← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62046: 1Cor

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


07:01 [ai]ܥܰܠ ܐܰܝܠܶܝܢ ܕܰܟܼܬܼܰܒܼܬܿܽܘܢ ܠܺܝ ܕܶܝܢ܃ ܫܰܦܿܺܝܪ ܗ̱ܽܘ ܠܓܼܰܒܼܪܳܐ ܕܠܰܐܢ̱ܬܿܬܼܳܐ ܠܳܐ ܢܶܬܼܩܰܪܰܒܼ܂
07:02 [ai]ܐܶܠܳܐ ܡܶܛܽܠ ܙܳܢܝܽܘܬܼܳܐ܃ ܐ̱ܢܳܫ ܐܰܢ̱ܬܿܬܼܶܗ ܢܶܐܚܽܘܕܼ܃ ܘܰܐܢ̱ܬܿܬܼܳܐ ܠܒܼܰܥܠܳܗ ܬܶܐܚܽܘܕܼ܂
07:03 [ai]ܓܰܒܼܪܳܐ ܠܰܐܢ̱ܬܿܬܼܶܗ ܚܽܘܒܿܳܐ ܕܡܶܬܿܬܿܚܺܝܒܼ ܢܶܦܼܪܽܘܥ܂ ܗܳܟܼܰܢܳܐ ܐܳܦܼ ܗܺܝ ܐܰܢ̱ܬܿܬܼܳܐ ܠܒܼܰܥܠܳܗ܂
07:04 [ai]ܐܰܢ̱ܬܿܬܼܳܐ ܠܳܐ ܫܰܠܺܝܛܳܐ ܥܰܠ ܦܰܓܼܪܳܗ܃ ܐܶܠܳܐ ܒܰܥܠܳܗ܂ ܗܳܟܼܰܢܳܐ ܐܳܦܼ ܓܰܒܼܪܳܐ ܠܳܐ ܫܰܠܺܝܛ ܥܰܠ ܦܰܓܼܪܶܗ܃ ܐܶܠܳܐ ܐܰܢ̱ܬܿܬܼܶܗ܂
07:05 [ai]ܠܳܐ ܗܳܟܼܺܝܠ ܬܶܓܼܠܙܽܘܢ ܚܰܕܼ ܠܚܰܕܼ܃ ܐܶܠܳܐ ܐܶܡܰܬܼܝ ܕܿܰܬܼܪ̈ܰܝܟܿܽܘܢ ܬܶܫܬܿܘܽܘܢ ܒܰܙܒܼܰܢ܃ ܕܬܶܬܼܥܢܽܘܢ ܠܨܰܘܡܳܐ ܘܠܰܨܠܽܘܬܼܳܐ܃ ܘܬܼܽܘܒܼ ܠܳܗ ܠܰܨܒܼܽܘܬܼܳܐ ܬܶܬܼܦܿܢܽܘܢ܂ ܕܠܳܐ ܢܢܰܣܶܝܟܼܽܘܢ ܣܳܛܳܢܳܐ ܡܶܛܽܠ ܪܶܓܿܬܼܳܐ ܕܦܰܓܼܪܟܼܽܘܢ܂
07:06 [ai]ܗܳܕܼܶܐ ܕܶܝܢ ܐܳܡܰܪ ܐ̱ܢܳܐ ܐܰܝܟܼ ܕܠܰܡܚܺܝܠܶܐ̈܃ ܠܰܘ ܡܶܢ ܦܽܘܩܕܳܢܳܐ܂
