← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62046: 1Cor

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


03:01 [ai]ܘܶܐܢܳܐ ܐܰܚܰܝ̈܂ ܠܳܐ ܐܶܫܟܿܚܶܬܼ ܕܶܐܡܰܠܶܠ ܥܰܡܟܼܽܘܢ ܐܰܝܟܼ ܕܥܰܡ ܪ̈ܽܘܚܳܢܶܐ܃ ܐܶܠܳܐ ܐܰܝܟܼ ܕܥܰܡ ܦܿܰܓܼܪ̈ܳܢܶܐ܃ ܘܰܐܝܟܼ ܕܰܠܝܰܠܽܘܕܼܶܐ̈ ܒܰܡܫܺܝܚܳܐ܂
03:02 [ai]ܚܰܠܒܼܳܐ ܐܰܫܩܺܝܬܼܟܼܽܘܢ܃ ܘܠܳܐ ܝܶܗܒܿܶܬܼ ܠܟܼܽܘܢ ܡܶܐܟܼܽܘܠܬܳܐ܂ ܠܳܐ ܓܶܝܪ ܥܕܼܰܟܿܺܝܠ ܡܶܫܟܿܚܺܝܢ ܗ̱ܘܰܝܬܿܽܘܢ܃ ܐܶܠܳܐ ܐܳܦܼܠܳܐ ܗܳܫܳܐ ܡܶܫܟܿܚܺܝܢ ܐܢ̱ܬܿܽܘܢ܂
03:03 [ai]ܥܕܼܰܟܿܺܝܠ ܓܶܝܪ ܒܰܒܼܣܰܪ ܐܰܢ̱ܬܿܽܘܢ܂ ܐܰܝܟܿܳܐ ܓܶܝܪ ܕܺܐܝܬܼ ܒܟܽܘܢ ܚܣܳܡܳܐ ܘܚܶܪܝܳܢܳܐ ܘܦܼܳܠܰܓܼܘܳܬܼܳܐ̈܃ ܠܳܐ ܗܳܐ ܦܿܰܓܼܪ̈ܳܢܶܐ ܐܢ̱ܬܿܽܘܢ܂ ܘܒܼܰܒܼܣܰܪ ܡܗܰܠܟܼܺܝܢ ܐܢ̱ܬܿܽܘܢ܃
03:04 [ai]ܡܳܐ ܕܳܐܡܰܪ ܓܶܝܪ ܐ̱ܢܳܫ ܐ̱ܢܳܫ ܡܶܢܟܼܽܘܢ܃ ܐܶܢܳܐ ܕܦܿܰܘܠܳܘܣ ܐ̱ܢܳܐ܃ ܘܰܐ̱ܚܪܺܢܳܐ ܐܳܡܰܪ ܐ̱ܢܳܐ ܕܰܐܦܿܳܠܳܘ ܐ̱ܢܳܐ܃ ܠܳܐ ܗܳܐ ܦܿܰܓܼܪ̈ܳܢܶܐ ܐܢ̱ܬܿܽܘܢ܃
03:05 [ai]ܡܰܢܽܘ ܓܶܝܪ ܦܿܰܘܠܳܘܣ܂ ܐܰܘ ܡܰܢܽܘ ܐܰܦܿܳܠܳܘ܃ ܐܶܠܳܐ ܡܫܰܡܫܳܢܶܐ̈ ܕܒܺܐܝܕܼܰܝܗܽܘܢ̈ ܗܰܝܡܶܢܬܿܽܘܢ܂ ܘܐ̱ܢܳܫ ܐ̱ܢܳܫ ܐܰܝܟܼ ܕܝܰܗ̱ܒܼ ܠܶܗ ܡܳܪܝܳܐ܂
03:06 [ai]ܐܶܢܳܐ ܢܶܨܒܿܶܬܼ܂ ܘܰܐܦܿܳܠܳܘ ܐܰܫܩܺܝ܃ ܐܶܠܳܐ ܐܰܠܳܗܳܐ ܪܰܒܺܝ܂
