← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62045: Rom

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Show manuscript variants

previous chapter


14:01 [ai]ܠܰܐܝܢܳܐ ܕܶܝܢ ܕܰܟܼܪܺܝܗ ܒܗܰܝܡܳܢܽܘܬܼܳܐ܃ ܗܰܒܼܘ ܠܶܗ ܐܺܝܕܼܳܐ܂ ܘܠܳܐ ܬܶܗܘܽܘܢ ܡܶܬܼܦܿܰܠܓܼܺܝܢ ܒܡܰܚܫܒܼܳܬܼܟܼܽܘܢ̈܂
14:02 [ai]ܐܺܝܬܼ ܓܶܝܪ ܕܰܡܗܰܝܡܶܢ ܕܟܽܠܡܶܕܶܡ ܢܶܐܟܼܽܘܠ܂ ܘܕܼܰܟܼܪܺܝܗ ܝܰܪܩܳܐ ܗܽܘ ܐܳܟܼܶܠ܂
14:03 [ai]ܗܰܘ ܕܶܝܢ ܕܳܐܟܼܶܠ܂ ܠܗܰܘ ܡܰܢ ܕܠܳܐ ܐܳܟܼܶܠ܂ ܠܳܐ ܢܫܽܘܛ܂ ܘܗܰܘ ܡܰܢ ܕܠܳܐ ܐܳܟܼܶܠ܂ ܠܗܰܘ ܡܰܢ ܕܳܐܟܼܶܠ܂ ܠܳܐ ܢܕܼܽܘܢ܂ ܐܰܠܳܗܳܐ ܓܶܝܪ ܩܰܪܒܼܶܗ܂
14:04 [ai]ܐܰܢ̱ܬܿ܂ ܡܰܢ ܐܰܢ̱ܬܿ ܕܕܼܳܐܶܢ ܐܰܢ̱ܬܿ ܠܥܰܒܼܕܿܳܐ ܕܠܳܐ ܕܺܝܠܳܟܼ܂ ܕܶܐܢ ܩܳܐܶܡ܂ ܠܡܳܪܶܗ ܩܳܐܶܡ܂ ܘܶܐܢ ܢܳܦܼܶܠ܂ ܠܡܳܪܶܗ ܢܳܦܼܶܠ܂ ܡܩܳܡ ܗ̱ܽܘ ܕܶܝܢ ܩܳܐܶܡ܂ ܡܳܛܶܐ ܓܶܝܪ ܒܺܐܝܕܼܰܝ̈ ܡܳܪܶܗ ܕܰܢܩܺܝܡܺܝܘܗ̱ܝ܂
14:05 [ai]ܐܺܝܬܼ ܕܕܼܳܐܶܢ ܝܰܘܡܳܐ ܡܶܢ ܝܰܘܡܳܐ܂ ܘܺܐܝܬܼ ܕܕܼܳܐܶܢ ܟܽܠܗܽܘܢ ܝܰܘܡܳܬܼܳܐ̈܂ ܟܽܠܢܳܫ ܕܶܝܢ ܒܡܰܕܿܥܳܐ ܕܢܰܦܼܫܶܗ ܢܶܫܬܿܰܪܰܪ܂
14:06 [ai]ܡܰܢ ܕܡܶܬܼܪܰܥܶܐ ܕܝܰܘܡܳܐ܃ ܠܡܳܪܶܗ ܡܶܬܼܪܰܥܶܐ܂ ܘܟܼܽܠ ܕܠܳܐ ܡܶܬܼܪܰܥܶܐ ܕܝܰܘܡܳܐ܃ ܠܡܳܪܶܗ ܠܳܐ ܡܶܬܼܪܰܥܶܐ܂ ܘܕܼܳܐܟܼܶܠ܂ ܠܡܳܪܶܗ ܐܳܟܼܶܠ܂ ܘܠܰܐܠܳܗܳܐ ܡܰܘܕܿܶܐ܂ ܘܰܕܼܠܳܐ ܐܳܟܼܶܠ܂ ܠܡܳܪܶܗ ܠܳܐ ܐܳܟܼܶܠ܂ ܘܡܰܘܕܿܶܐ ܠܰܐܠܳܗܳܐ܂