07:07 [ai]ܐܶܢܳܐ ܓܶܝܪ ܨܳܒܼܶܐ ܐ̱ܢܳܐ܂ ܕܟܽܠܗܽܘܢ ܒܢܰܝܢܳܫܳܐ ܐܰܟܼܘܳܬܼܝ ܢܶܗܘܽܘܢ ܒܕܰܟܼܝܽܘܬܼܳܐ܂ ܐܶܠܳܐ ܟܽܠܢܳܫ ܡܰܘܗܰܒܼܬܳܐ ܺܝܗܺܝܒܼܳܐ ܠܶܗ ܡܶܢ ܐܰܠܳܗܳܐ܃ ܐܺܝܬܼ ܕܗܳܟܼܰܢܳܐ܂ ܘܺܐܝܬܼ ܕܗܳܟܼܰܢܳܐ܂
07:08 [ai]ܐܳܡܰܪ ܐ̱ܢܳܐ ܕܶܝܢ ܠܰܐܝܠܶܝܢ ܕܠܰܝܬܿ ܠܗܽܘܢ ܢܶܫܶܐ̈܂ ܘܠܰܐܪ̈ܡܠܳܬܼܳܐ܃ ܕܦܰܩܳܚ ܠܗܽܘܢ ܐܶܢ ܢܩܰܘܽܘܢ ܐܰܟܼܘܳܬܼܝ܂
07:09 [ai]ܐܶܢ ܠܳܐ ܕܶܝܢ ܡܣܰܝܒܿܪܺܝܢ܂ ܢܶܙܕܿܰܘܓܼܽܘܢ܂ ܦܰܩܳܚ ܓܶܝܪ ܠܡܶܣܰܒܼ ܐܰܢ̱ܬܿܬܼܳܐ ܛܳܒܼ ܡܶܢ ܕܰܠܡܺܐܩܰܕܼ ܒܪܶܓܿܬܼܳܐ܂
07:10 [ai]ܠܰܐܝܠܶܝܢ ܕܶܝܢ ܕܺܐܝܬܼ ܠܗܽܘܢ ܢܶܫܶܐ̈܂ ܡܦܼܰܩܶܕܼ ܐ̱ܢܳܐ܃ ܠܳܐ ܐܶܢܳܐ ܐܶܠܳܐ ܡܳܪܝ܃ ܕܰܐܢ̱ܬܿܬܼܳܐ ܡܶܢ ܒܰܥܠܳܗ ܠܳܐ ܬܶܦܼܪܽܘܫ܂
07:11 [ai]ܘܶܐܢ ܬܶܦܼܪܽܘܫ܃ ܬܩܰܘܶܐ ܕܠܳܐ ܓܰܒܼܪܳܐ܂ ܐܰܘ ܠܒܼܰܥܠܳܗ ܬܶܬܼܪܰܥܶܐ܂ ܘܓܼܰܒܼܪܳܐ ܠܰܐܢ̱ܬܿܬܼܶܗ ܠܳܐ ܢܶܫܒܿܽܘܩ܂
07:12 [ai]ܠܫܰܪܟܿܳܐ ܕܶܝܢ ܐܳܡܰܪ ܐ̱ܢܳܐ܂ ܐܶܢܳܐ܂ ܠܳܐ ܡܳܪܝ܂ ܐܶܢ ܐܺܝܬܼ ܐܰܚܳܐ ܕܺܐܝܬܼ ܠܶܗ ܐܰܢ̱ܬܿܬܼܳܐ ܕܠܳܐ ܡܗܰܝܡܢܳܐ܃ ܘܗܺܝ ܨܳܒܼܝܳܐ ܕܬܶܥܡܰܪ ܥܰܡܶܗ܃ ܠܳܐ ܢܶܫܒܿܩܺܝܗ܂
07:13 [ai]ܘܰܐܢ̱ܬܿܬܼܳܐ܂ ܐܰܝܕܼܳܐ ܕܺܐܝܬܼ ܠܳܗ ܒܰܥܠܳܐ ܕܠܳܐ ܡܗܰܝܡܶܢ܃ ܘܗܽܘ ܨܳܒܼܶܐ ܕܢܶܥܡܰܪ ܥܰܡܳܗ܃ ܠܳܐ ܬܶܫܒܿܽܘܩ ܒܰܥܠܳܗ܂
