← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62046: 1Cor

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


09:01 [ai]ܠܡܳܐ ܠܳܐ ܗ̱ܘܺܝܬܼ ܒܰܪ ܚܺܐܪ̈ܶܐ܂ ܐܰܘ ܠܳܐ ܗ̱ܘܺܝܬܼ ܫܠܺܝܚܳܐ܂ ܐܰܘ ܠܝܶܫܽܘܥ ܡܫܺܝܚܳܐ ܡܳܪܰܢ ܠܳܐ ܚܙܺܝܬܼ܂ ܐܰܘ ܠܳܐ ܗ̱ܘܰܝܬܿܽܘܢ ܥܒܼܳܕܼܝ ܒܡܳܪܝ܃
09:02 [ai]ܘܶܐܢ ܠܰܐ̱ܚܪ̈ܳܢܶܐ ܠܳܐ ܗ̱ܘܺܝܬܼ ܫܠܺܝܚܳܐ܃ ܐܶܠܳܐ ܠܟܼܽܘܢ ܐܺܝܬܼܰܝ܂ ܘܚܳܬܼܡܳܐ ܕܰܫܠܺܝܚܽܘܬܼܝ ܐܰܢ̱ܬܿܽܘܢ ܐܶܢܽܘܢ܂
09:03 [ai]ܘܡܰܦܿܰܩ ܒܪܽܘܚܝ ܠܰܐܝܠܶܝܢ ܕܕܼܳܝܢܺܝܢ ܠܺܝ܂ ܗܳܢܰܘ܂
09:04 [ai]ܠܡܳܐ ܠܳܐ ܫܰܠܺܝܛ ܠܰܢ ܠܡܶܐܟܼܰܠ ܘܰܠܡܶܫܬܳܐ܂
09:05 [ai]ܘܰܠܡܳܐ ܠܳܐ ܫܰܠܺܝܛ ܠܰܢ ܚܳܬܼܳܐ ܐܰܢ̱ܬܿܬܼܳܐ ܠܡܰܟܼܪܳܟܼܽܘ ܥܰܡܰܢ܃ ܐܰܝܟܼ ܫܰܪܟܿܳܐ ܕܰܫܠܺܝܚܶܐ̈܃ ܘܰܐܝܟܼ ܐܰܚܰܘܗ̱ܝ̈ ܕܡܳܪܰܢ܂ ܘܰܐܝܟܼ ܟܺܐܦܼܳܐ܂
09:06 [ai]ܐܰܘ ܐܶܢܳܐ ܒܰܠܚܽܘܕܼ ܘܒܼܰܪܢܰܒܼܰܐ܂ ܠܰܝܬܿ ܠܰܢ ܫܽܘܠܛܳܢܳܐ ܕܠܳܐ ܢܶܦܼܠܽܘܚ܃
09:07 [ai]ܡܰܢܽܘ ܕܡܰܦܼܠܰܚ ܒܦܳܠܚܽܘܬܼܳܐ ܒܢܰܦܼܩܳܬܼܳܐ̈ ܕܢܰܦܼܫܶܗ܂ ܐܰܘ ܡܰܢܽܘ ܕܢܳܨܶܒܼ ܟܰܪܡܳܐ܃ ܘܡܶܢ ܦܿܺܐܪ̈ܰܘܗ̱ܝ ܠܳܐ ܐܳܟܼܶܠ܂ ܐܰܘ ܡܰܢܽܘ ܕܪܳܥܶܐ ܥܢܳܐ܃ ܘܡܶܢ ܚܰܠܒܼܳܐ ܕܡܰܪܥܺܝܬܼܶܗ ܠܳܐ ܐܳܟܼܶܠ܂
