The Comprehensive Aramaic Lexicon

16:01 [ai]	ܡܰܓܼܥܶܠ ܐ̱ܢܳܐ ܠܟܼܽܘܢ ܕܶܝܢ ܠܦܼܽܘܒܼܺܐ ܚܳܬܼܰܢ܃ ܕܺܐܝܬܼܶܝܗ ܡܫܰܡܫܳܢܺܝܬܼܳܐ ܕܥܺܕ̱ܿܬܳܐ ܕܩܶܢܟܼܪܶܐܘܳܣ܂
16:02 [ai]	ܕܰܬܼܩܰܒܿܠܽܘܢܳܗ ܒܡܳܪܰܢ܂ ܐܰܝܟܼ ܕܙܳܕܼܶܩ ܠܩܰܕܿܺܝܫܶܐ̈܂ ܘܰܒܟܼܽܠ ܨܒܼܽܘ ܕܒܳܥܝܳܐ ܡܶܢܟܼܽܘܢ ܬܩܽܘܡܽܘܢ ܠܳܗ܂ ܡܶܛܽܠ ܕܳܐܦܼ ܗܺܝ ܩܳܝܽܘܡܬܳܐ ܗܘܳܬܼ ܠܣܰܓܿܺܝܶܐܐ̈܂ ܐܳܦܼ ܠܺܝ܀
16:03 [ai]	ܫܰܐܠܘ ܒܰܫܠܳܡܳܐ ܕܰܦܿܪܺܝܣܩܶܠܰܐ ܘܕܼܰܐܩܶܠܰܣ܃ ܦܳܠܚܶܐ̈ ܕܥܰܡܝ ܒܝܶܫܽܘܥ ܡܫܺܝܚܳܐ܂
16:04 [ai]	ܕܗܶܢܽܘܢ ܗܳܠܶܝܢ ܚܠܳܦܼ ܢܰܦܼܫܝ ܨܰܘܪ̈ܰܝܗܽܘܢ ܝܰܗ̱ܒܼܘ܂ ܘܠܳܐ ܗ̱ܘܳܐ ܐܶܢܳܐ ܒܰܠܚܽܘܕܼܰܝ ܡܰܘܕܿܶܐ ܐ̱ܢܳܐ ܠܗܽܘܢ܃ ܐܶܠܳܐ ܐܳܦܼ ܟܽܠܗܶܝܢ ܥܺܕܼܳܬܼܳܐ̈܂ ܕܥܰܡ̱ܡܶܐ̈܂
16:05 [ai]	ܘܗܰܒܼܘ ܫܠܳܡܳܐ ܠܥܺܕ̱ܿܬܳܐ ܕܺܐܝܬܼ ܒܒܼܰܝܬܿܗܽܘܢ܀ ܫܰܐܠܘ ܒܰܫܠܳܡܳܐ ܕܶܐܦܿܶܢܶܛܳܘܣ ܚܰܒܺܝܒܼܝ܂ ܐܰܝܢܳܐ ܕܺܐܝܬܼܰܘܗ̱ܝ ܪܺܫܺܝܬܼܳܐ ܕܰܐܟܼܰܐܺܝܰܐ ܒܰܡܫܺܝܚܳܐ܀
16:06 [ai]	ܫܰܐܠܘ ܒܰܫܠܳܡܳܐ ܕܡܰܪܺܝܰܐ܂ ܐܰܝܕܼܳܐ ܕܣܰܓܿܺܝ ܠܶܐܝܰܬܼ ܒܟܽܘܢ܀
16:07 [ai]	ܫܰܐܠܘ ܒܰܫܠܳܡܳܐ ܕܰܐܢܕܿܪܳܘܢܺܝܩܳܘܣ܂ ܘܰܕܼܝܽܘܢܺܝܰܐ ܐ̱ܚܝܳܢܰܝ̈܂ ܕܰܗܘܰܘ ܫܒܼܰܝܳܐ̈ ܥܰܡܝ܃ ܘܺܝܕܼܺܝܥܺܝܢ ܐܶܢܽܘܢ ܒܰܫܠܺܝܚܶܐ̈܂ ܘܒܼܰܡܫܺܝܚܳܐ ܩܕܼܳܡܰܝ ܗܘܰܘ܀