07:14 [ai]ܡܩܰܕܿܰܫ ܗ̱ܽܘ ܓܶܝܪ ܓܰܒܼܪܳܐ܂ ܐܰܝܢܳܐ ܕܠܳܐ ܡܗܰܝܡܶܢ܂ ܒܰܐܢ̱ܬܿܬܼܳܐ ܕܰܡܗܰܝܡܢܳܐ܂ ܘܰܡܩܰܕܿܫܳܐ ܗ̱ܝ ܐܰܢ̱ܬܿܬܼܳܐ܂ ܐܰܝܕܼܳܐ ܕܠܳܐ ܡܗܰܝܡܢܳܐ܂ ܒܓܰܒܼܪܳܐ ܕܰܡܗܰܝܡܶܢ܂ ܘܶܐܢ ܠܳܐ܃ ܒܢܰܝܗܽܘܢ ܛܰܡܺܐܝܢ ܐܶܢܽܘܢ܂ ܗܳܫܳܐ ܕܶܝܢ ܕܟܶܝܢ ܐܶܢܽܘܢ܂
07:15 [ai]ܐܶܢ ܕܶܝܢ ܗܰܘ ܕܠܳܐ ܡܗܰܝܡܶܢ ܦܳܪܶܫ܂ ܢܶܦܼܪܽܘܫ܂ ܠܳܐ ܡܫܰܥܒܿܰܕܼ ܐܰܚܳܐ ܐܰܘ ܚܳܬܼܳܐ ܒܗܳܠܶܝܢ܂ ܠܰܫܠܳܡܳܐ ܗܽܘ ܩܪܳܢ ܐܰܠܳܗܳܐ܂
07:16 [ai]ܡܳܢܳܐ ܓܶܝܪ ܝܳܕܼܥܳܐ ܐܰܢ̱ܬܿܝ ܐܰܢ̱ܬܿܬܼܳܐ܃ ܐܶܢ ܠܒܼܰܥܠܶܟܼܝ ܬܰܚܶܝܢ܂ ܐܰܘ ܐܰܢ̱ܬܿ ܓܰܒܼܪܳܐ ܝܳܕܼܰܥ ܐܰܢ̱ܬܿ܃ ܐܶܢ ܠܰܐܢ̱ܬܿܬܼܳܟܼ ܬܰܚܶܐ܃
07:17 [ai]ܐܶܠܳܐ ܐ̱ܢܳܫ ܐ̱ܢܳܫ ܐܰܝܟܼ ܕܰܦܼܠܰܓܼ ܠܶܗ ܡܳܪܝܳܐ܃ ܘܐ̱ܢܳܫ ܐܰܝܟܼ ܕܰܩܪܳܝܗ̱ܝ ܐܰܠܳܗܳܐ܃ ܗܳܟܼܰܢܳܐ ܢܗܰܠܶܟܼ܂ ܘܳܐܦܼ ܠܟܼܽܠܗܶܝܢ ܥܺܕܼܳܬܼܳܐ̈ ܗܳܟܼܰܢܳܐ ܡܦܼܰܩܶܕܼ ܐ̱ܢܳܐ܀
07:18 [ai]ܐܶܢ ܟܰܕܼ ܓܙܺܝܪ ܐ̱ܢܳܫ ܐܶܬܼܩܪܺܝ܃ ܠܳܐ ܢܶܗܦܿܽܘܟܼ ܠܶܗ ܠܥܽܘܪܠܽܘܬܼܳܐ܂ ܘܶܐܢ ܒܥܽܘܪܠܽܘܬܼܳܐ ܐܶܬܼܩܪܺܝ܃ ܠܳܐ ܢܶܓܼܙܽܘܪ܂
07:19 [ai]ܓܙܽܘܪܬܳܐ ܓܶܝܪ ܠܳܐ ܗ̱ܘܳܬܼ ܡܶܕܶܡ܃ ܐܳܦܼ ܠܳܐ ܥܽܘܪܠܽܘܬܼܳܐ܂ ܐܶܠܳܐ ܢܛܽܘܪ̈ܳܬܼܳܐ ܕܦܽܘܩܕܳܢܰܘܗ̱ܝ̈ ܕܰܐܠܳܗܳܐ܂
07:20 [ai]ܟܽܠܢܳܫ ܒܩܶܪܝܳܢܳܐ ܕܶܐܬܼܩܪܺܝ܂ ܒܶܗ ܢܩܰܘܶܐ܂
07:21 [ai]ܐܶܢ ܥܰܒܼܕܿܳܐ ܐܶܬܼܩܪܺܝܬܿ܃ ܠܳܐ ܢܶܬܼܒܿܛܶܠ ܠܳܟܼ܂ ܐܶܠܳܐ ܐܳܦܼܶܢ ܡܶܫܟܿܰܚ ܐܰܢ̱ܬܿ ܠܡܶܬܼܚܰܪܳܪܽܘ܃ ܓܒܼܺܝ ܠܳܟܼ ܕܬܶܦܼܠܽܘܚ܂