03:07 [ai]ܠܳܐ ܗܳܟܼܺܝܠ ܗܰܘ ܕܢܳܨܶܒܼ ܐܺܝܬܼܰܘܗ̱ܝ ܡܶܕܶܡ܂ ܘܠܳܐ ܗܰܘ ܕܡܰܫܩܶܐ܃ ܐܶܠܳܐ ܐܰܠܳܗܳܐ ܕܰܡܪܰܒܿܶܐ܂
03:08 [ai]ܡܰܢ ܕܢܳܨܶܒܼ ܕܶܝܢ܂ ܘܡܰܢ ܕܡܰܫܩܶܐ܂ ܚܰܕܼ ܐܶܢܽܘܢ܂ ܘܐ̱ܢܳܫ ܐܰܝܟܼ ܥܰܡܠܶܗ ܐܰܓܼܪܶܗ ܡܩܰܒܿܶܠ܂
03:09 [ai]ܥܰܡ ܐܰܠܳܗܳܐ ܓܶܝܪ ܦܳܠܚܺܝܢܰܢ܂ ܘܦܼܽܘܠܚܳܢܳܐ ܕܰܐܠܳܗܳܐ܂ ܘܒܼܶܢܝܳܢܳܐ ܕܰܐܠܳܗܳܐ܂ ܐܰܢ̱ܬܿܽܘܢ ܐܶܢܽܘܢ܂
03:10 [ai]ܘܰܐܝܟܼ ܛܰܝܒܿܽܘܬܼܳܐ ܕܰܐܠܳܗܳܐ ܕܶܐܬܼܝܰܗܒܿܰܬܼ ܠܺܝ܃ ܣܳܡܶܬܼ ܫܶܬܼܶܐܣܬܳܐ ܐܰܝܟܼ ܐܰܪܕܿܺܟܼܠܳܐ ܚܰܟܿܺܝܡܳܐ܂ ܐ̱ܚܪܺܢܳܐ ܕܶܝܢ ܥܠܶܝܗ ܒܳܢܶܐ܂ ܟܽܠܢܳܫ ܕܶܝܢ ܢܶܚܙܶܐ ܐܰܝܟܿܰܢ ܒܳܢܶܐ ܥܠܶܝܗ܂
03:11 [ai]ܫܶܬܼܶܐܣܬܳܐ ܓܶܝܪ ܐ̱ܚܪܺܬܼܳܐ܂ ܣܛܰܪ ܡܶܢ ܗܳܕܼܶܐ ܕܣܺܝܡܳܐ܃ ܐ̱ܢܳܫ ܠܳܐ ܡܶܫܟܿܰܚ ܠܰܡܣܳܡ܂ ܕܺܐܝܬܼܶܝܗ ܝܶܫܽܘܥ ܡܫܺܝܚܳܐ܂
03:12 [ai]ܘܶܐܢ ܐ̱ܢܳܫ ܕܶܝܢ ܒܳܢܶܐ ܥܰܠ ܗܳܕܼܶܐ ܫܶܬܼܶܐܣܬܳܐ܃ ܕܰܗܒܼܳܐ ܐܰܘ ܣܺܐܡܳܐ܂ ܐܰܘ ܟܺܐܦܼܶܐ̈ ܝܰܩܺܝܪ̈ܳܬܼܳܐ܃ ܐܰܘ ܩܰܝܣܶܐ̈ ܐܰܘ ܥܡܺܝܪܳܐ܂ ܐܰܘ ܚܰܒܿܬܼܳܐ܃
03:13 [ai]ܥܒܼܳܕܼܳܐ ܕܟܽܠܢܳܫ ܡܶܬܼܓܠܶܐ܂ ܝܰܘܡܳܐ ܓܶܝܪ ܗܰܘ ܓܳܠܶܐ ܠܶܗ܂ ܡܶܛܽܠ ܕܰܒܼܢܽܘܪܳܐ ܡܶܬܼܓܠܶܐ܂ ܘܰܥܒܼܳܕܼܶܗ ܕܟܽܠܢܳܫ ܐܰܝܟܿܰܢܳܐ ܐܺܝܬܼܰܘܗ̱ܝ܃ ܢܽܘܪܳܐ ܬܶܦܼܪܫܺܝܘܗ̱ܝ܂
03:14 [ai]ܘܰܐܝܢܳܐ ܕܰܢܩܰܘܶܐ ܥܒܼܳܕܼܶܗ܃ ܗܰܘ ܕܒܳܢܶܐ ܐܰܓܼܪܶܗ ܢܩܰܒܿܶܠ܂