16:08 [ai]	ܫܰܐܠܘ ܒܰܫܠܳܡܳܐ ܕܰܐܡܦܿܠܺܝܳܘܣ ܚܰܒܺܝܒܼܝ ܒܡܳܪܰܢ܀
16:09 [ai]	ܫܰܐܠܘ ܒܰܫܠܳܡܳܐ ܕܽܐܘܪܒܼܰܢܳܘܣ܂ ܦܳܠܚܳܐ ܕܥܰܡܰܢ ܒܰܡܫܺܝܚܳܐ܃ ܘܕܼܶܐܣܛܰܟܼܽܘܣ ܚܰܒܺܝܒܼܝ܀
16:10 [ai]	ܫܰܐܠܘ ܒܰܫܠܳܡܳܐ ܕܰܐܦܿܶܠܺܐ ܓܰܒܼܝܳܐ ܒܡܳܪܰܢ܀ ܫܰܐܠܘ ܒܰܫܠܳܡܳܐ ܕܿܰܒܼܢܰܝ ܒܰܝܬܿܶܗ ܕܰܐܪܺܣܛܳܒܼܽܘܠܳܘܣ܀
16:11 [ai]	ܫܰܐܠܘ ܒܰܫܠܳܡܳܐ ܕܗܶܪܳܘܕܼܺܝܳܘܢ ܐ̱ܚܝܳܢܝ܀ ܫܰܐܠܘ ܒܰܫܠܳܡܳܐ ܕܿܰܒܼܢܰܝ ܒܰܝܬܿܶܗ ܕܢܰܪܩܺܣܳܘܣ܂ ܐܰܝܠܶܝܢ ܕܺܐܝܬܼܰܝܗܽܘܢ ܒܡܳܪܰܢ܂
16:12 [ai]	ܫܰܐܠܘ ܒܰܫܠܳܡܳܐ ܕܰܛܪܽܘܦܼܶܢܰܐ ܘܕܼܰܛܪܽܘܦܼܳܣܰܐ܂ ܕܠܺܐܝܶܝܢ̈ ܒܡܳܪܰܢ܀ ܫܰܐܠܘ ܒܰܫܠܳܡܳܐ ܕܦܿܶܪܣܺܣ ܚܰܒܺܝܒܼܬܿܝ܂ ܐܰܝܕܼܳܐ ܕܣܰܓܿܺܝ ܠܶܐܝܰܬܼ ܒܡܳܪܰܢ܀
16:13 [ai]	ܫܰܐܠܘ ܒܰܫܠܳܡܳܐ ܕܪܽܘܦܼܳܣ ܓܰܒܼܝܳܐ ܒܡܳܪܰܢ܃ ܘܕܼܶܐܡܶܗ ܕܺܝܠܶܗ ܘܕܼܺܝܠܝ܀
16:14 [ai]	ܫܰܐܠܘ ܒܰܫܠܳܡܳܐ ܕܰܐܣܽܘܢܩܪܺܛܳܘܣ ܘܕܼܰܦܼܠܶܓܼܳܘܢ ܘܰܕܼܗܶܪܡܰܐ ܘܰܕܼܦܿܰܛܪܳܒܼܰܐ ܘܰܕܼܗܶܪܡܺܐ܃ ܘܕܼܰܐܚܶܐ̈ ܕܥܰܡܗܽܘܢ܀
16:15 [ai]	ܫܰܐܠܘ ܒܰܫܠܳܡܳܐ ܕܦܼܺܝܠܳܠܳܓܼܳܘܣ ܘܰܕܼܝܽܘܠܺܝܰܐ ܘܰܕܼܢܺܐܪܳܘܣ ܘܰܕܼܚܳܬܼܶܗ ܘܕܼܳܐܠܽܘܡܦܿܰܐ܃ ܘܰܕܼܟܼܽܠܗܽܘܢ ܩܰܕܿܺܝܫܶܐ̈ ܕܥܰܡܗܽܘܢ܀
