The Comprehensive Aramaic Lexicon

15:01 [ai]	ܚܰܝܳܒܼܺܝܢܰܢ ܗܳܟܼܺܝܠ ܚܢܰܢ ܚܰܝܠܬܼܳܢܶܐ̈܃ ܕܟܽܘܪܗܳܢܳܐ ܕܰܡܚܺܝܠܶܐ̈ ܢܶܫܩܽܘܠ܃ ܘܠܳܐ ܠܢܰܦܼܫܰܢ ܢܶܫܦܿܰܪ܂
15:02 [ai]	ܐܶܠܳܐ ܐ̱ܢܳܫ ܡܶܢܰܢ ܠܩܰܪܺܝܒܼܶܗ ܢܶܫܦܿܰܪ ܒܛܳܒܼܳܬܼܳܐ̈܃ ܐܰܝܟܼ ܕܰܠܒܼܶܢܝܳܢܳܐ܂
15:03 [ai]	ܡܶܛܽܠ ܕܳܐܦܼ ܡܫܺܝܚܳܐ ܠܳܐ ܗ̱ܘܳܐ ܠܢܰܦܼܫܶܗ ܫܦܼܰܪ܃ ܐܶܠܳܐ ܐܰܝܟܼ ܕܰܟܼܬܼܺܝܒܼ܂ ܕܚܶܣܕܿܳܐ ܕܰܡܚܰܣܕܼܳܢܰܝܟܿ̈ ܢܦܼܰܠ ܥܠܰܝ܂
15:04 [ai]	ܟܽܠ ܡܶܕܶܡ ܓܶܝܪ ܕܡܶܢ ܩܕܼܺܝܡ ܐܶܬܼܟܿܬܼܶܒܼ܃ ܠܝܽܘܠܦܿܳܢܳܐ ܗܽܘ ܕܺܝܠܰܢ ܐܶܬܼܟܿܬܼܶܒܼ܂ ܕܒܰܡܣܰܝܒܿܪܳܢܽܘܬܼܳܐ܂ ܘܰܒܒܼܽܘܝܳܐܳܐ ܕܰܟܼܬܼܳܒܼܶܐ̈܂ ܣܰܒܼܪܳܐ ܢܶܗܘܶܐ ܠܰܢ܂
15:05 [ai]	ܐܰܠܳܗܳܐ ܕܶܝܢ ܕܰܡܣܰܝܒܿܪܳܢܽܘܬܼܳܐ ܘܰܕܼܒܼܽܘܝܳܐܳܐ܃ ܢܶܬܿܶܠ ܠܟܼܽܘܢ ܕܫܰܘܝܽܘܬܼܳܐ ܬܶܬܼܚܰܫܒܼܽܘܢ܂ ܚܰܕܼ ܥܰܠ ܚܰܕܼ܂ ܒܝܶܫܽܘܥ ܡܫܺܝܚܳܐ܂
15:06 [ai]	ܕܰܒܼܚܰܕܼ ܪܶܥܝܳܢ ܘܰܒܚܰܕܼ ܦܽܘܡ܃ ܬܫܰܒܿܚܽܘܢ ܠܰܐܠܳܗܳܐ܃ ܐܰܒܼܽܘܗ̱ܝ ܕܡܳܪܰܢ ܝܶܫܽܘܥ ܡܫܺܝܚܳܐ܂
15:07 [ai]	ܡܶܛܽܠ ܗܳܕܼܶܐ ܗܘܰܘ ܡܩܰܪܒܼܺܝܢ ܘܛܳܥܢܺܝܢ ܠܰܚܕܼܳܕܼܶܐ̈܃ ܐܰܝܟܿܰܢܳܐ ܕܳܐܦܼ ܡܫܺܝܚܳܐ ܩܰܪܶܒܼܟܼܽܘܢ ܠܬܼܶܫܒܿܽܘܚܬܿܶܗ ܕܰܐܠܳܗܳܐ܀
15:08 [ai]	ܐܳܡܰܪ ܐ̱ܢܳܐ ܕܶܝܢ܃ ܕܝܶܫܽܘܥ ܡܫܺܝܚܳܐ ܫܰܡܶܫ ܓܙܽܘܪܬܳܐ܃ ܚܠܳܦܼ ܫܪܳܪܶܗ ܕܰܐܠܳܗܳܐ܂ ܐܰܝܟܿܰܢܳܐ ܕܢܰܫܰܪ ܡܽܘܠܟܿܳܢܳܐ ܕܰܐܒܼܳܗܳܬܼܳܐ̈܂