03:15 [ai]ܘܰܐܝܢܳܐ ܕܰܥܒܼܳܕܼܶܗ ܢܺܐܩܰܕܼ܂ ܢܶܚܣܰܪ܂ ܗܽܘ ܕܶܝܢ ܢܶܫܬܰܘܙܰܒܼ܃ ܗܳܟܼܰܢܳܐ ܕܶܝܢ ܐܰܝܟܼ ܕܡܶܢ ܢܽܘܪܳܐ܀
03:16 [ai]ܠܳܐ ܝܳܕܼܥܺܝܢ ܐܢ̱ܬܿܽܘܢ ܕܗܰܝܟܠܶܗ ܐܰܢ̱ܬܿܽܘܢ ܕܰܐܠܳܗܳܐ܃ ܘܪܽܘܚܶܗ ܕܰܐܠܳܗܳܐ ܥܳܡܪܳܐ ܒܟܽܘܢ܂
03:17 [ai]ܘܡܰܢ ܕܰܡܚܰܒܿܶܠ ܗܰܝܟܠܶܗ ܕܰܐܠܳܗܳܐ܃ ܡܚܰܒܿܶܠ ܠܶܗ ܐܰܠܳܗܳܐ܂ ܗܰܝܟܠܶܗ ܓܶܝܪ ܕܰܐܠܳܗܳܐ ܩܰܕܿܺܝܫ ܗ̱ܽܘ ܕܰܐܢ̱ܬܿܽܘܢ ܐܶܢܽܘܢ܂
03:18 [ai]ܐ̱ܢܳܫ ܠܳܐ ܢܰܛܥܶܐ ܢܰܦܼܫܶܗ܂ ܡܰܢ ܕܣܳܒܼܰܪ ܒܟܽܘܢ ܕܚܰܟܿܺܝܡ ܗ̱ܽܘ ܒܥܳܠܡܳܐ ܗܳܢܳܐ܃ ܢܶܗܘܶܐ ܠܶܗ ܣܰܟܼܠܳܐ܂ ܕܢܶܗܘܶܐ ܚܰܟܿܺܝܡܳܐ܂
03:19 [ai]ܚܶܟܼܡܬܼܶܗ ܓܶܝܪ ܕܥܳܠܡܳܐ ܗܳܢܳܐ ܠܶܠܽܘܬܼܳܐ ܗ̱ܝ ܠܘܳܬܼ ܐܰܠܳܗܳܐ܂ ܟܬܼܺܝܒܼ ܗ̱ܽܘ ܓܶܝܪ܃ ܕܳܐܚܶܕܼ ܚܰܟܿܺܝܡܶܐ̈ ܒܚܳܪܥܽܘܬܼܗܽܘܢ܂
03:20 [ai]ܘܬܼܽܘܒܼ܃ ܡܳܪܝܳܐ ܝܳܕܼܰܥ ܡܰܚܫܒܼܳܬܼܗܽܘܢ̈ ܕܚܰܟܿܺܝܡܶܐ̈܂ ܕܿܰܣܪ̈ܺܝܩܳܢ ܐܶܢܶܝܢ̈܂
03:21 [ai]ܡܶܛܽܠ ܗܳܢܳܐ ܠܳܐ ܐ̱ܢܳܫ ܢܶܫܬܿܰܒܼܗܰܪ ܒܰܒܼܢܰܝܢܳܫܳܐ܂ ܟܽܠܡܶܕܶܡ ܓܶܝܪ ܕܺܝܠܟܼܽܘܢ ܗ̱ܽܘ܂
03:22 [ai]ܐܶܢ ܦܿܰܘܠܳܘܣ܂ ܘܶܐܢ ܐܰܦܿܳܠܳܘ܃ ܘܶܐܢ ܟܺܐܦܼܳܐ܃ ܘܶܐܢ ܥܳܠܡܳܐ܃ ܘܶܐܢ ܚܰܝ̈ܶܐ܂ ܘܶܐܢ ܡܰܘܬܳܐ܃ ܘܶܐܢ ܕܩܳܝ̈ܡܳܢ܂ ܘܶܐܢ ܕܰܥܬܼܺܝܕܼܳܢ̈܃ ܟܽܠ ܡܶܕܶܡ ܕܺܝܠܟܼܽܘܢ ܗ̱ܽܘ܂
03:23 [ai]ܘܰܐܢ̱ܬܿܽܘܢ ܕܰܡܫܺܝܚܳܐ܂ ܘܰܡܫܺܝܚܳܐ ܕܰܐܠܳܗܳܐ܀

next chapter