The Comprehensive Aramaic Lexicon

05:01 [ai]	ܣܳܟܼܳܐ ܡܶܫܬܿܰܡܥܳܐ ܒܰܝܢܳܬܼܟܼܽܘܢ ܙܳܢܝܽܘܬܼܳܐ܂ ܘܕܼܰܐܝܟܼ ܗܳܕܼܶܐ ܙܳܢܝܽܘܬܼܳܐ܂ ܐܰܝܕܼܳܐ ܕܳܐܦܼܠܳܐ ܒܶܝܬܼ ܚܰܢܦܼܶܐ̈ ܡܶܫܬܿܰܡܗܳܐ܂ ܥܕܼܰܡܳܐ ܕܢܶܣܰܒܼ ܒܪܳܐ ܐܰܢ̱ܬܿܰܬܼ ܐܰܒܼܽܘܗ̱ܝ܂
05:02 [ai]	ܘܰܐܢ̱ܬܿܽܘܢ ܚܬܼܺܝܪܺܝܢ ܐܢ̱ܬܿܽܘܢ܃ ܘܠܳܐ ܕܶܝܢ ܝܰܬܿܺܝܪܳܐܺܝܬܼ ܺܝܬܼܶܒܼܬܿܽܘܢ ܒܶܐܒܼܠܳܐ܃ ܕܢܶܫܬܿܩܶܠ ܡܶܢ ܒܰܝܢܳܬܼܟܼܽܘܢ ܗܰܘ ܡܰܢ ܕܗܳܢܳܐ ܣܽܘܥܪܳܢܳܐ ܣܥܰܪ܂
05:03 [ai]	ܐܶܢܳܐ ܓܶܝܪ ܟܰܕܼ ܪܰܚܺܝܩ ܐ̱ܢܳܐ ܡܶܢܟܼܽܘܢ ܒܰܦܼܓܼܰܪ܂ ܘܩܰܪܺܝܒܼ ܐ̱ܢܳܐ ܠܟܼܽܘܢ ܒܪܽܘܚ܃ ܡܶܢ ܟܰܕܿܽܘ ܕܳܢܶܬܼ ܐܰܝܟܼ ܩܰܪܺܝܒܼܳܐ ܠܗܰܘ ܡܰܢ ܕܗܳܕܼܶܐ ܣܳܥܰܪ܃
05:04 [ai]	ܕܒܰܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܬܶܬܼܟܿܰܢܫܽܘܢ ܟܽܠܟܼܽܘܢ܃ ܘܶܐܢܳܐ ܥܰܡܟܼܽܘܢ ܒܪܽܘܚ܃ ܥܰܡ ܚܰܝܠܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܃
05:05 [ai]	ܘܬܼܰܫܠܡܽܘܢܶܗ ܠܗܳܢܳܐ ܠܣܳܛܳܢܳܐ ܠܰܐܒܼܕܼܳܢܳܐ ܕܦܰܓܼܪܶܗ܃ ܕܰܒܼܪܽܘܚ ܢܺܚܶܐ ܒܝܰܘܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܀
05:06 [ai]	ܠܳܐ ܫܰܦܿܺܝܪ ܫܽܘܒܼܗܳܪܟܼܽܘܢ܂ ܠܳܐ ܝܳܕܼܥܺܝܢ ܐܢ̱ܬܿܽܘܢ ܕܰܚܡܺܝܪܳܐ ܩܰܠܺܝܠ ܟܽܠܳܗ ܓܒܼܺܝܠܬܳܐ ܡܰܚܡܰܥ܃