09:08 [ai]ܕܰܠܡܳܐ ܐܰܝܟܼ ܒܰܪܢܳܫܳܐ ܗܳܠܶܝܢ ܐܳܡܰܪ ܐ̱ܢܳܐ܂ ܗܳܐ ܐܳܦܼ ܢܳܡܽܘܣܳܐ ܗܳܠܶܝܢ ܐܶܡܰܪ܂
09:09 [ai]ܟܬܼܺܝܒܼ ܓܶܝܪ ܒܶܗ ܒܢܳܡܽܘܣܳܐ ܕܡܽܘܫܶܐ܃ ܕܠܳܐ ܬܶܒܼܠܽܘܡ ܬܰܘܪܳܐ ܕܡܰܕܼܪܶܟܼ܂ ܠܡܳܐ ܥܰܠ ܬܰܘܪ̈ܶܐ ܒܛܺܝܠ ܠܶܗ ܠܰܐܠܳܗܳܐ܂
09:10 [ai]ܐܶܠܳܐ ܺܝܕܼܺܝܥܳܐ ܕܡܶܛܽܠܳܬܼܰܢ ܗ̱ܽܘ ܐܶܡܰܪ܃ ܘܡܶܛܽܠܳܬܼܰܢ ܓܶܝܪ ܐܶܬܼܟܿܰܬܼܒܿܰܬܼ܃ ܡܶܛܽܠ ܕܥܰܠ ܣܰܒܼܪܳܐ ܗܽܘ ܘܳܠܶܐ ܠܶܗ ܠܟܼܳܪܽܘܒܼܳܐ ܕܢܶܟܼܪܽܘܒܼ܃ ܘܰܐܝܢܳܐ ܕܡܰܕܼܪܶܟܼ ܥܰܠ ܣܰܒܼܪܳܐ ܕܰܥܠܰܠܬܼܳܐ܂
09:11 [ai]ܐܶܢ ܚܢܰܢ ܕܪܽܘܚܳܐ ܙܪܰܥܢ ܒܟܽܘܢ܃ ܪܰܒܿܳܐ ܗ̱ܝ ܐܶܢ ܚܢܰܢ ܡܶܢܟܼܽܘܢ ܕܦܰܓܼܪܳܐ ܢܶܚܨܽܘܕܼ܃
09:12 [ai]ܘܶܐܢ ܠܰܐ̱ܚܪ̈ܳܢܶܐ ܐܺܝܬܼ ܠܗܽܘܢ ܫܽܘܠܛܳܢܳܐ ܥܠܰܝܟܿܽܘܢ܃ ܠܳܐ ܠܰܢ ܘܳܠܶܐ ܝܰܬܿܺܝܪܳܐܺܝܬܼ܃ ܐܶܠܳܐ ܠܳܐ ܐܶܬܼܚܰܫܰܚܢ ܒܫܽܘܠܛܳܢܳܐ ܗܳܢܳܐ܂ ܐܶܠܳܐ ܟܽܠܡܶܕܶܡ ܡܣܰܝܒܿܪܺܝܢܰܢ܃ ܕܰܒܼܡܶܕܶܡ ܠܳܐ ܢܬܼܰܟܿܶܣ ܣܒܼܰܪܬܼܶܗ ܕܰܡܫܺܝܚܳܐ܀
09:13 [ai]ܠܳܐ ܝܳܕܼܥܺܝܢ ܐܢ̱ܬܿܽܘܢ܃ ܕܰܐܝܠܶܝܢ ܕܒܶܝܬܼ ܩܽܘܕܼܫܳܐ ܦܳܠܚܺܝܢ܃ ܡܶܢ ܒܶܝܬܼ ܩܽܘܕܼܫܳܐ ܡܶܣܬܿܰܝܒܿܪܺܝܢ܂ ܘܰܐܝܠܶܝܢ ܕܰܠܡܰܕܼܒܿܚܳܐ ܦܳܠܚܺܝܢ܃ ܥܰܡ ܡܰܕܼܒܿܚܳܐ ܦܳܠܓܿܺܝܢ܂
09:14 [ai]ܗܳܟܼܰܢܳܐ ܐܳܦܼ ܡܳܪܰܢ ܦܰܩܶܕܼ܃ ܕܰܐܝܠܶܝܢ ܕܰܣܒܼܰܪܬܼܶܗ ܡܰܟܼܪܙܺܝܢ܃ ܡܶܢ ܣܒܼܰܪܬܼܶܗ ܢܺܚܽܘܢ܂
