The Comprehensive Aramaic Lexicon

02:01 [ai]	ܘܶܐܢܳܐ ܐܰܚܰܝ̈܂ ܟܰܕܼ ܐܶܬܼܺܝܬܼ ܠܘܳܬܼܟܼܽܘܢ܃ ܠܳܐ ܒܡܰܡܠ̱ܠܳܐ ܪܰܘܪܒܼܳܐ܂ ܐܳܦܼܠܳܐ ܒܚܶܟܼܡܬܼܳܐ܂ ܣܰܒܰܪܬܿܟܼܽܘܢ ܐ̱ܪܳܙܶܗ ܕܰܐܠܳܗܳܐ܀
02:02 [ai]	ܘܠܳܐ ܕܳܢܶܬܼ ܢܰܦܼܫܝ ܒܰܝܢܳܬܼܟܼܽܘܢ܂ ܐܰܝܟܼ ܕܿܡܶܕܶܡ ܝܳܕܼܰܥ ܐ̱ܢܳܐ܃ ܐܶܠܳܐ ܐܶܢ ܠܝܶܫܽܘܥ ܡܫܺܝܚܳܐ܂ ܐܳܦܼ ܠܶܗ ܟܰܕܼ ܙܩܺܝܦܼ܂
02:03 [ai]	ܘܶܐܢܳܐ ܒܕܶܚܠܬܼܳܐ ܣܰܓܿܺܝܐܬܼܳܐ܂ ܘܒܼܰܪܬܼܺܝܬܼܳܐ ܗܘܺܝܬܼ ܠܘܳܬܼܟܼܽܘܢ܂
02:04 [ai]	ܘܡܶܠܰܬܼܝ ܘܟܼܳܪܽܘܙܽܘܬܼܝ܃ ܠܳܐ ܗܘܳܬܼ ܒܰܡܦܿܺܝܣܳܢܽܘܬܼܳܐ ܕܡܶܠܶܐ̈ ܕܚܶܟܼܡܬܼܳܐ܃ ܐܶܠܳܐ ܒܬܰܚܘܺܝܬܼܳܐ ܕܪܽܘܚܳܐ܂ ܘܰܕܼܚܰܝܠܳܐ܃
02:05 [ai]	ܕܠܳܐ ܬܶܗܘܶܐ ܗܰܝܡܳܢܽܘܬܼܟܼܽܘܢ ܒܚܶܟܼܡܬܼܳܐ ܕܿܰܒܼܢܰܝܢܳܫܳܐ܃ ܐܶܠܳܐ ܒܚܰܝܠܳܐ ܕܰܐܠܳܗܳܐ܀
02:06 [ai]	ܚܶܟܼܡܬܼܳܐ ܕܶܝܢ ܡܡܰܠܠܺܝܢܰܢ ܒܰܓܼܡܺܝܪ̈ܶܐ܂ ܚܶܟܼܡܬܼܳܐ ܠܳܐ ܕܗܳܢܳܐ ܥܳܠܡܳܐ܂ ܐܳܦܼܠܳܐ ܕܫܰܠܺܝܛܳܢܰܘܗ̱ܝ̈ ܕܥܳܠܡܳܐ ܗܳܢܳܐ ܕܡܶܬܼܒܿܰܛܠܺܝܢ܂
02:07 [ai]	ܐܶܠܳܐ ܡܡܰܠܠܺܝܢܰܢ ܚܶܟܼܡܬܼܳܐ ܕܰܐܠܳܗܳܐ ܒܐ̱ܪܳܙ܂ ܗܳܝ ܕܰܡܟܼܰܣܝܳܐ ܗ̱ܘܳܬܼ܃ ܘܩܰܕܶܡ ܗ̱ܘܳܐ ܦܰܪܫܳܗ ܐܰܠܳܗܳܐ ܡܶܢ ܩܕܼܳܡ ܥܳܠܡܶܐ̈܂ ܠܫܽܘܒܼܚܳܐ ܕܺܝܠܰܢ܂
02:08 [ai]	ܗܳܝ ܕܚܰܕܼ ܡܶܢ ܫܰܠܺܝܛܳܢܶܐ̈ ܕܥܳܠܡܳܐ ܗܳܢܳܐ ܠܳܐ ܝܰܕܼܥܳܗ܂ ܐܶܠܽܘ ܓܶܝܪ ܝܰܕܼܥܽܘܗ܃ ܠܰܘ ܠܡܳܪܳܗ ܕܬܶܫܒܿܽܘܚܬܳܐ ܙܳܩܦܿܺܝܢ ܗ̱ܘܰܘ܂