07:22 [ai]ܐܰܝܢܳܐ ܓܶܝܪ ܕܥܰܒܼܕܿܳܐ ܐܶܬܼܩܪܺܝ ܒܡܳܪܰܢ܃ ܡܚܰܪܪܳܐ ܗܽܘ ܕܰܐܠܳܗܳܐ܂ ܗܳܟܼܰܢܳܐ ܐܳܦܼ ܐܰܝܢܳܐ ܕܒܰܪ ܚܺܐܪ̈ܶܐ ܐܶܬܼܩܪܺܝ܃ ܥܰܒܼܕܿܳܐ ܗܽܘ ܕܰܡܫܺܝܚܳܐ܂
07:23 [ai]ܒܰܕܼܡܰܝܳܐ̈ ܐܶܙܕܿܒܼܶܢܬܿܽܘܢ܂ ܠܳܐ ܬܶܗܘܽܘܢ ܥܰܒܼܕܿܶܐ̈ ܕܿܰܒܼܢܰܝܢܳܫܳܐ܂
07:24 [ai]ܟܽܠܢܳܫ ܒܡܶܕܶܡ ܕܶܐܬܼܩܪܺܝ ܐܰܚܰܝ̈܃ ܒܶܗ ܢܩܰܘܶܐ ܠܘܳܬܼ ܐܰܠܳܗܳܐ܀
07:25 [ai]ܥܰܠ ܒܬܽܘܠܽܘܬܼܳܐ ܕܶܝܢ܃ ܦܽܘܩܕܳܢܳܐ ܡܶܢ ܐܰܠܳܗܳܐ ܠܳܐ ܐܰܚܺܝܕܼ ܐ̱ܢܳܐ܂ ܡܶܠܟܿܳܐ ܕܶܝܢ ܝܳܗܶܒܼ ܐ̱ܢܳܐ܃ ܐܰܝܟܼ ܓܰܒܼܪܳܐ ܕܶܐܬܼܚܰܢܢܶܬܼ ܡܶܢ ܐܰܠܳܗܳܐ ܕܶܐܗܘܶܐ ܡܗܰܝܡܰܢ܂
07:26 [ai]ܘܣܳܒܼܰܪ ܐ̱ܢܳܐ ܕܗܳܕܼܶܐ ܫܰܦܿܺܝܪܳܐ܃ ܡܶܛܽܠ ܐܰܢܰܢܩܺܐ ܕܙܰܒܼܢܳܐ܃ ܕܦܰܩܳܚ ܠܶܗ ܠܒܼܰܪܢܳܫܳܐ܂ ܕܗܳܟܼܰܢܳܐ ܢܶܗܘܶܐ܂
07:27 [ai]ܐܰܣܺܝܪ ܐܰܢ̱ܬܿ ܒܰܐܢ̱ܬܿܬܼܳܐ܃ ܠܳܐ ܬܶܒܼܥܶܐ ܫܪܳܝܳܐ܂ ܫܪܶܐ ܐܰܢ̱ܬܿ ܡܶܢ ܐܰܢ̱ܬܿܬܼܳܐ܃ ܠܳܐ ܬܶܒܼܥܶܐ ܐܰܢ̱ܬܿܬܼܳܐ܂
07:28 [ai]ܘܶܐܢ ܬܶܣܰܒܼ ܐܰܢ̱ܬܿܬܼܳܐ ܠܳܐ ܚܳܛܶܐ ܐܰܢ̱ܬܿ܃ ܘܶܐܢ ܒܬܽܘܠܬܳܐ ܬܶܗܘܶܐ ܠܓܼܰܒܼܪܳܐ ܠܳܐ ܚܳܛܝܳܐ܃ ܐܽܘܠܨܳܢܳܐ ܕܶܝܢ ܒܰܦܼܓܼܰܪ ܗܳܘܶܐ ܠܰܐܝܠܶܝܢ ܕܗܳܟܼܰܢܳܐ ܐܶܢܽܘܢ܂ ܐܶܢܳܐ ܕܶܝܢ ܥܠܰܝܟܿܽܘܢ ܚܳܐܶܣ ܐ̱ܢܳܐ܂