09:15 [ai]ܐܶܢܳܐ ܕܶܝܢ ܠܳܐ ܐܶܬܼܚܰܫܚܶܬܼ ܒܰܚܕܼܳܐ ܡܶܢ ܗܳܠܶܝܢ܂ ܘܠܰܘ ܡܶܛܽܠ ܗܳܕܼܶܐ ܟܶܬܼܒܿܶܬܼ܃ ܕܗܳܟܼܰܢܳܐ ܢܶܗܘܶܐ ܠܺܝ܂ ܦܰܩܳܚ ܠܺܝ ܓܶܝܪ ܕܰܡܡܳܬܼ ܐܶܡܽܘܬܼ܃ ܘܠܳܐ ܕܐ̱ܢܳܫ ܫܽܘܒܼܗܳܪܝ ܢܣܰܪܶܩ܂
09:16 [ai]ܐܳܦܼ ܕܰܡܣܰܒܰܪ ܐ̱ܢܳܐ ܓܶܝܪ܃ ܠܰܝܬܿ ܠܺܝ ܫܽܘܒܼܗܳܪܳܐ܂ ܩܛܺܝܪܳܐ ܓܶܝܪ ܣܺܝܡ ܥܠܰܝ܂ ܘܳܝ ܠܺܝ ܕܶܝܢ܃ ܐܶܠܳܐ ܐܶܣܰܒܰܪ܂
09:17 [ai]ܐܶܢ ܓܶܝܪ ܒܨܶܒܼܝܳܢܝ ܗܳܕܼܶܐ ܣܳܥܰܪ ܐ̱ܢܳܐ܃ ܐܰܓܼܪܳܐ ܐܺܝܬܼ ܠܺܝ܂ ܐܶܢ ܕܶܝܢ ܕܠܳܐ ܒܨܶܒܼܝܳܢܝ܃ ܪܰܒܿܰܬܼ ܒܰܝܬܿܽܘܬܼܳܐ ܗܽܘ ܡܗܰܝܡܰܢ ܐ̱ܢܳܐ܂
09:18 [ai]ܐܰܝܢܳܐ ܗܽܘ ܗܳܟܼܺܝܠ ܐܰܓܼܪܝ܃ ܕܟܰܕܼ ܡܣܰܒܰܪ ܐ̱ܢܳܐ܃ ܕܠܳܐ ܢܦܼܰܩܬܼܳܐ ܐܶܥܒܿܕܼܺܝܗ ܠܰܣܒܼܰܪܬܼܶܗ ܕܰܡܫܺܝܚܳܐ܂ ܘܠܳܐ ܐܶܬܼܚܰܫܰܚ ܒܫܽܘܠܛܳܢܳܐ܂ ܕܝܰܗ̱ܒܼ ܠܺܝ ܒܶܐܘܰܢܓܿܶܠܺܝܳܘܢ܂
09:19 [ai]ܟܰܕܼ ܡܚܰܪܰܪ ܐ̱ܢܳܐ ܓܶܝܪ ܡܶܢ ܟܽܠܗܶܝܢ܂ ܠܟܼܽܠܢܳܫ ܫܰܥܒܿܕܼܶܬܼ ܢܰܦܼܫܝ܃ ܕܰܠܣܰܓܿܺܝܶܐܐ̈ ܐܺܬܼܰܪ܂
09:20 [ai]ܘܰܗܘܺܝܬܼ ܥܰܡ ܺܝܗܽܘܕܼܳܝܶܐ̈ ܐܰܝܟܼ ܺܝܗܽܘܕܼܳܝܳܐ܃ ܕܠܺܝܗܽܘܕܼܳܝܶܐ̈ ܐܺܬܼܰܪ܂ ܘܥܰܡ ܕܰܬܼܚܶܝܬܼ ܢܳܡܽܘܣܳܐ ܐܶܢܽܘܢ܃ ܗܘܺܝܬܼ ܐܰܝܟܼ ܕܰܬܼܚܶܝܬܼ ܢܳܡܽܘܣܳܐ܃ ܕܠܰܐܝܠܶܝܢ ܕܰܬܼܚܶܝܬܼ ܢܳܡܽܘܣܳܐ ܐܶܢܽܘܢ ܐܺܬܼܰܪ܂