16:16 [ai]	ܫܰܐܠܘ ܒܰܫܠܳܡܳܐ ܚܰܕܼ ܕܚܰܕܼ ܒܢܽܘܫܰܩܬܳܐ ܩܰܕܿܺܝܫܬܳܐ܂ ܫܳܐܠܳܢ̈ ܒܰܫܠܳܡܟܼܽܘܢ ܟܽܠܗܶܝܢ ܥܺܕܼܳܬܼܶܗ̈ ܕܰܡܫܺܝܚܳܐ܀
16:17 [ai]	ܒܿܳܥܶܢܳܐ ܕܶܝܢ ܡܶܢܟܼܽܘܢ ܐܰܚܰܝ̈܃ ܕܬܶܙܕܿܰܗܪܽܘܢ ܡܶܢ ܐܰܝܠܶܝܢ ܕܦܳܠܰܓܼܘܳܬܼܳܐ̈ ܘܡܰܟܼܫܽܘܠܶܐ̈ ܥܳܒܼܕܺܝܢ܃ ܠܒܼܰܪ ܡܶܢ ܝܽܘܠܦܿܳܢܳܐ ܕܰܐܢ̱ܬܿܽܘܢ ܺܝܠܶܦܼܬܿܽܘܢ܃ ܕܬܶܬܼܪܰܚܩܽܘܢ ܠܟܼܽܘܢ ܡܶܢܗܽܘܢ܂
16:18 [ai]	ܐܰܝܠܶܝܢ ܓܶܝܪ ܕܗܳܟܼܰܢܳܐ ܐܶܢܽܘܢ܃ ܠܳܐ ܡܫܰܡܫܺܝܢ ܠܡܳܪܰܢ ܝܶܫܽܘܥ ܡܫܺܝܚܳܐ܂ ܐܶܠܳܐ ܠܟܼܰܪܣܗܽܘܢ܂ ܘܰܒܡܶܠܶܐ̈ ܒܰܣܺܝܡܳܬܼܳܐ̈ ܘܰܒܒܼܽܘܪ̈ܟܿܳܬܼܳܐ ܡܰܛܥܶܝܢ ܠܶܒܿܰܘܳܬܼܳܐ̈ ܕܰܦܼܫܺܝܛܶܐ̈܂
16:19 [ai]	ܡܶܫܬܿܰܡܥܳܢܽܘܬܼܟܼܽܘܢ ܕܶܝܢ ܕܺܝܠܟܼܽܘܢ܂ ܠܟܼܽܠ ܒܰܪܢܳܫ ܐܶܬܼܝܰܕܼܥܰܬܼ܂ ܚܳܕܼܶܐ ܐ̱ܢܳܐ ܗܳܟܼܺܝܠ ܒܟܽܘܢ܂ ܘܨܳܒܼܶܐ ܐ̱ܢܳܐ ܕܬܶܗܘܽܘܢ ܚܰܟܿܺܝܡܺܝܢ ܠܛܳܒܼܳܬܼܳܐ̈܂ ܘܬܼܰܡܺܝܡܺܝܢ ܠܒܼܺܝܫܳܬܼܳܐ̈܂
16:20 [ai]	ܐܰܠܳܗܳܐ ܕܶܝܢ ܕܰܫܠܳܡܳܐ܂ ܢܶܫܚܩܺܝܘܗ̱ܝ ܒܰܥܓܼܰܠ ܠܣܳܛܳܢܳܐ ܬܚܶܝܬܼ ܪ̈ܶܓܼܠܰܝܟܿܽܘܢ܂ ܛܰܝܒܿܽܘܬܼܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܬܶܗܘܶܐ ܥܰܡܟܼܽܘܢ܀