07:29 [ai]ܘܗܳܕܼܶܐ ܐܳܡܰܪ ܐ̱ܢܳܐ ܐܰܚܰܝ̈܂ ܕܙܰܒܼܢܳܐ ܡܶܟܿܺܝܠ ܐܶܙܕܿܰܠܗܰܙ ܠܶܗ܂ ܕܰܐܝܠܶܝܢ ܕܺܐܝܬܼ ܠܗܽܘܢ ܢܶܫܶܐ̈܃ ܢܶܗܘܽܘܢ ܐܰܝܟܼ ܕܠܰܝܬܿ ܠܗܽܘܢ܂
07:30 [ai]ܘܰܐܝܠܶܝܢ ܕܒܳܟܼܶܝܢ܃ ܐܰܝܟܼ ܠܳܐ ܒܳܟܼܶܝܢ܂ ܘܰܐܝܠܶܝܢ ܕܚܳܕܼܶܝܢ܃ ܐܰܝܟܼ ܠܳܐ ܚܳܕܼܶܝܢ܂ ܘܰܐܝܠܶܝܢ ܕܙܳܒܼܢܺܝܢ܃ ܐܰܝܟܼ ܠܳܐ ܡܩܰܕܶܝܢ܂
07:31 [ai]ܘܰܐܝܠܶܝܢ ܕܡܶܬܼܚܰܫܚܺܝܢ ܒܥܳܠܡܳܐ ܗܳܢܳܐ܃ ܠܳܐ ܠܒܼܰܪ ܡܶܢ ܙܶܕܼܩܳܐ ܕܰܚܫܰܚܬܼܳܐ܂ ܥܳܒܼܰܪ ܠܶܗ ܓܶܝܪ ܐܶܣܟܿܺܡܶܗ ܕܥܳܠܡܳܐ ܗܳܢܳܐ܂
07:32 [ai]ܡܶܛܽܠ ܗܳܢܳܐ ܨܳܒܼܶܐ ܐ̱ܢܳܐ ܕܰܕܼܠܳܐ ܨܶܦܼܬܼܳܐ ܬܶܗܘܽܘܢ܂ ܐܰܝܢܳܐ ܓܶܝܪ ܕܠܰܝܬܿ ܠܶܗ ܐܰܢ̱ܬܿܬܼܳܐ܃ ܪܳܢܶܐ ܒܰܕܼܡܳܪܶܗ܂ ܕܰܐܝܟܿܰܢܳܐ ܢܶܫܦܿܰܪ ܠܡܳܪܶܗ܂
07:33 [ai]ܘܰܐܝܢܳܐ ܕܺܐܝܬܼ ܠܶܗ ܐܰܢ̱ܬܿܬܼܳܐ܃ ܝܳܨܶܦܼ ܕܥܳܠܡܳܐ܂ ܕܰܐܝܟܿܰܢܳܐ ܢܶܫܦܿܰܪ ܠܰܐܢ̱ܬܿܬܼܶܗ܂
07:34 [ai]ܦܽܘܪܫܳܢܳܐ ܕܶܝܢ ܐܺܝܬܼ ܐܳܦܼ ܒܰܝܢܳܬܼ ܐܰܢ̱ܬܿܬܼܳܐ ܠܰܒܼܬܼܽܘܠܬܳܐ܂ ܐܰܝܕܼܳܐ ܕܰܠܓܼܰܒܼܪܳܐ ܠܳܐ ܗܘܳܬܼ܃ ܪܳܢܝܳܐ ܒܡܳܪܳܗ܃ ܕܬܶܗܘܶܐ ܩܰܕܿܺܝܫܳܐ ܒܦܰܓܼܪܳܗ ܘܰܒܪܽܘܚܳܗ܂ ܘܰܐܝܕܼܳܐ ܕܺܐܝܬܼ ܠܳܗ ܒܰܥܠܳܐ܃ ܪܳܢܝܳܐ ܕܥܳܠܡܳܐ܃ ܕܰܐܝܟܿܰܢܳܐ ܬܶܫܦܿܰܪ ܠܒܼܰܥܠܳܗ܂
