← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62046: 1Cor

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:01 [ai]ܦܿܰܘܠܳܘܣ ܩܰܪܝܳܐ ܘܰܫܠܺܝܚܳܐ ܕܝܶܫܽܘܥ ܡܫܺܝܚܳܐ܂ ܒܨܶܒܼܝܳܢܶܗ ܕܰܐܠܳܗܳܐ܂ ܘܣܳܘܣܬܼܶܢܺܣ ܐܰܚܳܐ܃
01:02 [ai]ܠܥܺܕ̱ܿܬܳܐ ܕܰܐܠܳܗܳܐ ܕܰܒܼܩܳܘܪܺܢܬܼܳܘܣ܃ ܩܪ̈ܰܝܳܐ ܘܩܰܕܿܺܝܫܶܐ̈ ܕܰܒܼܝܶܫܽܘܥ ܡܫܺܝܚܳܐ ܡܩܰܕܿܫܺܝܢ܂ ܘܰܠܟܼܽܠܗܽܘܢ ܐܰܝܠܶܝܢ ܕܩܳܪܶܝܢ ܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܒܟܽܠ ܐܰܬܼܰܪ܃ ܕܺܝܠܗܽܘܢ ܘܕܼܺܝܠܰܢ܂
01:03 [ai]ܛܰܝܒܿܽܘܬܼܳܐ ܥܰܡܟܼܽܘܢ ܘܰܫܠܳܡܳܐ܂ ܡܶܢ ܐܰܠܳܗܳܐ ܐܰܒܼܽܘܢ܃ ܘܡܶܢ ܡܳܪܰܢ ܝܶܫܽܘܥ ܡܫܺܝܚܳܐ܀
01:04 [ai]ܡܰܘܕܿܶܐ ܐ̱ܢܳܐ ܠܰܐܠܳܗܝ ܒܟܽܠܙܒܼܰܢ ܚܠܳܦܼܰܝܟܿܽܘܢ܃ ܥܰܠ ܛܰܝܒܿܽܘܬܼܳܐ ܕܰܐܠܳܗܳܐ ܕܶܐܬܼܝܰܗܒܿܰܬܼ ܠܟܼܽܘܢ܂ ܒܝܶܫܽܘܥ ܡܫܺܝܚܳܐ܂
01:05 [ai]ܕܰܒܼܟܼܽܠ ܡܶܕܶܡ ܥܬܼܰܪܬܿܽܘܢ ܒܶܗ܃ ܒܟܽܠ ܡܶܠܳܐ܂ ܘܰܒܟܼܽܠ ܺܝܕܼܰܥܬܼܳܐ܂
01:06 [ai]ܐܰܝܟܼ ܕܣܳܗܕܿܽܘܬܼܶܗ ܕܰܡܫܺܝܚܳܐ ܐܶܫܬܿܰܪܪܰܬܼ ܒܟܽܘܢ܂
01:07 [ai]ܕܠܳܐ ܐܶܬܼܒܿܰܨܰܪܬܿܽܘܢ ܒܰܚܕܼܳܐ ܡܶܢ ܡܰܘܗܒܼܳܬܼܶܗ̈܃ ܐܶܠܳܐ ܡܣܰܟܿܶܝܢ ܐܢ̱ܬܿܽܘܢ ܠܓܼܶܠܝܳܢܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂
01:08 [ai]ܕܗܽܘ ܢܫܰܪܰܪܟܼܽܘܢ ܥܕܼܰܡܳܐ ܠܰܐ̱ܚܪܳܝܬܳܐ܂ ܕܰܕܼܠܳܐ ܪܶܫܝܳܢ ܬܶܗܘܽܘܢ ܒܝܰܘܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂
01:09 [ai]ܡܗܰܝܡܰܢ ܗ̱ܘ ܐܰܠܳܗܳܐ ܕܒܺܐܝܕܼܶܗ ܐܶܬܼܩܪܺܝܬܿܽܘܢ ܠܫܰܘܬܿܳܦܼܽܘܬܼܳܐ ܕܰܒܼܪܶܗ ܝܶܫܽܘܥ ܡܫܺܝܚܳܐ ܡܳܪܰܢ܀
01:10 [ai]ܒܿܳܥܶܐ ܐ̱ܢܳܐ ܕܶܝܢ ܡܶܢܟܼܽܘܢ ܐܰܚܰܝ̈܃ ܒܰܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܃ ܕܬܶܗܘܶܐ ܚܕܼܳܐ ܡܶܠܬܼܳܐ ܠܟܼܽܠܟܼܽܘܢ܂ ܘܠܳܐ ܢܶܗܘܝܳܢ̈ ܒܟܽܘܢ ܦܳܠܰܓܼܘܳܬܼܳܐ̈܂ ܐܶܠܳܐ ܬܶܗܘܽܘܢ ܓܡܺܝܪܺܝܢ ܒܰܚܕܼܳܐ ܬܰܪܥܺܝܬܼܳܐ ܘܰܒܚܰܕܼ ܪܶܥܝܳܢܳܐ܂
01:11 [ai]ܫܠܰܚܘ ܠܺܝ ܓܶܝܪ ܥܠܰܝܟܿܽܘܢ ܐܰܚܰܝ̈܂ ܡܶܢ ܒܶܝܬܼ ܟܠܳܐܶܐ̈܃ ܕܿܚܶܪ̈ܝܳܢܶܐ ܐܺܝܬܼ ܒܰܝܢܳܬܼܟܼܽܘܢ܂
01:12 [ai]ܗܳܕܼܶܐ ܕܶܝܢ ܐܳܡܰܪ ܐ̱ܢܳܐ܃ ܕܺܐܝܬܼ ܡܶܢܟܼܽܘܢ ܕܳܐܡܰܪ܂ ܐܶܢܳܐ ܕܦܿܰܘܠܳܘܣ ܐ̱ܢܳܐ܃ ܘܺܐܝܬܼ ܕܳܐܡܰܪ܂ ܐܶܢܳܐ ܕܰܐܦܿܳܠܳܘ ܐ̱ܢܳܐ܃ ܘܺܐܝܬܼ ܕܳܐܡܰܪ܂ ܐܶܢܳܐ ܕܟܺܐܦܼܳܐ ܐ̱ܢܳܐ܃ ܘܺܐܝܬܼ ܕܳܐܡܰܪ܂ ܐܶܢܳܐ ܕܰܡܫܺܝܚܳܐ ܐ̱ܢܳܐ܂
01:13 [ai]ܕܰܠܡܳܐ ܐܶܬܼܦܿܰܠܰܓܼ ܠܶܗ ܡܫܺܝܚܳܐ܂ ܐܰܘ ܠܡܳܐ ܦܿܰܘܠܳܘܣ ܐܶܙܕܿܩܶܦܼ ܥܰܠ ܐܰܦܿܰܝܟܿܽܘܢ̈܂ ܐܰܘ ܒܰܫܡܶܗ ܕܦܿܰܘܠܳܘܣ ܥܡܰܕܿܬܿܽܘܢ܂
01:14 [ai]ܡܰܘܕܿܶܐ ܐ̱ܢܳܐ ܠܰܐܠܳܗܝ܂ ܕܰܠܐ̱ܢܳܫ ܡܶܢܟܼܽܘܢ ܠܳܐ ܐܰܥܡܕܼܶܬܼ܃ ܐܶܠܳܐ ܠܰܟܿܪܺܝܣܦܿܳܘܣܺ ܘܰܠܓܼܰܐܺܝܳܘܣ܂