09:21 [ai]ܘܠܰܐܝܠܶܝܢ ܕܢܳܡܽܘܣܳܐ ܠܰܝܬܿ ܠܗܽܘܢ܃ ܗܘܺܝܬܼ ܐܰܝܟܼ ܕܠܳܐ ܢܳܡܽܘܣ܃ ܟܰܕܼ ܠܳܐ ܐܺܝܬܼܰܝ ܠܰܐܠܳܗܳܐ ܕܠܳܐ ܢܳܡܽܘܣ܃ ܐܶܠܳܐ ܒܢܳܡܽܘܣܶܗ ܕܰܡܫܺܝܚܳܐ܃ ܕܳܐܦܼ ܠܗܳܢܽܘܢ ܕܰܕܼܠܳܐ ܢܳܡܽܘܣ܂ ܐܶܢܽܘܢ ܐܺܬܼܰܪ܂
09:22 [ai]ܗܘܺܝܬܼ ܥܰܡ ܟܿܪ̈ܺܝܗܶܐ ܐܰܝܟܼ ܟܪܺܝܗܳܐ܃ ܕܿܠܰܟܼܪ̈ܺܝܗܶܐ ܐܺܬܼܰܪ܂ ܠܟܼܽܠܢܳܫ ܟܽܠ ܗܘܺܝܬܼ܃ ܕܰܠܟܼܽܠܢܳܫ ܐܰܚܶܐ܂
09:23 [ai]ܗܳܕܼܶܐ ܕܶܝܢ ܥܳܒܼܶܕܼ ܐ̱ܢܳܐ܃ ܡܶܛܽܠ ܕܶܐܗܘܶܐ ܫܰܘܬܿܳܦܼܳܐ ܠܰܣܒܼܰܪܬܼܳܐ܀
09:24 [ai]ܠܳܐ ܝܳܕܼܥܺܝܢ ܐܢ̱ܬܿܽܘܢ ܕܰܐܝܠܶܝܢ ܕܒܶܐܣܛܰܕܼܺܝܳܘܢ ܪܳܗܛܺܝܢ܃ ܟܽܠܗܽܘܢ ܗ̱ܽܘ ܪܳܗܛܺܝܢ܃ ܐܶܠܳܐ ܚܰܕܼ ܗ̱ܽܘ ܢܳܣܶܒܼ ܠܳܗ ܙܳܟܼܽܘܬܼܳܐ܂ ܗܳܟܼܰܢܳܐ ܗܰܪ̱ܛܘ܂ ܐܰܝܟܼ ܕܬܰܕܼܪܟܼܽܘܢ܂
09:25 [ai]ܟܽܠ ܐ̱ܢܳܫ ܕܶܝܢ ܕܰܐܓܼܽܘܢܳܐ ܥܳܒܼܶܕܼ܃ ܡܶܢ ܟܽܠ ܡܶܕܶܡ ܐܳܚܶܕܼ ܪܶܥܝܳܢܶܗ܂ ܘܗܳܠܶܝܢ ܪܳܗܛܺܝܢ ܕܢܶܣܒܼܽܘܢ ܟܠܺܝܠܳܐ ܕܡܶܬܼܚܰܒܿܰܠ܃ ܚܢܰܢ ܕܶܝܢ ܕܠܳܐ ܡܶܬܼܚܰܒܿܰܠ܂
09:26 [ai]ܐܶܢܳܐ ܗܳܟܼܺܝܠ ܗܳܟܼܰܢܳܐ ܪܳܗܶܛ ܐ̱ܢܳܐ܂ ܠܳܐ ܗ̱ܘܳܐ ܐܰܝܟܼ ܕܥܰܠ ܡܶܕܶܡ ܕܠܳܐ ܺܝܕܼܺܝܥ܂ ܘܗܳܟܼܰܢܳܐ ܡܶܬܼܟܿܰܬܿܰܫ ܐ̱ܢܳܐ܂ ܠܳܐ ܐܰܝܟܼ ܗܰܘ ܕܠܳܐܐܰܪ ܟܳܬܼܶܫ܂
09:27 [ai]ܐܶܠܳܐ ܦܰܓܼܪܝ ܗ̱ܽܘ ܟܳܒܼܶܫ ܐ̱ܢܳܐ ܘܰܡܫܰܥܒܿܶܕܼ ܐ̱ܢܳܐ܃ ܕܕܼܰܠܡܳܐ ܐ̱ܢܳܐ ܕܠܰܐ̱ܚܪ̈ܳܢܶܐ ܐܰܟܼܪܙܶܬܼ܃ ܐܶܢܳܐ ܩܢܽܘܡܝ ܐܶܣܬܠܶܐ ܠܺܝ ܿ܀ܿ܀ܿ

next chapter