02:09 [ai]	ܐܶܠܳܐ ܐܰܝܟܼ ܕܰܟܼܬܼܺܝܒܼ܂ ܕܥܰܝܢܳܐ ܠܳܐ ܚܙܳܬܼ܃ ܘܶܐܕܼܢܳܐ ܠܳܐ ܫܶܡܥܰܬܼ܃ ܘܥܰܠ ܠܶܒܿܳܐ ܕܒܰܪܢܳܫܳܐ ܠܳܐ ܣܠܶܩ܃ ܡܶܕܶܡ ܕܛܰܝܶܒܼ ܐܰܠܳܗܳܐ ܠܰܐܝܠܶܝܢ ܕܪܳܚܡܺܝܢ ܠܶܗ܀
02:10 [ai]	ܠܰܢ ܕܶܝܢ ܓܰܠܳܐ ܐܰܠܳܗܳܐ ܒܪܽܘܚܶܗ܂ ܪܽܘܚܳܐ ܓܶܝܪ ܟܽܠܡܶܕܶܡ ܒܳܨܝܳܐ܃ ܐܳܦܼ ܥܽܘܡܩܰܘܗ̱ܝ̈ ܕܰܐܠܳܗܳܐ܂
02:11 [ai]	ܐܰܝܢܳܐ ܗܽܘ ܓܶܝܪ ܒܰܪܢܳܫܳܐ ܕܝܳܕܼܰܥ ܕܰܒܼܒܼܰܪܢܳܫܳܐ܃ ܐܶܠܳܐ ܐܶܢ ܪܽܘܚܳܐ ܕܒܰܪ ܐ̱ܢܳܫܳܐ ܕܒܶܗ܂ ܗܳܟܼܰܢܳܐ ܐܳܦܼ ܕܒܰܐܠܳܗܳܐ ܐ̱ܢܳܫ ܠܳܐ ܝܳܕܼܰܥ܃ ܐܶܠܳܐ ܐܶܢ ܪܽܘܚܶܗ ܕܰܐܠܳܗܳܐ܂
02:12 [ai]	ܚܢܰܢ ܕܶܝܢ ܠܳܐ ܗ̱ܘܳܐ ܪܽܘܚܳܐ ܕܥܳܠܡܳܐ ܢܣܰܒܼܢ܃ ܐܶܠܳܐ ܪܽܘܚܳܐ ܕܡܶܢ ܐܰܠܳܗܳܐ܃ ܕܢܶܕܿܰܥ ܡܰܘܗܒܼܳܬܼܳܐ̈ ܕܡܶܢ ܐܰܠܳܗܳܐ ܐܶܬܼܺܝܗܶܒܼ ܠܰܢ ܿ܀ܿ܀ܿ
02:13 [ai]	ܐܰܝܠܶܝܢ ܕܳܐܦܼ ܡܡܰܠܠܺܝܢܰܢ܃ ܠܳܐ ܗ̱ܘܳܐ ܒܝܽܘܠܦܿܳܢܳܐ ܕܡܶܠܶܐ̈ ܕܚܶܟܼܡܬܼܳܐ ܕܿܰܒܼܢܰܝܢܳܫܳܐ܃ ܐܶܠܳܐ ܒܝܽܘܠܦܿܳܢܳܐ ܕܪܽܘܚܳܐ܂ ܘܰܠܪ̈ܽܘܚܳܢܶܐ ܪ̈ܽܘܚܳܢܝܳܬܼܳܐ ܡܦܼܰܚܡܺܝܢܰܢ܂
02:14 [ai]	ܒܰܪܢܳܫܳܐ ܓܶܝܪ ܕܒܰܢܦܼܶܫ ܗ̱ܽܘ܃ ܠܳܐ ܡܩܰܒܿܶܠ ܪ̈ܽܘܚܳܢܝܳܬܼܳܐ܂ ܫܳܛܝܽܘܬܼܳܐ ܐܶܢܶܝܢ̈ ܓܶܝܪ ܠܶܗ܂ ܘܠܳܐ ܡܶܫܟܿܰܚ ܕܢܶܕܿܰܥ ܕܰܒܼܪܽܘܚ ܡܶܬܿܕܼܺܝܢ܂
02:15 [ai]	ܪܽܘܚܳܢܳܐ ܕܶܝܢ ܟܽܠ ܡܶܕܶܡ ܕܳܐܶܢ܃ ܘܗܽܘ ܡܶܢ ܐ̱ܢܳܫ ܠܳܐ ܡܶܬܿܕܼܺܝܢ܂
02:16 [ai]	ܡܰܢܽܘ ܓܶܝܪ ܺܝܕܼܰܥ ܪܶܥܝܳܢܶܗ ܕܡܳܪܝܳܐ ܕܢܰܠܦܼܺܝܘܗ̱ܝ܂ ܠܰܢ ܕܶܝܢ ܪܶܥܝܳܢܳܐ ܕܰܡܫܺܝܚܳܐ ܐܺܝܬܼ ܠܰܢ܀

next chapter