01:15 [ai]ܕܠܳܐ ܐ̱ܢܳܫ ܢܺܐܡܰܪ ܕܰܒܼܫܶܡܝ ܐܰܥܡܕܼܶܬܼ܂
01:16 [ai]ܐܰܥܡܕܼܶܬܼ ܕܶܝܢ ܐܳܦܼ ܠܒܼܰܝܬܿܶܗ ܕܶܐܣܛܶܦܼܰܢܰܐ܂ ܬܽܘܒܼ ܕܶܝܢ ܠܳܐ ܝܳܕܼܰܥ ܐ̱ܢܳܐ܂ ܐܶܢ ܠܐ̱ܢܳܫ ܐ̱ܚܪܺܝܢ ܐܰܥܡܕܼܶܬܼ܂
01:17 [ai]ܠܳܐ ܓܶܝܪ ܫܰܕܿܪܰܢܝ ܡܫܺܝܚܳܐ܂ ܠܡܰܥܡܳܕܼܽܘ܂ ܐܶܠܳܐ ܠܰܡܣܰܒܿܳܪܽܘ܂ ܠܳܐ ܒܚܶܟܼܡܰܬܼ ܡܶܠܶܐ̈܃ ܕܠܳܐ ܢܶܣܬܿܰܪܰܩ ܙܩܺܝܦܼܶܗ ܕܰܡܫܺܝܚܳܐ܀
01:18 [ai]ܡܶܠܬܼܳܐ ܓܶܝܪ ܕܰܙܩܺܝܦܼܳܐ܂ ܠܰܐܒܼܺܝܕܼܶܐ̈ ܫܳܛܝܽܘܬܼܳܐ ܗ̱ܝ܂ ܠܰܢ ܕܶܝܢ܂ ܠܰܐܝܠܶܝܢ ܕܚܰܝܺܝܢܰܢ܂ ܚܰܝܠܳܐ ܗ̱ܝ ܕܰܐܠܳܗܳܐ܂
01:19 [ai]ܟܬܼܺܝܒܼ ܓܶܝܪ܂ ܕܰܐܘܒܿܶܕܼ ܚܶܟܼܡܬܼܳܐ ܕܚܰܟܿܺܝܡܶܐ̈܃ ܘܶܐܓܼܠܽܘܙ ܬܰܪܥܺܝܬܼܳܐ ܕܣܰܟܽܘܠܬܼܳܢܶܐ̈܂
01:20 [ai]ܐܰܝܟܿܳܐ ܗܽܘ ܚܰܟܿܺܝܡܳܐ܂ ܐܰܘ ܐܰܝܟܿܳܐ ܗܽܘ ܣܳܦܼܪܳܐ܂ ܐܰܘ ܐܰܝܟܿܳܐ ܗܽܘ ܕܳܪܽܘܫܳܐ ܕܥܳܠܡܳܐ ܗܳܢܳܐ܂ ܠܳܐ ܗܳܐ ܐܰܫܛܝܳܗ ܐܰܠܳܗܳܐ ܚܶܟܼܡܬܼܶܗ ܕܥܳܠܡܳܐ ܗܳܢܳܐ܂
01:21 [ai]ܡܶܛܽܠ ܓܶܝܪ ܕܰܒܼܚܶܟܼܡܬܼܶܗ ܕܰܐܠܳܗܳܐ܂ ܠܳܐ ܺܝܕܼܰܥ ܥܳܠܡܳܐ ܒܚܶܟܼܡܬܼܳܐ ܠܰܐܠܳܗܳܐ܃ ܨܒܼܳܐ ܐܰܠܳܗܳܐ ܕܰܒܼܫܳܛܝܽܘܬܼܳܐ ܕܟܳܪܽܘܙܽܘܬܼܳܐ ܢܰܚܶܐ ܠܰܐܝܠܶܝܢ ܕܰܡܗܰܝܡܢܺܝܢ܂
01:22 [ai]ܡܶܛܽܠ ܕܺܝܗܽܘܕܼܳܝܶܐ̈ ܐܳܬܼܘܳܬܼܳܐ̈ ܫܳܐܠܺܝܢ܂ ܘܰܐܪ̈ܡܳܝܶܐ ܚܶܟܼܡܬܼܳܐ ܒܿܳܥܶܝܢ܂
01:23 [ai]ܚܢܰܢ ܕܶܝܢ ܡܰܟܼܪܙܺܝܢܰܢ ܡܫܺܝܚܳܐ܂ ܟܰܕܼ ܙܩܺܝܦܼ܃ ܬܿܽܘܩܰܠܬܳܐ ܠܺܝܗܽܘܕܼܳܝܶܐ̈܂ ܘܠܰܐܪ̈ܡܳܝܶܐ ܫܳܛܝܽܘܬܼܳܐ܃
