← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62046: 1Cor

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


06:01 [ai]ܡܰܡܪܰܚ ܐ̱ܢܳܫ ܡܶܢܟܼܽܘܢ ܟܰܕܼ ܐܺܝܬܼ ܠܶܗ ܕܺܝܢܳܐ ܥܰܡ ܐܰܚܽܘܗ̱ܝ܃ ܕܰܢܕܼܽܘܢ ܩܕܼܳܡ ܥܰܘܳܠܶܐ̈܂ ܘܠܳܐ ܩܕܼܳܡ ܩܰܕܿܺܝܫܶܐ̈܃
06:02 [ai]ܐܰܘ ܠܳܐ ܝܳܕܼܥܺܝܢ ܐܢ̱ܬܿܽܘܢ ܕܩܰܕܿܺܝܫܶܐ̈ ܠܥܳܠܡܳܐ ܢܕܼܽܘܢܽܘܢ܂ ܘܶܐܢ ܥܳܠܡܳܐ ܒܟܽܘܢ ܡܶܬܿܕܼܺܝܢ܃ ܠܳܐ ܫܳܘܶܝܢ ܐܢ̱ܬܿܽܘܢ ܠܰܡܕܼܳܢ ܕܺܝܢܶܐ̈ ܕܰܩܕܿܩܶܐ̈܃
06:03 [ai]ܠܳܐ ܝܳܕܼܥܺܝܢ ܐܢ̱ܬܿܽܘܢ ܕܰܠܡܰܠܰܐܟܼܶܐ̈ ܕܳܝܢܺܝܢܰܢ܂ ܚܰܕܼ ܟܡܳܐ ܐܰܝܠܶܝܢ ܕܰܕܼܥܳܠܡܳܐ ܐܶܢܶܝܢ̈ ܗܳܢܳܐ܃
06:04 [ai]ܐܶܠܳܐ ܐܶܢ ܐܺܝܬܼ ܠܟܼܽܘܢ ܕܺܝܢܳܐ ܥܰܠ ܕܥܳܠܡܳܐ܃ ܠܰܐܝܠܶܝܢ ܕܰܒܼܣܶܝܢ ܒܥܺܕ̱ܿܬܳܐ܂ ܐܰܘܬܶܒܼܘ ܠܟܼܽܘܢ ܒܕܺܝܢܳܐ܂
06:05 [ai]ܠܟܼܽܘܳܐܪܳܐ ܗܽܘ ܕܶܝܢ ܐܳܡܰܪ ܐ̱ܢܳܐ ܠܟܼܽܘܢ܂ ܗܳܟܼܰܢܳܐ ܠܰܝܬܿ ܒܟܽܘܢ ܐܳܦܼܠܳܐ ܚܰܕܼ ܚܰܟܿܺܝܡܳܐ܃ ܕܢܶܫܟܿܰܚ ܢܰܫܘܶܐ ܒܶܝܬܼ ܐܰܚܳܐ ܠܰܐܚܽܘܗ̱ܝ܂
06:06 [ai]ܐܶܠܳܐ ܐܰܚܳܐ ܥܰܡ ܐܰܚܽܘܗ̱ܝ ܡܶܬܿܕܼܺܝܢ܂ ܘܬܼܽܘܒܼ ܩܕܼܳܡ ܐܰܝܠܶܝܢ ܕܠܳܐ ܡܗܰܝܡܢܺܝܢ܂