15:09 [ai]	ܘܥܰܡ̱ܡܶܐ̈ ܢܫܰܒܿܚܽܘܢ ܠܰܐܠܳܗܳܐ ܚܠܳܦܼ ܪ̈ܰܚܡܶܐ ܕܰܗܘܰܘ ܥܠܰܝܗܽܘܢ܂ ܐܰܝܟܼ ܕܰܟܼܬܼܺܝܒܼ܃ ܕܰܐܘܕܿܶܐ ܠܳܟܼ ܒܥܰܡ̱ܡܶܐ̈܂ ܘܠܰܫܡܳܟܼ ܐܶܙܰܡܰܪ܂
15:10 [ai]	ܘܬܼܽܘܒܼ ܐܶܡܰܪ܃ ܐܶܬܼܒܿܰܣ̱ܡܘ ܥܰܡ̱ܡܶܐ̈ ܥܰܡ ܥܰܡܶܗ܂
15:11 [ai]	ܘܬܼܽܘܒܼ ܐܶܡܰܪ܃ ܫܰܒܿܰܚܘ ܠܡܳܪܝܳܐ ܟܽܠܟܼܽܘܢ ܥܰܡ̱ܡܶܐ̈܂ ܫܰܒܿܚܳܝܗ̱ܝ̈ ܟܽܠܗܶܝܢ ܐܶܡܘܳܬܼܳܐ̈܂
15:12 [ai]	ܘܬܼܽܘܒܼ ܐܶܫܰܥܝܳܐ ܐܶܡܰܪ܃ ܕܢܶܗܘܶܐ ܥܶܩܳܪܳܐ ܠܺܐܝܫܰܝ܂ ܘܡܰܢ ܕܰܢܩܽܘܡ ܢܶܗܘܶܐ ܪܺܫܳܐ ܠܥܰܡ̱ܡܶܐ̈܂ ܘܰܥܠܰܘܗ̱ܝ ܢܣܰܒܿܪܽܘܢ ܥܰܡ̱ܡܶܐ̈܂
15:13 [ai]	ܐܰܠܳܗܳܐ ܕܶܝܢ ܕܣܰܒܼܪܳܐ܃ ܢܶܡܠܶܝܟܼܽܘܢ ܟܽܠܳܗ ܚܰܕܼܽܘܬܼܳܐ ܘܰܫܠܳܡܳܐ ܒܗܰܝܡܳܢܽܘܬܼܳܐ܂ ܕܬܶܬܼܝܰܬܿܪܽܘܢ ܒܣܰܒܼܪܶܗ܂ ܒܚܰܝܠܳܐ ܕܪܽܘܚܳܐ ܕܩܽܘܕܼܫܳܐ ܿ܀ܿ܀ܿ
15:14 [ai]	ܡܦܿܳܣ ܐ̱ܢܳܐ ܕܶܝܢ ܐܳܦܼ ܐܶܢܳܐ ܥܠܰܝܟܿܽܘܢ ܐܰܚܰܝ̈܃ ܕܳܐܦܼ ܐܰܢ̱ܬܿܽܘܢ ܡܠܶܝܢ ܐܢ̱ܬܿܽܘܢ ܗ̱ܽܘ ܛܳܒܼܬܼܳܐ܃ ܘܰܡܫܰܡܠܶܝܬܿܽܘܢ ܒܟܽܠܳܗ ܺܝܕܼܰܥܬܼܳܐ܃ ܘܡܶܫܟܿܚܺܝܢ ܐܢ̱ܬܿܽܘܢ ܐܳܦܼ ܠܰܐ̱ܚܪ̈ܳܢܶܐ ܠܡܰܪܬܿܳܝܽܘ܂
15:15 [ai]	ܩܰܠܺܝܠ ܕܶܝܢ ܡܰܪܳܚܳܐܺܝܬܼ ܟܶܬܼܒܿܶܬܼ ܠܟܼܽܘܢ ܐܰܚܰܝ̈܃ ܐܰܝܟܿܰܢܳܐ ܕܰܐܥ̱ܗܶܕܼܟܼܽܘܢ ܒܛܰܝܒܿܽܘܬܼܳܐ ܕܶܐܬܼܝܰܗܒܿܰܬܼ ܠܺܝ ܡܶܢ ܐܰܠܳܗܳܐ܃
15:16 [ai]	ܕܶܐܗܘܶܐ ܡܫܰܡܫܳܢܳܐ ܠܝܶܫܽܘܥ ܡܫܺܝܚܳܐ ܒܥܰܡ̱ܡܶܐ̈܂ ܘܶܐܦܼܠܽܘܚ ܠܶܐܘܰܢܓܿܶܠܺܝܳܘܢ ܕܰܐܠܳܗܳܐ܂ ܕܢܶܗܘܶܐ ܩܽܘܪܒܿܳܢܳܐ ܕܥܰܡ̱ܡܶܐ̈܂ ܡܩܰܒܿܰܠ ܘܰܡܩܰܕܿܰܫ ܒܪܽܘܚܳܐ ܕܩܽܘܕܼܫܳܐ܂