07:35 [ai]ܗܳܕܼܶܐ ܕܶܝܢ ܠܥܽܘܕܼܪܳܢܟܼܽܘܢ ܗ̱ܽܘ ܕܺܝܠܟܼܽܘܢ ܐܳܡܰܪ ܐ̱ܢܳܐ܂ ܠܳܐ ܗ̱ܘܳܐ ܡܰܚܢܽܘܩܺܝܬܼܳܐ ܪܳܡܶܐ ܐ̱ܢܳܐ ܠܟܼܽܘܢ܃ ܐܶܠܳܐ ܕܬܶܗܘܽܘܢ ܐܰܡܺܝܢܺܝܢ ܠܘܳܬܼ ܡܳܪܟܼܽܘܢ ܒܶܐܣܟܿܺܡܳܐ ܫܰܦܿܺܝܪܳܐ܃ ܟܰܕܼ ܠܳܐ ܪܳܢܶܝܢ ܐܢ̱ܬܿܽܘܢ ܒܥܳܠܡܳܐ܂
07:36 [ai]ܐܶܢ ܐ̱ܢܳܫ ܕܶܝܢ ܣܳܒܼܰܪ ܕܡܶܬܼܒܿܰܙܰܚ ܒܰܒܼܬܼܽܘܠܬܿܶܗ܃ ܕܰܥܒܼܰܪ ܙܰܒܼܢܳܗ܂ ܘܠܳܐ ܝܰܗܒܿܳܗ ܠܓܼܰܒܼܪܳܐ܃ ܘܘܳܠܝܳܐ ܕܢܶܬܿܠܺܝܗ܃ ܐܰܝܟܼ ܕܨܳܒܼܶܐ ܢܶܥܒܿܶܕܼ܂ ܠܳܐ ܚܳܛܶܐ܂ ܬܶܙܕܿܰܘܰܓܼ܂
07:37 [ai]ܐܰܝܢܳܐ ܕܶܝܢ ܕܫܰܪܺܝܪܳܐܺܝܬܼ ܦܣܰܩ ܒܪܶܥܝܳܢܶܗ܃ ܘܠܳܐ ܐܳܠܨܳܐ ܠܶܗ ܨܒܼܽܘܬܼܳܐ܃ ܘܫܰܠܺܝܛ ܥܰܠ ܨܶܒܼܝܳܢܶܗ܃ ܘܗܳܟܼܰܢܳܐ ܕܳܢ ܒܿܠܶܒܶܗ܂ ܕܢܶܛܰܪ ܒܬܽܘܠܬܿܶܗ܃ ܫܰܦܿܺܝܪ ܥܳܒܼܶܕܼ܂
07:38 [ai]ܘܰܐܝܢܳܐ ܗܳܟܼܺܝܠ ܕܝܳܗܶܒܼ ܒܬܽܘܠܬܿܶܗ܃ ܫܰܦܿܺܝܪ ܥܳܒܼܶܕܼ܂ ܘܰܐܝܢܳܐ ܕܠܳܐ ܝܳܗܶܒܼ ܒܬܽܘܠܬܿܶܗ܃ ܝܰܬܿܺܝܪܳܐܺܝܬܼ ܫܰܦܿܺܝܪ ܥܳܒܼܶܕܼ܀
07:39 [ai]ܐܰܢ̱ܬܿܬܼܳܐ ܟܡܳܐ ܕܚܰܝ ܒܰܥܠܳܗ܃ ܐܰܣܺܝܪܳܐ ܗ̱ܝ ܒܢܳܡܽܘܣܳܐ܂ ܐܶܢ ܕܶܝܢ ܢܶܕܼܡܰܟܼ ܒܰܥܠܳܗ܃ ܡܚܰܪܪܳܐ ܗ̱ܝ ܕܬܶܗܘܶܐ ܠܡܰܢ ܕܨܳܒܼܝܳܐ܂ ܒܰܠܚܽܘܕܼ ܒܡܳܪܰܢ܂
07:40 [ai]ܛܽܘܒܼܶܝܗ ܕܶܝܢ܂ ܐܶܢ ܗܳܟܼܰܢܳܐ ܬܩܰܘܶܐ ܐܰܝܟܼ ܪܶܥܝܳܢܝ ܕܺܝܠܝ܂ ܣܳܒܼܰܪ ܐ̱ܢܳܐ ܕܶܝܢ ܐܳܦܼ ܐܶܢܳܐ܃ ܕܪܽܘܚܳܐ ܕܰܐܠܳܗܳܐ ܐܺܝܬܼ ܒܺܝ ܿ܀ܿ܀ܿ

next chapter