06:07 [ai]ܡܶܢ ܟܰܕܿܽܘ ܗܳܟܼܺܝܠ ܩܢܽܘܡܟܼܽܘܢ ܚܳܒܼܬܿܽܘܢ ܠܟܼܽܘܢ܃ ܕܕܼܺܝܢܳܐ ܚܰܕܼ ܥܰܡ ܚܰܕܼ ܐܺܝܬܼ ܠܟܼܽܘܢ܂ ܡܶܛܽܠ ܡܳܢܳܐ ܓܶܝܪ ܠܳܐ ܡܶܬܼܥܰܠܒܼܺܝܢ ܐܢ̱ܬܿܽܘܢ܂ ܘܡܶܛܽܠ ܡܳܢܳܐ ܠܳܐ ܡܶܬܼܓܿܰܠܙܺܝܢ ܐܢ̱ܬܿܽܘܢ܂
06:08 [ai]ܐܶܠܳܐ ܐܰܢ̱ܬܿܽܘܢ ܥܳܠܒܺܝܢ ܐܢ̱ܬܿܽܘܢ܂ ܘܓܼܳܠܙܺܝܢ ܐܢ̱ܬܿܽܘܢ܂ ܐܳܦܼ ܠܰܐܚܰܝܟܿܽܘܢ̈܂
06:09 [ai]ܐܰܘ ܠܳܐ ܝܳܕܼܥܺܝܢ ܐܢ̱ܬܿܽܘܢ܂ ܕܥܰܘܳܠܶܐ̈ ܡܰܠܟܿܽܘܬܼܶܗ ܕܰܐܠܳܗܳܐ ܠܳܐ ܝܳܪܬܿܺܝܢ܃ ܠܳܐ ܬܶܛܥܽܘܢ܂ ܠܳܐ ܙܰܢܳܝܶܐ̈܂ ܘܠܳܐ ܦܳܠܚܰܝ̈ ܦܿܬܼܰܟܼܪ̈ܶܐ܂ ܘܠܳܐ ܓܿܰܝܳܪ̈ܶܐ܂ ܘܠܳܐ ܡܚܰܒܿܠܶܐ̈܂ ܘܠܳܐ ܫܳܟܼܒܰܝ̈ ܥܰܡ ܕܿܶܟܼܪ̈ܶܐ܂
06:10 [ai]ܘܠܳܐ ܥܳܠܽܘܒܼܶܐ̈܂ ܘܠܳܐ ܓܰܢܳܒܼܶܐ̈܂ ܘܠܳܐ ܪ̈ܰܘܳܝܶܐ܂ ܘܠܳܐ ܡܨܰܥܪ̈ܳܢܶܐ܂ ܘܠܳܐ ܚܳܛܽܘܦܼܶܐ̈܃ ܗܳܠܶܝܢ ܡܰܠܟܿܽܘܬܼܶܗ ܕܰܐܠܳܗܳܐ ܠܳܐ ܝܳܪܬܿܺܝܢ܂
06:11 [ai]ܘܗܳܠܶܝܢ ܐܺܝܬܼ ܗ̱ܘܰܝ̈ ܒܐ̱ܢܳܫ ܐ̱ܢܳܫ ܡܶܢܟܼܽܘܢ܂ ܐܶܠܳܐ ܣܚܰܝܬܿܽܘܢ܂ ܘܶܐܬܼܩܰܕܿܰܫܬܿܽܘܢ܂ ܘܶܐܙܕܿܰܕܿܰܩܬܿܽܘܢ܃ ܒܰܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܃ ܘܰܒܪܽܘܚܶܗ ܕܰܐܠܳܗܰܢ܀
06:12 [ai]ܟܽܠ ܫܰܠܺܝܛ ܠܺܝ܂ ܐܶܠܳܐ ܠܳܐ ܟܽܠ ܦܰܩܳܚ ܠܺܝ܂ ܟܽܠ ܫܰܠܺܝܛ ܠܺܝ܂ ܐܶܠܳܐ ܥܠܰܝ ܐ̱ܢܳܫ ܠܳܐ ܢܶܫܬܿܰܠܰܛ܂
06:13 [ai]ܡܶܐܟܼܽܘܠܬܳܐ ܕܟܰܪܣܳܐ܃ ܘܟܼܰܪܣܳܐ ܕܡܶܐܟܼܽܘܠܬܳܐ܂ ܐܰܠܳܗܳܐ ܕܶܝܢ ܠܬܼܰܪ̈ܬܿܰܝܗܶܝܢ ܡܒܼܰܛܶܠ܂ ܦܰܓܼܪܳܐ ܕܶܝܢ ܠܳܐ ܠܙܳܢܝܽܘܬܼܳܐ܂ ܐܶܠܳܐ ܠܡܳܪܰܢ܃ ܘܡܳܪܰܢ ܠܦܼܰܓܼܪܳܐ܂