16:21 [ai]	ܫܳܐܠܺܝܢ ܒܰܫܠܳܡܟܼܽܘܢ ܛܺܝܡܳܬܼܶܐܳܘܣ܂ ܦܳܠܚܳܐ ܕܥܰܡܝ܃ ܘܠܽܘܩܺܝܳܘܣ ܘܺܐܝܰܣܳܘܢܘ ܣܳܘܣܺܝܦܿܰܛܪܳܘܣ ܐ̱ܚܝܳܢܰܝ̈܀
16:22 [ai]	ܫܳܐܶܠ ܐ̱ܢܳܐ ܒܰܫܠܳܡܟܼܽܘܢ܂ ܐܶܢܳܐ ܛܶܪܛܺܝܳܘܣ܂ ܕܟܶܬܼܒܿܶܬܼ ܐܶܓܿܰܪܬܳܐ ܒܡܳܪܰܢ܀
16:23 [ai]	ܫܳܐܶܠ ܒܰܫܠܳܡܟܼܽܘܢ܂ ܓܿܰܐܺܝܳܘܣ܂ ܡܩܰܒܿܠܳܢܝ ܘܰܕܼܟܼܽܠܳܗ ܥܺܕ̱ܿܬܳܐ܀ ܫܳܐܶܠ ܒܰܫܠܳܡܟܼܽܘܢ ܐܶܪܰܣܛܳܘܣ܂ ܪܰܒܰܝܬܳܐ ܕܰܡܕܼܺܝܢ̱ܬܳܐ܃ ܘܩܽܘܰܐܪܛܳܘܣ ܐܰܚܳܐ܀
16:24 [ai]	ܠܰܐܠܳܗܳܐ ܕܶܝܢ܂ ܗܰܘ ܕܡܶܫܟܿܰܚ ܕܰܢܫܰܪܰܪܟܼܽܘܢ ܒܶܐܘܰܢܓܿܶܠܺܝܳܘܢ ܕܺܝܠܝ܃ ܗܰܘ ܕܶܐܬܼܟܿܪܶܙ ܥܰܠ ܝܶܫܽܘܥ ܡܫܺܝܚܳܐ ܒܓܶܠܝܳܢܳܐ ܕܐ̱ܪܳܙܳܐ܃ ܕܡܶܢ ܙܰܒܼܢܰܝ̈ ܥܳܠܡܶܐ̈ ܡܟܼܰܣܰܝ ܗ̱ܘܳܐ܃
16:25 [ai]	ܐܶܬܼܓܿܠܺܝ ܕܶܝܢ ܒܙܰܒܼܢܳܐ ܗܳܢܳܐ ܒܝܰܕܼ ܟܬܼܳܒܼܶܐ̈ ܕܰܢܒܼܺܝܶܐ̈܃ ܘܰܒܦܼܽܘܩܕܳܢܶܗ ܕܰܐܠܳܗܳܐ ܕܰܠܥܳܠܰܡ܂ ܐܶܬܼܺܝܕܼܰܥ ܠܟܼܽܠܗܽܘܢ ܥܰܡ̱ܡܶܐ̈ ܠܡܰܫܡܥܳܐ ܕܗܰܝܡܳܢܽܘܬܼܳܐ܂
16:26 [ai]	ܕܗܽܘܝܽܘ ܚܰܟܿܺܝܡܳܐ ܒܰܠܚܽܘܕܼܰܘܗ̱ܝ܃ ܫܽܘܒܼܚܳܐ ܒܝܰܕܼ ܝܶܫܽܘܥ ܡܫܺܝܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
16:27 [ai]	ܛܰܝܒܿܽܘܬܼܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܥܰܡ ܟܽܠܟܼܽܘܢ܂ ܐܰܡܺܝܢ ܿ܀ܿ܀ܿ