The Comprehensive Aramaic Lexicon

13:01 [ai]	ܟܽܠ ܢܦܼܶܫ ܠܫܽܘܠܛܳܢܶܐ̈ ܕܪܰܒܿܽܘܬܼܳܐ ܬܶܫܬܿܰܥܒܿܰܕܼ܂ ܠܰܝܬܿ ܓܶܝܪ ܫܽܘܠܛܳܢܳܐ ܕܠܳܐ ܗ̱ܘܳܐ ܡܶܢ ܐܰܠܳܗܳܐ ܗܽܘ܂ ܘܰܐܝܠܶܝܢ ܫܽܘܠܛܳܢܶܐ̈ ܕܺܐܝܬܼܰܝܗܽܘܢ ܡܶܢ ܐܰܠܳܗܳܐ ܗܽܘ ܦܩܺܝܕܼܺܝܢ܂
13:02 [ai]	ܡܰܢ ܕܩܳܐܶܡ ܗܳܟܼܺܝܠ ܠܽܘܩܒܼܰܠ ܫܽܘܠܛܳܢܳܐ܃ ܠܽܘܩܒܼܰܠ ܦܽܘܩܕܳܢܳܐ ܕܰܐܠܳܗܳܐ ܩܳܐܶܡ܂ ܘܗܳܠܶܝܢ ܕܩܳܝܡܺܝܢ ܠܽܘܩܒܼܰܠܗܽܘܢ܂ ܕܺܝܢܳܐ ܢܶܣܒܼܽܘܢ܂
13:03 [ai]	ܕܰܝܳܢܶܐ̈ ܓܶܝܪ ܠܳܐ ܗ̱ܘܰܘ ܕܶܚܠܬܼܳܐ ܠܰܥܒܼܳܕܼܶܐ̈ ܛܳܒܼܶܐ̈܃ ܐܶܠܳܐ ܠܒܼܺܝܫܶܐ̈܂ ܨܳܒܼܶܐ ܐܰܢ̱ܬܿ ܗܳܟܼܺܝܠ ܕܠܳܐ ܬܶܕܼܚܰܠ ܡܶܢ ܫܽܘܠܛܳܢܳܐ܃ ܥܒܼܶܕܼ ܛܳܒܼܬܼܳܐ܂ ܘܬܼܶܫܒܿܽܘܚܬܳܐ ܬܶܗܘܶܐ ܠܳܟܼ ܡܶܢܶܗ܂
13:04 [ai]	ܡܫܰܡܫܳܢܳܐ ܗܽܘ ܓܶܝܪ ܕܰܐܠܳܗܳܐ܃ ܐܶܠܳܐ ܠܳܟܼ ܠܛܳܒܼܳܬܼܳܐ̈܂ ܘܶܐܢ ܒܺܝܫܬܳܐ ܥܳܒܼܶܕܼ ܐܰܢ̱ܬܿ܂ ܕܚܰܠ܂ ܠܳܐ ܗ̱ܘܳܐ ܓܶܝܪ ܣܪܺܝܩܳܐܺܝܬܼ ܐܰܣܺܝܪ ܠܣܰܦܼܣܺܪܳܐ܂ ܡܫܰܡܫܳܢܳܐ ܗܽܘ ܓܶܝܪ ܕܰܐܠܳܗܳܐ܃ ܘܬܼܳܒܼܽܘܥܳܐ ܕܪܽܘܓܼܙܳܐ ܠܰܐܝܠܶܝܢ ܕܥܳܒܼܕܺܝܢ ܒܺܝܫܳܬܼܳܐ̈܂
13:05 [ai]	ܘܡܶܛܽܠ ܗܳܢܳܐ ܐܳܠܨܳܐ ܠܰܢ ܕܢܶܫܬܿܰܥܒܿܰܕܼ܂ ܠܳܐ ܡܶܛܽܠ ܪܽܘܓܼܙܳܐ ܒܰܠܚܽܘܕܼ܃ ܐܶܠܳܐ ܐܳܦܼ ܡܶܛܽܠ ܬܺܐܪܬܿܰܢ܂
13:06 [ai]	ܡܶܛܽܠ ܗܳܢܳܐ ܐܳܦܼ ܟܣܶܦܼ ܪܺܫܳܐ ܝܳܗܒܺܝܢ ܐܢ̱ܬܿܽܘܢ܂ ܡܫܰܡܫܳܢܶܐ̈ ܐܶܢܽܘܢ ܓܶܝܪ ܕܰܐܠܳܗܳܐ܂ ܕܰܥܠܰܝܗܶܝܢ ܕܗܳܠܶܝܢ ܩܳܝܡܺܝܢ܂