05:07 [ai]	ܕܰܟܿܰܘ ܡܶܢܟܼܽܘܢ ܚܡܺܝܪܳܐ ܥܰܬܿܺܝܩܳܐ܃ ܕܬܶܗܘܽܘܢ ܓܒܼܺܝܠܬܳܐ ܚܰܕܼ̱ܬܼܳܐ܃ ܐܰܝܟܿܰܢܳܐ ܕܺܐܝܬܼܰܝܟܿܽܘܢ ܦܰܛܺܝܪܳܐ܂ ܦܶܨܚܳܐ ܓܶܝܪ ܕܺܝܠܰܢ܃ ܡܫܺܝܚܳܐ ܗܽܘ܂ ܕܶܐܬܼܢܟܼܶܣ ܚܠܳܦܼܰܝܢ܂
05:08 [ai]	ܡܶܛܽܠ ܗܳܢܳܐ ܢܶܥܒܿܶܕܼ ܥܰܕܼܥܺܕܼܳܐ܃ ܠܳܐ ܒܰܚܡܺܝܪܳܐ ܥܰܬܿܺܝܩܳܐ܂ ܘܠܳܐ ܒܰܚܡܺܝܪܳܐ ܕܒܺܝܫܽܘܬܼܳܐ ܘܰܕܼܡܰܪܺܝܪܽܘܬܼܳܐ܃ ܐܶܠܳܐ ܒܰܚܡܺܝܪܳܐ ܕܕܼܰܟܼܝܽܘܬܼܳܐ ܘܰܕܼܩܰܕܿܺܝܫܽܘܬܼܳܐ܀
05:09 [ai]	ܟܶܬܼܒܿܶܬܼ ܠܟܼܽܘܢ ܒܶܐܓܿܰܪܬܳܐ܃ ܕܠܳܐ ܬܶܬܼܚܰܠܛܽܘܢ ܥܰܡ ܙܰܢܳܝܶܐ̈܂
05:10 [ai]	ܠܳܐ ܕܶܝܢ ܐܳܡܰܪ ܐ̱ܢܳܐ ܥܰܠ ܙܰܢܳܝܶܐ̈ ܕܰܒܼܥܳܠܡܳܐ ܗܳܢܳܐ܂ ܐܰܘ ܥܰܠ ܥܳܠܽܘܒܼܶܐ̈܂ ܐܰܘ ܥܰܠ ܚܳܛܽܘܦܼܶܐ̈܂ ܐܰܘ ܥܰܠ ܦܳܠܚܰܝ̈ ܦܿܬܼܰܟܼܪ̈ܶܐ܂ ܘܶܐܢ ܠܳܐ܃ ܚܰܝܳܒܼܺܝܢ ܗ̱ܘܰܝܬܿܽܘܢ ܐܳܦܼ ܡܶܢ ܥܳܠܡܳܐ ܠܡܶܦܿܰܩ܂
05:11 [ai]	ܗܳܕܼܶܐ ܕܶܝܢ ܕܟܶܬܼܒܿܶܬܼ ܠܟܼܽܘܢ ܕܠܳܐ ܬܶܬܼܚܰܠܛܽܘܢ܃ ܐܶܢ ܐܺܝܬܼ ܕܡܶܬܼܩܪܶܐ ܐܰܚܳܐ܂ ܘܺܐܝܬܼܰܘܗ̱ܝ ܙܰܢܳܝܳܐ܂ ܐܰܘ ܥܳܠܽܘܒܼܳܐ܂ ܐܰܘ ܦܳܠܰܚ ܦܿܬܼܰܟܼܪ̈ܶܐ܂ ܐܰܘ ܡܨܰܥܪܳܢ܂ ܐܰܘ ܪܰܘܳܝ܂ ܐܰܘ ܚܳܛܽܘܦܼ܂ ܥܰܡ ܐܰܝܢܳܐ ܕܗܳܟܼܰܢܳܐ ܗܽܘ܃ ܐܳܦܼܠܳܐ ܠܰܚܡܳܐ ܠܡܶܐܟܼܰܠ܂
05:12 [ai]	ܡܳܐ ܠܺܝ ܓܶܝܪ ܠܰܡܕܼܳܢ ܠܒܼܰܪ̈ܳܝܶܐ܂ ܐܰܢ̱ܬܿܽܘܢ ܠܕܼܰܠܓܼܰܘ ܕܽܘܢܘ܃
05:13 [ai]	ܠܒܼܰܪ̈ܳܝܶܐ ܕܶܝܢ ܐܰܠܳܗܳܐ ܕܳܐܶܢ܂ ܘܫܽܘܩܠܽܘܗ̱ܝ ܠܒܼܺܝܫܳܐ ܡܶܢ ܒܰܝܢܳܬܼܟܼܽܘܢ܀

next chapter