14:07 [ai]ܠܰܝܬܿ ܓܶܝܪ ܐ̱ܢܳܫ ܡܶܢܰܢ ܕܰܠܢܰܦܼܫܶܗ ܚܰܝ܂ ܘܠܰܝܬܿ ܐ̱ܢܳܫ ܕܰܠܢܰܦܼܫܶܗ ܡܳܐܶܬܼ܂
14:08 [ai]ܡܶܛܽܠ ܕܶܐܢ ܚܳܐܶܝܢܰܢ܃ ܠܡܳܪܰܢ ܚܳܐܶܝܢܰܢ܂ ܘܶܐܢ ܡܳܝܬܿܺܝܢܰܢ܃ ܠܡܳܪܰܢ ܗ̱ܽܘ ܡܳܝܬܿܺܝܢܰܢ܂ ܘܶܐܢ ܚܰܝܺܝܢܰܢ ܗܳܟܼܺܝܠ܂ ܘܶܐܢ ܡܳܝܬܿܺܝܢܰܢ܂ ܕܡܳܪܰܢ ܚܢܰܢ܂
14:09 [ai]ܡܶܛܽܠ ܗܳܢܳܐ ܐܳܦܼ ܡܫܺܝܚܳܐ ܡܺܝܬܼ ܘܰܚܝܳܐ܂ ܘܩܳܡ܃ ܕܗܽܘ ܢܶܗܘܶܐ ܡܳܪܝܳܐ ܠܡܺܝܬܼܶܐ̈ ܘܰܠܚܰܝ̈ܶܐ܂
14:10 [ai]ܐܰܢ̱ܬܿ ܕܶܝܢ܂ ܡܳܢܳܐ ܕܳܐܶܢ ܐܰܢ̱ܬܿ ܠܰܐܚܽܘܟܼ܂ ܐܰܘ ܐܳܦܼ ܐܰܢ̱ܬܿ܂ ܠܡܳܢܳܐ ܫܳܐܶܛ ܐܰܢ̱ܬܿ ܠܰܐܚܽܘܟܼ܂ ܟܽܠܰܢ ܓܶܝܪ ܥܬܼܺܝܕܼܺܝܢܰܢ ܠܰܡܩܳܡ ܩܕܼܳܡ ܒܺܝܡ ܕܰܡܫܺܝܚܳܐ܂
14:11 [ai]ܐܰܝܟܼ ܕܰܟܼܬܼܺܝܒܼ܂ ܕܚܰܝ ܐ̱ܢܳܐ ܐܳܡܰܪ ܡܳܪܝܳܐ܃ ܕܠܺܝ ܬܶܟܿܽܘܦܼ ܟܽܠ ܒܪܽܘܟܼ܃ ܘܠܺܝ ܢܰܘܕܿܶܐ ܟܽܠ ܠܶܫܳܢ܂
14:12 [ai]ܡܳܕܼܶܝܢ ܟܽܠ ܐ̱ܢܳܫ ܡܶܢܰܢ܃ ܦܶܬܼܓܼܳܡܳܐ ܚܠܳܦܼ ܢܰܦܼܫܶܗ ܝܳܗܶܒܼ ܠܰܐܠܳܗܳܐ܂
14:13 [ai]ܠܳܐ ܡܶܟܿܺܝܠ ܢܕܼܽܘܢ ܚܰܕܼ ܠܚܰܕܼ܂ ܐܶܠܳܐ ܗܳܕܼܶܐ ܕܽܘܢܘ ܝܰܬܿܺܝܪܳܐܺܝܬܼ܃ ܕܬܽܘܩܰܠܬܼܳܐ ܠܰܐܚܽܘܟܼ ܠܳܐ ܬܣܺܝܡ܂
14:14 [ai]ܝܳܕܼܰܥ ܐ̱ܢܳܐ ܓܶܝܪ܂ ܘܰܡܦܿܳܣ ܐ̱ܢܳܐ ܒܡܳܪܝܳܐ ܝܶܫܽܘܥ܃ ܕܿܡܶܕܶܡ ܕܰܡܣܰܝܰܒܼ ܡܶܢ ܠܘܳܬܼܶܗ܂ ܠܰܝܬܿ܂ ܐܶܠܳܐ ܠܰܐܝܢܳܐ ܕܪܳܢܶܐ ܥܰܠ ܡܶܕܶܡ ܕܰܛܡܰܐ܃ ܠܗܰܘ ܗ̱ܽܘ ܒܰܠܚܽܘܕܼ ܛܡܰܐ܂