13:07 [ai]	ܦܪܽܘܥܘ ܗܳܟܼܺܝܠ ܠܟܼܽܠܢܳܫ ܐܰܝܟܼ ܕܡܶܬܿܚܺܝܒܼ ܠܶܗ܂ ܠܡܰܢ ܕܰܟܼܣܶܦܼ ܪܺܫܳܐ܃ ܟܣܶܦܼ ܪܺܫܳܐ܂ ܘܰܠܡܰܢ ܕܡܰܟܼܣܳܐ܂ ܡܰܟܼܣܳܐ܂ ܘܰܠܡܰܢ ܕܕܼܶܚܠܬܼܳܐ܂ ܕܶܚܠܬܼܳܐ܂ ܘܰܠܡܰܢ ܕܺܐܝܩܳܪܳܐ܂ ܐܺܝܩܳܪܳܐ܂
13:08 [ai]	ܘܰܠܐ̱ܢܳܫ ܡܶܕܶܡ ܠܳܐ ܬܚܽܘܒܼܽܘܢ܃ ܐܶܠܳܐ ܚܰܕܼ ܠܚܰܕܼ ܠܡܰܚܳܒܼܽܘ ܿ܀ܿ܀ܿ ܡܰܢ ܕܡܰܚܶܒܼ ܓܶܝܪ ܚܰܒܼܪܶܗ܃ ܢܳܡܽܘܣܳܐ ܡܰܠܺܝ܂
13:09 [ai]	ܘܳܐܦܼ ܗܳܝ ܓܶܝܪ ܕܶܐܡܰܪ܂ ܕܠܳܐ ܬܓܼܽܘܪ܃ ܘܠܳܐ ܬܶܩܛܽܘܠ܃ ܘܠܳܐ ܬܶܓܼܢܽܘܒܼ܃ ܘܠܳܐ ܬܶܪܰܓܼ܃ ܘܶܐܢ ܐܺܝܬܼ ܦܽܘܩܕܳܢܳܐ ܐ̱ܚܪܺܢܳܐ܂ ܒܗܳܕܼܶܐ ܡܶܠܬܼܳܐ ܡܶܫܬܿܰܠܰܡ܂ ܕܬܶܪܚܰܡ ܠܩܰܪܺܝܒܼܳܟܼ ܐܰܝܟܼ ܢܰܦܼܫܳܟܼ܂
13:10 [ai]	ܚܽܘܒܿܳܐ ܠܩܰܪܺܝܒܼܶܗ ܒܺܝܫܬܳܐ ܠܳܐ ܣܳܥܰܪ܂ ܡܶܛܽܠ ܕܚܽܘܒܿܳܐ ܡܽܘܠܳܝܶܗ ܗ̱ܽܘ ܕܢܳܡܽܘܣܳܐ܂
13:11 [ai]	ܘܳܐܦܼ ܗܳܕܼܶܐ ܕܰܥܘ܃ ܕܙܰܒܼܢܳܐ ܗܽܘ܂ ܘܫܳܥܬܼܳܐ ܗ̱ܝ܂ ܡܶܟܿܺܝܠ ܕܢܶܬܿܥܺܝܪ ܡܶܢ ܫܶܢܬܼܰܢ܂ ܗܳܫܳܐ ܗܽܘ ܓܶܝܪ ܐܶܬܼܩܰܪܰܒܼܘ ܠܰܢ ܚܰܝܰܝܢ̈ ܝܰܬܿܺܝܪ ܡܶܢ ܕܟܰܕܼ ܗܰܝܡܶܢܢ܂
13:12 [ai]	ܠܺܠܝܳܐ ܡܶܟܿܺܝܠ ܥܒܼܰܪ܂ ܘܺܐܝܡܳܡܳܐ ܩܪܶܒܼ܂ ܢܢܺܝܚ ܡܶܢܰܢ ܗܳܟܼܺܝܠ ܥܒܼܳܕܼܶܐ̈ ܕܚܶܫܽܘܟܼܳܐ܃ ܘܢܶܠܒܿܰܫ ܙܰܝܢܶܗ ܕܢܽܘܗܪܳܐ܂
13:13 [ai]	ܘܰܐܝܟܼ ܕܒܺܐܝܡܳܡܳܐ ܒܶܐܣܟܿܺܡܳܐ ܢܗܰܠܶܟܼ܂ ܠܳܐ ܒܰܙܡܳܪܳܐ܂ ܘܠܳܐ ܒܪܰܘܳܝܽܘܬܼܳܐ܂ ܘܠܳܐ ܒܡܰܕܼܡܟܼܳܐ ܛܰܢܦܼܳܐ܂ ܘܠܳܐ ܒܰܚܣܳܡܳܐ ܘܰܒܚܶܪܝܳܢܳܐ܂
13:14 [ai]	ܐܶܠܳܐ ܠܽܘܒܼܫܽܘܗ̱ܝ ܠܡܳܪܰܢ ܝܶܫܽܘܥ ܡܫܺܝܚܳܐ܃ ܘܠܳܐ ܬܺܐܨܦܿܽܘܢ ܕܒܶܣܪܟܼܽܘܢ ܠܰܪ̈ܓܼܺܝܓܼܳܬܼܳܐ܂

next chapter