܥܰܡܝ܂ ܥܰܡܳܐ ܕܺܝܠܝ܃ ܘܰܠܠܳܐ ܐܶܬܼܪܰܚܡܰܬܼ܂ ܐܶܬܼܪܰܚܡܰܬܼ܂
09:26 [ai]	ܢܶܗܘܶܐ ܓܶܝܪ ܒܕܽܘܟܿܬܼܳܐ ܟܰܪ ܕܡܶܬܼܩܪܶܝܢ ܗ̱ܘܰܘ ܠܳܐ ܥܰܡܝ܃ ܬܰܡܳܢ ܢܶܬܼܩܪܽܘܢ ܒܢܰܝܳܐ ܠܰܐܠܳܗܳܐ ܚܰܝܳܐ܂
09:27 [ai]	ܐܶܫܰܥܝܳܐ ܕܶܝܢ ܐܰܟܼܪܶܙ ܥܰܠ ܒܢܰܝ ܐܺܝܣܪܳܝܶܠ܂ ܕܶܐܢ ܢܶܗܘܶܐ ܡܶܢܝܳܢܳܐ ܕܿܰܒܼܢܰܝ ܐܺܝܣܪܳܝܶܠ ܐܰܝܟܼ ܚܳܠܳܐ ܕܰܒܼܝܰܡܳܐ܃ ܫܰܪܟܿܳܢܳܐ ܕܡܶܢܗܽܘܢ ܢܺܚܶܐ܂
09:28 [ai]	ܡܶܠܬܼܳܐ ܓܪܰܡ ܘܰܦܼܣܰܩ܂ ܘܢܶܥܒܿܕܼܺܝܗ ܡܳܪܝܳܐ ܥܰܠ ܐܰܪܥܳܐ܂
09:29 [ai]	ܘܰܐܝܟܼ ܡܶܕܶܡ ܕܿܩܰܕܶܡ ܐܶܡܰܪ ܗܽܘ ܐܶܫܰܥܝܳܐ܂ ܕܶܐܠܽܘ ܠܳܐ ܡܳܪܝܳܐ ܨܒܼܰܐܘܽܬܼ ܐܰܘܬܿܰܪ ܠܰܢ ܣܪܺܝܕܼܳܐ܃ ܐܰܝܟܼ ܣܕܼܽܘܡ ܗܳܘܶܝܢ ܗ̱ܘܰܝܢ܃ ܘܰܠܥܳܡܽܘܪܳܐ ܡܶܬܿܕܰܡܶܝܢ ܗ̱ܘܰܝܢ ܿ܀ܿ܀ܿ
09:30 [ai]	ܡܳܢܳܐ ܗܳܟܼܺܝܠ ܢܺܐܡܰܪ܂ ܕܥܰܡ̱ܡܶܐ̈ ܕܠܳܐ ܪܳܗܛܺܝܢ ܗ̱ܘܰܘ ܒܳܬܼܰܪ ܟܺܐܢܽܘܬܼܳܐ܃ ܐܰܕܼܪܶܟܼܘ ܟܺܐܢܽܘܬܼܳܐ܂ ܟܺܐܢܽܘܬܼܳܐ ܕܶܝܢ ܐܰܝܕܼܳܐ ܕܡܶܢ ܗܰܝܡܳܢܽܘܬܼܳܐ ܗ̱ܝ܂
09:31 [ai]	ܐܺܝܣܪܳܝܶܠ ܕܶܝܢ ܕܪܳܗܶܛ ܗ̱ܘܳܐ ܒܳܬܼܰܪ ܢܳܡܽܘܣܳܐ ܕܟܺܐܢܽܘܬܼܳܐ܃ ܠܢܳܡܽܘܣܳܐ ܕܟܺܐܢܽܘܬܼܳܐ ܠܳܐ ܐܰܕܼܪܶܟܼ܂
09:32 [ai]	ܡܶܛܽܠ ܡܳܢܳܐ܂ ܡܶܛܽܠ ܕܠܳܐ ܗ̱ܘܳܐ ܡܶܢ ܗܰܝܡܳܢܽܘܬܼܳܐ܃ ܐܶܠܳܐ ܡܶܢ ܥܒܼܳܕܼܰܘܗ̱ܝ̈ ܕܢܳܡܽܘܣܳܐ܂ ܐܶܬܿܬܿܩܶܠܘ ܓܶܝܪ ܒܟܺܐܦܼܳܐ ܕܬܽܘܩܰܠܬܼܳܐ܃
09:33 [ai]	ܐܰܝܟܼ ܕܰܟܼܬܼܺܝܒܼ܂ ܕܗܳܐ ܣܳܐܶܡ ܐ̱ܢܳܐ ܒܨܶܗܝܽܘܢ܃ ܟܺܐܦܼܳܐ ܕܬܽܘܩܰܠܬܼܳܐ܂ ܘܟܼܺܐܦܼܳܐ ܕܡܰܟܼܫܽܘܠܳܐ܂ ܘܡܰܢ ܕܒܳܗ ܢܗܰܝܡܶܢ ܠܳܐ ܢܶܒܼܗܰܬܼ܀

next chapter