15:17 [ai]	ܐܺܝܬܼ ܠܺܝ ܗܳܟܼܺܝܠ ܫܽܘܒܼܗܳܪܳܐ ܒܝܶܫܽܘܥ ܡܫܺܝܚܳܐ ܠܘܳܬܼ ܐܰܠܳܗܳܐ܂
15:18 [ai]	ܠܳܐ ܓܶܝܪ ܡܰܡܪܰܚ ܐ̱ܢܳܐ ܕܺܐܡܰܪ ܡܶܕܶܡ ܕܠܳܐ ܣܥܰܪ ܒܺܐܝܕܼܰܝ̈ ܡܫܺܝܚܳܐ܂ ܠܡܰܫܡܥܳܐ ܕܥܰܡ̱ܡܶܐ̈܃ ܒܡܶܠܬܼܳܐ ܘܒܼܰܥܒܼܳܕܼܶܐ̈܂
15:19 [ai]	ܒܚܰܝܠܳܐ ܕܳܐܬܼܘܳܬܼܳܐ̈ ܘܰܕܿܬܼܶܕܼܡܪ̈ܳܬܼܳܐ܂ ܘܰܒܚܰܝܠܳܐ ܕܪܽܘܚܶܗ ܕܰܐܠܳܗܳܐ܂ ܐܰܝܟܿܰܢܳܐ ܕܡܶܢ ܐܽܘܪܺܫܠܶܡ ܐܶܬܼܟܿܪܶܟܼ ܥܕܼܰܡܳܐ ܠܺܐܠܽܘܪܺܝܩܳܘܢ܃ ܘܶܐܡܰܠܶܐ ܣܒܼܰܪܬܼܶܗ ܕܰܡܫܺܝܚܳܐ܂
15:20 [ai]	ܟܰܕܼ ܡܶܬܼܚܰܦܿܰܛ ܐ̱ܢܳܐ ܐܶܣܰܒܰܪ܃ ܠܳܐ ܟܰܪ ܕܶܐܬܼܩܪܺܝ ܫܡܶܗ ܕܰܡܫܺܝܚܳܐ܃ ܕܠܳܐ ܐܶܒܼܢܶܐ ܥܰܠ ܫܶܬܼܶܐܣܬܳܐ ܢܽܘܟܼܪܳܝܬܳܐ
15:21 [ai]	ܐܶܠܳܐ ܐܰܝܟܿܰܢܳܐ ܕܰܟܼܬܼܺܝܒܼ܂ ܕܰܐܝܠܶܝܢ ܕܠܳܐ ܐܶܬܼܶܐܡܰܪ ܠܗܽܘܢ ܥܠܰܘܗ̱ܝ ܢܶܚܙܽܘܢܶܗ܃ ܘܰܐܝܠܶܝܢ ܕܠܳܐ ܫܡܰܥܘ ܢܶܬܿܛܦܿܺܝܣܽܘܢ܂
15:22 [ai]	ܡܶܛܽܠ ܗܳܢܳܐ ܐܶܬܿܬܿܰܟܼܣܶܬܼ ܙܰܒܼܢܺܝܢ̈ ܣܰܓܿܺܝܳܐܢ̈܂ ܕܺܐܬܼܶܐ ܠܘܳܬܼܟܼܽܘܢ܂
15:23 [ai]	ܗܳܫܳܐ ܕܶܝܢ ܡܶܛܽܠ ܕܕܼܽܘܟܿܳܐ ܠܰܝܬܿ ܠܺܝ ܒܗܳܠܶܝܢ ܐܰܬܼܪ̈ܰܘܳܬܼܳܐ܃ ܘܰܣܘܶܐ ܗ̱ܘܺܝܬܼ ܡܶܢ ܩܕܼܳܡ ܫܢܰܝܳܐ̈ ܣܰܓܿܺܝܳܐܬܼܳܐ̈܂ ܕܺܐܬܼܶܐ ܠܘܳܬܼܟܼܽܘܢ܃
15:24 [ai]	ܡܳܐ ܕܳܐܙܶܠ ܐ̱ܢܳܐ ܠܰܐܣܦܰܢܺܝܰܐ܃ ܡܣܰܒܰܪ ܐ̱ܢܳܐ ܕܺܐܬܼܶܐ ܘܶܐܚܙܶܝܟܼܽܘܢ܃ ܘܰܐܢ̱ܬܿܽܘܢ ܬܠܰܘܽܘܢܳܢܝ ܠܬܼܰܡܳܢ܂ ܡܳܐ ܕܩܰܠܺܝܠ ܡܶܢ ܣܰܓܿܺܝ ܐܶܬܼܒܿܰܣܡܶܬܼ ܒܰܚܙܳܬܼܟܼܽܘܢ܂