01:24 [ai]ܠܗܳܢܽܘܢ ܕܶܝܢ ܕܰܩܪܶܝܢ܂ ܺܝܗܽܘܕܼܳܝܶܐ̈ ܘܰܐܪ̈ܡܳܝܶܐ܃ ܡܫܺܝܚܳܐ ܚܰܝܠܳܐ ܕܰܐܠܳܗܳܐ܂ ܘܚܶܟܼܡܬܼܳܐ ܕܰܐܠܳܗܳܐ܂
01:25 [ai]ܡܶܛܽܠ ܕܫܳܛܝܽܘܬܼܶܗ ܕܰܐܠܳܗܳܐ ܚܰܟܿܺܝܡܳܐ ܗ̱ܝ ܡܶܢ ܒܢܰܝܢܳܫܳܐ܃ ܘܰܟܼܪܺܝܗܽܘܬܼܶܗ ܕܰܐܠܳܗܳܐ ܚܰܝܠܬܼܳܢܝܳܐ ܗ̱ܝ ܡܶܢ ܒܢܰܝ ܐ̱ܢܳܫܳܐ܀
01:26 [ai]ܚܙܰܘ ܓܶܝܪ ܐܳܦܼ ܩܪܳܝܬܿܟܼܽܘܢ ܐܰܚܰܝ̈܃ ܕܠܳܐ ܣܰܓܿܺܝܐܺܝܢ̈ ܒܟܽܘܢ ܚܰܟܿܺܝܡܶܐ̈ ܒܰܒܼܣܰܪ܂ ܘܠܳܐ ܣܰܓܿܺܝܐܺܝܢ̈ ܒܟܽܘܢ ܚܰܝܠܬܼܳܢܶܐ̈܂ ܘܠܳܐ ܣܰܓܿܺܝܐܺܝܢ̈ ܒܟܽܘܢ ܒܢܰܝ ܛܽܘܗܡܳܐ ܪܰܒܿܳܐ܂
01:27 [ai]ܐܶܠܳܐ ܓܒܼܳܐ ܐܰܠܳܗܳܐ ܠܣܰܟܼܠܰܘܗ̱ܝ̈ ܕܥܳܠܡܳܐ ܕܢܰܒܼܗܶܬܼ ܠܚܰܟܿܺܝܡܶܐ̈܂ ܘܰܓܼܒܼܳܐ ܟܿܪ̈ܺܝܗܰܘܗ̱ܝ ܕܥܳܠܡܳܐ ܕܢܰܒܼܗܶܬܼ ܠܚܰܝܠܬܼܳܢܶܐ̈܂
01:28 [ai]ܘܰܓܼܒܼܳܐ ܠܰܐܝܠܶܝܢ ܕܰܒܼܨܺܝܪ ܛܽܘܗܡܗܽܘܢ ܒܥܳܠܡܳܐ܃ ܘܰܠܡܰܣܠܰܝܳܐ̈܂ ܘܠܰܐܝܠܶܝܢ ܕܠܰܝܬܿ ܐܶܢܽܘܢ܃ ܕܰܢܒܼܰܛܶܠ ܠܰܐܝܠܶܝܢ ܕܺܐܝܬܼܰܝܗܽܘܢ܂
01:29 [ai]ܕܠܳܐ ܢܶܫܬܿܰܒܼܗܰܪ ܟܽܠ ܒܣܰܪ ܩܕܼܳܡܰܘܗ̱ܝ܂
01:30 [ai]ܐܳܦܼ ܐܰܢ̱ܬܿܽܘܢ ܕܶܝܢ ܡܶܢܶܗ ܐܰܢ̱ܬܿܽܘܢ ܒܝܶܫܽܘܥ ܡܫܺܝܚܳܐ܃ ܗܰܘ ܕܰܗܘܳܐ ܠܰܢ ܚܶܟܼܡܬܼܳܐ ܡܶܢ ܐܰܠܳܗܳܐ܃ ܘܙܰܕܿܺܝܩܽܘܬܼܳܐ ܘܩܰܕܿܺܝܫܽܘܬܼܳܐ ܘܦܼܽܘܪܩܳܢܳܐ܂
01:31 [ai]ܐܰܝܟܼ ܕܰܟܼܬܼܺܝܒܼ܂ ܕܡܰܢ ܕܡܶܫܬܿܰܒܼܗܰܪ܂ ܒܡܳܪܝܳܐ ܢܶܫܬܿܰܒܼܗܰܪ܀

next chapter