06:14 [ai]ܐܰܠܳܗܳܐ ܕܶܝܢ ܘܰܠܡܳܪܰܢ ܐܰܩܺܝܡ܃ ܘܠܰܢ ܡܩܺܝܡ ܒܚܰܝܠܶܗ܂
06:15 [ai]ܠܳܐ ܝܳܕܼܥܺܝܢ ܐܢ̱ܬܿܽܘܢ ܕܿܦܼܰܓܼܪ̈ܰܝܟܿܽܘܢ ܗܰܕܳܡܶܐ̈ ܐܶܢܽܘܢ ܕܰܡܫܺܝܚܳܐ܃ ܢܶܣܰܒܼ ܗܰܕܿܳܡܳܐ ܕܰܡܫܺܝܚܳܐ ܢܶܥܒܿܕܼܺܝܘܗ̱ܝ ܗܰܕܿܳܡܳܐ ܕܙܳܢܺܝܬܼܳܐ܃ ܚܳܣ܂
06:16 [ai]ܐܰܘ ܠܳܐ ܝܳܕܼܥܺܝܢ ܐܢ̱ܬܿܽܘܢ܂ ܕܡܰܢ ܕܢܳܩܶܦܼ ܠܙܳܢܺܝܬܼܳܐ܂ ܚܰܕܼ ܗ̱ܽܘ ܦܓܼܰܪ܂ ܐܰܡܺܝܪ ܓܶܝܪ܂ ܕܢܶܗܘܽܘܢ ܬܿܪ̈ܰܝܗܽܘܢ ܚܰܕܼ ܦܓܼܰܪ܂
06:17 [ai]ܡܰܢ ܕܢܳܩܶܦܼ ܕܶܝܢ ܠܡܳܪܰܢ܃ ܗܳܘܶܐ ܥܰܡܶܗ ܚܕܼܳܐ ܪܽܘܚ܂
06:18 [ai]ܥܪܽܘܩܘ ܡܶܢ ܙܳܢܝܽܘܬܼܳܐ܂ ܟܽܠ ܚܛܺܝܬܼܳܐ ܕܢܶܥܒܿܶܕܼ ܒܰܪܢܳܫܳܐ܃ ܠܒܼܰܪ ܡܶܢ ܦܰܓܼܪܶܗ ܗ̱ܺܝ܂ ܡܰܢ ܕܰܡܙܰܢܶܐ ܕܶܝܢ܃ ܒܦܰܓܼܪܶܗ ܗ̱ܽܘ ܚܳܛܶܐ܂
06:19 [ai]ܐܰܘ ܠܳܐ ܝܳܕܼܥܺܝܢ ܐܢ̱ܬܿܽܘܢ܂ ܕܦܰܓܼܪܟܼܽܘܢ ܗܰܝܟܠܳܐ ܗܽܘ ܕܪܽܘܚܳܐ ܕܩܽܘܕܼܫܳܐ܂ ܕܥܳܡܪܳܐ ܒܟܽܘܢ܃ ܗܳܝ ܕܩܰܒܿܶܠܬܿܽܘܢ ܡܶܢ ܐܰܠܳܗܳܐ܃ ܘܠܳܐ ܗܘܰܝܬܿܽܘܢ ܕܢܰܦܼܫܟܼܽܘܢ܃
06:20 [ai]ܐܶܙܕܿܒܼܶܢܬܿܽܘܢ ܓܶܝܪ ܒܰܕܼܡܰܝܳܐ̈܂ ܗܘܰܝܬܿܽܘܢ ܗܳܟܼܺܝܠ ܡܫܰܒܿܚܺܝܢ ܠܰܐܠܳܗܳܐ ܒܦܰܓܼܪܟܼܽܘܢ ܘܰܒܪܽܘܚܟܼܽܘܢ܃ ܗܳܢܽܘܢ ܕܺܐܝܬܼܰܝܗܽܘܢ ܕܰܐܠܳܗܳܐ ܿ܀ܿ܀ܿ

next chapter