14:15 [ai]ܐܶܢ ܕܶܝܢ ܡܶܛܽܠ ܡܶܐܟܼܽܘܠܬܳܐ ܡܥܺܝܩ ܐܰܢ̱ܬܿ ܠܰܐܚܽܘܟܼ܃ ܠܳܐ ܗ̱ܘܳܐ ܒܚܽܘܒܿܳܐ ܡܗܰܠܶܟܼ ܐܰܢ̱ܬܿ܂ ܠܳܐ ܬܰܘܒܿܶܕܼ ܒܡܶܐܟܼܽܘܠܬܿܳܟܼ ܠܗܰܘ ܕܡܶܛܽܠܳܬܼܶܗ ܡܺܝܬܼ ܡܫܺܝܚܳܐ܂
14:16 [ai]ܘܠܳܐ ܬܶܬܼܓܿܰܕܿܰܦܼ ܛܳܒܼܬܼܰܢ܂
14:17 [ai]ܡܰܠܟܿܽܘܬܼܶܗ ܓܶܝܪ ܕܰܐܠܳܗܳܐ܃ ܠܳܐ ܗ̱ܘܳܬܼ ܡܶܐܟܼܠܳܐ ܘܡܰܫܬܿܝܳܐ܃ ܐܶܠܳܐ ܟܺܐܢܽܘܬܼܳܐ ܘܰܫܠܳܡܳܐ܂ ܘܚܰܕܼܽܘܬܼܳܐ ܒܪܽܘܚܳܐ ܕܩܽܘܕܼܫܳܐ܂
14:18 [ai]ܡܰܢ ܕܰܒܼܗܳܠܶܝܢ ܓܶܝܪ ܡܫܰܡܶܫ ܠܰܡܫܺܝܚܳܐ܃ ܫܳܦܼܰܪ ܠܰܐܠܳܗܳܐ܃ ܘܰܩܕܼܳܡ ܒܢܰܝܢܳܫܳܐ ܒܩܶܐ܂
14:19 [ai]ܗܳܫܳܐ ܒܳܬܼܰܪ ܫܠܳܡܳܐ ܢܶܪܗܰܛ܂ ܘܒܼܳܬܼܰܪ ܒܶܢܝܳܢܳܐ܂ ܚܰܕܼ ܕܚܰܕܼ܂
14:20 [ai]ܘܠܳܐ ܡܶܛܽܠ ܡܶܐܟܼܽܘܠܬܳܐ ܢܶܫܪܶܐ ܥܒܼܳܕܼܶܐ̈ ܕܰܐܠܳܗܳܐ܂ ܟܽܠܡܶܕܶܡ ܓܶܝܪ ܕܟܶܐ ܗ̱ܘ܂ ܐܶܠܳܐ ܒܺܝܫ ܗ̱ܽܘ ܠܒܼܰܪܢܳܫܳܐ ܕܰܒܼܬܼܽܘܩܰܠܬܼܳܐ ܐܳܟܼܶܠ܂
14:21 [ai]ܫܰܦܿܺܝܪ ܗ̱ܽܘ ܕܠܳܐ ܢܶܐܟܼܽܘܠ ܒܶܣܪܳܐ܂ ܘܠܳܐ ܢܶܫܬܿܶܐ ܚܰܡܪܳܐ܂ ܘܠܳܐ ܡܶܕܶܡ ܕܡܶܬܿܬܿܩܶܠ ܒܶܗ ܐܰܚܽܘܢ܂
14:22 [ai]ܐܰܢ̱ܬܿ ܕܺܐܝܬܼ ܒܳܟܼ ܗܰܝܡܳܢܽܘܬܼܳܐ܃ ܒܢܰܦܼܫܳܟܼ ܐܰܚܽܘܕܼܶܝܗ ܩܕܼܳܡ ܐܰܠܳܗܳܐ܂ ܛܽܘܒܼܰܘܗ̱ܝ ܠܡܰܢ ܕܠܳܐ ܕܳܢ ܢܰܦܼܫܶܗ ܒܡܶܕܶܡ ܕܰܦܼܪܰܫ܂
14:23 [ai]ܐܰܝܢܳܐ ܓܶܝܪ ܕܡܶܬܼܦܿܰܠܰܓܼ ܘܳܐܟܼܶܠ܃ ܐܶܬܼܚܰܝܰܒܼ ܠܶܗ܃ ܡܶܛܽܠ ܕܠܰܘ ܒܗܰܝܡܳܢܽܘܬܼܳܐ܂ ܟܽܠ ܡܶܕܶܡ ܓܶܝܪ ܕܠܳܐ ܗ̱ܘܳܐ ܡܶܢ ܗܰܝܡܳܢܽܘܬܼܳܐ܃ ܚܛܺܝܬܼܳܐ ܗܽܘ܀

next chapter