15:25 [ai]	ܗܳܫܳܐ ܕܶܝܢ ܐܳܙܶܠ ܐ̱ܢܳܐ ܠܽܐܘܪܺܫܠܶܡ ܕܶܐܫܰܡܶܫ ܠܩܰܕܿܺܝܫܶܐ̈܂
15:26 [ai]	ܨܒܼܰܘ ܓܶܝܪ ܗܳܠܶܝܢ ܕܰܒܼܡܰܩܶܕܼܳܘܢܺܝܰܐ܂ ܘܒܼܰܐܟܼܰܐܺܝܰܐ܃ ܕܫܰܘܬܿܳܦܼܽܘܬܼܳܐ ܬܶܗܘܶܐ ܠܗܽܘܢ ܥܰܡ ܡܶܣܟܿܺܢܶܐ̈ ܩܰܕܿܺܝܫܶܐ̈ ܕܺܐܝܬܼ ܒܽܐܘܪܺܫܠܶܡ܂
15:27 [ai]	ܨܒܼܰܘ ܡܶܛܽܠ ܕܳܐܦܼ ܚܰܝܳܒܼܺܝܢ ܠܗܽܘܢ܂ ܐܶܢ ܓܶܝܪ ܒܰܕܼܪܽܘܚ ܐܶܫܬܰܘܬܿܰܦܼܘ ܥܰܡܗܽܘܢ ܥܰܡ̱ܡܶܐ̈܃ ܚܰܝܳܒܼܺܝܢ ܐܶܢܽܘܢ ܕܳܐܦܼ ܒܕܰܒܼܣܰܪ ܢܫܰܡܫܽܘܢ ܐܶܢܽܘܢ܂
15:28 [ai]	ܗܳܕܼܶܐ ܗܳܟܼܺܝܠ ܡܳܐ ܕܓܰܡܪܶܬܼ܂ ܘܚܰܬܿܡܶܬܼ ܠܗܽܘܢ ܐܳܕܼܫܳܐ ܗܳܢܳܐ܃ ܥܳܒܼܰܪ ܐ̱ܢܳܐ ܥܠܰܝܟܿܽܘܢ ܠܰܐܣܦܰܢܺܝܰܐ܂
15:29 [ai]	ܝܳܕܼܰܥ ܐ̱ܢܳܐ ܕܶܝܢ܂ ܕܶܐܡܰܬܼܝ ܕܳܐܬܼܶܐ ܐ̱ܢܳܐ ܠܘܳܬܼܟܼܽܘܢ܃ ܒܡܽܘܠܳܝܳܐ ܗܽܘ ܕܒܽܘܪܟܿܬܼܳܐ ܕܶܐܘܰܢܓܿܶܠܺܝܳܘܢ ܕܰܡܫܺܝܚܳܐ܂ ܐܳܬܼܶܐ ܐ̱ܢܳܐ܀
15:30 [ai]	ܒܿܳܥܶܐ ܐ̱ܢܳܐ ܕܶܝܢ ܡܶܢܟܼܽܘܢ ܐܰܚܰܝ̈܂ ܒܡܳܪܰܢ ܝܶܫܽܘܥ ܡܫܺܝܚܳܐ܂ ܘܰܒܚܽܘܒܿܳܐ ܕܪܽܘܚܳܐ܃ ܕܬܶܥܡܠܽܘܢ ܥܰܡܝ ܒܰܨܠܽܘܬܼܳܐ ܕܰܚܠܳܦܼܰܝ ܠܘܳܬܼ ܐܰܠܳܗܳܐ܃
15:31 [ai]	ܕܶܐܬܼܦܿܰܨܶܐ ܡܶܢ ܐܰܝܠܶܝܢ ܕܠܳܐ ܡܶܬܿܛܦܿܺܝܣܺܝܢ ܕܒܺܝܗܽܘܕܼ܂ ܘܬܼܶܫܡܶܫܬܳܐ ܕܡܰܘܒܿܶܠ ܐ̱ܢܳܐ ܠܩܰܕܿܺܝܫܶܐ̈ ܕܒܽܐܘܪܺܫܠܶܡ ܬܶܬܼܩܰܒܿܰܠ ܫܰܦܿܺܝܪ܃
15:32 [ai]	ܘܺܐܬܼܶܐ ܠܘܳܬܼܟܼܽܘܢ ܒܚܰܕܼܽܘܬܼܳܐ ܒܨܶܒܼܝܳܢܶܗ ܕܰܐܠܳܗܳܐ܃ ܘܶܐܬܿܬܿܢܺܝܚ ܥܰܡܟܼܽܘܢ܂
15:33 [ai]	ܐܰܠܳܗܳܐ ܕܶܝܢ ܕܰܫܠܳܡܳܐ ܢܶܗܘܶܐ ܥܰܡ ܟܽܠܟܼܽܘܢ܃ ܐܰܡܺܝܢ܀

next chapter